هزيمة منكرة لمنتخب مصر امام ساحل العاج

[se_ Elsyed]

لقي منتخب مصر لكرة القدم هزيمة منكرة على ارضه ووسط جمهورة من منتخب ساحل العاج 1-2 في ثاني مباريات التصفيات المؤهلة لكأس العالم 2006 بألمانيا

بعد اداء باهت وإرتجالي من اشاوس الفريق المصري الذين بحاجة الي دخول كي جي ون كوره خاصة لاعبي الدفاع الذين يعطوا إحساس للجمهور المشاهد بإن اي شحص يحدف طوبة ممكن تدخل فينا هدف

اما عن حارس العرين عصام الحضري فحدث ولا حرج حيث انه ليس جديراً بان يزود عن مرمى فريق سرس الليان

بجد حاجة تقرف

[kokowawa1979]

تارديللي افندي اتغر بعد مباراة السودان ولعب بنفس التشكيله الكسر : الأستاذ عصام بطيخة صاحب الكباري والأنفاق !!!

السيد محمد شوقي الذي يربط في الساقية ويدور فيها !!!

ومحمد افندي حركات الشهير بأبو خيبة !!!

ويضاف إليهم السيد حسام رخيص الهولندي المكسح !!!!

كل كاس عالم وانتم طيبين بح خلاص طلعنا من التصفيات !!!!!

[linux]

حرقة دم علي الفاضي.

أنا مقتنع مية المية أن المرة دي العيب مش في المدرب. أخطاء ساذجة و دفاعنا كل الفرق ها تأكل عليه عيش. اللعيبة نازلة أصلا مرعوبة و خايفة. نفسي أعرف ليه أصرار الضهر علي لعب كور طويلة و عالية مع فرق أفريقيا؟

محمود بكر زود من حرقة الدم بتعليقة السلبي علي كل حاجة.

الأمل لسة موجود أن شاء الله لكن الفريق ده لازم يلعب ماتشات ودية كتير و يشوف حل في تناسق خطين الوسط و الدفاع.

كلمة حق، مع أني أهلاوي (يمكن علشان أهلاوي!!) أنا بحس بثقة أكتر لما عبد الواحد السيد يكون في حراسة المرمي.

تم تعديل 20 يونيو 2004 بواسطة linux

[se_ Elsyed]

الغرابة بقى ان كل الفرق الكبيرة جاتلها فره واتغلبت

ج افريقيا

السنغال

نيجيريا

تونس

حتى الكاميرون اتعادلت مع ليبيا

بس ده لا يبرر وكستنا التقيلة يكفي ان بلد 70 مليون مافيهاش مهاجمين والكل بيهلفط ويطجن ولو بصيت على دكة الاحتياطي يصعب عليم الفريق

بس انا عاتب عليك يا كوكواوا انك بتنتقد لاعبي الاهلي بالمنتخب وكأنهم كانوا بيلعبوا لوحدهم

كل اللعيبة كسر بما فيهم الكابتن حسام غالي البي مخه مايفرقش كتير عن جزمته

[Hasaballa 17]

ياريت بس الجرايد ما تخرجش علينا بشلة العواطلية (الخبراء) و يفتوا ان السبب فى خطة 4-2-4 وان لعيبتنا مش متعويدين عليها يا ننوس عينهم وفالح كل لعيب فيهم عايز قد كده علشان يجدد العقد .

لازم كلنا نعرف ان المنافسة من اساسه بين الكميرون و ساحل العاج و ان لو تاهلنا يبقى ده من عند ربنا و منصدقش ان احنا من الفرق المرشحةلان ده مستوانا.

و ياريت هؤلاء الخبراء يفكروا ليه فرقة زى ساحل العاج كنا من كام سنة بناكل عليها عيش رايح جاى بقت بتسبب لينا الرعب ده.

حاجة تقرف.

