للأهلاوية فقط ... حسام البدري وسنينه اللي مالهاش لون

[ozoozo]

الشوط الأول 3-0 للأسماعيلي يا س س

سترك يااااااااااااااارب

انا بصراحة قاعد مستمتع بإفتكاساته وعبقريته , ربنا يديمها علينا نعمة ويحفظها من الزوال :D

دراويش

دراويش

دراويش

دراويش

أوعي حد يضرب , هتضحكوا علينا بعد ماتش المصري برضه ما تقلقوش:ph34r:

مع تحياتي

زعلت منك جدا بعد الجمله دي ياحاج

يضحكوا علينا ليه بعد ماتش المصري

ليه انت فاكر ان المصري كان بيلاعب

الاهلي

[nightmare]

زعلت منك جدا بعد الجمله دي ياحاج

يضحكوا علينا ليه بعد ماتش المصري

ليه انت فاكر ان المصري كان بيلاعب

الاهلي

ههههههههههههههه , ملعوبة يا ozoozo

ما تزعلش يا حاج , بس بامانه كان ماتش صعب وكنت قلقان منه جدا , والحمد لله على الفوز وعلى الروح وعلى مكسب مجموعة من الشباب الواعد اللى هما امل الزمالك في السنوات القادمة.

ولا عزاء لاحبابنا , بس تفتكروا مين اللى هيمسك مكان البدري ؟؟:D

مع تحياتي

[se_ Elsyed]

أظن أنا كنت جايب لكم النتيجة من الكنترول وعارف إنه هايغور في داهيه ونكسر وراه مليون قله

فكر مين يا عم محمود صلي على رسول الله ...

بيقول لك البدري بعد ماتش أمبارح جاتله جلطه في المخ ...

لا حول ولا قوة إلا بالله .. وجاله منين المخ ياربي ؟؟؟

اهو ده اللي كان ناقصه

مش كل من ألتحق بدورات في جامعة كوبنهاجن بالسلوم .. ولا اشتغل مساعد جزمجي يبقى يفهم في التدريب ...

يا راجل أتفرج على فن التدريب أمبارح من مختار مختار ... أو أسامه عرابي اللي قد إبنه مع الإنتاج الحربي أو طارق يحي في المقاصة ...

على فكرة حسام حسن ما عندوش فنيات .. لكن عنده روح فقط .. بدليل إن مباراة المصري كانت ممكن تخرج 5-0 في الشوط الأول للمصري من الدفاع الشوارع ... لكن في لعيبة عندها مهارات فنيه عاليه ممكن تخلص الماتش في أي وقت .... نفس طريقة الجوهري .. بث الروح العالية في اللعيبة اللي بتعوض الهبل التكتيكي ....

لكن البدري أبو بدار لا روح ولا لون ولا طعم وبلوى وإتحدفت علينا ...

[الغريب]

أظن أنا كنت جايب لكم النتيجة من الكنترول وعارف إنه هايغور في داهيه ونكسر وراه مليون قله

فكر مين يا عم محمود صلي على رسول الله ...

بيقول لك البدري بعد ماتش أمبارح جاتله جلطه في المخ ...

لا حول ولا قوة إلا بالله .. وجاله منين المخ ياربي ؟؟؟

اهو ده اللي كان ناقصه

مش كل من ألتحق بدورات في جامعة كوبنهاجن بالسلوم .. ولا اشتغل مساعد جزمجي يبقى يفهم في التدريب ...

يا راجل أتفرج على فن التدريب أمبارح من مختار مختار ... أو أسامه عرابي اللي قد إبنه مع الإنتاج الحربي أو طارق يحي في المقاصة ...

على فكرة حسام حسن ما عندوش فنيات .. لكن عنده روح فقط .. بدليل إن مباراة المصري كانت ممكن تخرج 5-0 في الشوط الأول للمصري من الدفاع الشوارع ... لكن في لعيبة عندها مهارات فنيه عاليه ممكن تخلص الماتش في أي وقت .... نفس طريقة الجوهري .. بث الروح العالية في اللعيبة اللي بتعوض الهبل التكتيكي ....

لكن البدري أبو بدار لا روح ولا لون ولا طعم وبلوى وإتحدفت علينا ...

ثلاث حاجات عجباني في المشاركة دي

مختار مختار

أسامة عرابي

دي أسماء أحترمها لأنها خدت خبرة من جوزيه وبعدين بدأت تنميها شوية شوية مع أندية صغيرة لحد ما ربنا كرمهم دلوقتي وهما وطارق العشري تلامذة جوزيه بقوا بيقدموا أحلى كورة في مصر، ولا عزاء للبدري اللي الإدارة دللته زيادة عن اللازم وكان مرحلة المفروض أنتهائها بسرعة.

