كيف تكون سى السيد فى بيتك

[عنبو]

اولاً السلام عليكم ورحمة الله وبركاته

كل عام وانتم جميعاً بخير

دلوقتى احنا عاوزين نعرف بالصلاة على النبى

ايه هى الخطوات العمليه المتجربه خدوا بالكم من المتجربه دى علشان محدش يدخل يفتى وانا اللى اشيل الليله

علشان الواحد بقى يبقى سي السيد فى بيته

يرجع كده من الشغل يلاقى بقى مراته مجهزه الميه بملح والكلام ده يعنى

طبعاً انا سألت على ارض الواقع ناس كتير قوى

بس المشكله ان الناس مش بتقول الحقيقه يعنى

يعنى تلاقيه يقولك انا معرفش بعمل وبسوى

ولما تشوفه وهو بيكلم المدام تحس انه عامل زى اللى عامله حاجه غلط وخايف

فقولت مافيش بقى غير النت علشان مافيش حد يتكسف ويقول على الحق يعنى

ومتخفوش اللى اعرفه منكم على الحقيقه مش هفتح معاه الموضوع يعنى وكأنه اساساً مكتبش حاجه

يلا مستنيكم ويابخت من نص واحد ابن حلال فى الليله دى

تحياتى

عنبو

[se_ Elsyed]

طب نتكلم جد ... ولا ناخدها هزار عشان الموضوع في باب الإبتسام ؟

أنا هاعتبره جد واتكلم معاك يا عنبو لإني مش شايف حد رد عليك لحد دلوقت ( إحنا جايين نهدي النفوس بس )

- بص يا عنبو .. الموضوع يتوقف على الشخص نفسه أو الزوج يعني ... هل هو محتاج شريكة للحياة وإنسانة لها نفس حقوقه وعليها نفس واجباته بل أكتر شوية عشان مراعاة البيت والأولاد والحاجات دي ... ولا محتاج كيس جوافه مالوش أي لازمه في البيت ؟

لو محتاج شريكة حياة .. اللي هو الإختيار الأولاني .. يبقى ما فيش حاجه إسمها سي السيد او سعيد مهران ... لكن في حاجه إسمها مركب ماشيه في الحياة ركابها الزوج والزوجة والأولاد .... لكن قائد المركب هو الزوج وهو اللي لازم يستشير زوجته وأولاده وفي الأخر يتخذ هو القرار ... وإتخاذ القرار مش ميزة ولا جبروت ولا سُلطة ... لأ ... دي مسئولية عشان لو حصل حاجه للمركب يبقى هو المسئول الأول والأخير وهو اللي يصلح نتيجة خطئه ...

لو محتاج كيس جوافه بقى ... يبقى يدخل بقى على سي السيد والزعيق والكرباج وقلة القيمة .. زي ما ناس كتيرة بتعمل وتعامل الزوجة على إنها مجرد شيء موجود في البيت يطبخ ويغسل ويمسح ويربي العيال ...

لإن العلاقة الزوجية يا عنبو ليست علاقة ندية .. مين يبقى اقوى من مين .. أو مين يبقى له الكلمة اللي تمشي حتى لو غلط ومين يتكلم بصوت منخفض قدام مين ...

يعني بإختصار كل واحد لو عرف دوره وإن هناك رجل وهناك أمراة وكل واحد له دور في الحياة مرسوم ومعروف ... فالحياة بتسير بشكل محترم وبينعكس ده كله على تنشأة الأولاد

أما لو تبدلت الأدوار ولقيت الست متسلطة وعاوزه الكلمة تبقى ليها وهي تبقى الراجل .. أو لقيت الراجل متسلط وينظر لزوجته على إنها تابعة له وليس لها رأي ولا دور .. أو لقيته العكس مهاود ومريح على الاخر ومسلم القيادة لزوجته ...فلازم تلاقي حاجه غلط في الصورة ومستحيل الأمور تمشي بالمنظر ده ...

[أحمد سيف]

صحّ لسانك يا بو الأسيان

شفت با باشمهندس عنبو الراجل جابلك القصه من الآخر ... ما ينفعش اليومين دول تبقى سي السيد اللي بتشوفه في الأفلام والمسلسلات في بيتك وإلا الدنيا هتبوظ وحياتك هتبقى عذاب ... ده كان زمان وجبر

ولا حتى هتعرف تبقى سي السيد في المنتدى لإن الإسم متاخذ.

