كل سنة وإنتو طيبين بمناسبة عيد الفنانين

[se_ Elsyed]

أنا متلخبط دلوقت .. الريس قرر إنه يُحيا عيد الفنانين ويبقى في ديسمبر الجاي وعشان كده إجتمع ببعض فناني مصر أمس في قصر الرئاسة لمدة 4 ساعات ...

4 ساعات .. واخدين بالكم ؟

ولما حب يقابل حد من عامة الشعب عشان يرغي معاه .. طلب يقابل الفنان طلعت زكريا الأسبوع اللي فات لمدة ساعتين ...

اللي ملخبطني دلوقت ... في عيد الفنانين ... هادبح إيه ؟ أو اعمل كحك .. أو أعمل حواجبي أرخص ؟

طب ده برضوا بننفخ فيه بلاليم وبنطفي شمع ؟

انا متلخبط والله يا جماعة حد يدلني عشان العيد ما يجيش وما أبقاش مستعد ومجهز نفسي ..

....

ما كنتش أعرف المثل اللي بيقول " كِبر وخرف "

اللي بمتابعتي اللقاءات الأخيرة للرئيس القائد فتح الله عليه

فى ضيافة الرئيس: سأل الفخرانى «أين عباءة همام؟».. وسأل حسين فهمى عن موقفه السياسى.. وسأل العلايلى: «لماذا لا ترشحون أنفسكم فى البرلمان؟»

كتب حمدى دبش وأحمد الجزار ومحمد طه ومنى ياسين ٢٩/ ٩/ ٢٠١٠

تصوير- أحمد فؤاد

الرئيس مبارك فى صورة تذكارية عقب لقائه بالفنانين المصريين

بفارق ٨ أيام عن لقائه بالفنان طلعت زكريا، استقبل الرئيس مبارك أمس عددا من الفنانين، كان على رأسهم يحيى الفخرانى وحسين فهمى ويسرا ومنى زكى وعزت العلايلى ومنة شلبى ونيللى كريم ومحمود ياسين ود. أشرف زكى، نقيب الممثلين، بحضور أنس الفقى وفاروق حسنى، وزيرى الإعلام والثقافة. وتطرق اللقاء إلى عدد من الموضوعات الفنية، وطرح عليه الفنانون أبرز المشكلات التى تواجههم.

اللقاء الذى استمر ٤ ساعات كان مفاجئا لكل الفنانين الذين حضروه، حيث تم إبلاغهم به مساء أمس الأول، وقالت يسرا لـ«المصرى اليوم»: «الرئاسة أبلغتنا تليفونيا، ولم نعلم بعدد الحاضرين إلا خلال اللقاء». وأضافت يسرا، فى تصريحات خاصة لـ«المصرى اليوم»: «الرئيس فتح صدره لكل الحاضرين وتحدثنا بحرية مطلقة عن المشاكل التى تواجه الفنانين وصناعة الفن فى مصر لاقتناعه بأهمية الرسالة التى يقدمها الفنان، ولم يتحدث أحدنا فى مشكلات شخصية، وانصب الحديث على هموم الفنان، وقرار الرئيس مبارك عودة عيد الفن المقرر إقامته فى ديسمبر المقبل، وأكد الرئيس سعادته بعودة عيد الفن مرة أخرى حتى يشعر الفنانون بقيمة ما قدموه».

يسرا أكدت أن الرئيس تحدث أيضا عن مشروع حق الأداء العلنى الذى تسعى النقابات لتنفيذه، لتوفير دخل للفنانين يكفيهم إذا ما توقفوا عن العمل، فضلا عن إقامة مستشفى خاص بالفنانين، وقالت: «الرئيس استمع إلى كل مشكلاتنا، وبصراحة كان دمه خفيف، وكفاية إنه استحملنا كل الوقت ده، ووعدنا بحل كل هذه المشكلات بشكل نهائى خلال الفترة المقبلة، وقبل مغادرتنا اللقاء، قال لنا أكثر من مرة: مين عنده مشكلة؟».

