حملات الحج التى تقبل بالزائرين

[moamana]

الحمد لله اخيرا اخيرا اخيرا

بقالى اكثر من شهرين مش عارفة ادخل المنتدى لغاية ما لقيت الحل فى منتدى المطاريد بانى اعمل

dns مفتوح

بس الحمد لله لان المنتدى ده غالى عندنا اوى

و عشان انا عندى طلب مهم جدا جدا

ابى و امى و حماى جايين على الحج زيارة و عايزة حملة ترضى بالزيارات( اما انا وزوجى هنطلع تصاريح) و كمان تكون فئة كويسة و متعديش 5000 ريال ؟

يعنى الله يكرمكم يكون احد شاكر فيها لانى طالعة الحج معاهم و معى اطفال صغار و ابى لسه خارج من عملية خطيرة فعايزة اقلل مشقة الحج

[se_ Elsyed]

للأسف .. الزائر مش مسموح له بالحج ولا يتم إستخراج تصريح رسمي له ..

لكن هناك بعض الحملات الغير رسمية اللي بتطلع الزائرين وهما لهم طُرق لذلك ومنها دخول المشاعر المقدسة يوم وقفة عرفات حيث إن الأمن بيتساهل في تلك الأوقات ..

لكن بما إن عندكم ظروف خاصة سواء لمرض الوالد أ و وجود الأطفال .. يبقى لازم تدرسوا الموضوع كويس من جميع جوانبه

ولو إني بأقترح إقتراحين حسب ظروفكم والأمر يرجع لكم

و ابى لسه خارج من عملية خطيرة

لا يُكلف الله نفساً إلا وسعها .... ومهما كانت الحملة مُريحة في الحج إلا إن هناك امور بتبقى مفروضة على الكل سواسيةً ومالهاش دعوة بالحملة وإمكانياتها ... كزحام الطواف والسعي ومشقة السير يومياً إلى الرجم والزحام بشكل عام يعني ... عشان كده أستشيروا طبيب في الأول لإن الوالد لو حالته الصحية لا تسمح يبقى خلاص مش مطلوب منه الحج .

كنا حتى وقت قريب لا نعرف شيء إسمه إن الحرم المكي بيتم غلقه نظراً للكثافة الموجودة بداخله ممن يؤدون الطواف .... وبالتالي المنتظرين في الخارج وهم بالملايين عليهم الأنتظار طووووويلاً حتى يتم تخفيف الكثافة ... دي برضوا معاناة

و معى اطفال صغار

هايبقى شيء جيد جداً لو تسيبوا الأطفال مع أحد معارفكم ... والموضوع كله أسبوع وترجعوا بالسلامة .... الأطفال من الحاجات اللي بتفسد لذة الحج والعُمرة بصراحة .

الخلاصة : في وسط معارف عمل الزوج هاتلاقي لازم أسماء حملات بيتداولها الناس ودول ببيطلعوا حاملي تأشيرة الزيارة اللي مالهمش تصريح ... كذلك لو إنتو في الرياض يبقى في هنا حملات كويسة ومشهورة رسمية يعني .. والمبلغ اللي إنتو محددينه كويس جداً ... وأقترح إنكم تتفقوا مع حملة كويسة من هنا لتوفير الإقامة والأنتقال لكم فقط بدون تصريح ... وتطلعوا إنتوا إلى جده بالطيران وتحجزوا من الان إذا كنتم حصلتم على التأشيرات .. ومن هناك الدخول لمكه بيبقى سهل وتقابلوا الحمله داخل المشاعر ...

لإن برضوا مش هاتستحملوا الطريق لو روحتوا بالأتوبيس .. الطريق طويل وشاق ... وكله كوم ومكوث الأتوبيس في الميقات - مكان الإحرام - ( السيل الكبير لو كنتم في الرياض ) كوم تاني ... يكفي إنك تعلمي إن في الحج عشان تنزلوا الميقات وتحرموا .. فيها ما لا يقل عن 4 ساعات ... ويمكن زيهم مكوث داخل الأتوبيس عشان تقربوا على نقطة تفتيش دخول مكه ...

