التمريض المصري .. ما له وما عليه

[Morial]

أنا مشتغلتش في الحكومة يوم واحد بعد ما خلصت الامتياز

عارف ليه ؟

لأن المقابل اللي هحصل عليه مش هيعوض لحظة معاناة نفسية واحدة هعيشها

فأذا كنت اعيش في مجتمع لا يحترم مهنتي ولا يقدرني ويلقي بسنين طويلة تعبت فيها ودرست لجد ما اتخرجت

تفتكر المجتمع ده يستحق مني اني اضيع معاه مجهودي واتعب عشانه ؟

لاء وفي الاخر بمرتب ملاليم

يعني لا تقدير مادي ولا تقدير معنوي

اقولك حاجة كمان

بعد ما جالي جواب التنسيق بقبولي في كلية التمريض أهلي نفسهم كانوا اول حد قال تعليق مش تمام

علشان كدة

درست تاني ثانوية عامة ودخلت كلية اداب وكنت بدرس الكليتين في وقت واحد

عارف كانت ايه وجهة نظري او الدافع اللي خلاني اعمل كده؟

كنت بقول كلية التمريض علشان اخرج من مصر لأني عارفة فرص التمريض بره شكلها ايه

ما كلية الأداب فللوجاهة الاجتماعية

صدقني المجتمع ونظرته الدونية هما السبب في الاذدواجية اللي انا عشتها دي

القافلة تسير ومش عارفة ايه بتعمل ايه

عرفت دلوقت حضرتك التعالى مصدره ايه لو اى انسان فى اى مهنة مش عارف قيمة نفسه وعمله وخجلان منه

زى حضرتك ويبحث عن الوجاهة الاجتماعية والعائد المادى دون النظر للقيمة الانسانية لعمله فالنتيجة

الحتمية لذلك انه يحاول ان يصنع لنفسه هالة يخفى وراءها هذا الخجل والكبر والتعالى اسهل وسيلة

وللاسف دى نظرة معظم الممرضات والا لماذا نفس الممرضة عملها واسلوبها مختلف فى جهة عن اخرى تبعا

للعائد المادى ونوع المستشفى ولا الفقير بقى يروح يموت لما كل واحدة عاوزة تشتغل فى مستشفيات

الفنادق خمس نجوم

خجل من ايه يا بنت الحلال

مش تعرفي انتي بتقولي أيه؟

لا انا رقاصة ولا تاجرة مخدرات

تفتكري واحدة قليلة الذوق ومعندهاش أدب وبتتطاول علي موظف أثناء عمله

أبسط الأمور هيعاملها بنفس قلة الذوق ويوقفها عند حدها

وواضح أن ليكي تجربة مريرة في مستشفيات الحكومة

بس عايزة اقولك معظم المؤسسات الحكومية خربانه يا عزيزتي مش المستشفيات بس

ثم ان كل واحد من حقه يخطط لحياته بالطريقه اللي يشوفها في صالحه وصالح اولاده

وانتي خير دليل علي كده

مش انتي برده بتشتغلي بره مصر؟

بس مش من حق اي حد يقولك لاء انتي غلطانه وبلدك اولي بيكي ولازم ترجعي تتمرمطي في ترابها

علي العموم يا هند

أنا عندي بكالوريوس تمريض جامعة القاهرة

ومحضرة دبلومة في ال c p r

واناويه بأذن الله احضر ماجستير ودكتوراه في كندا

قريب اوي ان شاء الله

يا ريت بقي تعرفيني بنفسك

يا تري انتي دارسه ايه؟

تم تعديل 14 أغسطس 2010 بواسطة Morial

[Morial]

[qu

ولهند علي

أحب اقولك يا هند ان أكيد لو اتعاملتي مع الناس - اي ناس - كويس هيعاملوكي كويس

ونبرة التعالي اللي بتتكلمي عنها

اكيد انتي أستحقتيها

بفضل ومنة من الله ميسر لى ولاولادى علاج اسر تابع لجهة عمل زوجى فى ارقى المستشفيات ومنها مستشفيات ذكرتيها

