هل تؤيد قرار منع التدخين في الاماكن العامة بالإسكندرية ؟

[se_ Elsyed]

بالرغم من إني مش بأطيق الراجل عادل لبيب ده لأنه جاء بعد واحد عمل من الأسكندرية أجمل محافظة في مصر وهو عبد السلام المحجوب بالرغم من إنه كان هليب برضوا .. لكن عمل حاجه للبلد ...

فلما جه عادل لبيب رجال الأعمال اللي كانوا بيصرفوا على الإسكندرية رفعوا إيدهم .. فأبتدى يتخبط في قرارته ..

إلا إن القرار ده بالذات محترم وحضاري لأقصى درجة لو تم تطبيقه بشكل صحيح ...

صاحب مقهى: قرار المحافظ بمنع التدخين في الاسكندرية سيشرد 20 ألف عامل

10/25/2010 2:16:00 AM

كتب: مصطفى مخلوف -

المؤيدون.. القرار تأخر كثيرًا وكان يجب أن يطبق منذ فترة طويلة، المعارضون.. القرار أضر بالألاف ولا يوجد بديل.. هكذا ما بين مؤيد ومعارض لا يزال الحديث حول قرار محافظ الاسكندرية بمنع التدخين في الاماكن العامة.

ففي مداخلة هاتفية لبرنامج 90 دقيقة على قناة المحور، قال مالك إحدى الكافتريات بالأسكندرية، أن قرار اللواء عادل لبيب بمنع التدخين في الأماكن العامة، قد يؤدي إلى تسريح ما لا يقل عن 60 % من عمالة تبلغ 35 ألف فرد يعملون في مقاهي وكافيهات ومطاعم تسمح بالتدخين.

وأضاف المتحدث الذي رفض ذكر اسمه، أن هناك 1700 مقهى وكافيه مسجلين في سجلات الغرفة التجارية بالاسكندرية، وكلهم اصابهم ضرر بالغ جراء تطبيق هذا القرار، مما أدى إلى انخفاض المبيعات بنسبة 75%.

شاهد الفيديو

أزمة منع الشيشةوطالب صاحب المقهى السكندري، بتطبيق قانون البيئة، كما تنص شروطه في الاسكندرية، وهو ما طبقوه بالفعل - حسب تأكيداته - وهو أن يكون هناك حيز للتدخين يوجد به "شفاطات هواء"، و"ستائر هوائية"، كما طالب بمعاملتهم أسوة بالمحافظات الأخرى التي يسمح فيها بالتدخين في الأماكن المفتوحة.

وقال إن هناك غرامة 100 على الزبون و10 آلاف جنيه على صاحب المطعم، إذا سمح بالتدخين داخل المطعم، مضيفًا أنهم على الأقل يحتاجون إلى 4 شهور لتدريب العمالة الموجود على مهام أخرى غير عملهم بخدمات الشيشة.

يذكر أنه تم تدشين منذ شهر مبادرة "الإسكندرية خالية من التدخين"، وشدد المحافظ على تكثيف الحملات الأمنية على المقاهى والمواصلات العامة والمصالح الحكومية والمنشآت السياحية، لتطبيق الغرامة الفورية على المخالفين والالتزام بتطبيق المبادرة والذى تم تأجيله 5 شهور لمنح أصحاب المقاهى والكافيتريات فرصة توفيق أوضاعهم.

كما يشار إلى أن هناك عقوبة للسائقين فى حال تدخينهم، بسحب سيارات الأجرة واحتجازها لمدة أسبوع، بالإضافة إلى غرامة ألف جنيه لكل من يضبط بالتدخين فى المواصلات

[اغابي]

اوك انا ضد التدخين فى الاماكن العامة - اصل ريحة السجاير وحشة اوى

لكن

>

>

يعنى

>

>

>

>

>

>

الشيشة ايه ذنبها - حرام تتاخد فى الرجلين

[mekkawy]

و الله قرار محترم من حد محترم .. و بعيد خالص عن الكلام في الدين .. التدخين ده شئ قذر .. بجد و الله .. تلاقي المدخن كدة صوابعه قذرة و ملوثة طول الوقت و ريحته يــــــــع و صوته محشرج و يخوف .. مع احترامي لشخص اخواننا المدخنين الا ان كلامي عن عادة التدخين كعادة سيئة.

