نادي الكتاب .. فرع المحاورات

[Om Zayd]

السلام عليكم و رحمة الله و بركاته

هوا مش النهارده الجمعة ..و لاّ انا جيت بدري؟؟

فين الأعضاء؟ ولاّ بتدبسوني أرش ميّة و كده يعني؟

:protest:

عموما أنا خلصت كتاب الترام

تصدقوا و انا بقراه .. كل شوية يلاقوني بقول "ما أشبه الليلة بالبارحة" .. تفاصيل صغيرة لو غيرناها كأننا بنتكلم عن القاهرة الآن

القاهرة كانت تعاني من عدم وجود الصرف الصحي بصورته الحديثة .. ف "المستعمر المحتل" قام بعمل شبكة المجاري حفاظا على الصحة العامة

الظاهر انهم ما تعبوش نفسهم في صيانتها و تطويرها .. هي أكيد اتمدت لمناطق كتير بعد القاهرة ما تمددت و تعملقت .. لكن الأكيد برضه انها محتاجة صيانة لأن الوضع في أماكن كتير بقى في عصر ما قبل الترام

النتقال قبل الترام كان بال"عربجية" و وصف لنا تحكمهم و قلة أدبهم و أحيانا بلطجتهم

الآن .. الميكروباس و سواقينه

الناس كانت بتكسل قبل الترام تخرج برة منطقتها لصعوبة الانتقال و سوء الطرق.. و كان فيه عزلة و الناس متعرفش حاجة عن المناطق و القرايب ما لهمش علاقة ببعض إذا ساكنين في مناطق مختلفة التانية و ده أدي لانعدام الرأي العام

كام واحد فينا بيفكر ألف مرة قبل ما يخرج مشوار؟ و يقعد يحسبها و هل هو ضروري ضروري و لاّ ممكن تأجيله

كام واحد معادش بيزور قرايبه لصعوبة الانتقال و سوء الطرق

[masraweya]

جزاكم الله خيرا يا أم زيد

تعبناكِ في فتح النادي و رش المية و المشاريب

معكٍ حق .. ما أشبه الليلة بالبارحة

درنا دورة كاملة و عدنا من حيث بدأنا

كان .. صحف تمدح الاحتلال .. و الآن .. صحف تمدح الفساد و المفسدين

كان .. فن هابط .. الآن .. قنوات تملأ بيوتنا بالإسفاف

كان .. الاحتلال يشغل الطلبة والشباب بالمسابقات الرياضية عن التعليم و السياسة ..

الآن .. "*****" تشغل الشعب كله عن مستقبله بالماتشات

كان .. كل شيء -تقريبا- بيد الأجانب .. الآن ..كل شيء -تقريبا- بيد الأجانب و من والاهم و شاركهم

تم تعديل 5 نوفمبر 2010 بواسطة masraweya

[عبير يونس]

يا كسوفي يا جماعة

انا لسه شايفة الموضوع دلوقتي

بصراحة صحيتم فيا حاجات كتيرة

اهمها اني الظاهر بطلت قراءة :blink:

اكتشفت اني من زمان ممسكتش كتاب دسم كده في ايدي مع مج القهوة :coffeenews:

بقالي سنين قراءتي الكترونية فقط

و دلوقتي عيني على اي باد بحجم كف اليد عشان امسكه في ايدي و اقرأ في اي مكان

بيتحمل فيه الاف الكتب بصيغة PDF

للجمع بين لذة القراءة بحرية من غير التذنيبة قدام اللاب توب و في نفس الوقت باحدث التقنيات

لا تحزن كتاب يعتبر مرجع للمشاعر الانسانية

نتذكر فيه بين الحين و الآخر مشاعرنا التي قد تغيب عنا

نفسي انقض دلوقت على كتاب يحي الرخاوي

حأشوف كده لأحسن ورايا خمسين حاجة

ربنا ييسر

[المهندسه]

صباح الخير يا بنات ...انا دايما بدخل النادى السبت الصبح اصل الجمعه ببقى مشغوله مع الولاد ...معلش

انا قرأت جزء كبير من كتاب ترام القاهره و عجبنى جدا لانى اول مره بصراحه احاول اقرأ عن كتاب بيتناول التاريخ(بعيدا عن الاحداث السياسيه)اى التاريخ الاجتماعى بشكل مختلف فى مصر ...يعنى اول عصور النهضه فى مصر بعد التأخر التكنولوجى و تأخر النهضه بشكل عام..واستخدم الكاتب الترام كرمز لبدايه عصر النهضه.

وايضا تناول الكتاب التقدم فى عصر الترام فى الفن والرياضه والتجاره ..

الكتاب كبير انا لسه مخلصتوش بس هو رؤيه جديده وعجبنى فعلا.

