ايه احساسك بعد ما تقرأ الموضوع ده ؟

[raouf]

بدون اى كلام هاسيبكم مع بيتين الشعر دول عاوز اسمع احساسكم بعد قراءة الموضوع

أسيبكوا مع القصيده من تأليف الشاعر هشام الجخ.

شعور سخيف

إنك تحس بإن وطنك شيء ضعيف

صوتك ضعيف

رأيك ضعيف

إنك تبيع قلبك وجسمك

وإنك تبيع قلمك وإسمك

ما يجيبوش حق الرغيف

سألوا جحا عن سر ضحكه

قالك أصل اتنين وشبكو

اللى كان من تحت ميت

واللى كان من فوق كفيف

دا شعور سخيف

وشعور سخيف

إنك تكون رمز الشحاتة

تبنى مبنى للشحاتة

تعمل وزراة للشحاتة

يا ساقية دورى ... عدى فوقى ودوسى

نصبوا عليا وشحتونى فلوسى

ربطونى فيكى .. حتى ما اتغميت

هما اللى فرحوا ووحدى أنا اتغميت

أنا اللى صاحب البيت

عايش بدون لازمة

ولما مرة شكيت

إدونى بالجزمة

أنا اللى زارعك دهب

بتأكلينى سباخ

إن كان دة تقل ودلع

بزيادة دلعك باخ

لا شفت فيكى هنا

ولا شفت فيكى ترف

كل اللى فيكى قرف

كرامتنا متهانة

واللقمة بإهانة

بتخلفينا ليه لما انتى كارهانا

يعنى ايه تبقى إنتى هبة النيل يا مزة

وكل يوم المية تقطع

يعنى ايه لما اشتكى غلو الفاتورة

يقولو تشكى بس تدفع

لما قش الرز ثروة بتتحرق

وأما نفط الأمة ثروة بتتسرق

وأما جلادك على ولادك بيبطش

وأما علمك ما يلاقيش يآكل فيطفش

يعنى ايه نرفع ايدينا بالسلام لجل الغزاة

ويعنى ايه لما ابقى ماشى فى حالى اتشد اشتباه

يعنى ايه لما اتحبس أربع سنين حبس احتياطى

يعنى ايه مش حاسة بالعمر وغلاوته

بتصبى مر العمر ليه

دة انا كنت ح اوهب لك حلاوته

أنا عمرى ما أتأمرت

ولا حطيت شروطى

ومكان ما ترسى مركبك

بابنى شطوطى

أنا كنت جيشك لما مماليكك باعوكى

وكنت يوسف لما عشتى سنين عجاف

وضلوعى دى اللى فى معركة قادش حموكى

وشفايفى دى اللى ما بطلتش فى يوم هتاف

دة انا كل شبر فى أرضك اتمرمغت فيه

وكل يوم عشتيه

أنا اتغذبت بيه

بتكرهينى عيونك السودة

وأيامى اللى فاتت

مانتيش حبيبيتى من النهاردة

حبيبنتى ماتت

علا صوت أدانك جرس

فى الشدة صاحينلك

من امتى كانوا الحرس

هما اللى باقينلك

بعتينى علشانهم

وعنيكى معصوبة

ياهلترى خاينة

ولا زيى مغصوبة

كل الكلام اتقال

والشعر بقى ماسخ

والصبر علو جبال

والظلم شىء راسخ

وطن وغرقان فى النطاعة

كل شىء ريحته نطاعة

علمونا بالعصاية

ورضعونا الخوف رضاعة

علمونا فى المدارس

يعنى ايه كلمة قيام

علمونا نخاف من الناظر

فيتمنع الكلام

علمونا ازاى نخاف

وازاى نكش

بس نسيوا يعلمونا الاحترام

فمتزعلوش

لما ابقى مش باسمع كلامكم

وماتزعلوش لما ابقى خارج عن النظام

مستنى ايه من طفل ربوه بالزعاق

غير المشاكل والخناق

كل اللى بيقولك بحبك دول نفاق

أنا لما قلت لك بحبك

كان نفاق

الحب يعنى اتين بيدوا

مش ايد بتبنى وستميت تيت تيت يهدو

الحب حالة

الحب مش شعر وقوالة

الحب يعنى براح فى قلب العاشقين للمعشوقين

يعنى الغلابة يناموا فى الليل دفيانين

الحب يعنى جواب لكل المسجونين

هما ليه بقوا مسجونين

يعنى أعيش علشان هدف

علشان رسالة

يعنى احس بقيمتى فيكى

إنى مش عايش عوالة

يعنى لما اعرق تكافئيى بعدالة

الحب حالة

الحب مش شعر وقوالة

الحب حاجة ما تتوجدش فى وسط ناس

بتجيب غداها من صناديق الزبالة

