احذر .. السيارة تقودها سيدة .. احذر .. السيارة تقودها سيدة

[Amr Radwan]

اااااااااه ... طالما تألمت من سواقة السيدات في مصر .. و فعلا انا لما بشوف ست سايقة عربية جمبي لازم اوسع لها الطريق خااااااااااااالص عشان تعرف تعدي لاني عاوز احافظ علي نفسي و علي العربية اللي انا سايقها ...

كثيرا اشاهد مواقف لا تحسد عليها السيدات في الشوارع اثناء قيادة السيارة في الشارع بسبب الخوف و عدم تحمل المسؤولية بالاضافة علي عدم التركيز و الرهبة من انها تخطئ و الناس تضحك ..

هذا برده لا يمنع الاعتداءات علي السيدات بالالفاظ مع اخطاء صغيرة في السواقة ممكن يعملها حتي "شوماخر" و لكن الرجالة ما بتصدق

ناهيك عن سواقين الميكروباس اللي مجرد ما بيلاقي ست جمبه بيقعد يزنق عليها بعربيته و يوترها و يبوظ اعصابها و في الاخر لما تحصل مصيبة لها او له يرجع يقول الغلط علي اللي خلي السستات تسوق .. !!! طيب اية اللي خلاك تزنق عليها .. ابعد عنها خالص ...

انا متأكد ان الست اللي هتسوق بتكون اكيد مضطرة لكده مش حبا في الاذدحام المروري و تريقة اللي رايح و اللي جاي عليها ..

و فيه بقا ستات .. اساتذه سواقة .. بس دي نسبة ضئيلة جدا في توقعي لا تزيد عن 1%

ملحوظة غريبة سمعتها ان في الصين عاملين مواقف خاصة بمساحات اوسع للسيدات عشان يعرفوا يركنو براحتهم من غير ما يخبطو لا عربيتهم و لا عربية الغلبان اللي جمبهم .

مرة في الاتوستراد لقيت لك ست حامل و اختها حامل برده واحد خبط عربيتها من الخلف و هي نزلت و هو زي الباشا رافض ينزل و عاوز يمشي .. و

هي ما شاء الله عليها كان عندها جرأة مش علي راجل .. وقفت قدام عربيته و منعته من انه يتحرك .. و التانية دخلت علي الكرسي اللي جمب السواق و هجمت علي المفاتيح و خطفتها !!!! عشان ما يتحركش الا لما يوصل المرور .. لانه كان غلطان و هي علي حق ..

و سالت نفسي .. هل ان الست تتعرض للمضايقات دي و البهدلة دي في الطريق و هي سايقة .. عادي ؟؟

انا فعلا بكون مشفق عليهم و ببقا متضايق من السواق اللي بيغلس علي اي ست بس في نفس الوقت ببعد عن الستات اللي بتسوق خااالص .

اما عمرو اديب فجبت لكم مقطع هيضحكم و خاصة علي تعليقاته ... مع طبعا اعتراضي علي بعض تعليقاته .

http://www.youtube.com/watch?v=gOa5Std1-rs

في الاخر .. كل الاحترام لاخواتنا الستات اللي بتسوق .

سؤالي لكم .. هل صح و لا غلط ان الست تسوق ؟

و انا بسال عن الناحية الاجتماعية و الانسانية و الامنية و المرورية و كل حاجة ..

دمتم في سعادة دائمة

[اغابي]

بقى نسبة الستات اللى بتسوق كويس واحد فى المية

اه ه ه

وبعدين بقى كلكم شغالين على الستات فى المحاورات اليومين دول

حضرتك وعنبو وسمبا - خير - هو مفيش غيرى بيرد عليكم

ومالها سواقة الستات انا ليا اكتر من 6 سنين بسوق العربية ما عملتش غير حادث واحد فقط

ومخالفات مرة كسرت الاشارة الحمرا لان ابنى كان فى المقعد الخلفى وبيعيط جامد وما انتبهتش ان الاشارة حمرا بحاول اسكت فيه

كسرتها ولقتطتتنى الكاميرا ودفعت 50 دينار مخالفة

لكن تعالى لتاريخ جوزى فى المخالفات والحوادث

ولا اخويا قصة كبيرة

انا بجد سواقتى بحرص وكل حاجة فى الطريق قرياها اثناء القيادة

يعنى حتى لو مفاجاه بابقى خلاص واخدة بالى

يعنى فى ستات سواقتهم افضل من الرجالة بكتير بجد بجد

ميرسي

اغابي

[shiko]

....انتبه ...

السيارة ترجع إلى الخلف ...

انتبه ...