غير ان التدخين بيمسك في المكان .. طب و الله تلاقي سجادة الصلاة في مكتب فيه مدخنين .. متعرفش تسجد عليها من كتر الدخان اللي ماسك فيها .. لو ركب معايا حد مدخن يا ويله و سواد ليله لو دخن سيجارة و لو حصلت و ده ناااادر جداً العربية بتمسك فيها الريحة اليــــع بتاعت الدخان فبأروح فاتح الشباك و خد فوشك بأة هوا سخن عشان تحرم تدخن :lol:

يلا اقعدوا بالعافية

على جنب ....

ايه يا اغابي .. متعاطفة مع الشيشة ليه ها ؟؟ ليه ها ؟ smk:

مكاوى .. أنتي سموكرز كوميونيتي

[pink rose]

قرار محترم جدا

بس يا رب ما تبقاش الحملات دي زي الغربال الجديد

يعني يومين يلموا الغلة و بعدين يكبروا دماغهم

wst::

[nightmare]

خبر رائع طبعاً , وياريت يطبق فى كل محافظات مصر وما يبقاش مجرد حماس في الأول وبعد كده ترجع ريمة لعادتها القديمة , لان كان فيه قرارات مماثلة صدرت قبل كده واتطبقت فترة ورجعنا تانى من ضمنها حظر التدخين في الجامعات وحظر التدخين في الأماكن المغلقة والمكاتب الحكومية.

ومالك كده يا مكاوي يا اخويا شادد حيلك على المدخنيين smk: دول غلابة ومبتلين , ادعيلنا ربنا يهدينا ويبعدنا عنها, واحمد ربك على نعمته ان عافاك منها.

مع تحياتي

تم تعديل 25 أكتوبر 2010 بواسطة nightmare

[pink rose]

خبر رائع طبعاً , وياريت يطبق فى كل محافظات مصر وما يبقاش مجرد حماس في الأول وبعد كده ترجع ريمة لعادتها القديمة , لان كان فيه قرارات مماثلة صدرت قبل كده واتطبقت فترة ورجعنا تانى من ضمنها حظر التدخين في الجامعات وحظر التدخين في الأماكن المغلقة والمكاتب الحكومية.

ومالك كده يا مكاوي يا اخويا شادد حيلك على المدخنيين smk: دول غلابة ومبتلين , ادعيلنا ربنا يهدينا ويبعدنا عنها, واحمد ربك على نعمته ان عافاك منها.

مع تحياتي

يا فتاح يا عليم يا رزاق يا كريم

اصطبحنا و صبح الملك لله

مش عارفه الواحد يكون قاعد في حاله تلاقي ناس عمالة تجيب في سيرته ع الصبح

مالها ريما و اخواتها يا استاذ نايت

تم تعديل 25 أكتوبر 2010 بواسطة remo

[se_ Elsyed]

شيشة .. سجاير .. بانجو .... بلا أزرق

كل واحد حُر ...

بس ياريت عندما نمارس حريتنا لأ نعتدي على حريات الأخرين

يعني جيب الكوكتيل ده كله مع الخمور والبراشيم والترامادول .. وأضربهم في البيت يا عم ويا ريت تجيب الاولاد يضربوا معاك كمان لان الكيف بيحب اللمه ..

لكن إيه ذنب الناس في المواصلات العامة .. او إيه ذنب واحد عاوز يقعد قرأ الجريدة مع فنجان قهوة على أحد المقاهي المحترمة أو في مكان عمل ؟ ...

بس عجبني موضوع تشريد 20 الف عامل في مجال تقديم الشيشة والمعسل ..

على كده قرارت تجريم ومنع المخدرات بتؤثر على قطاع عريض برضوا من الشعب ؟

[moory]

الشيشة تتمنع فى اسكندرية، لا اتوقع و اشك و لا اعتقد و اي داوت على الاخر،،،

ممكن تتمنع فى حي، فى كومباوند، انما اسكندرية بحالها من غير تدخين، هع هع ابقو قابلوني

ده اغلب الناس و الشباب الي بتقعد على الكوفي شوب بتطلب الشيشة قبل المشروب، و يعيني بقى على الشيشة على الكافيهات الي على البحر، من غيرها ما تحلاش القعدة

ده غير السياح و العرب الي ينزلو اسكندرية يصيفو، جيف مي شيشة و ساهلاب، (الشيشة قبل السحلب)

