لبيبة الهبلة و الثانوية العامة

[محمد سنجر]

( الازدحام الشديد جعلني أفضل النزول من الميكروباس ،

بادرني السائق )

ـ على فين يا أستاذ ؟

ـ إيه ؟ نازل أمشي أحسن ، مش شايف الزحمة ؟

ـ الثانوية العامة يا بيه كل سنة و أنت طيب ....

ـ ثانوية إيه بس ؟ مش ها يشوفوا لها حل بقى ؟

ـ إيدي على كتفك ، ده اللي عندهم واد في الثانوية بيبقوا زي اللي عندهم ميتم ، تصدق بإيه يا أستاذ ؟

ـ لا إله إلا الله .

ـ مراتي أعلنت حالة الطوارئ في البيت عشان البت ، أنت فاكر إني نازل عشان أدور على رزقي ؟ لا و اللي جمعنا من غير ميعاد ، ده أنا اتخنقت م البيت ، الكلام ممنوع ، البت بتذاكر ، التلفزيون ممنوع البت بتذاكر ، حتى الأكل بميعاد عشان البت لسه بتذاكر ، الله يقطع الثانوية العامة و اللي اخترعوها ، عشان كده قلت أنزل أفك عن نفسي شوية ...

ـ لا حول و لا قوة إلا بالله ، طيب ممكن ثواني عشان أنزل ؟

ـ ما هي واقفة أهي ، بس معلش ، هات الأجرة يا مواطن .

ـ آسف ... نسيت و الله ...

( مددت يدي في جيبي ، أخرجت صرة الدنانير ،

فضضتها و أخرجت منها إحدى العملات المعدنية ،

ناولته إحداها و نزلت وسط الزحام الشديد ،

هرج و مرج هنا و هناك ، اختلط الحابل بالنابل ،

حاولت التسلل من بين الأجساد المتلاصقة ،

فجأة سمعت صرخة مدوية )

ـ مش تفتح يا أعمى ؟

( نظرت لصاحب الصرخة ،

و إذا بها لبيبة الهبلة تجلس على الأرض ،

تغير تعبير وجهها عندما رأتني )

ـ كده برضة تدوس عليا ؟ يعني ما تجيش غير منك يا أستاذ ؟

ـ معلش آسف يا خالة لبيبة ، ما شفتكيش و الله ، إنتي إيه اللي مقعدك كده؟

ـ مش الواد (حمو) عقبال أمالتك في الثانوية السنة دي ؟

ـ معقولة ؟ اللهم صل ع النبي ، حمو بقى في الثانوية العامة ؟ بسم الله ما شاء الله ، و الله أنت ست بميت راجل ، طيب تعالي نقعد بعيد بدل ما أنتي قاعدة كده في الأرض و حد يدوس عليكي .

( مددت لها يدي فأمسكت بها و وقفت )

ـ آخ ياني ، الله يقطع الثانوية و اللي عملوها ، مش تقول لهم يا أستاذ يلغوها أحسن ؟

ـ يلغوها إزاي بس يا خالة لبيبة ؟ أمال نعرف إزاي مستوى كل طالب عشان يروح الكلية اللي يستحقها ؟

ـ طب بذمتك يرضي مين إن الواد أو البت من دول يتحدد مستقبله على سنة واحدة ؟

ـ ما احنا عملناها سنتين قولتوا جــــــــــــــــــاي ، رجعوها سنة واحدة .

ـ أيوة ما هو الناس بدل ما كانوا بينصبوا الميتم سنة بقوا بينصبوه سنتين .

ـ طيب أهو ، أديك بتقولي ، نعمل إيه إحنا بقى ؟

ـ خلوها من أول العيل ما بيدخل المدرسة من أولى ابتدائي ....

ـ مش فاهم ؟

ـ يعني العيل من أولى ابتدائي لغاية ما يوصل للثانوية العامة كام سنة ؟

ـ اتناشر سنة تقريبا .

ـ الله ينور عليك ، درجاته بقى في الاتناشر سنة دول مع بعض هم اللي يودوه الكلية المناسبة .

ـ قصدك ناخد مجموع درجاته في السنين كلها و نقسمهم على اتناشر ؟

ـ أني عارفه بقى ؟ قسموها زي ما تقسموها ، المهم ما يقفش مستقبل العيل على سنة واحدة ، بذمتك ده عدل ؟

عيل طول عمره بايظ و يجي في الثانوية العامة بالفلوس و إلا بالغش يدخل طب و الا هندسة و الا معهد فني تجاري ؟

و واد تاني زي (حمو) ده طول عمره الأول و جه السنة دي تعب و الا ظروفه كانت وحشة يروح في ستين داهية ؟

بالذمة هو ده العدل بتاع ربنا ؟

ـ مش عارف و الله يا خالة لبيبة ، بس ها أحاول أكلم لك وزير الثانوية العامة حاضر و ندرس كلامك ده ، ليه لأ ؟

ها استأذنك أنا بقى عشان عندي مشوار مهم ....

( أخرجت سرة الدنانير التي أثقلت جيبي ، هممت بفضها لأخرج لها بعض العملات المعدنية ، إلا أنني آثرت الخلاص منها ، فقذفتها إليها ،

طارت لبيبة كما يفعل الحضري لالتقاط شقة البطيخ من زوجته ،

نادتني من بعيد )

ـ إلاهي ربنا يسترك يا بيه ، إوعى تنسى تكلم لنا وزير الثانوية العامة ....

( أشرت بإصبعي من العين دي للعين دي و رحلت أقلب حلها العبقري

)

تم تعديل 20 سبتمبر 2010 بواسطة محمد سنجر