بالاسم وحضرتك عارفة الخدمة فيها ازاى يعنى معاملة فوق السوبر زى مابيقوله

لكن ده مايمنعش انى اتعاملت بشكل او اخر مع مستشفيات الحكومة او التامين الصحى فى علاج اقارب لى

وشاهدت بنفسى مش سماعى سوء المعاملة للمرضى عموما

ساروى لحضرتك حاجة وقولى ايه الغلط اللى انا عملته عشان استحقه زى ماقلتى حضرتك

من قرابة 10 سنوات اكتشفنا اصابة والدى رحمه الله بسرطان البنكرياس وترتب عليه تليف الكبد فى مراحل

متقدمة جدا ولم يكون متاح علاج للكبد فى ذلك الوقت الا مستشفيات الصحة والتامين الصحى ولحسن

حظنا كانت لنا معرفة شخصية برئيسة احد الاقسام فى تلك المستشفى واحتجز بها لسوء حالته وكان اخى مقيم معه

ونحن نزوره فى ميعاد الزيارة يعنى لم نتقابل مع اى ممرضات فى تلك الفترة لكن كان فى اهتمام زيادة

بناء على الوساطة واجريت له عملية وادخل العناية المركزة فقررنا يقيم اخى ليلا وانا نهارا

وعندما شاهدته بعد خروجه من العناية كنت على وشك الانهيار من كثرة الخراطيم الخارجة من جسده مع فقده

لكثير من وزنه ولكنى تمالكت نفسى وجلست بجواره ابكى ولم يشعر بى وفجاة دخلت رئيسة الممرضات

ولم تراع حالته وانفجرت فى بدون سابق انظار لانى لم اغير له ملابس العملية حتى الان ولا الفرش

بالله عليك كيف اغير له وخرطوم محلول معلق فى يده وخرطوم اخر خارج من انفه و ثالث قسطرة وتعالى صوتها

بالصياح اكتر واكتر وانا ابكى لانى اول مرة اشوف ابى فى هذا الوضع كنت فى حالة انكسار مش عارفة اقول

اى حاجة وخرجت وعادت معها ثلاثة ممرضات تعاونوا لتبديل ملابسه بالاضافة تمرجية تغير الفرش

وكان كل مشكلتها وجودى عوزانى اروح رغم تسديد رسوم مقيم ومعنا ايصال وطبعا توسطت صديقتها معرفتنا

بعد فشل استجدائى لها بتركى معه فى اخر ايامه ورغم ذلك رجعت وشكرتها لحسن معاملة ابى

ولكن خلال تلك الفترة شاهدت معاملتها الاسوا لاخرين وتعالى غير طبيعى لدرجة انها استفزت زوجة مهندس مريض

ولكن الاخيرة لم تتركها ردت عليها باعنف ولسوء حظها كانت واسطتها اكبر كان مدير المستشفى

كام واحد عنده واسطة او فلوس يتعالج فى مكان كويس بعدين المرض ده كاس يتجرع منه الجميع

يعنى الرحمة الرحمة الرحمة فوق الوجاهة والمادة

واسفة للاطالة

شوفي يا هند

عناية مركزة يعني الزيارة بحساب وبمواعيد محدده

وفي حالة والدك الله يرحمه الزيارة المفروض تبقي بحساب اوي

وفيه مستشفيات - النضيفة - المفروض الزيارة تكون من ورا زجاج

انتم دافعين فاتورة مرافق

ده صحيح

لكن مش معني كدة ان من حقك تقعدي معاه في العناية المركزة

لكن من حقك تقيمي في المستشفي وتزوري والدك

لكن في مواعيد الزيارة المعلن عنها بس

واعتقد ان هو ده اللي الريسة قالتهولك

لكن انتي من حبك لوالدك وجزعك عليه كرهتيها وشفتيها شيطانه

مع انها قالت الصح واللي فيه مصلحة باباكي الله يرحمه

اما لو كانت شخطت فيكي ذي ما بتقولي - واعذريني مش قادرة اصدق - علشان مش غيرتي لباباكي الله يرحمه هدومه وهولسه خارج من العمليات وفي العناية

