ليه الحاجة غالية؟

[Sherief AbdelWahab]

ليه الحاجة غالية؟

ليه بالطريقة دي؟

ليه فجأة؟

رغم إن تكاليف المنتجات الزراعية مثلاً شبه معروفة ، مفيش حاجة غامضة ، ويسهل جداً توقع ارتفاعها أو انخفاضها لو بتنخفض ، وبالتالي يسهل توقع ارتفاع الأسعار من عدمه لو كل المتغيرات التانية ماشية كويس..

لكن ليه الأسعار اتسعرت كدة؟

خلص الكلام

[aimen]

ليه الحاجة غالية؟

ليه بالطريقة دي؟

ليه فجأة؟

رغم إن تكاليف المنتجات الزراعية مثلاً شبه معروفة ، مفيش حاجة غامضة ، ويسهل جداً توقع ارتفاعها أو انخفاضها لو بتنخفض ، وبالتالي يسهل توقع ارتفاع الأسعار من عدمه لو كل المتغيرات التانية ماشية كويس..

لكن ليه الأسعار اتسعرت كدة؟

خلص الكلام

ممكن نقول علشان نلهى الناس بنفسها اكثر واكثر

ممكن نقول علشان ننتظر الفارس الهمام المخلص اللى حيرجع الأسعار

ممكن نقول موسم الإنتخابات قرب ومش عاوزين وجع دماغ

[herohero]

لانا في بداية وقت الفوضى الخلاقة

مصر بدات مرحلة الفوضى وان شاء الله لسه

انا سعيد خليها تولع واحنا فيها عشان تعك ع الكل والله اريح تغلى الأسعار وينتشر الفساد اهو انتظار البلاء أصعب من وقوعه خليه يقع

لا لا يوجد اي مبرر لاي شيئ حادث ف م\صر

هي فوضى ليس اكثر

[capitshino]

بالنسبة لارتفاع اسعار بعض المنتجات الزراعية فالسبب الارتفاع الشديد لدرجة الحرارة هذا العام . والارتفاع فى كثير من الدول وليس مصر فقط

[doha]

سبحان الله لسه كنت بفكر في الحكاية دي النهرده .. اقول لحضرتك ..

اسعار الخضار ولعت لعدة اسباب اهمها بكل اسف مياه الري في مصر الي شحت بشكل غير مسبوق .. من سنين وهي بتيجي ( بالدور ) يعني تكون غزيرة في فترات معينة من كل اسبوع وبالتالي الناس كانت بتنظم الري على اساس المواعيد دي .. الي حصل ان المياه نقصت جدا من السنة الي فاتت وبناء عليه ناس كتير زرعها مات او اوشك وترتب على كده ان ناس كتير خرجت من مجال الاستثمار الزراعي ووجهت نشاطها لمجال اخر .. هنفهم من كده ان لو كان عندنا زمان فدانين مزروعين خضار دلوقت مبقاش عندنا غير فدان واحد فلما كنا بندفع 3 جنيه في كيلو الخضار النهرده هندفع 6 .

ضيف على المشكلة دي الارتفاع الغير مسبوق في اسعار الكيماويات اللازمه لمعالجه الزرع وكمان الاسمده .. بالمناسبة التركيبة السابقة افرزت انخفاض شديد في سعر الارض الزراعية ( تقريبا النص ) ماترتب عليه توجيه استثمارات لجهات اخرى فارتفعت زي الذهب مثلا او المباني بمعنى رفع سعر الحديد وهكذا ..

الدجاج بقى اسعاره ارتفعت لان العلف غلي بشكل مبالغ فيه .. طبعا الاعلاف دي بتيجي مستورده وجزء منها بيصنع محليا معتمد على الذرة وخلافه وده برضه سعره غلي للسبب السابق .. كمان الكتاكيت نفسها الي هي اساس عملية انتاج الدجاج الاحم سعرها تضاعف نتيجه سيطرة عدد محدود من المنتجين على سوقها في مصر .. نتج عن كده ان الدجاجة الي كانت بتكلف على صاحبها مثلا 8 جنيه فيبيعها بعشرة جملة وترجع توصلنا كمستهلك بالكتير بـ 13 ولا 14 اصبحت النهرده بتتكلف فوق العشرين جنيه وبالتالي هنشتريها احنا كمستهلكين بكام ؟