[اغابي]

طب ممكن صوت نسائي فى الموضوع

اكمن احنا يا نسوان عارفين ديتها

انت تدخل المسا عليها كدا وايه اسد تقولشي اسد

تروح اول ما تدخل من باب البيت تقول مساء الخير اوعى تقول عوافى زى لماضة

- مراتك كدا ممكن تاخد عليك اوى

- ايه عوافى دى

لا انت ادخل قولها مساء الخير او سلاموا عليكم بس ايه تكون ماسودة زى الاسد

يا مرعب

هى ترد وتقول وعليكم السلام يا سي محمد

تروح طاخ طووووخ - تضربها بالقلم على وشها

وتقولها كمان بتردي عليا هى وصلت لكدا

انا الكبير - روحى لمى شنطة هدومك وروحى لمامتك حالا دلوقتى

وانا ليا كلام تانى مع تانت

على الموبايل

وهى الاولى والاخيرة

حتدعيلى يا محمد من قلبك حتكشف راسك في ساعة العصرية

وتقول ربنا يعمر بيتك يا اغابي زي ما عمرتى بيتي

رووق يا عنبو قال سي السيد قال

احب انبهك احنا ما لناش غير سي السيد واحد

وما نعرفش غيره فى المحاورات

خليك راجل مش مان واشرب بيرل

اغابي

تم تعديل 6 سبتمبر 2010 بواسطة اغابي

[عنبو]

se_ Elsyed

مرسلة اليوم, 12:32 PM

طب نتكلم جد ... ولا ناخدها هزار عشان الموضوع في باب الإبتسام ؟

أنا هاعتبره جد واتكلم معاك يا عنبو لإني مش شايف حد رد عليك لحد دلوقت ( إحنا جايين نهدي النفوس بس )

- بص يا عنبو .. الموضوع يتوقف على الشخص نفسه أو الزوج يعني ... هل هو محتاج شريكة للحياة وإنسانة لها نفس حقوقه وعليها نفس واجباته بل أكتر شوية عشان مراعاة البيت والأولاد والحاجات دي ... ولا محتاج كيس جوافه مالوش أي لازمه في البيت ؟

لو محتاج شريكة حياة .. اللي هو الإختيار الأولاني .. يبقى ما فيش حاجه إسمها سي السيد او سعيد مهران ... لكن في حاجه إسمها مركب ماشيه في الحياة ركابها الزوج والزوجة والأولاد .... لكن قائد المركب هو الزوج وهو اللي لازم يستشير زوجته وأولاده وفي الأخر يتخذ هو القرار ... وإتخاذ القرار مش ميزة ولا جبروت ولا سُلطة ... لأ ... دي مسئولية عشان لو حصل حاجه للمركب يبقى هو المسئول الأول والأخير وهو اللي يصلح نتيجة خطئه ...

لو محتاج كيس جوافه بقى ... يبقى يدخل بقى على سي السيد والزعيق والكرباج وقلة القيمة .. زي ما ناس كتيرة بتعمل وتعامل الزوجة على إنها مجرد شيء موجود في البيت يطبخ ويغسل ويمسح ويربي العيال ...

لإن العلاقة الزوجية يا عنبو ليست علاقة ندية .. مين يبقى اقوى من مين .. أو مين يبقى له الكلمة اللي تمشي حتى لو غلط ومين يتكلم بصوت منخفض قدام مين ...

يعني بإختصار كل واحد لو عرف دوره وإن هناك رجل وهناك أمراة وكل واحد له دور في الحياة مرسوم ومعروف ... فالحياة بتسير بشكل محترم وبينعكس ده كله على تنشأة الأولاد

أما لو تبدلت الأدوار ولقيت الست متسلطة وعاوزه الكلمة تبقى ليها وهي تبقى الراجل .. أو لقيت الراجل متسلط وينظر لزوجته على إنها تابعة له وليس لها رأي ولا دور .. أو لقيته العكس مهاود ومريح على الاخر ومسلم القيادة لزوجته ...فلازم تلاقي حاجه غلط في الصورة ومستحيل الأمور تمشي بالمنظر ده ...