أما ثالث كلمة وأنا مؤمن جدا بيها " أن حسام حسن روح بلا فنيات " وسامحوني يا زملكاوية بس ده الواقع

[خالد شحاته]

ربنا ينتقم من حسام البدري ومن الا عمله مدرب للاهلي

[MZohairy]

الله يخرب بيت ال عملك مدرب يا شيخ ...روح يا شيخ و ماترجعش تانى يارب

من امتى الاهلى بيتهزم او حتى يتعادل ...رفعتلنا الضغط و هنروح نتعالج فى مستشفيات اخوانا الزمالكويه فى العنبر ال جنبهم على طول

شمت فينا الزمالكاويه ...طالما انت حمار فى التدريب بتدرب ليه يا لى من فصيلتهم

ياريت يبقى عندك دم وتمشى بقه و تريحنا و ندر عليا اكسر وراك مصنع قلل

مش عارفه اخد راحتى فى الشتيمه علشان بس الاخوه الاعضاء ما يقولوش عليا حاجه وحشه ...بس اه لو تعرف الجوايا و عايزه اقولهولك

...كنت رميت نفسك من برج بيزا المايل كده زى ما ميلت املنا.

مش انت السبب الخفى ان شادى محمد يمشى اهوه اداك فى سنانك يا زباله المدربين

هو ده الكلام

ربنا يستر و مايرفضوش استقالته

منك لله يا حسام

و منه لله اللي عينه و متمسك بيه

جاي رايح منه له

منه له

منه له

[se_ Elsyed]

>ه مقال خالد طلعت في موقع " في الجون "

على فكره مش غرور .. أنا المفروض أطلع المطار وأقف أستقبل السياح الاجانب اللي بيفهوا رياضه هههههههههههه

لان كل كلامه أنا قلته من السنة اللي فاتت قبل بدراوي أبو بدار ده ما يبقى مدير فني وهو اساساً كان ماشي جنب سور النادي فحد راح زقه جوه ولقى نفسه في الأمله اللي هو فيها وطلع قميص المدير الفني واسع عليه . وطبعاً غرق ألوفات ومرتب مهول .. وبالتالي إقطعوا رقبته على إنه يقدم أستقالته ... لإن ولا حتى مركز شباب زفتى يفكر إنه يتعاقد مع إنسان فاشل كروياً وفقير فنياً زي ده

هناك عدة أمور توضح الفارق بين المدير الفني الناجح، والمدير الفني الفاشل، ومن خلال تقييم تجارب المدربين مع فرقهم المختلفة تستطيع أن تجد عدة فروق واضحة بين كلاهما، وإليكم العديد من الفروق التي تميز المدرب الناجح عن المدرب الفاشل:

* المدرب الناجح هو من يتولى تدريب فريق منهار ومهلهل وغارق في المشاكل والأزمات الإدارية والمالية ويصعد به من المركز الـ14 إلى المركز الثاني في موسمه الأول مع الفريق، ثم يصل به إلى المركز الأول في جدول الترتيب في العام الثاني لتوليه المهمة، بينما المدرب الفاشل هو من يتسلم فريقا ناجحا وبطلا على المستوى المحلي والقاري لمدة ست سنوات متتالية فينهار الفريق تحت قيادته ويصبح فريقا ضعيفا لا حول له ولا قوة.

* المدرب الناجح هو من يقود فريقا ليس به نجوم أو أسماء رنانة باستثناء لاعب واحد فقط ويعتمد على مجموعة من اللاعبين صغار السن ليس لهم أسماء كبيرة أو معروفة ويقودهم لنجاحات عديدة، بينما المدرب الفاشل هو من يمتلك قائمة مليئة بالنجوم والأسماء الرنانة الكبيرة ومع ذلك يفشل في توظيفهم بطريقة جيدة داخل الملعب.

* المدرب الناجح هو من تجد لاعبيه يؤدون بطريقة رائعة تحت قيادته أفضل مما يؤدوا تحت قيادة مدرب المنتخب، بينما المدرب الفاشل هو من تجد لاعبيه يؤدون بمستوى متواضع تحت قيادته فيما يتألقون ويظهرون بمستوى أفضل تحت قيادة مدرب المنتخب.

