ماوحشتونيش - قصة .. من واقعي الإفتراضي

[MaYousof]

ماوحشتونيش

إنتاج أدبي

"ملو هدومي"

(1)

..

وفجأة .. وبدون أي مقدمات أو سابق إنذار .. وتقدروا تقولوا يعني وإذ غفلة كده .. عيني لقطت إسم عضو في المتواجدين اليوم .. ماشفتهوش من تلات تربع سنة ..

اختفت علامات القنزحة كلها من على وجهي .. وبلّمت .. تماما ..

من عشر تيام .. قولوا إسبوعين كده .. كُت قاعد ع الكرسي بتاعي باشا وملو هدومي .. وكُت منجعص وقاعد قعدة آخر قنزحة الصراحة .. وحاسس كده إن مفيش حد قدي وخلاص بقى عرشي على قمة نشطاء المحاورات لا يمكن تهديده من جانب أي جهة .. ماسك الماوس بطراطيف طراطيف صوابعي وبصص على الشاشة من فوق لتحت كإني بتفضّل عليها بالبصة بتاعتي دي

[MaYousof]

"ابن مصر"

(2)

معروف إني أديب كبير .. قوي

..

وشاعر مفوّه .. للغاية

..

أكتب القصيدة من دول .. المجتمع كله يتهز هز .. ينتفض نفض .. يترعش رعش .. وتلاقي الناس كلها اتجمهرت .. منهم اللي يعيط .. منهم اللي يزغرط .. ومنهم اللي تبدأ الحماسة تلتهب عنده ويهتف بعلو حِسُّه "نموت نموت وتحيا قويسنا .. نموت نموت وتحيا قويسنا" .. وتنّك إسبوع .. قول عشر تيام .. هيصة وزمبليطة فيكي كلك يا شبرا لما قصيدة من قصايدي تتنشر هناك

..

ولكل أديب .. منافسينه .. الغيورين من إنجازاته ونجاحاته

.. وصولاته وجولاته .. لكن الأديب الشاطر يعرف إزاي يتعامل مع منافسينه .. ومايخليش حد فيهم يغطي عليه أو حتى يهوب ناحيته ..

بس للأسف .. ساعات بتكون المنافسة شديدة جدا .. ووطيس المعركة حامي بشكل غير ممكن

.. وساعتها لازم واحد بس .. هو اللي يفضل .. ويتم إقصاء التاني من الساحة تماما ..

[MaYousof]

ابن مصر .. كفيل بإنهاء المهمة دي بالشكل الأمثل .. تواجده في الجوار يشكل واحد من أكبر محاور الخطورة السبعة اللي أصبحت تمثل هاجس عندي .. أنام أحلم بيه .. أصحى ألاقيه ..

ابن مصر .. القائل: مالا يقتلنى يرمدنى بكثره العناء .. ومن رمادى ابعث حيا ماردا كالعنقاء .. ناويهالي خلاص

.. كالعنقاء سيقصفني عند مساء ..

الراجل ده خطر كبير مش عليَّ أنا بس .. خطر كبير على ناس كتير هنا ..

الراجل ده لازم يفضل بعيد ..الراجل ده .. ماوحشنيش

..

أحمد محمود .. ماوحشتنيش

[MaYousof]

"إسو العظيم - جرندايزر"

(3)

أنا شكلي خلاص .. انتهيت وانتهت أيام عزّي ف البلد دي .. امبارح بس .. امبارح .. يعني الموضوع مش بعيد .. امبارح أهوه .. ببص وانا قاعد عمال آكل ف ضوافري م الرعب اللي عايش فيه بقالي إسبوعين .. ألاقيه طالعلي .. أنا اللي بخاف م السنافر

.. يطلعلي جرندايزر ..

أنا شكلي خلاص .. أنا رحت بلاش

..

أنا بجد ماشي اتلفت حوالين نفسي .. الرجل ده ظهر امبارح .. يعني ممكن يظهر بكرة .. وبعده .. يعني ممكن يرجع تاني .. ويشارك تاني .. يعني استحالة هاعرف أجمع جمهوري حواليَّ تاني خلاص .. أنا شكلي خلاص رحت بلاش .. اللي بيحاربني مش واحد .. ده معاه كمان واحد .. مش أي واحد .. جرانديزر .. زا جريييت

..

