عيد ميلاد بيت العيله

[مغتربة]

بيت العيله دا الاسم الجميل الى اطلقته ماما قلب ابيض على منتدانا الجميل

و انا اقتبسته منها علشان اقول لكم ان فكرت ان احنا نعمل عيد ميلاد للمحاورات الجميله الى جمعتنا مع بعض و ساهمت مساهمه مباشره فى زياده ثقافتنا و توسيع رؤيتنا و افاقنا الفكريه

كنت حابه جدا نعمل عيد ميلاد للمحاورات زى ما بنعمل لبعضينا و بنهنى بعضنا

عايزين نحتفل بيها و نعمل لها احتفال كبير و جميل يمثل مدى معزتها و مكانتها عندنا

بس واجهتنى مشكله انى معرفتش اوصل لتاريخ عيد ميلادها

دورت فى المنتدى بس معرفتش اوصل تحديدا لاول يوم ابصرت المحاورات فيه

فياريت استاذ عادل او اىا من الاخوه الافاضل المشرفين يمدونا بالمعلومه دى

و عايزة اسمع رايكم انتم كمان فى الفكره و يا رب الفكره تتنفذ و نعرف نعمل احلى عيد ميلاد لاحلى محاورات

ها ايه رايكم

و الى عنده اقتراح ياربت يضيفه علشان نوصل لاحسن فكره

[se_ Elsyed]

فكره جميله طبعاً يا مغتربة وأي فكره تؤدي إلى ترابط وتقارب بين أعضاء المنتدى فهي مقبولة

إحنا نعمل عيد ميلاد المنتدى على العيد الصغير ونجيب كحك وغريبة وبيتي فور وناكل بقى ونسقي في الشاي .. ماحنا هانكون فاطرين ساعتها

[hOuSsAm]

فكره جميله طبعاً يا مغتربة وأي فكره تؤدي إلى ترابط وتقارب بين أعضاء المنتدى فهي مقبولة

إحنا نعمل عيد ميلاد المنتدى على العيد الصغير ونجيب كحك وغريبة وبيتي فور وناكل بقى ونسقي في الشاي .. ماحنا هانكون فاطرين ساعتها

ممكن تعملوا عيد ميلاد المنتدى يوم عيد ميلادى......... عشان انا بقالى سنتين محتفلتش بعيد ميلادى ووقف نموى عند كدة وحاسس بالاحباط

تم تعديل 25 أغسطس 2010 بواسطة HOSAM ABDELFATAH

[Alshiekh]

السلام عليكم

فكرة جميلة جدا يا أخت مغتربة

أعتقد اننا فى اواخر هذا العام سنكون قد اتممنا عقد كامل ( عشر سنوات ) لا أتذكر التاريخ تماما ولكننى اعتقد انه كان فى أواخر ديسمبر 2000 وهو الارجح أو ربما فى بدايات يناير 2001 لاننى كنت من اوائل المشتركين فى المنتدى ولكن لاسباب فنية تتعلق بالسيرفر غيرت عضويتى اكثر من مرة الى ان استقرت الامور على عضويتى الحالية.

لذلك يمكننا ان نحتفل بهذه المناسبة مع بداية العام 2011 احتفالا بمرور العقد الأول على ميلاد محاورات المصريين .

[عبير يونس]

فكرة جميلة زيك يا مغتربة

المحاورات فعلا غيرت كتير في حياتي

و قضيت فيها أحلى أوقات

و ارتبطت بأعضائها ارتباط شديد و فعلا بأعتبرها بيت العيلة اللي فيه أهلي و ناسي

يارب دايما يكون تجمعنا على الخير

دي بقى تورتاية كده مش قد المقام

يللا اعتبروها السحور

:wub:

[Simba]

تم الارسال 09 October 2002 - 04:05 AM

ده تقريبا اقدم تاريخ لاقدم موضوع في قسم مواضيع جادة

[Alshiekh]

أقدم مداخلتين على حسب اعتقادى

تم الارسال 29 December 2000 - 05:02 PM

لا يوجد بيت تقريبا فى مصر إلا و عرف الرحلات المتوالية للمطار للقاء الأحبة عند عودتهم أو لوداعهم عند سفرهم. و هناك فى أرض غربتهم كأنهم لم يغيبوا و يحملون وطنهم معهم بكل أحلامه و آلامة .. فلنتواصل معهم طول الوقت من خلال ذلك الموقع .. و قد علق الدكتور جمال حمدان فى سفره العظيم شخصية مصر بقوله