* المدرب الناجح هو من يتسلم فريقا يضم لاعبين دوليين فقط وتحت قيادته يزيد عدد اللاعبين الدوليين في الفريق إلى ستة، بينما المدرب الفاشل هو من يتسلم فريقا يضم تسعة لاعبين دوليين وتحت قيادته يتبقى منهم فقط خمسة.

* المدرب الناجح هو من يتسلم فريقا لم يحصل سوى على بطولة محلية واحدة فقط طوال ست سنوات متتالية هي البطولة الأضعف ويخسر 11 بطولة أخرى، ثم تحت قيادته يتصدر الفريق البطولة الأهم خلال أقل من عام من توليه المسؤولية، والمدرب الفاشل هو من يتسلم فريقا حصد 12 بطولة محلية من أصل 15 بطولة شارك فيها في أخر خمس سنوات بنسبة نجاح 80 % ، ثم في عهده يحقق الفريق بطولتين محليتين فقط لا غير، ويفقد بطولتين محليتين أخريتين بنسبة نجاح 50 % فقط.

* المدرب الناجح هو من يعيد فريقه للمشاركة على المستوى القاري بعد غياب أربعة أعوام كاملة عن المشاركة، والمدرب الفاشل هو من يتولى فريقا حصد ست بطولات قارية من أصل ثمانية بطولات شاركت فيها في أخر خمس سنوات وشارك في البطولة العالمية ثلاث مرات، ثم يتولى المسؤولية فيصعد لدوري المجموعات بصعوبة وبشق الأنفس بهدف في الثواني الأخيرة بدعاء الوالدين، ثم يصعد للأدوار النهائية بصعوبة أيضا وبأقل رصيد ممكن من النقاط بعدما خدمته نتائج باقي فرق المجموعة، ثم يودع البطولة أمام فريقا خسر في المباراة النهائية بنتيجة مذلة بخمسة أهداف نظيفة.

كما أن خروج فريقه من هذه البطولة يحرمه من المشاركة في بطولة كأس السوبر القارية، ومن المشاركة أيضا في كأس العالم للأندية.

* المدرب الناجح هو من يقود فريقه لتحقيق ثمانية انتصارات خارج ملعبه في الدوري من إجمالي 12 مباراة لعبها خارج ملعبه، بينما المدرب الفاشل يحقق أربعة انتصارات فقط في الدوري من إجمالي 12 مباراة خاضها خارج ملعبه، بينما فشل في تحقيق أي فوز طوال ست مباريات إفريقية خاضها خارج ملعبه خسر في خمس منها وتعادل في واحدة فقط.

* المدرب الناجح هو من يسجل فريقه 54 هدفا في 31 مباراة بمعدل 1.75 هدف في المباراة الواحدة، بينما المدرب الفاشل هو من يسجل فريقه 73 هدفا في 51 مباراة بمعدل 1.43 هدفا في المباراة الواحدة.

* المدرب الناجح هو من يدخل مرمى فريقه 26 هدفا في 31 مباراة بمعدل 0.83 هدف في المباراة الواحدة، بينما المدرب الفاشل هو من يدخل مرماه 45 هدفا في 51 مباراة بمعدل 0.88 هدفا في المباراة الواحدة.

* المدرب الناجح هو من يحافظ على نظافة شباك فريقه في ست مباريات متتالية في الدوري، وفي خمس مباريات متتالية في الدوري أيضا في موسم واحد، بينما المدرب الفاشل هو من تهتز شباكه بهدف واحد على الأقل في ثماني مباريات متتالية في دوري أبطال إفريقيا سواء على ملعبه أو خارجه.

* المدرب الناجح هو من يقود فريقه للفوز على الاسماعيلي بعد ثماني مباريات متتالية لم يحقق فيها الفوز إذ خسر في ست منها وتعادل مرتين، والمدرب الفاشل هو من يقود فريقه للهزيمة من الاسماعيلي مرتين متتاليتين خلال أقل من شهرين بعد أربع مباريات متتالية لم يخسر فيها من الفريق، وتهتز شباكه سبع مرات من الدراويش خلال 180 دقيقة فقط.

* المدرب الناجح هو من يقود فريقه للفوز على المصري ثلاث مرات متتالية رغم التفوق الواضح للمصري في الفترة السابقة إذ فاز خمس مرات في أخر 11 مباراة مقابل خسارتين فقط وأربعة تعادلات، بينما المدرب الفاشل يتعادل على ملعبه مع المصري بعد خمسة انتصارات متتالية لفريقه على ملعبه على المصري.

