لو معاك فلوس .. عالناس تدوس

[se_ Elsyed]

وخلي فلوسهم تنفعهم .. وخلي مرتضى منصور يفرح باللعب بالقانون وبحدود الله ويجري ورا الملايين هو كمان لكن مش هايقدر بلعب في الأخره

مرتضى منصور يتولى الدفاع عن نجل كريازى

الأحد، 5 سبتمبر 2010 - 12:55

صرح المستشار مرتضى منصور بأنه تولى الدفاع عن ستيفو ريمون ستيفو كريازى المتهم بالاعتداء على ضابط الشرطة ولى الدين صبرى والشروع فى قتله.

وأشار منصور، أمس السبت خلال مداخلة هاتفية ببرنامج القاهرة اليوم، إلى أن صبرى اعتدى على ستيفو وضربه ضربا مبرحا فى إحدى إشارات المرور، إلا أن ستيفو رفض أن يحرر له محضرا خوفا من إشعال الفتنة بين المسلمين والمسيحيين، على عكس ما ذكره صبرى الذى قال إنه فوجئ بستيفو ينزل من سيارته ويقترب منه ويسبه، وفى اليوم التالى تتبعه ستيفو وأصدقاؤه الذين قاموا بالتعدى بالضرب على صبرى، إلا أن ذلك لم يشبع رغبة ستيفو فى الانتقام فظل يضرب بسيارته سيارة صبرى حتى أصبحت هى والرصيف واحدا وبينهما صبرى الذى لم يتبق من ساقه سوى الوتر، إلا أن منصور دفع بأن ستيفو لم يكن موجود بمصر فى ذلك اليوم.

وأعرب منصور عن استيائه من قيام رئيس مباحث مصر الجديدة محمود هندى باعتقال بواب عائلة كريازى وزوجته، مشددا على أن "النيابة العامة أمرت بضبط السيارة وستيفو، فما دخل البواب وزوجته؟".وتجنب منصور الرد على سؤال الإعلامى عمرو أديب عن مكان ستيفو فى الوقت الحالى.

[se_ Elsyed]

على فكره .. الواد ستيفو الزفت ده من كام سنة كان ماشي بعربيته سكران في عز الضهر ... ومنطلق بأقصى سرعه .. أثناء ما طلبة جامعة القاهرة خارجين من الجامعة وواقفين منتظرين الأتوبيس على الرصيف ... يقوم الجزمه طالع بعربيته على اللرصيف مموت كذا واحد وفاعصهم بعربيته وأصاب العديد الأخرين ..

ورسيت العملية على دفع تعويض وما أتحبسش يوم واحد ..

أصل أبوه واصل وبيعمل أراجوز للحزب الوطني في أي فترة أنتخابات ولأن مصانعه عندنا في العبور . فبأشوفه مسخر الأتوبيسات كلها لنقل العمال لمراكز الأنتخاب عشان يرقصوا للحزب الوطني .. ده غير التبرعات المادية والدعاية اللي بيعملها لهم ...

[herohero]

عاااااااااااااااااااادي

ايه الجديد يا استذ سي السيد كشكشها ماتعرضهاش

سيدي ده الواقع اللي حاصل من ساعة ماقولنا القانون اللي ماشي ف بلد 7000000000000سنة

معاك قرش تسوى قرش

[المهندسه]

حسبى الله و نعم الوكيل فيه فى امثاله هيروحوا فين من ربنا يوم الحساب

تم تعديل 5 سبتمبر 2010 بواسطة المهندسه

[Howayda Ismail]

ليه بننسى امثالنا الشعبية اللى بتعبر عن عن جميع الاحوال فى مصر ومنها

(اللى تعرف ديته اقتله)

واللى حصل ده مش جديد وبيتكرر كتير لان لو الدولة حافظة حقوق المواطنين مكانش حيصل حاجة من دى

لكن الحكومة نفسها داهسة ومبهدلة مواطنيها برة وجوة

لكن السؤال دلوقت الوضع مختلف مع كونه حدث مع ضابط شرطة مش مواطن عادى يعنى الحكومة حتعرف تجيبله حقه

ولا الروس حتتساوى؟

وبعدين مين الصادق فى اعتداء الطرف الاخر الاول مش جايز كل واحد فيهم اتباهى بمكانته (انت عارف بتكلم مين)

[se_ Elsyed]

إيه القذارة والعفن اللي وصل إليه عصر مبارك ده ؟

يخرب بيت كده بصراحة

صورة شيك الصلح بين كريازى والضابط السابق

الثلاثاء، 9 نوفمبر 2010 - 19:35

المحامى عصام سلطان

كتب محمود سعد الدين

حصل "اليوم السابع" على صورة من الشيك النقدى الذى أنهى القضية المتهم فيها ستيفو ريمون كريازى نجل رجل الأعمال ريمون كريازى بالاعتداء على ضابط أمن الدولة السابق ولى الدين صبرى والشروع فى قتله، وهى القضية التى شغلت الإعلام والرأى العام طيلة الشهرين الماضيين.

