مسلسل الجماعة , حقائق, إفتراءات أم إستخفاف بعقل المشاهد

[the consultant]

بصراحة انا مش من هواة متابعة المسلسلات بس المسلسل ده بالذات حبيت أني اتابعة (مسلسل الجماعة) يمكن عشان الدعاية اللي اتعملت و و إختيار قناة القاهرة و الناس اللي انا اشهد بالذكاء الإعلامي المرعب للقائمين عليها.

أولا انا مش إخواني و لا إخوانجي و لا من اتباع البنا . بس بصراحة أنا مش مصدق اللي بيحصل في المسلسل ده و بعتبرة بصراحة استهبال على استلواح . أولا الاإخوان طبعا طالعين في المسلسل بصورة المنافقين قطعاو طبعا ده كان واضح جدا لما أحد قيادي الجماعة اللي عنده سوبر ماركت قال لاحد العمال " طلع يابني منتجات الدنمارك اللي كنا مخبينها أيام حملة المقاطعة عشان الموضوع خلاص هدى" . !!!!!

و اللي ينقط بأة هو تصوير أمن الدولة و ظباطها و وكلاء نيابة أمن الدولة بالملائكة اللي بيحاولو يمنعو الاخوان المتوحشين من إنهم يضرو الشعب الغلبان بأفكارهم الهدامة و ذلك باستخدام وسائل امن الدولة المشروعة اللي مافيهاش عنف نهائيا .

لقطة إمبارح بأة بصراحة شلتني طبعا في شخصية وكيل نيابة امن الدولة اللي حاول القائمين على المسلسل تصويرة من بداية المسلسل بالملاك الذي لا يبغى الا إعمال العدل و بالفعل ترسخت في ذهني تلك الصورة عن ذلك الشاب إبن الحلال الذي لا يعنيه منصبة و لا يبتغي الا العدل و إذا به في حلقة أمس يطرد خادمته لانها انتقبت ......!!!!! طيب إيه؟ بمعنى أخر انا عايز أوصلك انك لو رجل ذو أخلاق عالية و رفيعة و لا تريد باعمالك الا وجه الله إذا يجب أن ترفض هذا النقاب السئ..... مش عارف بصراحة إتخنقت و لو إني مش من المتعصبين للنقاب .

أيه رأيكو!!!

[se_ Elsyed]

يا كونسالتنت ..

قبل ما تبدأ في عرض الموضوع

لازم تعرف

Who's Talking

فطالما فيها وحيد حامد .. يبقى خلصت

مش هو برضوا بتاع مسلسل العائلة في مطلع التسعينات رداً على إنتشار ظاهرة التطرف وقال فيها بالنص قناعات شخصية لدية واضحه وصريحة وقال بالحرف الواحد " مافيش حاجه إسمها عذاب قبر " ده على لسان واحد من المشايخ في المسلسل ؟!!!!!!

حقيقة شاهدت أول حلقتين من مسلسل الجماعةفقط وبعد كده ما عنديش وقت ...

ولكن لاحظت أبرازة لصورة ضباط أمن الدولة وكأنهم بلسم شافي وملائكة بجناحات

وهذا حوار شاهدته دار بين مدير مباحث أمن الدولة وضباطه بعد أن قبضوا على بعض شباب الأخوان اللي عملوا عرض الكراتيه في جماعة الازهر :

- المدير الكبير : إوعوا تكونوا ضربتوا الولاد اللي قبضتوا عليهم أو حد أتعرض لهم ؟

- ضابط : لأ يا فندم .. إحنا لقيناهم مضروبين جاهزين .

- المدير : أه . أنا مش عاويزهم ياخدوا فكره وحشه عننا أو يطلعوا من هنا وعندهم أنطباع سيء . دول شباب مضحوك عليهم ...

- ضابط : أنا لاحظت يا فندم إن معظم الطلبة المقبوض عليهم من الكليات العملية !!

