وأنا صغير..وأنا صغيرة...

[لماضة مصرية جدا]

السلام عليكم و رحمة الله و بركاته

حلو اوي موضوع و انا صغيرة....(طب ما احنا لسه صغيرين..... :lol: )

زمان و احنا صغيرين كان عندنا قدرة ع الدهشة...و صياغة الدهشة في اسئلة في منتهي البساطة...دلوقتي مساحات الدهشة بقت ااقل و بقينا نظن ان احنا نمتلك اجابات لكل الاسئلة

خدي بقي عندك يا دامو....مع اني معاكي جدا في موضوع رش الميه من البلكونات....(اينعم انا دور ارضي...يعني ملتحمة بالجماهير بس مسدس الميه كان زي صوابع ايدي عمري ما فارقني

حكاية البرص و تحوله الارتقائي الي تمساح....او التمساح المتنكر في زي برص قزم....دي برضه من ابحاث الطفولة المشردة)

و انا صغيرة:

1- كنت معتقدة اني لما اخد الدوا بتاع السخونة اسخن.....طفلة نابغة من يومي...(وش اي عيل عبيط)....و عشان كده كنت يوم الاحد داميا غياب من المدرسة....كنت دايما بسخن....و دايما باخد الدوا بطريقة عكسية؟؟

2- بحب ااقلد صوت الضفادع....مش عشان صوتها حلو....لا عشان بعرف اعمل صوتها و بفتكر انها بتكلمني و خصوصا لما بنبقي في الكورنيش و الدنيا ضلمة

3- مع كرهي الشديد للمستشفيات...تخيلت ان البنج هو الديتول او الكلوركس اللي بينضفوا بيه جوه العيانين

4-ماما دايما كانت تقول اللي بيضحك في الضلمة العفريت يركبه....عفريت ايه بس....انا و اخويا كنا بنجيب الشموع و بعدين نعمل خيال ضل ع الحيطة و نفضل نضحك فيه...و مافيش اي عفاريت ركبتنا....غير....(عفركوش و شمهورش و الاشكيف... :lol: )

5- بابا جاب الفوطة بتاعت الايدين و في حركة تثبيت اكتاف من اخويا....صاحب واجب طول عمله....نزل لي كل صف سناني القدامنين الملخلخين....علي اعتبار اني لازم الصبح اغني نشيد الصباح...."يا شمس يا شموسة خدي سنة الجاموسة...قصدي...العروسة)...و لازم احط السنان تحت المخدة و اصحي ارميهم في ام عين الشمس :blink:

6- و انا صغيرة كنت بحس ان كل حاجة بتكلمني.....يعني الدباديب....بنس الشعر...الشوزات....الفساتين....بس هي بيبقي ليها لغة خاصة بيها....مش لازم اردبس كنت عارفة انهم بيكلموني

7- كان لازم اغطي الدبدوب و ينام جنبي (و لغاية دلوقتي الحقيقة :rolleyes: )...و احيانا ممكن هو يتغطي و انا لا....مصدقة جدا انه ممكن يكون بردان

و انا صغيرة لما كانت تيجي لقطة في التلفزيون ان الشباك يترزع....و الريح تبقي جامدة موووووت....البطلة بعديها تعيط...ابص لاخويا و في نفس واحد نقول يبقي "حامل"

و انا صغيرة كنت متاكدة و مقتنعة جدا اني لازم اتجوز بابا....و بعدين ابقي اشوف اي حد تاني اتجوزه....بس بابا الاول

و انا صغيرة ماما عشان ننام...كانت بتقول اللي مش هينام هيطلع نقار الخشب ينقره....الاوضة بتاعتنا كانت باركيه....انا و اخويا كنا نستني طول الليل نقار الخشب دوت....و احيانا نحط ليه حتة عيش من تهريبة ساندوتش و كده

اتهيالي انه حاجة كده في حجم النعامة و مليانة ايدين.....و بعيدن مرة جه في التلفزيون...طلع حاجة مسخرة خالص