الراجل التاني ده خطر هو كمان .. ومش خطر عليَّ لوحدي .. الراجل التاني ده خطر كبير على ناس تانية كتير هنا ..

جرندايزر ده لازم يفضل بعيد ..جرندايزر ماوحشنيش

..

عصام .. ماوحشتنيش

[MaYousof]

"سيدة المحاورات"

(4)

الإسم في حد ذاته دال على مدى الخطورة اللي ممكن صاحبته تمثله على أي حد شعبيته طاغية الطغو اللي شعبيتي طاغية بيه ف الحي ده ..

ماما سلوى صحيح بتكتب .. لكن من بعيد لبعيد .. وده كان أكبر عامل أنا استغليته عشان أكوّش على حب الجماهير .. هي تكتب المداخلة دول من هنا أجري أنا ألغوشلي في موضوع من مواضيع اللغوشة عشان ماحدش ياخد باله من قراية مدخلتها من هنا .. وكنت ناجح .. بشكل .. كبيييير

..

ماما سلوى في الوقت الحالي مش بالخطورة اللي ممكن تخليني مضطر إني أتخذ إجراءات أعنف عشان أخليها تحافظ على المسافة البعيدة اللي بتكتب منها .. لكن الهاجس اللي بيزن على راسي إن توافد الناس التانية ممكن يدي لماما سلوى فرصة أكبر للجلوس على مسافة أقرب .. ساعتها ممكن تكتب أكتر .. والبساط من تحت رجلي تزحزح أكتر واكتر واكتر

..

أنا بجد مش هاستحمل وضع زي ده .. سيدة المحاورات لازم تفضل بعيدة .. لازم تكتب أقل .. لازم ماتقرّبش النواحيدي أكتر من كده ..

سيدة المحاورات بتشكل خطر في حد ذاتها على شعبتي .. وعلى شعبية ناس مِلَغوشاتية تانية كتير .. حضور سيدة المحاورات أكتر من كده ممكن يعني قيمة أكبر للمداخلات المضافة للمحاورات .. ممكن يعني استفادة أكتر لناس أكتر .. ممكن يعني إن اللغوشة مايتسمعلهاش .. واللي زيي عصرهم يضمحل .. ويرنو للأفووووول .. يانهاري اللي مش فايت

..

ماما سلوى خطر كبير .. خطر خطير .. خطر مداه واسع .. مش عليَّ أنا بس ..

ماما سلوى خطر على كل ملغوشاتي حر ..

ماما سلوى لازم تفضل بعيد .. ماما سلوى ماوحشتنيش

..

Salwa .. ماوحشتنيش

[MaYousof]

"آل كابوني .. أخونا المعذب سكوب السريقوسي"

(5)

أنا عشت أيام هنا الكام إسبوع اللي فاتوا .. ماعشتهمش قبل كده .. ولا شكلي هاعيشهم بعد كده .. الأستاذ المعذب السريقوسي دلوقتي بينطّلي في كل موضوع .. أشوف إسمه جتتى تتلبش أقفل الموضوع خالص واشوفلي موضوع غيره .. ألاقيه ناططلي فيه برضه .. طب أروح فين .. أروح فين

.. يا جدعان أنا عارف إن عمري ما هاعرف أخطف الأضواء والراجل ده محاوطني كده .. بجد .. الرجل ده لما بيكتب بيبقاله سحر عجيب غريب ماحدش بيعرف يقاومه .. يعني لا قصيدة هتنفع .. ولا لغوشة هتنفع .. ولا تفجيرات في سلك السيرفر معاه برضه هتنفع ..

الراجل داخل بيفقشلي قالب طوب على قورته

.. وناويلي خلاص ..

الراجل ده أخطر الخطرين بجد .. الراجل ده ممكن ياكل الجو من أكبر كبير .. الراجل ده ممكن يقلب موازين المنتدى كوعا على كعب .. الراجل ده قسم شبرا تاني دايرة رامي لكح .. يعني من النهاردة مفيش حاكومة .. هو الحاكومة .. هو الحاكومة

..

