سرقة لوحة زهرة الخشخاش .. للمرة الثالثة

[se_ Elsyed]

لو الراجل الكبير لسه فيه نفس يقرا

تبقى مصيبة لو سكت - كعادته -

وهايسكت أنا عارف .. أصل فاروق حُسني له وضع - خاص -

تخيلوا يا جماعة إن متحف محدود زي ده تبلغ عدد غرفه 20 غرفه فقط ... بيشتغل داخله كام قفا ؟

تخيلوا كام موظف ورجل أمن ؟

120

ههههههههههههههههههههه

يعني أكتر من الزوار اللي بيزروه في شهر مثلاً

الأعجب بقى وما يتكشف كل لحظه من مهازل لا يُمكن أن تحدث إلا في العصر المبارك ..

الأعجب أن هناك 3 أنواع من الحراسة فيه .... مصيبة صح ؟

وهما

شرطة وزارة السياحة

شركة أمن خاصة ...

موظفين أمن تابعين لوزارة الثقافة

ههههههههههههه

فانله

وقميص بست زراير

وكرافته مربوطة ..

وجاكت بدله

ومع كده الفانلة أتسرقت

وفعلاً .. لبسها الحاج شعلان وأصدر النائب العام قراراً بحبسه هو وبعض موظفي المتحف

تماماً تماماً مثلما حدث في الكارثة المفجعة في إحتراق قصر ثقافة بني سويف سنة 2005 وتفحم 32 شخص منهم نقاد فنيين وصحفيين ... ووزير الثقافة ما حدش مس شعره منه .. ولبس القضية ناس أبرياء مالهمش دعوه بالموضوع

حسبي الله ونعم الوكيل

[se_ Elsyed]

مقال في الجون لبلال فضل

أزهى عصور الخشخاش

بقلم بلال فضل ٢٤/ ٨/ ٢٠١٠

انظروا إلى الجانب المشرق من الصورة. جميع لوحات الوزير الفنان فاروق حسنى بخير.

ثم احمدوا الله على كل حال، لكى يزيدكم من نعيمه، ولا تنسوا أنهم إذا كانوا قد سرقوا لوحة زهرة الخشخاش، فنحن والحمد لله مازلنا نمتلك البرواز، ويمكن أن نضع بداخله أى لوحة من لوحات الوزير الفنان ونقول للعالم إنها لوحة زهرة الخشخاش، «حتى أهوه هذه البقعة هى الزهرة وهذا الخليط اللونى المتنافر هو الخشخاش»، ولا تسألوا إذا كان العالم سيصدقنا أم لا، فذلك السؤال لم يشغلنا عندما قلنا له بكل فخر إننا قفشنا الذين سرقوا اللوحة وإنها رجعت كاملة لينا، ثم اتضح بعدها بدقائق أن ذلك لم يحدث، وأن وراء تلك المهزلة سياسة «قالوا له» التى ينتهجها أهل بلادنا من أتعس غفير إلى أطول وزير.

تصدقون بالله، أنا اللى صعبان علىّ فى هذه الحكاية هو المرحوم فينسنت فان جوخ، الذى لم يكفه أنه عاش فقيرا كئيبا، ومات محسور القلب مقطوع الأذن مكروش النفس، ثم لم يكتف الزمن الوغد بكل هذا العذاب الذى ألحقه به، بل حكم عليه عندما أصبحت لوحاته تساوى ملايين الدولارات، أن تأتى لوحة من أجمل لوحاته وأشهرها إلى بلاد حكمها أناس جعلوا عيشة أهلها هبابا، فبعد أن كان أجدادهم أول من أبدع الفنون وعلموها للدنيا، أصبح أحفادهم يعتبرون زيارة المتاحف «فضا وروقان بال»،