,إذا كان المغتربون يخضعون بالضرورة لتغيرات عميقة فى المهجر و الخارج تمس النظرة و التفكير و التجربة و العقلية...الخ

فإن أثرهم الإرتدادى فى مصر ليس يقل خطرا و عمقا سواء ماديا أو غير مادى  .. بل لعلهم يوما ما بفضل حريتهم و ثروتهم  أن يشكلوا قوة تغيير تفوق قوى التغيير داخل مصر نفسها بكل ملايينها المكبوتة,

(Edited by Adel Abuzaid at 12:04 am on Dec. 30, 2000)

تم الارسال 29 December 2000 - 09:45 PM

دول شرق آسيا أدركت أن العلم هو طريق التقدم وأصبحت تجني الثمار، بينما نحن في مصر لا نعرف حتى الآن الهدف من وراء التعليم.

فهل الهدف من التعليم هو شهادة ؟ ففي مصر التعليم مازال من أجل الإمتحان والتقدير، بينما جميع دول العالم أصبحت تهتم على الناحية العملية وتحديدا الإبتكار الذي يقتل في جميع المدارس والجامعات.

ما رأيكم؟ وما الحل؟

[pocy]

فكره ممتازه ومتميزه بجد

ياه المحاورات من 2000 وانا مش سمعت عنها الا من تلات سنين بس

ياريت نجمع اخوانا واخواتنا ونعمل احلى عيد ميلاد لاحلى محاورات

تجمعنا على الخير والتفائل والحوار والاستفسار

اتمنى ان تتفعل الفكره وزى ما قالالاستاذ محمد على 2011 نعمل عيد ميلاد العقد الاول للمحاورات

واتمنى انكم تعملوه فعلا فلا ارض الواقع فى مكان صغير يضم من هم متواجدين فى مصر للعلم انا ان شاء الله هكون فى يناير فى مصر يعنى عايزه اجى واتعرف شخصيا على المحاوراتين باشخاصهم الحقيقيه وربنا يجمعنا دايما على الخير

مغتربه اشكرك وبشده على طرح الفكره الاكثر من رائعه

[مغتربة]

الحمد لله ان الفكره عجبتكم

بشكركم كلكم على كلماتكم الجميله

و انا عن نفسى دورت فلقيت ان تاريخ عضويه استاذ عادل ابوزيد هو 29 ديسمبر 2000

و بتهيالى ان دا اقدم تاريخ و بالتالى مش هيختلف كتير عن التواريخ الاخرى الى حطتوها و كلها بدور حوالين نفس الفتره

و فعلا الاحتفال بالسنه العاشره لازم يكون مميز على قدر تميز المحاورات

فدورنا دلوقتى بقى هو الاتفاق على يوم محدد من ضمن التواريخ الى طرحت و كمان كل واحد يقول فكرته للاحتفال تكون ازاى

و من كل الافكار انا متاكده اننا هنقدر نطلع بشكل احتفالى جميل

[قلب ابيض]

بيت العيله دا الاسم الجميل الى اطلقته ماما قلب ابيض على منتدانا الجميل

تسلمى يا مغتربه عالفكره الجميله دى .....

وبما ان الايام بتدور حول شهر العظماء .اللى شرفت الدنيا فيه شهر ديسمبر ..اقترح يكون مع نهايه السنه يعنى 31 ديسمبر وتبقى بدايه كل سنه فى عمرنا وعمر المحاورات الى جمعتنا عيله واحده

واقترح ايضا ان يحتفى به فى كل مكان يعنى يبقى يوم لقاء دورى للاعضاء فى كل مكان

اللى بالقاهره بالقاهره

والكويت بالكويت

وكندا بكندا ..........وهكذا

الهدف ان نلتقى جميعا فى نفس التوقيت فى جميع بقاع الارض بأرواحنا وخيالنا وربنا يستر من الصدمات بقى

تقبلوا تحياتى لكم جميعا

"بتوع السعوديه خليهم مستريحين عندهم والنق هايوصلنا لحد عندنا ان شاء الله " الا فتفوته فين ؟؟؟؟؟ من زمان ما نقتش علينا اقصد ماطلتش علينا