يازينة شبابي اللي هتروح على إيدك يا سريقوسي

..

يا خسارة المنتدى فيَّ على إيدك يا آل كابوني

..

[MaYousof]

سكوب السريقوسي لازم يتوقف عند حده .. لازم أحجّمه .. لازم كلنا نحجّمه

..

سكوب السريقوسي خطر مهول .. عليَّ .. وعلى ناس كتيرة .. على ناس كبيرة .. سكوب السريقوسي خطر على جنوب أوروبا كلّهيتها ..

سكووب السريقوسي بجد لازم يتحجّم .. الراجل ده لازم يرجع يختفي تاني ..

الراجل ده مش صح إنه يجول في الجوار كده دون رقيب وحسيب ..

الراجل ده مبينفعش معاه ولا قصايد ولا لغوشة ولا حركات حضانة

..

الراجل ده واعر ومدقدق وعارف ألاعيب الناس كلها وممكن وجوده يغير من شكل المحاورات

..

الراجل ده بيسحر للناس

..

الراجل ده مخاوي .. وبيلعب مع العفاريت لعب

..

الراجل ده خطر .. أكبر خطر .. لأنه لو نوى يعفرتنا كلنا .. مش هنلاقي اللي يعرف يحوش من علينا ..

الراجل ده لازم يفضل بعيد .. سكوب السريقوسي ماوحشنيش

..

Scorpion .. ماوحشتنيش

[MaYousof]

"الليدي فلانة"

(6)

لا يخفي السر على أحد منا .. الليدي رجعت .. أصبح الموضوع في عداد المنتهي .. كل يوم تطل طلة .. وتكتب مداخلة .. وهنا مكمن الخطر .. النهاردة مداخلة .. بكرة إتنين .. بعده مش عارف رايحين لفين .. الليدي معروف عنها الانضباط والحال المايل عمره مايعرف يمشي معاها .. يعني أنا لو فكرت ألغوشلي في موضوع عشان الناس ماتاخدش بالها من مداخلة لماما سلوى في موضوع تاني هلاقي الليدي فلانة أخدت بالها مني .. ومش بعيد ألاقيها راحت قايلة للسريقوسي يبعت عفريت من عفاريته يأتُرني .. والعفاريت مابتسكتش .. هيرجع العفريت يبلغ السريقوسي بكل اللي باخططله .. وبعدين xxxxxxxxxx (باقي المشهد محذوف بمعرفتي منعا لخدش حياء المحاوراتية)

شفتوا بقى الليدي ممكن تعمل إيه .. خطر ولا مش خطر؟ دي خطر وخطر وخطر وخطر .. أنا مش عايز انضباط .. أنا مش عايز عفاريت السريقوسي تطلعلي .. أنا عايز أروّح

..

الليدي مش ينفع تطل علينا أكتر من كده .. الليدي مش ممكن هاتسيب الناس تلغوش .. الليدي والسريقوسي مينفعش يظهروا مع بعض .. أساسا أنا كنت هامشي جنب الحيط لما لاقيت السريقوسي بدأ يعاود نشاطه .. وقلت هاقعد أدعي إن عفاريته ماتشوفنيش .. ولو قلت كلمة ربنا يخليها خفيفة ع الجميع .. تقوم تطلعلي الليدي وتطل علينا .. طب أروح فين

.. استخبى إزاي ..

الليدي كمان أديبة كبيرة .. تريد ولا تريد .. ووجودها هيسبب ضعف حاد على منتجاتي الأدبية اللي مغرق بيها شبرا .. يعني مفيش ناس هتعيط .. مفيش ناس هتزغرط .. مفيش "نموت نموت وتحيا قويسنا"

..

الليدي فلانة خطر يا جدعان ..

يعني مافيش لعب عيال .. يعني مفيش تسيب ..

مفيش هتافات في فداء قويسنا ..

مفيش حيطة نسمع عليها زيطة ..

الليدي لازم تفضل بعيد .. الليدي فلانة ماوحشتنيش

..

