حقيقه افزعتنى ......... التحرش الجنسي للاطفال

[pocy]

ترددت كثيرا فى كتابه هذا الموضوع لما عليه من وقع سئ على النفس ولكن ما دفعنى لكتابه هذا الموضوع هو انى بالامس استيقظت على حقيقه مفجعه ترويها احدى الامهات فى موقع نسائي عن اطفالها وهم بنت عندها خمس سنين وولد سنتين يتعرضوا للتحرش الجنسي من طفله الجيران عندها سبع سنوات وعندما حاورت الام ابنتها بكل حب وتعزيز الثقه بين الام و ابنتها اكتشفت ما هو افظع وهو تعرض ابنتها للتحرش الجنسي من قبل ابن الجيران عنده 15 سنه وقالت انه فعل هذا مره واحده وطبعا كشفت على البنت وده اول اجراء ستفعله اى ام للاطمئنان على ابنتها وعلى مستقبلها والحمد لله جت سليمه ولكن ماذا ستفعل الام هذه للتجنب اطفالها التحرش الجنسي ومن اقرب الناس لها وهم جيرانها من 10 سنوات ويمكن اكتر وداخلين خارجين مع بعض وكيف لطفل عندها 7 سنوات تتحرش جنسيا بطفل عنده سنتين ولولا ان الطفل بيعرف يلاغي وقال لمامته ان توته بتعمله كده لم تكن ستعرف ابدا ما حدث ولولا انها استدرجت ابنتها بطريقه جيده لما عرفت ما حدث لابنتها وكان من الممكن ان يتكرر مره اخرى وكيف انها البنت اللى عندها 7 سنين وهى طفله مؤدبه وذكيه على حد قولها تعلم هذا الامر وتريد استكشافه

وخلال بحثي لحل مشكله مثل هذه وجدت فيلم للمركز المصري لحقوق المرأة وفعلا هو ممتاز بس للي يفهمه ووجدت ايضا بعض النصايح وارجو كل الرجاء ممن يعلم اى نصيحه او خبره يخبرنا بها لانى قلقانه على اطفالى كيف ساحميهم من هذا الامر وربنا يجعله فى ميزان حسناتكم

اولا هذا مقطع الفيديو

كيفيه حمايه ابنائنا من التحرش الجنسي

http://www.youtube.com/watch?v=Z6vrxg8T2Kw&feature=player_embedded#!

تم تعديل 20 سبتمبر 2010 بواسطة pocy

[pocy]

اقدم هذه النصيحه لكل ام مهم جدا

سنوياً، يتعرض مئات الآلاف من الأطفال للتحرش الجنسي، و بينما لا يستوعب العديد من الناس هذه الحقيقة، فغالباً ما يكون ذلك على يد أقرب الناس، كأحد أفراد العائلة، أو الأصدقاء، أو المربيات، أو الخادمات، أو السائقين، أو الجيران و في بعض الأحيان المعلمين و المدربين.

إذا كنت والداً، جداً أو حارساً لطفل، فالإشارات التالية قد تدل على تعرض طفلك للتحرش جنسي، حسب المركز القومي الأمريكي للأطفال المفقودين و المغتصبين.

بعض هذه التصرفات قد يكون لها تفسيرات أخرى عدا عن التحرش الجنسي، و لكن يبقى من الضروري الاهتمام بعلاجها لمساعدة طفلك، مهما يكن سببها.

أيضاً، ضع في الحسبان أن الأطفال لا يظهرون دوماً دلالات واضحة على تعرضهم للتحرش الجنسي، و لكن قد يقولون أو يفعلون شيئاً قد يدل على ذلك.

1) تغير في السلوك، تأرجحات عنيفة في مزاجه، انطواء، نوبات رعب و بكاء عنيف.

2) التبول أثناء النوم، الكوابيس،الخوف من النوم في السرير، أو اضطرابات أخرى في النوم.

3) القيام بسلوكيات جنسية غير لائقة، أو الاهتمام الغير اعتيادي بالمسائل الجنسية.

4) إظهار حركات عاطفية مفاجئة أو عنيفة أو ثورية.

5) الانتكاس إلى تصرف طفولي معين ( التشبث)

(( يعني يرجع يتصرف كأنه طفل أصغر من سنه))

6) مشاكل سلوكية أو مدرسية.

