استفسار هام

[drhady]

السلام عليكم ورحمة الله وبركاته

انا خريج طب بشري دور يونيو 2010 جالي عقد عمل في السعودية اختصاصي تسويق وقمت بعمل الاتي

1- توثيق العقد من الخارجية

2- تغيير المهنة بالبطاقة الي اخصائي تسويق

3- تغيير المهنة في الباسبور اخصائي تسويق

4- شهادة خبرة لمدة 3 سنوات اخصائي تسويق موثقة من الشهر العقاري والخارجية المصرية

5- فيش وتشبيه

6- كشف طبي

7- بيان نجاح من الكلية يفيد ان الطالب فلان الفلاني نجح في الفرقة السادسة واعتمدت النتيجة من مجلس الكلية ولكنها لم تعتمد من مجلس الجامعة بعد ووثقتها من امين الجامعة والخارجية المصرية

وقدمت الورق ده كله الي السفارة السعودية ولكنه اترفض لانهم عاوزين المؤهل انا قولتلهم ان بيان النجاح يغني قالولي لأه طب دلوقتي الشهادة المؤقتة علشان تطلع قدامها شهرين تلاتة اعمل ايه ؟

ارجوكم افيدوني

[شريف مان]

انا خريج طب بشري دور يونيو 2010 جالي عقد عمل في السعودية اختصاصي تسويق

ان شاء الله الاخوة يفيدوك

بس معلش سؤال كده دكتور وهتشتغل فى التسويق ليه

[Mr MAGED]

أخي الفاضل

للأسف مش هتقدر تسافر بدون تقديم شهادة التخرج موثقة

ومعلهش برضه أنا بكرر سؤال شريف

هو انت طالع تشتغل أخصائي تسويق ليه ؟؟

ومن الواضح انك معندكش لسة خبرة في التسويق لأنك خريج جديد

وماشاء الله يعني .. الأطباء شغلهم كتير .. فايه السبب !!

[nightmare]

انت مستعجل على السفر ليه , انت دكتور , ايه اللى يشغلك في التسويق.

ما تصبر سنة او اثنين خد خبرة ولو تحضر دبلومة , وفرص السفر للأطباء على قفا من يشيل , وبمرتبات محترمة.

راجع نفسك يا دكتور

مع تحياتي

[drhady]

السلام عليكم ورحمة الله وبركاته اولا انا بشكر كل الناس اللي ردوال عليا ربنا يجعله في ميزان حسناتكم

انا اصلا الوظيفة الحقيقية الطبيب الخاص للشيخ عبد الله العثيم ولكن لطبيعة الشركة حيث انها اسواق معروفة في الرياض لا تستطيع استقدام اطباء فالتأشيرة طالعة اختصاصي تسويق

اما بالنسبة انا ليه عاوز اطلع دلوقتي فلاني متزوج ومحتاج اجيب شقة ولذلك عاوز اطلع دلوقتي وبالنسبة للتسويق انا اشتغلت فترة كبيرة اثناء الكلية في التسويق ولكن الوظيفة الحقيقية طبيب خاص

وشكرالكم جميعا

[Mr MAGED]

السلام عليكم ورحمة الله وبركاته اولا انا بشكر كل الناس اللي ردوال عليا ربنا يجعله في ميزان حسناتكم

انا اصلا الوظيفة الحقيقية الطبيب الخاص للشيخ عبد الله العثيم ولكن لطبيعة الشركة حيث انها اسواق معروفة في الرياض لا تستطيع استقدام اطباء فالتأشيرة طالعة اختصاصي تسويق

اما بالنسبة انا ليه عاوز اطلع دلوقتي فلاني متزوج ومحتاج اجيب شقة ولذلك عاوز اطلع دلوقتي وبالنسبة للتسويق انا اشتغلت فترة كبيرة اثناء الكلية في التسويق ولكن الوظيفة الحقيقية طبيب خاص

وشكرالكم جميعا

أخي الفاضل ... كلنا متفهمين تماما الظروف اللي بتمر بيها

لأن كلنا بلا استثناء تقريبا مرينا بيها

لكن أدعوك للتروي وعدم التعجل بدافع الحاجة والظروف

الشقة والعربية والحاجات دي جاية جاية ان شاء الله بس لازم نفكر

انت طالع طبيب خاص وانت لسة متخرج !! يعني هتسيب التكليف بتاعك

ومش هتاخد أي شهادة علمية تساعدك في الكاريير بتاعك ..

ومش هيكون لك وظيفة في مصر لما ترجع ان شاء الله

وطبيب خاص معناها انك مش هتمارس الطب ولا هتعرف حاجة عنه

أخرك هتعلق محاليل وتقيس الحرارة وتدي حقن

اعذرني بس هيا دي الحقيقة .. انا أعرف الشيخ عبدالله العثيم شخصيا

وأعرف عنده كام طفل ومتزوج كام واحدة .. يعني لو كل عيل منهم كح مرة مش هتلاحق

ومش هيكون عندك وقت لأي حاجة .. ومش هتسفيد علميا ً من أي شيء

وبالتأكيد هو عارف كده عشان كده جاب طبيب لسة متخرج وصغير

وبالتأكيد هو لما يتعب بجد ويحتاج دكتور مش هيناديلك .. أكيد هيروح مستشفي كبير أو يجيب دكتور كبير

وحتي لو انت بتتلكم عن الاستفادة المادية .. ماظنش ان الراتب اللي انت طالع عليه هيأمنلك الموضوع ده

احسبها كويس ... لو فضلت تشتغل معاه لمدة 3 أو 4 سنين هتحوش كام !!! وهتبقي ايه !!!!!

ولو فضلت في مصر لمدة سنتين .. وخدت التكليف وخدت ع الاقل دبلومة .. وطلعت بعد كده هتطلع علي كام

وفوق كل ده هتكون طالع دكتور بجد ... مش طالع طبيب خاص !!!

أنا أسف لو كلامي مش علي هواك .. بس انت زي أخويا الصغير واتمني ليك الخير

واتمني انك متستجبش لمعسول الكلام اللي بيحاولوا يقنعوك بيه

تمنياتي لك بالتوفيق

[drhady]

السلام عليكم

بجد انا بشكر حضرتك جدا علي ردك وافدتني كتير ربنا يجازيك خير يارب