هل لا يزال سي السيد موجودا في زمننا هذا ؟؟؟؟

[أمل حياتي]

الاخت ام زياد

الاخت رضوي

زي ما بيقولوا عندنا بالخليج كفيتوا ووفيتوا

ونقلتوا وجهة النظر صح

لسه لينا عوده

الأخ عبدالمطلب حارجعلك بعد ما اتفرج عالفيديو

تم تعديل 23 أكتوبر 2010 بواسطة حمال الأسيه

[قلب ابيض]

الموضوع كبيييير على فكره ...انا مستمتعه بجميع الاراء رغم اختلافها

وبالطبع لى راى الشخصى جداااا فى هذا الموضوع ولكنى أوثر ان ارجئها الان

فقط وددت ان اسجل متابعه باهتمام

واعجاب برأى بنوته المحاورات رضوى

رزقك الله بسى السيد 2010 مما تمنيتى ياااارب

[قلب ابيض]

الفيديو ده ايه علاقته بالموضوع ؟؟؟؟؟

[أمل حياتي]

الأخت الفاضله لماضه مصريه جدا

علي فكرة بقي.....انا قناعتي الشخصية....الست مهما كانت قوة الشخصية او مستقلة و ده اللي بيخوف كتير من الرجال...(عشان دايما عايزين تفرضوا السيطرة)....بيكون احتياج الاحتواء من رجل هي ترتضيه لنفسها.....اكبر

لانها جربت تلعب الدورين.....و بتحن انها تلعب الدور الانثوي.....مع من ارتضته لنفسها و اكتفت بيه...مع انه ميكنشي لا الاغني و لا الاذكي و لا الوسم.....لكن بيحقق ليها الجانب ده

اتفق معاكي تماما ده اللي بنتكلم فيه

[ذهبية]

هل لا يزال سى السيد موجود فى زمنا هذا ؟؟؟

اكيد موجود بس على حدود ضيقة جدااا سى السيد الصح اللى بتتمناة اى امراءة

بس ليا نعليق ممكن يغضب الستات انا ست و اسمحوا ليا اهاجم الستات شوية هى لية الستات مش مريحة نفسها لية غاوية تعب لية دايما مش عاجباة حالها مش باكلمك لوحدكم باكلم نفسى معاكم باحس ان الست لازم مهماالرجل عمل لها برضة فية حاجة ناقصة مش موجودة

لية دايما بتدور على سلبياتة بنكاش علشان تعظمها و تكبرها و تعيش فيها و بيها فى الاخر تصدقها و تقنعة بيها

يا جماعة اى حياة اى ازواج اى راجل و ست ليهم عيوبهم وسلبياتهم و مميزاتهم

مين قال ان الراجل لما هيكون سى السد زى ما هى عايزة مش هترجع تزهق و تقول شخصيتى و كيانى و يرتنى اشتغلت و خرجت

ومين يقول ا ن الراجل دلوقتى عايز اللى تقعد فى البيت و اللى تكون تحت طوعة حاضر و نعم و اللى تشوفة يا سى السيد

ومين قال ان الاولاد عايزين الام اللى ملهاش شغلة و قاعدة تحت رجليهم رايحين فين و جاين منين و بتتدخل فى كل حياتهم

لا الست بقت امينة و لا الراجل بقى سى السيد

لا انتى و لا غيرك هيقدر يغير من شخصية اى راجل او اى ست انتى بتخدية شروة كدة بعيوبة و مميزاتة بتتعودى على بتقدرى علية و بتحاولى تغيرى الباقى و هو كمان بيخدك زى ما انتى كدة

[masraweya]

السلام عليكم

تعليق صغير

كلامك يا حمال الأسية كلام واحدة تعبت و عايزة ترتاح

احنا بنحمل نفسنا كتير .. كاننا عايزين نثبت اننا نقدر نعمل كل حاجة .. و غالبا الرجالة بيسيبونا عشان يريحوا نفسهم (خليها تشيل) .. نقوم احنا نحن لفارس الاحلام اللي في الروايات و الأفلام ..بيحارب الدنيا كلها بإيد واحدة .. حامي الحمى اللي ما بينساش يفاجئها بوردة (أو هدية!) و اللي كل مهمتها انها تكون موجوده في حياته (ملهمته) .. حتى لو الراجل ده موجود , بعد شوية أكيد هيزهق .. غالبا هيبقى محتاجها تشاركه مشاكله .. تفكر معاه .. تشيل جزء من المسئولية .. يحس انها يعتمد عليها مش كل حاجة هو اللي يعملها