الشيك صادر من ريمون ستيفو كريازى إلى مركز أمراض الكلى والمسالك البولية بالمنصورة "وحدة أبحاث السكر" بقيمة مليون جنيه فى حسابه ببنك الشركة المصرفية العربية الدولية.

تم تحرير الشيك بمكتب عصام سلطان المحامى فى المهندسين بتاريخ 1 نوفمبر 2010، وتعهد سلطان بتوصيله إلى الدكتور محمد غنيم لوضعه فى حساب المركز، وهو ما تم بالفعل اليوم.

قبول الشيك يعنى التصالح النهائى بين الطرفين، حيث أكد سلطان أن مبلغ التبرع هو عبارة عن اعتذار من المتهم استيفو ريمون كريازى، للشعب المصرى عما بدر من ابنه تجاه أحد أفراده الذى شرع فى قتل المجنى عليه ولى الدين شفيق عن سبق الإصرار والترصد.

كما تضمنت شروط التصالح تحمل المتهم تكاليف علاج المجنى عليه فى ألمانيا، والعمليات الجراحية اللازمة له، مع دفع التعويض اللازم.

[se_ Elsyed]

قضية شروع في قتل مع سبق الإصرار والترصد

وأستخدام النفوذ والمال في القتل زي هشام طلعت مصطفى

والظابط عجز خلاص وما بقاش نافع نفسه وهو في عز شبابه

القاتل العيل وأبوه يهربوا بره مصر في طيارة خاصة قبل الحكم عليهم .. إلى اليونان بلدهم الأصلي طبعاً

القضاء المصري يُبلغ الأنتربول بسرعة القبض عليهم

مافيش إتفاقية تبادل مجرمين بيننا وبين اليونان

الأب يحرر شيك ويرميه على الجزمة القديمة بمليون جنيه تبرع لمركز الكلى بالمنصورة

ويسفر المجني عليه يعمل عًمَره كامله في ألمانيا

مع

مع

تعويض مقبول

مش هايقل عن مليون بالتأكيد

وبخخخخخخخخ كده خلصت وهايرجعوا مصر هما الأتنين مكللين باكاليل الغار .. ويمارسوا نشطاهم عادي .. وديتها يزودوا سعر التلاجة او الغسالة جوز جنيهات عشان يلموا فلوس التعويض في يومين تلاته

عشان تبقى دي ثاني حادثة قتل من نوعها يرتكبها العيل ده بسيارته .. فكما ذكرت من قبل .. من حوالي 5 سنين داس بعربيته عدة طلاب من جامعة القاهرة كانوان ينتظرون الاتوبيس على المحطه .. وجاي ده بمنتهى السرعة وهو سكران .. وطلع على الرضيف داسهم .. والموضوع خلص بالفلوس برضوا

طب ما الحياة سهلة أهي وجميلة وبفلوسك موت البشر كلها

بُصوا الظابط السابق لامن الدولة وهو المجني عليه قال إيه في حديث تليفزيون في احد العاشرة مساءً مع منى الشاذلي بعد الحادث مباشرةً

فى لقاء تليفزيونى مع الظابط بامن الدوله سابقا سالته المذيعه ماذا لو قدموا لك التعويضات اللازمه من فلوس وخلافه وطلبوا منك ان يعالجوك على نفقتهم خارج مصر هل توافق رفض الضابط بشده وقال ولو بكنوز الدنيا كلها انا موش محتاج وانا عندى مايكفينى والحمد لله يكفى ان اعلم ابنتى اننى لم افرط فى حقى ابدا

هيء هيء هيء

دلوقت يطلع يقول أصلي عاوز أجوز البت وأمن لها مستقبلها

وهاقول لها أبوكي باع شرفه وعِرضه عشان مليون جنيه وسفرية لألمانيا وهايرجع عاجز برضوا بقيت حياته لأن العيال أفتروا فيه والواد كان حالف إنه يحطه تحت كاوتشات العربية ويدوس عليه .. وقد كان