فدي واحدة ملهاش علاقة بالتمريض من اساسه

وبديهيا كان المفروض تردي عليها وتقوليلها

اومال انتوا بتعملوا ايه هنا ؟

تم تعديل 14 أغسطس 2010 بواسطة Morial

[Morial]

يا جماعة ما تنسوش ان مقارنة اى مهنة فى مصر مع مثيلاتها فى اى بلد آخر سوف تظهر حالة الفوضى والهرجلة فى مصر

حيث يوجد خلل فى الحقوق والواجبات ... لأن الممرضة لا تؤدى عملها كما يجب - وهذا هو الغالب، وايضا لا تحصل على حقوقها المادية او المعنوية

وطبعا المريض ما لوش ذنب فى هذا الخلل ولكن ايضا الممرضة بشر وتتأثر بضغوط الحياة مثل اى فرد فينا

ودا مش فى التمريض بس ... دا فى كل المهن تقريبا

لأنها اصبحت ثقافة ... انك تؤدى عملك باسهل طريقة واقل مجهود وبدون الاهتمام باتقان ما تفعله

أحييك أستاذي الفاضل

رأي واع

وأدب جم

[hOuSsAm]

الاخوة الافاضل

السلام عليكم ورحمة الله وبركاته

انا مستغرب انكوا بتتكلموا عالتمريض بالصورة دى

هى مصر كدة كل المهن فيها الكويس وفيها الوحش

ليه ننتقد الممريض بتناقد السلوك الاجتماعى فى مصر

انا شوفت ممرضين كويسين وشوفت ممرضين مش كويسين زى مفيه دكاترة ولاد حلال وفيه دكاترة ولاد....... (ولا بلاش اللهم ما انى صايم)

والمحاسبين والمحامين والظباط........ كل المهن فيها الكويس وفيها الوحش

فيه دكاترة بيسوقوا توك توك دلوقتى وممرضين ماشاء الله بيقبضوا مبالغ ضخمة

الاعلام المصرى للاسف سبب رئيسى فى تشويه الكتير من المهن......لاء ده تشويه للشخصية المصرية

بس للاسف فيه مشكلة جانبية ملهاش علاقة بالموضوع ( انها لسه ما اجوزتش 34 سنة)

هو ايه علاقة موضوع الجوزا بالتمريض......... البنت اللى بيزيد سنها عن 30 او 40 من غير متتجوز ده ليس عيب فيها او تقصيرا منها...... يا سيدى دى مشكلة مجتمع

كل الناس من كل المهن ممكن متتجوزش عشان سن كبير

اروح اسال نسبة الزواج بين بنات طب وقارنها بنسب الزواج بين بنات التمريض (الموضوع اصلا ملهوش علاقة بالمهن)

اقولك على حاجة شفتها فى اجازتى الاخيرة

صديق لى ومن عائلة ذات واجهة اجتماعية وهو طالب فى كلية الطب...... اعجب بزميلته فى كلية التمريض وقرر يتجوز منها.... عادى يعنى الدنيا ماشية تمام ليه بقى هنقارن المهن

--------------------------

بالنسبة للتمريض فى مصر دلوقتى مستواه بدا يتحسن كتير بعدما اصبح كلية 5 سنوات ودراستهم مشابهة تماما لدراسة طب بنفس المواد ونفس اللغة وماشاء الله مستواهم الاجتماعى كويس وكذلك الاخلاقى

شوفوا كدة كلية تمريض واخدة كام السنة دى

وعن نفسى شايف انى لو خيرت بين كلية الصيدلة وكلية التمريض هختار التمريض مش عيبا فى كلية الصيدلة ولكن الموضوع مستقبل وحسبة عائد