ولا يعرفون أن فى متاحفهم كنوزا يأتى الناس من أنحاء الدنيا لزيارتها، ولا يتورع بعضهم عن انتهاز أى فرصة للمساعدة على سرقة هذه الكنوز وبيعها لأى راغب مقتدر، عملا بالمبدأ الذى يعتنقونه منذ عصور المماليك «لو بيت أبوك خرب الحق وخدلك منه قالب»، وهو مبدأ بات الذين يجلسون منهم للتآمر على سرقة لوحة أو تمثال أثرى، يفككونه إلى جمل أخرى أكثر تفصيلا من نوعية «يعنى هى جت علينا إحنا.. ما البلد كلها بتتسرق.. على الأقل إحنا باللى هنسرقه هنأكِّل عيالنا ونستّر بناتنا.. وبعدين هى اللوح والآثارات دى بتاعة حد.. مش أحسن ما هى متلقحة ومافيش حد بيبص عليها نطلع بلقمة حلوة منها.. وبعدين هو يعنى إحنا هنسرق حاجة تنفع الناس.. ده شغل فاضى بتاع ناس فاضية.. ياخدوه بقى الخواجات اللى هم أولى بيه»، ولا تستبعد أبدا أن يكون أحد هؤلاء قد شارك فى سرقة اللوحة بقلب جامد لأنه سمع مرة شيخا يفتى بأن الفن التشكيلى حرام لأنه تجسيد لخلق الله، مع أن لوحة (زهرة الخشخاش) تنتمى إلى فئة لوحات الفاكهة والأنهار والحقول والأزهار، التى يتسامح معها بعض الشيوخ المتشددين.

عارفين، لو كان أخونا فان جوخ حيا يرزق لما فَوّت هذه الفرصة التاريخية لكى ينتج أجمل أعماله الفنية على الإطلاق، ويرسم جدارية كبيرة يسميها (دولة الخشخاش) تصور أحوال دولة يحكمها نظام فردى معمر، يتسامح مع خطايا الوزراء إذا كان دمهم خفيفا على قلبه، ولا ينسى لهم أنهم أدخلوا له المثقفين الذين كانوا يوجعون قلب نظام الحكم إلى الحظيرة، لذلك يبقى الوزير ملتصقا بكرسيه مهما حدث، سواء احترق فى عهده نخبة من أجمل مسرحيى البلاد، أو احترق أثر إسلامى فريد بسبب إهمال وزارته، أو تساقط كبار مساعديه بتهم الفساد دون أن يُساءل سياسيا عن اختيارهم، أو أصبحت المتاحف ملطشة لكل من يرغب فى تحسين دخله، أو ماتت صناعة السينما التى كانت نوارة البلاد وفخرها بين الأمم، أو ساد التطرف والجهل أرجاء البلاد، فى حين يفضل الوزير أن يكلم نفسه ومثقفى حظيرته فيعقد لهم مهرجانات المسرح التجريبى ومؤتمرات النقد التفكيكى وسمبوزيومات الفنون النخبوية، دون أن يسأل أحد: لماذا لم تساهم كل تلك الفعاليات الرائعة فى تقدم البلاد وأهلها، بل أدت إلى انعزال الثقافة ورواج التطرف، ولا لماذا يعتبر الوزير أن ما قام به من إنجازات لا يمكن إنكارها فى مجالات النشر والآثار والفنون التشكيلية وقصور الثقافة نِعَمٌ يتفضل بها على البلاد وكأنه أنفق عليها من جيبه الذى أتخمته حصيلة بيع لوحاته لرجال الأعمال، الذين لم يفكر أحد فى أن يسأل، ولو مجرد سؤال، عن طبيعة التطور المذهل فى أسعارها منذ توليه الوزارة، ولا عن كون متاجرته فيها أثناء توليه الوزارة أمراً يخالف القانون.

خلال زيارة الرئيس مبارك الأخيرة إلى المتحف الإسلامى، الذى لا يمكن إنكار أنه إنجاز لوزير الثقافة، حتى لو كان قد تأخر عشرات السنين، وقف الوزير فالقا ضبه عن ابتسامة طويلة وهو يحكى للرئيس عن أكبر متحف فى العالم سيقام بفضل سيادته ويضم مئات الآلاف من القطع الأثرية النادرة، سأله الرئيس عن موعد فتح المتحف، فطالت ابتسامة الوزير أكثر وحدد له عدداً من الشهور ثم قال للرئيس: «بس هنستسمح سعادتك إننا نتأخر كام شهر»، فرد عليه الرئيس مستغربا «ليه.. مش حددتوا معاد للافتتاح يبقى تلتزموا بيه»، فطالت ابتسامة الوزير حتى صارت أطول من الدكتور أحمد نظيف وقال له «معلهش سعادتك مافيهاش حاجة يعنى..