لحد ما دمر له منطقة الحوض ... ويا عالم دمر إيه تاني ما هو الحوض مليان بلاوي ... ومش مهم .. ممكن برضوا في ألمانيا يركبوا له حته من التورلوب في قفاه ويرجع حلو برضوا

بالمناسبة : العُمال البلطجية اللي ساعدوا المجرم في جريمته وتم ذكر أسماءهم بالأسم في القضية وهم عاملين بمصنع كريازي ... يا ترى برضوا العملية أتطرمخت بالنسبة لهم وعادي يعني ؟

على فكره : للتذكير مره أخرى ...الموضوع وراءه غراب الخراب احمد عز ومساعده إبن العمده جمال مبارك .. حيث أن كريازي من اكبر الم ...... هامشيها المدعمين للحزب الواطي بفلوسه وبنفوذه في محافظة القليوبية .... ويكفي أصوات العاملين بمصانعه .. ويكفي تنزلوا العبور عندنا دلوقت وتشوفوا المهرجانات اللي بيعملها كريازي للحزب الواطي

[المهندسه]

انا اتفرجت على على الحلقه دى من العاشره مساءا و الضابط كان متشدد جدا على عدم الصلح و قال فعلا انه عاوز يعلم بنته ماتفرطش فى حقها

و كمان كان باين عليه انه مستور و مش محتاج الفلوس ...لكن كل القيم دى انهارت فى لحظه ..طيب ليه ...لازم نسأل نفسنا عملولوه ايه يغير موقفه

من النقيض للنقيض...هل اغراء المال ؟؟؟او حالته الصحيه مثلا متدهوره و عاوزه علاج بملايين وهو ما يقدرش على الثمن ؟؟؟وممكن يكونوا هددوه

زى ما بيحصل فى الافلام ...اصل دول عصابه بعيد عنك يا استاذ س س...انا طبعا مش مع ال عمله كريازى الزفت هو و ابنه الحيله نانوس عين امه

وكمان ظاهريا مش مع الضابط فى تفريطه غى حقه ...لكن مانقدرش نحكم عليه غير لو عرفنا الدافع الحقيقى و السبب الخالاه يعمل كده...وما نقدرش

نعرف ظروفه و احساسه الا لو كنا مكانه ربنا يعافينا و يعافيكم يارب.

[شريف مان]

الموضوع بسيط يا عمو س س

الضابط يا يعيش بقيت حياته عاجز

يا يتعالج أحسن علاج ويرجع زى الحصان وكام مليون فى البنك

لو انت مكانه لا قدر الله تختار ايه

[dongol]

هو جمع كلمة ننوس ايه يا جماعة

لان الموضوع ده كتر قوي في البلد

كل واحد جايب ننوس و عايز يركبه فوق رقاب الخلق لاما بالنفوذ لاما بالفلوس

بس الحمد لله بصراحة ان جمال ما بيعملش كده علي حس ابوه

تصدقوا جمال ده طلع متربي

[الترجمـان]

إحنا بنعاني من ازمة قياده ... دا موضوع لا مفر منه...

سواء في السياسه او في الإقتصاد او الثقافه او حتى على مستوى القيادة المرورية في الشارع المصري ...

فاكرين الواد ال موت عيله بحالها الشهر اللي فات وهوه راجع من الساحل ولا من أي داهيه هوه وصحابه ..؟؟

تخيلوا الواد داه لو من يوم ما استلم الرخصه وهوه عمال طايح في الشوارع

وماسبش غرزه فيكي يا مصر إلا لما خيطها بالعربية ..حد وقفو ..؟؟ حد منعه ..؟؟ حد قاله دا مش شارع ابوك ..؟؟ أبدا

في الأول لما كان بيتمسك سرعه كان بتلفون سامي يخلي الظابط يضربله تعظيم سلام ويديلو رخصة القيادة تاني في إيده ولو عصلج يبقى ياخد وصل يموت بيه الناس تاني زي ما هوه عاوز ,لإنه آخر الأسبوع هيروح لعمو في المكتب يشرب النسكافيه لغاية ما العسكري يجيبله الرخصة من الملف ..

دلوقتي بعد "الإصلاحات" المرورية والتعديلات الأخيرة بقت الحكاية أسهل من كدا بكتير ..ومبقاش فيه داعي يتعب نفسه ويتعب عمو معاه ..!!

لإن الشعار المروري الآن بقى دعه يسرع دعه يمر ...