حسين فهمى كان أحد الفنانين الذين تلقوا الدعوة للقاء الرئيس مبارك. فهمى أكد لـ«المصرى اليوم» أن سبب الزيارة الرئيسى هو رغبة فنانى مصر فى الاطمئنان على صحة الرئيس مبارك، وقال: كان نفسنا نشوفه ونطمن عليه، وهو لبى لنا رغبتنا، لأنه لا يتأخر عنا، وكان يريد أن يعرف أشياء أخرى عن وضع الفنانين وعيد الفن بعد لقائه مع طلعت زكريا».

فهمى أضاف: «عايز أطمن الناس إن الرئيس صحته ممتازة، وروحه المعنوية مرتفعة جدا، وكان قاعد بيهزر ويضحك معانا طول اللقاء، اللى كان أقرب إلى الجلسة العائلية، لدرجة إن الرئيس عرض علينا تناول الغداء معه، لكننا اعتذرنا، وأنا بصراحة قلت له اعفينى، أنا عايز أروح ألعب رياضة».

فهمى أكد أن الفنانين الذين حضروا اللقاء لم يتحدثوا عن مشكلاتهم الخاصة، بل تحدثوا بلسان ٣٥٠٠ فنان فى النقابة، وقال: «طرحنا فكرة تصوير الأفلام الأجنبية فى مصر، وكانت الجلسة مفتوحة وتحدثنا عن المواطن المصرى البسيط، والرئيس مهتم جدا بمحدودى الدخل، وعلى دراية كاملة بكل كبيرة وصغيرة فى البلد».

وأضاف: «ليست هذه المرة الأولى التى أقابل فيها الرئيس مبارك، فقد سبق أن تحدثنا هاتفيا عدة مرات، منها عندما قرأ حوارى الذى نشر فى (المصرى اليوم)، وقتها ناقشنى فى آرائى السياسية التى طرحتها فى الحوار».

يحيى الفخرانى هو الآخر عرف باللقاء فى وقت متأخر، فقد أبلغه به النقيب أشرف زكى مساء أمس الأول، وقال: «استمتعت جدا بلقاء الرئيس مبارك، وعرضنا عليه جميع المشكلات التى تواجه الفنانين، وطلبت من الرئيس التدخل لحل مشكلة التصوير الخارجى للمسلسلات، لأن هناك جهات كثيرة تطلب مبالغ ضخمة لتصوير أى مسلسل، وهى اكبر مشكلة تواجه الفن». وقال الفخرانى للرئيس مبارك: «هناك جهات إنتاج أجنبية ترفض التصوير فى مصر، وتتجه إلى التصوير فى دول أخرى مثل المغرب وسوريا بسبب ارتفاع الضريبة الجمركية التى تفرض على معدات التصوير».

وأكد الفخرانى أن الرئيس طمأنهم على البلد رغم أن الحوار لم يتطرق إلى الحديث عن الأوضاع السياسية أو الانتخابات المقبلة إنما كان مركزا على الفن المصرى وأهميته فى المجتمع، وأوضح الفخرانى أن الرئيس شاهد مسلسله «شيخ العرب همام» وداعبه: «فين العباية يا همام؟».

وأكد عزت العلايلى سعادته بهذه الزيارة لأنه اطمأن على أحوال البلد من خلال كلام الرئيس، وقال: «أفخر بأننى مصرى وأن رئيسى هو حسنى مبارك، فأنا أحبه واكتشفت خلال هذا اللقاء أنه يعرف (دبة النملة) فى مصر، وهذا ما لم أتخيله».

وأضاف أن الرئيس تحدث معهم عن كل مشاكل المجتمع المصرى وأهمها مشكلة التعليم والعلاقات الدولية بين مصر والدول الأخرى، وقال: «رحب الرئيس مبارك بمشروع الأداء العلنى، فهناك فنانون كانوا كبارا وأعمالهم مازالت تعرض حتى الآن دون أن يستفيدوا من ذلك ومنهم كمال الشناوى ومريم فخرالدين».