اللحوم اسعارها ارتفعت برضه لارتفاع اسعار العلف وهو الارتفاع الي دفع بكثير جدا من المربين ـ في السنتين الماضييتين ـ للتخلص من رؤوس الماشية الي عندهم ( مهم مش لاقيين يأكلوهم ) خاصة والبرسيم او العلف الاخضر كان مكلف جدا في تلك الفترة ( كان في ارتفاع غير مبرر في ايجارات الارض الزراعية بما رفع التكلفة على المربي وبالمناسبة فالاسعار رجعت انخسفت الارض بعد ماعزف الكثير عن التربية ) ..

نتيجه للنقص الي حصل في اعداد الماشية في مصر ونتيجة لارتفاع اسعار العلف حصل ارتفاع غير عادي لسعر الحيوان نفسه.. فالجاموسة ـ اكرمكم الله ـ التي كان سعرها من سنتين تلاته 8 او 9 النهرده مش اقل من 15 ويقال انها وصلت الى 18 او 20 لراس الجاموس الواحد !!

ده لو هتشتريها جملة .. لكن شوف بقى على ماتتوصل لنا كمستهلك والجزار الي كان متعود يبيع مية كيلو مثلا كل اسبوع مكسبه في الكيلو على سبيل المجاز 5 جنيه يبقى هو متعود يكسب 500 جنيه اسبوعيا .. النهرده ونتيجه لارتفاع سعر اللحم ناس كتير قللت استهلاكها منه وبالتالي الي كان بيبيع مية مش هيبيع غير 50 .. يبقى عشان يحصل على نفس المكسب وهو 500 مضطر انه بدال ماكان بيكسب في الكيلو 5 جنيه هيرفعه الى 10 يعني بدال مايبيع الكيلو بخمسين هيبيعه لنا بستين ..

ده بخلاف ازمه انفلونزا الطيور في الكام سنة الي فاتوا والي قضت على ثروة مصر الداجنة من البط والاوز المربى منزليا في الريف وده خلاهم يتجهوا لاستهلاك الدجاج الابيض والاسماك بما خلق طلب اضافي ساهم بدوره في رفع الاسعار ..

دي اسباب خاصة حدثت في الكام سنة الي فاتت اضافة لاسباب اخرى شائعه بتحصل من سنين طويلة زي الحظر المفاجيء على تصدير سلعة ما زي الرز مثلا بما يضرب منتجها في مقتل .. او تواطؤ البعض على صناعة ما زي ماحصل في بنجر السكر الموسم الماضي .. او اغراق السوق فجأه بمنتج مستورد اقل سعرا بما يدمر المحلي منه زي ماحاصل اليومين دول لما اشتري دجاجة ( فرخة ) بـ 35 لافاجا ان الدجاج المجمد انتاج البرازيل مالي المجمعات الاستهلاكية بسعر 22 جنيه للدجاجة فقط !!

او لاتباع المزارعين والمربين في مصر لنظرية القطيع في تحديد السلعه الي هينتجوها فلو محصول البصل السنة دي جاب ايراد كويس هتتفاجيء ان السنة الجاية البلد كلها هتزرع بصل فالسعر هينزل الارض عشان يرجع يرتفع السنة الجاية لعنان السماء لما الكل يعزف عن زراعته بعد قرصة السنة الي فاتت .. وقيس على ذلك ..

اذا ففي غياب الخطة ومع التخبط في اصدار القوانين ووجود الايادي القذرة المتلاعبة في الخفاء واستمرار المزارع المصري بالعمل كما كان اجداده يعملون وبنفس الطريقة دون تطوير او تدخل معرفي او تكنولجي هيكون الي بيحصل ده طبيعي واكثر من الطبيعي كمان ..

[المهندسه]

الارتفاع الغير مسبوق في اسعار الكيماويات اللازمه لمعالجه الزرع وكمان الاسمده

الدجاج بقى اسعاره ارتفعت لان العلف غلي بشكل مبالغ فيه

اللحوم اسعارها ارتفعت برضه لارتفاع اسعار العلف

ده بخلاف ازمه انفلونزا الطيور

الكلام ده كله كويس لكن مش قادره اقتنع بيه بنسبه كبيره...لان لو فعلا الازمه بتكمن فى ارتفاع اسعار الاسمده والعلف وانفلوانزا الطيور

كان هيبقى نفس الحال على الدول المستورده للاعلاف و الاسمده...لكن الحال مش كده فى باقى الدول.

