ايه رايكوا فى مشكلة صحبى.....الواد ده تعبنى معاه ومش عارف اعمله ايه

[hOuSsAm]

فيه واحد صحبى عنده مشكلة وبحاول اساعده فيها بس مش عارف طريقتى فى التفكير كدة مظبوطة ولا ايه...... عشان كدة قولت اجى احط المشكلة هنا ونشوف اراء الناس هتبقى عاملة ازاى

بداية صحبى ده بيشتغل دلوقتى فى القاهرة فى مجال المبيعات ومرتبه بيتراوح بين 2400 و 3000 جنيه على حسب العمولة اللى بياخدها

وبيعمل دبلومة فى اتسويق وباذن الله اتوقعله مستقبل كويس لانه دماغه حلوة ولسانه شغال فى البيع

وعنده شقة فى بيت والده فى الاقاليم بس مش ناوى يعيش فيها لانه ناوى يستقر فى القاهرة

وعرضت عليه كذا مرة انه يسافر السعودية او الكويت ..... بس هو مرضاش وقال ان مستقبله فى مصر (ومشربتش من نيلها والحجات دى)

طب ايه المشكلة

المشكلة انه واثناء الكلية اعجب ببنت اصغر منه بسنة وقال انا هتقدم للبنت دى... وسالنى رايك ايه اكلمها ولا ادخل من الباب قولتله الدخول من الباب هو اقصر طريق للمراد واضمنها.... قالى توكلنا على الله

وفعلا اول مخلص الكلية واستلم اول شغلانة...... راح لابوها عشان يخطبها بس تقريبا ابوها كرشه :) هو مش كرشه اوى بس قاله انت لسه صغير ومستقبلك مش واضح ولسه مش مستقر....... ومحصلش نصيب ايامها

الكلام ده كان من حوالى 3 سنوات

مشكلة والدها انه كان من التجار الكبار والمعروفين...... وغالبا التجار بيبقى ليهم حسابات اخرى فى الزواج وبيدققوا اوى عالوضع المادى

حتى الان البنت لسه متجوزتش بالرغم من ان بيجلها عرسان كتيرة بس رفضتهم كلهم

والدته بتلح عليه انه يتقدم تانى ...... وهو متردد

وانا بقوله توكل على الله ودوس تانى وطالما دلوقتى مسكت شغل كويس والدنيا ظبطت معاك يبقى لو رحت الامور هتمشى تمام

انتوا ايه رايكوا؟

[masraweya]

السلام عليكم

إيه المانع انه يتقدم تاني؟؟ ربنا ييسر له الخير

تم تعديل 25 أغسطس 2010 بواسطة masraweya

[ذهبية]

انة يتقدم تانى عادى مفيهاش حاجة لكن مرتين رفض دة اللى مش عادى

يبقى الحل اية

انة ميتقدمش الا لما يتاكد انة المرة دى مش هترفض طيب يعمل اية

دة دور البنت بقى ؟؟؟ تتكلم مع ماماتها و تفتح سكة مع باباها

الام ليها تاثير و دور ايجابى جدا فى الموضع

لو الام كمان رافضة يبقى صديقك يلغى المووضع كدة اكبر قوتين مش معاة

يبقى الان دور الام و البنت لو ربنا سهل و عروفوا يقنعوا الاب يتقدم لو معرفوش يبقى يدور على غيرها و ملوش لزمة الاحراج مرتين

[شريف مان]

طب ما يتجوزها ويحط اهلها تحت الامر الواقع

:closedeyes:

[عادل أبوزيد]

لم تذكر شيئا عن الموائمة الإجتماعية بين الأسرتين و هذه نقطة مهمة ، و لم تذكر شيئا أهل الفتى و أهل البنت ..... الزواج يا سيدى فى النهاية علاقة جديدة بين أسرتين.متناغمتين إجتماعيا.

ما سبق كان إستهلالا لابد منه

أحد التقيبات الجيدة إقترحت أن تتم مفاتحة بين الفتاة و أمها و هذه فكرة جيدة أو لنقل بداية جيدة ، و أعود لعبارة البداية و هى ضرورة وجود التوائم الإجتماعى بين الأسرتين فعلى وجه التغليب لاتنجح زيجة بين أسرتين غير متناغمتين ..... أسرة تاجر سمك كبير لها قيم و مثل يعيشون بها تختلف بشدة عن أسرة قاضى متوسط الحال ربما يكون هناك تقارب فى المستوى المادى و لكن منظومة القيم تختلف بين الأسرتين.