[أمل حياتي]

تحياتي وسلامي للأخت ذهبيه

كلامك صح بجد جايز لو لقت سي السيد جايز ما يعجبهاش الحال

بس سي السيد ده لازم يكون مالي القلب والعقل والعين

انا باتخيله دايما في اغنية تمثل اعلى درجات الحب والإندماج بين شخصين

وهى اغنيه صباح

((( عاشقه وغلبانه والنبي ما اقدرش افوته والنبي

ده أنا كل حته في توبي دايبه في هوى محبوبي ))

دي الكلمات التي بتعبر عن حالة حب سي السيد بس هوه فين

تم تعديل 24 أكتوبر 2010 بواسطة حمال الأسيه

[أمل حياتي]

كلامك يا حمال الأسية كلام واحدة تعبت و عايزة ترتاح

الأخت مصراويه bv:-

ايوه تعبت وعايزه ارتاح عايزه سي السيد

الكل بيخاف مني وعايزه حد يخوفني هههههههههههههههه

[masraweya]

كونهم بيخافوا منك .. لعله خير .. عشان يمكن ما ينفعوكيش

ادعي ربنا و اخلصي نيتك انه يرزقك الزوج الصالح اللي ترتاحي معاه

نصيحة: ما تظهريش الرومانسية دي قوي لانها غالبا هتتفهم غلط

ناس هتستغلها و ممكن تتعبي

مش المطلوب انه يخوفك .. لكن انه يتعمله حساب و يفرض هيبته و احترامه

ربنا يرزق الكل أزواج صالحين

[أمل حياتي]

احنا تجوزنا وشبعنا جواز

بس لسه بندور سي السيد ههههههههههه

[masraweya]

يعني عايزة زوجك يتغير للصورة اللي بتتمنيها؟

[moory]

كلامك يا حمال الأسية كلام واحدة تعبت و عايزة ترتاح

الأخت مصراويه bv:-

ايوه تعبت وعايزه ارتاح عايزه سي السيد

الكل بيخاف مني وعايزه حد يخوفني هههههههههههههههه

بخخخخخخ

ههههههههه

سي السيد موجووود،

وطوول ما انت بتفكري فييه، اكيد هتلاقيه فى يوم من الايام

[شريف مان]

يعنى سيد السيد ( يحيى شاهين ) كان عدل ... دا كن منيل بنيله

جوه بيته أسد على زوجته واولاده وبره بيته قطه مع الراقصات

مش عارف ليه الستات ميعجبهاش العجب

الرجل هادى ورومانسى وحنين وقلبه قلب خصايه .. يبقى وحش .. وعايزين واحد حمش

الرجل عصبى ويدخل البيت كله يقفله انتباه ... يبقى قلبه قاسى قوى قوى

حيرتونا معاكواااا

لا سي السيد ولا غيره .. ما عندنا رسولنا الكريم ياريت نحاول نعمل زى ماكان عليه الصلاة والسلام بيعمل

فاصل ونواصل

[مغتربة]

كلامك عين العقل وانا معاك ولا اقصد بسي السيد هو ما دار في المسلسل ولكنه تعبير عن الرجل القائم بكل مسئولياته

جميل جدا و عين العقل

كلنا كده اكيد معاكى فى اهميه تربيه الرجال على القيام بكل مسئولياتهم

بس برضه مش فاهمه دا ايه علاقته بقعاد الست من خروجها

يعنى الحمد لله البنت ربنا رزقها براجل بمعنى الكلمه دا برضه ايه علاقته بانها تشتغل و لا متشتغلش

ما هو ممكن راجل بمعنى الكلمه بس ظروفه صعبه و هى عايزه تساعده

ما يمكن راجل بمعنى الكلمه علشان كدا عارف اهميه الشغل ليها و موافقها بالتراضى عليه