[moamana]

شكرا يا سى السيد على الرد جدا

و الحمد لله ابى سمح له الطبيب بالحج

و للاسف لا استطيع ترك ابنى مع معارف لانه رضيع و لانى ليس لى معارف هناو الحمد لله على كل حال

و بالفعل انا فى الرياض

و عشان اوضح شوية حاجات

ابى و امى و حماى عملنالهم زيارة و هيجوا يوم 22 ذو القعدة هنا على الرياض عشان يستنوا الحج\

يبقى لو هنسافر طيران الى جدةقول هنسافر يوم 7 ذو الحجة هيسمحولهم يروحوا من مطار الرياض الى جدة عادى طيران

طيب كده هيحرموا منين من جدة و لا من هنا الرياض

و بالنسبة للاسماء المتداولة ديه لو كنت اعرفها انا و زوجى مكنتش كتبت الموضوع

[doha]

اختي العزيزه يفضل انك تسألي في مكاتب الحملات الموجوده في البطحاء ( اشارة طارق بن زياد ) زوجك يشرح لهم الوضع ( بينه وبينهم ) وهم هيدلوه ان كان عندهم الامكانية دي او لا خاصه والموضوع يعتبر ( غير قانوني ) يعني من شبه المستحيل ان حد يجي على العام كده ويحط لك اسم حملة او اثنين بتقوم بحاجه مخالفة للقانون ويعرضهم لمشاكل الغاء الترخيص وغيره .. يمكن ربنا يكرمك وحد يدلك على مكتب كويس عن طريق ارسال رقمه على الخاص بتاعك بس لو ده محصلش فمش قدامك غير زي ماقلت لك روحوا بنفسكم واسألوا ..

[elrasy]

يا ريت حد يدلنا على حملة بتسهل حج الزائرين

[se_ Elsyed]

والله يا جماعة أنا شخصياً ما عنديش فكرة عن الحملات اللي بتسمح للزائرين بالحج ..

لكن شوفت قدامي السنوات الماضية كذا حملة منهم بيعملوها أشخاص بشكل غير رسمي عن طريق تأجير اتوبيسات وتنظيم رحلات من غير تصاريح حج وبيعرفوا يعدوا من نقاط التفتيش لكن غالباً إن لم يكن كلها بياجروا سكن في منطقة العزيزية .. وهي منطقة ناحية الجمرات وخارج نطاق المشاعر المقدسة . وبالتالي الناس بتضطر تروح تقضي عدة ساعات من الليل في مِنى ... عشان كده هي مش مناسبة للناس الكبيرة أو المريضة عشان هايقضوها رايح جاي كل يوم بالمنظر ده ... وتكلفتها بتكون زهيدة جداً ولا تتعدى 2000 ريال للفرد عشان السكن مأجرينه رخيص وما فيش تكلفة لتصاريح الحج ولا في تأمين بيدفعوه للحكومة كما يدفع أصحاب الحملات الرسمية ... وبيعتمدوا على إن السكن بيكدسوا فيها ناس كتيره فممكن تلاقي غرفة فيها 10 أفراد مثلاً ... وبتتضح معالم تلك الحملات مع أقتراب موسم الحج وعن طريق تداول الأخبار بين الناس المهتمين بتأدية فريضة الحج . ..