طبعا يوجد دائما إستثناءات و ألا ما سمعنا قصص و أساطير الحب و الغرام على مر التاريخ.

[Simba]

دة دور البنت بقى ؟؟؟ تتكلم مع ماماتها و تفتح سكة مع باباها

الام ليها تاثير و دور ايجابى جدا فى الموضع

[se_ Elsyed]

طب ما يتجوزها ويحط اهلها تحت الامر الواقع

:closedeyes:

إنت بتتكلم جد يا شريف ؟

طب أي حد في الدنيا يرضاها لأخته أو بنته إنهم يصبحوا في يوم يلاقوها متجوزه بدون موافقتهم ؟

لأن ما يبقاش واحد ربى وكبر وفجأة يلاقي بنته إتجوزت بدون علمه مهما كانت الظروف ... فأجتماعياً غير مقبول

ودينياً حرام ولا يجوز شرعاً لإن فيها حديث شريف لا يحتاج إلى تآويل .. " لا زواج بدون ولي " بعض العلماء ذهب أيضاً إن ده ينطبق على الثيب - اللي إتجوزت قبل كده - ولو إن الحالة دي فيها كلام ً ...

والبدايات الخطأ تؤدي غلى نهايات خطأ بدون شك

رأيي يا حسام إن الولد يكون عنده المقومات الأساسية للزواج زي الشقة والقدرة على تأثيث المنزل والوظيفة المحترمة المستقرة .. ويتقدم تاني بكل ثقة ويحاول يقنع أهلها .. ومن ناحية تانية البنات لهم طريق في الإقناع لا تخفى على أحد .. فالبنت لو مقتنعه فبتروح تاكل ودان أمها وبأحبه يا ماما وعاوزاه يا ماما .. والام تروح تاكل ودان زوجها هي كمان ويدخل على العيلة يلاقيهم من غير ودان خالص ...

على فكرة الطريقة دي متجربة وفعاله .... أنا شخصياً عملت كده ... بس الموضوع كان مختلف شويه .. عشان زوجتي وقتها كانت لسه طالبة في ثانوي هههههههههه وكنت عاوز أتجوزها كده لكن أهلها رفضوا رفضاً قاطعاً ... لكن بالأقناع عن طريق زوجتي وأمها قدروا يقنعاو الأب .. وأتجوزنا على سنة تالتة جامعة بدلاً من أن أنتظرها إنها تخلص وأكون حمضت أنا .

[hOuSsAm]

masraweya

مرسلة الأمس, 06:23 PM

السلام عليكم

إيه المانع انه يتقدم تاني؟؟ ربنا ييسر له الخير

ده رايي وربنا ييسر الامور باذن الله تعالى

دة دور البنت بقى ؟؟؟ تتكلم مع ماماتها و تفتح سكة مع باباها

المشكلة انه ميعرفش مشاعر البنت ايه لحد دلوقتى

هو سالنى يا حسام اروح اقولها ولا ادخل من الباب وانا قولتله ادخل من الباب احسن

وبالتالى هو تعمد انه ميتكلمش مع البنت خالص الا بصفة رسمية

وللاسف مفيش اى طريق قدامه يقوله مشاعر البنت ايه

طب ما يتجوزها ويحط اهلها تحت الامر الواقع

شريف .... بلاش انت

هو باذن الله مش محتاج يعمل كدة...... مقومات الولد كويسة

لم تذكر شيئا عن الموائمة الإجتماعية بين الأسرتين و هذه نقطة مهمة ، و لم تذكر شيئا أهل الفتى و أهل البنت ..... الزواج يا سيدى فى النهاية علاقة جديدة بين أسرتين.متناغمتين إجتماعيا.