* المدرب الناجح هو من يعطي فرصا للاعبين الشباب داخل الفريق ويثبتوا ذاتهم ويسهموا في انتصارات الفريق ويدخلوا ضمن قوائم المنتخب الأوليمبي أو منتخب الشباب، والمدرب الفاشل هو من يعطي فرصا للاعبين الشباب ثم يجلسهم على الدكة بعد ذلك ويقضي عليهم رغم تألقهم ويدفع بلاعبين أقل منهم في المستوى خوفا من نجوميتهم.

* المدرب الناجح يحقق انتصارات رغم أن فريقه يضم لاعبين من نوعية الصفتي وغانم ومهاجمه الصريح هو أحمد جعفر، بينما المدرب الفاشل يفشل في تحقيق الفوز رغم أن فريقه يضم لاعبين بحجم بركات وأبو تريكه وأحمد حسن وجدو وفتحي ومعوض وجمعه وعاشور.

* المدرب الناجح هو من يقف على الخط طوال المباراة لتحفيز لاعبيه وتوجيههم، والمدرب الفاشل هو من يستمر جالسا على الدكة عابس الوجه في انتظار الفرج وعندما يقوم من مقعده يهتف بجملة واحدة فقط هي "باص .. باص".

* المدرب الناجح هو من تجد تبديلاته تساهم في تطور أداء الفريق وتجد مستوى فريقه في الشوط الثاني أفضل كثيرا من الأول ونتائجه أفضل في الشوط الثاني، والمدرب الفاشل هو من تجد فريقه يسير بصورة جيدة حتى يبدأ في إجراء التبديلات ليتراجع المستوى وتنهار الخطوط وتجد فريقه في الشوط الثاني أسوأ كثيرا من الشوط الأول.

* المدرب الناجح هو من تجد لاعبيه يحبوه ويعشقوه ودائما ما يتحدثوا عنه بحب واحترام سواء في وسائل الاعلام أو في جلساتهم الخاصة ويشيدوا بفضله عليهم، والمدرب الفاشل هو من تجد لاعبيه يكرهوه ويتحدثوا عنه بسوء ودائما ما يشكون من عجرفته وسوء تعامله معهم بل ويتحدثون في أحيان كثيرة عن تبديلاته الخاطئة.

* المدرب الناجح هو من ينجح في تقويم لاعبين غير ملتزمين مثل شيكابالا وميدو وعمرو زكي وتجده يعاملهم بطريقة سحرية يكونوا معها ملتزمين داخل الملعب وكأنهم أشخاص أخرين غير الذين نعرفهم، والمدرب الفاشل هو من تجد لاعبين ملتزمين ومخلصين ولم يصدر لهم صوتا طوال سنوات طويلة مثل أحمد حسن ومحمد أبو تريكه يخرجوا عن النص ويخرجوا عن شعورهم وتجد أحدهم يعترض على مدربه بشكل غير لائق عند التبديل والأخر يتحدث عن مدربه بشكل سيء ويؤكد أنه لا يجيد التعامل معه.

* المدرب الناجح هو من تجد الجماهير تهتف باسمه وتعلق له لافتات تشيد به وصور تعبر عن اعجابهم به وتنشد له أغاني مثل "احنا معاك يا عميد"، والمدرب الفاشل تجد الجماهير تعلق لافتات تطالب برحيله وتهتف ضده وتهاجمه وتهديه أغاني مثل "كفاية حرام" أو "روح يا بدري".

* المدرب الناجح هو من لا يغتر بنفسه بعد قراءة هذه المقالة بل يزداد تواضعا وإخلاصا والتزاما في عمله بعد النجاح، والمدرب الفاشل هو من يقرأ هذه المقالة ويستمر في منصبه ولا يرحل حتى لو تمسكت إدارة ناديه به.

[المهندسه]

استاذ محمود مصطفى اهلا بك

المهندسة كل سنة وانتى طيبة

وحضرتك بألف صحه وسلامه

طول عمر الاهلى بيتهزم دى رياضة وليس هناك فائز دائم بها

فعلا لا يوجد فائز دائم ...لكن لما تكون الهزيمه بعد اداء فنى عالى واداء متميز وجهد ...يبقى ماشى لكن من ساعه البدرى و الاهلى ما بقاش بيلعب بفن و روح ممتعه ...الماتش بيبقى بارد ومالوش طعم ولا لون ...تبقى عايزه خلص و خلاص...كمان ولا فوز كان طعمه غالى لانه من غير جمل محترفه وفنيه ...يعنى من وجهه نظرى