السيارة ترجع إلى الخلف

مين بيتكلم على سواقة الستات ؟؟

طب عندك دليل على اللى حضرتك بتقوله ؟؟

ممكن تقولى احصائيات للحوادث المرورية نسبة كام لكام سيدات إلى رجل؟؟

طب المخالفات ؟؟

....

بص على العموم انا شايفة ان الستات سواقتهم زى الفل ...

وتحذيرى اخوى ...بلاش تنرفز بنت سايقة على الطريق ليه بقى ؟؟

ممكن تعمل مجنونة ...وتوديك وتودى نفسها فى داهية علشان تثبت انها ما بتخفش من حاجة ...

[Howayda Ismail]

الظاهر ده رأى كل الرجالة فى الموضوع ده

انا نفسى اتعلم السواقة لكن زوجى رافض الفكرة نهائى

وبعدين العملية مش مقياس يعنى فعلا فى سيدات بتبقى واثقة من نفسها وتسوق احسن من بعض الرجال

وفى سيدات بتسوق باضطراب وده ممكن يربكها فى الطريق وذلك موجود ايضا عند بعض الرجال

من الاخر السواقة ملهاش كبير فى الزحمة وشدة تقارب العربيات من بعض والسرعة يعنى ممكن تكون

ماهر سواقة لكن نصيبك تتخبط عربيتك من ست او راجل

[أحمد سيف]

بصراحه السواقة في مصر من اولها لآخرها غلط ... والكل مش بيعرف يسوق ستات ولا رجاله

السواقه مش انك تظبط رجلك على البنزين والدبرياش وتمسك الدركسيون ... السواقة هي تطبيق قواعد المرور

لما يبقى هناك نظام للمرور وناس عارفه القواعد وبتطبقها نبقى نقدر نقيّم مين اللي بيسوق صحّ ومين اللي بيسوق غلط

وزي ما الاستاذه شيكو قالت ... قارنوا نسبة الحوادث ... وأدينا شايفين السعودية مثلا نسبة الحوادث والوفيات فيها عالمه ازاي رغم إن مافيش ستات بتسوق

تم تعديل 7 سبتمبر 2010 بواسطة أحمد سيف

[Howayda Ismail]

كلام حضرتك صح لكن حتى لو هناك من يلتزم بقواعد المرور يااما يتعارك مع اللى وراه عشان الكلكسات

اللى بيضربها له يااما يخبط فيه من ورا

مسكنا بيطل على شارع رئيسى بيفصل بين حيين يعنى بيعبره مئات المواطنين وتلاميذ المدارس يوميا

وحدث الكثير من الحوداث بسبب السرعة والرعونة توفى على اثرها نساء ورجال واخرها تلميذ فى الابتدائى

وزاد ذلك بعد اتساع الطريق وازالة المطب الاصطناعى لدرجة قيام الاهالى بغلق الطريق اكتر من مرة

احتجاجا على ماحدث وتباطئ المسئولين فى الحضور وكان السبب الرئيسى لتواجد الشرطة والمرور

هو غلق الطريق على كبارات المحافظة وكانت تحل دائما بارهاب المواطنين وفض تجمعهم

ده غير عشرات المشاحنات يوميا والخبطات بين السيارات وللاسف مافيش اشارة واحد ولا رجل مرور

حتى قانون المرور الاخير المنع فى الاتجاه المضاد اكتر فئة لم تلتزم بيه سيارات الشرطة

وعربات الامن المركزى مع ان مافيش ضرورة للمخالفةوطبعا ماركات سيارات على اعلى مستوى

الخلل كبير والمحسبوية والواسطة وراء حصول الكثير على رخص القيادة وهم فى بيوتهم

[Amr Radwan]

شكرا شيكو و هند و احمد سيف

الاول كل سنة و انتم طيبيبن و عيد سعيد علي الكل

و انا بعتذر عن عدم متابعه الموضوع في الفترة اللي فاتت بسبب الاجازات و العيد و كل سنة و انتم طيبين

اما بالنسبة للموضوع .. كده عندنا 3 اراء رئيسية

1- نسبة كبيرة من الستات مش بتعرف تسوق و بتعمل لخبطة في الطريق

2- الستات زيها زي الرجالة في السواقة كل منهما بيخطأ و بيعمل الصح و مفيش قيادة صحيحة 100% للرجالة و نسبة اقل للستات

3- راي اخر يحترم و هو ان لا الستات و لا الرجالة في مصر بتعرف تسوق لان مفيش احترام لقواعد المرور

انتو بقا اية رايكم ؟

ملحوظة اخيرة .. اننا بنتكلم .. بنتحاور .. بنتناقش .. و محدش ياخد الموضوع بحساسية و يحسس نفسه بنظرية المؤامرة الرجالية :)

لا و الله الموضوع بسيط جدا و انا بتكلم معاكم عشان كلنا نستفيد و يمكن انا أوغيري يكون وجهه نظرنا مش سليمة و احب اغيرها لو هي فعلا مش سليمة ..