كلها كام شهر تأخير بس هيبقى إنجاز عالمى وكله بفضل سيادتك ورعايتك للمتاحف والفنون»، تذكرت هذا الحوار الذى كان يوحى بأن الوزير مسيطر على تفاصيل الوزارة وقابض على مقاليدها، وأنا أتابع بذهول المهازل التى تكشفت عن أحوال متحف محمد محمود خليل، ونقلتها كبرى المواقع العالمية لتصير فضيحة دولية بجلاجل، فقرأت الفاتحة وآية الكرسى والمعوذتين بنية أن يحمى الله ما تبقى من آثارنا المعروضة فى المتاحف التى تقع تحت مسؤولية وزير، لم يفكر حتى فى تأمين أقرب هذه المتاحف إلى مقر وزارته، برغم أنه يحوى بعضاً من أغلى وأهم اللوحات فى العالم.

نصيحة: اقرأوا معى الفاتحة وآية الكرسى والمعوذتين، وبعدها انظروا إلى النصف الملآن من البرواز، إذا كانوا قد سرقوا زهرة الخشخاش، فالخشخاش نفسه موجود فى السوق. وقضا أخف من قضا.

[أسد]

هل الإعلان الكاذب عن الوصول إلى سارقي اللوحة

وهل كون هذا الإعلان صدر عن مسئول كبير الوزير

ثم ظهر أن هذا الإعلان غير صحيح

ثم قال الوزير أن من أبلغه هو مسئول كبير آخر ولكن أقل منه

ثم اتضح أن هذا المسئول الكبير اللي أقل منه هو من تباطأ في تطوير المتحف

وأنه كان من المفترض إغلاق المتحف لتطويره وتخزين اللوحات بعد أيام من سرقة اللوحة

ثم بدأت التحقيقات .. وتم إتهام هذا المسئول بالإهمال

ثم في خطوة مفاجئة يتقرر حبسه

هل كان هذا الإعلان الكاذب هو فرصة لأن تسترخي أجهزة الأمن ثم يتم تهريب اللوحة في هذا الوقت ؟؟؟؟؟

؟؟؟؟؟؟؟؟

[عادل أبوزيد]

هل الإعلان الكاذب عن الوصول إلى سارقي اللوحة

وهل كون هذا الإعلان صدر عن مسئول كبير الوزير

ثم ظهر أن هذا الإعلان غير صحيح

ثم قال الوزير أن من أبلغه هو مسئول كبير آخر ولكن أقل منه

هل كان هذا الإعلان الكاذب هو فرصة لأن تسترخي أجهزة الأمن ثم يتم تهريب اللوحة في هذا الوقت ؟؟؟؟؟

؟؟؟؟؟؟؟؟

إحتمال كبير أو قل أنه علامة إستفهام كبيرة

أحد التعليقات فى مجلة أجنبية تشكك فى أن اللوحة المسروقة كانت مزيفة و يقول معلومة غريبة أن لوحة مقلدة لزهرة الخشخاش قد بيعت فى لندن سنة 1983 بسعر 43 مليون دولار .... اللوحة كانت أسطورة ......و لكننا لم نكن نستحق حيازتها أو قل وزارتنا لم تكن على مستوى المسئولية

[se_ Elsyed]

بعد ما أُذيع بالأمس في برنامج " مصر النهاردة "

أتمنى أن يتم إعدام وزير الثقافة في ميدان عام .. أو نعلقه على تمثال رمسيس في الشمس والحر وهو صايم لحد ما تاكل الطير من رأسه ..

أذاعوا أمبارح يا سادة تصوير حديث يمكن من يوم او يومين لنظام المراقبة في

في المتحف المصري ..

لا هانقول محمود خليل ولا مختار ولا قصر محمد علي

المتحف المصري العالمي ...

بجد .. شيء مُخزي وحاجه كده من العصور الوسطى

كاميرات مراقبة عتيقة ومتلزقه ومترقعه بشريط لحام " شكيرتون " وكانها خارجه من معركة قادئ ... وباين إنها فعلاً من الكاميرات اللي كانت من 50 سنه .. ويعلوها النعكبوت والغبار بشكل بشع ..

ناهيك بقى عن أجهزة الإنذار ... ياااااااااااه ... فعلاً يستحق أن يكون متحف للأثارات والمساخيط .. والله العظيم بأتكلم جد ... لإن بيتهيألي السياح ممكن يسيبوا توت عنخ أمون وهاتور وأمون رع ويصوروا الأجراس دي على اساس إنها أجهزة إنذار فرعونية من عهد الأسرة السادسة ..