الاهلى مش هو الاهلى من اول ما البدرى مسك التدريب

وهذا ما جعل جوزية يهرب

جوزيه نفد بجلده لما احس ان الفريق غير قادر على اداء افضل و احسن ...كان يرى ما يحدث الان ...وقالها فى حديث تليفزيونى ان الاهلى غير قادر على جلب مزيد من البطولات

دون مراجعه اللاعبين و شراء اخرين للنهوض بالفريق...كان عنده حق و اعتقد انه هيرجع تانى لو الفريق بدأ يقف على رجله تانى ما هو مش اول مره يعملها عادته ولا هيشتريها(انا من اشد معجبيه كمدرب فقط)

شادى محمد ليس من لاعبى ااهلى المخلصين تم تسريحة من الاهلى لانة كاذب ومتلون بمعنى انة انسان غير جدير بارتداء الفانلة

معاك فى ال بتقوله لكن زعلانه ان الاهلى خسر لاعب متميز زييه....زى ما انا مش مع ال عمله الحضرى اطلاقا لكن ما قدرش انكر انه من اول ما مشى اى هجمه على الاهلى ...الواحد بيحط ايده على قلبه ...غير ايام الحضرى

لا تقلقى الاهلى بة من الرجال من يعرف كيف يختصر الطريق الى البطولات

نفسنا فى بطولات مع لعب و اداء ممتع و متميز كحال الاهلى دائما ...لكن ما يحدث الان هو فوز من وجهه نظرى بالصدفه بالبركه و طبعا لا ننكر ان جماهير الاهلى لها عامل رئيسى فى رفع معنويات الفريق لانها من الجماهير التى تساند وتشجع فريقها دائما سواءفائز او مهزوم

البدرى,, تعلم الادارة ولجنة الكرة ان البدرى صاحب شخصية قوية وصاحب فكر تدريبى وتم الحاقة بعديد من دراسات الكرة والتدريب على حساب الاهلى فى ارقى اندية العالم انجاترا واسبانيا وهولندا وحاصل على شهادات صحيحة وليست مفبركة ودارس لغة ومحترم ولة فكر لكن ظروفة ليست جيدة وحظة الايام دى غير سعيد لاصابة عدة لاعبين وهبوط مستوى اخرين مما جعلة لا يستطيع تنفيذ فكر او جمل

يا سيدى الفاضل مش كل من تعلم بره يبقى خلاص مفيش زيه "العلم فى الراس"يعنى هو معندوش اى قدره على الرياده هو ممكن يكون الرجل التانى او مساعد هينجح اكتر زى ايام جوزيه لكن هو معندوش ملكه الرياده والرئاسه و الامساك بزمام الامور....ممكن ينجح اكتر لو مساعد مدير فنى او ضمن الفريق الفنى لكن يكون هو القائد لاء.

واخير احب اشكر حضرتك على مشاركتك و اتمنى لنادى الزمالك ان يعود بشكله القديم الذى تعودنا عليه من سنين.

هو ده الكلام

ربنا يستر و مايرفضوش استقالته

منك لله يا حسام

و منه لله اللي عينه و متمسك بيه

جاي رايح منه له

منه له

منه له

امين يارب يا بشمهندس زهيرى يارب يمشى بقه وانا عندى استعداد ادرب الفريق ...هيبقى اكيد احسن من ال هو فيه دلوقت

[se_ Elsyed]

خبر طازه ... من الموقع الرسمي للأهلي

أنباء عن قبول استقالة الجهاز الفني بأكمله .. وتحديد البديل خلال ساعات

2010/11/22 12:14كتب : الأهلي.كوم

أشارت مصادر مطلعه داخل النادي الاهلي لـ El-Ahly.com الى ان لجنة الكره في القلعة الحمراء قد وافقت على قبول استقالة الجهاز الفني بكامل هيئته من مهمة تدريب الفريق الاول للنادي الاهلي وذلك بعد انتهاء اجتماع لجنة الكره في النادي الاهلي منذ دقائق قليله.

وسوف يكون البديل جاهز خلال ساعات قليله وذلك بعد بحث جميع البدائل الخاصه بالفريق ودراسة السير الذاتيه المتواجده في لجنة الكره منذ فترة طويله من اجل تحديد البديل وهل سيكون مصري مؤقت او اجنبي .

جدير بالذكر ان حسام البدري المدير الفني للنادي الاهلي كان قد تقدم باستقالته فور خسارة الفريق من الاسماعيلي بثلاثة اهداف مقابل هدف يوم امس الاحد

وياريت كمان لجنة الكرة تعيد النظر في طريقة تفكيرها العقيمة .. لانهم هما اللي ورطونا في حسام غالي وشوقي وفرانسو ميتران وغدار ومكار وشريف إخرامي ....