- المدير : دي حقيقة .. الأخوان بيصطادوا الطلبة اللي في الكليات العملية عشان طبيعة دراستها جافة .. أما الكليات النظرية فبتحتاج لخيال ومناهجها خفيفة وصعب يجندوا حد منها

ههههههههههههه ( أنا كنت في كلية التجارة وفعلاً كان عندي خيال واسععععععع وساعات كنت باكتب شعر ونثر وزجل .. وكنت بأذاكر تحت ظلال الزيزفون وعلى ضفاف النيل حيث المياه الرقراقه والبلابل المغردة والعصافير المزقزقه )

والحب كله بقى تشوفه في مشهد الأستجواب للطلبة من قبل الظباط .. إيه الحلاوه والجمال والرقة دي ... ده كانوا بيطلبوا لهم شاي أثناء التحقيق .!!!! أه والله .. وكنت أنا كمشاهد مستني مشهد الظابط وهو بيطلب لكل واحد واحد وجبة كومبو مع بيبسي حجم عائلي ..

شوف بقى تصوير وحيد حامد لحوار المرشد العام مع رجاله ولا كإنه رئيس عصابة في مغارة تحت الأرض وحاجه أخر إجرام

وكلام يُدينه ويسفه ما يقوله هو شخصياً قبل أن يُدين أي شخص تاني

[زهقان]

على فكره من الصعب جدا الحكم على المسلسل من أوله .. اللى اتذاع ده مجرد مقدمة للمسلسل للتعرف على أبطال المسلسل

[se_ Elsyed]

على فكره من الصعب جدا الحكم على المسلسل من أوله .. اللى اتذاع ده مجرد مقدمة للمسلسل للتعرف على أبطال المسلسل

ماشي يا زهقان .. سيبك من أوله وأخره

قول لنا رأيك في الحوار اللي حصل ده بغض النظر عن أبعاد الشخصيات ...

هل جهاز أمن الدولة بيطلب وجبات كومبو للمقبوض عليهم وبيعامل الناس بحنيه وناقص يديهم حقن فيتنامينات ويجيب لهم دوا كُحه ؟

[herohero]

طبعا بما انه وحيد حامد فلاتتوقعواالكثير

طبعا المسلسل بيجي ف وقت السحور ع نايل دراما وده شيئ كويس ان الواحد يتفرج وهو بياكل

المهم انا شايف ان المسلسل ده هيزود منشعبيه الاخوان صحيح هومطلع امن الدولة ملاك طاهر لكن هيعرف الناس بالاخوان

وفيه جمل خطيرة

يعني الحلقةبتاعت امبارح وكانت بتتكلم لماحسن البنا كان طفل ولعب لعبة عسكر وحرامية وقالهم لا هنخليها بين الكفار والمسلمين يعني الولد من صغره فكره عنيف برده حته ملعوبه منك يا وحيد يا حامد

وفكرة ان حسن البنا ماعجبهوش التمثال العاري

وفكرة تمويل الجماعه وعبدالعزيز مخيون وهو ف راي يقصد خيرت الشاطر

وناتي لوكيل النيابه الباحث عنتاريخ الاخوان فلنا عليه علامات استفهام لكن هو الشخصية التي تقودنا لاحداث المسلسل ولا يهمنا اسقاط موقف النقاب واصراره ع طردالخادمة لمجرد انها انتقبت

عموما ما عجبني هذه الجملة

ع لسان عزت العلايلي

الحكومة تصنع آلام الشعب والاخوان بيتاجروا بآلام الشعب

[زهقان]

بصراحة يا س س

جميع التحقيقات اللى تمت فى أمن الدولة اللى ظهرت فى المسلسل واللى ظهر فيها المحقفين على أعلى درجات الاحترام واكرام الضيف و ليس المتهم خلانى بفكر جديا انى أقضى اجازتى اللى جاية فى أمن الدولة

[Ola Nagi]

تصدق انا من غير حتي ما اشوفوا مصدقه هما الناس دي عبط ولا فاكرين انهم بيتعاملوا مع هبل

[the consultant]

بصراحة يا س س

جميع التحقيقات اللى تمت فى أمن الدولة اللى ظهرت فى المسلسل واللى ظهر فيها المحقفين على أعلى درجات الاحترام واكرام الضيف و ليس المتهم خلانى بفكر جديا انى أقضى اجازتى اللى جاية فى أمن الدولة

طيب ياريس يبقى الموضوع باين من أوله و مش محتاج الإنتظار لأخر المسلسل . و أجازة سعيدة :rolleyes:

[se_ Elsyed]

بصراحة يا س س

جميع التحقيقات اللى تمت فى أمن الدولة اللى ظهرت فى المسلسل واللى ظهر فيها المحقفين على أعلى درجات الاحترام واكرام الضيف و ليس المتهم خلانى بفكر جديا انى أقضى اجازتى اللى جاية فى أمن الدولة

طب خُد الأوفر ده

في دلوقت عرض إنك تقضي ليلتين عندهم ويدولك ليلة مجاناً في الحبس الأنفرادي ...