تم تعديل 26 أغسطس 2010 بواسطة قلب ابيض

[لماضة مصرية جدا]

السلام عليكم و رحمة الله و بركاته

ايه ده.....يعني المحاورات اديلها ما شاء الله 10 سنين...و طول الفترة اللي فاتت محدش جاب بلالين و لا عمل تورتات و لا حركات و لا كده

يا ربي...(وش علي فاتح بوقه ع الاخر....و مستغرب اوي)

احساسك رائع يصل للقلب...يخبط عليه كده و يصحي فيه حاجات حلوة يا مغتربة

عجبتني فكرة استاذنا محمد و تانت قلب ابيض بتاعت ديسمبر (مع اني كنت فاكرة ان شهر العظماء هو مااااايو wst:: :lol: )

بس امتي في ديسمبر بقي

هو نهاية السنة فكرة حلوة برضه....بس لو احنا هنتفق نتجمع فيهامثلا مش عارفة ده هيظبط و لا لا

بس انا بشجع فكرة الالتقاء علي ارض الواقع.....كل في محيط قطر الدائرة اللي عايش فيها...(يا سلام بقي لو حد يبعتلي الحانطور مع عم عثمان يبقي حاجة ملبن اوي)

و اذا ما ظبطش ان احنا نتقابل و نشوف سحن بعض....قصدي وشوشنا الملائكية....

يبقي فيه حتة يا جدعان احنا لسه مفتحنهاش في بيت العيلة...اسمها غرفة الشات

احنا كلنا نتفق علي معاد معين....و نتجمع فيه...في الاوضة المقفولة ديت... و تبقي هيصة...(وش عيل بينط م ع السرير و بيقول هييييييه)

بس كمان لما نيجي نتجمع كل واحد فينا يكون جايب معاه ذكري حلوة....حكاية محاوراتية.....بجد غيرت حياته...او خلته يشوف الدنيا بعيون غير

ميرسي كتير مغتربة

صباحك ونس...

صباحك....بيت كبير بندور عليه لما البيوت التانية بتضيق علينا

صباحك فتافيت سكر تدوب في فنجان افكار بتحرك فينا حاجات حلوة

[engmido]

فكرة جميلة يا مغتربة

وبرافو عليكى واؤيد فكرة الالتقاء على ارض الواقع

ومنتظرين مداخلة الاستاذ عادل ابو زيد لتأكيد الميعاد الحقيقى

والحكم هو الميقاتى الوحيد....ههههههه

[عادل أبوزيد]

يبقي فيه حتة يا جدعان احنا لسه مفتحنهاش في بيت العيلة...اسمها غرفة الشات

احنا كلنا نتفق علي معاد معين....و نتجمع فيه...في الاوضة المقفولة ديت... و تبقي هيصة...(وش عيل بينط م ع السرير و بيقول هييييييه)

بس كمان لما نيجي نتجمع كل واحد فينا يكون جايب معاه ذكري حلوة....حكاية محاوراتية.....بجد غيرت حياته...او خلته يشوف الدنيا بعيون غير

محاورات المصريين بدأت فى أوائل سنة 1998 و لكن فى مواقع إستضافة تقدم خدمات ال board للجميع و بدأنا السيرفر الخاص بنا أول ديسمبر سنة 2000 .

بالنسبة لغرفة ال Chat فلم ألاحظ إقبال عليها رغم أنها خدمة مميزة فيسعدنى جدا إستخدامها و الإلتقاء بين الأعضاء فيها.

[مغتربة]

لان الميعاد قرب رفعته

عايزيين الى عنده اقتراحات للاحتفال فى المنتدى يحطها هنا

و انا كمان عندى اقتراحات

علشان نرفعها للاداره تشوف ايه المناسب منه

عايزين عيد ميلاد المحاورات العاشر تحكى و تتحاكي عنه باقى المنتديات هههههههه

لا بجد عايزيين احتفال مميز بمنتدى مميز

ها مين هيبتدى بالافكار

[shiko]

لوجو سريع يرفعه جميع المشتركين ...بدل الصورة الرمزية للاعضاء ...

موسيقى احتفالية .....عند تشغيل الصفحة .....