تحياتي لكم جميعا :)

[اغابي]

حصل موقف الاسبوع اللى فات والامانة تقتضي ان احكيه فى التوبيك بتاعك يا استاذ عمر مع انى ما كنتش ناوية

لكن هو ممكن يحصل مع الرجالة برضوه -

كنت راجعة من الشغل وتعبانة جدا ومرهقة جدا جدا وكمان جعانة

يعنى بسوق وانا فى عالم تانى - واى حد ممكن يحصل معاه كدا عادى هما

الرجالة ما بيتعبوش ولا بيجوعو ولا بيرهقو وبيسوقو عادى يعنى

المهم وانا واخده طريق الغزالى وعند الاشارة على اساس حادخل

تحت الجسر من الارهاق عملت غلطة صوغيرة اوى اد كدا

انى اديت اشارة شمال ودخلت يمين

:lol: :lol:

اكيد اللى ورايا متاكد ومتاكد انى حادخل شمال ما هو مديا اشارة شمال

طب ازاى حادخل يمين بالعقل كدا وانا ما كنتش واخدة بالى وكان عندى صدااااع جامد

رحت داخلة يمين عكش الاشارة اللى بتنور فى العربية ونورت الشارع كله طبعا

كانو 3 عربيات حيخبطوا فيا وفى بعضينا كدا كلنا اهو تحس كانت حتبقى حفلة كبيرة

حادث رباعى او خماسي كدا 5 عربيات فى بعض وبعدين اعتذرت من الكل ومشيت وفكرت انى اكسر اشارت العربية يبقى افضل

وفى الطريق افتكرت بس داه موقف ممكن يحصل مع الرجالة صح صح

وحصل الاسبوع اللى فات واول مرة يحصل معايا اللخبطة

دى بجد انا حريصة وحوادث يعتبر ماعنديش اوى يعنى

ربنا ستر

وبعدين الفيديو اللى منزلو عمر اديب داه مفترى اوى يعنى مش معقول

ضحكتونى - بس صدقونى الستات مش فاشلين بالعكس حريصين جدا

تقبلوا مرورى

اغابي

تم تعديل 20 سبتمبر 2010 بواسطة اغابي

[hOuSsAm]

ناهيك عن سواقين الميكروباس اللي مجرد ما بيلاقي ست جمبه بيقعد يزنق عليها بعربيته و يوترها و يبوظ اعصابها و في الاخر لما تحصل مصيبة لها او له يرجع يقول الغلط علي اللي خلي السستات تسوق .. !!!

فكرتنى يا عمرو بموقف كنت فى التحرير وراكب مايكروباص واذا به الميكروباص اللى قدام بيحود يمين.... طب ليه عشان واحدة ست كانت سايقة عربية ملاكى عاليمين وكل شوية يقرب منها والطريق واقف اصلا لحد مكسرها المرايا الشمال تعمدا......... واعدوا يشتموا فى بعضهم هما الاتنين بالفاظ مخجلة.... السواق بصراحة كان واضح انه متعمد يعمل كدة مش عارف ليه ومحدش عرف يحمى الست دى من البلطجة دى

للاسف يعمرو المشكلة مش فى سواقة الستات (وان كانت تمثل جزء من المشكلة) ولكن المشكلة فى المنظومة كلها كلها غلط فى غلط واللى يسوق من غير اى خبطة او حكة حاجة من اتنين لاما سوبر مان لاما بيمشى بعربية هليكوبتر

المهم وانا واخده طريق الغزالى وعند الاشارة على اساس حادخل

تحت الجسر من الارهاق عملت غلطة صوغيرة اوى اد كدا

انى اديت اشارة شمال ودخلت يمين

يا اغابى القصة دى بشوفها كل يوم 20 مرة ويمكن عمرو شافها معايا

طيب قولى الحمد لله ان عندكوا بيدوا اشارات طيب عندنا محدش بيدى اى اشارة او اى انتظار ولا فى الدماغ وتلاقى واحد فجاة كسر قدامك الطريق

للاسف دى ثقافة شعوب وكل مكانت العملية منظمة وفيه وعى الحوادث هتقل بصرف النظر عن نوع الجنس اللى بيقود السيارة