7)تغيرات في عاداته في استعمال المرحاض.

8)الخوف من أنشطة معينة، أماكن معينة أو أناس معينين.

9) ظهور جروح، كدمات، رضات،

طفح جلدي، خزعات (لا أعرف معناها)

أو إصابات متعددة غير مفسرة في جسده.

10) آلام، حكة، نزيف، سوائل في المنطقة التناسلية.

منقووووووووووووووووول للفائدة

[pocy]

وايضا هناك هذا المقال اعتقد انه مفيد ايضا

التحرش الجنسي بالأطفال : التعريف .. الأسباب ... الوقاية والعلاج

[masraweya]

ربنا يستر

جزاكم الله خيرا

[doha]

جيتي على الجرح يابوسي ..

امبارح بدأت الدراسة .. وامبارح اتفقت مع شخص ـ معرفوش ـ هيوصل بنتي ويجيبها من المدرسة كل يوم زي مابيعمل مع بقية التلاميذ ..

من ساعتها وانا قلقانة .. مش من الشخص ده بالعكس وانما من الفكرة نفسها .. بنتي بتروح وتيجي لوحدها وربنا يسترها معاها يارب ومع كل الاطفال الي في مثل ظروفها .. انها متبقاش تحت عيني ومع ناس غرب ووسط اطفال تانيين ياعالم متربيين على ايه .. هو ده بالظبط مصدر القلق ..

الموضوع ده دار في خلدي امبارح بالذات لهذا السبب وسبحان الله لقيتك فتحتي توبيك مخصوص بشأنه ..

المشكلة الوحيده الي واجهتني في محاولاتي ( لتوعية ) البنت اني مش عاوزه اكبر لها الحكاية عشان معقدهاش من امور او ( افتح عينيها) على امور تانية .. وفي نفس الوقت مينفعش اسكت واهون لان الموضوع فعلا مهم .. خاصة و ( طوب الارض ) من الامهات السابقين حذروني من اني لازم انبها من دلوقت خاصة وانا كنت مش مهتمه بالحكايه دي حتى عهد قريب ..

على العموم من قراءتي في هذا الموضوع في خطوات اساسية لازم الواحد يعملها قبل مايسيب الحكاية برمتها ( على ربنا ) ..

اولا ابدئي في توعية الطفل من سن ثلاث سنوات مش بعد كده .. من السن ده لازم يعرف ان في اماكن في جسمه ممنوع نهائيا تظهر امام اي شخص ايا كان ماعدا ( ماما طبعا ) .. لما كانت بنتي بتروح الكيجي قبل كده فهمتها بهدوء وبسرعه وبدون دخول في تفاصيل ان لو حبت تدخل الحمام تقول ( للدادة ) وتدخل معاها مفيهاش حاجه لكن طبعا مبنخليش حد تاني يدخل معانا وهي امنت على كلامي ..

امبارح ذكرت لها برضه في سياق التوصيات وانا بلبسها ملابسها ووشي بيضحك وكأنه حوار لقطع الوقت ان مهما حصل محدش يخلع لها ملابسها ابدا .. وهي برضه قالت لي طبعا .. ربنا يستر ..

طبعا لما بتكلم معاها في اي موضوع من دول لازم بعد ماقلت لها التنبيه وبطريقة لا توحي باهميته او انه امر وبعد ماتأكدت انها استوعبت ماقلت بنتقل بسرعه لموضوع تاني خالص ملوش علاقه اذكره لها بطريقة مرحة عشان يبقى استفدت من ايصال المعلومه وفي نفس الوقت مخليش عقلها يتطلع لما وراءها ..

عامة مبخليش بنتي تتفرج على افلام عربي ولا اجنبي .. مفيش غير الكرتون وافلام الاطفال ... لو شافت حاجه بالصدفة بدئا من القبلة وماشابه بقولها بهدوء نغير القناة ياماما عشان كده غلط .. وارجع اقلب تاني بعد انتهاء المشهد ..في محاولة وبقدر الامكان تأخير لفت نظرها لما يمكن ان يدعوها لسؤال الاكبر سنا عنه ..