ما يمكن راجل بمعنى الكلمه لكن هى عندها وقت فراغ كبير عايزة تستغله

ما يمكن راجل بمعنى الكلمه لكن ما بيحبش الست الى مبتشتغلش

ما يمكن و ما يمكن ليه خلط الاوراق كدا

حضرتطك تعبانه من الشغل سبيه سهل قوى صح

لكن معلش فى غيرك مش تعبان منه و لا حياته مدمره و لا اولاده متشرده و موفقين امورهم و مرتاحين

لو اتكلمتى عن الموضوع كمشله شخصيه مفيش مانع لكن انا ضد كل التعميميات الى حضرتك اطلقتيها من اول الموضوع دا على طول الخط

[لماضة مصرية جدا]

احنا تجوزنا وشبعنا جواز

بس لسه بندور سي السيد ههههههههههه

السلام عليكم و رحمة الله و بركاته

استاذتي الفاضلة

انا عارفة ان التوبيك ليس شخصي...و إنما كل حد فينا بيحاول....ييفكر...او حتي يتنهد بصوت عالي

بس في بداية الموضوع تخيلت اني بتكلم واحد لسه مش متجوزة....تمام

عارفة كنت هقولها ايه

كنت هقولها....مينفعشي تخشي ارتباط بتوقعات مسبقة....او بقوالب...او بصورة في دماغك....لان يا حبيبة قلبي من جوه هتنصدمي

مش عشان اللي بتقابليه هيطلع وحش...ما هو مش معقول يعني كل الناس وحشين

لكن علشان انتي هتبقي مظبطة دماغك علي فورمة معينة و مافيش مرونة انك تدي الشخص اللي قدامك اي مساحة انه يوريلك ان عنده حتة تانية....ممكن تكون مختلفة كتير عن اللي في يوم حلمتي بيه

ممكن اقول مثال...هو خفيف...بس ممكن تقيسي عليه حاجات اكبر

في يوم ما تخيلتش اني ارتبط مثلا بشخص اصلع....(اه عندي تمييز عنصري)...معرفشي...يعني دي عقدة مثلا و لا ايه

لكن متعرفيش ساعة النصيب يا بنتي.....تلاقي نفسك لبستي في قلقاساية....اصلك وقتها لقيتي حتة تانية في الدماغ اللي متخيلتيش انها تعجبك....بس لقيتي صامولة ظبطت الدماغ عندك

و قيسي بقي عليها حاجات كتير

لو تخيلنا برضه ان واحدة متجوزة.....و لسه بتدور علي سي السيد...اللي تاه في مولد الدنيا و المسئوليات

برضه هقولها

بيتهيالي بعد فترة من الجواز ...(حوال شهرين يعني....ههههههه)... الناس بقي بتمل من بعضها....طب يبقي السؤال هل فيه فرصة بجد ان كل واحد فينا انا او هو ...نشوف بعض بشكل جديد

مش قصدي انك تضربي شعرك في الخلاط.....و لا انه يفرق الشعرة اليتيمة اللي حيلته...(ما هو احنا افترضنا ان النشان جه علي احمد مكي ...ههههه)

قصدي اكتشفوا بعض انسانيا

يعني خليه صاحبك....و كوني انتي ليه صاحبته

اعملوا حاجة هبلة مع بعض...اه و ربنا هبلة.....بجد هتخرجوا بره خنيقة الدور بتاع الراجل و الست المودام

طب اعملوا حاجة خير لربنا مع بعض......بجد هتلاقي كتفك في كتفه.....و هتبصي عليه من بعيد...و هيبقي جواكي نفس نظرة الاعجاب اللي تتمننا بيه الجوازة....من سنين فاتت

لو بتحبي ان حد يخاف منك...او بمعني اصح...(يديني علي دماغي....بس في اوقات...و الا دماغي تورم بقي)...يبقي ابعتله رسالة كده مش مباشرة....انا بحب ايه.....و بستمخ من ايه

ممكن من فيلم....اروح اخترعله قصة.....انكشيه يا فوزية....كده يعني

لازم توصليله انتي بتحبي ايه....مينفعشي نفضل بنمثل علي بعض عمر ان احنا مبسوطين....عشان بنعمل حاجات بتشبه الناس المبسوطين...بس جوانا مش كده

طلعي اللي جواكي....بس من غير ما تجرحيه.....من غير ما تحسسيه ان اللمعة اللي في عينيكي ناحيته انطفت...

