تساولات ساذجة عن مجلس الشعب 2010

[سكر]

فى كام سوال كدة اول ما اشوف مجلس الشعب واعضاء مجلس الشعب

ومبنى مجلس الشعب وتصويت مجلس الشعب واى حاجة فيها مجلس اللى مفروض بتاع الشعب

تنط فى دماغى وابقى نفسى حد يجاوبنى عليها

السوال الاول: كيف يمكن لوزير فى الحكومة ان يرشح نفسه لعضويه مجلس الشعب

من اين ياتى حساب الوزراء والحكومه اذا كان عضو مجلس الشعب هو الحكومه

لو عرفت تجاوب على السوال الاول اكيد مش هتعرف تجاوب على الثانى

السوال ثانى : كيف يمكن لرئيس مجلس الشعب رئيس ها خلى بالك رئيس ان يكون عضو فى مجلس الشعب

الصراحة مش فاهم النقطه دى خالص

السوال الثالث : ليه مازلت نسبه 50 %فلاحين 50% عمال موجودة بالرغم من ان معظم الاعضاء رجال اعمال

السوال الرابع : كيف يكون شرط الترشيح ان يكون فقط بيعرف يقرا ويكتب ياعالم يا هو دة احنا فى زمن IPAD

السوال الخامس :ايه علاقه ابن الدايرة الى ناجح فى انه يدخل نور وكهرباء ويشغل العيال وينقلهم من المدرسه الى مدرسه (دة لو اصلا عمل حاجة)

مش المفروض فى دوله للحاجات دى وفى قانون وهو فقط بيراقب نتفيذ القانون

كفايه عليكم خمس اسئله لحسن انا شايل ومعبى قوى من مجلس الشعب وعندى اسئله للصبح

وبالتالى تسهيلا على اعضاء المحاورات فى الاجابه ممكن تختار الاجابه الصح من 3 اختيارات

وهى

1- الفساد

2- الفاسدون

3- المفسدون

لو عرفت الاجابه الصح ابعتها على عنوان التالى

1- شارع مجلس الشعب المتفرع من شار القصر العينى

وانت انشاء الله هيتقبض عليك متلبس بتهمة تغير الدستور بالرغم انهم شالوا عدة الدستور

[se_ Elsyed]

موعوووووود

معايا بالعذاب ... يا قلبي

---------

يا حبيب قلبي يا موعود ده موضوع شرحه يطول لأنها

ملهاة ومأساة

ويرجع أصلها إلى الشو والديكور اللي عمله العسكر .. وأستكمله السادات .. وأضاف عليه شوية تحابيش الأخ مبارك

دي مصيبة بكل معنى الكلمة .. أن يكون أعضاء المجلس التشريعي المسئولون عن سن القوانين ومناقشتها ووضع سياسات البلد .. يكونوا بصمجية

والله العظيم كان نائب الدائرة اللي موجود فيها بيت العيلة بالقاهرة - يعني سوري ش هاقول في الأرياف وأهو فلاح ومش حالك - كان بصمجي لا يعرف القراءة ولا الكتابة وكان نائباً لعدة دورات

وزي مات قولت .. كل دوره ينحصر في الوسايط في التوظيف ودخول معهد امناء الشرطة و و و و و

بُص .. هاقول لك قصة ظريفة قوي ... من شهر كده كنت عند واحد قريبي هنا ... فلقيت جماعة من قرايبه بيزوروه ... هما من طنطا ... فواحد بيسأل التاني اللي لسه راجع من أجازة ....

والله العظيم السيناريو والحوار حصل زي ما باكتب كده بالظبط

بيقول له : هو مين اللي هايترشح عندنا السنة دي ... أوعى يكون فلان النائب الحالي ؟

قال له يا راجل لأ طبعاً . مستحيل ... ده الناس بتكرهه .. تخيل .. 5 سنين قاعد في المجلس وموجود معانا في البلد .. لا عُمره خرج حد من القسم عشان عامل مشكلة ... ولا حضر عزا ولا واجب ... ولا حتى الكوته بتاعت الوظايف اللي المجلس بيحددها له نفع بيها حد ..

عكس بقى نائب الأخوان "علي لبن " راجل محترم وبعيني دي شوفته بيعمل قُرعة وأختيار عشوائي للمتقدمين بطلبات توظيف ... وراجل صاحب واجب وبتلقائية في كل المناسبات

قلت يا نهار مش فايت .. بقى هو ده المنطق ؟ قصدي ده هو مجلس الشعب ... عزا وفرح وطهور ووظايف وأقسام شرطة ؟

انا مش خواجه وعارف إن ده بيحصل .... ومش هاقول إسم نائب الدائرة الموجود فيها بيت العيلة حالياً .... لكن هو شخص مُرشح عن الحزب الوطني .. وهو " تاجر مخدرات " مشهود له بالكفاءه والمجهود الوفير .....