وأوضح العلايلى أن أشرف زكى طالب الرئيس بتوفير مكان جديد لنقابة الممثلين بدلا من مقرها الحالى، وهو شقة فى وسط البلد، وتدخل أنس الفقى، وزير الإعلام، وقال إنه على استعداد لتوفير مكان فى مدينة الإنتاج الإعلامى، وقال فاروق حسنى وزير الثقافة إنه على استعداد لتجهيزه.

وأكد العلايلى أن الحوار تطرق إلى مستقبل السينما المصرية، وقال الرئيس مبارك إنه فخور جدا بالفن المصرى، وإنه من حق الفنانين أن يكون لهم عيد، لما يقدمونه لمصر، وتحدث الرئيس مبارك – حسب العلايلى - عن انتخابات مجلس الشعب وسأل الفنانين: هل رشح أحد من الفنانين نفسه فى هذه الدورة؟ فقالوا: لا.. فطالبهم بالاهتمام بذلك ليكون ضمن المجلس واحد منهم يعبر عن مشاكل الفن والفنانين.

وأكد د. أشرف زكى، نقيب الممثلين، أن الرئيس مبارك تحدث عن السينما كصناعة، وأهمية دعمها، باعتبارها ثروة قومية وأضاف: «الرئيس وعدنا بحل كل مشكلاتنا، وطلبنا منه أن يضعنا فى خدمة الشعب من خلال قضايا المواطن التى نطرحها فى أعمالنا الفنية».

[se_ Elsyed]

وقد يسأل سائل سؤالً خبيثاً لولبياً بغرض الإحراج ويقول : ويا ترى عيد الشعب إمتى ؟

وهاجاوبه إجابة أخبث وأقول له : لما ينزاح الكابوس اللي بقى له 30 سنة وأخر البلد 500 سنة ..

ساعتها هاندبح ونهيص ونركب المراجيح والزحاليق ونفرقع بومب ...

--------------

شوفتوش خيبة زي دي ؟

شوفتوش علماء ورجال وهامات عاليه في الوطن يتم تجاهلهم بل بالعكس يتم سحب الجوائز منهم زي ما حصل مع فاروق جويدة وعلاء الأسواني و و و و و لمجرد إنهم معارضين أو بيقولوا كلمة حق ؟

ولماذا لم يستدعي الرئيس فنان زي خالد يوسف .. فبالرغم من إعتراضي على معظم اعماله الفنية .. إلا أنني اتفق معه في رؤيتة السياسية ؟

ولماذا لم يستمع مثلاً إلى مُحسنة توفيق أو خالد الصاوي .....

ههههههههههه .. طبعاً هو عاوز يسمع الهليسة وبتوع أفلام البورنو .. أيوه بورنو والله مش مصدقين ... أصل إتنين كبارررررررررررررررررر قوي من اللي قابلهم دول عملوا أفلام بورنو صريحة ..... أما الباقيين فليهم في السيمي بورنو ..

مره أخرى كل سنة وإحنا طيبين بعيد الفنانين

[se_ Elsyed]

وأكد الفخرانى أن الرئيس طمأنهم على البلد

رغم أن الحوار لم يتطرق إلى الحديث عن الأوضاع السياسية أو الانتخابات المقبلة

ماما حلوه

والبلد زي الفل والعيش كبير واللحمه مغرقة الدنيا وعندنا إنفلات في عدد المصابين بمرض النقرس .. والكهربا منوره والعيشة زبادي في الخلاط

[ozoozo]

وقد يسأل سائل سؤالً خبيثاً لولبياً بغرض الإحراج ويقول : ويا ترى عيد الشعب إمتى ؟

وهاجاوبه إجابة أخبث وأقول له : لما ينزاح الكابوس اللي بقى له 30 سنة وأخر البلد 500 سنة ..