تم تعديل 20 يونيو 2004 بواسطة Hasaballa 17

[disappointed]

تارديللّى مسئول عن الهزيمة بأخطاء التشكيل

كيف يلعب الحضرى و عبد الواحد السيّد على الخط؟؟؟

كيف يلعب حسام غالى (كصانع لعب) و حازم إمام على الخط؟؟؟

كيف يلعب محمد شوقى و تامر عبد الحميد (ذو الثلاث رئات) على الخط؟؟؟

كيف ياعب فى الباك اليمين فى المنتخب فى ماتش هام زى ده لاعب لا يلعب باك يمين أساسا فى ناديه؟؟؟

كيف يلعب محمد عبد الوهاب و طارق السيّد على الخط؟؟؟

كيف يلعب أبو تريكه مهاجم صريح و عم بيومى بتاع التين الشوكى عارف إن ده مش مركزه و إن أبو تريكه لا يبدع إلا تحت الإثنين المهاجمين و بالإنطلاق من نصف الملعب؟؟؟؟

والله العظيم مش علشان أنا زملكاوى , بس حقيقى المفروض اللعيبة اللى قلت أساميها دى كانت هيّه اللى تلعب لأنها فعلا هى الأفضل فى الوقت الحالى

وبعدين........ حد يشوف لنا حل فى المصيبة اللى إسمها أحمد السيّد ده (ده أنا حتى سمعت إن أطفال الجالية الكوت ديفواريّة راحوا لتارديلّلى بعد الماتش و قالوا له : ممكن يا أبو الكباتن تسلّفنا أحمد السيّد نرقـّصه شويّه و حنبقى نرجّعهولكم؟؟!!

حاجه تجيب شلل معيز بصراحه

تم تعديل 20 يونيو 2004 بواسطة disappointed

[afiona]

هالو,

كيف يلعب حسام غالى (كصانع لعب) و حازم إمام على الخط؟؟؟

لأن ببساطة حازم لاعب دمث الخلق ومش بتاع مشاكل ومعندوش إتصالات زى جدو حسام أو ستو إبراهيم حسن علشان يقلب الدنيا لما يقعد على الخط.

بس الغرابة هو تفضيل لاعب يلعب فى غير مركزه على ثعلوبة...إيه التأخر الفكرى ده ؟

وبعدين........ حد يشوف لنا حل فى المصيبة اللى إسمها أحمد السيّد ده (ده أنا حتى سمعت إن أطفال الجالية الكوت ديفواريّة راحوا لتارديلّلى بعد الماتش و قالوا له : ممكن يا أبو الكباتن تسلّفنا أحمد السيّد نرقـّصه شويّه و حنبقى نرجّعهولكم؟؟!!

مش عارف ليه إفتكرت مصطفى تونس وأنا بأشوف الشارع المفتوح بإسم أحمد السيد...مين ده بالمناسبة؟ مفروض الواحد يكون عارفه؟

أنا مستعد آخد خمس مرتب تارديللى (وبالمصرى كمان) وأتعهد إنى حأتغلب على أرضى...مش صعبة يعنى...

يا خوفى لأحسن يرجع التؤام تانى...

تم تعديل 21 يونيو 2004 بواسطة afiona

[hamo90]

أعتقد أن العشم كلنا في المنتخب بتاعنا

بس يا أخوانا المشكلة مش في المدرب

المدرب ده كويس جدا الا في نقطة تأخير التغييرات الي كانت لازم تتعمل من أول الشوط التاني

بس بصراحة فعلا كوت ديفوار أو الكاميرون لو فرقة فيهم وصلت كأس العالم هتشرف الكرة الافريقية لانها منتخبات مش شوية هواة مش عارفين حتي يتحركوا في الملعب

يعني زي ما قولنا زمان قبل التصفيات

المجموعة دي فيها 5 فرق كرة قدم وفريق حكشة

hamo

[هشام عبد الوهاب]

ماذا حدث فى المباراة ولماذا انهزمنا او قل اتفضحنا لأننا لم نلعب اصلا ....

التشكيل ... الحضرى سئ الى اقصى درجة ممكنة .

مسئول عن الهدف الأول بنسبة 90%

مسئول عن الهدف الثانى بنسبة 50%

لم يخرج من مرماه فى عدد كبير من الكرات العرضية وظل متشبس بالوقوف على الخط ... وعندما خرج كاد يتسبب فى هدفين ... لم يتصدى الا لمحاولة واحدة ناجحة .