مش غريبه .. على فكرة أنا مش من الباطنية أو من كوم السمن .. أنا من القاهرة والله وإبن ناس هههههههههههههههه

فشوف يا موعود ... كيف يستمد نظام فاسد شرعيته ؟

إيه تفتكر هايجيب سيناتورز .. أو لوردات أو ناس متعلمه ومحترمة عشان يقفوا له عالواحده ؟

ولا لازم يجيب كوركات وهتيفه وناس لما أعترضت على قانون الضرايب العقارية من الحزب نفسه راح ملتفت لهم القزم العجيب أحمد عز .. راحوا منزلين إديهم في منتهى الأدب . وتم تمرير القانون ؟....

إذن هناك ما يُسمى " الشيء لزوم الشيء "

نظام ديتكاتوري من سنة 1952 .. كان يتم تعيين الرئيس عن طريق ترشيح اعضاء مجلس الشعب له ...

يبقى لازم يكون الأعضاء شخشيخة في إيد النظام

وما فيش مانع من تطبيق مبدأ إطعم الفم تستحي العين

يعني فعلاً .. كوتة وظايف ماشي .... تأشيرات حج مجانية يبيعوها بملايين ماشي ..... عبد الأحد جمال الدين زعيم الأغلبية الوطنية يقول لك أيوه بنصرف لكل واحد عشرات الألوف من ميزانية الدولة عشان يشبرق بها أهل دايرته ( من أعضاء الحزب فقط .. قالها كده صراحةً ) ... شغال برضوا ...

وخد عندك .. قروض من البنوك ... تجارة مخدرات ... والزغلول الكبير بقى ... مليارات العلاج على نفقة الدولة ... وأبجني يا معلم ..

وبعدين زيتنا في دقيقنا يا عم ... القرار يطلع بأسماء وهمية .... ياخد النايم قصدي النائب من دول القرار يجري به على مستشفى دار الفؤاد ... بتاعت مين ؟

عليك نور . خليك صاحي معايا .. بتاعة وزير الصحة .... يعرقه ... يعني يديله اللي فيه النصيب .... ويروح نفس الوزير لوزارة الصحة ههههههههههههههههه اللي فيها مكتبة .. يصرف المستخلصات والقرارات دي ... ههههههههه شوفت إزاي زي شكة الدبوس ؟

اما عن موضوع ترشح الوزراء لعضوية مجلس الشعب .. فهي لا تحدث إلا في جمهوريات الموز ... أو مملكة بامبوزيا اللي إحنا فيها ويحكمها البامبوزي الأكبر الموجود حالياً دلوقت ..

تخيل وزيرالتعليم مثلاً لو أترشح وكسب .... يروح يحلق شنبة بعد الضهر ويجري يحضر جلسة في مجلس الشعب .. يقدم مثلاً طلب إحاطة لوزير التعليم ... أيوه يا سيدي هو هو والله بس من غير شنب

وتخيل وزير مسئول عن 80 مليون .. لو أجمع أهل دائرته اللي هما 100 الف لهم حق الترشيح .. أجمعوا على عدم إختياره .... يبقى نقول عليه إيه ؟

نقول له : يا فاشل يا فاشل ... ويكمل عادي زي ما حصل قبل كده ؟

ولا نقول له : إذا كنت لم تحوذ على قبول وموافقة 100 الف .. فما بالك بـ 80 مليون ؟ ...

على فكره أنا باحب المتنبي جداً .... راجل عبقري ربنا يديله الصحه هههههه ..

بص كان كاتب إيه من مئات السنين ؟

يا أعدل الناس إلا في معــاملتي **** فيك الخصام و أنت الخصم والحكم

هههههههههههه أهو كده .. يبقى الوزير هو الخصم وهو الحكم في مجلس الشعب ...

يا راجل بتتكلم في إيه ..

ده في أخر دورتين لولا شوية الإخوان المسلمين على المستقلين الأحرار اللي يتعدوا عالصوابع .. كان زمانهم باعوا الدكك اللي أعضاء مجلس الشعب بيقعدوا عليها

أما 50 % عُمال و 50 % فلاحين ..

فعامله زي فقرة الدستور اللي بتتكلم عن الإشتراكية في مصر .... نكته وناس عايشه في عصور ما قبل البالوظه

[Howayda Ismail]

ايه الحقد بتاعكم ده

يعنى الوزير ده ايه غير موظف حكومى غلبان بياخد كام ملطوش اخر الشهر وعاوز له سبوبة يزود

بها دخله عشان البرستيج بتاعه يعنى يروح يشتغل سواق على توك توك ولا يطلع اعارة برة ويفضح الحكومة

طيب ماهو المجلس مجلسنا وبالمرة نفع واستنفع ومحدش غافل عن امتيازات المجلس لاولاد البطة

البيضة اشى بدلات على حوافز على سفر مؤتمرات فى الخارج ومافيش مانع مرافقة الرئيس فى زيارات

خارجية وداخلية وكله بحسابه ماهو بيتعب اهو الراجل ومننساش رشات الحزب الجريئة من حتة ارض

هنا ولا شاليه هناك ولادنا اولى برضه اللى يجن بيجيب وقت منين للوزارة والحزب مع بعض