استكملا لمسلسلات الرعب بتاعت تخويف الطفال الابرياء....في المدرسة كان عندنا ناظرة شديدة جدا اللي بيعمل حاجة غلط بتقوله هنحطك في اوضه الفيران

و العيال اصحابي نقعد ندور هي فين هي فين....و رسينا يف الاخر انها تحت السلم....كنت مقتنعة تماما ان الفيران دي مبتخوفشي....مش فيه "جيري" اللي بيضرب توم ع قفاه....يبقي اكيد لو قعدنا في اوضة الفيران...هنلعب لعب.....بس عمري ما جربتها wst::

و انا صغيرة....كنت مقتنعة جدا ان اللي يقولي...."انا اعرف بابا و ماما"....يبقي فعلا يعرفهم....و اتعرضت للخطف....او محاولة يعني كده...و تقريبا المجرم الشرير...(اللي اكيد دلوقتي تاب و اناب الي الله...بعد ما اكلت ودانه من الرغي)....وقعه حظه التعس في اختياري كضحية....بس لما قالي الجملة السحرية....فعلا كنت مصدقاه

كنت فاكره الدنيا كلها تعرف بابا و ماما...انتو متعرفهومش...(وش عيل واقف و حاطط ايديه في وسطه)

و انا صغيرةكنت بحب اخد الحاجات بالشقلوب....لاني مكنتش فاهمة معني المعدول....يعني الزوجليقة من تحت لفوق...مش زي الاطفال الطبيعين....المخدات ع الارض و راسي ع الارض و رجلي ع السرير....طول عمري اقعد اخر الكلاس...مع انهم بيقولوا الشطار قدام

محدش قالي ايه المعدول.....فالشقلوب كان بالنسبة ليا احلي....و تقريبا دي الحاجة اللي كملت معايا

و انا صغيرة حياتي شفت الزحاليق بالشقلوب....و لما كبرت...حبيت حياتي برضه بالشقلوب

و انا صغيرة....

و انا صغيرة

و انا صغيرة

حاجات كتير اخدناها معانا.....و فضلت جوانا.....و بنقول يا تري ولادنا هيبقوا بالعته ده....و لا هيبقي ليهم دنيا بطعم الفانيليا و سما بشقاوة الشيكولاته

دامو.......احنا هنفضل طول عمرنا....."و انا صغيرة"

مسااااكي......فرحة...عربية هامر,,,, لونها موف يا دامو....موف....انا خلاص قربت انتحر من الصياعة بتاعت العربيات اللي بشوفها

فوتك بعافية

[yasser moustafa]

انا بقى كانت ذاكرتى حديدية لدرجة انى كنت فاكر يوم زواج والدى ووالدتى ... آه امال انتو فاكرين ايه

وحضرت الفرح كمان وكنت بوصف لـ ماما كانوا جالسين ازاى فى الكوشة وبعض التفاصيل الأخرى

كمان وانا فى ابتدائى ... جاتلى الشجاعة واعتقدت ان صوتى جميل فى تلاوة القرآن الكريم، لدرجة انى سجلت شريط كاسيت لجدى - طبعا بناء على طلبه والحاحه الشديد

mfb: mfb: ما حدش يشتم ... سمعك منك له، وعارف اسمك ثلاثى كمان

[اغابي]

ما هو اخر رقم؟؟؟؟؟؟؟؟؟؟

وأنا صغيرة قررت اكتشف ايه هو آخر رقم

ومامتي شجعتني وجابتلي كراسة مخصوصة للبحث بتاعي :closedeyes:

يعني خيالات الاطفال قد تكون متقاربه......................