فاكرين جرس البيت أبو نص كورة حديد ده وعليه قطعه حديد بتخبط فيه وترن

هانروح بعيد ليه ..

أنا قمت بمغامرة أمس ونزلت مقبرة الملك سيتي الأول في وادي الملوك وجبت لكم صورة للجرس اللي كان سيتي بيرن به لما يعوز حد من خدامينه

أهو ده جرس الملك سيتي الأول

بيقولك بقى إن هيئة إدارة المتاحف تقدمت لطلب للحكومة عشان محتاجه 40 مليون جنيه لتطوير نظام الأمن بالمتاحف المصرية .. فالحكومة تفضلت وتمطعت وصرفت لهم 500 الف ج ... ههههههههه يادوب حق سجاير أفراد الأمن

وتم بالأمس عرض المراسلات الرسمية التي تمت بين الاخ اللي شال الليلة الدكتور محسن شعلان واللي تم تجديد حبسه بالأمس .. المراسلات دي بقى لها سنتين دلوقت بينه وبين وزير الثقافة عشان تأمين متحف محمود خليل .. ووزير الثقافة ولا هنا وولا كإنه سامع .. لحد الراجل ما لبسها وبالهنا والشفا

[doha]

هي دي الي عاملين عليها القلبة من الصبح

يعني مش بطالة ..بس بيني وبينكم .. يقولوا عدوة ثقافة يقولوا مبتفهمش في الفن والجمال بس رايي الي مقتنعه بيه ان في بلد الناس فيها مش لاقية حق رغيف العيش حرام وقلة حيا كمان وسفة اننا ندفع 500 جنيه حتى مش بس 500 الف في حراسة متحف عدد زواره لا يتجاوز 20 زائر كل يوم ..

افهم اننا نحتفظ باثارنا الفرعونية والمصرية اجمالا وافهم اننا ندفع فيها دم قلبنا حراسة وتخزين لان ده تراثنا منقدرش نتخلى عنه .. لكن مالنا احنا ومال فان جوخ ولا بطيخ .. ازاي يكون عندنا لوحات بالقيمه دي ونحتفظ بيها مركونه عشان يشوفها عشرة عشرين واحد لغايه ماتنسرق ومنروحش من البدايه نبيعها ونعمل بتمنها حاجة تفيد ..

مصر خلاص معادتش بلد سياحية حتى لو البعض لسه معتقد كده . لو الوحات والتماثيل وكيوبيد وابصر كيت الي في المتحف دي انباعت بسعرها وتم توجيه المبلغ لدعم المتحف المصري مثلا ولا اي قطاع سياحي اخر ولا حتى جبنا بيهم عيش حاف للغلابة في العشوائيات كان ابرك من رميتهاكده لغاية ماياخذها صاحب النصيب..

وخلينا كده زي الكحيت بتاع احمد رجب .. مش لاقيين ناكل وعاملين بنفهم في الفن الرفيع .. الرفيع اوي ..

[engmido]

يا اخواننامتصدقوش

وربنا فازة

هههههههه

[عادل أبوزيد]

الفاضلة ضحى

قد تكونى الآن فى حالة من الكآبة نتيجة حادث سرقة اللوحة ، و قد تكون إهتماماتك أبعد ما تكون عن الفن التشكيلى - و لا تلامى على ذلك - و قد تكونى فى مرحلة الكفاح المرير فى رحلة العمر مما لا يتيح أمامك فرصة لرفاهة زيارة المتاحف و المشاركة فى المناسبات الثقافية ، و لكنى أستبعد تماما أن تكون دعوتك لإلغاء الثقافة لصالح رغيف العيش.

ما سبق كان إستهلالا لابد منه

فى أواخر الخمسينيات زار محمود شكوكو المنولوجست المشهور ألمانيا - لا أذكر أى الألمانيتان - و إحتفوا به و حضر العديد من الإحتفاليات الفنية و عندما عاد إلى مصر قال أن مزيكتهم (موسيقاهم يقصد) هى مجموعة من "تخبيط الحلل" هذا لا يعنى فى نظرى أنه غير مثقف و لكن ثقافته مختلفة.

من فضلك قولى لى أنك لا تدعين لإلغاء وزارة الثقافة حتى لا أزعل !