وفى نفس الوقت الحكومة مش عاوزة اللى يقرفها باستبيان ولا استجواب ولما الطبيخ (القوانين)

يطبخ جوا مجلس الشعب حتى لو حمضان حيكون شهد مكرر وموافقون موافقون يعنى من دقنه وافتله

حكاية بقى 50% عمال وفلاحين ده الباب الخلفى اللى دخل منه امثال كمال الشاذلى والغول ونواب

كل صلتهم بدوائرهم شهادة ميلادهم ولايعرف حتى يروحلها منين الا زيارة وقت الدعاية وادنتم

كأنه بيقولهم ابقوا قابلونى لو شفتوا وشى هنا تانى

فى حاجة كمان مش عيب ان نائب محترم يستغل كرم الحكومة فى تأشيرة او موافقة او علاج مجانى

لان اللى بيجى من الحكومة احسن من عينها العيب فى النائب الغير محترم اللى بيقدم ده للى يدفع

اما كارثة مرشحى المخدرات هى دى الفئة اللى نجحت فى مجلس الشورى الدورة دى وهى نفس الفئة اللى

نازلة قصاد نواب محترمين كل عيبهم انهم اخوان مع الفرق الكبير انهم حزب وطنى

[shawshank]

إجابة السؤال الأول

لأن فلسفة نظام الحكم في مصر هي فلسفة "الباب الموارب". يعني مفيش حاجة بنطبقها كاملة بحذافيرها، لازم نبعزق ونقطع فيها لحد ما الثوب الجميل يبقى خرقة بالية، كده يبقى تمام وعلى مقاس مصر، نروح مطبقينه. ده طبعًا لأن "مصر ليها خصوصيتها" :lol: . أو ببساطة لأنه مفيش نظرية حكم ينفع النظام الاستبدادي الشمولي يطبقها بحذافيرها وفي نفس الوقت يدعي الديمقراطية. فالنظام لقى نظريات الباب المفتوح والباب المقفول ماتنفعش، فراح موارب الباب، في كل حاجة. ومن هنا جت خصوصية مصر :D . أو زي ما الناس الشيك بتقول: "أصبح من المألوف أن تعلن كل دول العالم اعتزازها وتمسكها بالديمقراطية على الرغم من أن نظم الحكم في كثير منها أقرب إلى الديكتاتورية والاستبداد والشمولية، مما جعل البعض يقول عن إيمان أو سخرية إن الديمقراطية لها أشكال متعددة وإن الثقافات المختلفة تفهم الديمقراطية بالمعنى الذي يروق لها ويتفق مع مراميها وأهدافها الخاصة".

النتيجة إن لا احنا رأسمالية ولا اشتراكية ولا بنطبق الشرع ولا الديمقراطية ولا فيه استقلالية لأي حاجة. مش بس كده، ومبنقلش كمان إننا ديكتاتورية أو حتى ملكية. اشمعنا بقى جت على الوزير اللي في السلطة التنفيذية ومش عايزه يبقى كمان في السلطة التشريعية؟

لإجابة بقية الأسئلة، راجع إجابة السؤال الأول :rolleyes:

تم تعديل 27 أكتوبر 2010 بواسطة shawshank

[سكر]

دة مقال مكتوب فى المصرى اليوم عن احوال مجلس الا مش شعب

دعونا اولا نهنئ كل الساده اعضاء مجلس الشعب الذين

نجحوا بالفعل فى الانتخابات القادمه لا تتعجب فالنتائج

سربت و بالطبع من ضمنهم الساده الوزراء فليس من اللائق

ان يخفق وزير فى دائرته نعود لمصرنا الحبيبه و كيف تدار

من المعروف ان هناك ما يسمى بالسلطه التشريعيه وهى

موكله بسن التشريعات و اقرارها و من المفترض ان تكون

تلك التشريعات لصالح المواطن الفقير المعدم الذى ترون

صورته امامكم و تلك السلطه تتمثل فى اعضاء مجلسي

الشعب والشورى و هم الذين يخوضون معارك انتخابيه

ضاريه و ينفقون كل غالى و نفيس ليصلوا لكرسى المجلس

ليجاهدوا فى حصول الفقراء على حياه كريمه بان تكون كل

القوانين لمصلحتهم هم فقط دون غيرهم ثم ناتى للسلطه

التنفيذيه و هى موكل اليها تنفيذ كل ما تم الموافقه عليه

من قوانين و ايضا من المفترض تنفيذها فى اطار مصلحه

فقراء البلد الذين منحوهم اصواتهم و سلموا لهم مصائرهم

كل ذلك هو المفترض ولكن نراجع سويا الصور المعروضه

والتى نشاهد ونرى فيها بعد السيد الرئيس والسيد رئيس

الوزراء كيف هو الحال وزراء فى جلسات تقرير مصير شعب

لا يقتلون الوقت الممل فى حضور الجلسات الا بقزقزه اللب

فهم يعلمون تماما انها فقط لاستكمال العرض المسرحى

وان ما يريدون هو النافذ ولينعم الجميع بتمثيل دوره ولما لا

وحماه حقوق الفقراء كما تشاهدون نيام بل فى غفله عما

يدور حولهم لسبب بسيط وهو انه من البدايه غايتهم ذلك

المقعد الذى اصبحوا لا ينعمون بالنوم الا بين احضانه

وعندما يؤمرون بالاستيقاظ فتكون مهمتهم التصفيق و اقرار كل ما قد مرر وهم غافلون فلا