[masraweya]

صباحك فل يا باشمهندسة

معكِ حق

أسلوبه سلس و تحسي انه بينقلك للعصر اللي بيتكلم عنه

في انتظارك

مصرية متغربة

نورتِ يا فندم

في انتظار مشاركاتك

[masraweya]

السلام عليكم

ممكن آخد رأيكم في شوية حاجات .. من أجل نادي أفضل

:closedeyes:

هل الجمعة مناسب للجميع؟

هل تقترحوا آلية أفضل للاتفاق على الكتب و اقتراحها؟

باشمهندسة و خير اللهم اجعله خير و لماضة و أم زيد و هند و مغتربة و سمبا ومصرية متغربة

أين أنتم؟

[لماضة مصرية جدا]

السلام عليكم

ممكن آخد رأيكم في شوية حاجات .. من أجل نادي أفضل

:closedeyes:

هل الجمعة مناسب للجميع؟

هل تقترحوا آلية أفضل للاتفاق على الكتب و اقتراحها؟

باشمهندسة و خير اللهم اجعله خير و لماضة و أم زيد و هند و مغتربة و سمبا ومصرية متغربة

أين أنتم؟

مين ع الباب

قووووووووووووم يا واد يا مروان افتح

مش فاضي....(عيال قليلة الادب)

قوووووووووم يا واد علي ما البس الاسدال

مش فاضي....ما تخلي ريان تفتح

فردة شبشب طايرة حايرة.....تستقر في قفا ابننا الغالي مروان

و ده طبعا كان حوار تخيلي....بيني و بين اولادي...ريان و مروان قيمة 10 سنين قدام

قولتيلي بقي يا مصراوية

بتنادي عليا

بصي بقي

فمرة النادي رائعة جدا.....بس هي فكرة التفاعل الاسبوعي دي هي ما اخشاه

لو هتكلم عن نفسي

زي ما قولت لحضرتك قبل كده

بفتح اكتر من كتاب مع بعض

و بعدين ممكن بتستجد حاجات في الدنيا تخلي الواحد يقفل كل الكتب مثلا و يفكر يبيع جرجير علي ناصية بيتهم ...(وشي و انا عمالة افكر و اقول هجيب جرجير منين)

الحاجة التانية....الاهتمامات مختلفة

يعني نا بحب علم النفس....و فجاة تلاقيني بقرا في قصص الاطفال...و فجاتن تلاقيني قريت حاجة ادب....(يعني شعر و قصصص و كده)...و فجاة تلاقيني بقرا عن حقوق الانسان و تقارير التنمية البشرية

مش عارفة دي هتلاقي اهتمام من اللي قدامي و لا لا

و الحاجة التانية يا تري انا هلاقي االلي بحبه في اللي بتقروه و لا لا

يبقي نعمل ايه.....(نعمل بامية....قصدي نعمل الاتي:

زي برنامج عصير الكتب كدهوت بتاع بلال فضل

اللي بيقري كتاب

او مقالة

او دراسة معينة

يكتبلنا افكاره هو و تاملاته اللي وقف عندها في القراية...من الكتاب ده و ده بعد نبذة سريعة عن الكتاب

و بعدين يسيبها هنا في الدكان

لو جه حد و قري نفس الكتاب....او شدته التاملات هينفتح حوار

و هكذا

ده رايي المتواضع

حبيت افكر معاكي....و اشد علي ايدك و ااقولك.....الفكرة حلوة....بس هي لقدام مش لدلوقتي....يعني هتتجدد طول ما حد بيقري...و يتابع و ممكن النهاردة...ممكن بعدين

صبااااااحك نور ربنا

[masraweya]

كده بقت "قرأت لك" .. فكرة حلوة

بس كان نفسي يبقى فيه حوار أكثر و اقتراحات أكثر

يعني اللي بيقرا كتاب حاليا ينورنا و يقول بيقرا إيه

و اذا عنده رابط للكتاب يحطه

بعد ما يخلص .. او في وسط ما بيقرا .. ينورنا بانطباعاته و تعليقاته على الكتاب

ما رأيكم .. دام فضلكم؟

[لماضة مصرية جدا]

كده بقت "قرأت لك" .. فكرة حلوة

بس كان نفسي يبقى فيه حوار أكثر و اقتراحات أكثر

يعني اللي بيقرا كتاب حاليا ينورنا و يقول بيقرا إيه

و اذا عنده رابط للكتاب يحطه

بعد ما يخلص .. او في وسط ما بيقرا .. ينورنا بانطباعاته و تعليقاته على الكتاب

ما رأيكم .. دام فضلكم؟

طب ايدك علي عرقي انا بقي....(وش اي سباك بيضحك ضحكة هبلة)