Folana .. ماوحشتنيش

[MaYousof]

"سعد باشا"

(7)

سعد باشا زغلول .. أحمد سيف .. الأقل خطرا حتى الآن .. الحمد لله أخيرا فيه محور مفقود .. أنا كنت هلاقيها منين وللا منين وللا منين .. العنقاء .. وللا جرندايزر .. وللا سيدة المحاورات .. وللا آل كابوني بتاع كشري المعذب العازب .. وللا الليدي .. واحد يا جدعان يفضل بعيد .. واحد يسيب سرسوب أمل عند كل متسيب إنه يلغوش من غير ما يتلـبِّش .. أنا بصراحة أحيي سعد باشا .. عرف التيتة .. مفيش فايدة .. ومشي .. أنا نفسي بقية المحاور اللي بدأت تطل وتهل دي تتعظ .. الرجل ده عبقري .. أنا فاكر لما كان بيحلل أزمة أنابيب البوتجاز بمخططات كده ورسومات تحليلية وواخد الموضوع جد قوي .. قال يعني احنا يهمنا نعرف أصل المشلكة إيه وهنهتم تتحل إزاي .. ولما تتحل بقى يا باشا هنعرف نولول إزاي ونقول أصلنا حزنانين ع البلد؟ احنا مش عايزين نفهم أصل المشكلة وفصلها يا باشا .. احنا عايزين زرار "دعاء عشوائي على مسئول" وزرار "كلمتين نحيب عشوائي" عشان نعرف نشارك بشكل أسهل في حلول مشاكل البلد .. مش تجبلي مخططات ورسومات ..

أحيي فيك فقدناك للأمل في كل واحد فينا هنا .. وانقطعك التام عن المنتدى .. سعد باشا .. إنت قلتها .. ولازم باقي المحاور اللي في القصة دي يسمعوك .. ويعرفوا إن عندك وجهة نظر إلتزموا بيها لفترة .. لكن شكلهم بيشاوروا راسهم ف اللي كانوا قرروه ..

إخواني الشرفاء باقي المحاور اللي في القصة دي .. سعد باشا مش عبيط .. ده بتاع رسوم وتخطيط .. وعقل كبير .. اتخذوا منه قدوة صالحة لكل واحد فيكم ..

سعد باشا .. لو صفية لسه ماغطتكش قولي وأنا اجيبلك بطانية .. الشتا ده شكله هيبقى بارد حبتين ..

سعد باشا .. ماوحشتنيش

..

أحمد سيف .. ماوحشتنيش

[MaYousof]

"شاعرة المحاورات "

(8)

الأستاذة لولا .. شاعرة المحاورات .. مش ف شطارة أحمد سيف .. مفيش حد ف شطارة أحمد سيف .. بس لولا أحسن من السريقوسي مثلا .. السريقوسي مستنوي بجد .. ده بيقولي انتخابات وشبرا واحد وشبرا إتنين .. يا عم فكك واقعد عيط على اللبن المسكوب .. خواجات فلتانة بصحيح ..

أستاذة لولا أفضل كتير من السريقوسي .. أفضل من سيدة المحاورات ..أفضل من الليدي .. لولا كبيرها مداخلة في الاسبوع .. شوف اللباقة والأناقة .. إدراك أكبر من إدراك سيدة المحاورات وإدراك الليدي ف إن الناس بتوع حوارات مش محورات .. ممكن المداخلة الإسبوعية تعني إن عندها بصيص أمل في ناس بلدها .. لكنه بصيص خافت .. ضئيل .. عايز جبل عشان تحس إنه يقدر يخلي الناس تبطل تبقى أنانية وتبدأ بنفسها قبل ما تلوم اللي حواليها وتلعن الظلام .. لولا مش في حكمة أحمد سيف .. لكنها حكيمة .. خير الكلام ما قل ودل .. مفيش مانع إني أمد إيدي بس لازم الناس تصبح أكتر نضجا ..

الكلمة تنادي صاحبها .. ولولا صاحبة الكلمات .. تكتب كلمتها أبيات .. وتنادي القوم بسطور .. وحروف تنقط آهات .. لولا صاحبة الكلمات ..