فعلا - خيالات الاطفال كلها متشابهة جدا

وكمان الاطفال بتساعد بعض على التسلق الخيالى بمعنى

داه يقول قصة من خياله ولو فى طفل تانى يؤكدها ولو فى طفل تالت يضيف كمان عليها كتسلسل

ولو تركز مع الاطفال تلاقيهم كلهم ماسكين فى موضوع واحد ووهمى

وكمان عمالين يجمعوله اجزاء علشان الحبكة الدرامية

تحياتي للجميع

اغابي

[engmido]

كان زمان بيقولولى

ان اللى بيقرقض ضوافره ...بعد شوية بفتحوا بطنه يلاقوها مليانة ضوافر اااااااااد كده

مع انى مكنتش بابلعها اساسا

هههههههه

[تامر مصطفى]

موضوع اكثر من رائع

خصوصا واني دايما احن للماضي ودايما افتكر ايام الطفولة واتمنى انها ترجع تاني

وهحاول اتذكر معاكم خزعبلات الطفولة

وانا صغير كانت والدتي دايما تقولي كل الرغيف كله علشان ميجريش وراك يوم القيامة

وانا في كل مرة اسرح بخيالي واتخيل حوالي عشرين رغيف طالع لهم رجلين صغيرة وانا منطلق بأقصى سرعة وهما ورايا

بس في مرة فكرت لو وقفت هيعملوا ايه يعني؟؟

وانا صغير كنت صاحب نظريات واكتشافات

فأكتشفت ان الانسان بيكون في بداية حياته كبير وبعدين بيصغر والسبب في الاكتشاف ده ان كان لينا جار صديق والدي قصير جدا فكنت متخيل انه صغر وكمان كام سنه هيبقى أدي

وطبعا من ضمن التحليلات طرحت تساؤل ونجحت في الاجابة عليه

الا وهو طيب ليه انا مش فاكر حاجة من ايام ما كنت كبير؟؟؟

وبسرعة وضحت لنفسي الامر وطلعت بنتيجة وهي ان الانسان بينسى الاحداث اللي حصلت لما يصغر

وانا في سن ال5 سنوات كنت نفسي افضل سهران ومنامش علشان اشوف مين الرخم اللي بيجي بالليل يدلق علياميه وانا نايم لدرجة اني بقوم غرقان md2:

لما افتكر حاجة تاني ارجع اقولكم عليها علشان لسه عندي كتييييير

اكمل بعض الذكريات

وانا في اولى ابتدائي كنت متفق مع بابا في السر اني اكمل دراسة لغاية ثالثة ابتدائي واطلع من المدرسة

وهو كان موافقني جدا وفي الاخر اكتشفت انه كان بيضحك عليا

اللي جاية دي بقى سر من اسرار حياتي ومحدش يمسكهالي ذلة

وانا في تالتة ابتدائي كنت لسه متفرج على توم وجيري بالليل وكانت حلقة فيها قط اسود بيتحدى توم على حب قطة بيضا جميلة

والقط الاسود مسك القطه وحط ايده على شعرها وكلمها بصوت تخين شوية

تاني يوم دخلت الفصل لقيت في اول دكه بنوته قاعدة رحت متقمص شخصية القط الاسود وعملت زيه وتخنت صوتي وكلمتها

المصيبة بقى ان في عيال شافوني ومسكوهالي ذلة طول السنة وبقيت أعملهم خدمات علشان ميقولوش للأبلة

وانا في المرحلة الابتدائية كنت باسمع نكت عن واحد سأل الكمبيوتر سؤال خلاه طلع نار

وفضلت مقتنع ان الكمبيوتر بيعرف كل حاجة في الدنيا

واول كمبيوتر قعدت ادامه سنة 89 وكان وقتها اختراع يخوف اول حاجة كتبتها عليه كان سؤال "انا مين" بالرغم من ان كان عمري 15 سنة بس كنت مقتنع بالموضوع ده من صغري

وانا صغير كنت لما اشوف معاق راكب اي حاجة بعجل اتخيل ان دي وسيلة مواصلات وافكر اني لما اكبر ابقى اشتري واحدة زيها وخصوصا العجلة ام 3 عجلات وبدال في الايدين

