تكرار إنقطاع الكهرباء .... إرتفاع أسعار مولدات الكهرباء

[se_ Elsyed]

بنجاح منطقع النظير ... تمكنت حكومتنا الذكية بقيادة الرجل الذكي أحمد نظيف من إعادة البلاد إلى عصور الظلام وعصر الكلوبات ومصابيح الجاز اللي كانت من 60 عاماً وأكثر مضت ... كل هذا تحت القيادة الحكيمة للسيد القائد محمد حسني مبارك

أتصلت بعد الفطار النهاردة بأخي العزيز وصديقي الأستاذ أسد .... عضو مكتب الأرشاد .. قصدي الأشراف .. عشان أسلم عليه ونفطر سوا قريباً . لقيته بيحكي لي على موضوع انقطاع الكهربا في مصر والمهازل الحاصلة الأن

والله ما فيش 10 دقايق .. لقيت اخويا بيتصل بيه من مصر بيطلب مني أسأل له على سعر مولد الكهرباء ( الجينيريتور ) هنا في السعودية لان الوضع أصبح لا يُطاق والكهربا بقت تطقع مرتين تلاتة بشكل يومي وشكلنا على الأقل هانقعد في السواد ده سنتين .. ولو جمال مسك بعد ابوه يبقى فيها عشرين سنة تاني ظلاممممممممممممممممم

الغريب بقى .. أخويا بيقول لي إني كنت في شارع الجمهورية من 3 شهور بالظبط ... وسأل بالصدفة على سعر مولد الكهربا في محل كان بيشتري منه أشياء أخرى .. وعمر ما حد كان ييجي في باله يشتري مولد كهربا ولا شمع حتى ... فالراجل قال له 800 ج

أمبارح وهو هو نفس الأتوبيس السياحي الفاخر ونفس المحل ونفس الجينيريتور .... ههههههههههههههههههههههههههههههههههه بقى بـ 2000 ج

يالله .. خلي طبقة من أثرياء الحرب تظهر وتقب على وش الدنيا على حساب جثث الشعب

[شريف مان]

أنا حاسس انى فى كابوس

أمتى امشى من ام البلد بقى

md2:

[ozoozo]

اشاعه قويه تتردد ان احمد عز يمتلك مصنع شمع والناس ولاد التيييييت ماكانتش بتشتري الشمع غير في المناسبات وبس

:lol:

[se_ Elsyed]

اشاعه قويه تتردد ان احمد عز يمتلك مصنع شمع والناس ولاد التيييييت ماكانتش بتشتري الشمع غير في المناسبات وبس

:lol:

وليه ما تقولش إن في واحدصيني عمل فينا المغرز ده عشان بدل ما نلعن الظلام يبقى نروح نشتري جينيريتور ؟؟

[pink rose]

و الله حاجه اخر قلة ادب و سخافة

كل يوم بعد الفطار على طول كانهم ظابطين الساعه يقطعوا النور من 10 دقايق لنص ساعه حسب المزاج دا طبعا في المناطق اللي على البحر

اما في المناطق الشعبية بقى فا دول غلابة النور بيتقطع من الساعه 6 لحد 10 بالليل وش كده

و الله الناس كلها بتدعي على مبارك و ابنه و على كل الغيلان اللي معاهم

بجد فعلا منهم لله الله ينقم منهم دنيا و اخرة

النهاردة لما النور قطع اختي حكتلنا ان واحدة صاحبتها كانت ماشية في الشارع مروحة بيتها فجأة النور قطع و طبعا ظلام حالك

البنت طلعت الموبايل تنور بيه لنفسها عشان تشوف تمشي طلع عليها اتنين قليلين ادب طبعا البنت فضلت تصوت لحد ما خافوا و سابوها و جريوا و البنت ساكنة في زيزينيا منطقة محترمة مش في عشوائيات يعني

قعدت اقول ياااااااااااااه هانرجع تاني تفتكروا ننور الشوارع بلمض جاز و لا بشعلة زي كفار قريش كده في فيلم الشيماء

و يا سلام بقى لو عينوا شاويش يقول هاع مين هناك

منك لله يا مبارك انت و شلة الفساد اللي نهبتوا بلدنا و خيرها

اقولكم على حاجه كمان عشان يبقى بجملة الكوراث

كنا بنصيف في مطروح كل ما نشوف شقة يسأل على العدد و يقولوا لازم عددمعين في الشقة عشان المايا

عشان المايا ما فهمتش قصدهم ايه

لما سألت عرفت ان شركة المايا اتخصخصت و بقوا اهل مطروح بيشتروا فناطيس مايا يملوا الخزانات عشان المصييفين

و الكل بيقول ان دا بيحصل في مطروح بس لكن قرى الساحل مايا و كهربا على طول عادي

حاجه بقت تقرف بجد

[ابو محمد بن مصطفي]

الواحد مش عايز يضيع صيامه علي ناس متستهلش

ومش نافع فيهم دعا ولا قيام ليل ولا تهجد

تجربتي الشخصية مع الكهربا اصل الموضوع دلوقتي بقي خبرات ولازم نتبادل مع بعض الخبرات دي

صلاة القيام بصليها في الخلاء .... منها احياء سنه وكمان دي الخبرة

تخيل المسجد فيه يجي تلتميت نفر وفجأه انقطع النور هيحصل ايه التكليفيات والمراوح بتعطل....

وتلاقي الناس في الجامع بقي عرقهم مرقهم وخلاص هتفتص

علشان كدة انا بصلي قدام الجامع في الخلاء وفي الهواء الطلق .... هوا ربنا

ومش مهم احنا المهم المواطن الاسرائيلي يلاقي حقه في الغاز واحنا نولع بجاز

ونصيحة بدلا من ان تلعن الظلام ولع في نفسك

ولأزمة الكهرباء اي حاجة ليها علاقة بالكهربا غليت

شمع .... جينيتور ..... كشافات شحن

[mekkawy]

ايــــــــــــــــه يا جدعان md2:

جرى ايه يا عم انت و هو و هي .. مش كدة يعني .. الحكومة شافت مصلحتنا في قطع الكهربا .. فيها ايه دي ؟؟ :closedeyes:

عااااادي جداً .. الحكومة أدرى بمصلحة الشعب و الشعوب المجاورة

طب بالك انت منك له .. الكهربا اللي شغالة طولة الوقت دي بتعمل فولت عالي ع المخ بيسيح الدهون اللي في الجسم مما يسبب الضرر على باقي أعضاء الجسم smk:

و ثبت علمياً إن قطع الكهربا ده شئ مفيد جداً .. و ثبت تاريخياً إن أمريكا إبان الحرب العالمية الثانية كانت بتقطع الكهربا و كان ده سبب تفوقها على اليابان بعكس ما هو معروف ان القنبلة الذرية هي السبب!!!!

بطلوا ظلم و افترا بأة ع الحكومة يا ظلمة ده احنا في رمضان .. كهربة ايه و بتاع ايه اتهدوا شوية يا شعب نمرود يخاف ما يختشيش

مكاوى .. تحيا مصر

[pink rose]

عاملين جروبات جديدة على الفيس بوك بمناسبة الكهربا

منها

الحملة القومية ليه تدعي على الحكومة لما ممكن تشتري لمبة جاز

مصر تحتفل بعيد الفطر على لمبات الجاز