وفي .. إبعاد ياسين منصور ومحمد عبد الوهاب وإبراهيم المعلم اللي بيموتوا في النادي الاهلي وكانوا مغرقينه فلوس ...

أعتقد كمان إن حسن حمد وطارق سليم عجزوا وكفايه كده .. ياريت يخلوهم في الإدارة بس ويسيبوا لجنة الكرة لناس عندها نظر وبتعرف تنقي لعيبه بحق وحقيق ...

لإن بقى لنا أكتر من 7 سنوات بنجيب لعيبة بالكوم وكل قفص يا دوب ما يطلعش فيه غير لعيب عدل والباقي بيطلع مفعص .

حتى العِدل بنفرط فيه في منتهى السهولة لمجرد إنه عاوز إتنين جنيه زيادة في عقده .. زي جيلبرتو اللي من بعديه إتيتمنا ...وزي فلافيلو الله يرحمه اللي من بعيد أصابنا العقم وبقينا " ما بنعرفش "

[محمد عبدالعزيز]

أتمنى إن الإدارة تاخد القرار السليم اللى فى مصلحة الفريق, وإنها تتجنب اتخاذ أى قرارات تحت تأثير ضغوط وقتية.

من وجهة نظرى أن تجتمع الإدارة مع الجهاز الفنى واللاعبين لبحث الأسباب التى أدت للوصول للمستوى ده, وإذا كان فى مدير فنى جديد يكون من أول الموسم القادم مش دلوقتى.

الأهلى فى المركز التانى ولسه ماتشين مؤجلين, وبالتركيز على إعادة الروح وبحث مشاكل اللاعبين اللى عبر عنها تصريح محمد أبو تريكة الأخير ممكن نصل للقمة ونحافظ عليها كمان.

وفترة الانتقالات الشتوية جاية ولاعيبة مؤثرة منتظر رجوعها من الإصابة زى عماد متعب وسيد معوض, يعنى ممكن تصحيح الأوضاع بداية من الدور التانى والموضوع مش صعب أبداً.

لا أعتقد إن مدير فنى جديد فى الوقت الحالى قرار صائب, وحنبقى زينا زى الفرق اللى بتغيير المدربين كل ماتش أو ماتشين, والمدير الفنى الجديد لازم ياخد فترة لا نطالبه فيها بنتايج لأنه حيقول عاوز يعمل فريق جديد, وحلنى بقى.

أنا موافق إن حالة الفريق كانت سيئة جداً فى ماتش امبارح, ولكن لسه المشوار طويل وتصحيح الأوضاع ممكن جداً لأن معظم فرق الدورى الموسم ده يصعب توقع نتايجها ونظرة على ترتيب الجدول وفرق النقط تؤكد الكلام ده. قرار مدير فنى جديد فى نص الموسم ليس هو القرار السليم أبداً.

[se_ Elsyed]

. قرار مدير فنى جديد فى نص الموسم ليس هو القرار السليم أبداً.

والله يا محمد التغيير ممكن يتم في أي وقت .

أما الفكر العقيم بتاع " البيع مش بالقطعة .. لكن الحساب في أخر الموسم "

بالله عليك .. لو خسرنا الدوري وده أمر مؤكد هذا الموسم ... وكمان خسرنا المركز الثاني ... على إيد البدري اللي طمع الدنيا كلها فينا حتى الجونه ووادي دجله وكل فرق الدرجة الثانية ..

لو خسرنا ده كله بالإضافة إلى إنه هايخلي بغباؤه لعيبة كتير تنسى الكوره ... يبقى في أخر الموسم هاحاسبه على إيه ؟

إيه هاقول له رجع عجلة الزمن وتعالى نبدأ الموسم من أول وجديد ؟

عُمرك شوفت مركب بتغرق والمسئولين عنها يقولوا : سيبوا القبطان يتصرف وتعالى نحاسبة بعد ما المركب تغرق وتستقر في القاع باللي فيها ؟

أنا ضد التسرع في جلب إدارة جديدة بطريقة متسرعة .. لكن عندي مليووون واحد من جوه النادي ممكن يتولوا المسئولية مؤقتًاً زي مختار مختار أو فتحي مبروك أو زيزو .. ونكون درسنا الموضوع من جميع جوانيه ونجيب واحد اجنبي محترم أخر الموسم ....

والله يا عم لو أبو تريكه أو احمد حسن تولى الإدارة الفنيه هايبقى برقبة الأخ الفقير ده ..

