مدرس فقأ عين تلميذة - هـو فيـه ايـه ؟؟

[اغابي]

مسلسل اعتداء المدرسين على الطلابة او التلاميذ - بقى احدث موضة - زمان ومدرسين زمان كان يكفينا منهم مجرد النظره

هل هو خلل فى منظومة التعليم ككل - ام الخلل فى المدرسين انفسهم - ام خلل فى تربية الطفل

؟؟

انا اتكلمت فى الموضوع داه قبل كدا واتناقشنا كتير - وكتير من المدرسين على المحاوارات رفضو التعميم على ان كل المدرسين

ممكن ينطبق عليهم انهم غير مؤهلين ذهنيا وعقليا ونفسيا - انهم يتعاملو مع الطفل

الاطفال يا جماعة

محتاجين ليونة فى التعامل ودبلوماسيه - لانهم اذكياء وحساسين ومكارين - لو انت كمدرس شايف انك

مش حتقدر على ممارسة مهنة التدريس دى لانها تختلف عن اى مهنة - يبقى مارس اى مهنة اخرى .

بالمناسبة

الاسبوع اللى فات الميس رفضت انها تسمح لابني انه يروح الحمام ولغاية دلوقتى مش فاهمة حجتها ايه - ما علينا

وعلت صوتها علي ابني - وفضل الولد يبكى طول الحصة لانه فعلا عاوز يروح الحمام مش بيكذب - وهو صوغير جدا - 4.5

مع العلم انها المدرسة محترمة ومشهورة جدا وثنائية اللغة ( انجليزي وفرنساوى ) ومدرسين اغلبهم اجانب

وانا روحت للمدير العام - مش حاقولكم عملت ايه فيه وفيها وفى المدرسة كلها - وازاى اوصف انى طلعت من اعصابي

لمجرد انها رفضت تسمحله يروح الحمام وتصرخ فيه بالطريقة دى - وهو بيبي كدا

ما بالكم اهل الطفلة دى يعملوا ايه

كان الله فى عون والديها

عموما

الخبر داه مش اول خبر نسمعه

ومش اخر خبر - لانه حيتكرر كتير

اليكم الخبر

مــدرس فـقأ عيــن تلميــذة

الأقصر (مصر) - «الراي» |

فقأ مدرس عين تلميذة في الصف الأول الابتدائي بسبب خروجها من الفصل للشرب.

وكانت التلميذة ريم.ج (7 أعوام) شعرت بالعطش أثناء وجودها في الفصل الدراسي بإحدى مدارس محافظة الأقصر الابتدائية (611 كيلو مترا جنوب العاصمة المصرية)، وعندما حاولت الخروج للشرب، اعتدى عليها مدرس الرياضيات بالضرب مستخدما «حزام بنطاله» فأصاب عينها بقوة أدت إلى فقئها.

تم نقل المصابة على المستشفى الجامعي، الذي أخطر بدوره الأجهزة الأمنية في الأقصر، فأوقفت المدرس المتهم وأحالته على النيابة العامة المصرية، التي قررت حبسه على ذمة التحقيقات.

http://www.alraimedia.com/Alrai/Article.aspx?id=231478&date=12102010

تم تعديل 12 أكتوبر 2010 بواسطة اغابي

[se_ Elsyed]

هي منظومة فاسدة من أولها يا اغابي

كله بياكل في كله

فصل فيه ييجي 60 طفل ..

ومدرس بياخد 140 ج ....

وأهالي تلاميذ طالع عين اللي خلفوهم

ووزير بيضرب في المدرسين ..

ومدرسين بيضربوا في العيال

وهيصه وهاتلاقي كل يوم من ده طالما ما فيش مسئول محترم عنده ضمير ويقدر ياخد قرارات مبتكرة وخلاقة لعلاج هذا الخلل الموجود في المنظومة ..

[ابو محمد بن مصطفي]

هي منظومة فاسدة من أولها يا اغابي

كله بياكل في كله

فصل فيه ييجي 60 طفل ..

ومدرس بياخد 140 ج ....

وأهالي تلاميذ طالع عين اللي خلفوهم

ووزير بيضرب في المدرسين ..

ومدرسين بيضربوا في العيال

وهيصه وهاتلاقي كل يوم من ده طالما ما فيش مسئول محترم عنده ضمير ويقدر ياخد قرارات مبتكرة وخلاقة لعلاج هذا الخلل الموجود في المنظومة ..