لما افتكر حاجة تانية اكمل

[drTOTA]

موضوع اكتر من رائع على فكرة

انا واخويا واحنا صغيرين كنا فاكرين ان المذيعين قاعدين جوة التليفزيون, وعليه, كنا طول النهار قاعدين جنبه على الترابيزة كل واحد من ناحيه وعمالين ( نلغوش) عليهم لما زهقناهم بصراحة

نفس الكلام للرسايل المسجله على التليفون, كنا نطلب اى رقم غلط وننزل تهزيئ فى الست الى بتقول هذا الرقم غير موجود بالخدمه او نقولها نكت عشان تتلخبط وأخر مانزهق نقولها انتى معندكيش دم صحيح

لى عودة لو افنكرت حاجه تانبه ان شاء الله

[SoSo R]

دامو بجد موضوع روعة ...و قبل ما أكتب أى حاجة فى الذكريات إسمحيلى أحط الأغنية دى

بصراحة من حلاوة الأغنية دى و جمالها و الدموع اللى بتنزل لما باسمعها كنت ناوية أفتح لها موضوع جديد فى الفنون

مش عارفة اللى ألفها إزاى عرف يضبط كل الحاجات الحلوة دى؟!!!

المهم إسمعى يا ستى

http://www.youtube.com/watch?v=ErMnV1b0Z78

[Damo]

6- و انا صغيرة كنت بحس ان كل حاجة بتكلمني.....يعني الدباديب....بنس الشعر...الشوزات....الفساتين....بس هي بيبقي ليها لغة خاصة بيها....مش لازم اردبس كنت عارفة انهم بيكلموني

وأنا صغيرة كنت مقتنعه ان كل حاجة بتتكلم من ورانا وكذا مرة أحاول اقفشها. ومرة كنت قعده بازازة 7UP وبقولها : "أنا عارفه أنك بتتكلمي. قوليلي ومتخافيش أنا مش هأقول لحد . أنا بحذرك. قوليلي يا أما مش هيحصلك كويس. يعني مش عايزة تقولي ؟ ماااشي" ورحت هوب لسه هعض البوز بتاعها ونسيت انها لسه مليانه رحت شرقت :sad: بعدين قلت :" بقى كده ؟؟ طييييييييب حسبي معاكي بعدين"

انا بقى كانت ذاكرتى حديدية لدرجة انى كنت فاكر يوم زواج والدى ووالدتى ... آه امال انتو فاكرين ايه

وأنا صغيرة خاصمت بابايا ومامتي يوم عشان مش عزمنوني على فرحهم

انا واخويا واحنا صغيرين كنا فاكرين ان المذيعين قاعدين جوة التليفزيون, وعليه, كنا طول النهار قاعدين جنبه على الترابيزة كل واحد من ناحيه وعمالين ( نلغوش) عليهم لما زهقناهم بصراحة

بابايا وهو صغير كان بيعتقد ان الممثلين والمذيعين وشخصيات الكرتون بيستنوا بليل لما كله ينام بعدين يطلعي يلعبوا في الصالة

دامو بجد موضوع روعة ...و قبل ما أكتب أى حاجة فى الذكريات إسمحيلى أحط الأغنية دى

بصراحة من حلاوة الأغنية دى و جمالها و الدموع اللى بتنزل لما باسمعها كنت ناوية أفتح لها موضوع جديد فى الفنون

مش عارفة اللى ألفها إزاى عرف يضبط كل الحاجات الحلوة دى؟!!!

المهم إسمعى يا ستى

http://www.youtube.com/watch?v=ErMnV1b0Z78

بدون مااسمحلك ولا حاجة مدام سوسو...الموضوع موضوعك :rolleyes:

[مسافر زاده الخيال]

بخصوص الكومبيوتر.........اول مره اسمع الكلمة دي من عمي اللى جاي اجازة من اميركا وكان الكلام دا تقريبا 82 او 83

طبعا كان يتكلم مع الوالد وانا كنت باسمعهم..........وكنت خايف يعني جهاز يعد ويتكلم ويطلع صوت!!!!!!!!!!

