مسلسلات رمضان 2010 ..بتشوف أيه

[Simba]

بما أن خلاص بقينا في اواخر رمضان

والناس اللي بتنوي كل سنة انها مش هتشوف مسلسلات برضه بتشوفها :)

ايه اكتر مسلسل عجبك وبتابعه والمسلسل اللي حسيت انه سخيف

أنا بحب اشوف مسلسل العار وبستناه

مسلسل عايزة اتجوز حسيت انه معمول لناس عبيطة ممكن تضحك علي اي حاج استخفاف علي استهبال كده

[Damo]

أنا متابعه مسلسل 'قصة حب' حلقه بحلقه :happy:

' أنا عايزة أتجوز' حسيتو خفييييف بفتحو وأنا بحضر الفطار. بس بصراحه أنا رأيي ان هند صبري في المسلسل ده تفوقت على نفسها لانها قدرت تخرج عن نوع الادوار الواقعيه اللي دايما تعملها وعملت حاجة فانتازي كده

' العار' برده جميل بس مش متابعه قوي ...اشوف واحدة وافوت خمسه

[Simba]

في المدونة دي

كل تترات مسلسلات 2010

http://modymai.jeeran.com/archive/2010/8/1215879.html

انجوي

[ozoozo]

العار

الجماعه

الحاره

[Sherief AbdelWahab]

أشاهد العار والوحوش فقط.. أما عايزة أتجوز فلدي عليه تعليقات أتحفظ على ذكرها لعدم قدرتي على فلترة الألفاظ الأدق التي تصفه ، والتي يعاقب القانون على معظمها..

خلص الكلام

[yasser moustafa]

اشاهد مسلسل شيخ العــرب همــام ... وبس

[aimen]

فقط مسلسل كوميدى سورى بإسم ضيعه ضائعه ( هو اقرب للكوميديا المخلوطة بالسياسة )

فى اول يومين شفت حلقتين من عاوزه اتجوز ( لأنى كنت من متابعى مدونة غادة عبدالعال مؤلفة المسلسل ) وبعدين طنشتها بصراحة خنقونى طقم الممثلين

كنت اتمنى متابعه حلقات برنامج بيوت مطمئنة لعمر عبدالكافى

وحلقات مسلسل انا القدس -

«أنا القدس» يتناول حكايات من القدس الفلسطينية العربية خلال نهاية الحقبة العثمانية، وحقبة الانتداب البريطاني حتى الاحتلال الإسرائيلي في عام 1967 مروراً باحتلال الجزء الغربي من المدينة عام 1948، بالاستناد إلى مصادر أهمها مذكرات الفلسطيني المقدسي واصف جوهرية، وبعض مذكرات الشهيد عبد القادر الحسيني. علماً ان مخرج العمل باسل الخطيب عبّر في بيان عن سعادته بعرض هذا العمل على شاشة فلسطين، قائلاً: «عنوان المسلسل يعبر عن مضمونه وجوهره، فهو يقدم القدس كأنها تتكلم عن نفسها وتاريخها، أشبه بحالة بوح بأحزانها وأفراحها من خلال شخوص العمل.. وأنا سعيد لعرضه عبر شاشة تلفزيون فلسطين، أصحاب الدار والقضية».

تم تعديل 3 سبتمبر 2010 بواسطة aimen

[جسار]

مملكة الجبل : علشان الحبكة الدرامية وأداء عمرو سعد

الحارة : للمصداقية والتنوع

الجماعة : مجهود روائى ضخم وأنتاج أضخم ,آهى وجهات نظر

العار : دى عار حقيقى على التليفزيون المصرى كم العرى والتلميحات المبتذلة وكذلك سطحية التعامل

مع المواقف الدرامية وكأن كل من أكل من مال حرام سيلاقى مصيره الحتمى فى دنياه

أعتقد أن هذه ثقافة ربات البيوت لانه ببساطه هناك الاف من سرقوا أموال الشعب المصرى

وعايشين آخر حلاوة ومتهنيين على الاخر ، وفلسفة هذا المسلسل_ أن كان لديه فلسفة_

هو التواكل على القدرة الالهية فى محاسبة المنحرفين واللصوص ناسيين أن الله سبحانه

قد أنزل على عبده النبى موسى الوصايا العشر والتى كانت أولها : لاتسرق

[se_ Elsyed]

في مسلسل أكثر من رائع أتابعه .. قصة شيقة لبلال فضل في أول تجربة بوليسية ... وإخراج وتصوير جديد على الدراما المصرية بشكل عام ... واداء من طقم الممثلين مالوش حل خصوصاً من نجم قادم بقوة إسمه " خالد الصاوي " ... بالإضافة إلى إن ممثلين كتير قبلوا إنهم يطلعوا في لقطة أو إثنين لكن تركوا علامة واضحة في الدقائق دي .... أتمنى أن تشاهدوا مسلسل " أهل كايرو "

برضوا شيخ العرب همام مش بطال واداء عالي كالمعتاد ليحي الفخراني .. وعامة المسلسلات التاريخية بيبقى لها رونق خاص .. إلا " السائرون نياماً " فمن البرومو الخاص به عرفت إنه بطولة فردوس عبد الحميد وإخراج جوزها محمد فاضل .. فكده شكراً قوي وسك عالموضوع

وبس الإتنين دول .... يكفي إن بقى لي أكثر من 5 سنوات لم أتابع مسلسل بالتليفزيون ، لكن العملين دول هما اللي شدوني بصراحة