انا مش مدخن، و بكرهش في حياتي قد ريحة السجاير، بس صعب قوي القرار ده يطبق فى مدينة زي الاسكندرية

وزي ما قلت يا سي السيد، وفي ظل قيادة المحافظ الحالي الغير رشيدة بلاوي وكوارث حصلت فى اسكندرية وخاصة موضوع العمارات الي كل شوية تقع، فهوا بيحاول يحسن صورته قدام الناس عن طريق اتخاذ قرارات ووضع قوانين لمصلحة الناس، وقرار زي ده ممكن يقلل السياحة شوية فى اسكندرية، الي هوا اساسا من اهم مصادر الدخل ليها على ما اعتقد،

انا احترمت القرار ده جدا لما سمعته و اتمنى انو يتنفذ فعلا، وبعيد عن الناس الي هتتشرد و السياحة وان التدخين حررام وانها ممنوعة فى الاماكن العامة و المصالح الحكومية، وانها بتسبب امراض سرطان و رئة و قلب و ذبحة صدرية وانها مش بس بتأذي الي بيشربها ده كمان التدخين السلبي بيأذي اكتر الناس الي حوالين المدخن، وان التدخين نوع من انواع الادمان....

السجاير غليت،

[nightmare]

يا فتاح يا عليم يا رزاق يا كريم

اصطبحنا و صبح الملك لله

مش عارفه الواحد يكون قاعد في حاله تلاقي ناس عمالة تجيب في سيرته ع الصبح

مالها ريما و اخواتها يا استاذ نايت

ههههههههههه , اول مرة اشوف حد مسمي اسمه على مثل شعبي , معلش يا ريما عندي دي المرة دي.:lol:

شيشة .. سجاير .. بانجو .... بلا أزرق

كل واحد حُر ...

بس ياريت عندما نمارس حريتنا لأ نعتدي على حريات الأخرين

يعني جيب الكوكتيل ده كله مع الخمور والبراشيم والترامادول .. وأضربهم في البيت يا عم ويا ريت تجيب الاولاد يضربوا معاك كمان لان الكيف بيحب اللمه ..

لكن إيه ذنب الناس في المواصلات العامة .. او إيه ذنب واحد عاوز يقعد قرأ الجريدة مع فنجان قهوة على أحد المقاهي المحترمة أو في مكان عمل ؟ ...

بس عجبني موضوع تشريد 20 الف عامل في مجال تقديم الشيشة والمعسل ..

على كده قرارت تجريم ومنع المخدرات بتؤثر على قطاع عريض برضوا من الشعب ؟

ده بيرجع لسلوك المواطن نفسه يا سي السيد , أنا شخصياً وبدون حلفان لا أدخن مطلقاً في أى مكان عام سواء مواصلات أو في المكتب وغيره , وحتى لما كنت اشوف مدخن في ميكروباص مثلاً كنت اول واحد بتخانق معاه قبل اى حد, ورافع دائماً شعار "كما ان لى الحق في التدخين .. فالآخرون لديهم الحق في إستنشاق هواءاً نظيفاً " , ووالدي الى الآن ووالدتى لم يروني على الإطلاق وفي يدي سيجارة مع انهم يعلمون أنى مدخن, بس ما اقدرش اعملها قدامهم.

والا صحيح هنعمل فيهم ايه ال 20 الف واحد دول , هي البلد ناقصه, طب نسرحهم ببانجو بقي في اشارات المرور والا ايه.:happy:

مع تحياتي

[se_ Elsyed]

وزي ما قلت يا سي السيد، وفي ظل قيادة المحافظ الحالي الغير رشيدة بلاوي وكوارث حصلت فى اسكندرية وخاصة موضوع العمارات الي كل شوية تقع، فهوا بيحاول يحسن صورته قدام الناس عن طريق اتخاذ قرارات ووضع قوانين لمصلحة الناس، وقرار زي ده ممكن يقلل السياحة شوية فى اسكندرية، الي هوا اساسا من اهم مصادر الدخل ليها على ما اعتقد،

عشان نبقى موضوعيين

العماير دي كلها من مخلفات عصر المحجوب اللي كان سايبها سبهلله وممشي نظام " إبرز ... تنجز )

يعني طول ما أنت بتدفع ومفتح نافوخك .... يبقى علي وأنا أعلي ..