فسالته يعني ايه كمبيوتر ؟؟؟؟؟؟؟؟؟؟ فقال زي الجهاز اللعبه اللى عندكم((كان عندنا جهاز اتاري العائلة بدون اشرطة هي 10 العاب بالعدد ويد الكترونية وحده بس تشبه الميكروفون وكنت اظن انها نوع من الفيديو)) المهم ابويا قاللي- انبسط عندنا كمبيوتر- وبقينا فرحانين اننا متطورين واصحاب تكنولوجي....لكن مره شفت مشهد تمثيلي في (افتح ياسمسم) عن اطفال يتكلمو مع الكومبيوتر ويكلمهم يسالوه ويجاوبهم ....فاعتقدت ان دا الكومبيوتر بتاع الكبار وان يكاد يعلم الغيب !!!!!!!!!!!! واول كمبيوتر حقيقي اشوفه في عام 86 في بيت خالتي وكنت خايف المسه حتى!!!!!!!!!!! ايام

الان ولد ابن خالتي اللى في الكي جي بيعرف عن الانترنت والكمبيوتر احسن مني مليون مره.............

[عبير يونس]

كنت غاوية كولمبو اوي

قبل كونان طبعا :lol:

و كان دايما معايا نوتة صغيرة اسجل فيها ملاحظاتي عن اي حاجة مريبة تحصل ادامي

dtcv:

ياه بقى على رحلة الهرم في ابتدائي

كنت فاكرة اني حأكتشف آثار:ninja:

و لا رحلة الفيوم

كنت عايزة اكتشف كنوز قارون المدفونة في البحيرة:blush2:

لحد الجامعة كنت فاكرة المية السخنة اللي بتطلبها القابلة في افلام لم تكون الست بتولد ان حيحطوا فيها البيبي اول ما ينزل

:blink:

كنت فاكرة ان آخر البحر على مدى الشوف مفيش حاجة و ان اللي يروح لحد هناك حيقع من على الحرف

قعدت فترة كبيرة اقرأ لما يكون في حلقات مسلسلة ملخص ما نشر على انها "منشر"

كنت بأقرأ كلمة زيت الخروع الخرووووع

و كلمة لانجويج language لانج يوش

نبيهة من يومي -_-

كنت مولعة بالقراءة من و انا في رابعة ابتدائي و كنت بأقرأ كتب د مصطفى محمود و أنيس منصور

كان عاجبني اوي كتاب لعنة الفراعنة

من يومي بحب الاسرار و العوالم الخفيةbag):

كنت فاكرة اني لو حد بيموت ممكن بسرعة قبل ما يموت اقتل نفسي وآخده في حضني يقوم روحي تدخل في جسمه و ميموتش

لما افتكر حاجة تاني حقول

[cup cake]

و انا صغيره مره اصحابى سالونى اسم مامتك ايه؟فرديت و كلى ثقه ماما اسمها ماما هيكون ايه يعنى و فضلوا العيال يضحكو عليا علشان مش عارفه اسم مامتى و انا مصره ان ماما اسمها ماما و ملهاش اسم تانى

ماما كانت دايما تقولنا ان اخر معلقه فى الطبق هى الى فيها البركه علشان نخلص طبقنا

و انا صغيرة كنت مقتنعه اقتناع تام ان المكرونه بتتزرع و مكنتش مصدقه انها بتتصنع ابدا

اما عن سوس الاسنان فكنت معتقده انه حشرات صغيره لونها اسود بتاكل الاسنان و لو اكلت حلويات كتير و مغسلتش اسنانى هياكل كل اسنانى و هبقى زى جده من غير ولا سنه(كنت معتقده ان اسنان جدى اختفت بسبب السوس)