هنا مثلا فى السعوديه الاسعار ما ارتفعتش زى مصر ..الحال كما هو عليه وكمان احيانا الارتفاع بيكون طفيف مش بالصوره الموجوده فى

مصر حاليا...كمان السعوديه ثروتها الحيوانيه اساسها الابل و الخرفان اما باقى انواع اللحوم الحمراء بيتم استيرادها مش بس استيراد

العلف لاء ده استيراد اللحوم نفسها ومع ذلك سعر الكيلو ما وصلش 100 جنيه مصرى و لا حتى 50!!!!.

انا سمعت ان كيلو الطماطم فى مصر 7 جنيه طيب ليه ؟؟؟والفاصوليا 20 جنيه ليه ؟؟؟

الغلى فى مصر حاليا مبالغ فيه جدااا ووراءه سر غير معروف لينا ولا لتوقعاتنا مش بس غلاء العلف و الاسمده ...الموضوع اكبر

ليه ما يجيش فى بالنا انه جشع و طمع من التجار نفسهم ..ممكن ؟؟؟ليه لاء لقيوا البلد ما فيهاش رادع ممكن يتصدى لهم فقالوا

نرفع الاسعار ونزود ربحنا ونبقى نفوت سبوبه للكبار علشان يسكتوا؟؟؟ وكله على قفى الشعب الغلبان الله اعلم؟؟

[doha]

هنا مثلا فى السعوديه الاسعار ما ارتفعتش زى مصر ..الحال كما هو عليه وكمان احيانا الارتفاع بيكون طفيف مش بالصوره الموجوده فى

مصر حاليا...كمان السعوديه ثروتها الحيوانيه اساسها الابل و الخرفان اما باقى انواع اللحوم الحمراء بيتم استيرادها مش بس استيراد

العلف لاء ده استيراد اللحوم نفسها ومع ذلك سعر الكيلو ما وصلش 100 جنيه مصرى و لا حتى 50!!!!.

انا سمعت ان كيلو الطماطم فى مصر 7 جنيه طيب ليه ؟؟؟والفاصوليا 20 جنيه ليه ؟؟؟

مهو احنا قلنا ياباشمهندسة ان الدجاج المستورد في مصر بعد تكاليف شحنه وجماركه وكله بيطلع ارخص من ذلك المصري المنشأ .. يعني حضرتك جاوبتي على الجزئية دي بنفسك وهي ان السعودية بتستورد لحوم مش بتنتج واللحم المستورد في مصر ارخص طول عمره من المحلي ( البلدي ) بس ملوش سوق اوي في مصر لاختلاف الطعم وبالرغم من كده فمن كام سنة اصبح الفارق مش كبير بين اسعار اللحم الضأن البلدي والمستورد ببساطه لان استراليا وهي من اكبر منتجي الاغنام في العالم قررت تتوقف عن تصدير اي رؤوس ماشية لنا بحجة اننا ( بنعاملهم وحش ) .. ايوه متستغربيش .. من فترة قامت قيامة الراي العام الاسترالي نتيجه عرض فيلم تسجيلي يصور عمال المدبح عندنا في مصر وهم بيفقأوا عين حيوان ويخنقوه ويرفسوه كمان قبل مايذبحوه وهو ماترتب عليه القرار السابق .. كأنها كانت ناقصة ..

وبناء عليه فلو قلنا في كل عيد في ثلاثه بيشتروا خرفان اثنين بيشتروهم بلدي والثالث بيجيب مستورد فبعد الحظر اصبح الثلاثه هيشتروا بلدي مايعني ان االخروف الي كان بالف جنيه حلو عليه اوي بقى بالف ونص يادوب ولو لقيتيه ..

ده بالنسبة للاغنام الي على حد علمي مش بتاكل ( علف ) زي الماشية من جاموس وابقار ودي على حد علمي برضه مش مشهورة بيها السعودية يعني ملهمش فيها اوي ولو زاد سعر اعلافها فمش متوقع ان المستهلك يشعر بكده ..