ساعتها هاندبح ونهيص ونركب المراجيح والزحاليق ونفرقع بومب ...

--------------

شوفتوش خيبة زي دي ؟

شوفتوش علماء ورجال وهامات عاليه في الوطن يتم تجاهلهم بل بالعكس يتم سحب الجوائز منهم زي ما حصل مع فاروق جويدة وعلاء الأسواني و و و و و لمجرد إنهم معارضين أو بيقولوا كلمة حق ؟

ههههههههههه .. طبعاً هو عاوز يسمع الهليسة وبتوع أفلام البورنو .. أيوه بورنو والله مش مصدقين ... أصل إتنين كبارررررررررررررررررر قوي من اللي قابلهم دول عملوا أفلام بورنو صريحة ..... أما الباقيين فليهم في السيمي بورنو ..

مره أخرى كل سنة وإحنا طيبين بعيد الفنانين

مش عزت العلايلي ده اللي كان معري ............ في احد افلامه مع الفاضله ناهد شريف

هو بقي من شروط البرلمان تعريه المنطقه دي ......

يمكن عايزين بعرفوا هي قوه كام شلوط في الجلسه

تم تعديل 29 سبتمبر 2010 بواسطة ozoozo

[ذهبية]

و الله يا سى السيد من ساعة ما قريت الخبر و انا محتارة بجد هو بيعمل كدة لية

يعنى ساب البلد تولع باللى فيها و اختار الفنانين علشان يسالهم على حال البلد على اساس انهم بيقفوا فى طابور العيش و لا بيجيبوا الطماطم بعشرة جنيهة و لا مرتبهم مش مكفيهم لا مدارس و لا كتب خارجية و مش لاقيها و لا دروس و لا اية

بجد حاجة فى قمة الاستفزاز فنانين اية اللى رايح يقابلهم و بيغظنى اكتر بقى كل يوم بيعدى تلاقية رايح بلد من بلد ليلد بيعمل اية مرعفش يعنى بيتفق على مشاريع اقتصادية مشفناش بيدخل روؤس اموال للداخل كل للى شفتوها للخارج بس بلا رجعة ون واى

بيسافر يعمل اية معرفش

هو اية جيمى حب يراضية و يطلعة فى الاعلام شوية قولة يعمل الحركة دى علشان الناس تتكلم عنة شوية لانهم نسييوا شكلة

هو دورة اية بالضبط فى البلد حد يفهمنى

[nightmare]

ايه الحقد ده يا سي السيد ,ده بدل ما تفرح وتغني وتهيص وتقول " يارب كثر أعيادنا وعلى قد نيتنه ادينا"

وعقبال يارب اما يلتقي كده بالمعلمين والمحاسبين والمحامين واساتذة الجامعات والأطباء والبقالين والمهندسين والسواقين والتباعين ... الخ.

ونعمل كل يوم عيد , وايه المشكلة ما احنا رايقين وفايقين ومفيش ورانا حاجة نعملها , كل واحد فينا عنده فيلته وعربيته ودخله الشهري كام الف دولار والطرق فاضية والتعليم والعلاج مجانى .

والا احنا هنفضل شعب فقري على طول كده وما بنعرفش نفرح.

افرح ياراجل ووزع البونبونى والشوكولاته وهات التورته واعزم اصحابك في الشغل واحتفلوا بالمناسبة الجميلة دي.

ويعنى هي جت عليهم وعاوز تحرمهم من البرلمان , يعنى هما هيكونوا اوحش من نواب القروض والمخدرات ونواب العلاج ونواب ضرب الناس بالنار ونواب القتل, واللى نعرفه يا سي السيد احسن من اللى ما نعرفوش

ودام الله علينا أعيادنا.:D

تم تعديل 29 سبتمبر 2010 بواسطة nightmare

[شريف مان]

ما كنتش أعرف المثل اللي بيقول " كِبر وخرف "

اللي بمتابعتي اللقاءات الأخيرة للرئيس القائد فتح الله عليه

bv:-

[أبوعمار]

