مستفيد شهاب : إنجازات الرئيس فاقت التوقعات

[se_ Elsyed]

كفايه بقى ..

كفايه بجد أنا زهقت من كُتر الرفاهية ....

هاعوز إيه أكتر من كده ؟ ..

عندي شالية في ماربيلا ...

شقة عالبحر تاني صف في موناكو ...

3 أوض وعفشة مية في مساكن صقر قريش ..

عربيات أشكال والوان وبالبس البدلة مع لون العربية ...

شوارع نضيفة ومستحمية بالمية والصابون .. لدرجة إني اتزحلقت امبارح واونكل رجلي بقى فيه واوا

الرغيف كبييييييييير وباكل فيه بالتلات ايام مش بيخلصش ..

الكهربا موجودة 24 ساعة لدرجة إن السلوك العريانة مالية الشقة وباخاف أدوس على سلك فيهم عشان عيب .. السلوك لها عوره برضوا

كل دي إنجازات للسيد الرئيس فاقت التوقعات والرجل وعد وأوفى .. وتحدث فأنجز .. وإدي الواد لأبوه الواد عطشان إسقوه

شهاب : إنجازات برنامج الرئيس.. فاقت التعهدات

أكد الدكتور مفيد شهاب وزير الدولة للشئون القانونية والمجالس النيابية أن الحكومة استطاعت خلال الخمس سنوات الماضية تحقيق الكثير من التعهدات الواردة بالبرنامج الانتخابي للرئيس مبارك.. موضحاً أن مصر بدأت مرحلة التعافي والانتعاش الاقتصادي. حيث ركزت الحكومة عل فتح آفاق جديدة للاستثمار وبناء مصانع جديدة ومشروعات بنية تحتية من أجل توفير موارد وفرص عمل. ومشيراً إلي أنه سيتم إنجاز ما تبقي من البرنامج الانتخابي خلال العام المتبقي للفترة الرئاسية وفقاً للجدول الزمني المعد مسبقاً.

اللي بيصعب عليه في الموضوع ده .. رجل مُسن تخطى السبعون عاماً وبالتأكيد له أبناء وأحفاد زي رجل القانون العظيم مفيد شهاب .. يا ترى لما بيقعد معاهم في البيت وهو لابس البيجاما المخططة والطرطور وشايل طقم الأسنان وبياكل الزبادي اللي ضاربينه له في الخلاط عشان يبقى سهل الهضم .. يا ترى بيقول لهم : سامحوني يا ولادي أنا بأنافق وباحجز تذكرة للدرك الأسفل من النار عشان أكل العيش قصدي اكل الزبادي .. يا ترى لما بيسألوة عن احوال ابلد السوده اللي بقينا فيها من كهربا بتقطع يوماتي وأنابيب بوتاجاز ببطاقة التموين وعيش ما يتاكلش وزبالة قربت تدخل بيوتنا من كتر ما الشوارع إكتظت بها .... يا ترى بيقول لهم إن الإنجازات اللي فاقت التوقعات بيجهزوها تحت الأرض الأول وبعدين هاينزلوا بيها عالعيد الكبير مع اللحمة ؟

[أبو حميد المسافر]

يا راجل هي الناس دي بتشوف الزبالة أصلا

ولا الكهربا عندهم بتقطع أساسا

ولا يسمعوا اصلا عن انابيب البوتجاز !!!

عايزينهم يحكموا الاشكال اللى زينا و يلبسوا احسن لبس فى الكوكب ويسافروا فى افخم سفريات

وبعد كدة يهتموا بمشاكلكم التافهة دي

ايه الحقد والسواد اللى فى قلوبكم دة ... هو حد جايبهم ورا غيركو

بدل ما يبقي المورننج بتاع معاليه باتون ساليه

تعكننوا مزاج حضرتوا بزبالة وقرف ع الصبح

صبح صبح يا سي السيد ... وخليكوا فى النت اللى تمصوا صوابع رجليهم شكرا لأنكم شفتوه قبل سنة 2050 :lol:

رحمك الله يا عمر ... لقد أهلكت من جاء بعد

تم تعديل 18 سبتمبر 2010 بواسطة أبو حميد المسافر

[mfarag]

من جهة فاقت التوقعات فهى فاقت التوقعات بكتير

و عشان كدة ياريت ينجز و يرحمنا باة

و يريت يطلع البلد من تحت ايدةة - دا حتى المحكوم عليةبالموبد ممكن يطلع حسن سير و سلوك

[se_ Elsyed]

- دا حتى المحكوم عليةبالموبد ممكن يطلع حسن سير و سلوك

قانوناً ده مش صحيح

لإنه لو سجين مشاغب وبيقول جاااااااااي أرحموا أهلي من النفخ .. وبيعمل وقفات إحتجاجية وإعتصامات .. فممكن تتضاعف عليه المدة وتعدي التلاتين سنة ... وإذا مات .. نجيب عيل من عياله نسجنه بداله :lol:

ايه الحقد والسواد اللى فى قلوبكم دة ... هو حد جايبهم ورا غيركو

آه صح ...ده سواد عايم بعيد عنك ... وإحنا فعلاً شعوب لا تستحق حكامها .. ربنا يكافيء الحكام بتوعنا ويكرمهم بعقود عمل في السعودية أو ليبيا ويسيبوا لنا البلد خربانة وكل حاكم يشوف نفسه بقى بعيد عن وشنا..