الدفاع . ضعيف

بشير والسقا اجادا الى حد ما واخطأ كل منهما مرة واحدة الأولى ادت الى انفراد بالمرمى والثانية تسببت فى الهدف الثانى .

محمد عبد الوهاب ... دوره الهجومى غير واضح فلم يرفع اى كرة سليمة ودوره الدفاعى سئ جدا ..

احمد السيد ... من كوارث المبارة .. بطء .. غباء..سوء تصرف..كل تمريراته مقطوعه .. شارك فى صنع الهدف الأول للخصم .. الحسنة الوحيدة تغطيته على المدافعين احيانا.

الوسط ... وكسه .

عبد ربه بدأ ممتاز ومع الوقت لم يعد له اى دور لا هجومى ولا دفاعى وشارك مع احمد السيد فى شارع للخصم تجول به من شاء منهم .

حسن مصطفى .. افضل لاعبى هذا الخط .. فى الشوط الثانى تحرك كثيرا وسبب ازعاجا ولم يلق اى مساندة من محمد عبد الوهاب .. لمسته الأخيرة كانت اهم عيوبه ..

حسام غالى ... سئ جدا ولم يفعل اى شئ .. تحركات بطيئة استلام وتسليم سئ .. لم يمد المهاجمين بأى شئ .. ولا يملك مهارة التسديد ... لماذا شارك !!!!!!!!

محمد شوقى ... اكثر لاعب جرى فى الملعب لكن بدون الكرة وضد الكرة ... نفس مستوى غالى لكن بيجرى على الفاضى كتير .

الهجوم . تايه

ابوتريكه لم يكن له اى وجود نهائيا حتى الهدف جاء بدون قصد

عبد الحليم على .. افضل لاعب فى المنتخب فى الشوط الأول .بذل مجهود ضخم وسبب ازعاج كبير .. هبط اداءه فى الشوط الثانى .

البدلاء.

طارق السيد .. لم يلعب

احمد حسن . 8 دقائق لم تسعفه وان حاول .

عمرو زكى .......... لسه بدرى قوى

----------------------------------------------

السيد تارديللى وكوارثه واخطاء بالجملة

التشكيل ..... سئ جدا .. اشرك الحضرى وعبد الواحد افضل كثيرا....... اشرك احمد السيد فى مركز الظهير الأيمن لأول مرة وتركه يكمل المباراة رغم انه كانت نقطة ضعف كبيرة .

محمد عبد الوهاب مدافع متوسط ومهاجم اقل من المتوسط ..طارق السيد افضل كثيرا خاصة لو تعاون مع حسن مصطفى .

محمد شوقى وحسام غالى ... لماذا اشرك الأثنين معا ؟؟ لاعبا ارتكاز تنقصهم مهارة التسديد وتمويل المهاجمين بكرات قاتلة ..لم يكن دور كل منهم محدد وانما خط دفاع اول والسلام ... والأفضل كان اللعب بابو تريكه مكان احدهم .

--------

التغييرات

كلها خاطئة ومتأخرة وغير مفهومة .

طارق السيد(تغيير متأخر وخاطئ) لعب ناحية اليسار وظل محمد عبد الوهاب موجود ونقل حسن مصطفى فور تألقه للجبهة اليمنى !!!!!!!!

احمد حسن .. (تغيير متأخر) كان لابد ان يلعب مبكرا فى بداية الشوط لهبوط مستوى الجبهة اليمنى والأفضل كان خروج احمد السيد وعودة عبد ربه للخلف.

عمرو زكى ... تغيير خاطئ بكل المقاييس .. بقاء عبد الحليم رغم اجهاده افضل او نزول ابوجريشة الأكثر خبرة ومهارة .

---------

ادارة المبارة ... ولا الحضانة .

التغييرات داخل الملعب كلها سيئة جدا .. حسن مصطفى تألق فى اليسار فنقله الى اليمين ...

ابو تريكة سئ ولم يستبدله او يضعه تحت المهاجمين بنزول ابو جريشة وخروج غالى او شوقى .

