فرجة و تسلية ببلاش ... الإعلانات فى المحاورات و غيرها

[honest reader]

دائما أتجنب الإعلانات ليه مش عارف و بالذات على الإنترنت و عندى شعور داخلى عميق برغبة فى حذف الإعلانات من المسلسلات و الأفلام على التليفزيون يمكن الرغبة دى عادية لأنها تقطع الإنسجام مع الفيلم أو المسلسل و جايز ده فى العالم كله.

و مع ذلك استمتع بقراءة الإعلانات و الكتالوجات أيا كانت و اسعد لما يصلنى كتالوج ميل اوردرز

فكرت من كام يوم فى سلوكى و موقفى من الإعلانات و لاحظت فى محاورات المصريين عدد من الإعلانات و كذا فى كذا موقع أدخلهم بإنتظام و لاحظت حاجة غريبة ان الإعلانات هنا بتتغير كثير و شاملة حاجات كتير يعنى عنب الشام و بلح اليمن.

قررت إنى أعطى جزء من وقتى على النت للإعلانات وجدت فيها متعة و معلومات جديدة.

هل أنا وحدى فى وجهة نظرى دى ؟ ما حبش أدخل موقع غعلانات بس لكن أحب يكون فيه اعلانات ممكن ادخل ليها و القى نظرة هما طبعا بتوع الإعلانات مش حيضربونى على غيدى علشان اشترى.

ياترى حد منكم له موقف من الإعلانات و ايه تفسيره و هل تغير هذا الموقف قريبا ؟

تم تعديل 24 أكتوبر 2010 بواسطة honest reader

[Simba]

الفيس بوك اكبر موقع تعارف شهده الأنترنت يضج بالاعلانات ولكنها غير مزعجة اطلاقا تجدها في اقصي شمال او يمين صفحتك الشخصية

المسالة ليس في حبك للاعلانات ام لا المسالة في طريقة عرض الاعلان

عن نفسي لا احب ان افتح اي موقع ثم افاجأ بفتح صفحتين او ثلاثة فجأة من الأعلانات واجدها مزعجة جدا وهناك من يستخدم برامج لوقف لمثل تلك الصفحات

[nightmare]

كويس انك لحقت غيرت إسم الموضوع , أنا قلت إيه "الإهلانات" دي , تكنولوجيا جديدة زي ال reputation كده والا ايه.:lol:

بخصوص الإعلانات بصراحة بتحرق دمي وبتعصبنى لدرجة انى بقيت أكره التليفزيون بسببها , وخاصة القنوات المصرية وخاصة خاصة بقي قنوات بنوراما دراما دي , اللى تلاقي المسلسل يبدأ الساعة 5 مثلاُ ينتهي الساعة 8 , كل 10 دقايق قدامهم بتاع 30 دقيقة اعلانات لحد ما تخليك تنسي انت كنت بتتفرج على ايه أساساًmd2:

والمشكلة ان معظمها اعلانات نصب من وجهة نظري , خط المعلم سلومة وخط مين اللاعب اللى اتصاب عشر مرات الموسم ده؟ وخط مين الممثلة اللى عملت 4 عملية تجميل في حواجبها ؟ واعرف واكسب 1000 زرار, وكله كوم واعلانات الأطباق والشوك والمعالق واللحفه والبطاطين دي كوم تانى.

بخصوص اعلانات الإنترنت بكره ان افتح موقع الاقي فرقع في وشي 4 او 5 صفحات ولا ليهم أي لازمة في الحياة , كلها العاب ترافيان واختبر ذكائك وهبل في الجبل, فالواحد بيطر يقعد يقفل فيهم او تستخدم برنامج لغلقهم, وعلى رأي أخونا سيمبا التنظيم حلو , فيها ايه لما الاعلان يكون خفيف كده على جنب بدون إزعاج, بتبقي حاجة شيك واحياناً كثير بتيجي منى وانا اللى افتحها اشوفها.

مع تحياتي

[ذهبية]

اى شىء لو زاد عن حدة انقلب ضدة

طبعا انا مع الاعلانات لكن بحدود و باوقاتها المناسبة مش اللى عمال على بطال

طبعا الاعلانات شىء مهم لاى منتج علشان يكون فية اقبال علية و دعاية مهمة بلا جدال

لكن الفكرة انة بيتحشر فى كل حاجة و فى اى وقت بدون استئذان منك او من غيرك

اعتقد ان افضل وسيلة لحل هذة الازمنة هو فتح قناة خاصة للاعلانات و الشخص هو اللى يختار متى يفتحها و فى اىوقت بمزاجة هو و راحتة مش اجبار علية

انا مع التخصص فى الاعلان بمعنى لو انقسمت قنوات و تكون تخصصات مختلفة بمعنى قناة للاجهزة الكهربية بكل انواع الشركات الخاصة بها

قناة خاصة بشركات السياحة و قناة خاصة بالملابس و الغذاء و هكذا ا

زى ما بالاقى قنوات مخصصة للاعلانات و ارقام التليفون اعتقد ان التجربة دى فريدة اننا نطبقها على قنواتنا

[Advisor]

تم إخفاء مشاركتين للفاضل honest reader تحوى إعلانات مختارة.

ما سبق كان إستهلالا لابد منه

الفاضل honest reader رجاء العلم أن الإعلانات التى تراها أنت على محاورات المصريين تختلف تماما عن التى أراها أنا أو يراها عضو ثالث حيث أن إختيار الإعلانات لشخص ما يتوقف إلى حد كبير على الموضوعات و المواقع و عبارات البحث التى يستخدمها أو تستخدم من على جهاز الكومبيوتر المعين.

و الضغط على الإعلان يؤدى لمدفوعات نقدية(ضئيلة للغاية) لإدارة الموقع - محاورات المصريين - و ممنوع الدعوة للضغط على الإعلانات لأن ذلك فيه ظلم و غبن لصاحب الإعلان حيث أنه يدفع مقابل الرؤية التلقائية الطبيعية للإعلان و التى قد يستتبعها الشراء لو كان الإعلان عن سلعة.

و العادى فى مواقع ال forums مثل موقعنا هذا أن المتصفحين عامة لا يضغطون على الإعلانات إلا فيما ندر و بالتالى العائد منهاضئيل للغاية لايذكر