على فكره .. مستفيد شهاب لسه عامل تصريحين قريب انقح من بعض .. الراجل كبر وخرف ومعذور .. أول تصريح بيقول فيه إن إحنا البلد الوحيدة في العالم اللي فيها إشراف قضائي كامل على الإنتخابات ... واحنا اللي فيهم والباقي سلطة ..

التصريح التاني بيقول إن الحديث عن مرشح رئاسة متوقع والرئيس لسه بيحكم يبقى " قلة أدب "

مش عارف هو جمال مبارك يعتبر قليل الأدب برضوا وما ترباش ولا يقصدوا حد تاني ؟

[nightmare]

فعلا يا سي السيد انجازاته فاقت كل التوقعات

فلم يتوقع أحد أن تباع كل شركات القطاع العام بأبخس الأثمان وأن ينضم عمالها إلى طابور العاطلين.

لم يتوقع أحد أن تباع كافة أراضي الدولة بثمن بخس جعلت الغني يزداد غني والفقير يزداد فقر.

لم يتوقع أحد أن يقف آلاف المصريين في طابور طويل من أجل رغيف خبز ويسقط منهم القتيل والجريح من اجل الصراع على لقمة العيش.

لم يتوقع أحد أن يرمى آلاف الشباب من أبناء مصر بأنفسهم في البحار والمحيطات من أجل الهروب منها ومن جحيمها ومن أجل الحصول على فرصة حياة كريمة.

لم يتوقع أحد أن يعيش المصريون وهم عندهم السد العالى في الظلام الدامس ويفطرون على أضواء الشموع.

لم يتوقع أحد أن يتقاتل المصريون على أنبوبة بوتاجاز في الوقت الذى يصدر فيه الغاز إلي إسرائيل وبثمن باهت.

لم يتوقع أحد أن يكون أعضاء مجلس الشعب الذي يمثلهم هم مجموعة من تجار المخدرات والحرامية والمرتشين والمهربين والمطالبين بضربهم بالنار أيضاً.

لم يتوقع أحد أن يستقبل مطار القاهرة كل يوم جثة مصري قتل في دولة من أجل أنه مصري.

لم يتوقع أحد أن تمتلئ المعتقلات من الشباب المصري الطموح الذي يريد حياة أفضل وأن يري بلده أفضل بلاد الدنيا.

لم يتوقع أحد أن تتحول شوارع القاهرة إلي تلال من القمامة والزبالة ويصرح المسئولون أنها دليل الرفاهية .

لم يتوقع أحد أن يأتى اليوم الذي يشرب فيه المصريون مياه المجاري والصرف الصحي ويصابوا بالتيفود.

لم يتوقع أحد أن يأتى يوم تصبح فيه نسبة المصابين في مصر بالفيروس الكبدي والفشل الكلوي تتعدي 25% , أى أكثر من 20 مليون مواطن.

لم يتوقع أحد أن يأتى اليوم الذي يدفع فيه المصريون ضرائب على مساكنهم التى إشتروها بعد معاناة سنين .

لم يتوقع أحد أن يتقاضي لاعب الكرة والفنان ملايين الجنيهات سنوياً بينما الباحث والعالم في مركز البحوث لا يتعدي راتبه 500 جنيه شهرياً.

لم يتوقع أحد أن تصبح مصر أكبر مستوردة للقمح والقطن وهي التى تمتلك صحراء شرقية وغربية لا تجد من يمد يده اليها بالحياة.

وأخيرا علشان تعبت

لم يتوقع أحد أن يعيش هذا الرجل إلى الآن وقد بلغ الثالثة والثمانيين من عمره.