بارت مراعينا والبئر قد جفَ

والجوع يكوينا والصبر ما كّفى

والقلب لا يهدا والجرح لا يشفى

ولأننا طوع

زنا لهم خفا

جاءوا بموكبهم

واشتغلت الزفة

الدفة مظبوطة

وأصلا مافيش دفة

والكفة مش مايلة

علشان مافيش كفة

و جحا اللى جاى بالليل لساه بيتخفى

شايف ديدان الغيط سارحة ومارحماشى

من جبنه شاف الدود سابه وراح ماشى

ولا اتكسف للناس

ولا حس على طوله

الناس عشمها كبير جريوا بيشكوله

ضحك جحا ضحكة مواشى

مادام بعيد عن طينى ... ماشى

الدود قاعد لك يا جحا ولابد فى طينك

بعد ما يمص فى دمانا مش حيحلاله الا طينك

احنا اهلك

احنا رجالتك

أمانك

إحنا وقت الشدة سندك

إحنا زادك

يا جحا احمى ولادك

لو كنت عايز تحمى طينك

سوف أرحل

ربما يلقانى من ارجو لقاه

هامشى ويا الشحاتين

وابكى على حلمى اللى تاه

بس مش هاشحت رغيف

هاشحت وطن لله

[sarmar]

بتكرهينى عيونك السودة

وأيامى اللى فاتت

مانتيش حبيبيتى من النهاردة

حبيبنتى ماتت

طبعا كل اللى ورد بهذة القصيدة نحن نعيشة فعلا ولكن احساسنا تبلد ومات بس صحى وانتعش وانتبة لما قال الشاعر مانتيش حبيبتى 00000 حبيبتى ماتت

لايمكن لمصر الا ان تكون حبيبتى وحبيبتك وحبيبة كل المصريين مصر اية ذنبها اننا نكرهها ومصر لايمكن تكرهنا لانها هيا احنا واحنا هيا

اما كل ماسردتة وعن ضروفنا وحياتنا الهباب فهى ليست من مصر بل من اللى ماسك زمام امور مصر من المصريين انفسهم مننا من نفسنا

اية اللخبطة اللى عايشينها فى مصر دى هوا فية اية لما الحاكم مش بيعمل انجازات ليش ماناخترش مصرى تانى وهو يروح لصفوف المواطنين طيب اذا كان هو واصل لعلمة من خلال اجهزتة انة احسن رئيس لمصر لية احنا مانوصلوش راينا بصراحة ونقولة عايزينة ولا لا ؟؟ واذا لم يستسلم لراى الناس اعتقد اننا ممكن نتصرف بامور بلدنا كويس اذا كان عندنا الاستعداد لان نحب مصر

مصر بتحبنا كلنا وعايزنا نكون صح عايزانا شعب صح وعلماء صح ومواطنين صح ورجال صح ونساء واطفال صح كل هذة الفئات هيا مصر لازم ننقذها لانها بتحبنا كلنا

[أبوعمار]

القصيدة حلوة

واللي كاتبها كلامه سلس ومعبر فعلا

بس زي ما قال sarmar

المشكلة مش مصر

مصر هي الأم اللي بتخلف

وبيطلع من ولادها الصالح والطالح

واذا كان فيه في مصر فساد وظلم

واذا كانت الأجيال الجديدة ماشية من سيء إلى أسوأ

فالمسئولية مشتركة وعلى رؤوس الكل

واذا احنا فعلا بنحب نفسنا وولادنا ومستقبلهم (بلاش أقول يعني إذا كنا بنحب مصر)

اذا فعلا عايزين نلحق نفسنا يبقى لازم بندأ العلاج فورا

واذا كنا مش عارفين العلاج ندور ع الطبيب

اللي يقدر يشخص المرض صح

ويوصف لنا العلاج الفعّال

احساسي بعد ما قريت القصيدة:

ازداد كرهي للظلم والفساد

وازداد حبي لمصر وخوفي عليها

من الدود اللي بينهش فيها

تقبل تحياتي

[شريف مان]

وطن وغرقان فى النطاعة

كل شىء ريحته نطاعة

علمونا بالعصاية

ورضعونا الخوف رضاعة

هيا دى الخلاصة

[raouf]

وطن وغرقان فى النطاعة

كل شىء ريحته نطاعة

علمونا بالعصاية

ورضعونا الخوف رضاعة

هيا دى الخلاصة

جامدين اوى البيتين دول يا شريف وخصوصا ورضعونا الخوف بالرضاعة

طيب مفيش حد ها يتفطم من الرضاعة بقى وينساها وينسى الخوف ؟

[Howayda Ismail]