لم يشرك حازم امام وكان ممكن يلعب مكان غالى، شوقى، ابو تريكة ، احمد السيد ، او حتى الحضرى .

كل تصفيات وانتم بخير ...........

[afiona]

كل لما يكون فيه تشكيل غبى، يقولوا إنه فكر غير تقليدى(الجوهرى) أو نتيجة ظروف المباراة (فاروق جعفر) أو أى سبب يخلينا نفهم إن إحنا اللى مش عارفين نتفرج...

بس إشراك الحضرى وركن عبد الواحد ليه ؟ يا ترى الحضرى مثلا النواحى التكتيكية أحسن عنده ؟

[هشام عبد الوهاب]

اما السيد محمود بكر المعلق فحدث ولا حرج .

فزلكة .. نطق خطأ للأسماء .. مفردات لغة سيئة الى اقصى درجة ... بيشوف حاجات لوحده .. وبيفهم حاجات غير كل الجمهور .

الأخ بكر تحفنا بشوية كلمات من قاموسه اللغوى الخاص والعجيب ومثال لذلك ..

بيستهيألى بدل (بيتهيألى) دولى (دول) الجامهور (الجمهور) لاعابنا ( لعبنا) ده غير التاء المعطشه تشول الوقت قصدى طول الوقت .

منك لله يابكر هى كانت ناقصاك .

[kokowawa1979]

يبدو أن هناك من وسوس لتارديللي والله أعلم بأن جمهور الأسكنرية جمهور أهلاوي ولهذا يجب أن يكون التشكيل معظمه من لاعبي الأهلي حتى لو كانوا كسر أمثال أحمد السيد وعصام الحضري ومحمد شوقي ومحمد عبد الوهاب ومحمد أبو تريكة حسام افندي المكسح الشهير بحسام غالي !!! ويستثنى من هؤلاء الكسر حسن مصطفى الذي بذل مجهودا خرافيا فعلا وكان أحسن لاعبي الفريق . وصدقوني موضوع الوسوسة ده ممكن يكون صحيح 100% لهذا وجدنا أحمد السيد الشهير بتايسون يلعب فى مركز الظهير الأيمن مع إنه كان يمكن ضم سيد عبد الحفيظ لهذا المركز لكن يبدو أن النونو أحمد السيد ظهره تقيل قوي لأننا وجدنا تارديللي أفندي يستعين به في مركز الظهير الأيسر في المباريات الودية بينما عمه طارق السيد أحسن ظهير أيمن في مصر يجلس احتياطي له شوفتم وكسة أكبر من كدة !!!

ومن هو محمد عبد الوهاب هذا ؟؟ هل من أجل تعاقده في الأهلي يحق له أن يلعب أساسيا ويجلس طارق السيد على الدكة مع العلم بأن محمد عبدالوهاب يلعب في أحد أندية الدرجة التانية في الإمارات وليس الأولى وهو نادي بني ياس!!!

أما عصام بطيخة فالأصلح له أن يعمل في شادر بطيخ ( يشقط بطيخ يعني) علشان لما بطيخة تفلت منه وتنكسر المعلم يجيب كرشه ويفكنا منها سيره

صدقوني عدلي القيعي كان سبب نكبة الأهلي السنين الماضية وهو سبب نكبة المنتخب هو وعصام عبدالمنعم لفرضهم أسماء بعينها على المنتخب فهل من المعقول أن يمثل المنتخب لاعبين كسر ليس لديهم طموح حتى لأنديتهم ؟؟؟

[Guest Mohd Gramoun]

التعليقات المخططة و الصفراء اللي هنا فكرتني بمنتخب الزمالك و الإسماعيلي....

bt:) bt:) rs:

[se_ Elsyed]

طب يا جماعة ياللي بتلوموا أحمد السيد وأبو تريكه ... ما ذنب اللاعب إذا وضعه المدير الفني المسئول على التشكيل ومراكز اللاعبيين في غير مركزه ... وهل اللاعب المصري هو ذلك الفذ الجهبز الذي يمكن تطويعه وتشكيلة حسب ما يرى المدرب ؟

وإذا كان عصام الحضري سيء وفيه عبر الدنيا ليه ماخرجوش ونزل بدلاً منه عبد الواحد السيد الزملكاوي إرضاءً لجماهير الزمالك ؟

للأسف لازم نعترف إن إثنان من لاعبي ساحل العاج هما اللي هزموا منتخب مصر كاملاً وهما رأسيي الحربه ديروجبا وهارونا ... اما باقي الفريق فهو عادي جداً وأي فرقه تهزمه وليس بذلك الفريق المرعب الذي خوفونا منه .