على المدى القصير هيكون الاستيراد ارخص بالنسبة لنا كمصريين وهتغرق اللحوم المستورده السوق المصري بس الوضع ده لو حصل فبكل اسف هيشكل كارثة على المدى البعيد لانه هيقضي على انتاج اللحم والدواجن في مصر .. في السعودية مش محتاجين ينتجوا لحوم وممكن جدا يكتفوا باستيرادها على اساس ان معاهم مصادر تانية للدخل .. لكن احنا لو بطلنا ننتج هنجيب حتى فلوس المستورد منين ؟؟؟

الموضوع كبير بكل اسف مش مسألة طبق سلطه بقى بيكلف عشرين جنيه ولاكيلو كباب يعدي المية جنيه .. المسألة اقتصاد بينهار وبسرعه الصاروخ وربنا يستر من الي جاي ..

تم تعديل 1 أكتوبر 2010 بواسطة doha

[shawshank]

ليه ما يجيش فى بالنا انه جشع و طمع من التجار نفسهم ..

بالإضافة للأسباب اللي ذكرها الزملاء الأفاضل، فجشع التجار في مصر ده شئ مفروغ منه ... الدولة قررت اعتماد آليات السوق في الكثير من السلع كواحدة من أسس الرأسمالية، يعني إن الدولة تترك السوق يصحح نفسه بنفسه خاضعًا للعرض والطلب. لكن الدولة خدت اللي عاجبها من الرأسمالية وسابت اللي مش عاجبها. يعني مثلاً فين رقابة الدولة الصارمة على التجارة الداخلية والخارجية كمكون أساسي من مكونات الرأسمالية؟ فين الضرائب المتدرجة، واللي بتفرضها الدولة بنسب عالية على كبار التجار؟ فين حماية المنافسة ومنع الاحتكار؟ ... الخ. تقاعس الدولة عن القيام بدورها الرقابي على عمل الأسواق التجارية أوجد ثقافة سيئة عند التجار. قوام هذه الثقافة أنه لا وجود لمنافسة حقيقية. يعني من آليات السوق إن لو تاجر رفع سعر سلعة معينة بدون مبرر غير جشعه في زيادة الربح، بتقول آليات السوق إن الطبيعي إن بقية التجار مش هيفكروا يرفعوا السعر، لأن بسعرهم الأقل بينافسوا هذا التاجر، وبالتالي هيبيعوا أكتر، وبالتالي التاجر الجشع ده في النهاية هيخسر، فهيضطر ينزل السعر. والعكس صحيح. يعني لو تاجر حب ياخد السوق لنفسه، هينزل السعر ، صحيح مكسبه هيقل، بس هينافس بقية التجار بقوة، فيضطر بقية التجار في تنزيل السعر زيه. بين هذا وذاك تستقر الأسعار عند المعقول. مفيش حاجة من دي بتحصل. اللي بيحصل في الواقع في مصر إن لو تاجر جشع رفع السعر عشان يزود ربحه أضعاف المعقول، بقية التجار بيعملوا زيه بالظبط ويرفعوا السعر عشان برضه يكسبوا مكاسب خيالية. أما إن تاجر ينزل السعر عشان ينافس بقية التجار، فده مبيحصلش أصلا. فدي ثقافة عجيبة، من دور الدولة إنها تستبدل ثقافة المنافسة بثقافة الجشع تلك.

فيه ناس بتقول إنه طالما فيه بيع والناس بتشتري، يبقى الناس معاها فلوس. ولما الناس ماتبقاش قادرة تشتري، هينزل السعر تلقائيًا للحد اللي ممكن معاه الناس تشتري. ده ممكن يكون صحيح في سلع أخرى غير السلع الأساسية. يعني ميصحش ينطبق الكلام ده على الطعام والشراب والمسكن والملبس والدواء. دي سلع أساسية من واجب الدولة حماية المنافسة فيها ومنع احتكارها بما يضمن توافرها باسعار مناسبة.