ما سبق كان إستهلالا لابد منه

أحد التقيبات الجيدة إقترحت أن تتم مفاتحة بين الفتاة و أمها و هذه فكرة جيدة أو لنقل بداية جيدة ، و أعود لعبارة البداية و هى ضرورة وجود التوائم الإجتماعى بين الأسرتين فعلى وجه التغليب لاتنجح زيجة بين أسرتين غير متناغمتين ..... أسرة تاجر سمك كبير لها قيم و مثل يعيشون بها تختلف بشدة عن أسرة قاضى متوسط الحال ربما يكون هناك تقارب فى المستوى المادى و لكن منظومة القيم تختلف بين الأسرتين.

طبعا يوجد دائما إستثناءات و ألا ما سمعنا قصص و أساطير الحب و الغرام على مر التاريخ.

استاذ عادل حضرتك اتكلمت فى نقطة مهمة..... انا عن نفسى مش شايف فروق فى المستوى الاجتماعى.... وان كنت شايف فروق فى المستوى المادى

والد البنت زى مقولت تاجر كبير جدا ووالد الولد موظف بشركة الكهربا

ام البنت طبيبة ارستقراطية.......وام الولد موظفة بشركة الكهربا بردوا

بس فعلا فيه فرق كبير جدا فى المستوى المادى.......يعنى اهل البنت عندهم ماشاء الله كتير بس بردوا مش بيلعبوا فى الملايين (عشان الدماغ متروحش لبعيد)

واهل الولد مستورين وعندهم بيت وعايشين زى الناس العادية فى مصر.... اللى من الناس اللى بيعشوا على اد مرتبهم

بس بالنسبة للولد هو البوزشن بتاعه دلوقتى مشرف مبيعات ومعاه عربية وسنه صغير 26 سنة ومرتبه معقول وعنده شقة فى بيت والده بس هو ناوى يقيم فى القاهرة

ومعندوش شقة فى القاهرة

دى كل ظروفه...... اتصرفوا انتوا بقى

[pocy]

بسم الله الرحمن الرحيم

والله يا اخى الفاضل حسام

انا شايفه ان مقوماته كويسه وربنا يوفقه ان شاء الله

انا رائي انه يتقدم مره تانيه بس لو قدر يجس نبض البنت مره تانيه يبقي احسن علشان يبقي ضامن يعنى ومالى ايده وربنا يوفقه يار وييسرله اموره وامورك انت كمان وكل شباب المسلمين يارب اللهم امين

[شريف مان]

إنت بتتكلم جد يا شريف ؟.

لا .... طبعا بهزر :lol:

المشكلة انه ميعرفش مشاعر البنت ايه لحد دلوقتى

يعنى اتقدم مرة وبيفكر يتقدم تانى وميعرفش مشاعرها !!!

مايمكن هيا رفضاه والاب اتحجج بأى حاجة عشان ميحرجوش

بص من الاخر هوا يشوف البنت رأيها ايه لو موافقة يتقدم

لو الاب رفض بقى تانى يشوف واحدة تانية ويريح دماغة

رفض مرتين دى حاجة رزلة أوى :blush2:

تم تعديل 26 أغسطس 2010 بواسطة شريف مان

[ذهبية]

يعنى هو ملوش كلام مع البنت و لا يعرف مشاعرها الى الان

يبقى لا انصحة بالتقدم لان كدة كل الاطراف مش معاة

قدامة حاجة من اتنين لا يكلم البنت و يعرف رايها

لا يخلى ماماتة تكلم ماماتها فى التليفون و تفتح معاها المووضع تانى

وتعرف رايها بدون ما يتقدم رسمى

ميتقدمش لها تانى رسمى و يدخل البيت كعريس الا لو متاكد بالقبول

لو مش هيعرف يعمل لا دة و لا دة يبقى يفكر فى غيرها و بالبنات كتير خاصة ان مفيش ارتباط عاطفى بينهم

[مغتربة]

انا مع الراى الى بيقول يجس النبض عندهم الاول

يعنى ممكن مامته تكلم مامتها

او يوسط اى سيده على علاقه بيهم من بعيد او قريب

لو مش عايز يبين مامته فى الصوره دلوقتى

لو ليه اخت او زوجه اخ او بنت خاله اى سيده فى العائله يتوسم فيها انها تقدر تفاتحهم فى الموضوع بشكل سليم

اى صديقه مشتركه من ايام الجامعه ( بس يتاكد الاول انها مش من النوع الى بيحب يهدى النفوس :rolleyes: :rolleyes: لحسن انت عارف غيره البنات من بعض wst:: wst:: )