[se_ Elsyed]

أي حياه بدون ثقافة وفن محترم وتذوق للجمال الذي خلقه الله ... تبقى لا مؤخذه حياة تيتتتتتتتتتتتتتتتتت

بالمناسبة .. ذكرت في كتير من مداخلاتي إن سبب من اسباب تفشي ظاهرة العنف واللامبالاة والتبلد والانمالية والقبح بشكل عام في المجتمع المصري هو إهمالنا لمواد مهمه زي الرسم والموسيقى والتربية الرياضية في المدارس

فأصبحنا .. لا دين كويس في المدارس وبقت مادة لا تضاف إلى المجموع ... وقول سلاماً على الاخلاق والتعامل ..

وولا ذوق ولا إحساس بالجمال عشان مدرسين الرسم والموسيقى والتربية الرياضية كمان بقوا عواله وزيهم زي أي تخته أو كرسي في المدرسة

[عادل أبوزيد]

كما ترون اللوحة لم تسرق و لكن تم إغتيالها و إتلافها فإن الأختام و الىملصقات فى ظهر اللوحة جزء مهم من البطاقة الشخصية للوحة.

و قد كنت فى حديث مع عديلى و هو إبن المرحوم أحمد صبرى رسام البورتريه الشهير و صرح لى أنه منذ عشر سنوات زار متحف محمود خليل و توقف أمام لوحة فان جوخ (زهرة الخشخاش) و طلب من المسئول أن يريه خلفية اللوحة فأوقف الرجل جهاز الإنذار و قلب اللوحة فما كان منه إلا أن قال اللوحة دى مزيفة ليس فى ظهرها أختام أو ملصقات و ضحك الرجل و لم يبد عليه أنه إقتنع.

[se_ Elsyed]

نجيب ساويرس يرصد مكافأة قدرها " مليون جنيه " لمن يُدلي بأي ملعومات تقود في العثور على اللوحه المسروقة

القاهرة - أكد المهندس نجيب ساويرس أن المكافأة التي أعلن عن منحها لمن يدلي بمعلومات تسهم في إعادة لوحة زهرة الخشخاش انطلقت من دافع الحزن الذي تملكه بعد معرفة خبر سرقة اللوحة‏.

وأضاف أن هذه اللوحة أعرفها وشاهدتها وأعتز بها كأي مصري لأنها جزء من تراثنا‏.‏

وقال في تصريحات عبر الهاتف من الولايات المتحدة‏ أعتقد أن المكافأة قد تساعد أجهزة البحث المعنية في التوصل لمعلومات تؤدي لاستعادة اللوحة‏،‏ واعتقادي أن هذه اللوحة لا تزال داخل مصر ولم تخرج‏,‏ وأن هناك طرفا آخر غير السارق لديه معلومات‏،‏ والمكافأة قد تشجعه‏،‏ ولدي أمل كبير في ذلك‏‏ للإدلاء بمعلومات تفيد الأجهزة المعنية‏.‏

وعبر ساويرس عن تفاؤله بعودة هذه اللوحة المسروقة‏.

وكان رجل الأعمال، المهندس نجيب ساويرس، قد أعلن عن رصده لمبلغ مليون جنيه لمن يدلي بمعلومات مؤكدة تؤدي إلى العثور على لوحة زهرة الخشخاش، للفنان العالمي فان جوخ، والتي سرقت متحف محمود خليل في 21 اغسطس الجاري.

وتم تخصيص رقم الهاتف ( 0224884500 ) لتلقي الاتصالات، والإدلاء بمعلومات عن واقعة السرقة.

بصراحة .. حركة رجولة محترمة قوي قوي

[se_ Elsyed]

خلاص ... بخخخخخخخخخخخخخخخخخخ

إتطبخت وأستوت وبقت تستاهل الأكيله ... همممممم يا جمل

محسن شعلان إتصالح مع فاروق حُسني وخدوا بعض بالأحضان والقبلات والذي منه من يومين

ونفس شعلان اللي كنت باحترمه طلع عضو عامل في عصابة الحكم وصرح وقال إن لوحة زهرة الخشخاش لوحه " زبالة " بالنص كده والله

وهو طبعاً كان شغال في متحف بيعرض لوح زبالة .... بالرغم من إن صندوق الزبالة ده يسوى أكتر من 50 مليون دولار ...

