سمعت دنيا مسعود قبل كده ؟

[se_ Elsyed]

من 4 سنين تقريباً كنت أشاهد احدى الحفلات الفنية التي تُقام في قلعة صلاح الدين تحت مًُسمى " محكى القلعة " فيما يشبه ساقية الصاوي كده لتقديم المواهب الفنية المختلفة ومنها الجديد ومنها طبعاً الفنانين المعروفين .. ولفت نظري صوت نسائي أكثر من رائع وكله إحساس ...

وعرفت بعد كده إن البنت دي إسمها " دنيا مسعود " .. وبعدين تابعت أعمالها .. وأكشتفت حاجات غريبة جداً

أول الحاجه البنت دي دماغها مطرقعه رسمي ... يعني تحس إنها مش طبيعية .. ملحوسه تقول .. أو عليها عفريت بيخلي الإبداع ده يتفجر منها ... يخرب بيت كده ...

تاني حاجه ... التقمص الفني عندها مالوش حل .. يعني تغني بالصعيدي تحس إنها صعيديه قُح ... من قلب الصعيد يعني

تغني أسكندراني تحس إنها بمبوطية ...

تالت حاجه : البت دايرة تلف العالم كله ومهرجاناته على حسابها لمجرد الغناء فقط وتقديم الألوان الغريبة من الغناء دي .... وأخيراً عرفت بالأمس فقط إنها كونت فرقة عربية إسمها " كذا مدى " مع عازفين من لبنان والأردن وسوريا ...

رابع حاجه مش هاتصدقوها .. عارفين البنت دي مين ؟

تخيلوا طيب ؟؟؟؟؟؟؟؟؟؟

البنت دي هي اللي قامت بدور سكرتيرة أحمد حلمي في فيلم " جعلتني مجرماً " .. هاقربها لكم .. وهي اللي قامت بدور فتاة الفندق المنحرفة في مسلسل " أهل كايرو ..

اهي عشان ما تحتاروش

إسمعوا بعض أغانيها وأحكموا

http://www.youtube.com/watch?v=eyDgT868Irk&feature=related

وبعدين ممكن تعملوا سيرش على اليوتيوب وتسمعوا بقية أعمالها

http://www.youtube.com/watch?v=B8kee8PO8qQ&feature=related

تحياتي

[أبوعمار]

فعلا صوت جميل

وشخصية متميزة

هي عجبتني في الفيلم رغم دورها الصغير

دمها خفيف وفيها شقاوة غريبة

بس موضوع الغنا ده معلومة جديدة بالنسبة لي

ومنكم نستفيد

[مغتربة]

واااااااااااااااااااو

بصراحه اكتشاف مسيو سى السيد

البنت صوتها حنين و بتعرف تستخدمه لتجسيد معانى الكلمات الى بتغنيها

انا اول مره اعرف انها بتغنى

طيب دفنت نفسها فى الكام لقطه الى مثلتهم فى الافلام و المسلسلات ليه

موهبتها الحقيقيه هى الغنا

حرام تضيعها

لازم تركز فيها بدل التمثيل

[Diab]

سمعت دنيا مسعود قبل كده ؟

أساسي طبعا

وكنت منزل الألبوم" محطة مصر " بتاعها من حوالي سنة ونص وكنت مشغله طول النهار في العربية بتاعتي لحد ما قلبت أرطن صعيدي

تم تعديل 17 أكتوبر 2010 بواسطة Diab

[nightmare]

مفاجأة لي بصراحة , اول مرة اعرف انها بتغني ومش بس كده , صوتها جامد وفيه حاجة غريبة تشدك.

بس كل اما افتكر منظرها في فيلم "احمد حلمي" , اموت من الضحك وخاصة وهي بتقول "ما انا كنت قدامه ماخطفنيش ليه"

بجد ربنا يوفقها , صوت ممتاز بس على الله ما يضعش وسط الموجة اللى ماشية

مع تحياتي

تم تعديل 17 أكتوبر 2010 بواسطة nightmare

[مسافر زاده الخيال]

مش عارف هي اللى مثلت دور (البنت اللدغاء) في مسرحية الدور الرابع شقه تسعه؟؟؟؟؟؟؟؟؟؟بطولة نجاح الموجي و احمد بدير؟؟؟

[se_ Elsyed]

اليوم السابع فكرني بها النهاردة

يخرب بيت الصوت ده

http://www.youtube.com/watch?v=P6uzXeeFfaU&feature=player_embedded

ساعات بأغير من الأصوات الجميلة دي .. وخصوصاً صوت صديقي زيزو لما كان بيغني قدامي ...

فكنت بأحاول أغني .. مجرد محاولة

تصدقوا بالله كرهت نفسي ... وقولت كفاية عليك تتكلم في السياسة وما ترتكبش جريمة الغنا دي ولا الدندنة حتى

[se_ Elsyed]

http://www.youtube.com/watch?v=eyDgT868Irk&feature=related