على جنب بقى .. الموضوع ده مُربح جداً وأقل ربح بيحققه الشخص من دول بيبقى 100 الف ريال

[hOuSsAm]

من خبرتى فى قصة الحج 90 % من الشركات مبيرفضوش انهم يطلعوا الناس بدون تصاريح (ولا سيما ان هيبقى معاهم حد بتصريح)

بس الصعوبة زى منا شايف فى انتقال والدك ووالدتك بالباص من الرياض لمكة هتبقى عملية شاقة جدا ومتعبة بنتكلم فى 12 ساعة سفر فى احسن الاحوال وربطة على كرسى الباص

فانا برجح راى سى السيد انهم يحجزوا على شركات فى جدة (واظن ان سعرها بيبقى ارخص من الرياض) ويجوا طيران على جدة ويركبوا فى الباص حيث ان المسافة بتاخد اقل من 3 سعات باذن الله مع زحمة التفتيش

ولو حضرتك خايفة ان شرطة الطيران الداخلى ميرضوش يركبوهم وهما محرمين عشان هما زيارة ممكن يسافروا بملابسهم العادية على اول ذى الحجة وبكدة هيبقوا اقاموا فى جدة اكتر من 3 ايام ومن حقهم فى الحالة دى يحرموا من جدة باعتبار انهم من اهل جدة

من الاماكن اللى هتبقى مناسبة لحالتهم الفئة أ وهى اقرب فئة فى الجمرات

وفيه هناك مبانى فندقية بنها وبين الجمرات حوالى 500 متر وهى ليست كالخيام ولكنها فنادق (وعدد الافراد فى الجرة بيبقى قليل بس مش عارف كام بالظبط)

وسعرها اظن فى حدود المبلغ اللى حضرتك قولتيه بس طبعا السعر بيتغير من عام للاخر تبعا للعرض والطلب

اطئنى وباذن الله الامور هتمشى على خير

حج مبرور وذنب مغفور باذن الله

[se_ Elsyed]

معليش يا حسام تعليق بسيط

من خبرتى فى قصة الحج 90 % من الشركات مبيرفضوش انهم يطلعوا الناس بدون تصاريح (ولا سيما ان هيبقى معاهم حد بتصريح)

طب خد لك لفه كده في البطحا حيث عشرات المكاتب هناك .. وبس قول لهم أنا زيارة وهادفع اللي إنتو عاوزينه بس أحج ... وشوف هايقولوا لك إيه ؟

بيرفضوا رفض قاطع طبعاً عشان مش عاوزين مشاكل مع حد ..

أصل الحملات الرسمية بيبقى صابعها تحت ضرس وزارة الحج .. لانهم بيدفعوا تأمين باهظ جداً مقابل تأجير الخيام وأي مخالفات أخرى .. وبالتالي أي مخالفة عليهم بيبقى مضمون إنها تتخصم من المنبع وتقطم وسطهم ..

ممكن تلاقي ناس توافق بس دول بيبقوا حاجه صعبة قوي والحملة بتاعتهم اي كلام في تجهيزاتها وغالباً برضوا بتبقى الخيام بتاعتهم يا في العزيزية يا في مزدلفة خارج مِنى ..

ولو حضرتك خايفة ان شرطة الطيران الداخلى ميرضوش يركبوهم

الشرطة مالهاش دخل بالموضوع ده لا من قريب ولا من بعيد طالما الزائر تأشيرته صالحه فماحدش له الحق يسأل ويقول له إنت رايح فين وجاي منين ... لإن لو الموضوع كده فأبسط شيء الواحد يعمله

لو رجل ... يبقى يطلع الطيارة بملابسة العادية ويُحرم في الطائرة وقت المرور فوق الميقات .. وكل الطيران الداخلي لجده لديهم تعليمات لا يحيدون عنها بالتنبية المستمر على الركاب بأقتراب مكان الميقات ..

ولو ست . مجرد النية للاحرام فوق الميقات تكفيها ...