اتمنى ان نظرة المجتمع السطحية للامور تتغير.......... زهقنا بقى

[herohero]

ياجماعه مالكم احنا بنتكلم عادي مفيش داعي يا اخت موريال على انك تقلبي الموضوع لشخصي خااااااااالص

على فكرة والدتي انا ممرضة من زمن وخريجه ع ما افتكر كان معهد عالي بعد الثانوية اوحاجه زي كده واشتغلت ف السعوديه زمان سنة 76 ومش عاوز اقولك ساعتها كانت بتاخد كم كان مرتب بجد المهم لما اتجوزت والدي رفض وروحنا الكويت رفض انها تشتغل ووالدي تعليمه عالي وراح فرنسا كمان لكن ده فكره وقعدت والدتي ف البيت واقتنعت بكلام والدي اللي انا مش مقتنع به لكنه كان غير راضي عن فكرة عمل زوجته كممرضة وده وجهات نظر

لكن ما ارغب ف ذكره اننا ف مصر نعاني من اهمال ف العديد من المجالات لكن اخطرها ان يمس الاهمال صحتنا فانا مش مهم عندي لما اللي بينظف الشارع يهمل او مهندس اتصالات يهمل انما اي شخص يتعامل مع البشر لما يهمل يبقى شيئ لا يغتفر

لكن ف حاله اذا كان البشر لهم قيمة ف بلدنا

التمريض المصري ف راي لا يقل فنيا عن غيره لكن خلينا نقول performance بتاعه

الشغل الاحترافي ده اللي اقصده بحس ان الفلبينيات حركييييييييييين قووووووووووووي وخفاف بينجزوا

[se_ Elsyed]

أسلوبك في التحاور مرفوض تماماً يا موريال وهجومك على كل من يخالفك الرأي لمجرد إنهم مسوا قدس الأقداس المتمثل في مهنة التمريض بمصر شي غريب وغير مُبرر..

بالرغم من إنك قولتي إنك ما أشتغلتيش في مصر كتير . يبقى حكمتي على الموضوع إزاي ؟

أيوه أؤكد لك إن ده موجود في مصر ... وحصل معايا كتير وأنا لا أتعامل مع مستشفيات حكومية لأني الحمد لله مقتدر ... وأقربها في ولادة إبني في أحدى المستشفيات الكبرى بالمهندسين وما كانوش راضيين يوريهوني إلا بعد ما أدفع المعلوم ... وأقسم بالله ما صدقت الدكتورة المتابعة للحالة لما قالت لي إبقى راضي الممرضات .... يعني المطلوب تشيل كيس فلوس وتمشي ترُش .. غير كده يدولك الوش الأبلكاش

إيه هاندفن روسنا في الرمل ؟

أيوه كلامك يا موريال بيدُل على إنك بتخجلي من مهنتك الشريفة بدليل أنفعالك الغير مبرر وهجومك على هند بالرغم من إن كلامها ما فيهوش ما يُسيئ

وإذا كان الحوار هايبقى بالشكل ده ..

يبقى نسك على الموضوع ونعترف إن التمريض في مصر زي الفُل ..

وإن الممرضات المصريات مكتسحين في مجالهم وبيكنسوا الممرضات الفلبينيات مش في الخليج بل في العالم كله

---------

عندي بكالوريوس تمريض جامعة القاهرة

ومحضرة دبلومة في ال c p r

واناويه بأذن الله احضر ماجستير ودكتوراه في كندا

قريب اوي ان شاء الله

يا ريت بقي تعرفيني بنفسك

يا تري انتي دارسه ايه؟

أه صح

بعد كده يا جماعة من شروط المنتدى أو من شروط وضع أي رد في موضوع إن كل واحد يجيب معاه صورة تيبك الأصل من شهاداته وكمان يكلمنا عن خططه المستقبلية لحياته وبيخطط لإيه ؟