[Howayda Ismail]

ليه الحاجة غالية؟

ليه بالطريقة دي؟

ليه فجأة؟

رغم إن تكاليف المنتجات الزراعية مثلاً شبه معروفة ، مفيش حاجة غامضة ، ويسهل جداً توقع ارتفاعها أو انخفاضها لو بتنخفض ، وبالتالي يسهل توقع ارتفاع الأسعار من عدمه لو كل المتغيرات التانية ماشية كويس..

لكن ليه الأسعار اتسعرت كدة؟

خلص الكلام

للاسف الناس هى اللى اتسعرت بقى كل واحد مادد ايده فى جيب غيره ياخد اللى يقدر عليه

ابسطها لما بيكون لك باقى فى فاتورة كهربا او مية وهى محددة القيمة بيطنش على الباقى

ولو طالبته الرد جاهز مش معايا فكة وكل مرة بتتكرر لان الحكومة لغت تداول القرش صاغ

ولكن لم تلغيه من الفواتير فعشان قرش صاغ ياخد معاه 24 قرش وممكن تصل باقى جنيه شوف

كم فاتورة بيحصلها شهرياوكذلك فواتير التليفون...........

النهاردة سمعت موضوع كنت ناوية اكتب عنه موظف حى بيحصل عوايد عن ارض لشركة ومعلوم

قيمة العوايد صاحب الشركة اعطى موظف عنده المبلغ المطلوب فى ظرف ومحدد القيمة

واسم موظف الحى واتصل بيه موظف الشركة عشان يسدد له المبلغ فى مكتبه فى الحى

قاله لأ اصل انا مش باقعد فى المكتب انا حاجى اخد الفلوس وطبعا كان باقى بضعة جنيهات

من كذا الف لم يطالبوه بردها ولكن لانه بجح وطماع طالب الموظف بقهوته يعنى عاوز فلوس

زيادة رغم ان ده شغله بيقبض عليه مرتب وصاحب الشركة مش موجود اتصل به موظفه

يخبره بطلب موظف الحى واتعمد يشغل الاسبيكر لانه كان متوقع رد صاحب الشركة

قاله كمله على اللى معاه مبلغ كذا خليه يغور بلاش سرقة وقلة ادب وشتيمة تانية وطبعا سامع

الكلام ده ورغم كده مد ايده اخد الفلوس وقاله ده محاسبين فى شركات تانية بيحسبوا

صاحب الشركة على 100جنيه فى اشارة انهم بيسرقوا هم كمان قاله انا اتعمدت اسمعك

عشان متفتكرش انى مسمسر من وراه او من وراك طيب ان كان ده فى الحكومة

حنلوم على بياع تجزئة اصلا وصله البضاعة سعرها عالى من التجار الكبار وطبعا هو

عاوز يكسب كمان واللى بتحمل تكلفة الطمع ده المواطن الغلبان اللى الحكومة نفضت

جيوبه قبل ماتنفض ايدها منه لامنها عاوزة تحدد تسعير جبرية زى زمان تلزم بها البائع

ويكون عارفها المشترى ولامنها بترفع المرتبات لتعادل ارتفاع الاسعار حتى العلاوة

اللى مش كل الناس بتاخدها كل الناس بتنكوى من اثارها حتى قبل ماتتقبض والى يجن

الناس بتزيد 5 جنيه كل السلع بترتفع دون استثناء باضعاف اضعاف هذه الخمسة

المشكلة عند الحكومة وعندنا احنا لما بنشترى طالما معانا فلوس مش بنبص غيرنا مش

قادر لكن لو قاطعنا كلنا وتضامنا مع بعض غصب عنهم بيتراجعوا زى تجربة مقاطعة

اللحوم فى بور سعيد غصب عنهم نزلوا سعرها بعد المقاطعة

[أسد]

بالفعل .. الأسعار في إرتفاع كبير ..

خاصة المواد الغذائية ..

ولكن هذا الحال ليس في مصر فقط .. بل أن هناك إرتفاع في أسعار المواد الغذائية في كل مكان ..

حتى السعودية وقد أشار البعض إلى أن الأسعار لم ترتفع فيها .. فقد إرتفعت الأسعار بشكل كبير خلال العام الحالي .. فأسعار اللحم قد إرتفعت بحدود 20% .. وأسعار الخضر والفاكهة إرتفعت بشكل ملحوظ في الآونة الأخيرة .. وكثير من المنتجات إرتفعت أسعارها بشكل كبير ..