فتح اوتجراف للتوقيع بمناسبة الاحتفالية .

[engmido]

الافكار كتير

بس افكر واجيلكو

[Dreamwithme]

لوجو سريع يرفعه جميع المشتركين ...بدل الصورة الرمزية للاعضاء ...

موسيقى احتفالية .....عند تشغيل الصفحة .....

فتح اوتجراف للتوقيع بمناسبة الاحتفالية .

اقتراحات جميلة جدا

أنا هاقترح اقتراحين ...

الأول لقاء في غرفة الشات يجمع جميع الأعضاء

والثاني لقاء علي أرض الواقع هيبقي جميل جدا

[مغتربة]

لوجو سريع يرفعه جميع المشتركين ...بدل الصورة الرمزية للاعضاء ...

موسيقى احتفالية .....عند تشغيل الصفحة .....

فتح اوتجراف للتوقيع بمناسبة الاحتفالية .

اقتراحات جميلة جدا

أنا هاقترح اقتراحين ...

الأول لقاء في غرفة الشات يجمع جميع الأعضاء

والثاني لقاء علي أرض الواقع هيبقي جميل جدا

اقتراحات جميله جدا

يا شيكو و دريم

استاذ ميدو فى انتظار مقترحاتك

انا موافقه على الاقتراحات دى و هضيف لها شويه اقتراحات انا كمان

هو بس موضوع اللقاء الى على ارض الواقع حاسه انه ممكن يكون صعب شويه لكن فكره الشات ممتازه ممكن يتم تحديد معاد بيناسب اغلب الاعضاء بمراعاه فروق التقيتات بينهم و يعلن عن الميعاد دا علشان الكل يدخل مع بعضه فيكون تجمع جميل على الشات

يالله يا جماعه عايزيين افكار

[مغتربة]

بالنسبه للافكار الى عندى لغايه دلوقتى بالاضافه لما سبق

1- ان الاحتفالات فى المنتدى تمتدد عشر ايام على عدد سنين المحاورات

1- فتح اوتوغراف تهنيئه فى باب الزوار بحيث ان حتى الى مش عضو يقدر يهنى المحاورات

3- طبعا معلوم انه هيكون فى موضوع للاعضاء خاص بالتهنئه لكن ممكن نعمل موضوع تانى علشان مش نهنى و لكن نكتب خواطرنا عن المحاورات و استفادتنا منها

4- ممكن الاداره تختار مثلا اسماء عشر اسماء للاعضاء و تعمل عليهم استفتاء نشارك فيه كلنا و اكتر عضو هياخد اصوات فى الاستفتاء دا يحصل على وسام يتحط تحت اسمه اسمه وسام اكثر الاعضاء عطاءا او تميزا الاستفتاء دا هيكون مقصور على الاعضاء الغير مشرفيين ليه بقى

5- لان المشرفي نفسهم لازم كمان نعمل استفتاء عليهم لاكتر مشرف متميز و برضه يتحط تحت اسمه وسام مصمم بالمعنى دا

ايه رايكم فى الافكار لغايه دلوقتى

لسه هفكر و ارجع لكم تانى

[لماضة مصرية جدا]

السلام عليكم و رحمة الله و بركاته

هما فكرتين

الاولانية اليوم ده.....كله يشيل الصور الرمزية و يظهر بصورته الشخصية....لان احنا مش عارفين نتقابل علي ارض الواقع....يبقي خلينا نحاول نحس ان احنا حقيقين و بجد و كده يعني

و طبعا....هتبقي مذبحة......(وش شرير مووووت)

بتكلم بجد ع فكرة

الفكرة التانية بقي

نعمل توحيد لجبهة الساري لماضة.....و معسكر الكتلة الشرقية دوت بتاع الكويت

و نوضب دماغنا و نعلم فيلم وثائقي عن المحاورات كلها من ساعة ما قالت واء واء....لغاية ما بقت بين المنتديات في اعلي الاجواء

لو الباشمهدزين...الساري....و فريق عمل الكويت وافقوا

ممكن نبتدي نعمل برين ستورمينج ع الافكار و السيناريو....نفصله مع بعض...

ايه رايكم؟؟؟؟

احب انا جو الاستعداد للحفلات و كده

ع جنب بقي

ح يطمني.....هو فين البوفيه....(صوت كركعة اوي)