تم تعديل 18 سبتمبر 2010 بواسطة nightmare

[اغابي]

فعلا يا استاذ س س

من كثرة الانجازات - مش عارفة اقول ايه ولا ايه

لكنة ممكن نختصرها بكلمات موجزة - زى مثلا

- المخالفات القانونية الجسيمة ودور الرشوة فى تسهيل هذه المخالفات

انشقاق الفكر وتعدد الثقافات -

- وانقسام الوطن الى جزيئات - وطبقات

ازدياد العشوائيات

وقصص المدن الجديدة وقوانينها المتغيرة

عدم الاحساس بالامان

اصبح الشعب المصري يبدل قاموسه اللغوى

وحذف مرادفاته الوطنية بمرادفات انانية

صور جمال مبارك واخباره تعتبر من ضمن الانجازات ايضا

وضع اقتصاد الوطن فى ايدي فئتين فقط هم

رجال الاعمال ورجال مجلس الشعب وكلاهما وجهين لعملة واحدة

الى ان تم الاندماج بينهما بخطة جهنمية حكومية

واصبح كل رجل اعمال عضو بمجلس الشعب - يعنى زيتنا فى دقيقنا

- اى انه قانون حصانة جديد

قتل روح المحبة والانتماء والتعاون بين افراد الشعب وعلى مبدا - فرق تسود

ومن كثرة الانجازات اصبحت مصر - كنتيجة نهائية

اقل حضارة ورقى من الهند

تحياتى للانجازاتك يا ريس

مع تحيات

اغابي

المقهورة

[شريف مان]

ياللى جاى تدينا صوتك

اطمن اكيد

بكرة هتعرف قيمة صوتك

لما الخير هيزيد

الحزب الوطنى فى مصلحتك

والمستقبل ليك

كل شباب مصر هيشتغلوا

وبكرة تشوف بعنيك

انتج صدر ابني و كبر

خضر أراضيك

مليون فدان ألف مصنع

عايزين بس ايديك

الحزب الوطنى مسهلك

فرصك فى الاسكان

نص مليون مسكن

ملكك و انت

بقيت في أمان

الحزب الوطنى حرية

قول رايك بأمان

و أنت مواطن حر ف بلدك

و لصوتك مكان

دى اغنية الحزب ايام الانتخابات ( المهزلة ) الرئاسية الماضية

وكل اللى فيها اتحقق بس بالعكس

فعلا نتائج فاقت كل التوقعات

:blink:

[أبو حميد المسافر]

نظيف : ما حدث فى مشروع مدينتي هو خطأ إداري وليس فسادا

أ / سين سين

شكل حضرتك امبارح كنت فى موناكو

أو بتعلب اسكواش فى ماليزيا

او بتغير القعدة البلدي اللى في شقة صقر قريش

ما انت مرفه بقي

ولم يسعدك حظك التعس الأسود بقراءة تصريخ فخامة رئيس مجلس الوزراء السيد : أحمد نظيف فى أمس

الجمعة جريدة الأهرام الغراء - قديما - الغبراء حديثا بالبنط الأحمر العريض المطيول

نظيف : ما حدث فى مشروع مدينتي هو خطأ إداري وليس فسادا :ninja:

كان بودي اجيبلك اقتباس من موقع الاهرام بس مش عارف شكله اتحرق باين :lol:

تم تعديل 18 سبتمبر 2010 بواسطة أبو حميد المسافر

[Howayda Ismail]

هو فعلا الانجازات فاقت كل التوقعات (الحكومة لاتكذب ولكنها تتجمل)

زادت الاستثمارات وتم انشاء الاف المصانع وعملت لها البنية التحتية لكن كل ده عشان خاطر

السلالة الجديدة وهو الاستعمار الاجنبى الجديد اللى بلع القطاع العام واتملك الاراضى بابخس الاثمان

وسيطر على معظم ثروات البلد بمباركة الحكومة والدليل:

اصبح الشعب اكثر فقرا

واكثر مرضا

واكثر جوعا

واكثر انتحارا

زى مايكون معمول خطط لابادة السلالة المصرية

من الاخر العزبة ضاقت عليهم والمركب قربت تغرق بيخففوا حمولتها بالتخلص من الحاجات اللى ملهاش لازمة

والشعب بقى اكبر حاجة ملهاش لازمة عند الناس دى

[shawshank]

على فكره .. مستفيد شهاب لسه عامل تصريحين قريب انقح من بعض ..

التصريح التاني بيقول إن الحديث عن مرشح رئاسة متوقع والرئيس لسه بيحكم يبقى " قلة أدب "

مش ده كان تصريح علي الدين هلال؟

[se_ Elsyed]

على فكره .. مستفيد شهاب لسه عامل تصريحين قريب انقح من بعض ..

التصريح التاني بيقول إن الحديث عن مرشح رئاسة متوقع والرئيس لسه بيحكم يبقى " قلة أدب "

مش ده كان تصريح علي الدين هلال؟

بالظبط يا دكتور ... علي الدين هلال الشهير بصاحب صفر كأس العالم هو من قال لك نصاً ..

لكن إتسعجبت إن في نفس التوقيت كانوا طالقين مفيد شهاب في مؤتمرات ولقاءات بيكرر نفس الكلام عن ترشيح جمال في حياة أبوه وكأنهم بيتسهبلوا هما الأتنين ومش شايفين الدعاية الممنهجة للننوس او حملة التوقيعات اللي شغالة ولا حملات التطعيم