[لماضة مصرية جدا]

السلام عليكم و رحمة الله و بركاته

انا مغيوووووووووووظة

انا هفرقع

مش عاجبني الحال ده اصلا

اه و سامحني يا استاذ حسام

اصل حضرتك انا معرفشي ان الراجل يبقي قليل الحيلة كده و يبقي مش واثق في نفسه و لا في امكانياته

يعني دلوقتي بقي فيه شباب معندوش اي حاجة من اللي حضرتك قولت عليها لكن لما تشوفهم و هما بيتكلموا تقولشي انه راح لعب مع الاسد و ضربه علي صداغه و رجع بشعرة من دقنه

بصي يا استاذي

انا لو مكان البنوتة ديت

انا مش هغلب اني اقنع اهلي بشخص انا شايفاه علي خلق و دين....و ده اسمي و انا متصنفة في بطاقة التموين "بنت"

لو هو ولد بقي....قصدي راجل.....و الرجال قليل فعلا.....طالما دي مش جوازة تقليدية و فيه بينهم بدايات نضيفة.....ليه ميحاولشي مرة و اتنين و عشرة و عشرين

مافيشها حاجة......لو عايز البنت دي بالذات......يبقي معلشي يشرب بيريل.....و يكون للرجولة موقف

ع جنب بقي

تامر حسني اللي مش عاجبكم كان بيقول...."هوصلك حتي لو عارف اني هموت.....هوصلك عشان تحسي بس باللي حبك موووت"

اوعي حد يضرب

بس هما صحيح بوقين

بس ليه يا شباب الغد الواعد اللي صدعتونا كلام عن الرجولة....مناخدهومشي كدهون و نطبقهم

ع فكرة انا ابن عمي.....فضل يحارب عشان يتجوز بنت عمي (لا مش اخته طبعا عمي التاني....وش عيل فكيك)....لدرجة انه كان بيطفش العرسان اللي بيجولها و لما سالته ليه يا ولدي....و بقوله البوقين بتوع اللي بيحب حد يتمناله الخير و الكلامي الفاضي دوت....قالي....هي خلاص بتاعتي و انا مش شايف غيرها

ابن عمي...اتجوز بنت عمي اللي هي مش اخته.....و عندهم دلوقتي 3 اطفال.....رخمين بشكل.... :lol:

صباحكم.......موقف....و موقف....اصل البني ادم ايه غير حبة مواقف فوق بعض

[لماضة مصرية جدا]

طب ما يتجوزها ويحط اهلها تحت الامر الواقع

:closedeyes:

السلام عليكم و رحة الله و بركاته

حسب قاموس عبد المجيد الصحاح

الامر الواقع المذكور في العوبارة اعلاه

هو كل ما يقع بالانسان و يشده الي ان يكون في اسوأ حالاته

و لما يقع....

الناس هتمشي عليه بالنعال و يتساوي بالتراب....

و لن يكون له اي اثر في الحياة الانسانية...مجرد تراااااااااااب

هذا و قد لزم التنويه

اصلها عبارة يا استاذ شريف متوعلشي مني....استفزتني جدا جدا جدا جدا......و قلبت كشافات نور علي مشهد ابيض و اسود من اي فيلم بتاع زكي رستم مالوش محل من الاعراب لا في وقته و لا دلوقتي

بس خلاص

[شريف مان]

ايه يا لماضة هوا فيه ايه

انتى مش عاجبك كلامى ولا كلام حسام ولا صاحب حسام ولا الرجالة فى مصر ولا البنت اللى بيحبها صاحب حسام

طيب عاجبك المنتدى

وكمان تنصحينا بشرب بيريل !!!

على العموم مقبولة منك لان اسمك لماضة وكمان عشان احنا فى رمضان

ملحوظة :

الرجااااااال فى مصر كتيير قوى عشان الاخوة الظرفاء اصحاب مقولة الذكور كتير أنما الرجال لا

فمعلش يعنى هما ميعرفوش رجاااالة

واحب أطمنك عل شباب مصر فهم بخييييييييييييير

وزى ماانت اقتبستى كلام محمد الصاوى أنا كمان هقتبس كلام محمد سعد

الشاب من دول لو دخل فى سور هيعدى من الناحية التانية

فتك بعافية

[abdulmuttaleb]

حسام بيه عبدالفتاح (كتبتها أبو الفتوح في الأول:))..