[moamana]

اولا شكرا لكل اللى رد على

ثانيا و الله يا استاذ حسام انا سالت على الغرف التو توجر فى منى لقيت الفرد فى حملة زى ديه بيكون من 11 الف ريال و انت طالع عشان بيسموه حج

vip

طيب يعنى احنا لو سافرنا جدة قبل ميعاد الحج ب3 ايام ينفع نحرم من جدة ردوا بفتوى صحيحة ارجوكم عشان احجز طيران اليوم

[moamana]

و على فكرة مكتوب على موقع طيران سما انهم مبيسمحوش غير لحاملى تاشيرة الحج و العمرة انهم ينزلزا فى مطار جدة فى موسم الحج اما الزيارات اللى على بقية المدن ........لا

و الله اعلم

[se_ Elsyed]

و على فكرة مكتوب على موقع طيران سما انهم مبيسمحوش غير لحاملى تاشيرة الحج و العمرة انهم ينزلزا فى مطار جدة فى موسم الحج اما الزيارات اللى على بقية المدن ........لا

و الله اعلم

والخطوط السعودية بتعمل كده ... بس ده للي جايين من خارج السعودية عشان يخفوا الضغط على مطار جده ..

لكن الرحلات الداخلية مالهاش دعوه بالكلام ده

[hOuSsAm]

طب خد لك لفه كده في البطحا حيث عشرات المكاتب هناك .. وبس قول لهم أنا زيارة وهادفع اللي إنتو عاوزينه بس أحج ... وشوف هايقولوا لك إيه ؟

بيرفضوا رفض قاطع طبعاً عشان مش عاوزين مشاكل مع حد ..

أصل الحملات الرسمية بيبقى صابعها تحت ضرس وزارة الحج .. لانهم بيدفعوا تأمين باهظ جداً مقابل تأجير الخيام وأي مخالفات أخرى .. وبالتالي أي مخالفة عليهم بيبقى مضمون إنها تتخصم من المنبع وتقطم وسطهم ..

والله يا باشا انا عملت اللفة دى قبل كدة (فى جدة) يمكن اكتر من 8 شركات كانوا موافقين وشركة واحدة اللى رفضت

وكلهم شركات مرخصة وسمعتها كويسة فى السوق

وان مكنش بيتكلم عالملاء هاتهم بيقول على جنب طيب تعالى احجزلهم وربنا ييسرلك الامور

انا مش عايز اقولك فى سنة من السنين كانوا نسبة اللى معاهم تصريح فى اتوبيس احدى الحملات كانوا كام فى المية (كانوا باين 8 فى الاتوبيس) يعنى حتى مكملوش 15 %

وقيس على ده باقى الاتوبيسات وباقى الشركات

طيب يعنى احنا لو سافرنا جدة قبل ميعاد الحج ب3 ايام ينفع نحرم من جدة ردوا بفتوى صحيحة ارجوكم عشان احجز طيران اليوم

انا متاسف يا جماعة عالفتوى دى حيث اختلطت عليا الامور

ارجو مراجعة حد من العلماء يقول رايه ايه

[moamana]

الحمد لله الحج قرب و احنا لازم نساعد بعض

فانا هقولكم انا و جوزى قررنا ايه

احنا هنسافر جدة بالعربية و نسيبها لواحد صاحبه هناك

و طبعا معاى بابا و ماما و حماى و طفلى الصغير

عشان تكاليف الحج طيران كثير

و كمان عشان نقلل تمن الحج هنلتحق بالحملة من جدة

و ربنا مكعانا و يوفقنا باذن الله

[elrasy]

الحمد لله الحج قرب و احنا لازم نساعد بعض

فانا هقولكم انا و جوزى قررنا ايه

احنا هنسافر جدة بالعربية و نسيبها لواحد صاحبه هناك

و طبعا معاى بابا و ماما و حماى و طفلى الصغير

عشان تكاليف الحج طيران كثير

و كمان عشان نقلل تمن الحج هنلتحق بالحملة من جدة

و ربنا مكعانا و يوفقنا باذن الله

ويا ترى لقيتوا حملات بتطلع زائرين ؟ لان والدتى جاية زيارة قريب وبدور على حملة