من حقي أعرف همة بيجيبوا الكلام دة منين..

[Sherief AbdelWahab]

http://lanaaa.com/ar/category-table/147---70--------.html

أنا شخصياً مش عارف إيه هو جهاز سلامة الغذاء دة علشان يطلع إحصائيات بالدقة دي؟

أي عمل إحصائي له أصول واضحة ، وطرق معلومة للي بيدرس وحتى اللي ما بيدرسش ، جمع بيانات ، تحليل بيانات ، إلى آخر القايمة.. إلا لا شفنا الكلام دة في الإحصائية دي ولا في غيرها..

ممكن تقروا الكلام دة كمجرد عمل علمي ، لكن أنا يهمني كمواطن مصري إني أعرف المعلومات اللي في الإحصائيات الدقيقة جداً جداً جداً اللي مفيش جهاز مخابرات في العالم عنده القدرة على تجميعها قدروا يجمعوها إزاي؟

ليه فيه مراكز بحثية حكومية بتحب تلعب اللعبة المبتذلة الغبية اللي عفا عليها الزمن من عقود طويلة؟ هل لما أحس إن الدولة عارفة مقاس شرابي ح أتجنب كمواطن مصري مخالفة القانون وأمشي على العجين ما ألخبطهوش وأحس إني عايش في دولة قوية قادرة تحميني كمواطن؟

هل مفيش إلا الأسلوب الهابط المقرف دة؟

خلص الكلام

[doha]

قريت الخبر المرفق وعلى العكس من حضرتك اعتقد والله اعلم ان الدراسة صحيحة ..

هي الفكرة كلها في استبيان بيتكتب فيه اسئلة مثل هل تغسل يدك قبل الاكل او الى اي مدى توافق على زياده السعر مقابل مزيد من وسائل الوقاية .. الخ .. الاستبيان ممكن يتوزع بمندوبين يمروا على المنازل او يتصلوا بالتليفون او حتى يرسلوه بالايميل ومواقع النت .

المشكلة ممكن تظهر لما يكون الثلاثه الاف الي تم اجراء الدراسة عليهم من الاحياء الفقيرة بس في المحافظات موضع الدراسة .. في الحالة دي هتطلع نتيجه مضلله وممكن جدا تكون الارقام خطأ ..

لا اشك في ان في دراسة اتعملت فعلا وان من السهل اوي نجيب معلومات زي دي لكن مقدرش اجزم بصحة الارقام لاني معرفش على اي اساس تم اختيار العينة وبرضه مش متأكده من سلامة اجراءات استطلاع الرأي الي ممكن جدا حد يفبركها وهو قاعد على مكتبه ..

ممكن يكون الكلام الوارد في الخبر صحيح ومع ذلك بتحفظ وبشده على طريقة صياغه الخبر الي تحسسك انهم ( مسكوا ذلة ) او (عرفوانا على حقيقتنا )..

في بلد عدد سكانها فوق الثمانين مليون ونسبة الفقراء فيهم في تزايد فالارقام الوارده في الدراسة دي ـ ان صحت ـ تعتبر (انجاز) بعكس ماقد يوحي به الخبر ..

[Sherief AbdelWahab]

وهل كل الإحصائيات اللي قبل كدة واللي سبق الكلام عنها هنا في موضوع أو أكتر من كام سنة صحيحة؟

هل دة شغل علمي ولا شغل معزة النيجر؟

http://www.egyptiantalks.org/invb/?showtopic=13723

للتذكير : ما نشرته الوفد أول أكتوبر السنة اللي فاتت :