طب عندي حاجه من على وش القفص وهاتدعي لي : إيه رأيك في هاني رمزي ؟

بس عيبه إنه إبن ناس ومتربي وطيب ...

لكن فاهم كوره وبرنس ..

لكن عفواً.. إدارة الأهلي تعيش بعقول القرن الثامن عشر .. ولا تفعل أي شيء غير تقليدي ..

يا راجل حد يجيب هادي خشبة المؤدب الهاددددددددددددددددددي زيادة عن اللزوم وتعمله مدير كوره وما ينجحش في تجديد عقد أي لاعب أو إقناعه حتى .. وولا بيهش ولا بينش ؟

يا راجل حد يعني سيد عبد الحفيظ القُله يعينه منسق عام ؟

يا راجل شوف محمد يوسف ولا علاء ميهوب وشوف الإستكانه والبلاده اللي هما فيها ؟

حتى أحمد ناجي بتاع التصريحات النارية واللي بيكتب أشعار جاهليه في الحراس المكسحين .. هو كمان لازم يتغير ...

[ozoozo]

والله حرام عليكم

مش الراجل قلكم حاسبوني جمله وبلاش القطاعي ده

ثم انه بيتكلم انجليزي لبلب

ومعاه بي ار في كندا

عايزين منه ايه تاني ينحرف يعني ولا يمشي مشي بطال عشان تستريحوا

gra:-

[محمد عبدالعزيز]

خلاص يا سي السيد, الجماعة اخدوا برأيك وناويين على قبول الاستقالة وتعيين مدير فنى جديد.

الأهلي يقبل مبدئيا استقالة البدري ويعين خليفته خلال ساعات

يارب يكون هو ده القرار السليم وبالتوفيق للجديد أيا كان.

والله حرام عليكم

مش الراجل قلكم حاسبوني جمله وبلاش القطاعي ده

ثم انه بيتكلم انجليزي لبلب

ومعاه بي ار في كندا

عايزين منه ايه تاني ينحرف يعني ولا يمشي مشي بطال عشان تستريحوا

gra:-

من ضمن مميزات الأهلاوية -الكتير قوى- إنهم لما يكون عندهم عيوب ومشاكل يعترفوا بها ويتعاملوا معاها, غيرهم بيستغرق فى عقدة الاضطهاد من الدنيا كلها وهو بيكون أصل المشكلة ولكنه لا يعترف إنه سئ ويشتكى من طوب الأرض إن غيره هو سبب مشاكله.

تم تعديل 22 نوفمبر 2010 بواسطة محمد عبدالعزيز

[سكر]

يا نهار ابيض ايد دة هو كله ضرب ضرب مفيش شتيمة

الراجل اتهرى ضرب من كل الناس

لازم فعلا يقدم الاستقاله وفورا مش عشان هو وحش دة موضوع تانى لكن عشان نفسيا الناس مش قابله منه حاجة حلوة او وحشه

واعتقد ان مشكله البدرى انه طلع السلم بالاسانسير يعنى لو كان درب فرق صغيرة وتدرج فى التدريب كان ممكن يكون

صورته احس من الواقع الحالى بس برضه مكنش هيدرب الاهلى لانه امكانيته ممكن متساعدوش فى ذلك

حسن شحاته لما ضرب افتكر انه بدا بتدريب المنيا وبعد كدة المقاولين وبدا الاسهم تعلى

يعن اخد السلم من تحت قوى

بالنسبه لمقال خالد طلعت في موقع " في الجون "

اذا كان الوقت هو وقت تقطيع حسام البدرى فهو ليس وقت تمجيد حسام حسن

حسام حسن وابراهيم حسن بيتعملوا مع الزمالك بقانون الطوارى والارهاب

ومع اول غلطة لحسام الزمالكويه مش هيصبروا عليه كتير لانه هيتصرف بغياء كالعادة هو واخوة

لكن فى الروح القتاليه هو رقم واحد بس عيب الروح القتاليه ان نفسها قصير يعنى كبيرها موسم واحد فقط وتقطع

اسف جدا هذا ليس عصر حسام حسن

[ozoozo]

من ضمن مميزات الأهلاوية -الكتير قوى- إنهم لما يكون عندهم عيوب ومشاكل يعترفوا بها ويتعاملوا معاها, غيرهم بيستغرق فى عقدة الاضطهاد من الدنيا كلها وهو بيكون أصل المشكلة ولكنه لا يعترف إنه سئ ويشتكى من طوب الأرض إن غيره هو سبب مشاكله.