فكر ورد عليه عشان ننفذ ههههههههه

واهو بالمره تعمل حاجه جديده تقضي على حالة الزهق دي

[مغتربة]

كل حلقه بشوفها بقعد اضحك فيها من اولها لاخرها

لو هى دى الحياديه و هو دا البحث المستقل عن الحقائق الى صدعنا بيهم وحيد حامد قبل عرض المسلسل يبقى فعلا على الدنيا السلام

الى انا متاكده منه ان المؤلف و عذرا على اللفظ (بغباؤه )هيخلى حتى الى مش متعاطفين مع الاخوان هيتعاطفوا معاهم

هو يمكن مش حاسس ان الالسلوب المباشر دا فى الهجوم معدش بينفع مع الناس زى زمان قبل ما يكون عندها اكتر من مصدر تقدر تاخد منه المعلومه بكذا زاويه

بحيث انها تعرف فى النهايه تتوصل بنفسها للحقيقه

دا ايه الحنيه الى ضباط امن الدوله فيها دى دا على كدا كل الشعب هيحب هيصيف عندهم ما دام الخدمه عندهم خمس نجوم كدا

كل مشهد فيه تجنى فظيع على الاخوان و تبنى يكاد يكون تام لروايه الداخليه لدرجه ان لو موظف فى الداخليه نفسها هو الى كاتب المسلسل مش هيطلعوا بالشكل دا

ووكيل النيابه المثقف يطرد الخادمه لمجرد ارتدائهاا لنقاب و يعلنها بكل صراحه ان النقاب ليس فرض

طيب كان التزم بالامانه المهنيه و اقر على الاقل انه مختلف فيه

كمان مشهد حسن البنا و هو فى المسجد بيقرا القران اشمعنى اختاره الايه الكريمه اللى بتتحدث عن ان يعطوا الجزيه و هم صاغرون

بصراحه المسلسل من اوله لاخره استفزااااااااااااااااز حتى للى مش مع ايا من الجانبين

[أبو محمد]

أولا .. رمضان كريم يا "جماعة" :)

طبعا باين عليك باسين سين إنك كنت فى تجارة وعلشان كده رومانسى وحالم وحاجات حلوة كتير mc: .. إيه ياعمنا ؟ ماله وحيد .. الراجل له موقف معروف وبيعبر عنه .. ده عمل فنى .. مش بالضرورة يكون مطابق للواقع .. الفن ليس محاكاة للواقع بل اقتباس من الواقع ليعكس عليه الفنان رؤيته الخاصة .. وكون إن له رؤية خاصة فى "الجماعة" لا يعيبه إطلاقا .. العيب فينا احنا لما نعتبر الأعمال الفنية وخصوصا الدرامية منها عبارة عن حصص فى التاريخ .. يقعد المؤلف يقول واحنا نسمع ونقتنع بأن ما يقوله هو الحقيقة .. تماما كما يفعل إخوانا العرب ويقتنعون بأن كل امرأة مصرية لازم يكون عندها بدلة رقص بتخش بيها فى الشوار بتاعها .. هم بيشوفوا إن كل المصريين حشاشين وكل المصريات رقاصات .. لأنهم بيستمدوا ثقافتهم من الأفلام والمسلسلات