بصي حضرتك بما اني و حضرتك الوحيدين هنا دلوقتي في الساحة الشعبية...رايي تستني لما تشوفي بقية الاراء بتاعت الزباين و كده

و ع فكرة كان فيه توبيك زمان اسمه ماذا تقرا؟؟؟

و كان فيه توبيك برضه تاني

اسمه "بين يدي كتاب" لاستاذ دياب...(لا دي مش قافية...هي جت كده)

حد بقي يخطف رجليه و يدور عليهم

و دي برضه وجهة نظر

صبااااحك سحابة حلوة ماشية في السما...بتبشر بمطر وفير

[Dreamwithme]

السلام عليكم ورحمة الله وبركاته :

أنا عن نفسي بحاول أتابعكم من أول مادخلت المنتدي وهي فكرة حلوة جدا بس أنا توهت ومش عارفة أنتم بتقرأوا إيه دلوقتي ومدينه وقت قد إيه؟

فكرة لماضة حلوة وأنا متفقة معها ...لكن برضه كلام حضرتك يا مصراوية مضبوط ....يبقي أجمل كتير لو في مناقشة أكتر.

لو تسمحولي أنضمن لناديكم الموقر (وش عيل صغير بنضارات عامل مثقف)

[Om Zayd]

السلام عليكم و رحمة الله و بركاته

يعني اسيبكم ساعتين زمن الاقيكم فتحتوا النادي و انتخابات .. قصدي اقتراحات

شوفوا يا حلوين

حلوة حكاية ان كل واحد يحب يعرض كتاب يقولنا هو بيقرا إيه الأول .. كده ممكن حد تاني يتحمس و يقرا نفس الكتاب و يبقى العرض من أكثر من وجهة نظر

احلم معايا منورانا

يلاّ يا قمر .. مستنيين اسهاماتك

كابتن لماضة.. ما خلصتيش لسة و لا كتاب من اللي فتحتيهم؟

مستنياكم

انا قريت كتاب العلمانية و المناظرة .. لنا عودة بإذنه تعالى لعرضهما

;)

[masraweya]

لماضة .. حبكت "عرقي " في الشتا؟

احلم معايا .. نورتِ .. لو فيه كتاب معين بتقريه .. قوليلنا.. او لو كتاب عاجبك هنا و هتقريه .. قوليلنا

(.. اوعي تكوني لابسة نضارة بجد .. ليفتكروا القراية بتبوظ النظر و لاّ حاجة)

أم زيد .. أنا قلت بس أريحك من فتح النادي كل مرة

أنا كمان قريت الكتابين دول

حلو .. هنتناقش

:happy:

منتظرة باقي المهتمين بالموضوع

[Dreamwithme]

أختي مصرية..... هو ممنوع النظارات ولا إيه؟ i*:

مش مشكلة أققلع النظارة وأحسس يرضيك برضه؟!

أنا حاليا بقرأ كتاب " قدرات غير محدودة " لأنتوني روبنز.... هو كتاب في علم إدارة وتنمية الذات ...الكتاب حلو جدا بس للأسف مش لاقية منه نسخة ألكترونية.

عموما أنا في المشاركة القادمة هأحكيلكم علي اللي عاجبني في الكتاب wst:: .

[Simba]

يا جماعة انا عقلي اتشتت من كثرة المكتبات وعدد الكتب اللي بتتعرض في موضوع واحد

يعني المحصلة بالنسبة لي في النهاية بتكون صفر

ممكن نتوجه بنداء للادارة الكريمة انها تخصص باب للكتب يتعرض في كل كتاب علي حدة والمهتمين بنوع معين من القراءة اكيد هيستفيدوا اكثر

[masraweya]

يا جماعة انا عقلي اتشتت من كثرة المكتبات وعدد الكتب اللي بتتعرض في موضوع واحد

يعني المحصلة بالنسبة لي في النهاية بتكون صفر

ممكن نتوجه بنداء للادارة الكريمة انها تخصص باب للكتب يتعرض في كل كتاب علي حدة والمهتمين بنوع معين من القراءة اكيد هيستفيدوا اكثر

أخي سمبا

تنوع المعروض مش المفروض يشتتنا .. العكس.. كل واحد يقرا اللي هو عاوزه

كل اللي طالباه ان اللي بيقرا حاجة ييجي يقولنا و يشركنا في انطباعاته و اللي استفاده و تعليقاته على الكتاب

و لو اتكعبلت في موضوع مخصص لكتاب معين .. يا ريت تحط الرابط بتاعه هنا .. و يبقى النادي مكان نتقابل فيه كلنا رغم اهتماماتنا المختلفة

خالص تحياتي