انا اللى فيه دلوقت مش عارفة اوصفه بس والله دماغى بتوجعنى حاسة انها حتنفجر بوادر اكتئاب

وانهيار عصبى

عاوزة اخد اجازة من الدنيا كلها من الناس ومن بيتى وعيالى والمحاورات نفسى مخى يبقى هايف عشان

يقدر يلاحق على كل الهموم دى مافيش اخبار تسر لا فى جريدة ولاتليفزيون ولاحتى الشارع لما بانزل

الكل تعبان وشكوى شكوى البسمة اختفت من وشوش الناس واللى معاه بيشتكى اكتر من اللى معهوش

فساد ومحسوبية فى كل حتة بازعل لما حد يجاملنى ويمشيلى امورى عشان معرفة سواء فى مدرسة او مصلحة

وابقى كدابة لو قلت بارفض الخدمات دى بس بتعب لان غيرى ملوش معرفة ومصلحته واقفة

لامتى حنفضل كده نمشى بالمعارف والوسايط والرشاوى لو احتاج الامر. دماغى بقى شغال 24 ساعة

وانا فى المطبخ وانا فى شغل البيت حتى فى منامى طبعا كل ده بيخلينى مش عاوزة

اعمل اى حاجة ولا اكلم اى حد بارجع اعيش فى الماضى افتش فيه عن ناس زمان واخلاق زمان

حزنت لما شفت ذكرى العبور ورجالها والفرق بينهم وبين جيل خايب تايه مش عارف امه من ابوه

نفسى اصحى على ثورة تطهير فى البلد من كل السلبيات اللى فيها من اول الهرم من فوق

عشان الضحكة تتدخل قلوبنا من تانى عشان نقدر نشيل مسؤليات ولادنا وبيوتنا

بقينا نحمل الامور اكتر من طاقتها فى كل حاجة من كثرة الضغوط

سامحونى بس كنت محتاجة اخرج الكلمتين دول من جوايا بدل مانفجر

[عادل أبو عمر]

الاحساس يكمل لما نشوف و نسمع طريقة الإلقاء ... حاجة

http://www.youtube.com/watch?v=NbdFur1FTBI&feature=player_embedded

لما شوفت الحلقة في برنامج العاشرة مساء و كنت صراحة انطباعي مش كويس عن الشاعر ( هشام ) من طريقة كلامه

لكن لما قال القصيدة في نهاية الحلقة اتصدمت فعلا من كلام القصيدة ... حاجة صعبة جدا كلامها رائع و معبر لأقصى درجة عن احوالنا في مصر ...

القصيدة جميلة فعلا ... حاجة كدة زي قصايد عبد الرحمن الأبنودي ( فى خطابات حراجى القط العامل بالسد العالى )

تحياتي للجميع

أبو عمر

[raouf]

انا اول مرة اشوف الفيديو

الراجل القاؤه اكثر من رائع

بصراحة يخلى المستمع يبكى ويوضح معانى الكلمات بطريقة رائعة

ربنا يباركله بس قصيدتين زى دول والواحد ينتحر فعلا

[أبوعمار]

في قصيدة اسمها قطر الغلبانين لهشام الجخ

بتقول:

مزحوم يا قطر الغلبانين .. وحنشكي مين؟

واخدين على صوت الانين .. لينا سنين

متعلمين الطاعة .. من قبل الصلا

ويا إما نبقى بضاعة .. يا إما المقصلة

والجُبن وسط الجواعة .. قيمة مأصّلة

وآدي الحكاية مفصّلة.. بس اللي يسمع مين

[مصطفى يونس]

والله احنا الل بنعمل كدا فى نفسنا كل واحد فينا بيقول يلا نفسى ملناش دعوة احنا مالنا والكلام ده

اه يابلد عايزه ولد

[رضوي]

هشام الجخ شاعر صعيدي واعي ........... وله قصائد فعلاً بتوصف المعاناه اليومية للواقع المصري

هو بيتكلم في القصيدة دي مع مصر ......... بس في اعتقادي انه يقصد المسئولين في مصر ........... لأن مصر مفعول به مش فاعل

مصر مجني عليها مش هي الجاني .........

تحياتي

[shiko]

انا اللى زرعك ...دهب ...

بتأكلينى سباخ ...

ما ان كان ده تقل ودلع ما كفاية دلعك باخ

لا شوقت قيكى هنا ..ولا شوفت فيكى ترف ...

كل اللى فيكى قرف ....

كرامتنا متهأانة واللقمة بإهانة ...

بتخلفينا ليه لما انتى كارهانا ...؟؟