دائما بكرر لها اني بصدقها في اي حاجه بتقولها واني ( بثق فيها ) .. من الحاجات الي بيعتمد عليها المتحرش ان الطفل مش هيشتكي سواء لانه خايف من النتيجه الي هيعملوها فيه اهله لو عرفوا ( انه غلط ) او لانه عارف ان محدش هيصدقه .. مهم جدا ان الواحد يعرف ابنه او بنته انه واثق فيه والاهم انه يهتم بجد لاي شكوى يقولها الطفل ويلاحظ العلامات الي دائما بيتكلموا عنها في المواضيع المماثلة من انطواء مفاجيء او خوف او خدوش وماشابه في جسم الطفل .. الخ .. يسال الطفل بهدوء عن ايه ده ويهتم جدا لما سيقول .. عن نفسي دائما اقول لبنتي لو حد ( ضايقك ) قولي لي وانا ( هتصرف ) ..

من الامور الهامه برضه عدم ارهاب الطفل من المدرسين او الاكبر سنا لمجرد انهم اكبر .. برضه منأمرش الطفل بالطاعة العمياء عمال على بطال .. لان المتحرش غالبا بيعتمد على ( ارهاب ) الطفل فيأمره بما يريد وبطبيعه الحال فلو الطفل معتاد على الانصياع هيستجيب بدون مقاومة .. من الحاجات الي بزرعها في بنتي بمناسبة وبغير مناسبة انها بتسمع كلامي ( لاني ماما ) وماما دائما استثناء .. وفي نفس الوقت بحاول قدر امكاني اني انمي فيها الشخصية وهي تختار مش انا او غيري الي يفرض عليها ..

سمعت مرة في احد البرامج الحوارية ان اكثر الشكاوى الي بيتلقوها من اهالي تعرض ابنائهم للتحرش في ( تجمعات عائلية ) بمعنى في الاعياد مثلا لما بيلتقي الاخوة والاخوات وابنائهم .. غالبا الكبار بيكونوا مع بعض والصغار بيلعبوا في مكان تاني قريب والكل مطمئن .. في البرنامج ده حذروا من الحكاية دي وقالوا لازم كل شويه نروح نبص على اطفالنا ونتاكد انهم بيلعبوا في امان .. عن نفسي بنصح دائما انك ( تنتقي ) مين هيلعب مع اطفالك وانك تتاكدي من المراقبة ( من بعيد لبعيد ) ان الاطفال التانية لسه ( قطط مغمضه ) زي ابنائك بالظبط وان مفيش خطر لغاية دلوقت من اختلاطهم مع بعض ..

من الحاجات الهامة جدا ان الواحد يتحكم في رد فعله اثناء استماعه لابناءه عادة .. الاهم كمان ان الابن لايعاقب العقاب المعتاد اذا هو بنفسه جاء وذكر الحقيقة .. اذكر مرة بنتي دلقت مية على اللابتوب ـ وكان لسه جديد ـ طبعا انحرق اللابتوب بس انا سكت وانا اكاد ارميها من الشباك وقلت لها وانا بكتم غيظي بصعوبه اني كنت هقتلها لكن هسامحها المرة دي بس عشان قالت الحقيقة .. فعلا الي دار في ذهني وقتها اني لو عاقبتها بما يفترض لعمله سوده زي دي فدي هتكون آول وآخر مرة تقولي فيها حاجه خاصة وهي الي جائت بنفسها وقالت لي الحقي ياماما انا عملت كذا بدون مااقصد ..

من المهم برضه لو ابننا او بنتنا حكى لنا حاجه غلط عن صديق له او ماشابه اننا منتسرعش في ارتداء ثوب الواعظ ونبدأ نصحح ونقيم خطأ الصديق ده وانما اننا نسمع من الطفل الاول رايه هو ايه ونوجهه من بعيد لبعيد برأينا الي مش ( ملزم ) في الحالة دي .. ساعات كتير بيكون لابنائنا اصدقاء ( سوء ) وهم بيكونوا عاوزين ياخذوا راينا او يحكوا لنا عن الي بيحصل لكن لانهم عارفين مسبقا رد فعلنا هيكون ايه فبيفضلوا الصمت .. طبعا لو في شخص ( ناوي على التحرش ) وباديء يمهد لده فاحنا كأهل ممكن جدا ناخذ بالنا من المقدمات ونمنع حدوث ماهو اسوأ لو ان الطفل حكى لنا في الوقت المناسب عن امور قد تبدوا له طبيعية الى حد ما لكنها في الواقع ليست كذلك ..