كان عندى هوس غير معقول ببطل جرينديزر و كنت مقتنعه انى هتجوزه لما اكبر

كمان كنت معتقده ان النجوم الى فى السما دى هى الناس الى ماتوا و دى روحهم تحولت لنجمه

كان نفسى و انا صغيره اروح مشوار ايه هو المشوار ده و شكله ايه مكنتش عارفه بس كنت عايزة اروح واحد زى بابا

كنت عايزة ابقى بنت البقال علشان اكل حاجات حلوة زى ما انا عايزة من غير ما ادفع حاجه

[mekkawy]

طبعا زى ما قالت ضحى كان عندى اعتقاد ان البرص بعد لما بيموت ديله بيفضل عايش بس بيكبر تانى لغايه ما يبقى برص جديد

و هو مش بيفضل عايش صحيح و يبا برص تاني ؟ :blink:

مكاوى .. تساؤلات

[Howayda Ismail]

على ما يبدو إننا وإحنا صغيرين إتربينا في بيت واحد

لإن مُعظم الأوامر العُليا دي كنا بنتلقاها من القيادة .. خصوصاً بتاعت الشمامه هاتشمك دي ..

بس من الأقوال المأثورة برضوا وإحناصغيرين : ماتاكلش لب سوري عشان مايعملش دودفي بطنك..

- للبنات بقى : ماتكنسيش البيت بالليل عشان الملايكة بتضايق

- جُملة كرهتني في شم النسيم واللي نسموه : إصحى يا سين سين لغنك لو نمت يوم شم النسيم يبقى هاتفضل وخمان وكسلان طول السنة لحد شم النسيم الجاي .... منتهى الرعب

حضرتك منين بالضبط

على كده طلعنا اخوات اصله نفس الكلام بالملى كان بيقولوا لينا واحنا صغيرين

واحنا طبعا كنا بنصدقهم يمكن بنقول حاجات منه لاولادنا دلوقت خصوصا حماية العيد

احسن الشمامة تيجى تشمكم واللب السورى اللى رجع موضة تانى

[pink rose]

موضوع زي السكر يا دامو

و انا صغيرة كنت بخاف اوي لما جدو يقولي " عارفه يا ريم لو ما قعدتيش ساكتة هابيتك في جلدك"

يالهوي هابات في جلدي يادي المصيبة اقوم فورا احترم نفسي و اقعد

و انا صغيرة كانوا دايما يقولولنا ما تاكلوش و انتوا واقفين لحسن الاكل ينزل في رجلكم

و كمان لازم نغسل بؤنا قبل النوم عشان الشمامة ما تجيش تشمنا

و انا صغيرة كان في كرتون بتاع روبي الدبدوب اللي بيركب عربية بتطير كانت امنية حياتي اجيب عربية بتطير smk:

و انا صغيرة كان عندنا بطانية بتاعتي و انا بيبي و كانت لها شراشيب من الاجناب كده كل ما افتح الدولاب و الاقيها افتكرها ايد عفريت عاوزة تمسكني اقفل الدولاب و اجري استخبى في حضن ماما

اللطيف ان البطانية دي عندي لحد دلوقتي اخدتها من ماما لما ولدت مريم و كل ما اشوفها افتكر الهبل و اضحك :happy:

الحاجه اللي بجد مسخرة بقى و انا صغيرة كان نفسي افهم هما ازاي بيزرعوا المكرونة اشكال مختلفة كده :blink:

مصرية مغتربة تصدقي بالله انا لحد دلوقتي ما اعرفش المايا السخنة دي بيعملوا بيها ايه لما تكون الست بتولد :lol: :lol:

و انا صغيرة كانوا بيقولولي لما البرص يموت و ديله يتقطع الديل دا مش بيموت و يفضل يجري بعيد لحد ما يطلعله برص تاني و يرجع يعض اللي موته و لحد دلوقتي باترعب من البرص دا

