لو إنت محاسب فى مصر للطيران ب2000 جنيه و جايلك عقد ب4500 ريال فالسعودية ترفض و لا تقبل؟

[أحمد الكشكى]

السلام عليكم ورحمة الله

أنا محاسب خريج تجارة إنجليش و معايا 4 سنين خبرة و مقبل على الزواج

راتبى فى حدود 2000 و زوجتى قدامها سنتين دراسة فى الجامعة

ناس كتير قالولى إن ال 2000 جنيه دول يا دوب يعيشونى أنا و هيا وممكن نتزنق لو فيه اطفال

عشان كده فكرت ادور على عقد وفعلا جالى عقد فى شركة إسمها

إسمها إكسترا عندها مولات الكترونيات تبع مجموعه الفوزان

العقد تفاصيلة

راتب:4500

بدل سكن:1125

بدل إنتقالات:450

تذكرة مجانية

رعاية صحية للأسرة

30 يوم أجازة

أنا محتار جدا و حبيت أستشيركم

عل العرض دا معقول بالنسبة لوضعى فى مصر حاليا و ممكن أحوض كام من الراتب ده

جزاكم الله خيرا

[se_ Elsyed]

إكسترا مول إلكترونيات وأجهزة منزلية كبير هنا

لكن

لو الفرصة دي هاتخليك تضحي بشغلك المُستقر في مصر للطيران

يبقى لأ .. والف لأ

إوعى تعملها لو كنت متثبت في مصر للطيران .

واعتقد أن مرتبك في مصر للطيران ده لا يشمل الأمتيازات الأخرى زي العلاوات والمكافآت السنوية

وخلي بالك

الحياة بقت غالية قوي في السعودية

يعني إنت كده هاتاخد 13500 بدل سكن ... وهاتتبهدل على ما تلاقي سكن مناسب بالسعر ده .... ده أنا بأتكلم عن الرياض .. أما لو روحت فرع الخبر .. فانسى .. السكن هناك نارررررررررر

واعمل حسابك لو مثلاً جيت الرياض .. هنا أشهر فرعين لأكسترا واحد في طريق الملك عبد العزيز في حي الورود ودي منطقة راقية وأقل شقة هناك إيجارها بيبقى 25 الف .. يعني هاتضطر تسكن بعييييييييييييييييد عن شغلك

والأخر في شارع السويدي ... وحولها منطقة شعبية زي المنفوحه أو الشفا أو السويدي ... وممكن تلاقي هناك شقة مناسبة بالسعر ده .

سيبك من ده كله ... أحسب اهم حاجه مكاسبك وتضحياتك من تركك للعمل في مصر للطيران

إنت لو ما كونتش شغال شغلانه كويسة زي دي في مصر .. كنت نصحتك وقلت لك تعالى

لكن ما تستعجلش يا أحمد .. إنت لسه خريج حديث .. وعريس حديث .. والطريق طويل قدامك وكمان قدامك مستقبل وظيفي محترم يحلم به أي شخص ...

والله أفتكرت دلوقت راجل كبير مصري .. شغال سباك هنا .. وهو بيبكي وبيحكي لي إن إبنه اخد بكالوريوس تجارة وبالواسطة والمعارف إتعين محاسب في أحد البنوك ... ومع ذلك فضل يحرجم عشان يسافر الخليج الحلو الجميل الطراوه... وأخيراً جت له شغلانة محاسب في مؤسسة ملابس بـ 1800 ريال وساب الشغل في البنك وأترفد طبعاً .. فقلت له الله يخليك لما أبنك يوصل أبقى أتصل بيه عشان أجي أضربه بجد ...