أما أراء بعض الاخوة المتحيزة هنا والتي قطعت في فروة لاعبي الأهلي فقط فأسمحولي أقول إن سبب تراجعنا هو إننا مازلنا ننظر إلى لاعبي المنتخب على حسب إنتماءهم ... وإلا لماذا لم يذكروا أي شيء عن رأس الحربة العندليب عبد الحليم اللي مالعبش بتعريفه مع إنهم قطعوا أبو تريكه اللي أحرز هدف حفظ ماء الوجه ... ولماذا لم يذكروا شيء عن لاعبي الإسماعيلي المحليين الذين لم يقدموا شيء للمنتخب ؟

يا اعزائي إن المصيبة تعم الكل والجميع مشارك فيها ولازم نعرف حجمنا ... إحنا كبيرنا زي ما قولت قبل كده إننا نتشطر على بعض .. الأهلي يهزم إنبي .. أسوان يكسب القناة .. الزمالك يتعادل مع حرس الحدود .. الإسماعيلي يكسب البلدية .. لكن لما نييجي نشكل منتخب قوي نريد منه أن يمثلنا في المشاركات الخارجية .. هنا يجب أن تكون لنا وقفه .... تخليوا معايا إننا وصلنا كأس العالم - ماحدش يضرب .. انا بأقول تخيلوا - ووقعنا في مجموعة تضم الأرجنتين وألمانيا وفريق ضعيف تالت إسمه منتخب التشيك اللي خرج هولندا وطايح في كل فرق أوروبا .... انا متخيل منظر الصحف المصرية وهي صادرة وعلى جانبيها شريط إسود وتُعلن مقدماً حالة الحداد على الكره المصرية ... لأن النتائج بتبقى معروفة سلفاً ... وهايبقى حالنا عامل زي " كيس الفينو "

حد هايسألني يعني إيه كيس الفينو .. أقول له ده اللي بيشيل 8 زي منتخب السعودية ما شال من ألمانيا في كأس العالم اللي فات .

إتفرجوا على أي مبارة لأي فريق مصري وسوف تروا مهازل في خط الدفاع .. في جميع الفرق بلا إستثناء ..... أهداف عبيطة ... تمركز أعبط .... لاعيبه بتسرح وبتنسى نفسها ... عدم وجود مهارة حُسن التصرف عند اللاعبين .... بطء لدرجة الشلل .. فاكرين مبارة فرنسا أم خمسة واللي عملوا فينا سيسية وهنري .... نفس اللي حصل فينا إمبارح ... كان مدافعينا هم الذين يركضون ويلهثون وراء المهاجمين المنطلقين بسرعة الإكسبريس أما سلاحف النينجا المصريين المُقعدين فمكانهم اللائق يجب ان يكون في أي دار مسنين أو جمعية النور والأمل .

[زيزو]

إحنا كدة! مفيش موضوعية... العجل وقع، هاتوا السكينة!

المنتخب لعب مباراة جيدة الا بإستثناء بعض الأخطاء الهجومية والدفاعية التي كلفتنا المباراة.

والسيطرة كانت مصرية الا في بعض الأوقات القليلة بعد دخول أهداف ساحل العاج.

بصراحة، انا مبسوط أكتر بكتير وانا بتفرج على هذا المنتخب (لأن فيه منه أمل) عن المنتخبات والتشكيلات إياها.

أحمد السيد وعصام الحضري هم نقاط الضعف الأساسيين، لكن عصام الحضري مستواه لا يمكن التنبؤ به وحداثة عهد تارديللي لم تمكنه من معرفة هذه الحقيقة. وأحمد السيد تم إشراكه بدلا من إسلام الشاطر الذي لم يحضر.