أروح أنا فين لو لولا بدأت تكتب أكتر .. أنا ياجدعان ماصدقت لاقيت الساحة خليت عليَّ .. أكتب شعر .. أكتب قصص .. ألغوش .. أقعد أدور ع الخيبة بمنكاش زي العبيط .. اغيظ ده .. أفقع تقرير في ده .. اتغاظ من ده .. واتغاظ من غيظ ده لده .. والله ماكان نفسي في حاجة .. آخر برطعة .. لكن بجد فيه إرهاصات عودة لناس ممكن تعمل تغيير في وجه قويسنا كلها .. العملة الجيدة شكلها بدأت تلاعب راسها .. المحاور بدأت تتكالب عليَّ .. أنا خلاص مبقاش لي عيش هنا ..

لكن أنا مش زي أحمد سيف .. أنا مش هاستسلم .. أنا هاقاوم ..

أستاذة لولا .. كوني حكيمة .. مداخلة في الإسبوع تكفي وتزيد ..

أستاذة لولا .. ماوحشتنيش

..

لولا .. ماوحشتنيش

[MaYousof]

"همسة على صرصور الأذن"

(9)

أحمد محمود .. عصام .. Folana .. Scorpion .. Salwa .. أحمد سيف .. لولا.. ماوحشتونيش .. ماوحشتونيش .. ماوحشتونيش

..

-----------------------------------

النهاية

[MaYousof]

أحمد محمود .. عصام .. Folana .. Scorpion .. Salwa .. أحمد سيف .. لولا

-----------------------

السريقوسي شكله بعت عفاريته تأترني خلاص

[Scorpion]

لكن انت وحشتنا...

شفت بقي ...

و لما ربنا يفتح عليا بوصفة الكشري اللي هي ..

هفتكرك و انا باكلها...

kis)-

[MaYousof]

أشتاتا أشتوت

الأستاذ السرياقوسي بذات نفسه مشرفني هناهوّن .. ومن بدري كمان .. وأنا أقول يادي النور اللي هالل ع النواحيدي .. ياديي النسايم اللي جاية م النواحيدي .. أتابي حضرتك قاعد ومرقد .. قصدي مشرّف ..

أنا عرفت لوحدي إنك هتنط .. قصدي هتيجي عشان تنورني هنا كمان .. أخبار الحبايب إيه يا أستاذ .. والله زمان يا بلد .. فين يا أستاذ أيام لما كنت تلمنا كلنا حواليك كده وتحكيلنا عن أمنا الغولة .. وأوضة الفيران اللي تحت بير سلم المنتدى .. وازاي اللي داخلها مفقود واللي خارج منها مولود .. إييه .. أيام ..

آدي اللي أنا كنت عامل حسابه

سكوب خطف الأضواء .. بالفعل

أنا كنت ناوي أعمل فيها العاقل الكبير اللي لازم يتدخل لما صفوة التفكير في المحاورات يختلفوا

موضوع نط فيه السيد سكوب

وآدي النتيجة:

طب أكتب أنا فين بالشكل ده

طب .. أنا هاحاول محاولة أخيرة لإقصاء الراجل ده

أنا شكرتها جدا الحق .. ف وهيا ماشية كده لاقيتها بتقولي على إيه .. الجزمة جزمة سكوب .. هو اللي سابهالي هدية من كام سنة .. قلتلها كبير وإيده كريمة .. وبعدين ببص على الجزمة لاقيتها مقاس كبير قوي الصراحة فبصيت لقرنفل تاني كده وقلتلها .. ورجله كبيره .. ضحكت وسابتلي الجزمة ومشيت ..

أنا بصراحة لاقيت إن عملية نقل للنعلين فيها مخاطرة .. كمان الجزمة طلعت حاجة معتبرة وجلد طلياني .. قلت ألبسها زي ماهي كده بجلدها بنعلها .. لاقيت رجلي عايمة فيها عوم .. رحت تاني يوم أشتريتلها جوزين شرابات كاروهات عنابي على أخضر .. بخط إسود من فوق .. قطن المحلة .. حاجة تستاهل المداس القيمة ده .. قلت ألبس واحد في رجلي والتاني أحشيه في الجزمة عشان رجلي تبطل تعوم فيها .. بس للأسف .. التجربة فشلت ..