و انا صغيرة بابا ضحك عليا و قالي ان اللي في بطن ماما دا ولد و هانسميه محمد و خلاص بقى فضلت انا و اختي مقتنعين انه محمد و يالهوي على العياط اللي عيطته لما عرفت ان ماما جابت بنوته و قعدت اقول لبابا فين محمد فين محمد

بس الحق يقال لما شوفت اختي اتوهمت بيها كانت اجمل بيبي شوفتها في حياتي كلها ما شاء الله عليها ربنا يحفظها :wub: :wub: :wub:

لو افتكرت حاجه تانية هاجي اكتبها

[Damo]

طبعا زى ما قالت ضحى كان عندى اعتقاد ان البرص بعد لما بيموت ديله بيفضل عايش بس بيكبر تانى لغايه ما يبقى برص جديد

و هو مش بيفضل عايش صحيح و يبا برص تاني ؟ :blink:

مكاوى .. تساؤلات

ديل البرص ده بينفصل عن الجسم عشان لما ييجي يهرب من أي حاجة ممكن تمسكه من ديله ... ولما ديله يعقد يتحرك كده بيشغل العدو في الديل عشان بفتكر انو حاجة صاحيه.

بعدين البرص يطلعله ديل تاني . لكن عمر الديل مايطلعله برص :blink:

[pink rose]

ما شاء الله مش ملاحظين ان الكل عنده نفس الاعاقة الذهنية wst::

[عبير يونس]

مصرية مغتربة تصدقي بالله انا لحد دلوقتي ما اعرفش المايا السخنة دي بيعملوا بيها ايه لما تكون الست بتولد :lol: :lol:

:blink:

و ده سؤال برضه

طبعا بيعملوا بيها شاي للبيبي

[مغتربة]

دا كلام

يعنى تلعبوا من غيرى كدا

طيب مش لاعبه

مش عارفه قعد اعطر مخى و شغلت البروجرام على اعلى حاجه

و برضه مفيش

طفولتى كده كانت حاجه عاقله و رزينه و تتحلى بالوقار

طبعا قبل ما التلات تربع يضربوا دلوقتى

لا بجد عمركم شوفتوا طفل برىء فى ابتدائى بيحب يتفرج على نشرات الاخبار

كنت فى تالته ابتدائى لما احداث الامن المركزى حصلت و كنت متبعاها بشغف سواء فى الجورنال او الاخبار او انى اقعد اسمع الكبار بيقولوا عليها ايه

مش عارفه دا صح و لا غلط بس عمر اهلى ما خوفونى بحاجات كدب

لكن كان دايما الكلام لازم نغسل ايدينا علشان نكون نضاف و ربنا يحبنا و حاجات من هذه القبيل

و انا فى ابتدائى كنت بموت فى القراءه و بقرا فى كل حاجه و لو قريت حاجه اكبر من سنى كنت بروح لماما تبسطهالى

و كنت بحب قوى اتفرج على الافلام الاجنبى و اقرا الترجمه بنفسى عمر ما حد قرهالى و كنت بغيظ صحابى فى الفصل الى كانوا لسه اهلهم هما الى بيقروا لهم القصص او ترجمه الافلام بان انا بعمل دا لوحدى

و انا صغيره كنت بجمع البنات فى الفسحه و افعد ادربهم علشان نعمل استعراض على اغنيه معينه و اعمل لصحابى فى الفصل مسابقه فى المعلومات العامه ( على قدى طبعا ساعتها ) و كنت بجيب لهم الجوايز من مصروفى

كنت باهتم بحاجات غريبه و ياما قعدت كتبت مقالات لما حصل غزو الكويت و لما افتكر دلوقتى اد ايه انا كنت متعاطفه معاهم و بدو على اخبار الموضوع من التلفزيون للجرنال بستغرب قوى

من اول ما اتعلمت قرابه الجورنال كانت صفحه عبدالوهاب مطاوع شيىء مقدس عندى كل يوم جمعه طبعا لانى كنت بشوف اهتمام الى فى البيت بيها صحيح مشاكل كتير ساعتها مكنتش بفهمها لكن كنت بحب اسمع المناقشات الى كانت بدورر بين الكبار عنها قدامى

