الإعتكاف بخطاب تعريف من الكفيل !!!!!!!!!!!!!!!!!!!!

[se_ Elsyed]

أنا أتشليت يا سعاد ....

بجد مش لاقي تعليق على القرار

الرياض - مباشر العربية :

اشترطت وزارة الشؤون الإسلامية على أئمة المساجد وضع سجل يضم معلومات عن الراغبين في الاعتكاف خلال العشر الأواخر من شهر رمضان مع نسخة من بطاقة هوياتهم الوطنية.

وأوضح الدكتور توفيق بن عبدالعزيز السديري وكيل الوزارة لشؤون المساجد والدعوة والإرشاد: إن وضع الضوابط يأتي في سياق تنظيم شؤون المعتكفين في المساجد والجوامع خلال العشر الأواخر من شهر رمضان المبارك وعدم الخروج عن هدفه الشرعي إذ أبلغت وزارة الشؤون الإسلامية فروعها في مختلف مناطق المملكة ومحافظاتها بضوابط الاعتكاف للعمل بموجبها.

وأكد الدكتور السديري على ضرورة أن يكون إمام المسجد لديه معرفة تامة بالمعتكفين إلى جانب وجود موافقة خطية معتمدة من الكفيل لغير السعوديين الراغبين في الاعتكاف. وشدد على أئمة المساجد الحرص على عدم وجود ما ينافي الاعتكاف.

[se_ Elsyed]

على فكرة القرار مردود عليه

فلو كانت بحجة إن ممكن بعض الهاربين من كفلاءهم هايلجئوا للإيواء في المساجد ... فنقول لهم : يا حلاوة .. يعني الهربان ده هاتبقى كل مشكلته في الحياة أيام العشر الاواخر من رمضان اللي مش هايلاقي متوا فيهم ؟

لأ طبعاً .... اللي عاوز يهرب بيهرب حتى لو راح أستخبى في جهنم ..

- أما من يقول إن اللي بيعتكف العشر الأواخر وهو أجنبي يبقى لا شغله ولا مشغله عشان يغيب عن اعلم 10 أيام بحالهم ... فنقول له أستغفر الله العظيم ... ومين قال لك يا أخي ... إتق الله .. لإن أجازة الحكومة مثلاً بدأت يوم 22 رمضان وناس كتير أجانب شغالين في الحكومة وبالتالي عندهم متسع من الوقت للإعتكاف في الإجازة ...

و

بعدين ماذا يمنع في حالة كوني اجنبي وحصلت على إجازة بدون مرتب موافق عليها وأعتكفت ؟

نقطة أخرى في منتهى الخطورة ... والله والله والله أعرف كفلاء لا يسمحون لمكفوليهم بالحصول على إجازة لاداء العُمرة في نهاية الإسبوع ... وعامةً العُمرة بتبقى بعد إنتهاء دوام يوم الأربعاء ثم الخميس والجمعة والناس بترجع شغلها السبت عادي .... ما بالك لو الواحد حصل على إجازته السنوية أو أجازة شخصية للإعكتاف .... طبعاً ساعتها الكفيل ممكن يتاويه ويعلقه من رجله على باب المؤسسة على طلبة ده

نقطة أخرى ... أعرف كفلاء يُفضلون الغير مسلم في العمل لسبب ... دي سمعتها بأم ودني وماحدش قال لي : أصل اللي مش مسلم لا هاييجي يقول لي عُمره ولا كل شويه يروح يصلي وهايبقى فاضي لشغله فقط .

نقطة أخرى والحديث يطول ... معروف هنا إن معظم أئمة المساجد بيبقوا مُعينين من وزارة الأوقاف وبيحصلوا على مرتبات عالية جداً ... ومنتشر قوي قوي قوي قوي موضوع إن الإمام بيجيب حد على كفالته يشتغل إمام بداله هههههههههه ( دوبلير يعني ) .. أه والله ... يعني باكستاني أو هندي ياخد 1200 ريال وييجي من بلده يشتغل إمام ده اقصى أمانية وشيء يسعى إليه .. وأخينا التاني يشوف له اي سبوبة وعمل أخر وييجي كل كام شهر يشقر على محل عمله اللي هو المسجد ..

- طب اللي كفيله مسافر بيعيد مثلاً ... أو مش موجود في البلد اللي هو فيها .... يعمل إيه يا ناس ؟

- بالمناسبة بقى .... كثير مننا عارفين ليه أبواب حمامات المساجد الخارجية بيحرصوا على إنهم يغلقوها في غير أوقات الصلاة :happy: .. واللي عاوز يعرف ممكن اقول له على الخاص عشان " اللهم إني صايم "

[masraweya]

لا حول و لا قوة إلا بالله العلي العظيم

[herohero]

القرار يهيا لي يا سي السيد يخص الوافدين والمواطنين يعني مش فيه تمييز ولا حاجه يعني الكل سواء ثانيا انا مش شايف ان الناحيه التنظيمية فيها مشكلة