ع جنب بقي

كل راجل بيحب بالونة سي السيد...(بيتهيالي يعني)....بيحب يتملي...يتنفخ....امسكي المنفاخ...و انفخيه...بس باللي يبسطك انتي كمان

دي وجهة نظري

معذرة علي الاطالة

و ربنا يقر عينينا بازوجانا و زوجاتنا في الدنيا و الاخرة

[Simba]

تمتلأ أمثالنا الشعبية بترسانة من الحديث عن الزواج والرجال والنساء ويعجبني هذا المثل

( أبنك علي ما تربيه وجوزك علي ما تعوديه ) وأراه أقرب للواقع ويتفق تماما مع مقولة كوني له جارية يكن لك ملك

شوه الأعلام تمام معني الأنوثة وخرجت علينا جمعيات تنادي بالمساواة وحقوق المرأة حتي جعلتها من أنثي وديعة إلي مخلوق مستذئب إلي من رحم ربي وبقت الأنوثة تطل علينا من قصائد الشعراء واللوحات الزيتية والأفلام الكلاسيكية

وببلاهة شديدة خرجت علينا اربع فتيات يطرقون عالم الأدب بكتاب اسمه ( التخلص من أدم ) ورأيت فيديو يستضيف أحداهن وهي تقول وجود الأنثي لا يرتبط بوجود الرجل وبالحرف قالت ( جيت جيت اهلا وسهلا ما جيتش خلاص اتس اوك الدنيا مش هتقف عليك يعني )

شخصية سي السيد ليست عنصر مفقودا فأن كل رجل لا يعود إلي صباه ألا في حضور أنثاه واعتقد ان الرجل المتصابي في الحانات علي حسب رؤية الفيلم لا يتكلم عنه هذا الموضوع

قال سقراط : عبقرية المرأة تكمن في قلبها وأراه قد صدق فأن زرعت المرأة بذور حبا يقينا ستجني الحصاد احتواء ودفء وكما قيل ايضا المرأة زهرة يفوح ريحها في الظل فأن وجدت ظل أمان ملئت دنياها عبيرا ويبدو وكأنها مسئولية مشتركة بين الرجل والمرأة أن يكون هناك تناغم بينهم والا فكيف ستزرع المرأة بذور الحب في وجود رجل لا يمنحها ويمنح قلبها الأطمئنان والسكينة متناسيا أن أختارته من دون الرجال

ويقول المثل المصري ( اللي يقول لمراته يا هانم يقابلوها علي السلالم ) وليس المقصود هنا خضوع الرجل للمرأة فالمقصود هو محافظته علي كرامتها بين أهله والمعارف وتقديره لشانها

ومثل مصري اخر يقول ( اللي يقول لمراته يا عورة تلعب بيها الناس الكورة ) وهكذا الامر فان احترام المحيطين بها نابع من أحترامه لها

وفي النهاية فيه مثل كويتي بيقول

( شاور حرمتك واعصاها) مش علشان عايز يخالفها في رأيها وخلاص بس تقدير لها حتي لو عارف ان ارائها مش بتكون دايما صح

سي السيد موجود

وامينة موجودة

لكن احنا اللي بنشكل الحياة دي علي حسب طباعنا وهوانا

تم تعديل 24 أكتوبر 2010 بواسطة سمبا

[masraweya]

الله ينور عليكي يا لماضة

كنت هكتب حاجة مشابهة لردك بس قلت استنى إجابة على سؤالي عشان ما افترضش حاجة

[لماضة مصرية جدا]

السلام عليكم ورحمة الله وبركاته

من هو سي السيد الذي نريد التحدث عنه ؟؟؟؟؟؟؟ وماهي علاقته بزوجته ( ماقولنا خلاص مافيش حاجة اسمها أمينة ومش مفضل انها تكون ) ؟