ايه يا سي السيد انت معلوماتك قديمة جدا 60 طفل في الفصل دي تبقي والله خمس نجوم

في الجيزة واسيوط والمنوفية الفصل وصل لـ 120 طالب ما تتخضش ايوه مائه وعشرون تلميذا ده في المرحلة الابتدائية

انت عارف ان الاولاد في السن ده بيبقي مسخوتين فممكن تلاقي سبع عيال قاعدين علي تخته واحدة (ديسك)

والادهي من كده لو عرفت مساحة الفصل 5 م في 6 م

بالاضافة الي ذلك التلميذ مطالب بانه يدخل في مجموعة او درس خصوصي في المدرسة غصب عن عين اللي خلفوه

اليد التي تلعب في مستقبل التعليم في مصر معروفه وتطفيش الاهالي والتلاميذ من التعليم الحكومي لصالح المدارس الخاصة

اذا قلنا ان 80% من الشعب لا يستطيع الدراسة في القطاع الخاص

اذا الحل هو تطوير التعليم والمدارس والقضاء علي التكدس في الفصول

اما المدرس اللي فقأ عين التلميذه بالحزام فالعين بالعين

[اغابي]

طب بلاش نتكلم عن المنظومة التعليمية ككل

تعالو نتكلم فى نقطة تانية بسيطة جدا ومش متعقدة ولا حاجة خالص

اخدتو بالكم من الجزء داه

اعتدى عليها مدرس الرياضيات بالضرب مستخدما «حزام بنطاله» فأصاب عينها بقوة أدت إلى فقئها

حزام البنطلون ليه ......... انت داخل خناقة فى ميكروباص

حزام البنطلون ليه ......... انت بتتخانق مع شلة بلطجية

دى طفلة صوغيرة 7 سنين - عاوزة تشرب

حاجة كدا تخرج الواحد عن اعصابه

ولا على رايكم ما هو الفصل فيه 120 و 80 طفل بناقص حتتة عين لطفل منهم

كدا نتوقع الحادث الجاى بما ان الموضوع فيه تطورات

قبل كدا فى اسكندرية لما المدرس ضرب الولد برفس وشلاليت فى بطنه لغاية الطفل اسلام ما مات كان 11 سنة عمره

وحادث كان جابه معتز الدمرداش فى 90 دقيقة - المدرس اللى حدف الميه المغليه على وش الطالب

وادى نهاردة فقا عين طفلة بالحزام

المرة الجاية المدرسين حيدخلوا المدرسة بالمطاوى

علشان العصايا ما بقتش تجيب نتيجة فاى طفل حيطلب يروح الحمام او يشرب او يدلع فى الفصل

وكدا العيب مش فى المدرس لانه مش عارف يعلم الاطفال يحترموه اساسا

يبقى يضرب مطوة فى قلب اى طفل ويخلص

على ايه تشوهات وفقا عين وميه مغليه وحاجات عبيطة كدا

خليهم مطاوى علطول

اغابي

:roseop:

تم تعديل 12 أكتوبر 2010 بواسطة اغابي

[شريف مان]

الكلام دا مبيحصلش فى المدارس الفنية ( صناعية - زراعية - تجارية )

عشان المدرس عارف لو عمل حاجة هيحصل فيه أيه

ناس تخاف متختشيش ... والله أتحدى ان ما كان المدرس دا مريض نفسى

كل الاخبار بقت تحرق الدم

[جويرية]

الاسبوع اللى فات الميس رفضت انها تسمح لابني انه يروح الحمام ولغاية دلوقتى مش فاهمة حجتها ايه - ما علينا

وعلت صوتها علي ابني - وفضل الولد يبكى طول الحصة لانه فعلا عاوز يروح الحمام مش بيكذب - وهو صوغير جدا - 4.5

مع العلم انها المدرسة محترمة ومشهورة جدا وثنائية اللغة ( انجليزي وفرنساوى ) ومدرسين اغلبهم اجانب

ما هوه القصل مثلا في 30 طالب ، التلاتين دول عايزين يروحوا الحمام ، و التلاتين برضو عايزين يخرجوا يشربوا ، و برضو كلهم عايزين يخرجوا يجيبوا الكراسة اللي نسيوها مع زمايلاهم

المدرس بيريح نفسه و يمنع الخروج تماما

و العيال بيبقوا حفظوا المدرس ده خلاص مبيخرجش حد من الفصل

و بعدين الطالب ، لو خرج برة و بعد ما راح الحمام فضل يلف في المدرسة ، في اشراف حيحاسب المدرس

العيب مش في المدرس العيب في القوانين العسكرية بتاعتة المدارس

لو عملوا ان اي ولي امر من حقه ياخد ابنه في اي وقت

او لغوا نسبة الحضور

خلاص مش حيبقي في مشكلة

و بعدين طفل 4 او 5 سنين ده مفروض ميبعدش عن امه

و هوه الأطفال في الأبتدائي بيتعلموه ايه غير القراية و الكتابة و جدول الضرب

لو الأم جابت لأبنها مدرس في البيت لمدة ساعتين فقط يوميا ، احسن من ال 10 ساعات اللي بيضيعوا في المعتقلات قصدي في المدارس

[ابو محمد بن مصطفي]

حزام البنطلون ليه انت داخل خناقة فى ميكوباص

حزام البنطلون ليه انت بتتخانق مع شلة بلطجية

دى طفلة صوغيرة 7 سنين - عاوزة تشرب

ماهو البلطجي ده... اكيد ماشي في المدرسة بالحزام ويضرب التلميذ اللي يقابله .. وكمان اكيد دي مش اول مرة

بعض المدرسين يجب ان تخضعوا للكشف النفسي قبل العمل في المدارس

هذا الكشف (علي فكرة) ليس فقط لمدرسين الحكومة ولكن ايضا للعاملين في المدارس الخاصة