شقة 26 م ... طب تيجي إزاي دي ؟

[se_ Elsyed]

إحترت أين أضع هذا الموضوع .. فقررت إني أضعه أخيراً في باب مكافحة الفساد

الفساد المسئولة عنه الدولة قلباً وقالباً

- لفت نظري خبر الأسبوع الماضي .. لكن في منتهى الغرابة

الخبر بيقول ...

إن سكان الدويقة ومنشية ناصر والمناطق اللي الصخرة وقعت خلصت على كثير منهم ولسه بقى لهم كذا سنة مذلولين ومنتظرين مساكن من الحكومة الغير محترمة ومرميين في الشارع طبعاً .... أقتحموا المساكن اللي بنياها مؤسسة ساويرس واحتلوها ...

فاكرينها ؟

المشروع اللي كان عامله ساويرس وهو عبارة عن فلل دوبلكس بجنينه ومحندقه كده .. تقريباً كانت 160 متر

الناس الغلابة دول أقتحموها وأحتلوها بالقوة الجبرية ...

طبعاً الله يرحمهم .. زمانهم أتسحلوا دلوقت ومشرفين في التخشيبة ...

طب والله أكرم لهم على الأقل مكان يتاويهم وأكل وشرب ... بدل رميتهم في الشارع .. وحسبنا الله ونعم الوكيل في الحكومة من كبيرها لصغيرها

طب الناس دي عملت كده ليه ؟

عملوا كده لإن بعد سنين من الوعود والرميه في الشارع ، الحكومة كانت وعداهم بسماكن جديدة في مدينة 6 أكتوبر .. وشقة لكل واحد ... وحسب الوعود والتأكيدات . الشقة كانت هاتبقى 35 متر ... جم يستلموها لقوها 26 متر

يا نهار مش فايت !!!!

والله العظيم فضلت اقلبها يمين شمال ... هندسياً معمارياً ... هلامياً ... مش راضية تيجي معايا ..

طب يقولوا أوضه ... أو عفشة ميه ... مقبوله شوية

لكن شقة إزاي ؟

يعني نفترض إنها عبارة عن غرفه 4* 4 .. أدي كده معانا 16 متر .... وحمام 1.5 * 1.5 يادوب الناس تدخله سبموكسة بالجنب كده أدي مترين وربع

يبقى كده المساحة 18.25 م

يبقى فاضل عندنا 7.75 ..

نقول مطبخ محندق قوي عباره عن 2 م * 2 م = 4

يبقى فاضل 3 متر ... يادوب الواحد يعدي فيهم طُرقه مثلاً .

مش مهم بقى يحطوا البوتجاز أو التلاجة ولا الغسالة فين ...

ويبقى أكلهم وشربهم ومعيشتهم ونومهم في الأوضه ...

عارف عارف والله إن في أوروبا والدول المتقدمة في حاجه إسمها أستوديو .. بيبقى عبارة عن غرفه وحمام فقط وبيوصل كمان سعره لأرقام فلكية ...

لكن هل الأستوديو ده بتعيش فيه عائلة مكونة من زوج وزوجه وهانقول إنهم مؤدبين وبيمشوا على النظام وعارفين حقوقهم وواجبتهم وبيحددوا النسل ... وعندهم طفلين بس ..

يبقى كل الدنيا دي تتكربس في غرفة واحده ؟ ... وناس تنام على الأرض والباقي يناموا على سرير ..

وبما إننا بنشتكي من العشوائيات وأفرازتها الخطيرة ...

يبقى ليه بيخترعوا عشوائيات أكثر قسوة ؟ ... ونخلق طبقة حاقدة على المجتمع زي الولد عيسوي اللي قتل بنت ليلى غفران ..

كان نفس الموضوع برضوا ..

دخله الشهري من عمله كحداد يتخطى 1000 ج شهرياً ..

لكن عايش هو وأمه وابوه وأخواته الأربعه الكبار .. و كلهم وتخطوا سن الشباب ومش متجوزين طبعاً .. كلهم عايشين في غرفة وصالة وحمام مشترك مع الجيران ... والمطبخ كاسرين المنور وعاملينه مطبخ ..فبالتأكيد الدنيا كانت سودا في وشه وماعندوش أمل في الحياة إنه يشم نفسه حتى ... بالاضافة إلى البيئة الميحطة به والمخدرات .. كل ده ينضرب في الخلاط ويطلع لنا مجرم أراري

مازالت أتذكر من وقت قريب سنة أو أتنين ... السيد الرئيس القائد كان بيفتتح مشروع مبارك للأسكان والحركات والشقة مساحتها 60 م .. فبيسأل أحمد المغربي

هي الشقق صغيرة كده ليه ؟

فالمغربي قال له : لأ ما هي دي حضرتك الناس بتبدأ فيها حياتها وبعد كده بيشتروا شقق أكبر ...