أنفعال غير مقبول يا موريال وحوار لن يؤدي إلى اي نتيجة

[Morial]

وانت يا سي السيد

علام يدل اسلوبك؟

الأ يدل علي انك تستغل سلطاتك الاشرافيه في توجيه مجري الحديث الوجهه التي ترضاها؟

كنت اتخيلك رمزا لمثقف مصري يعرف ماذا يقول

لكن اتضح انك واحد شايل كيس فلوس وماشي يرش

وللعلم

لا تشرفني عضوية منتدي أنت أحد مشرفيه

وطلًع راسك من تحت الرملة

تم تعديل 14 أغسطس 2010 بواسطة Morial

[se_ Elsyed]

وانت يا سي السيد

علام يدل اسلوبك؟

الأ يدل علي انك تستغل سلطاتك الاشرافيه في توجيه مجري الحديث الوجهه التي ترضاها؟

كنت اتخيلك رمزا لمثقف مصري يعرف ماذا يقول

لكن اتضح انك واحد شايل كيس فلوس وماشي يرش

وللعلم

لا تشرفني عضوية منتدي أنت أحد مشرفيه

وطلًع راسك من تحت الرملة

اللهم إني صايم ....

أما أسلوبك الراقي كسيدة محترمة .. تسُب الأخرين في رسائل خاصة وتكتب تعليقات مسئية في البروفايل الخاص بالأعضاء ... فيدل على بيئتك وثقافتك ..

وسنقابلة بشكل رسمي من الإدارة ... ولن نتدنى لأسلوبك ونرد على إساءتك ... وسنقوم فقط بشطب عضويتك من منتدى لا يضم إلا المحترمين فقط فيما بينه

[hakeem]

ياجدعان صلوا ع النبى كده وكل سنه وانتوا طيبين

رمضان كريم يا سى السيد والمسامح كريم

رمضان كريم يا Morial

وبلاش يا استاذ سى السيد موضوع شطب العضويه ده وكفايه متردش وخلاص ..انا معرفش مين Morial بس تعرف ايه المشكله اللى عندنا مش مشكله التمريض حلو ولا وحش انمما مشكله حوار ..يبقىالحوار بادى كويس ولذيذ وبعدين تقلب بغم ..نقول ايه بس بلاش حوار من اصله..

يا جماعه كل سنه وانتوا طيبين والمسامح كريم

[engmido]

انت بتتكلم عن مين بالظبط يا أخ؟

ومين اللي بيقولك الشاي بتاعنا يا بيه؟

دول ممرضات وللا العمال اللي بيمسحوا المستشفي؟

لكن اللي اعرفه ان فيه فرق اكيد في السلوك بين الدبلوم والبكالوريوس وحتي ممرضات الدبلوم اللي اتعاملت معاهم اخلاقهم مش كده

يا اختى انتى تانى مرة تفهمينى غلك انا مقلتش كده خالص

انا قلت هناك بعض الناس...ومقلتش ان بتوع التمريض البكالوريوس كده ..مين قال كده

ده انا مجمل مداخلاتى كلها انى متعاطف مع هذه المهنة وما يقال عليها بعيدااا عن الكلام اللى انا قلته واللى زعلكم

ارجو ان اكون اتفهمت صح المرة دى

ثم انتم سايبين المداخلة كلها وما فيها وماسكين فى النقطة دى

ارجوكم اقرو المداخلة تانى بهدوء

وستفهمون انى زعلان على ما يقال ولست معه

---- نقطة تانية موضوع الشاى ده موجود واللى مش من مصر يقول انا مش من مصر....ومش لازم يطلب بالبق ..بس انت لازم تفتح مخك عشان المريض بتاعك

----- نقطة الجواز دى انا برده وضحت وقلت بعيد عن الموضوع ...انا عن نفسى زعلان عليها ومقلتش انهم بيعنسوا ولا حاجة من دى

وشكرااا لكم وكل سنة وانتم طيبين

[Salwa]

وانت يا سي السيد

علام يدل اسلوبك؟

الأ يدل علي انك تستغل سلطاتك الاشرافيه في توجيه مجري الحديث الوجهه التي ترضاها؟

كنت اتخيلك رمزا لمثقف مصري يعرف ماذا يقول

لكن اتضح انك واحد شايل كيس فلوس وماشي يرش

وللعلم

لا تشرفني عضوية منتدي أنت أحد مشرفيه

وطلًع راسك من تحت الرملة

اللهم إني صايم ....