و سوق بأمان طول ما جيبك مليان ... لا فيه رخصه بتتسحب ولا فيه عربية بتتوقف ... وهيه ديتها إيه ...محضر تصالح ودفع فوري ..ويمكن العملية تطور بعد كدا والظباط يقعدوا في الكمائن بمكن فيزا كارد للجماعه اللي مابيشلوش محافظ ..

للأسف الشعب رخص نفسه وبقى رخيص في نظر اللي بيحطوا السياسات والي ببيرفعوا أديهم ويوافقوا عليها ..

المرور المصري في حاجه إلى ضمير لإن اللي بيحصل في الشارع داه حرام بجد ... في ناس كتير ماشية في الشارع ماينفعش تسوق يا ناس ..

تم تعديل 11 نوفمبر 2010 بواسطة الترجمـان

[Om Zayd]

مبدئيا .. كأغلب مشاكل مصر الحبيبة.. الحل هو القانون الحازم الذي يطبق على الكل دون تفرقة

موضوع قبول التعويض و إنهاء الموضوع يحتاج بعض الضوابط حتى لا يتحول إلى منفذ للي معاهم فلوس .. بحيث لا نكتفي بالفلوس .. بل لا بد ان نتاكد ان الجاني "تعلم الدرس تماما" .. مش شوية فلوس بيرميها و خلاص

الطرق في انجلترا و تخطيطها فظيعة.. كان حلها الوحيد اما يعيدوا الطرق من تاني و ينزعوا الملكيات و تعويضات و وجع قلب

أو

قوانين مرور صارمة جدا

وسائل تكنولوجية للمتابعة

امتحان الرخصة صعب جدا و يضع السلامة و القيادة الآمنة في قمة أولوياته

اي غلطة توحي ان السائق متهور بعض الشيء ... يعيد الامتحان (رسومه غالية

ربنا يصلح حالنا

[se_ Elsyed]

أنا خلاص والله

دماغي هاتفرقع ومش قادر اتعايش مع الأحداث ... بجد والله

المتهم بحادث الدائرى يتصالح مع أهالى9ضحايا والمحكمة تؤجل للمرافعة

أجلت محكمة جنح الوراق اليوم، السبت، برئاسة المستشار محمد المنسى، محاكمة الطالب الجامعى المتهم بقتل ١٢شخصاً وإصابة 8 آخرين بسيارته أعلى الطريق الدائرى فى الوراق، إلى جلسة 20 نوفمبر الجارى مع استمرار حبس المتهم.

حضر المتهم وسط حراسة أمنية مشددة من محبسه وتم إيداعه قفص الاتهام وطلب دفاعه التأجيل لحين إتمام باقى التصالح مع أهل الضحايا، مشيرا إلى أنه تم التصالح بالفعل مع 14 من الضحايا وذويهم ومازال يسير فى إجراءات التصالح مع الباقين، فقررت المحكمة التأجيل لإنهاء إجراءات التصالح والمرافعة وتقديم المستندات.

كان النائب العام، المستشار عبد المجيد محمود، أحال المتهم "على عبد الحميد" (18 عاماً) طالب بالجامعة الأمريكية، إلى محاكمة عاجلة، بعد توجيه تهم القتل والإصابة الخطأ وقيادة سيارة بدون رخصة له.

قتل خطأ إزاي وهو سايق عربية زي الوحش وأخر موديل ومن غير رخصة ؟

وتصالح إيه ونيلة إيه اللي يفيد في القضية ده ؟

ما هم أساساً كان لازم لهم دية قتل خطأ .. وبالتالي دي مدفوعة مدفوعة غصب عن أهله

[زهرة الجبل]

عندي سؤال يا ساده

مش من المفروض إن هناك نوعين من الحقوق مختلفين و كل منهما له صاحب يجوز له التمسك به أو التنازل عنه ؟

أعني أنه عندما يتعدى أحدهم على الآخر أو تقع جريمه ما يكون فيها طرفين جاني و مجني عليه فسوف يترتب على ذلك نوعين من الحقوق

حق مدني يمتلكه المجني عليه و لا يمتلك غيره و يجوز له التمسك به و بالتالي المطالبه بمعاقبة الجاني و الحصول على تعويض منه إذا لزم الأمر أيضاً إلى جانب المعاقبه أو التنازل إذا إرتأى هو ذلك

و النوع الآخر من الحقوق هو الحق العام الذي أرى أنه غائب في كل الأمثله السابقه .. و هو حق المجتمع الذي تمتلك الدوله تطبيقه و لا تمتلك التنازل عنه