سيدي المساجد بتتقفل ف مصر وف حتت كتيرة رغم انها زمان كانت بتبقى مفتوحه

يعني الحكاية منزمان غير منطقيه والخطب بتتوزع عالمساجد وبقى عندك اذان موحد يعني الدين حاليا بقى كانك باروح تنفذ لوائح

ربنا يكرمهم ولما نشوف الحس الامنيف اي بلد عربي اللي مش بيظهر الا ف الدين لما نشوف هنوصل لايه

[se_ Elsyed]

القرار يهيا لي يا سي السيد يخص الوافدين والمواطنين

يعني المواطن برضوا هايجيب خطاب تعريف من كفيله ؟ ههههههههههههههه

كبيره قوي هايشوفوا بطاقته ... لكن إنت عارف يعني إيه مرار الحصول على خطاب من الكفيل اللي بالتأكيد هايقول لك وأنا مال اهلي بدل ما يقفشوه معتكف في المسجد وأتعك أنا فيها بالخطاب ده ..

احلى حاجه إن السعوديين أنفسهم كاتبين تعليقات في منتهى الطرافة على القرار ومش عاجبهم طبعاً

[masraweya]

خطورة ما يحدث في السعودية أن أي قرار تتخذه"الأسرة الحاكمة " يتم ربطه بالأسلام بحسن أو سوء نية

[أسد]

فيه ناس عايزة تشتري شقة في السعودية

[أبو محمد]

أنا أتشليت يا سعاد ....

بجد مش لاقي تعليق على القرار

الرياض - مباشر العربية :

اشترطت وزارة الشؤون الإسلامية على أئمة المساجد وضع سجل يضم معلومات عن الراغبين في الاعتكاف خلال العشر الأواخر من شهر رمضان مع نسخة من بطاقة هوياتهم الوطنية.

وأوضح الدكتور توفيق بن عبدالعزيز السديري وكيل الوزارة لشؤون المساجد والدعوة والإرشاد: إن وضع الضوابط يأتي في سياق تنظيم شؤون المعتكفين في المساجد والجوامع خلال العشر الأواخر من شهر رمضان المبارك وعدم الخروج عن هدفه الشرعي إذ أبلغت وزارة الشؤون الإسلامية فروعها في مختلف مناطق المملكة ومحافظاتها بضوابط الاعتكاف للعمل بموجبها.

وأكد الدكتور السديري على ضرورة أن يكون إمام المسجد لديه معرفة تامة بالمعتكفين إلى جانب وجود موافقة خطية معتمدة من الكفيل لغير السعوديين الراغبين في الاعتكاف. وشدد على أئمة المساجد الحرص على عدم وجود ما ينافي الاعتكاف.

الموضوع أكبر من كده يابو السيد .. هذا إجراء لا يمكن فصله عن الأمر الملكى بحظر الفتاوى إلا على هيئة كبار العلماء أو من توافق عليه الهيئة (ومن وراها الداخلية طبعا) .. هناك معركة فى الظل أو فى الكتم بين الدولة وجماعات (تكلمت عنها فى أكثر من موضوع) ومنها جماعة شهيرة تسمى نفسها "الحركة الإسلامية للإصلاح" .. تحت زعامة الزبيرى / النجدى/ التميمى الدكتور سعد الفقيه

الحركة دى يابو السيد أصدرت بيان بعد الأمر الملكى بتدعو فيه أعضاء الحركة إلى التجمع فى مساجد معينة فى المملكة .. صحيح التجمعات حتكون يوم الجمعة الأخيرة من شوال لكن برضه الأمر بيحتاج إلى ترتيبات وتكتيكات وحاجات ومحتاجات ( والاعتكاف فرصة كويسة للتداول) وممكن تيجى التعليمات (بالمطلوب من الحركة) فى أى يوم من رمضان وتسلم أثناء تجمع الاعتكاف .. وده لأن الدكتور سعد مقيم فى بريطانيا.

تحب تقرا البيان ؟ .. إتفضل

الحركة تقرر الجمعة الأخيرة من شوال 8 أكتوبر موعد النشاط القادم

اعلن الدكتور سعد الفقيه

عن تحديد الجمعة الأخيرة من شوال الموافق للثامن من أكتوبر

موعدا للتجمع القادم

والذي سيكون خلال صلاة الجمعة في أربع مدن

هي الرياض وجدة والجوف وجيزان

وسوف تعلن الحركة أسماء المساجد قريبا بإذن الله

وتهيب الحركة بجمهورها أن يبادروا ببث هذا الإعلان

عن طريق الاتصال المباشر

والجوال والانترنت والملصقات وبكل الوسائل

واخد بالك انت من حكاية "موعد النشاط القادم" ؟ .. بلاش دى .. واخد بالك انت من "وسوف تعلن الحركة أسماء المساجد قريبا بإذن الله" ؟ .. عاملين زى حسام البدرى لما يعلن التشكيل قبل النشاط .. قصدى .. قبل المباراة مباشرة