ان كنت تقصد موضوع العمل اللي لاقوه مدفون في سور نادي الزمالك جنب الراجل بتاع البديهات فاحنا الحمدلله جبنا شيخ وفكه -لو عايزين نمرته ابقي ابعتهالكم-

وبعدين انا عمري مالاقيت في الدنيا اطيب من الجمهور الزمالكاوي

تخيل بيحبوا البدري اكتر من حسام حسن

وكلهم في نفس واحد بيقولوا لا تتنحي لا تتنحي

فينك ياعم نايت

تعالي قابل وقعد الناس معايا

كفايه احتفالات بقي وتعالي هنا اجل الاحتفالات دي بعد مالدوري يدخل ميت عقبه

تم تعديل 22 نوفمبر 2010 بواسطة ozoozo

[الغريب]

شكل فتحي مبروك قرب

بس أنا نفسي في محسن صالح

[nightmare]

فينك ياعم نايت

تعالي قابل وقعد الناس معايا

كفايه احتفالات بقي وتعالي هنا اجل الاحتفالات دي بعد مالدوري يدخل ميت عقبه

معاك انا اهو يا ozoozo بس حظهم حلو ان احنا الإثنين تعبانيين وعندنا برد

سبهم ياعم في اللى هما فيه , اللى فيهم مكفيهم , البدري عمل فيهم اللى ما شافهوش بقالهم 6 سنين من ايام اوليفيرا.

شكل فتحي مبروك قرب

بس أنا نفسي في محسن صالح

فعلا هو فتحي مبروك أقوي المرشحين يا غريب , ما هو الحيطة المايلة اللى كل اما تتزنقوا تجيبوه, والخبر اهو

علم موقع "ستاد الاهلى" أن الكابتن فتحى مبروك هو المرشح الأقوى لتولى مهمة تدريب النادي الاهلى في الفترة القادمة لحين التعاقد مع مدير فني اجنبى يقود الفريق للعودة لمستواه الطبيعي بعد حالة الانهيار التي يعانيها الفريق على يد حسام البدرى .

ومن المتوقع أن تعلن لجنة الكرة عن المدير الفني الجديد للفريق الكروى مساء اليوم بعد أن تجتمع لحسم المصير النهائي للبدرى والأسماء المرشحة لخلافته .

وتتجه النية لدى لجنة الكرة لتعيين مبروك كمدير فني حتى إشعار آخر وحتى يكون لديها الوقت الكافي للبحث عن مدير فني اجنبى صاحب سيرة ذاتيه قوية يعود بالاهلى لمستواه الطبيعي .

مع تحياتي

تم تعديل 22 نوفمبر 2010 بواسطة nightmare

[akramgroup]

انتوا عارفين مين احسن واحد يجيبوه يمسك الاهلى

ابراهيم حسن :P

ههههههههههه

بصراحه هم يبكى وهم يضحك كارثة امبارح دى جابتلى صدمه نفسيه

وادى جمهور الزمالك بيقول احنا اول الدورى

اكيد فى حاجه غلط

[م تيمور المراغي]

لجنة الكرة بالأهلي تقبل استقالة الجهاز الفني للفريق بقيادة البدرى

قبلت لجنة الكرة بالنادي الأهلي فى اجتماعها مساء الاثنين برئاسة حسن حمدى رئيس مجلس ادارة النادى الأهلى استقالة الجهاز الفنى للفريق الأول بالنادى بقيادة حسام البدرى.

وأكد المنسق العام للجنة الكرة بالنادى سيد عبد الحفيظ أن لجنة الكرة فى حالة انعقاد مستمر للاعلان عن اسم المدير الفنى الجديد للنادى الأهلى خلال ال 48 ساعة القادمة ، موضحا أنه تم إلغاء تدريب الفريق الأول الثلاثاء على أن يستأنف الفريق تدريباته الأربعاء .

كان الجهاز الفنى للفريق قد تقدم فى وقت سابق الاثنين باستقالة رسمية جماعية للجنة الكرة إثر الهزيمة التى منى بها الاحد على يد فريق النادى الإسماعيلى .

وتضمنت الاستقالة كلا من حسام البدرى المدير الفنى وهادى خشبة مدير الكرة وعلاء ميهوب المدرب العام ومحمد يوسف المدرب المساعد وأحمد ناجى مدرب حراس المرمى ومحمد أبوالعلا أخصائي التأهيل

[شريف مان]

أفضل من يقود الاهلى فى الوقت الحالى

الجنرال / محمود الجوهرى