لماذا سقط الحق العام تماماً من الصوره إلى هذا الحد الذي سمح لكل جاني قادر على شراء الحق المدني بأن لا يقيم الجريمه بأكثر من قيمة هذا التعويض الذي يدفعه مقابل الحق المدني ؟؟

و الخوف لما يستقر الوضع على كده ندخل مرحلة ان يبقى التعويض فقط هو الأمر الطبيعي .. .. و بعدها بشويه تسقط التعويضات من الصوره كما سقط الحق العام

و بدل ما بنقول الآن لو معاك فلوس عالناس هتدوس .. .. ساعتها هنقول لو واصل دوس و منغير فلوس

فين دور القانون و فين دور السلطه المسؤوله عن تطبيقه و فين الحق العام ؟

و أنا لما بسأل عن الحق العام هنا لا أقصد المعمول به حالياً ( ده إن كان في يعني ) و اللي بتلغيه كلمة مع إيقاف التنفيذ

أنا بسأل عن قانون به عقوبات رادعه لا يمتلك أياً من يكون أن يتنازل عنها .. لا المجني عليه و لا اللطه و لا المجتمع

عقاب رادع و معلن و معروف و ثابت و ملوش ثغرات و مينفعش معاه إيقاف تنفيذ حتى يكون سبباً في التفكير ألف مره و مره قبل أن يقبل المجرم على جريمته

سواء كانت تلك الجريمه بدوافع كيديه و يسبقها إصرار و ترصد .. أو كانت بسبب عدم الإكثراث و الإهمال و الضرب بالقوانين عرض الحائط ..

لأن ببساطه القانون ده لو يتخاف منه مكنش الطالب بتاع الجامعه الأمريكيه ركب العربيه و ساق بالتهور ده و إسترخص أرواح الناس كده وهو أساساً معاهوش رخصه أصلاً

و مكنش والده أو أياً كان المسؤول عنه إشتراله العربيه دي أو مكانش سمح له يستخدمها

و كان ممكن وقتها البيه بتاع كريازي يفكر ألف مره قبل ما يقضي على الضابط بالطريقه دي لأنه عارف إنه ممكن يقضي عشر سنين مثلاُ من عمره في السجن و لا تنفعه فلوسه و لا واسطته

إنما للأسف الشديد

لا سلطه ... و لا قانون .. و لا حق عام .. و لا حول و لا قوة إلا بالله العلي العظيم

[se_ Elsyed]

ماحدش إتكلم يعني عن الحكم اللي اخده الولا بتاع الطريق الدائري ؟

يا بلاش والله

قيادة سيارة فارهه بدون رخصة ..

سرعة جنونية على طريق مكتظ بالناس والسيارات

قتل 12 نفس بشرية وتعجيز 8 اخرين ( لو دولة محترمة كان رئيس الجمهورية إستقال فيها لو عنده ذرة إنسانية )

كل الفيلم ده ... 4 سنين سجن * 9 شهور = 36 شهر ... وإفراج بعد ثلاثة أرباع المده .. يعني 27 شهر سجن ... يا بلاش والله

ربنا يخلي بابا ... ودوس على الشعب المصري كله يا حبيبي فداك مليون واحد

[hakeem]

هو ده الواقع يا س س ..واللى تعرف ديته اقتله..واياك تتخدع بالكلام بتاع القضاء فوق الجميع وحصن الغلابة ولا لاتعليق على احكام القضاء..كله اونطة

اول حاجة الظابط اللى خد تعويض واتنازل..ماهو اصلا واخد على كدة..يعنى ازاى بقى ظابط..؟بالدفع طبعا..وشغال ازاى بالقبض..من اى مكان بئا مش مشكلة المهم يكون مستقبلة bv:- ..وكفاية اللى بيتعمل فى الناس من بتوع الشرطة..

قضية الطريق الدائرى واللى ماتوا واللى هيموتوا..طبعا معاك فلوس تدوس..وهيتم التصالح والواد برائه..زى ما ناس اتحكم عليها بالاعدام وهيطلعوا الاخر برائه وهيطالبوا الحكومة بتعويض عن الالم النفسى اللى حصلهم فى السجن....حلاوة

وهو يعنى حصل ايه لصاحب العبارة اللى مات فيها اكتر من 1000 مصرى..خلع على برة وخدت تعويض للضحايا من شركه التامين وقسمه مع اهالى الضحايا..يعنى طالع كسبان بردوا

الكلام اللى بتقوله ده يا س س نبقى نتكلم فيه لما نكون بلد زى مخاليق ربنا ..وبلدنا تحترمنا