فضيحة في بيانات الجهاز المركزي للتعبئة والإحصاء

زعم تصدير أسلاك نحاس قيمتها 755 مليون دولار رغم عدم وجود مصانع لإنتاجه في مصر

كتب ـ مصطفي عبيد: تكشف »الوفد« عن واقعة تزوير بيانات تقارير جهاز التعبئة والإحصاء. زعمت بيانات الجهاز تصدير لفائف وأسلاك نحاس خلال العام الماضي بقيمة 755 مليون دولار، رغم عدم وجود مصانع لانتاج أسلاك النحاس في مصر. وكانت صادرات نفس البند في العامين السابقين أقل من مليون دولار، ولم تتم إضافة استثمارات جديدة لإنتاج لفائف وأسلاك نحاس. أكد المهندس محمد سيد حنفي مدير عام غرفة الصناعات المعدنية عدم وجود انتاج أسلاك ولفائف نحاس في مصر. وأشار الي ان الغرفة أرسلت خطابا الي جهاز الإحصاء تطالبه بضرورة تدقيق البيانات والأرقام الخاصة بالتصدير، ووصف البيانات الخاصة بصادرات منتجات النحاس بأنها غير منطقية.. كما أضاف أن الغرفة تلقت ردا أكد فيه جهاز الإحصاء أنه يعتمد في تقاريره الخاصة بالصادرات علي الأرقام المقدمة من المصدرين أنفسهم، وتعتمد في بيانات الواردات علي مصلحة الجمارك. وأكد مدير غرفة الصناعات المعدنية في تصريحاته الي »الوفد« عدم وجود مصانع لانتاج أسلاك ولفائف النحاس في مصر، كما أشار الي أن أي مصنع يعمل في مجال الصناعات المعدنية لابد من تسجيله في الغرفة. وأكد أن التفسير الوحيد المقبول لقيمة الصادرات العالية لمنتج لا ينتج محليا أن البيانات المنشورة في تقارير جهاز الإحصاء خاطئة!. وكانت بيانات جهاز الإحصاء قد أشارت الي أن صادرات لفائف وأسلاك النحاس البالغة 755 مليون دولار، وتضمنت لفات من نحاس نقي مشطوف الحواف بقيمة 270 مليون دولار، ولفات نحاس نقي عادي بقيمة 303 ملايين دولار، وأسلاكا للف البوبينات من نحاس معزول بقيمة 67 مليون دولار، وأسلاكا للف البوبينات من نحاس مطلي بقيمة 114 مليون دولار.

خلص الكلام

[Sherief AbdelWahab]

ليه بأقول الكلام دة؟

في الدولة البوليسية كان بيبقى جزء كبير من قوة الدولة وجبروتها مش في وسائل القمع اللي بتملكها ، قد ما هية في قدرة الدولة على إنها تعرف كل شيء عن مواطنيها ، أو إنها توهمهم أو تفكرهم بدة من وقت للتاني.. علشان يفتكر اللي ناسي إن وراه دولة حتخليه يبص وراه..

وفي الدولة البوليسية تلاقي بدل الجهاز ألف ومحدش يعرف عنهم أي حاجة..

دلوقت هامش الحرية علي عن زمان كتير ، والحزبوطني وبلدنا بتتقدم بينا وبلدنا بالمصري وبالكاروهات بيكلمونا عن حراك سياسي وتحول ديمقراطي وأبصر إيه..

يعني يفترض إن الحركات القرعة دي تكون في المتحف ، مش شغالة بعد عشر سنين من بداية الألفية..

يعني يفترض إن تبقى فيه شفافية في تداول المعلومات ، يعني يفترض إني أعرف المعلومات دي اتجمعت مني ازاي..

أي عمل إحصائي في العالم بيبدأ بتخطيط المعلومات وجمعها.. وطالما بتتجمع بأسلوب علمي - زي ما بيزعموا كذباً- يبقى لازم تتجمع من مصادر موثوق فيها ، وبطرق معروفة .. غير كدة دة يدي إيحاء ، سواء بفحوى الإحصائية أو بطريقة عرض نتائجها في الميديا نتيجة واحدة فقط ، هي آخر ما نريد بالمرة في عصر نحتاج فيه لعودة مرجعية الدولة ، دون ترك الحبل على الغارب للمؤسسات الدينية -أياً كان دينها - أو للمال السياسي للحلول محلها..

والنتيجة دي بالمفتشر يعني إن الدولة بتمارس التجسس على مواطنيها..

هل الموظفين اللي بيعملوا الأبحاث المضروبة دي - لإن محدش بيعمل دراسات ولا بيعمل استطلاعات رأي زي ما انتم متخيلين- واعيين لخطورة اللي بيعملوه؟

ولا حنستنى مصيبة بضخامة مصايب سابقة علشان نعرف أن الله حق وإن الناس دي حتسهم في إن البلد دة يروح في ستين داهية؟

خلص الكلام