وآدى الرابط

كان معكم من وراء الجورنال المخروم .. أبو محمد المصرى .. مخبر أمن الدولة السعودى :ninja:

[Howayda Ismail]

ماذا يضير فى هذا القرار طالما ان دواعى الامن تستدعى ذلك

ولو حاجة العمل تستدعى وجود الموظف فى مقر عمله فذلك افضل له من الاعتكاف وتعطيل مصالح الناس

بالنسبة عندنا هنا فى مصر اكتر موظفى المصالح الحكومية فى حالة اعتكاف طول الشهر حتى مش

ببكلفوا نفسهم عناء الرد على اى استفسار للمواطنين كأنه صيام عن الشغل والكلام كمان

والله بيظلموا الصيام والشهر الكريم معاهم

[مسافر زاده الخيال]

بعد السلام والتحية,,,,

ان اتخذت الدولة هذا القرار (فلا شك ان هناك اسباب قوية وموضوعية)لذلك,,,,فلا يخفى على الجميع (استغلال الفئات الضالة) للمواسم الدينية والاعمال الدينية كجمع الصدقات والتبرعات ولا يستبعد قيام بعض المغرر بهم لاعمال تضر بمصالح البلاد والعباد....والتاريخ القريب شاهد و حافل بذلك..........

للاسف ....لقد نجحت (تلك الفئات الضالة) بالاضرار بمصالح المسلمين بشكل يفوق ما اراده اعداء الاسلام .........

عموما

ان اتخاذ القرارات الاخيرة مثل قصر الفتوى على بعض العلماء و قرار الاعتكاف (له ما يبرره) ولاشك ان الدولة تنظر بمنظور اوسع واشمل

وفق الله الدولة لما فيه خير الاسلام والمسلمين

[خالد المسلم]

السلام عليكم ورحمه الله وبركاته

لاحول ولاقوه الا بالله العلى العظيم اللهم اجرنى فى مصيبتى واخلف لى خيرا منها

والله العظيم مصايب وبلاوى كل يوم الواحد بيقرأ عنها الاعتكاف بخطاب الكفيل والله العظيم نكته من النكت

طيب نناقش الموضوع :

كيف نضع حريه العباده فى ايدى البشر؟

ليه انا اخد خطاب من كفيلى وانا عارف ان هناك من يحل محلى فى العمل عشان اروح احييى سنه الاعتكاف فى المسجد وغالبا محدش بيحييى هذه السنه الا فى العشر الاواخر ؟

طيب افرض كفيلى راجل فاسق او زنديق او متعنت وقالى لا مش تروح ..رغم ان سير العمل لن يتأثر..وده بسبب أسباب شخصيه عندالكفيل يبقى خلاص

حد عنده ذره من عقل يقول كده

واذا كان الموضوع عن حركه الاصلاح ممكن يزيدوا من الرقابه على المساجد وطبعا هيه مساجد معينه وضمان ان الاعتكاف لن يستخدم فى احداث فتن

مش كل واحد يجيب جواب من كفيله

زائد ليه نربط ده بمصالح الناس محدش قال ان الواحد مش يراعى الله سبحانه وتعالى فى شغله ويروح يعتكف ..الاعتكاف سنه وقضاء مصالح الناس واجب ولا تقدم السنه على الواحب ولكن ...

نفترض ان واحد شايف شغله على اكمل وجه ويراعى الله سبحانه وتعالى وفى العشر ايام الاخيره اراد ان يكتف لله سبحانه وتعالى فى مكه او فى المدينه ابتغاء الاجر والثواب

ليه بقى احطله عراقيل واجعله يأخد الاذن من بشر قد يكون صالح وقد يكون فاسق

وحتى لو كان صالح المبدأ فى حد ذاته فاسد

ملخص الكلام اللى انا عاوز اقول

انا اعترض على نقاط معينه :

كيف نطلب اخذ الاذن للقيام بشعيره اسلاميه من نظام اسمه الكفاله مخالف اساسا للشريعه الاسلاميه قلبا وقالبا

وده مش كلامى ده كلام الجمعيه الوطنيه لحقوق الانسان بالسعوديه

http://www.arabianbusiness.com/arabic/523355

[doha]

وهو ده آخرة ( الفوضى الخلاقة )

في قناة على الدش مخصصة لمعارضة النظام السعودي فقط لا غير وبتدعوا الناس انها تتجمهر في مساجد بعينها والمهم انهم لا بيطلبوا منهم حاجه معينة ولا حتى بيقدموا برنامج محدد هيعملوه فيما لو الناس دي تجمعت .. يعني هي دعوة للخروج على النظام لمجرد الخروج ..

اعتقد والله اعلم مفيش سبب تاني لمنع الاعتكاف في المساجد غير منع التجمهر ( قانون طواريء يعني ) واعتقد ان ده امر منطقي جدا وطبيعي جدا لمجابهة اللاطبيعية الي عماله تغرقنا كلنا شرق وغرب والي بتمثلها مثل هذه القناة ..

ربنا يستر من الي جاي ..