كل واحد له رأى بيعبر عنه "فنيا" بطريقته .. يزود الملح والفلفل شوية .. يحط قرنفل .. أو ورق لورى .. أو فلفل هندى أو شطة سودانى .. المهم فى اللى بيستطعم .. إنت مش فاكر فيلم ميرامار تأليف نجيب محفوظ عن فترة حكم الاتحاد الاشتراكى ؟ .. بلاش نروح بعيد قوى كده .. إنت مش فاكر فيلم "اللعب مع الكبار" ؟ أهو ده مؤلفه هو وحيد حامد "بغباوته" .. بيبين إن فيه عصابة فى الحكومة .. حكومة الحزب الوطنى .. وبيبين إن فيه ظابط أمن دولة حليوة وحبوب بيحارب الفساد وبيظبط حتى عضو مجلس الشعب مهرب المخدرات (حسين فهمى) :hearts: .. وكمان فيه ظابط أمن دولة شرس ووشه سمح وكفه محنى وخده محنى (مصطفى متولى) mf( .. هو بنفسه وغباوته وحيد حامد .. وآخر مشهد فى الفيلم بيخلى الشعب وأمن الدولة يغنوا "إحنا كلنا .. نحب بعضنا" .. عادل إمام (الشعب) يصر على الحلم وكشف الفساد ، وحسين فهمى (أمن الدولة) بيحمى ضهره بالقوة ويدعمه فى محاربة ذلك المجهول الذى يقتل كل حالم رومانسى خريج تجارة

[se_ Elsyed]

مخطيء من يظن إن الناس هاتهاجم وحيد حامد عشان رأيه في جماعة الاخون المسلمين ...

أبداً ... ابسليوتلي

لكن إحنا بنتكلم عن سذاجة السيناريو والحوار ...

لإن بالمنظر ده .. ومن خلال 5 حلقات إتذاعوا .. تأكد للجميع تماماً إن المؤلف لسه في مرحلة الحضانة الفنية ...

بالعكس والله .. دي في أطفال وصغار سن بيألفوا وبتكون الحبكة الدرامية والحس الفني لديهم أعلى من هذا ..

- حلقة الامس كانت عن بداية تكوين الجماعة ..

( مشهد خارجي ... فلوكة قديمة في عرض الترعة ... حسن البنا وهو عنده 10 سنوات يجمع حوالي 8 أطفال أعمارهم تتراوح بين 6 إلى 9 سنوات عشان يتفقوا على تكوين جماعة الأخلاق الحميدة الاخوان يعني )

آه والله يا جماعة ...

وبص وأتمزج من حوار الاطفال :

البنا : أنا جمعتكم النهاردة وفي المكان ده عشان أقول لكم إني قررت أكون جماعة للأخلاق الحميدة في قريتنا ومحاربة الطغيان والفُجر والظلم ... ومن دلوقت عاوز أعرف مين اللي معايا ومين اللي مش معايا ... حتى اللي مش هايوافق على الأنضمام للجماعة دي لو فتن علينا فسيكون له مني عقاب أليم ...

مجاميع الأطفال بعد ما كل واحد فيهم عدل البامبرز اللي لابسه .. بداوا يناقشوه في اهداف الجماعة ودور كل واحد فيهم .. وأهم شيء سألوه عن طُرق تمويل نشاط الجماعة

آه والله يا جماعة ... لأ مش إنتو جماعة الناس الوحشين .. لأ قصدي جماعة المحاورات

فرد البنا وقال لهم : أنا قررت إني اعمل إشتراك وقدره قرش صاغ على كل واحد في الأسبوع ... هانجمعه من بعض لتمويل الجماعة ... وهانبدأ بعمل منشورات تحض على الأخلاق والفضيلة ونوزعها في السر على أهل البلد الظالمين ... وأنا إن شاء الله هادبر المكان اللي هانحفظ فيه المنشورات والكتب بتاعتنا ...

وبدأ يقسم الأدوار ... وبدأوا يكتبوا منشورات ويرسلوها بطريقة سرية إلى صاحب الخمارة اللي في بلدهم عشان يكف عن بيع الخمور للناس . وجابوا الراجل وهو مستغرب ومندهش وبيقرأ المنشور وبيتتريق ويقول : يعني إيه ؟ يعني عايزييني أبيع عرقسوس بدل الخمره ؟

وأرسلوا أيضاً منشور إلى تاجر صاحب بقالة أو عطارة عشان يكف عن التحرش بالنساء اللي بييجوا يشتروا من عنده ..

وكذلك أرسلوا منشور لواحد بياكل حقوق اليتامى من أقربائة ...

وزي مانتو شايفين كل ده ضد المباديء والأخلاق ...

وتستمر الاحداث وما زال النيل يجري

على فكره يا هيرو

الحكومة تصنع آلام الشعب والاخوان بيتاجروا بآلام الشعب

يا راجل حرام عليك .. ده البرومو بيتعاد كل شوية في التليفزيون للتنوية عن إذاعة المسلسل .... وهو قال بالتحديد

الحكومة تصنع آلام الشعب والاخوان والاحزاب بيتاجروا بآلام الشعب

عجبني مشهد لعزت العلايلي أول أمس وهو بيشرح لحفيدته باين أو بنته .. اللي تلقت أتصال تليفوني ..

ومن تعبيرات وشها وطريقة الرد أنا قلت في مصيبة مثلاً أو مات لهم حد ...

طلع يا عيني إن في حد بلغها تليفونياً أن الشغالة اللي عند قرايبهم جت في يوم الشغل وهي لابسه النقاب عشان في رجالة غريبة في البيت اللي بتخدم فيه .... وراحت تقول لأبوها - المصلح الموجتماعي عزت إبن العلايلي - الخبر القاسي ده ..فأنزعج وهاج وماج وقال لها وهي يلفظ أنفاسه الأخيرة : للأسف يا بنتي الاخوان بيسرقوا البلد ... بيسرقوا قيمها ووسطيتها يعني .... وإن الاخطر من الاخوان هما الجماعات المتطرفة اللي بتقف ورا الأخوان وبتدعمهم .. يعني الاخوان هما واجهة للجماعات المتطرفة يعني ...

[Diab]

بنزل الحلقات وبتفرج عليها ع النت لما ببقي فاضي لاني لا اشاهد التلفزيون في رمضان

عجبتني حكاية ان وكيل النيابة طالع اهبل وميعرفش أي حاجة عن الاخوان

بالله عليكم ده كلام

وكيل نيابة أمن الدولة ميعرفش

ده في عيال في ثانوي حافظة تاريخ البنا

صباح السذاجة

تم تعديل 16 أغسطس 2010 بواسطة Diab

[شريف مان]

انا شايف ان المسلسل حتى الان كويس

فيما عدا مشهد المنتقبة كان سخيف جداااااااااا

بالذات ان كان فيه اجماع انها مخطئة وارتدت النقاب لانها متخلفة ومش فاهمة حاجة

اما بالنسبة لامن الدولة فعادى جدااااااااااااااااااا

امن الدولة لايتعامل بعنف لامع الاخوان ولا مع السلفيين الا فى حالات معينة

والكلام دا عن تجربة صديقين واحد اخوان والتانى سلفى

والله زى ماراحوا زى ما رجعوا

ولا حد كلمهم كان استجواب عااااادى

كان فيه ضغط نفسى مش اكتر

زى ان الشخص يتركن 3 ساعات من غير محد يقوله رايح فين ولا جاى منين وطبعا هوا مرعوب لانه فى امن الدولة

والتحقيق معاه بيبقى وهوا معصوب العينين من باب الرزالة

انما غير كدا مفيش

[yasser moustafa]

ده عمل فنى .. مش بالضرورة يكون مطابق للواقع .. الفن ليس محاكاة للواقع بل اقتباس من الواقع ليعكس عليه الفنان رؤيته الخاصة

من صحيفة اليوم السابع -- "أكد الموقع الرسمى للحزب الوطنى أن مسلسل"الجماعة" كشف عدة حقائق عن جماعة الإخوان المسلمين المحظورة، أهمها استخدام العنف فى العملية السياسية، والحرص على ميوعة المواقف الإخوانية وتكييفها بما يحقق أكبر مصلحة ممكنة لقادة الجماعة وتنظيمها الخاص إضافة إلى عدم الثبات على المبادئ المعلنة

وكأن المسلسل اصبح يمثل الحقيقة والواقع وبالتالى نكتشف منه الحقائق، هذا هى طريقة الحزب الوطنى فى الهجوم على جماعة الاخوان

على فكرة انا لست اخوانيا وحتى غير متعاطف معهم، ولكن استغرب طريقة الهجوم عليهم بهذا الاسلوب التافه

[hanzalah]

على فكرة انا لست اخوانيا وحتى غير متعاطف معهم، ولكن استغرب طريقة الهجوم عليهم بهذا الاسلوب التافه