[yasser moustafa]

لو تقدر تاخد اجازة سنة او اكتر ... ها تكون المجازفة اقل ما يمكن

وها تقدر تقرر انك تستقيل وتكمل فى الخليج او ترجع شغلك تانى فى نهاية الاجازة

[أحمد الكشكى]

السلام عليكم ورحمة الله

إخوانى الأفاضل أرجو الأ تبخلو على بنصيحتكم

أنا شاب مقبل غلى الزواج و أعمل فى مصر للطيران محاسب براتب 2500 مصرى وزوجتى المقبلة لن تعمل لأنها لازالت طالبة

قد إستقر فى وجدانى فكرة ترك مصر و السفر للخارج للحصول على حياة ذات جودة أفضل وأمامى الأن عدة خيارات

1-القبول بعرض عمل فى السعودية عملا بمبدأ عصفور فى اليد علما بأن العرض معقول و ليس مغرى 4500 ريال + سكن

2-التقديم على الهجرة لكندا

3-الإستمرار فى مصر للطيران و محاولة عمل شهادة مهنية دولية فى مجالى تزيد من فرصى و قيمتى فى سوق العمل سواء داخل مصر أو خارجها

أرجو إفادتكم

[herohero]

انا لست فمجال المحاسبة ولكن يجب ان تعلم ان المعروض ف السوق الخليجي كثير والجميع بيقولك خبرة الخليج يعني حسابات مصر مختلفه ولا تنسى ان هناك الفلبينيين والهنود والباكستانيين فالعرض ف الخليج بيكون مختلف والمنافسه مختلفه

طبعا وجودك ف مصر الطيران شيئ ليس بالسهل واكيد يعني لوسيبتها مش من السعهل انك تلاقي سكة تانيه تدخلك مكان زيها

يعني كلنا يعلم ان مثل هذه الانماكن ليس بالسهول الوصول اليها ف راي المتواضع انك تستمر ف مصر الطيران وانت لسه ف بداية طريقك وتطور نفسك بشهادات مهنية وماتنساش انت ف شغل شبه حكومي يعني مفيش ضغوط القطاع الخاص سواء ف الخليج او ف مصر فاستغل ده وطور نفسك بشهادات مهنية

اما عن الهجرة فطبعا انت عارف ان الهجرة الهدف منها مش مادي يعني لا تتوقع انك لما تهاجر عشان تحقق فلوس ولكن هو سعي نحو مستوى معيشي افضل ومستقبل قد يكون افضل لاطفالنا

عموما راي المتواضع استكر ف عملك وطور نفسك لان العروض المغرية ليست بالسهلة الخليج حساباته مختلفه يعني فيه سكك ووسايط لكن ع الاقل مش هتكون للمصريين يعني احنا مش لوبي قويف الخليج عموما فحسابات الشغل هنا هي الكفاءة ليس اكثر وبالتالي استمر ف تكوير ذاتك وسوف ترتقي وتجد المزيد من العروض

[se_ Elsyed]

يا أخ أحمد

يا جماعة

يا صائمين

التنظيم هي عملية بديهية فطرية مش محتاجه لا تعليمات ولا أوامر

مش حضرتك برضوا اللي كاتب موضوع أول امبارح عن العرض اللي جايلك في السعودية وردينا عليك بما يُرضي الله ؟

إيه لازمت الموضوع المنفصل ده ؟

قولي إنت لو سمحت إيه لزمته ؟

ولما نمنع خاصية فتح موضوعات جديدة عن الأعضاء الجدد الناس تزعل وتقول ليه ومش ليه ؟

[se_ Elsyed]

تم دمج الموضوعين ونرجو مراعاة الجانب التنظيمي

[شريف مان]

3-الإستمرار فى مصر للطيران و محاولة عمل شهادة مهنية دولية فى مجالى تزيد من فرصى و قيمتى فى سوق العمل سواء داخل مصر أو خارجها

[hOuSsAm]

بص انا فى رايي لو انت فى مصر للطيران بتاخد خبرة كويسة وليك مستقبل وظيفى واضح (يعنى عارف ايه الخطوات المطلوبة عشان تبقى مدير مالى) ولو حبيت تسيب مصر للطيران لاى سبب هتلاقى ميت مكان تانى ياخدك يبقى استمر فى مصر للطيران

لو الوضع مختلف عن كدة ومفهوش استقرار يبقى سافر

موضوع الشهادات المهنية كدة كدة لازم تعملها سواء استقريت فى مصر للطيران او سافرت (ده شئ لابد منه)

وفى نفس الوقت سواء استقريت فى مصر للطيران او سافرت السعودية قدم عالهجرة لكندا طالما انت ناوى عليها