يدرون على اى قوانين وافقوا وهل تلك القوانين حقا لصالح فقراء مؤتمنون على مصالحهم

ام انها تصب فى صالح من تزاوجوا فى غفله من الضمير و القيم فى عرس المال و السلطه

لا ادرى ان كنت قد استطعت ان اعبرعما بداخلى فانا لست من المتمكنين فى التعرض لتلك

الموضوعات ولكنها بلسان مواطن من مواطنى تلك البلد ملاحظه اخيره هناك صوره اسفل

المجموعه على اليسار قد تكون غير مناسبه و الكلمات و لكنى اردت ان اتسائل هل احد

منكم يعرف من هو هل هو من بيننا يعيش وسطنا فمن يعرفه رجاء ان يخبرنى من يكون

حيث انى اتشكك فى الامر فكلما صادفت مرايه اشعر و كانى اعرفه هل ينتابك نفس الشعور

[se_ Elsyed]

الحزب الوطني عمل حاجه غريبة جداً في الإنتخابات المره دي انا مش لاقي لها تفسير لحد دلوقت .... وحاسس بمصيبة هاتحصل

بأختصار : في السنوات الماضية الحزب زيه زي أي حزب في العالم في كل دائرة بيرشح شخص واحد فقط .. ما ينفعش حزب ينزل إتنين متنافسين قدام بعض ... ده يبقى هبل

ما علينا ...

فكان اللي بيقع عليه الإختيار رسمياً بيحمل شعار الحزب إما الجمل أو النخلة اعتقد او الهلال طبقاً لصفته فئات أو عمال أو فلاحين

واللي الحزب ما بيتخارهوش بيروح نازل مستقل أمام هذا المرشح الرسمي ..

فبيبقوا مسكوا العصايا من النص .... لو نجح مرشحهم يبقى بها ونعمه .. ولو نجح المرشج الأخر .. ففوريرة بيروح منضم للحزب بعد ما يفوز ههههههههههه ويبقى حزب وطني في لمح البصر

وعشان كده الدورة اللي فاتت والدورة اللي قبلها ... لم تتعدى نسبة نجاح مرشحي الحزب الفاشي .. 40 % ... تخيلوا ؟ هما دول الاغلبية وهي دي شعبيتهم

لكن لما عملوا الحركة الزبالة دي الدورة الماضية امام طوفان الإخوان اللي نجحوا بشرف وصلوا لما فوق 70 % وبقوا اغلبية في المجلس

بالرغم من إن النسبة اللي اعلنوها بعد إنتهاء الإنتخابات واعلان نتيجتها كانت نجاح بنسبة 38 % .. يعني نسبة ما تدخلش الحمام حتى

المره دي جمال مبارك عمل حاجه غريبة قوي هو واحمد عز ....

1- الحزب لم يُرشح أحد بل طالبوا كل من لديه النيه في الترشح أن يقدم طلب للحزب مع توكيل للحزب بإتخاذ ما يلزم للترشح ...

2- عملوا هما بقى نظام نقاط وتقييم للمرشحين .. 50 % لمؤهلات وتاريخ العضو 25 % لرأي المحافظ بتاع المدينة فيه !!!!!!!!!!25 % اعتقد لرأي أمانة الحزب ..

3- وقالوا إن التقدم للجنة الإنتخابات للترشح الرسمي هايتم عن طريق الحزب بالتوكيلات اللي معاهم بالأسماء المرشحة رسمية قبل غلق باب الترشح يوم 7 نوفمبر بساعة واحده فقط !!!!!!!!!1

يعني إيه ؟

يعني هايقعدوا لأخر لحظه وما حدش عارف مين مرشحين الحزب ... وبالتالي حتى اللي بيتقمصوا وممكن ينزلوا مستقلين نكاية في الحزب ومتغاظين من الحزب لعدم ترشيحهم .. مش هيبقى لهم فرصة إنهم يترشحوا لإن الوقت أنتهى خلاص

وبالتالي ما فيش غير حلين :

1- إما إن الحزب واثق من نفسه وإنه سيفوز بالأغلبية بشرف .... إبقى قابلني لإن الشرف والكرامة غير موجود في قاموسهم

او

2- إنه هايسحل المرشحين المعارضين بدري بدري وخصوصاً خصوصاً الإخوان ومش هايخليهم يشوفوا النور .. وذلك عن طريق ممارسة اللعبة التي يُجيدها ويلعبها وهو مغمض العينين وبصابع رجله الصغير وهي " التزوير "

[shiko]

:WelEgTks: وخدى بالك انت من الحاجات المتطورة دى ؟؟

طب انا ليه تساؤل واحد فقط ...:quest: :quest: :quest:

بس بالله عليكم ماحدش يضرب ...bsh:)

ها ؟؟

كله ينزل ايديه تحت ...