طبعا شكر الله اهتمام حضرتك بمشكلة صديقك، هذا أمر نادر ربما في هذا الزمان..

في الحقيقة، فيه نقطتين بشكل مركز جدا:

رقم واحد: هل الشاب ده راجع نفسه في مدى مناسبة هذه الفتاة له؟ يعني أخشى أن يكون ما جذبه لها مثلا جمالها أو ثقافتها ليس إلا.

في الحقيقة في مرحلة الجامعة تصور مسؤوليات الزواج قد لا يكون بالنضج الكافي لدى الشباب والفتيات، وبالتالي عليه أن يسأل نفسه ألف مرة: هل هنالك توافق اجتماعي بين الأسرتين في القيم والفاليوز زي ما بيقولوا؟

هل هنالك توافق في نظرتيهما للحجاب، الصلاة، العمل وتغيير مكانه (لو اضطر للسفر مثلا)، ميزانية الأسرة، العلاقة مع الوالدين، العطلات السنوية، تربية الأولاد، التعامل مع الخلافات، إلخ، ولاحظ سيدي أن كلمة توافق لا تعني تطابق وجهات النظر بالضرورة، فقد لا تكون مثلا مثلا الفتاة محجبة وكلاهما مقتنع بهذا لكن يكون من المهم تقرير مبدأ هل الحجاب شيء مرفوض أم والله شيء جيد لو حصل في المستقبل فلا مشكلة، أم أن الزوج سيحاول تلميحا وتصريحا الإلحاح عليها فيه

رقم اثنين: على الشاب أن يحرص في خطواته كما بدأ بطرق الباب مباشرة أن يحافظ على هذا وأن يحرص على ألا يؤثر عاطفيا على الفتاة. في الحقيقة فدعني أكتب حقيقة هنا قد لا تدركها بعض الفتيات، وهي أن أي شاب حين يقرر التقدم لخطبة فتاة فإنه يراها حينئذ الفتاة الوحيدة على وجه الأرض المناسبة له كزوجة. وطبعا هنالك حالتان إما الموافقة أو الرفض. الحالة الثانية (مثل حالة صاحبنا) قد تكون مؤلمة في البداية، لكن عليه أن يتغلب على أية مشاعر سلبية بالتمسك بالعفة والافتناع بأنه طالما كان يريد إعفاف نفسه فمن المؤكد أن الله عز وجل سيوفقه للخير، أحيانا كثيرة يريد الله أن يشعرنا بأننا في حاجة دائمة للجوء إليه

ومن يعلم لعل الله أراد به خيرا في عدم اقترانهما ببعضهما، ولتتوجه عاطفته إلى التضرع إلى الله والبكاء بين يديه بأن يوفقه الله لفتاة أخرى أو كما في حالته أن يتقدم لها مرة ثانية، لكن لا أنصحه إذا رفض في المرة الثانية أن يعاود التقديم مرة ثالثة، إلا إذا جاءت المبادرة من طرف والد الفتاة (الوالد وليس الفتاة نفسها) وبالطبع عليه ألا ينتظر بل يبدأ البحث عن فتاة أخرى لأن الانتظار لن يفيد وسيدخل في دوامة أوهام وأمنيات لا طائل من وراءها. بالضبط عليه تخيل نفسه في موقف مشابه لو أن والد فتاة عرض عليه الزواج من ابنته وهذا الشاب رأى أنها غير مناسبة له، هل سيفيد والد الفتاة أن يلح مرة ثم مرة على صديقك في أن يتزوج ابنته؟ ما أريد أن أقوله أن الرفض وارد وليس معناه نهاية العالم.

[Digital]

طب مفيش عروسة في الامارات طيب؟

مبهزرش و الله :D

[doha]

مش عارفه ليه عبد الحليم لما يحب يحب .. مبينشنش غير على زبيده ثروت ..

ولازم سبحانك ربي عشان النصيب يكون هو مش لاقي ياكل وتكون هي بنت ناس اغنيا ..