[المهندسه]

انا اشاهد اهل كايرو زى الاستاذ س س ما قال هو اسلوب جديد فى اخراج المسلسل و فعلا حلو اوى ومتابعاه الساعه 2 ظهرا بتوقيت السعوديه على نايل لايف

متابعه جيده جدا لمسلسل العار انا مش مع الاستاذ جسار هو بيعلم الناس ان اكل مال الحرام عقابه فى الدنيا كبير وبيشيل البركه من حياة الانسان وبيبين قدره اله عز

وجل انه يقدر فى لحظه ياخدمنك كل شىء مالك الحرام و صحتك وكل شىء وانت ضعيف لا تقدر على شىء لو ربنا عاوز يعذبك فى الدنيا لكن فعلا فى ناس لاتلاقى حسابهم فى الدنيا

لكن و ماله لما نعرضه علشان الناس تتعلم و تعتبر ما احنا لو قولنا الناس الحراميه مابتتعذبش فى الدنيا يبقى الناس كلها هتبقى حراميه بقه ومش هتعتبر هو فعلا

فى ملابس غير ولابدمن علا غانم لكن على الققل بيوصل رساله و موعظه للناس غير مسلسلات و افلام العرى للعرى فقط وعلى العموم خالوا الرجاله ماتتفرجش

طبعا ليلى بنتى بتشوف عالم سمسم الساعه 6 المغرب على الحياه2 مسلسل هايل للاطفال بيعلمهم كل حاجه كويسه و مافهوش اى الفاظ غير لائقه للاطفال زى كتير من برامج الاطفال

شاهدت مقتطفات من زهره و ازواجها الخمسه و انا بطبخ بس ده ماينفعش فى رمضان خالص ده يفطر على رأى صحفى كتب كده فى احدى المواقع ده ينفع عرض ازياء مثلا عرض غير

محترم و دور لحسن يوسف لم يضيف اليه شيئا بالعكس على رأى الشيخ عبد الرحيم ابن الشيخ الشعراوى مايصحش العمل دور الشعراوى يعمل دور زى ده خد من شعبيته كتير دى

مسخره ادعوا الناس الاتشاهده دى ناس مش محترمه بس نعمل ايه البيشفوهم هما البيعمللهم سعر

[Damo]

أنا كمان بحب خالد الصاوي بس للاسف مش قدرت اتابع عشان مواعيده مش مناسبة

[لماضة مصرية جدا]

السلام عليكم و رحمة الله و بركاته

هو التوبيك دوت رجالي و لا ايه.....اصلي ملاحظة ان معظم الاجابات يعني من معسكر اخواتنا من جمع المذكر السالم...طبعا ما هو مافيش غسيل مواعين.....و لا هاتي يا بنتي طبق القطايف....و لا يا سلام لو تعمليلنا كوباية شاي.....(شاي ايه بس ده حتي بيصفر السنان....وش واحدة رايحة تعمل الحاجة الغير انسانية دي و هي بتبرطم في السكة)

و طبعا لازمن و حتمن و لابد نحي كل من الرفيقة دامو.....اللي بتتفرج علي حاجات غريبة اوي.....(قصة حب)....هقول لعمو عليكي ع فكرة...(وش عيل فتاااااان مووووت)

و كمان الرفيقة المهندسة

انا بتفرج ع الحارة.....عشان كل حلقة لازم ناخد جرعة نكد.....ماما بتشوف ان ده جزء من تلاحمنا بقضايا المجتمع.... :lol:

لو هتتكلموا بقي ع البرامج فيه برنامجين بحبهم اوي

الشجرة الطيبة....الحبيب الجفري

خواطر 6.....احمد الشقيري

الاتنين تووووووووحفة بجد

مساااااكم قطايف غرقاااانة في الشربااااات.....و لا عزاء للريجيم

[Damo]

ايه ده محدش يعرف قصة حب ؟؟؟

http://www.youtube.com/watch?v=okjd52H7m_w

أنا بحبوا جدا

وبصراحة ده اللي بيجيلنا بقي :sad:

ا بخصوص أنا عايزه اتجوز....زي ماأستاذ سمبا قال بالظبط...أنا من الناس العبط اللي بتضحك على أي حاجة فعلا :closedeyes: (عرف ازاي :blink: ) أنا سهل جداااا ان حد يضحكني

وبيجي برنامج الطعام أسرار...كتير ابتدي الحلقة عشان عجبني الكلام بعدين شويه واتخنق من المذيعة

[ذهبية]

اهل كايرو و طبعا اغمية التتر تحفة لحسين الجاسمى و دة اول حاجة شدتنى للمسلسل بصراحة غير انة نوعية جديدة مختلفة

همام شيخ العرب و دور صابرين رائع

زهرة مووضوع ساذج متفصل على مقاس غادة عشلان تتبروز و المرفوض اللى احنا نصدقة و نمشى وراهم ولا اية بالضبط

الحارة حلو جدا تمثيل رائع من ابطال المسلسل متحسش انة تمثيل نهائى بجد كل الممثلين اجادوا بالذات كريمة مختار رائعةةةةة و سوسن بدر

[اروى]

العار وخصوصا اغنية التتر جميلة جدا وكمان قضية صفية لمى عز الدين اما زهرة بتفرج عليه علشان عرض الازياء اللى عملاه غادة عبد الرازق وعايزة اتجوز عاجبانى فيه هند صبرى رغم انه رخم شوية