برضه بلاحظ في اهالي كتير بتعلم ابنائها اسماء اجزاء حساسة من اجسامهم وبيعتبروها ماده للضحك والتندر ان الطفل يكرر الاسماء دي امامهم .. بالنسبة لي الامر ده مرفوض تماما وارى ان الحل المناسب هو تجاهل الطفل لما يكرر الكلام ده سواء كان مجرد الفاظ او امتد لحركات خارجه ممكن يقوم بيها الطفل كان يتعرى من ملابسه او ماشابه بغرض اضحاك الكبار .. هيضحك النهرده وهتتفتح عينه بكرا .. مااراه صواب في المسألة دي اننا نختار الفاظ ( محترمه ) نعلمها لاطفالنا وفي نفس الوقت لانبدي اي اهتمام او تغير اذا تطرق الحديث اليها او ذكرها الطفل ونعاملها في سياق حديثنا كما يعامل اي اسم تاني لاي حاجه محيطه بالطفل اذا ماتحدث عنها هو .. فيما نتجاهلها نحن قدر الامكان اذا كنا من سيتحدث ..

كمان لو انتي مع اطفالك عند ناس متتركيش طفلك ابدا في رعاية حد بيرعى اطفال الناس دول عاده .. يعني لو عندهم شغاله او سائق او حتى اخ اكبر متبقيش مطمئنة اوي ان طفلك معاهم وان الناس دي ضامنة الي شغالين عندهم او ماشابه .. لان ممكن جدا ووارد انه لا يؤذي اطفال البيت لان اهلهم ( صاحيين له ) لكن مش بالضرورة هيعمل نفس الشيء مع اطفال الآخرين .. لما تكوني مع ابنك او بنتك برا البيت فهم مسؤوليتك انتي لوحدك متسيبيهاش ابدا لحد تاني الى على مسؤوليتك الخاصة برضه ..

واخيرا مهم اوي في تربية ابنائنا اننا نفرق لهم مابين ( العيب ) و ( الحرام ) .. لان الحاجه الي عيب النهرده او متنفعش مش بالضرورة تكون كده بكره على العكس من الحرام الي هنعيش ونموت وهيفضل حرام .. مهم اوي اننا منضخمش الامور بالنسبة للطفل ومنعملش له سلك شائك حوالين مناطق كتير وارد جدا انها هتكون مناطق طبيعية له في يوم من الايام ومصيره هيطلع عليها..الحكمه مطلوبه في الامور الي زي دي .. منبالغش بس في نفس الوقت منهونش وبالتاكيد .. منهملش .. هي التربية متعبه .. بس النتيجه تستحق التعب ..

طبعا كل ماسبق هي نصائح لاطفال صغيرين زي بنتي او ابنك.. بكل اسف مش متاكده من الي المفروض الواحد يعمله لمراحل سنية اكبر ـ فترة المراهقة تحديدا ـ وايه هي انسب طريقة لحمايتهم في السن دي .. بس اعتقد والله اعلم اننا لو تعبنا شويه في السنين الاولى وربينا صح واعتمدنا منهج المصارحه والاحتواء فاحتمال كبير ان ربنا هيوفقنا في الي جاي .. يارب ..

[engmido]

موضوع ممتاز وغاية فى الاهمية يا اخت بوسى

ومداخلة ممتازة و متميزة يا اخت ضحى...اى خدمة

ومنتظر المزيد وتوضيح اكتر لو سمحتو

[pocy]

احب ان احيكى وبشده على كلامك لانه كلام يساعد اى ام فى الحفاظ على ابنتها

واتمنى باقي خبرات الامهات ماذا تفعل لتحمى ابنك او بنتك من اى موقف من المواقف دى ؟؟؟؟؟؟؟؟؟؟؟؟؟؟؟

[أبو حميد المسافر]

موضوع رائع ومهم جدا

شكرا للأختين بوسي وضحي

[شريف مان]

شكرا جزيلا يابوسى على الموضوع الهام جدا دا

فعلا دى كارثة

لو لا قدر الله حصل اى علاقة جنسية بطفل

بدمر حياته كلها سواء طفولته او حتى شبابه

ربنا يستر على الجميع

[engmido]

ربنا يسترها على اطفال المسلمين