خسرنا مباراة ولم نخسر المعركة. وكفانا إنهزامية عند أول عقبة نعيط! :(

[رحال]

سؤال سريع:

اذا كنا نجحنا فى التعادل او اى كوره من الهلفطه بتاعه امبارح دخلت جون وغلبنا هل

هل

هل كنا سنكتب كللللللللللللللللللللل هذا الكلام؟؟

مجرد سؤال.

[se_ Elsyed]

إحنا كدة! مفيش موضوعية... العجل وقع، هاتوا السكينة!

المنتخب لعب مباراة جيدة الا بإستثناء بعض الأخطاء الهجومية والدفاعية التي كلفتنا المباراة.

بالعكس يا زيزو إحنا أرائنا موضوعية وواقعية ... وعلى فكرة مش علشان مسكت كوره في مبارة أمام فريق كبير تبقى أنت كويس ... طب هانروح بعيد ليه .. تعرف السيناريو اللي حصل إمبارح انا متوقع إنه هايتكرر مع الكاميرون بانفس التفاصيل .. تسيبك تمسك كوره وتصول وتجول لكن لما يجيلها هجمتين تلاتة هـوب يخلصوا بهم الماتش ... وتلاقيه يلاعبك بأقل مجهود وعارف إنه هايكسبك .. لأن فرقتنا بتبقة نازله مرعوبة ومنهزمة داخلياً قبل ما تلاعب فرقة كبيرة زي دي .. وده لأننا ماعندناش حاجة إسمها إعداد نفسي .. وكمان عندنا صحافة رياضية بيتكبوا وهما قاعدين على قهوة السواقين .. كلام عبيط وشعارات فارغة .. يا راجل يجيلك في ماتش قدام السودان وتلاقي الصحف فضلت ترص كلام غريب من عينة .. عنق الزجاجة .. المعركة .... مباراة المصير ... ويقولك إيه غداً يلاقي المنتخب المصري الشهير بالفراعنه منتخب " صقور الجديان " - آه والله العظيم قرأت ذلك - مين الجديان دول يا جدعان ؟ .. يقولك ده لقب يُطلق على منتخب السودان لقوته حيث إن الصقور التي تصطاد الجديان في البراري تكون قوية جداً ... طب اومال لما السودان صقور الجديان تبقى نيجيريا والسنغال والكاميرون إيه ؟

[se_ Elsyed]

سؤال سريع:

اذا كنا نجحنا فى التعادل او اى كوره من الهلفطه بتاعه امبارح دخلت جون وغلبنا هل     

هل

هل كنا سنكتب كللللللللللللللللللللل هذا الكلام؟؟

مجرد سؤال.

أيوه يا رحال كنا هانكتب كده برضوا لأن لو إنت أديت مبارة جيدة وفريقك كان متماسك دفاعاً وهجوماً ولكن لم يحالفك التوفيق وخسرت فده وارد في كرة القدم ...

اما أن نكون بهذه الدرجة من التفكك والسذاجة ونفرح إننا فزنا بهدف طايش كده ولا كده وفين على أرضك ووسط جمهورك .. فماذا إذاً سنفعل إذا خرجنا لتلك المنتخبات ولاقيناها على أرضها ؟

يا راجل ده حتى هف أبو تريكه كانت رمية بغير رامٍ !!!!!!

[ragab2]

يعنى

صفر المونديال بقى بالثلث

ياريت نلحق نفسنا بالاصلاح حالا

[زيزو]

لا حول ولا قوة الا بالله!

الإصلاح ده عملية بتاخذ وقت أم عملية فورية تتم في يوم وليلة؟

بصراحة هناك بعض الإصلاح، وسيبوا المنتخب في حاله. لو عاوزين إصلاح بجد يبقى لازم يبدأ من تحت خالص ولازم حاجات كتير تتصلح في تنشئة الشباب وتوفير ملاعب وحاجات كتير محتاجة أكتر بكتير من إتحاد كورة!