ولكن في مصر يظل الوضع مختلفاً ..

وذلك بسبب كم كبير من الأسباب والمشكلات تلخصت أغلبها في المداخلات السابقة .. ولن أضيف

ولكن الحل يوجد في شئ واحد

وهو تعميق المنافسة الحرة .. وإيجاد وفرة في عرض المنتجات كافة .. وإطلاق حرية التجارة للجميع ..

ولكن مع وضع ضوابط قوية لمنع الإحتكار وحماية التاجر الصغير الذي يمكن تدميره من كبار التجار في حال المنافسة الشديدة .. وهذا واقع للأمر في مصر ..

ووجوب وجود دور قوي للدولة في حماية المستهلك من الغش والتدليس

الحل موجود وسهل .. يبقى فقط وجود إرادة لدى القائمين على الأمر في تطبيقه وبكل دقة وحزم

[nightmare]

بكل بساطة لتكامل أسباب الغلاء جميعاً في وقت واحد.

الأول: غلاء كل أدوات الزراعة من شتلات زراعية وصوب ومواد كيماوية واجرة ماء الري وحتى اجرة العامل الذي كنت تؤجره لحرث الأرض أو زراعتها او لجنى المحصول وكذلك غلاء اجرة ماكينات الحرث والحصاد والتى تعمل بالساعة.

ثانياً: الديون المتراكمة على 90% من الفلاحين لدي البنك الزراعي او بنك ناصر والذي يدفعهم إلي زيادة السعر حتى يستطيعوا الوفاء بسداد القروض.

ثالثاً: غلاء اجرة نقل المحاصيل من الأراضي إلى الأسواق , من عمال وسيارات , وكله يتم تحميله إلى تكلفة المحصول.

رابعاً: جشع التجار الذين تعودوا على هامش ربح معين ومازالوا متمسكين به برغم أن سعر التكلفة أصبح مضاعف.

خامساً: عدم وجود رقابة على الأسواق والضرب بيد من حديد على كل تاجر جشع, لكن هو فيه حد بيحاسب حد في البلد , كله بيعمل اللى نفسه فيه , مرحلة "فوضي" في كل جوانب الحياة.

دعابة : الغلاء خالف كل التوقعات , كانوا بيعلمونا زمان انه كلما زادت السلعة عن الحد قلت قيمتها , ماشي حلو . طب افهم بقي "الكوسة" غالية ليه مع انها مالية البلد.:lol:

مع تحياتى

تم تعديل 2 أكتوبر 2010 بواسطة nightmare

[المهندسه]

بكل بساطة لتكامل أسباب الغلاء جميعاً في وقت واحد.

الأول: غلاء كل أدوات الزراعة من شتلات زراعية وصوب ومواد كيماوية واجرة ماء الري وحتى اجرة العامل الذي كنت تؤجره لحرث الأرض أو زراعتها او لجنى المحصول وكذلك غلاء اجرة ماكينات الحرث والحصاد والتى تعمل بالساعة.

ثانياً: الديون المتراكمة على 90% من الفلاحين لدي البنك الزراعي او بنك ناصر والذي يدفعهم إلي زيادة السعر حتى يستطيعوا الوفاء بسداد القروض.

ثالثاً: غلاء اجرة نقل المحاصيل من الأراضي إلى الأسواق , من عمال وسيارات , وكله يتم تحميله إلى تكلفة المحصول.

رابعاً: جشع التجار الذين تعودوا على هامش ربح معين ومازالوا متمسكين به برغم أن سعر التكلفة أصبح مضاعف.

خامساً: عدم وجود رقابة على الأسواق والضرب بيد من حديد على كل تاجر جشع, لكن هو فيه حد بيحاسب حد في البلد , كله بيعمل اللى نفسه فيه , مرحلة "فوضي" في كل جوانب الحياة.