لا كيس جوافه ايه الله يرضى عليك

انا عاوز واحده بنى ادمه ليه حقوق وعليها واجبات

بس برده يعنى ابقى سيى السيد ولو حتى فى فى الاسبوع اقولك خليها يوم فى الشهر

ولا كتير عليا يا سى السيد وكله بالاتفاق يعنى

يعنى هنقول مثلاً اخر يوم من كل شهر ابقى انا سى السيد يعنى واعيش بقى دور سى السيد

وبعد لما اليوم يخلص ارجع عنبو زى الاول ده مجرد اقتراج يعنى ولا انت ايه رأيك يا كبير السينيه

أحمد سيف

مرسلة اليوم, 01:51 PM

صحّ لسانك يا بو الأسيان

شفت با باشمهندس عنبو الراجل جابلك القصه من الآخر ... ما ينفعش اليومين دول تبقى سي السيد اللي بتشوفه في الأفلام والمسلسلات في بيتك وإلا الدنيا هتبوظ وحياتك هتبقى عذاب ... ده كان زمان وجبر

ولا حتى هتعرف تبقى سي السيد في المنتدى لإن الإسم متاخذ.

ربنا يطمنك يا دكتور احمد

يعنى خلاص اشيل الفكره دى من دماغى

وانا اللى كنتوا فاكركم هتقفوا معايا وتشجعونى

طلع ان سى السيد ده مش موجود بس الا فى الخيال "" وش واحد مصدوم فى الواقع "

اغابي

مرسلة اليوم, 02:06 PM

طب ممكن صوت نسائي فى الموضوع

اكمن احنا يا نسوان عارفين ديتها

انت تدخل المسا عليها كدا وايه اسد تقولشي اسد

تروح اول ما تدخل من باب البيت تقول مساء الخير اوعى تقول عوافى زى لماضة

- مراتك كدا ممكن تاخد عليك اوى

- ايه عوافى دى

لا انت ادخل قولها مساء الخير او سلاموا عليكم بس ايه تكون ماسودة زى الاسد

يا مرعب

هى ترد وتقول وعليكم السلام يا سي محمد

تروح طاخ طووووخ - تضربها بالقلم على وشها

وتقولها كمان بتردي عليا هى وصلت لكدا

انا الكبير - روحى لمى شنطة هدومك وروحى لمامتك حالا دلوقتى

وانا ليا كلام تانى مع تانت

على الموبايل

وهى الاولى والاخيرة

حتدعيلى يا محمد من قلبك حتكشف راسك في ساعة العصرية

وتقول ربنا يعمر بيتك يا اغابي زي ما عمرتى بيتي

رووق يا عنبو قال سي السيد قال

احب انبهك احنا ما لناش غير سي السيد واحد

وما نعرفش غيره فى المحاورات

خليك راجل مش مان واشرب بيرل

اغابي

لا ضرب ايه بس يا اغابى

انا مبضربش حريم خالص مهما عملوا حتى لو حرقوا الاكل تخيلى !!

بس احب اقولك على حاجه انتظرى سى السيد على ارض الواقع

وبكره تقولى عنبو قال ووفى

تحياتى

عنبو بيفكر

[Howayda Ismail]

انا كنت مترددة اشارك لانك طلبت راى الرجال فقط لكن مشاركة اغابى شجعتنى

نصيحة من اخت كبيرة الراجل بيصبح سى السيد فعليا وبرضا زوجته لما يؤثرها بحبه وعطفه وحنانه

وبيقدرها فكريا ومعنويا قبل كل شئ ويحترم رايها لان اساس العلاقة الزوجية المودة والرحمة

فى الحالة دى بس تخلع عنيها وتديها له عن حب و طيب خاطر

لكن لو سى السيد نجيب محفوظ فى زمنا دلوقت اسفة فى التعبير بيحول نفسه لاكبر مغفل فى بيته

لانها فى الحالة دى بتوهمه بصدق معتقده لكن بتخبى عليه كل كبيرة وصغيرة برة وجوة ويصبح اخر

من يعلم ولو بتراعى ربنا وعندها كرامة مش حتقبل الوضع ده(لانها مش كيس جوافة كما ذكر الاستاذ سى السيد)

على فكرة كان فى اعلان لطيف يذاع من مده فى TV للفنان احمد ماهر مضمونه:

(الراجل مش بس بكلمته الراجل برعايته لبيته واسرته)

[Om Zayd]

السلام عليكم

ده اللي كتبته بعد رد س.س. ..بس سي السيد بتاعي شغلني (ابني) مقدرش أأخرله طلب

بما انكم بتتكلموا بجد .. اسمحلي أنقل وجهة نظر الطرف التاني

الموضوع ده متفاوت جدا .. تذكر قوله صلى الله عليه و سلم "خيركم خيركم لأهله وأنا خيركم لأهلي" احكي معاها و اسمع منها .. الحسم في موضعه .. الوضوح من البداية .. بالذات إذا فيه "خطوط حمراء" .. لا تعزل نفسك تماما عن أمور البيت