أنا لما قريت الموضوع ده فعلا عرفت معنى "كبر وخرّف"

وعرفت معنى "اللي اختشوا ماتوا"

وعرفت قد ايه وصلوا للاستخفاف بالناس

يعني زي ما بيقول المثل "اللي تعرف ديته .. اقتله"

خلاص هما عرفوا آخرة المصريين ايه

فدلوقتي قاعدين يبرطعوا ويستهبلوا براحتهم

افتكرت دلوقت الأوبريتات اللي كنا بنسمعها في

أعيااااااااااااااااااد بتاع الثورة والذي منه

"اخترناه ... وبايعناه ... واحنا معاه لما شاء الله" :P

ولا الأنقح منه

"مصر الحرية معاك ... عايشة بنور الحرية

حرية كمان وكمان .... اديها كمان حرية" bv:-

اديها ما تحرمهاش

[مغتربة]

فعلا الف حمد و الف شكر ليك يا رب

الى كان ناقصنا فعلا هو عيد الفنانين

مش عارفه ازاى كنا قادرين نعيش من غيره

ربنا يخليك لينا يا ريس و عقبال عيد لاعيبه الكوره علشام متبقاش حارمنا من حاجه

بس دا بقى اعتقد ان جمال هو الى هيعمله لما يمسك ( ان شاء الله ما يشوفها )

[akramgroup]

معلش هو انتم ليه مستغربين من اللقاء ده

دى حاجة طبيعية جدا انها تحصل فى بلد زى بلدنا معظم شعبها مبيحبش يتكلم فى السياسة

فى وجهة نظري الشخصية المتواضعة ان اللقاء لابد منه فى هذا التوقيت بالذات

وبسبب التأثير الهائل للفنانين على معظم فئات الشعب

يعنى هما دول اللى بيطلعوا فى التلفزيون والناس بتسألهم هاترشحوا مين ومش هاترشحوا مين

يعنى الموضوع مش محتاج شرح اكيد وصلتلكم وجهة النظر

تحياتى

أكرم,,

[Mr MAGED]

والله يا سين سين انا مش عارف انت هتودينا لغاية فين

يا أخي متسيبه ياخد راحته

الراجل كبر ... ووصل لخريف العمر .. وعايز يدلع نفسه شوية

قام جايب يسرا ومنة ومنمن عشان يطروا القعدة شوية

ثم ان مين هيعرف أحوال الشعب غير اللي بيمثلوا ع الشعب

ده بيقولك الراجل بيعرف دبة النملة .. ومتابع أخبار الشعب لحظة لحظة

بلاش نتجني عليه .. كل واحد من حقه يشوفله يومين

وخصوصا لما يتم تقليص مهام وظيفته وتتسحب منه الصلاحيات

هيقعد يعمل ايه يعني

ويجعله عامر

[se_ Elsyed]

عندكو حق والله .. الظاهر إن أنا اللي بأهيس ..

والله العظيم من ساعة ما عرفت الخبر ده امبارح وأنا الضغط عالي عندي والصداع هايفرتك نافوخي ...

[م تيمور المراغي]

انا مش متفق معاكم ,, الفن شيئ جميل وحبيب وراقي لازم نهتم بيه كشعب متحضر مش كده ؟

يعني الفن المصري عموما من نحت ورسم وزخرفه و خزف ونسيج وموسيقى هو اقدم الفنون في العالم فطبيعي اننا النهارده كدوله نجعل له يوم للاحتفال ,,

بغض النظر عن الوضع السياسي الحالي او مستوى الفنانين اللي قابلهم ولكنه عيد للفن ككل وليس عيد التمثيل او السينما فقط

مش طبيعتي والله اخالف التيار معلش لكنها وجهة نظر وعارف ان كثير معايا فيها ,,

http://ar.wikipedia.org/wiki/%D9%81%D9%86

[se_ Elsyed]