دعابة : الغلاء خالف كل التوقعات , كانوا بيعلمونا زمان انه كلما زادت السلعة عن الحد قلت قيمتها , ماشي حلو . طب افهم بقي "الكوسة" غالية ليه مع انها مالية البلد.:lol:

مع تحياتى

كلام منطقى جدا ..خصوصا ديون الفلاحين للبنك الزراعى ...فعلا انا عارفه الموضوع ده من فتره

[المهندسه]

الحل موجود وسهل .. يبقى فقط وجود إرادة لدى القائمين على الأمر في تطبيقه وبكل دقة وحزم

كلام كويس جدا استاذ اسد لكن احب اضيف "بكل دقه وحزم وضمير"

فأن القائمين على امور بلدنا للاسف كثير منهم غاب عنهم الضمير وهو السبب فى اهدار حق صغار التجار او صغار المستثمرين فى الدوله

وحق الشعب نفسه.

[ozoozo]

علي فكره الطماطم في السعوديه وصلت 8 ريال

لكن مشكله الحكومه في مصر محدش بيصدقها حتي لو صادقه فعلا

[اغابي]

انتكم بتتكلمو فى موضوع مهم اوى بنعانى منه يوميا

على فكرة الاسعار فى الكويت للخضار والفاكهة مرتفعة بشكل ملحوظ

لو حسبناها بالمصري

لما كيلو الطماطم ب 20 ج

وشاحح

وكيلو الباتينجان ب19 ج

واقل نوع فاكهة ب14 ج

لما يبقى حزمة الشبت

او البقدونس او الجرجير - ما بين 2-4 ج

يبقى فى ايه - طب ايه الاسباب هل فى سر خفى للدرجة يعنى

بجد الاسعار ابتدت تزيد فى بداية شهر رمضان واحنا متعودين على كدا

كل سنة ومع انتهاء العيد الاسعار تتراجع - لكن اللى حصل غير كل المتوقع بالعكس فى سلع غذائية زادت اسعارها عن شهر رمضان

السمك ما بين 40 ج للكيلو الى 150 ج حسب النوع

مع العلم انواع عادية جدا قبل كدا ما كنش سعر الكيلو لاغلى نوع يزيد عن 40 ج او 2 دينار

الخبز مدعم من الدولة علشان كدا سعره ثابت

فروق الاسعار فى الزيوت بانواعه - حتى البهارات والصلصات والمكرونات والكاتشب ما سلمش من زيادة الاسعار

مفاجات - بالاضافة الى السكر والرز والحليب والعصاير والاجبان واللانشونات والبيض واللحوم -

ومع دخول المدارس كل الاسعار فى زيادة مستمرة - ايه الاسباب

بصراحة اللى فى الكويت يحكولكم عن الاسعار من بعد العيد بقت شكلها ايه

ايه السبب

وايه هو الحل

اغابي

تم تعديل 2 أكتوبر 2010 بواسطة اغابي

[اغابي]

علي فكره الطماطم في السعوديه وصلت 8 ريال

لكن مشكله الحكومه في مصر محدش بيصدقها حتي لو صادقه فعلا

الطماطم فى الكويت ب دينار

يعنى 20 جنيه

وانا اللى اعرفه ان السعودية ارخص فى الاسعار من الكويت

كيلو الفلفل وصل الى 18 ج او 900 فلس

لا هنا الاسعار بقت مش ممكن

حزمة البصل الاخصر - ب حواااالى امممم يعنى ممكن نقول 4 جنية مصري

لالا حاجات غريبة ومش بنحب نحسب بالمصري

خلينا ناكل احسن لكن هى بتاثر على المرتب والمصاريق اليومية اكيد

تحياتى

[aimen]

[شريف مان]

لان عندنا وزير زراعة فااااااااااااااااسد ومستفيد من كل دا

واللى ساكتين عليه فاسدين ومستفيدين زيه

[المهندسه]

الطماطم فى الكويت ب دينار

يعنى 20 جنيه

عمار يا سعوديه

[سكر]

لما اشتري دجاجة ( فرخة ) بـ 35 لافاجا ان الدجاج المجمد انتاج البرازيل مالي المجمعات الاستهلاكية بسعر 22 جنيه للدجاجة فقط !!

ايوة ليه بقى مصر بتنتجها ب 35 والبرازيل 22 جنيه

مع العلم ان 22 شامل مكسب المستورد والمصدر ومصاريف الشحن

المفروض ان الظروف عالميه فى الانتاج

لو عرفت الاجابه اتصل على 0900