طريقه عمل الموتيارا بالسوسيس

[tiimon]

يا جماعه في اكله اسيويه اسمها متيارا بليز الي يعرف طريقه عملها بالرز بالظبط يكتبلي عليها شكرا

[Amr Radwan]

انا ما اعرفهاش الاكلة دي

و حاولت ادور علي النت عن الكلمة دي

متيارا

و لكني لقيت فنادق في ماليزيا و مراكز للتجميل و مفيش حد بيقول اكل خالص

كان نفسي اساعد :(

[بندق أفندى]

الموتيارا نوع من الصوص

[MaYousof]

اللي أعرفه عن الموتيارا إنها طبق تايلاندي ..

وهو عبارة عن:

رز بالكاري والبسلة chf::

ده الطبق الأساسي ..

بعدين بيتحط عليه من فوق التالي:

1. بضع شرحات دواير من الخيار الطازج

2. بيضة مقلية وش وضهر

3. نوع من أنواع اللحوم بالصوص حسب الاختيار

وهذه اللحوم بالصوص ممكن تكون إما لحم مواشي ..

واسم هذا اللحم بالصوص في هذه الحالة هو تاجي ميرا ..

أو ممكن تكون لحم دجاج ..

واسم هذا اللحم بالصوص في هذه الحالة هو آيا ميرا ..

وممكن يتم طبخ السوسيس/فرانكفورتر بالصوص ويستخدم على الطبق الرئيسي بدلا من الاستخدام التقليدي للتاجي ميرا أو الآيا ميرا ..

عشان كده فيه:

1. موتيارا بالتاجي ميرا, أو

2. موتيارا بالأيا ميرا, أو

3. موتيارا بالسوسيس

كيف يتم طبخ اللحم أو الدجاج أو السوسيس بالصوص؟

بسيطة ..

المقادير لكمية صوص تكفي لطبقين موتيارا محترمين ..

1. 200 جرام لحم شرائح صغيرة أو دجاج مخلي مكعبات صغيرة أو سوسيس متقطع طرنشات وسط إلى صغيرة

2. ملعقتين زيت طهي نباتي أي نوع بس بلاش بتاع التموين

3. فلفلة رومي محندقة شرائح صغيرة أو ممكن قرنين فلفل شطة للي بيحب السبايسي زي حالاتي

4. بصلة محندقة شرائح صغيرة

5. كوب 200 مل ماء من الحنفية (يعني الصنبور)

6. ملعقتين كبار نشا أو ممكن دقيق مش هتفرق كتير

7. ملعقتين كبار بابريكا بودرة

8. ملعقة كبيرة كاري

9. ذرة ملح

10. ذرة فلفل إسود مطحون

11. ذرة شطة بودرة (حسب الرغبة)

لو مش عايز وجع راس .. أدلق كل ده على بعض في طاسة غويطة وقلب على نار متوسطة لمدة نص ساعة .. هتتعك منك العملية شوية .. مايهمش .. المهم اللحمة تستوي عشان محدش يعيى ..

لو عايز تطبخه صح يبقى قم بتشويح أول أربع مكونات كالتالي:

1. شوح اللحم/دجاج/سوسيس في معلقتين الزيت على نار هادئة لمدة 5 دقائق

2. أضف الفلفل والبصل الشرائح وكمل تشويح لكمان 5 دقائق

الآن:

3. قم بإذابة النشا أو الدقيق جيدا في وعاء خارجي مع تلات ملاعق ماء حتى تضمن عدم كلكعته

4. ضيف باقي كباية الماء على النشا المذاب وقلب جيدا

5. ادلق الخليط على اللحمة اللي بتتشوح مع الفلفل والبصل

6. ضيف البابريكا والكاري والملح والفلفل الإسود المطحون وياريت تضيف الشطة البودرة عشان أنا بجد بحب الأكل مشطشط

7. قلب بلطف حتى يغلي معاك الخليط خلال 7 دقايق بالكتير

8. بطّل تقليب وسيبه يغلي كمان 3 دقايق

9. إطفي النار

بعد كده تاخد من الطبخة الحلوة دي مغرفة وتحطها فوق طبق الموتيارا اللي هو مش أكتر من رز بالكاري والبسلة ..

متنساس تضيف شرايح الخيار الطازج والبيضة المقلية وش وضهر ..

وبالهنا والشفا ..

وتحيا مصر ..

على فكرة أنا عملت الطبق ده قبل كده كتير ..

وعندي صورة لطبق موتيارا قرديحي أنا كنت عامله .. هارفع الصورة خلال دقايق .. بس مافيش صوص في الصورة .. مجرد الرز اللي بالكاري والبسلة وعليهم البيضة المقلية وش وضهر .. ماكانش فيه لحمة في التلاجة يوميها فعملتها قرديحي chf:: ومكانش فيه خيار كمان :closedeyes:

[MaYousof]

لازم أعترف إن بسبب العجز في اللحمة والخيار (حسبنا الله ونعم الوكييييل) .. حاولت تعويض العجز ده بإستخدام عدد 2 بيضة بدل بيضة واحدة :blush2:

عموما أنا كنت قاعد لوحدي في البيت في اليوم ده .. وكانوا سايبين ليَّ شوية رز أبيض في التلاجة وكيس بسلة في الفريزر قمت قلت لما أدلع نفسي .. وبدل ما آكل رز أبيض .. أعمل موتيارا قرديحي ..

اتفضل: