قصيدة " المحل مغلق للصلاة "

[se_ Elsyed]

الله على الشعر لما يلمس الجرح ويرشق في كبد الحقيقة ..

إيه الحلاوة دي يا عم علي سلامه ؟

المحل مغلق للصلاة

كتب على سلامة ٢٦/ ٩/ ٢٠١٠

قالوا الكهربا ضعيفة عندنا

والحكومة مشكورة بتبعتلنا

ما تيسر من مياه..

ترمى الموت ف مواسير

تسرق من قلوبنا الحياة..

وتشتكى..

يقولك انت مش مؤمن

تقول آه..

ورحمة أمى آه..

خلاص اشرب..

اشرب وتوكل على الله..

يا عم دى مجارى

لكن هو ده التدين ف الزمان الجارى

مساجد كتير وكنايس

وده اتخطف..

وده رجع..

وده تاه..

فتنة..

ودوشة وشغب..

يا خسارة

ماعدتش كتب العلم ف بلادى

بتساوى وزنها دهب..

مابقيتش ضحكتك يا حبيبتى

ضحكة ليها العجب..

ولما اختفت لمستك من عيون الولاد

فضل الجماد.. جماد

شوية حديد وخشب

حتى اللى باقى منك

اتنهب..

وانتى مش موجودة خالص

أما عن الصحة والعلم والمدارس

ده ترف ولهو ورجس من عمل الشيطان

أما عن كرامة الإنسان..

انت لسه فاكر!

يااااااااااه..

خايف أصحى الصبح

ألاقى كل شىء مغلق للصلاة..

على وطن مات

ومتنا معاه..

بس بإذن الله مصر مريضة فقط ولم تمت ...... اللي هايموتوا هما الفاسدين الحاكمين بما لم ينزل الله .... ولحد ما ربنا يبعت لنا حد ياخد بإيدها ويعطيها قبلة الحياة .. لازم نتفائل ولا نيأس ونرجو الخلاص من الله ..

[أبوعمار]

عظمة على عظمة

عجبتني القصيدة وعجبني تعقيبك

لأنه بيعبر عن قناعة جويا مش هاتزعزع أبدا

مصر بخير وهاتفضل بخير

وان شاء الله أزمة وهاتعدي

دايما بأقول لنفسي كأننا في فترة استعمار جديد

وأكيد هاييجي اليوم وننول حريتنا تاني

(إن بعد العسر يسرا, إن بعد العسر يسرا)

[nightmare]

سي السيد , أبو عمار

قصيدة رائعة بالفعل , ومش جديدة على "على سلامة" اللى كتب على باب سفارة كندا وبوابة تفتيش

رائعة جديدة تضاف إلى طابور روائعه

مع تحياتى