هو أنا اختلفت معاك لا سمح الله يا أركتاكشر يا اخويا ؟

الفن فعلاً يسمو بالروح ويهذب الأخلاق .. مش تهريج والله

لكن إيه فايدة الفن على بطن فاضية ومعده بتتلوى من شرب المجاري ؟

إيه فايدة الفن والأمراض بتفتك بالناس واللي ما ماتش من المرض مات من أرتفاع الأسعار في بلد لا لها كبير ولا لها رئيس ؟

[se_ Elsyed]

صدفة ومن غير ميعاد

علي سلامة كاتب زجل النهاردة في المصري اليوم .. بجد .. طلقة ... وينطبق على حالتنا بتاعت عيد الفنانيين

مصر مين فيهم..؟

كتب على سلامة ٢٩/ ٩/ ٢٠١٠

ابنى العزيز..

انتهت إجازة الصيف

واديك راجع تانى للمدرسة..

خللى بالك م الطريق

وتجارة يا ابنى..

زى طب..

زى هندسة..

نهاية واحدة ونتيجة معروفة..

ولو بتحب أبوك صحيح

أرجوك..

لا تأكل الحلوى المكشوفة..

وان سألوك عن مصر

قولهم مصر مين فيهم

دى..

ولا اللى مخطوفة..

ابنى العزيز..

اهتم بنظافة قلبك..

وسلامة اسنانك

واشترى دماغك

وإوعى تصدق إن أبوك

اتغرب يوم عشانك..

وان سألوك عن مصر

قولهم مصر مين فيهم

دى..

ولا اللى بالى بالك..

ابنى العزيز..

اشرب اللبن قبل ما تنام..

واللى تقوله المدرسة النهارده

بكره تكدبه الأيام..

وأبوس إيدك

واوعى لما تكبر

تشتغل إعلام..

وإن سألوك عن مصر

قولهم مصر مين فيهم..

دى..

ولا اللى منشورة ف الأهرام..

[م تيمور المراغي]

هو أنا اختلفت معاك لا سمح الله يا أركتاكشر يا اخويا ؟

الفن فعلاً يسمو بالروح ويهذب الأخلاق .. مش تهريج والله

لكن إيه فايدة الفن على بطن فاضية ومعده بتتلوى من شرب المجاري ؟

إيه فايدة الفن والأمراض بتفتك بالناس واللي ما ماتش من المرض مات من أرتفاع الأسعار في بلد لا لها كبير ولا لها رئيس ؟

انا مع حضرتك ولكن الذنب مش في الفن ابدا ,, لان الفن كمعنى مطلق منزه وبعيد عن اتباعه الحاليين اللي ماعرفوش يوظفوه التوظيف السليم لخدمة البلد ,,

فاكرين الفن في ايام عبد الناصر الاولى ازاي كان قادر يوظف كل الشعب سوا لتحقيق غايات نبيله ,,

يبقى العيب في التطبيق وليس في المضمون ,,

احترامي وتقديري لشخصكم الكريم استاذي الكبير ,,,

[doha]

اول ماسمعت عن لقاء ( الريس ) بطلعت زكريا تمنيت اعرف مين ( العبقري ) الي بيخطط له حملاته الانتخابيه من نصحه يشرب الشاي مع الراجل الغلبان في العشة الخوص على طريقة عادل امام لما اجبر فتحي (يبوس ) الفلاح مع انه معفن ..

نفسي اعرف العبقري ده بيجيب افكاره دي منين ؟

والاهم هو بجد مصدق ان الحركات دي ممكن تخيل على الشعب وان ممكن فعلا زي الناس ماحبت شخصية الرئيس في فيلم طباخ الريس وقارنت بينها وبين الشخصية الحقيقة ولمست بنفسها البعد الشاسع مابين اهتمام ده وده .. هل هو متخيل ان الناس ممكن فعلا باستضافة طلعت زكريا تصدق ان ( الريسين ) واحد وان الراجل مهتم بينا بجد ؟