دلوقتي الجزمة تعتبر بحالتها .. والشرابات جديدة .. وانا مش هاعرف ألبسهم .. قلت المال إيه .. أولى باصحابه .. أنا ألِفّ الجوز المعتبر ده في ورقة لحمة .. ومعاها جوزين الشرابات .. وارجّع الجزمة لسكوب واهاديه بالشرابين كمان .. على فكرة الجوز التاني مش كاروهات على أخضر .. لا على فحلقي .. والخط برتقالي ..

أنا باقول تجربهم .. يمكن يعجبوك .. وتلبس بقى جزمتك كده .. وتمشى بيها كده .. ويعني ممكن الجزمة اللي جابت .. ممكن جدا .. تودّي .. هو صحيح ممكن تستريح فيها فتاخدك مننا وتنشغل بيها .. خصوصا إن الشرابات قطن تقيل .. لكن نعمل إيه .. بتوحشنا بس جزمتك دي مالك وحقك .. ولو خدتك مننا ماحدش ممكن يزعل منها اأبدا ..

اتفضل يا أستاذ السرياقوسي .. الجزمة أهه

إلا م الحق يا أستاذ السرياقوسي .. أنا كُت امبارح قاعد حدانا ع المصطبة .. قدام الدار .. ف قرنفل عدت من شارعنا كده .. ما انت عارف إن انا وهي بلديات .. ف يعني بعد ما اتبادلنا العواف .. بسألها كده إذا يعني كان حداهم جزمة زيادة قديمة ولا حاجة آخد نعلها عشان أنا الله يعزك جزمتى تعلها انخرم .. فبتقولي إن عندها جزمة رجالي قديمة .. بس ممكن ماتطلعش مقاسي عشان الرجل اللي كات بتلبسها من المقاسات الكبيرة يعني .. قلتلها وماله .. نقيف النعل على مقاسي .. قوم راحت البُنيّة وجابتلي الفردتين .. مع إني كنت عايز الشمال بس .. قالتلي عشان ما أزقيش وانا ماشي بنعل ونعل يستحسن نعمل عملية نقل كاملة للنعلين مع بعض م الجزمادي للجزمادي ..

[عصام]

MaYousof

إنت مستفز :P

أنا يا سيدى ما بقتش اخوف خلاص بعد ما فكيت الشرايط وسلمتها فى قسم اللبان أول امبارح

أنا يا سيدى من سنة 2003 شبعت كلام فى المسيحيين والمسلمين والعلمانيين والقرآنين والفتنة والكورة

وبقى نفسى اتكلم فى حاجة مفيدة .. ليا وللناس

نفسى اتكلم فى حاجة تخلينا فى أول الصف زى الناس الكفار اللى فى أوروبا وأمريكا

نفسى نقارن بين روايتين للعقاد او قصيدتين للمتنبى زى زمان

نفسى حتى يا أخى نفضفض .. بس من غير مسدسات!

وفى الآخر لما ما لقيتش .. قعدت اتفرج

والغريب انها بعد كل دا لسا زى ما هى :P

بيقولك بقى ايه .. خبر نشرته الديلى تلجراف انهم صمموا جهاز بيسجل الأحلام .. والجهاز دا هايساعدهم جدا فى إفاقة الناس اللى فى غيبوبة وفاقدى الذاكرة كمان

قلت لى بقى سنة "ساتة" ابتدائى اتلغت وللا لسا؟!

يدوم العز .. وجزاك الله كل خير على السؤال .. (مراتى بتقولى دلوقتى حالا: بقالك كتيييييييييييير ما كتبتش فى المنتدى .. خير؟)

تم تعديل 30 أكتوبر 2010 بواسطة عصام

[Folana]

السلام عليكم ورحمة الله...

والله يا أستاذ محمد أفندى أنت بتحرجنى بذوقك....ومش عارفة أرد عليك فين ولا فين...وكل ما أنوى أكتب الاقينى اتشغلت..يا اما بغسيل هدمتين يا اما بتقطيف ملوخية للسرياقوسى ..يا اما بالتفكير فى الحلة اللى عنبو دبسنى فيها ....وورايا كام موضوع منتظرين رد منى بس ايييه ..فين الوقت.....تعب كلها الحياة يا أستاذنا والله...