إذا افتكرت حاجة تاني هبقى أضيفها

عيد سعيد و حياة جميلة

[لماضة مصرية جدا]

السلام عليكم و رحمة الله و بركاته

اخواني المحاورين و المحاوراتية....و انا و انت و الناس الحلوة و اللي بيحبنا ميضربش نار

مش قادرة امنع نفسي من الضوحك

ليه بقي

اصل ابننا البار الرفيق عنبووووف من ساعة ما كتب الموضوع دوت و هو قاعد في الغابة و عصر قداحة ذهنه علي اصوات زئير الاسد.....بعديها اختفي في ظروف غامضة

ايييييييييييييه دنيا

قولته ميمسكشي سلك الكهربا....مسمعشي الكلام

كان راجل طيب

كان رجل و الرجال قليل...(وش عم ايوب)

اللي بعده....(وش حانوتي بيشمر كم الجلابية.... :lol: )

محدش بقي يقرب م التوبيك دوت من اخواتنا الخناشير

هذا و قد اذعر من انذر

فوتكم بعافية

[Amr Radwan]

وصفة مجربة و مضمونة 100% و ابقا ادعيلي

http://www.youtube.com/watch?v=h5fautAGn6Q

الحياة الزوجية السعيدة ليس فيها سي السيد و لا المرأة الحديدية

الحياة الزوجية السعيدة تعتمد علي الاحترام و الاتفاق و الثقة

كلما ألنت الطرف لزوجتك كلما كنت زوجا كريما طيبا عطوفا

و سيبك من موضوع حلم انك تبقي سي السيد

تم تعديل 26 سبتمبر 2010 بواسطة Amr Radwan

[Mr MAGED]

عنبو حبيبي .. ترجع بالسلامة ان شاء الله ... أجازة سعيدة يا رب

بس معلهش بقي فاتتك رحلة بحرية مع الأخوة الأعداء ... وقفلت بأكلة مندي نمنا جنبها

المهم .. ندخل في الجد بقي

مش عارف ليه معظم اللي ردوا عليك ستات ... الرجالة خايفين الظاهر

زي ما قال أخونا الكبير سي السيد .. والأهم من كده شوف الاسلام بيقول ايه

وشوف ازاي الرسول عليه الصلاة والسلام كان بيعامل زوجاته

وشوف سيدنا عمر لما زوجته رفعت صوتها عليه قال ايه

هتلاقي قصص وأحداث واقعية كتير بتقول ان مافيش حاجة اسمها سي السيد

فيه حاجة اسمها حب واحترام واحتواء

علي قد ما هتحب زوجتك وتحترمها وتقدر تحتويها ... علي قد ما تلاقي سعادة وراحة بال

وتأكد ان لكل فعل رد فعل ... وان مكنش رد الفعل ده هيتم قدامك ... تأكد انه هيتم من وراك

وده أكيد شيء انت مش هتحبه ولا هترضي عنه

انا عارف انك لسة مجربتش .. ومش هتعرف معني الكلام ده الوقتي

بس عشان تحصد الخير لازم تزرع خير ... وعشان ترتاح في حياتك ان شاء الله

لازم تمشي بوصية الرسول الكريم لما قال

" فاظفر بذات الدين تربت يداك "

تحياتي

[hOuSsAm]

لكن قائد المركب هو الزوج وهو اللي لازم يستشير زوجته وأولاده وفي الأخر يتخذ هو القرار ... وإتخاذ القرار مش ميزة ولا جبروت ولا سُلطة ... لأ ... دي مسئولية عشان لو حصل حاجه للمركب يبقى هو المسئول الأول والأخير وهو اللي يصلح نتيجة خطئه ...

بص يا عمنا الكلمة دى عجبتنى اوى عشان كدة بسجل اعجاب

اما ابننا عنبو (بلاش ابننا دى عشان متكبرنيش ممكن اقول اخويا الصغير)

الناس المحترمة اللى فوق دول قالوا كلام كتير محترم انا هضيف بس عليهم حاجة صغيرة بس كبيرة فى قيمتها

الاحترام والاخلاص

ترجعلنا بالسلامة باذن الله