طيب فات يعني العبقري صاحب الخطة الجهنمية دي ان لو الريس مهتم بشعبه فآخر حد ممكن ينسال عننا هم طبقة المتعفنين الي من سنين طويلة بترتزق بتشويه صورتنا عند العالم وبتقديمنا لهم على اننا حفنة من العاهرات الي بيصرفوا على مدمني المخدرات ؟

بصراحه انا مش بلوم الريس على عيد الفنانين الي عمله ولا بلومه على مقابلته للفنانين ولا شربه الشاي في كوبايه مش مغسوله .. انما الي افلظع من كل ده ه بجد ازاي يمشي ورا الي بيخطط له الحملة بتاعته بالشكل ده وازاي بجد مصدق انها ممكن تجيب نتيجه .. الهم الا بقى لو كان بيعمل كده من باب حرق دمنا كمصريين .. لو كده يبقى برافوا عليه .. عرف يختار .

تم تعديل 29 سبتمبر 2010 بواسطة doha

[Diab]

إن شاء الله يعمل عيد للبقالين <_<

المهم م الاخر كدة هناخد كام يوم أجازة في العيد ده ؟

[Amr Radwan]

بسم الله الرحمن الرحيم

و به نستعين .. اتقدم بالتهنئة الي كل طوائف و فئات الشعب المصري العريق بهلول هلال عيد الفن اعادة الله علي المصريين جميعا باليمن و البركات

و انتهز هذه الفرصة الثمينة لاتقدم بالشكر الي السادة اللي فوق علي اهتمامهم بمزاج الشعب المصري و بالفن و التمثيليات و الافلام المؤثرة و المعبرة و التي تهز قلوب المصريين و تأسر عقولهم و تحيا جمهورية مصر الفنية .. قصدي العربية

و كم كنت في غاية التاثر عندما قرأت ان اللقاء استمر لمدة 4 ساعات .. و لقاء طباخ الريس استمر لمدة ساعتين و استريحت جدا لما قرأت ان نطمأن علي حال مصر و المصريين .

كم انا سعيد و هتتفقع مرارتي من السعااااااااادة و خاصة بعد مشاهدتي و متابعتي لمعظك برامج التوك شو و التي تبث كل ما يسعد المواطن هذا بالاضافة الي سعادته الحقيقية عند مشاهدة الحياة المنعمة بنفسه .

و تحيا مصر

و بهنيكم للمرة التانية بهلول هلال عيد الفن

[Diab]

بسم الله الرحمن الرحيم

و به نستعين .. اتقدم بالتهنئة الي كل طوائف و فئات الشعب المصري العريق بهلول هلال عيد الفن اعادة الله علي المصريين جميعا باليمن و البركات

و انتهز هذه الفرصة الثمينة لاتقدم بالشكر الي السادة اللي فوق علي اهتمامهم بمزاج الشعب المصري و بالفن و التمثيليات و الافلام المؤثرة و المعبرة و التي تهز قلوب المصريين و تأسر عقولهم و تحيا جمهورية مصر الفنية .. قصدي العربية

و كم كنت في غاية التاثر عندما قرأت ان اللقاء استمر لمدة 4 ساعات .. و لقاء طباخ الريس استمر لمدة ساعتين و استريحت جدا لما قرأت ان نطمأن علي حال مصر و المصريين .

كم انا سعيد و هتتفقع مرارتي من السعااااااااادة و خاصة بعد مشاهدتي و متابعتي لمعظك برامج التوك شو و التي تبث كل ما يسعد المواطن هذا بالاضافة الي سعادته الحقيقية عند مشاهدة الحياة المنعمة بنفسه .

و تحيا مصر

و بهنيكم للمرة التانية بهلول هلال عيد الفن

عائشة عبد الهادي في اليوم السابع بتقولك أن مصر مفيهاش بطالة وان الشاب اللي مسافر برة بيدلع ومش راضي يشتغل في مصر وفرحان بهلاهيل

والله حاجة تفقع

المرارة :D