معليش ياعم الحاج حسام متزعلش مني بس هو صاحبك ناوي يتقدم تاني ليه .. على اساس يعني انها لغايه دلوقت ملقيتش مشتري ونزلت اوكازيون فيلحق ياخذها بعد ماكانش قادر على ثمنها ؟

هي اصلا زبيده ثروت ملفتتش نظر حليم غير في شياكتها وجمالها ( المصروف عليه ) وبطبيعة الحال هو لو اتجوزها مش هيوفر لها نفس المستوى الاجتماعي الي حطها ( في البرواز ) الي خلاه معجب بيها ده ..

معظم الشباب بيشوف احسن بنت حواليه ويقول انا ( عاوز اقتني دي ) . عوز دي ( تبقى بتاعتي ) مش لانه بيحبها والا لانه شايف ان دي الافضل وان دي هي ( الي تستاهله ) .. وغالبا صاحبك مفكرش يرجع يتقدم لها تاني غير لانه لغايه دلوقت مش لاقي واحده ( على نفس المستوى ) ..

نصيحه لصاحبك يشوف هو اول مرة لما اترفض قالوا له اسباب الرفض ايه ويشوف هل الاسباب دي تغيرت ولا لسه ..

يعني لو كانوا قالوا مثلا اصلك لسه مكملتش تعليمك وهو دلوقت كمله يبقى في امل .. او لو قالوا اصل مفيش شقة ودلوقت بقى في يبقى من حقه يتقدم تاني .. اما لو كان الرفض ببساطه لانه ( غبر مناسب ) يبقى ميحرجش نفسه ويظلم البنت معاه ويروح يتقدم تاني وهو عارف انهم لو وافقوا فهم ( مغصوبين ) اصل البنية .. نزلت اوكازيون ..

ملاحظة : عشان مكونش بقطع على نصيب حد .. ياريت يصلي استخاره هي اهم من كل ماسبق ..

[herohero]

حذار والوقوع ف فخ فرق المستوى

كله هيقول الحب يصنع المعجزات لكن الفروق المادية تفرق كتيييييييير

ولو اهل البنت تقييمهم للامور مادي حتى لوتعليمهم ممتاز برده لو هم بيشتغلوا ف التجارة هيكون تقييمهم للامور مادي فبصراحه ده مش هيكون لصالح صديقك

يبقى اروح لنا س يكونوا مرحبين بيا وشيئ اجمل لما يكون الولد من مستوى اجتماعي اعلى او ع الاقل متساويين

لان بتريح قوي اما لو كفة البنت اعلى ماديا صدقني بعيد عن اي رومانسية هتيجي مواقف تزعل صديقك وساعتها هيكره نفسه

والحب شيئ جميل لكن يومنا كله مشهنقضيه حب

ياترى هو عارف بيتهم ماشي ازاي من جوا ما ينفعش ارتبط ببنت تكون فيه عندهم شغاله ف البيت واجي انا اطلب منها تبقى لهلوبة ف شغل البيت وتساعد والدتي

ده ع سبيل المثال الارتباط فيه عوامل كثيرة ليس فقط منها الاعجاب المتبادل والحب

اللي هنا مش واضح قوي يعني خلينا نقول لسه مرحله حب اصدقاء الدراسة يعني حب من الكلية وتعلق والقصه كلها 26 سنه يعني تجاربة لسه

فراي ابعد عن الارتباط لما يكون فيه فروق مادية واضحه وكبيرة

[hOuSsAm]

لو هو ولد بقي....قصدي راجل.....و الرجال قليل فعلا.....طالما دي مش جوازة تقليدية و فيه بينهم بدايات نضيفة.....ليه ميحاولشي مرة و اتنين و عشرة و عشرين

مافيشها حاجة......لو عايز البنت دي بالذات......يبقي معلشي يشرب بيريل.....و يكون للرجولة موقف

ع جنب بقي

تامر حسني اللي مش عاجبكم كان بيقول...."هوصلك حتي لو عارف اني هموت.....هوصلك عشان تحسي بس باللي حبك موووت"

اوعي حد يضرب

بس هما صحيح بوقين

بس ليه يا شباب الغد الواعد اللي صدعتونا كلام عن الرجولة....مناخدهومشي كدهون و نطبقهم

من قولت فى الاول هو ميعرفش مشاعرها نحيته ايه

ولعلمك هو بيحملنى المسئولية دى لانه سالنى فى الاول ..... اتكلم معاها ولا ادخل من الباب قولتله ادخل من الباب...