لأول مره في حياتي أشوف حارات سد .. وعرضها متر في متر .. ورغم ذلك فيها العديد من العماير المرتفعه فوق الـ 15 دور .. وقريبة من البحر وعوامل الرطوبة والملح اللي بياكل الواجهات بتاعت العماير وبالتأكيد بيأثر على أساسات العمارة وكيانها ...

مش مهم بقى تكلمني عن مشكلة مرور .. ولا العمارة اللي فيها 50 شقة على الأقل لو ربع الناس دي عندهم عربيات هاياكلوها ولا يعملوا فيها إيه خصوصاً إن كللللللللللللللللللللللل المباني دي ما سمعتش عن حاجه إسمها جراج تحت العمارة أو جنبها حتى !!!!

[masraweya]

ومالك كده يا مكاوي يا اخويا شادد حيلك على المدخنيين smk: دول غلابة ومبتلين , ادعيلنا ربنا يهدينا ويبعدنا عنها, واحمد ربك على نعمته ان عافاك منها.

مع تحياتي

ربنا يعافيك و كل مبتلى

بجد حاول .. عادة سيئة جدا .. الموضوع ده آذى أقرب الناس ليا

شوية عزيمة .. و احنا من موقعنا هذا نشد من أزرك و ندعو لك بالنجاح و

التوفيق

ينفع واحد حاصل على وسام المحاورات من الطبقة الأولى يبقى مدخن؟؟

تم تعديل 25 أكتوبر 2010 بواسطة masraweya

[se_ Elsyed]

من الحاجات اللي موديه مصر في داهيه " الصراع بين العقل والقلب "

عارفين إزاي ؟

- في يا عيني بياعه خضار غلبانه بتجري على أيتام قاعده بشوية خضار وجرجير وحاجات من دي .. في قلب الميدان أو في قلب الشارع ..

يا عم سيبها تاكل عيش حرام عليك

تاني يوم .. واحده بتجري على ايتام جت قعدت جنبها تونسها ..

يا عم سيبها هي روخره خلي في كلبك رحمه

يومين تلاته وتلاقي سوق شعبي إترشق في قلب الميدان أو في وسط الشارع وليذهب المارة والسيارات والكل كليلة إلى الجحيم ...

وهذا يحدُث في مصر من الإسكندرية حتى أسوان وجهاراً نهاراً ...

وه بياكل وده بيلهف ... ونغرق في العشوائيات كما يحدث في بر مصر ..

ويرجع يقول لك يا حرام 20 الف هايتشردوا ؟

لأ يا سيدي خليهم ياكلوا عيش ومستشفيات السرطان تتملي ..

[اغابي]

على فكرة عاوزين راى سمبا - لانه بيدخن - سجاير كتيرررررر

؟؟؟؟؟؟؟؟؟؟

[Mr MAGED]

هو اكيد قرار جريء ومحترم

بس بجد يعني هيتنفذ ازاي ده

يعني اسكندرية دي بلد سياحية .. والسياحة معروف انها بتعتمد ع الشيشة

الكافيتريات والقهاوي والمطاعم والبحر

اكيد كلكم رحتوا شرم وشفتوا خليج نعمة .. الشارع الرئيسي

تتخيلوامثلا مكان زي ده يقدروا يمنعوا فيه التدخين والشيشة !!!!

مش عارف .. القرار عاجبني صحيح .. بس باشك في امكانية تطبيقه

تحياتي

[Simba]

ماشي يا اغابي smk: smk:

اولا انا لا أؤيد واشجب وادين واعترض بشدة

أنا مدخن ومدخن شره كمان لدرجة بتمني في يوم يجي وقت تكون رحلة الطيران فيه كراسي مخصصة للمدخنين وبعيدة عن الأخوة الأعداء كمان موصي واحد صاحبي اندونيسي يجيب لي سجاير من هناك النيكوتين فيها 26,. مج ... ايييه امزجة بقي

انا مش مع اني اضايق حد بدخان سيجارتي في المواصلات وبتضايق جدا لما بلاقي حتي راكب مواصلة مع ناس وبيدخن عادي كده كأنه قاعد في البلكونة

لكن انا مش مع منع التدخين في الاماكن العامة

طيب هي المقاهي مالها والسمة الغالبة فيها هي الشيشة وفنجان القهوة وسيجارتين

وبعدين قبل ما يقولوا دخان السجائر ينضفوا الاحياء العادية والشعبية من الزبالة ويتوفر لهم مكان يرموا فيه الزبالة ويتوفر عمال نضافة كافية