أما أسلوبك الراقي كسيدة محترمة .. تسُب الأخرين في رسائل خاصة وتكتب تعليقات مسئية في البروفايل الخاص بالأعضاء ... فيدل على بيئتك وثقافتك ..

وسنقابلة بشكل رسمي من الإدارة ... ولن نتدنى لأسلوبك ونرد على إساءتك ... وسنقوم فقط بشطب عضويتك من منتدى لا يضم إلا المحترمين فقط فيما بينه

ف الحقيقة ...

المشرف المحترم سى السيد ...لم يستخدم اى صلاحيات لتغيير مسار اى موضوع ..

كل عام وانتم بخير ..

ان كنتى حضرتك تريدين منا لى الحقائق ..!!

حتى نكون فى جانبك على اساس انه مشرف وانك عضوة لاتستطيع استخدام نفس صلاحياته ..

فيا سيدتى الفاضلة ..

اخطأ سيدنا داوود فى الحكم عندما قيل له ..ان لأخى تسعة وتسعون نعجة ولى نعجة واحدة ....وقف بجانب من يظهر انه على حق ..لمجرد انه لايستطيع رد الظلم ( من وجهة نظره )

لن استخدم صلاحياتى الآن كمشرفة حتى احذف عضويتك من منتدى لايشرفك وجود ( امثال ) سى السيد ...به وهو فى الحقيقة احدى اهم اعمدته..

سوف يتم مناقشة الأمر ف الادارة ..حتى يكون الرأى كما تعودنا شورى بيننا ..

وسوف يتم اغلاق هذا الموضوع مؤقتا ..

شكرا جزيلا سيدتى الفاضلة ...

[عادل أبوزيد]

موضوع .. لكل العصور

[عطر الجنة]

موضوع .. لكل العصور

سبحان الله ..

الموضوع انتهى نهاية درامية بحذف احدى العضوات ..

سبحان الله تواضع من صاحب الموضوع الذى يناقشه بهدوء و عقلانية و رقى اخلاقى و لفظى ..

يقابله عجرفة من احدى المنتميات لهذه المهنة و التى اعتبرها دعاية سلبية ..

المفروض الممرضة او الممرض ملاك رحمة ..

تحياتى

[Grandma]

كانوا زمان بيطلقوا على الممرضة لقب ( حكيمة ) ودا تقدير لها و لمكانتها 

وكانوا الممرضات زمان فاهمين في شغلتهم وبيحلوا محل الطبيب لو غاب 

دلوقتي للأسف نادرا اما نلاقي ممرضة مدربة جيدا ... الاغلبية بيشتغلوا وهما مالهمش نفس

شايلين كل مشاكلهم وهمومهم وداخلين بيها على المريض و مكشرين في وشه 

يغزوا فيه الحقنة تطلع من راسه

حركة بطيئة واوزان ثقيلة و المدهش ان بعضهن منقب ... على ايه ؟!! هو الجمال هيفط منك ؟!!

كل خدمة تعملها المطلوب انها تترجم ماديا من المريض تعبيرا عن شكره 

الواحد فعلا بيزعل اما يشوف الممرضات الفلبينيات و الهنود و يقارنهن بالمصريات 

بلاش نتكلم عن الممرضات الانجليزيات احسن نتعقد 

احتمال يكون المصريين و المصريات كلهم دلوقتي مالهمش نفس يشتغلوا ولا يتعلموا 

مش عارفة ايه اللي اتغير !!!