لعلمك هو كان يقدر من الاول يعمل زى تامر حسنى ويكلمها ويعمل الحركات دى (بس هو ميرضهاش على اخواته البنات)

كلامك مظبوط بس فى حالة واحدة ان بينهم قصة حب لكن غير كدة انا مش مقتنع

حسام بيه عبدالفتاح (كتبتها أبو الفتوح في الأول)..

طبعا شكر الله اهتمام حضرتك بمشكلة صديقك، هذا أمر نادر ربما في هذا الزمان..

هههههههههههههههه متفكرنيش

(لعلمك انا متسمى على اسم حسام ابو الفتوح وده بسبب ان عيلته والده واعمامه كانوا جيرانا قبل ميتنقل هو للقاهرة..... حتى بيتنا بتاعنا حاليا كانت الارض بتاعتهم..... والحمد لله ان ابويا مش اسمه ابو الفتوح..... كانت هتبقى ورطة)

طبيعى ان الواحد يهتم بامور اصدقائه ومشاكلهم زى مهما بيبادلوه نفس الاحساس..(انما المسلمون اخوة ان اشتكى عضو تداعت له باقى الاعضاء)

وبالطبع عليه ألا ينتظر بل يبدأ البحث عن فتاة أخرى لأن الانتظار لن يفيد وسيدخل في دوامة أوهام وأمنيات لا طائل من وراءها.

لعلمك هو عمل كدة وخطب ميت الف مرة بس هو مش مستريح مع حد..... حتى من زهقنا فيه كلمناه كذا مرة انه يجى السعودية او يروح لاصحابنا الكويت بس هو اصلا رافض فكرة السفر

اللى قدرنا عليه انه جه يعمل عمرة

حتى من محاسن الصدف ان مرة واحد زميلنا وداه لعروسة وبعد موصل البيت (قاله استنى البيت ده ان جيته من 6 شهور...... مش دى البنت اللى فى رابعة صيدلة)

يادى الكسوف

Digital

مرسلة الأمس, 04:38 PM

طب مفيش عروسة في الامارات طيب؟

مبهزرش و الله

طيب ابعتلى بينانات الاتصال بيك عالخاص ومبهذرش والله :)

معليش ياعم الحاج حسام متزعلش مني بس هو صاحبك ناوي يتقدم تاني ليه .. على اساس يعني انها لغايه دلوقت ملقيتش مشتري ونزلت اوكازيون فيلحق ياخذها بعد ماكانش قادر على ثمنها ؟

على حسب كلامه يا اخت ضحى لاء...... لانه كان ممكن يخطب اللى اعلى منها بكتير ماديا واجتماعيا وكانوا موافقين عليه

(بس بالبلدى كدة .... هى دى اللى عايزها)

يعني لو كانوا قالوا مثلا اصلك لسه مكملتش تعليمك وهو دلوقت كمله يبقى في امل .. او لو قالوا اصل مفيش شقة ودلوقت بقى في يبقى من حقه يتقدم تاني .. اما لو كان الرفض ببساطه لانه ( غبر مناسب ) يبقى ميحرجش نفسه ويظلم البنت معاه ويروح يتقدم تاني وهو عارف انهم لو وافقوا فهم ( مغصوبين ) اصل البنية .. نزلت اوكازيون ..

كلمة اوكازيون مستفزة اوى.... بس بلاش نظلمه هو لو كان بيفكر بالاساليب دى كان زمانه اتجوز اى حد من زمان وريحنا

فراي ابعد عن الارتباط لما يكون فيه فروق مادية واضحه وكبيرة

انت ادرى يا سيد هيرو....... بس عن نفسى مش هحط فروق مادية معوق لجوازتى لان لو فيه حتى فروق مادية فبتعوضها فروق تانية

من الاخر مفيش حد فى الحياة كامل ...... وشايف كمان ان المستوى الاجتماعى صعب اننا نتغاضى عنه لكن المستوى المادى مش صعب لان الفلوس بتروح وبتيجى لكن المستوى الاجتماعى صعب ان حد يحصل عليه بسهولة