الزبالة الموجودة في كل حتة افظع من اي دخان

مش كويس ابدا ان حد يفرض وصايته علي التاني في الاماكن العامة هي اصلا اماكن عامة للجميع وبعدين انا مش هاجي وسط ناس مش بتدخن واقرفهم بسيجارتي الاماكن المفتوحة كتير واللي رايح المقهي ده مش محتاج حد يقوله دخان الشيشة والسجاير بيكون ازاي هناك

انا عارف كويس ان التدخين مش كويس وقد ايه هو مؤذي لكن انا مستحيل احاوي اذي اللي حوالية بدخان السجاير يا اما بكون قاعد مع مدخنين في الاصل او في غرفتي وفي مصر مش بدخن الا في البلكونة

والمشكلة اني مش قادر ابطل السجاير علشان للاسف بحبها

خليهم بقي يطلعوا قرارات في النهاية التدخين هيفرض نفسه لانه موجود والحرب علي التدخين ما تجيش بلوي الدراع ولا بصور مشوهة علي علب السجاير

[akramgroup]

ايه بقى هو فى ايه؟؟؟؟؟؟؟؟؟؟؟؟؟؟؟؟؟

انتوا بتعاملونا كده ليه

بجد مش طريقه عشان انا من يوم ما ربنا رزقنى بـ كادى (اسم بنت مش ولد)

وانا بطلت اشرب سجاير فى الاوض وبقيت بشرب سجاير فى المطبخ تحت الشفاط

بجد ياجدعان حاولوا تحسوا احساسى وانا واقف تحت الشفاط smk: بتعذب وافضل اسرح

شويه فى البوتاجاز وشويه فى التلاجه بحس انى فى الحجر الصحى mfb: mfb: وكل ده وانا مستحمل

وبقول هانت لما انزل اجازتى فى بلدى اسكندريه هابقى اروح كافيهات واشيش بقى براحتى واملى الوجود

كله بالدخان ( حلوة الوجود دى)

وفى الاخر تقولولى ان المحافظ عاوز يمنع التدخين فى الاماكن العامه ؟ طيب فى المواصلات العامه ودى معروفه

والمحلات والسوبر ماركت بردو معروفه والجامعات والمستشفيات والمصالح الحكوميه معروفه بردو

انما فى الكافيهات لالالالالالالالالالالالا امال الناس بتروح الكافيهات ليه عشان يشربوا زبادى خلاط بس :sad:

يعنى خلاص مفيش شيشه بالعنب؟ ولا بالنسكافيه؟ ولا حتى بالكنتالوب ؟؟ كله ممنووووووع

يعنى ياربى لما اخد اجازة من الشفاط بيه اروح اشرب فين؟؟ فى الصحراء

يعنى اروح اعمل سفارى يومين تلاته فى الواحات عشان اخلصلى علبه سجاير واشرب شيشه

لا مينفعش تتلغى الشيشه من الكافيهات ........راعوا ظروفى مع الشفاط يااخوانا

أكرم,,

[Ahmed Anwer]

المتضررين هما المشيشين من أمثالي

بصوا بقه مينفعشي يقول هأمنع !!!

يعني بدل ما مبنفع صاحب القهوة و العمال

أروح أجيب شيشة في البيت و أضر كل أهل البيت !!!

يأما حل دبي

الشيشة في الأماكن المغلقة

يأما حل سوريا

الشيشة في الأماكن المفتوحة

تتقنن بس

[خالد شحاته]

فعلا قرار ممتاز بس عمره اعتقد ما يطبق لانه صعب انت بتشوف في الامكان العامه هي باذات اكتر الدخان فيها لان الناس بتكون جالسه بتسلي نفسها الاول ياسيما وانت بتحجز في الطياره بيسالك الموظف انت مدخن كان فيه مكان مخصص للدخين الان لالا

[engmido]

ارجو ان يصدروا قرار بمنع السجائر فى الدنيا بحالها

بكرهها كره

[شريف مان]

يعنى قرار منع التدخين فى الاماكن العامة ... ويبيعوا سجاير ويكسبوا مليارات

نفسى يجي اليوم االى تتقفل فيه شركات السجاير ويجرم التدخين ونخلص من الشيش والدخان والقرف دا

ياريت يتطبق على مصر كلها مش اسكندرية بس

تم تعديل 25 أكتوبر 2010 بواسطة شريف مان