كان مسيطر هلى تفكيرى موضوع ان الجماد بيكلم بعضه و ان احنا بمجرد ما بنسبهم فى الاوضه و نخرج بيتكلموا مع بعض (و لسه لغايه دلوقتى بفكر كدا على فكره )

باختصار كنت بفكر بطريقه اكبر من سنى ساعات بحس ان دا ميزة و ساعات بحس انه عيب لانى متمتعتش بسذاجه الطفوله كما يجب

انتوا ايه رايكم

[MaYousof]

[...] بعدين البرص يطلعله ديل تاني . لكن عمر الديل مايطلعله برص :blink:

أنا بجد مش مصدق نفسي .. بجد .. إزاي ده ممكن .. إزاي الدكتورة دامو .. اللي شرحت للمنتدى كله بطريقة سلسة لأبعد حد وبالدليل العلمي إن اللون الأصلي للحمار المخطط هو اللون الأسود .. إزاي ممكن يكون عندها النظرة الدونية دي لديل البرص

يا أستاذتي الفاضلة .. لازم حضرتك تعرفي إن زي ما البرص اللي بيفقد ديله بيطلعله ديل تاني بداله .. الديل اللي بيفقد بُرصُه بيطلعله برص تاني بداله

وفي واقع الأمر ده بيعتبر طريقة من طرق التكاثر عند السحالي بوجه عام ..

اسمها الانقسام الميتوزي السحلوي للخلايا الحيوانية .. بينقسم فيها البرص (أو السحلية بوجه عام) إلى جزئين منفصلين .. جزء عبارة عن برص بدون ديل وجزء عبارة عن ديل بدون برص .. وبعدين ينمو ديل جديد للبرص وبرص جديد للديل من نفس الحيوان الواحد ..

الموضوع مش أعجوبة يا دكتورة بالعكس .. ده أساس بيولوجي موجود في حيوانات كتيرة .. لاحظي حضرتك مثلا إن بيضة الفرخة كائن حي بسيط التركيب وحيد الخلية .. ومع ذلك بينمو لحد ما بيصبح فرخة كاملة .. أهو البرص اللي من غير ديل زي الفرخة تمام (لاحظي إن الطيور والزواحف فيه بينهم صلة قرابة) .. الفرخة كائن حي متكامل التطور .. وبيطلع منها بيضة .. والبرص اللي من غير ديل برضه كائن حي متكامل التطور .. وبيطلع منه ديل .. وفي الوجه المقابل للعملية دي .. البيضة كائن بسيطة وحيد الخلية .. وبيطلع منها فرخة كاملة .. والديل اللي مالوش برص كائن حي أكتر تعقيدا من البيضة .. لأنه على الأقل متعدد الخلايا (حيوانية وعصبية) .. بينمو وبيطلع منه برص كامل بعد كده

أرجو إني أكون وضحت لحضرتك الصورة وقدرت أقنعك

وتحياتي لحضرتك على الموضوع الجميل .. ولكل المشاركين حتى الآن وعلى رأسهم مادام سوسو راني

[شريف مان]

بما ان الموضوع اتقلب لعالم الحيوان وحلقة النهاردة عن البرص

فمن فترة شفت واحد متخصص فى الحيوانات يعنى بيصطاد أفاعى وعايش معاها وعنده حديقة حيوان مصغرة

المهم كان بيتكلم عن البرص

فقال ان فى اوروبا البرص ليه احترامه :ninja:

وموجود فى كل بيت .. لانه بالنهار بياكل العنكبوت والصراصير والنمل ..... وبالليل زى الشاطر بيطلع ينام على السقف

يعنى بديل للمبيدات الحشرية :D

تم تعديل 13 أكتوبر 2010 بواسطة شريف مان