هو ينفع

ارشح

:egyflag:

نفسى ؟؟؟

اصل لما بشوف الناس اللى مرشحة نفسها بحس انى

ممكن اكوووون

بدرجة البلاهة والتخلف دى بمنتهى السهولة ...

طب الصعوبة بقى فى ايه ؟؟؟

لا بجد ..ينفع ؟؟

قلنا ماحدش يضرب ....

:protest:

[se_ Elsyed]

ينفع ونص كمان

اهم حاجه تكوني بتعرفي تفُكي الخط ... والله باتكلم جد .. يعني تقدمي شهادة نحو الأمية

ويكون بابا مصري ... وكفاية تقدمي شهادة ميلادك اللي بتثبت إن عم أبو شيكو مصري كريم العنصرين

وتقدمي فيش وتشبيه تثبتي إنك تتمتعي بكامل الأهلية وما فيش عليكي قضايه نفقة او تبديد قايمة العفش او حاجه من دي

وتسلمي وتعيشي ...

وتبتدي بقى تتفقي مع واحد بتاع فٍراشة عشان يعمل لك سرادقات في المنطشقة .... وتأجري كام عيل هتيف .. وإنتخبوا شيكو رمز " الصابونة " ودي بقى اللي هاتطهر المنطقة وتنضفها وياريت تبقى صابونه بريحة

ولازم يبقى لك مدير للحملة ( أحم أحم ... ألحقي إحجزيني أصل عندي عروض مغريه من مرشحين أخرين )

متخيلك يا شيكو وإنتي نازلة ضمن 25 % فلاحين ولابسه كده

بس كده الصابونة مش هاتنفع ...

ممكن نختار لك رمز المشلتت مثلاً

يا لهوي عليه مع الجبنه القديمة ... اممممممممممممممممممم أو عسل النحل

وكتابة الله دي تبقى حملة ولا حملة فريزر على رشيد وكدهوت

[ماستر]

مستر س س اظن ان الاجابة الثانية اصح

2- إنه هايسحل المرشحين المعارضين بدري بدري وخصوصاً خصوصاً الإخوان ومش هايخليهم يشوفوا النور .. وذلك عن طريق ممارسة اللعبة التي يُجيدها ويلعبها وهو مغمض العينين وبصابع رجله الصغير وهي " التزوير

ممكن نضيف تعديل بسيط الا وهو:

ان السنة دى مفيش هزار علشان انتخابات الرئاسة ولازم المسرح يكون جاهز ومعد مسبقا يعنى مش هيدخل المجلس غير الاسماء المكتوبة من قبل

وتحية للديمقراطية

[ماستر]

معلش يا موعود ممكن اضيف سؤال صغير على اسئلتك

هو مش الناس كلها كانت قالت مش هندخل الانتخابات من غير الشروط السبعة؟ اية الى حصل هما رجعوا فى كلامهم لية؟

طيب وبعدين ننسي الشورط السبعة ونستنى السنة الجاية لما نوصل للشروط الثمانية؟

تم تعديل 29 أكتوبر 2010 بواسطة ماستر

[shawshank]

اهم حاجه تكوني بتعرفي تفُكي الخط ... والله باتكلم جد .. يعني تقدمي شهادة نحو الأمية

معاليك بتفكرني بواحد كان قاعد جنبي في التختة في إعدادي. فوجئت بصوره متعلقة في الشوارع والميادين ... مرشح نفسه لمجلس الشعب. قعدت شوية أفكر لحد ما افتكرته، وبقيت أضحك كل لما أمشي في الشارع وأشوف صوره :D . بجد حاجة كوميدية جدًا. مش قادر أصدق إن ده ممكن يبقى عضو مجلس شعب. هو بيقول إنه كان بيغش مني في المدرسة :astaghfer: :astonished: ، مع إني والله كنت حريص جدًا وببذل قصارى جهدي إني ماغشش من حد ولا حد يغش مني :shs: ، بس الظاهر إني كنت غشيم في الحكاية دي.

بحب أخرج أبص لصورته وأفتكر وأقول: يااااااااااااااااه ... وأخبط ايدي على جبيني وأنا عمال أضحك

تم تعديل 29 أكتوبر 2010 بواسطة shawshank

[سكر]

الصراحة انا مش عارف اعمل ايه مع كل المتعاونين فى الاجابه على الاسئله

بس ان شاء الله اول لما اجيب الاجابه النموذجيه من مكتبه الفجاله هوزعها على المحاوريين مجانا

وبعد كدة ينفع طبعا ترشحونى عضو فى مجلس اللا مش شعب

المهم نرجع للاسئله

السوال السادس

ليه الحكومه الالكترونيه لم تطبق الانتخابات بالرقم القومى ؟

لو حضرت عرفت ان مشروع الرقم القومى بدا عام 1992

طب اسهل السوال على حبايبنا

ليه مشروع الرقم القومى واخد فرامل يد وفرامل رجل وساحب مرشدين بالرغم ان السعودية بدات مشروع رقم الهويه للمواطن (ورقم الاقامه لاجانب)1993

