عبدو مشتاق

[se_ Elsyed]

لا حديث هذه الأيام في الشارع المصري إلا عن التغيير الوزاري المرتقب اللي هايجيب الديب من ديله ويخلي الشعب المصري بين يوم وليلة يفطر مربى ويتغدى قشطه ويتعشى كباب حله .. ولأني مذاكر الدستور المصري وحافظه عن ظهر قلب فأنا أعرف تماماً بإن جميع أبناء الشعب المصري سواسية ومافيش حد إبن تسعه وحد تاني إبن ستة فعشان كده قلت يا واد يا س س جهز نفسك لهذا الحدث الجلل عشان لو الريس إختار رئيس الوزراء والوزرا بطريقة عشوائية زي كل مره وجت الطوبة في المعطوبة وأختاروك تبقى ريدي من مجاميعه لكل حاجة فعشان كده أنا قمت بعمل الآتي :

1- نزلت بدلة الفرح السودا من فوق الدولاب وبعثتها للرفا عشان يصلح ما يمكن إصلاحه فيها ومن ثم سأخذها للغسيل أبو بخار يديها وش ورنيش أخير.. ده في حالة إذا بقيت وزير .. أما بقى لو تبسم لي الزمان وبقيت رئيس وزارار فندراً عليه والندر دين هانزل بدلة الشبكة هي كمان وإن شالله ماحدش حوش .. واهو الواحد يبقى عنده طقمين يبدل فيهم ويتمنظر قدام الريس والمجتمع الحاكم .

2- إشتريت علبة بوهية سودا وهادهن بها العربية المكسوبيشي اللانسم اللي هاشتريها وقطعت حتة من الستارة اللي في أوضة المسافرين وهاركبها جوه العربية عشان لما أبقى قاعد ورا ماحدش من الأعداء يشوفني .

3- إشتريت لوحين كونتر وعملت كوشك خشب قدام البيت لزوم الحراسة .

4- إشتريت شكارتين أسمنت وربع متر زلط على رملة وعملت مطبين صناعي بدرجة ميل 75 واحد على في اول الشارع والتاني في أخره .... وقدام شوية لما اترستق في الوزارة وتبقى رسمي هاسد الشارع ويبقى السكان ينطوا من أسطح المنازل المجاورة لحد ما يوصلوا شققهم ... وأنا هاقطع نفسي .. كل لزوم السيكعوريتي .

5- روحت لعم سعد العجلاتي اللي في الحتة وأجرت من عنده عدد 2 فيزبه لمدة شهر وإتفقت مع عيلين مقاطيع دايماً بالأقيهم قاعدين على القهوة اللي في الشارع اللي ورانا وإتفقت معاهم إني كل ماجي خارج واحد يمشي ورا العربية والتاني قدامها يوسعولي السكة ويضربوا أي حد في طريقهم .. ولهذا الغرض إشتريت عدد 2 بندقية رش وسلمت كل واحد بندقية عهدة .

6- جيت على نفسي وقطعت من قوتي وقوت عيالي وحولت كارت المحمول لخط بيزنيس وقولت مش معقول الريس يكلف نفسه وييجي يتصل ترد عليه رسالة من عندي بتقولوا إني رصيدك إنتهى ولازم تشحن يا جلده .

7- عملت توصيلات لتليفون البيت في كل مكان حتى إسم الله على مقامكم في بيت الراحة وحرجت على المدام والعيال إنهم يلمسوا التليفون .. وإذا كانت المدام عايزة تكلم امها بيقى تروح عند ام إبراهيم اللي جنبنا تتكلم براحتها على الأقل ترحمني من الفاتورة المولعة بتاعت التليفون ... وزيادة في الإحتياط عملت التليفون إستقبال بس مافيش إرسال .

8- نزلت إشتريت شريط الست بتاع أُغنية " انا في إنتظارك ملـــــــــــــيت "

9- أخدت اجازة بدون مرتب لمدة شهر بحجة إني طالع أصيف في رأس البر .

10 - طبعت كروت عليها النسر الطيار شعار الجمهورية وكتبت عليها .... سعادة المحافظ الوزير الدكتور / س س وسيبت إسم الوزارة تحت فاضي أبقى إكتبوا بعدين .

أظن كده بقى عداني العيب وبقيت على اتم إستعداد وفي إنتظار لحظة حلف اليمين امام السيد الرئيس والسيد زكريا عزمي رئيس ديوان رئيس الجمهورية وجبت منديل محلاوي عشان لما الدمعه تفر من عيني قدام الكاميرا ....

س س ماجستير من جامعة بركنساس تخصص إقتصاد ... ودكتوراة من جامعة الطشت قالي تخصص سياسة ... وزميل جمعية الاطباء بالمعهد الملكي البريطاني والكومنولث .