يا اهل الخير الموضوع هو مجرد سبوبه ليس إلا

طالما الهوجه الآن هي نتف دقن الاخوان وتقطيع عباءة الاخوان ولعن سلسفيل جدود الاخوان يبقى نكتب مقال او نؤلف مسلسل ينحل وبر الاخوان واللي حطوا بذرتهم كمان

وحيد حامد كاتب كبير

لكن الخيبة ان الكتابة تتحول الى سبوبة

وبالتالي فوحيد لم يعرف الجماعه كما نعرفها نحن الناس العادية التي تتعامل مع افراد من الجماعه في محيط حياتها اليومي

نحن نعرف اكتر من وحيد حامد ومن الحكومة نفسها

وبالتالي فمستحيل ان يتم استعباط شعب

بل ازعم ان عظمة الشعب المصري انه بيعرف يعمل عبيط

يجعله عامر

[Sherief AbdelWahab]

تحليل بسيط:

1-توقيت إذاعة المسلسل انتخابي .. وضرب عصفورين بحجر..

أ-صناعة رأي عام معادي للإخوان..

ب-التغطية على عيوب الحزبوطني وأحزاب المعارضة وفضائح العلاج على نفقة الدولة والميوعة الفائقة من الحزب في التعامل مع نوابه المتورطين في الفضيحة ، بما إنه "حزب الأغلبية".. الأكثر تواجداً في البرلمان ..

المبتذل كمان السسبنس اللي سبق المسلسل عن حذوفات وتدخلات رقابية.. ثبت إنها ما حصلتش..

المسلسل اتكلف تكاليف رهيبة ممكن تخليه أعلى مسلسل اتكلف في تاريخ التليفزيون في مصر..

هل وحيد حامد من الموضوعية إنه يقدر يتناول تيارات سياسية أخرى زي الوفد واليسار المصري والشيوعيين بنفس الطريقة اللي بيتناول بيها الإخوان؟

الله أعلم..

خلص الكلام

[herohero]

عارفين احلى حاجه ان المسلسل ده يعني خلى ناس كتير تبص ع الاخوان انا بتكلم ع الناس اللي ماتعرفش حاجه عنهم رغم اني اشك

الاخوان ع الارض مسيطرين عن الحزب الوطني وعموما المسلسل ما كنش له تاثير سلبي ع الاخوان بالعكس انا شايفه هيزيد من شعبيه الاخوان لتفاهة العرض

[se_ Elsyed]

طالما حرية التعبير مكفولة للجيمع

فأنتظروني في مسلسلي القريب اللي هاقوم بتأليفه وهاسميه

العصابة

وهاتكلم فيه عن نشأة الحزب الوطني ... وما وصل إليه الأن

بس عاوز أدور على حد ينتج لي المسلسل ... وكمان محتاج واحد محامي يترافع عني لما أتقفش .. وكمان حد يبعت لي ساندوتشات بيض بالبسطرمه وأنا جوه وكمان سجاير مش عشان أشربها لكن عشان أرشها على المساجين أصحابي

ولا لأ مش هاحتاج محامي ....

ده امن الدولة دلوقت بيقدم وجبات كومبو وبقوا في منتهى الحنيه ... ده مش بعيد لما يقفشوني يسفروني أكمل تعليمي بره ويدوني بوكيت ماني كمان

[ذهبية]

انا بصراحة متغاظة من اللى بيحصل اليومين دول فى الحياة السياسيةفى مصر باحس انة بجد شغل عيال اية الهبل اللى بقينا فية دة

خلاص الحكومة مبقاش قدمها الا المسلسلات علشان تستخدمها فى الحرب على خصومها و الله دة اخر استهبال

زى الحملة السذاجة اللى فيها لم امضااءت من الشعب علشان جمال يرشح نفسة و لا و اية بداوا من الريف اللى مش فاهمين حاجة و لموا 63الف فى عشر ايام و اللى يرفع الضغط يقولك اية الحزب ميعرفش حاجة و يطلع صفوت الشريف يقول دة شغل عيال

لما شغل العيال بالطريقة دى و لسة على البر امال لما العيال بقى تمسك الحكم هيحصل اية