وشوف الفرق فى الخدمات الالكترونيه والبنكيه المقدمة فى الدولتين

السوال السابع

ليه الحكومه الالكترونيه لاتتطبق التصويت الالكترونى داخل قاعة المجلس اللا مش شعب (اوى حد مخه يروح للتصويت فى الانتخابات العامة)

اجابه السوال دة انا سرقتها من المصرى اليوم

خط فتحي سرور للتصويت الإلكتروني «أحمر» من خط سليمان جودة

٢١/ ١/ ٢٠٠٧

طرح الأستاذ سليمان جودة في عموده (خط أحمر) موضوع التصويت الإلكتروني وأهميته وعدم إمكانية تطبيقه نظرا لضيق القاعة الحالي!! فأرسلت لسيادته رسالة وضحت فيها أن التصويت الإلكتروني حاليا أصبح لاسلكيا ولا يحتاج الأمر هدم القاعة الحالية أو الانتقال لمبني جديد!!

فقام سيادته بنشرها في ١١ ديسمبر الماضي فاتصل به الدكتور فتحي سرور عقب نشرها مباشرة موضحا وجهة نظره والتي نشرها الأستاذ سليمان تحت عنوان (دبلوماسية فتحي سرور!) وبمراجعة ردوده الدبلوماسية نستخلص أنه يمكن تطبيق التصويت الإلكتروني (لاسلكيا) فورا ولا يحتاج الأمر إلي هدم قاعة المجلس الحالية! وأن العمل بذلك النظام سوف يريحه كرئيس للمجلس!!

ولكنه أبدي تحفظه معللا أن فرنسا استخدمته أيضا في الانتخابات العامة إضافة إلي البرلمان، ولكنها تراجعت عنه بسبب اكتشافها ثغرات فيه!..

كما أنه يمكن اختراق النظام والالتفاف حوله، لأن جهاز الريموت كنترول الخاص بكل عضو يمكن التحكم فيه واستخدامه عن طريق عضو غير صاحبه، وبالتالي نقع في مشكلة أقرب ما تكون لتوقيع عضو لآخر في كشف الحضور، أو حتي التصويت نيابة عنه في أي قضية مطروحة علي البرلمان!! وأنه يتمني أن ننتقل عن التصويت اليدوي إلي الإلكتروني في أقرب فرصه ممكنة!!..

ومرت أيام قليلة وإذا ببيان يلقيه الدكتور سرور في المجلس موضحا عدم إمكانية التصويت الإلكتروني في مجلس الشعب نظرا للحاجة لقاعة أوسع!!. دفعني هذا لأن أكتب إليكم موضحا أن ما حدث في فرنسا من ثغرات في التصويت الإلكتروني كان في الانتخابات العامة، وهي تجري علي مستوي شبكة كبيرة تضم جميع أرجاء فرنسا إضافة إلي أبنائها في الخارج!! أما في حالة مجلس الشعب فهي دائرة صغيرة مغلقة محكمة شديدة الدقة..

وبالنسبة لأجهزة الريموت كنترول فهي متشابهة وغير مرتبطة بعضو معين وتوزع علي الأعضاء طبقا لعددهم ولا يمكن الضغط علي زرار الموافقة أو الرفض أو الامتناع عن التصويت سوي مرة واحدة، كما يمكن جمع الأجهزة بعد التصويت بعملية تنظيمية سهلة ودقيقة.. ولولا ذلك لما استمرت عشرات البرلمانات في العالم في استخدامها!! والآن علي أعضاء مجلس الشعب وكل المنادين بالديمقراطية والوضوح والشفافية ـ بعد التوضيح السابق ـ أن يطالبوا مرة أخري بسرعة التطبيق!!

إن الدكتور سرور أستاذ قانون يشهد المجتمع الدولي بكفاءته ، وهو رجل يلقي قبولا من الجميع أغلبية ومعارضة ومستقلين.. كما أنه ظاهرة نادرة من الصعب تكرارها باستمراره ١٧ عاما متصلة حتي الآن رئيسا لمجلس الشعب.. كما أنني أكن له احتراما خاصا نتيجة موقفه الرجولي في قضية أحد أصدقاء عمري الدكتور ممدوح حمزة.. ولكنه يظل المسؤول الأول أمامنا عن سرعة تطبيق ذلك النظام !!..

وأعتقد أن السبب الرئيسي لتأجيل استخدام التصويت الإلكتروني هو القلق من موقف أعضاء الحزب الوطني!! فمع استخدام النظام لن يعرف أحد من وافق ومن عارض!! وسيظهر عدد الحضور بدقة!! ومع هذا علي الدكتور سرور أن يسرع بالتطبيق، بل يمكن أن يطبقه خلال أيام قليلة!!