ههههههههه

أومال لما 60 صغيرة ..

تبقى 26 إيه ؟

تُربه ... قبر يعني ؟

لا حول ولا قوة إلا بالله

[Howayda Ismail]

يعني نفترض إنها عبارة عن غرفه 4* 4 .. أدي كده معانا 16 متر .... وحمام 1.5 * 1.5 يادوب الناس تدخله سبموكسة بالجنب كده أدي مترين وربع

يبقى كده المساحة 18.25 م

يبقى فاضل عندنا 7.75 ..

نقول مطبخ محندق قوي عباره عن 2 م * 2 م = 4

يبقى فاضل 3 متر ... يادوب الواحد يعدي فيهم طُرقه مثلاً .

فكرتنى بالخالة نوسة فى فيلم يانا ياخالتى وهى فى السجن وهى تجيبها يمين تقيسها شمالعشان عفاريتها

خمسة يناموا هنا وستة هنا وفى الاخر قالت حاحير نفسى ليه ضربت الستات وكومتهم على حنب فى الركن

واستولت على المكان.

وهو ده اللى عاوزاه الحكومة الناس تاكل بعضها من الضيق والخنقة مش كفاية حبستهم جوة نفسهم

لأ تزود عليهم سجن المكان ربنا يضيقها عليهم الحرامية زى ماضيقوها على الناس

[المهندسه]

يا استاذ سين سين انت مستغرب ليه مساحه 26 متر مناسبه جدا ...انت جيت فى منطقتى لعبتى يعنى افهمهالك من وجهه النظر المعماريه و هقنعك

الحمام بيبقى عباره عن قاعده فقط 1X1=1 اما الحوض بيكون هو نفسه بتاع المطبخ

عدد 2 غرفه نوم 2.5X3=7.5 =15و على فكره دى مساحه مناسبه للمساكن الاقتصاديه يعنى فى اقل من كده و ما تستغربش

مطبخ 2X2=4 على العلم ان المطبخ ملوش باب زاويه فقط

يبقى كده المجموع 20 متر و السته الفاضلين دول صاله 2X3 و المساحه دى تسمح تحط ثلاجه و كمان غساله وكنبه

اديها اتحلت زعلان ليه بقه دى الحكومه عارفه شغلها تمام و ماشيه بمنهج علمى يا سيدى

ماتستغربش فى فعلا مساكن بتتصمم و تتنفذ بالمواصفات دى و ما اكثرها فى مصر و انا طبعا شوفتها بحكم عملى

و مع انها من وجهه النظر المعماريه سليمه لكن الحقيقه هى غير ادميه تماما و تجيب الاكتئاب من صغر المساحات دى لكن تقول ايه فى

البلد البتعامل شعبها بطرق غير ادميه وما بتحترمش شعبها على عكس البيحصل مثلا هنا فى السعوديه و طبعا انت عارف اكتر منى

ازاى الحكومه هنا اهم حاجه عندهم المواطن السعودى و راحته و عاملين نظام سعوده لراحه المواطن السعودى.. الشعب المصرى ده

عاوز لجنه حموم الانسان على رأى اللمبى

انت بتقلب علينا المواجع ليه الواحد فى رمضان و مش عاوز يشيل فى قلبه من البلد و اللى فيها و يقول كلمه كده و الا كده على البلدو فيهم.. اسكت يا لسانى.. اللهم انى صايمه

تم تعديل 19 أغسطس 2010 بواسطة المهندسه

[سكر]

أومال لما 60 صغيرة ..

تبقى 26 إيه ؟

تُربه ... قبر يعني ؟

لا حول ولا قوة إلا بالله

فكرتنى لما الكفراوى كان متضايف من الشقق 67 متر وقال ان ايام لما كان وزير

كان القانون بيقول ان التربه يجب ان لا تقل عن 60 متر

[engmido]

والله يابو عمر الواحد كل ما يخش يلاقيك فاتح موضوع وصدمة جديدة فما بقتش عارف اقول ايه من الصدمة

غير خسبى الله ونعم الوكيل ....لك الله يا مصر

[جسار]

زمان أيام الزيارات المفاجئة أفتتح الرئيس مشروعا لجمعية صقر قريش

عبارة عن مجموعة من العمارات متوسطة الاسكان ، وبعد الفرجة والشرح ، نزل الرئيس ونظر للشوارع فوجدها لاتزيد عن

4 متر بين كل صف عمارات ، فكانت مقولته العظيمة : هى الشوارع ضيقة كده ليه أبقوا وسعوها ، وكان الرد الفورى

حاضر يا أأفندم !!!