سي السد

- رجل يحترم كلمته

-يحترم زوجته

- يتحمل مسئولية بيته وأسرته

- يشارك في كل صغيرة وكبيرة في بيته

- على علم ودراية كاملة بكل مشاكل ومتطلبات أبناؤه

- يحب زوجته ويقدرها

-حازم

-حنون

-طيب القلب

-واسع الادراك

-غيور علي زوجته وبيته

- صديق لأبناؤه ............ يحترموه ويخافون من غضبه ( مش بيخافوا منه )

- حبيب لزوجته ........... يحترمها ويشاركها كل الحياه ( فهي شريكة حياته ليست جاريته ............... ولا أتحددث هنا عن الندية )

- يبذل قصارى جهده من أجل رعاية أسرته والوصول بها لبر الأمان

- عندما تخطيء زوجته لايعنفها ............ وإنما يكتفي بتلك النظرة المعاتبة التي تشعرها بخطئها وتجعلها تسعي من أجل اصلاح خطئها .......... خوفاً علي حبه لها

- عندما يخطيء هو يعترف بخطئه ............. ولايتردد في الإعتذار

- رومانسي أخر حاجة .......... تعشقه زوجته

- وقور يحترمه الناس وتفتخر زوجته به

- مثقف واسع الأفق

السلام عليكم و رحمة الله و بركاته

يا لهوي يا رضوي

حطيتي يا امي 20 بند عشان سي السيد بل الهوا طربوشه

بصي مع انهم كتير حبتين

بس خليني ااقول.....فيه...و موجود....و الحمد لله رب العالمين....و ربنا يخليهم يا رب...(ايه ده انا حاسة اني ماسكة مبخرة و بقرا المعوذتين و آية الكرسي...واجب برضه)

بس اسمحيلي اختصرلك الليلة دي في كلمة واحدة

يكون "ابن ناس"

و حطي بقي تحتيها اللي انتي عايزاه....و ابن ناس مش هنا لا هو معناها عيل فافي....و لا معاه عربية و رصيد

بالعكس ممكن يكون من اسرة متواضعة جدا....لكنه اتربي ع الفطرة

اتربي يعني ايه مسئولية

اتربي يعني ايه يحاسب ربنا فيكي

اتربي انه لام يدي...مش ياخد و بس

اتربي انه إزاي يدخل الفرحة علي اهله قبل اي حد تاني

اتربي انه يشيل الهم....حتي مجرد لما يكون فكرة طايرة...في الهوا.....عن اقرب الناس ليه

اتربي

اتربي

اتربي

اتربي

اتربي

و هفضل اكتب كلمة اتربي دي من هنا لغاية ما اموت

اللي بوصف فيهم دول....موجودين

جدا

جدا

جدا

بس للاسف مينفعشي اتجوزهم.....أصلهم اخواتي الاولاد.....بس ع الاقل عرفت معني الراجل اللي بجد معاها...و ربنا يقوينا بقي علي الباقي

مساااااااكي دعاء....بقرة العين

[Om Zayd]

السلام عليكم و رحمة الله و بركاته

فيه حاجة مهمة.. ما ينفعش سعادتك و استقرارك النفسي يكون معتمد تماما و كليا على الطرف التاني أو الاولاد

محتاجين شوية استقلال عاطفي

شوية "دهشة" .. مش بعد سنتين تلاته يسقوا حفظوا بعد .. و يبتدي الملل

ربنا يسعدنا جميعا

تم تعديل 24 أكتوبر 2010 بواسطة Om Zayd

[أمل حياتي]

المناقشه جميله جدا وثريه

ارحب بيكم كلكم ومقتنعه ان في اتجاهات اخرى لرأيي

وانا رايي ان الست مكانها البيت مهما علت ومهما ارتفعت وما عملتش كده ليه مهو احنا نرجع لنفس الأساس

ان مفيش سي السيد بالمعني الكامل اللي يقعدني انا وغيري في البيت

لو حنتكلم عن حاله شخصيه انا لا تعبت في تربيه اطفالي ولا تمرمطت في المواصلات والشغل وكنت مرتاحه في بيتي

ووصلت الحمدلله لأعلى المناصب في عملي

ومع ذلك بأقول الست مكانها الأساسي البيت وسي السيد يحطيها بكل الدعم المادي والمعنوي

وهنا معني العلاقه بين عمل الست وسي السيد