وعندئذ سيذكر له التاريخ أنه صاحب تلك المبادرة !. وختاما أذكر سيادته أننا ـ أنا وهو والبعض ـ في مرحلة سنية لم يتبق منها الكثير، وسنقف بعدها أمام المولي فتشفع لنا أعمالنا لا مراكزنا وأموالنا.. فهل نحن مستعدون؟؟

مهندس/ حاتم فــودة

[se_ Elsyed]

لأ إحقاقاً للحق وعشان الناس تبقى عارفه حقوقها

جداول الإنتخابات تم تعديلها حسب عنوان كل واحد في بطاقته

ويُمكن لأي مصري الان التوجه إلى قسم الشرطة ليتأكد من أن إسمه موجود ويعرف هو تبع أنهي دائرة .... ومش مهم يستخرج بطاقة إنتخابية لأن يوم الإنتخابات لو راح ببطاقة الرقم القومي هايلاقي إسمه في الجدول ويقوم بالتصويت مستخدماً إياها فقط .

دي تاكيدات حقيقية 100 %

لكن الأغرب هو أن الحكومة لحست كلامها - كالمعتاد - ولن يًسمح للفئة المغضوب عليها والمطروده خارج مصر بالتصويت بعد ما كذا مسئول حلف بالطلاق إننا هانصوت ونلطم كمان في إنتخابات مجلس الشعب القادمة .. اللي هي بعد كام يوم واخدين بالكم

لكن الحكومة بالتأكيد عارفه رأيينا كويس ..

بالمناسبة ... مكسوف أقول لكم على أسامي الدول اللي الإنتخابات بتتم بمنتهى السهوله واليُسر في سفارتها خارج البلاد والمغترب بيروح من غير أي صعوبات يًدلي بصوته ...

لكن حكومة الحزب الوطني حكومة مفضوحه وعارفه إن سيرتها على كل لسان ... وعارفه مقدماً رأي المغتربين في أداءها خلال 30 سنة ...

[سكر]

ويُمكن لأي مصري الان التوجه إلى قسم الشرطة

الله يسامحك يا سى السيد دة كلام ياراجل تقوله

امال الاب يطلع ازاى فى الافلام والمسلسلات ويقول لابنه "يا ابنى انا طول عمرى ما دخلت قسم شرطة ولا محكمة وتجى انت على اخر الزمن تعملها بعد العمر دة كلها "

انت كدة كسرت برواز من باويز السينما المصريه

بالنسبه لاستعلام عن الدائرة الى انت تبع لها كان ممكن الحكومه الالكترونيه النضيفه تعمل ويب سايت تعبان بتلات تعريفه كل الى فيه خانة لادخال الرقم القومى

وتظهر جنبها اسم الدايرة وخلصنا مش انا قلت احنا فى عصر IPAD

موضوع التصويت بالرقم القومى اعتقد انه ممكن يسهل التصويت لكن ايضا ممكن يسهل التزوير

السوال الثامن

يعنى ايه كوته المراة ؟

يعنى تحجز عدد معين من المقاعد وتقول المقاعد دة مخصصه للنساء فقط حاجة كدة زى عربه السيدات بالمترو

هو الموضوع دة مش كدة يبقى فى تفرقه بين الرجل المراة وعدم مساواة واعتقد انه كمان مش دستورى

[سكر]

السوال التاسع

ليه دائما عضو مجلس الشعب لازم ولابد يكون بيجمع بين عمل خاص او عمل عام

لو اغمضنا العين على العمل الخاص ليه نغمض على العمل العام

ايه معنى ان يكون عضو المجلس عضو اخر فى اتحاد كورة ومذيع برامج

او وكيل وزارة او مدير موسسه حكوميه

هو الاخ العضو مش واخد فلوس ومرتبات ضخمة من اجل التفرغ لوظيفته الاساسيه ولو كان ولابد يكون عضوفى مجلس شعب

يبقى ياخد اجازة من عمله الاساسه للتفرغ للعمل بمجلس الشعب

جاءت قائمة الحزب الوطني لاختيار قائمته من الرياضين حافلة بالمفاجآت بعد ان استقر الحزب الوطني على قائمة مرشحيه كممثلين للحزب في انتخابات مجلس الشعب المقبلة وشملت أسماء عدد كبير من الرياضيين وكان من أبرزهم هاني أبو ريدة- نائب رئيس اتحاد الكرة في محافظة بورسعيد.

وأحمد شوبيرنائب رئيس اتحاد الكرة السابق- في مدينة طنطا. و محمود الشامي عضو مجلس إدارة اتحاد الكرة عن مدينة المحلة الكبرى والمندوه الحسيني- أمين صندوق الزمالك السابق- عن دائرة بولاق الدكرور و طارق السيد- نجم نادي الزمالك ومنتخب مصر في محافظة المنيافي دائرة بني مزاروسيد جوهر- نائب رئيس نادي الترسانة عن دائرة الدقي.

وفي نفس السياق لم يحالف الحظ عدد أخر من الرياضيين ممن تقدموا للترشح في المجمع الانتخابي للحزب الوطني وكان من أبرز هذه الأسماء:مجدي عبدالغني والعامري فاروق ومعتمد جمال وحسن فريد ويحيى الكومي ومصطفى الكيلاني وعبدالستار صبري.