يعني ممكن واحد بكره يطلع يقول إن هرم خوفو زبالة ... أو معبد الكرنك خرابه .... ويالا نبيعه هييه هييه

وأهو شعلان عشان البؤين دول .. هايتعين مستشار في وزارة الثقافة مكافأة له على تعاونه مع الحرامية اللي كلنا عارفينهم طبعاً

الثقافة: تعيين شعلان مستشاراً الأسبوع المقبل

الخميس، 28 أكتوبر 2010 - 11:18

محسن شعلان

كتبت دينا عبد العليم

يدرس أشرف العشماوى المستشار القانونى لوزير الثقافة، حالياً قراراً بتعيين محسن شعلان فى وظيفة مستشار فئة "أ"، وهى وظيفة ليس لها سلطات إدارية، إلى أن تنظر المحكمة يوم 9 ديسمبر المقبل فى قضيته على خلفية سرقة لوحة "زهرة الخشخاش" من متحف محمود خليل، ومن المنتظر أن يصدر القرار خلال الأسبوع المقبل.

ورداً على سؤال بشأن مجريات القضية والتوقعات بشأنها، أكد وزير الثقافة فاروق حسنى فى بيان صحفى صادر عن الوزارة صباح اليوم، أنه لا يجب الخوض أو التحدث فى القضية بأى شكل من الأشكال، خاصة أنها ما زالت منظورة أمام القضاء بشقيها الجنائى والإدارى ولم يبت فيها إلى الآن.

وأعرب حسنى، فى البيان، عن تمنياته أن ينال محسن شعلان توفيقاً من الله سبحانه وتعالى أثناء القضية، سواء فى الشق الجنائى أو الشق الإدارى.

[se_ Elsyed]

تخيلوا إنطباع العالم المحترم اللي بيقدر الفن المحترم لما يسمعوا هذا الكلام غير المحترم ؟

بصراحة الله يبارك لأي حرامي سرق اللوحه ... لو كان بيفهم في الفن وعاوز يستمتع بها مش يعمل سبوبة

فعلى الأقل هو خلصهم من زبالة كانت ممكن تجيب لهم أمراض يععععععععععععع

[nightmare]

تخيلوا إنطباع العالم المحترم اللي بيقدر الفن المحترم لما يسمعوا هذا الكلام غير المحترم ؟

بصراحة الله يبارك لأي حرامي سرق اللوحه ... لو كان بيفهم في الفن وعاوز يستمتع بها مش يعمل سبوبة

فعلى الأقل هو خلصهم من زبالة كانت ممكن تجيب لهم أمراض يععععععععععععع

تصدق بالله يا سي السيد يا أخويا , ان الواحد أحياناً لما بيقعد مع نفسه كده تجيله بعض الأفكار الشيطانية في دماغه , وبسأل نفسي انا واجع قلبي ليه ومتغرب وبتاع علشان الوفات , طب ما الواحد يروح على حتة متحف زي ده ويعلق لوحة حلوة زي دي ويمشي ولا هي محتاجة خطة ولا محتاجة احتراف يعني ولو بعتها ان شاء الله يكون بمليون جنيه حتى ما انا الكسبان لو قعدت في الغربة 15 سنة مش هعملهم.

او الواحد كان وافق على عرض المدير بتاعه في مصر ومضيت على توريد السيرفرات المضروبة اللى أعلى من قيمتها 4 او 5 أضعاف , وكنت اتفقت معاه على ربع مليون والا حاجة بدل ما عملت فيها الشهم المناضل وفضلت 4 سنين اخد 124 جنيه ولا عارف اعيش بيهم ولا عارف اسيب الشغل واخد اجازة , ده السيرفر الواحد ثمنه معدي ال 400 الف وهو ولا يسوا 60 الف على بعض ودول كانوا 15 سيرفر يعني ربع مليون مش قصة يعني, فأكيد كان هيوافق , ده هو بعد المناقصة دي اخد شقة في المهندسين بدل فيصل تجلها ببتاع 2 مليون.

بس العقبة الوحيدة ان الواحد مش قادر لاننا متربيين ان الواحد ما يمدش ايده على مال حرام ولا ياكل منه

حسبي الله ونعم الوكيل في الناس اللى خلتنا نفكر في كده

مع تحياتي

تم تعديل 28 أكتوبر 2010 بواسطة nightmare