وهناك عدد آخر انضموا لاحزاب اخرى مثل طاهر ابوزيد وسفير نور عن حزب الوفد.

[سكر]

الراجل دة بيتكلم فى الحته الى وجعة قلبى

حافظ أبو سعدة

ترشيح الوزراء ومطاعن عدم الدستورية

رشح الحزب الوطنى ثمانية وزراء لعضوية مجلس الشعب، بالطبع ليست المرة الأولى التى يترشح فيها وزراء لعضوية المجلس، لكن هى المرة الأولى التى يخوض فيها الانتخابات البرلمانية هذا العدد الكبير من الوزراء، وفتح هذا الباب للبحث فى مدى دستورية هذه الخطوة ومدى تناقضها مع مبدأ الفصل بين السلطات، وهل يستطيع الوزير وهو عضو فى الحكومة أن يمارس دوره الرقابى، وأن يستخدم آليات مثل الاستجواب الذى هو اتهام للحكومة، وهل فعلا يمكن لنظام جمهورى يعتمد مبدأ الفصل بين السلطات فى إطار الرد على هذه التساؤلات؟

نفى الوزير مفيد شهاب أن يكون ترشيح الوزراء لعضوية البرلمان يتناقض مع مبدأ الفصل بين السلطات، وهو استند هنا الى نص فى الدستور يسمح للوزراء، وحتى رئيس الوزراء بالترشح، وهى المادة 134 من الدستور، «يجوز لرئيس مجلس الوزراء ونوابه وللوزراء ونوابهم أن يكونوا أعضاء فى مجلس الشعب».

وفى الحقيقة لم يشرح السيد الوزير الفرق بين الدول التى تلزم الوزير بأن يكون عضوا فى البرلمان، وتلك الدول التى تحتم أن يكون الوزير من خارج البرلمان، الفارق هنا فى طبيعة النظام السياسى، فالنظام البرلمانى هو نظام فى الحقيقة يقوم على مبدأ دمج السلطات، عكس النظام الجمهورى الذى يقوم على مبدأ الفصل بين السلطات، وللتوضيح نأخذ النظام الإنجليزى نموذجاً. النظام الانجليزى هو نظام برلمانى بامتياز، أى أن الحزب الذى يحصل على الأغلبية يكلف بتشكيل الحكومة من بين الأعضاء الفائزين فى الانتخابات، ويقوم البرلمان بوظائفه استناداً إلى الانقسام بين الأغلبية والمعارضة، وقيام المعارضة بمحاسبة الحكومة ونقد سياستها، بينما فى النظام الرئاسى يعد رئيس الجمهورية رأس السلطة التنفيذية، وتساعده حكومة يقوم بتعيينها من رئيس حكومة ووزراء ونواب للوزراء، ففى الدستور المصرى فى الباب الثالث تحت عنوان السلطة التنفيذية، تنص المادة 138 على اشتراك الوزراء مع الرئيس فى وضع السياسة العامة للدولة، ويشرفون على تنفيذها، ويراقب أعمال الحكومة ويحاسبها، بل يوجه الاتهام إلى الوزراء فى حالة المخالفة، هو مجلس الشعب.

وأستند فى رأيى إلى أن الدستور يمنع ترشح الوزراء إلى نص المادة 89 التى تقول: «يجوز للعاملين فى الحكومة وفى القطاع العام أن يرشحوا أنفسهم لعضوية مجلس الشعب، وفيما عدا الحالات التى يحددها القانون يتفرغ عضو مجلس الشعب لعضوية المجلس ويحتفظ له بوظيفته أو عمله وفقا للقانون» فهذا النص واضح أنه يؤكد من خلال معيار التفرغ على الاستقلال للمجلس عن السلطة التنفيذية التى تغولت على كل السلطات، وحاصرت كل محاولات المحاسبة، وأطلقت العنان بعد ذلك لكل عناصر الفساد لتعمل فى بيئة تساعد عليه، فالسلطة المطلقة مفسدة مطلقة. > >

[التونسى]

بصراحه الفيديو ده عجبنى :D .. كنت حنزله فى موضوع قائم بذاته B) .. لكن لما شفت الموضع ده قلت يمكن يكون فى الفيديو ده اضافه او اجابه على سؤال من الاسئله المطروحه

ومن غير اطاله ولت وعجن ..اسيبكم مع الفيديو :partytime:

http://www.youtube.com/watch?v=88J2e200hL0

انا عن نفسى لو متاح ليا كنت برده رشحت برغوت bv:-

[nightmare]

السوال الرابع : كيف يكون شرط الترشيح ان يكون فقط بيعرف يقرا ويكتب ياعالم يا هو دة احنا فى زمن IPAD

هرد على السؤال ده ببعض الصور اللى بتبين قد ايه مدي الجهل بتاعهم حتى في الدعاية لأنفسهم , شوف كده معايا

مع تحياتي