وزى ماقال سكوب..انت اللى وحشتنا ووحشتنا كتاباتك وصولاتك وجوالاتك...وللامانة اقول وحشتنا كتابات كل اللى ذكرتهم واضيف عليهم كمان كل الاعضاء اللى اتحرمنا من قلمهم وفكرهم وحضورهم المميز...

وبأوافقك الرأى طبعن انى شاعرة..بأكتب الشعر الحر ...لكن زهقت بقى وليسقط الشعر ولتنهار أبياتى ..الشعر شعرى والمأساة مأساتى....أبيع نفسى لكن فى النهاية باحب السنونو بحب السنونو..:)

شوف كده حضرتك اخر انتاج لى

http://www.youtube.com/watch?v=6jrRNlW4ykg&feature=related

وللأمانة ايضا اقول انى سارعت بالرد لما لقيت اخويا العزيز جدا ايسو ذى جريت منور الموضوع..وكان لزمن وحتمن ومن كل بد اقول له وحشتنا يا عصام ...بقى كده يا عصام تفك الشرايط وتهد السلم وتبيع القضية ..:( ليييه كده يا عصام....ان شالله تكون بخير والاسرة الكريمة وماتحرمناش من وجودك وقلمك....

خالص مودتى واحترامى

[عصام]

وللأمانة ايضا اقول انى سارعت بالرد لما لقيت اخويا العزيز جدا ايسو ذى جريت منور الموضوع..وكان لزمن وحتمن ومن كل بد اقول له وحشتنا يا عصام ...بقى كده يا عصام تفك الشرايط وتهد السلم وتبيع القضية ..:( ليييه كده يا عصام....ان شالله تكون بخير والاسرة الكريمة وماتحرمناش من وجودك وقلمك....

خالص مودتى واحترامى

منورة بأهلها يا حاجة

ربنا يبارك فيكى ويديلك على أد نيتك

إلهى يطعمك ما يحرمك ويرزقك من وسع

إلهى وانت جاهى ... :blink:

بس خلاص

[MaYousof]

مش قادر أوصف مدى سعادتي بمداخلات إسو .. خايف أقول أي كلمة تخليه يبص من بعيد تاني ..

مش قادر أقول إني شايف إن كمان سبع سنين ..

هاجي أنا ..

واسأل عن سنة "ساتة" ابتدائي .. اتلغت ولا لسه ..

كفاية بقى ..

--------------

السنونو والحلزونة إنتاج حضرتك يا أستاذة

على فكرة .. المعاني كبيرة .. الحلزونة .. الحلزونة ..

دوخيني يا لامونة ..

أحيكي يا أستاذة .. بس هو حضرتك بتنشري زيي في شبرا برضه؟

ولا تخصص حضرتك هناك تقطيف ملوخية وبس؟

أنا باهدي النفوس مش أكتر ..

لحاد مانشوف المنشور هيتفك كربه إمتى عشان يستلم طرطوره ..

ودوخيني ..

يا لامونة ..

واجري بيَّ ..

يا حلازونة ..

[إبن مصر]

سا الخير............

هو بصراحه يعنى احساس جميل قوى ان الواحد يبقى.مش عارف..

حاسس انى بتعلم الكتابه من جديد..

حاسس ان عندى.....عندى... فقدان للذاكره اخنيارى؟؟

يمكن..

بس اديتنى اكتر من حقى.. وأقل واجب اشكرك على تذكرى..

المشكله ان انا مش فاكرنى..

عصام قال انه زهق..

انا يمكن معنديش رفاهيه الزهق..

مش عارف بس بعد ما سلمنا الشؤايط على رأى عصام.. فى احساس جميل تانى..

مش عارف اوصفه..

انا فعلا مش عارف بكتب ايه وبقول ايه.. بس

شكرا من قلبى على تذكرك لى .. يمكن بمساعدتك.. افتكر.. انا كمان... كنت مين..

[MaYousof]

سا الخير............

هو بصراحه يعنى احساس جميل قوى ان الواحد يبقى.مش عارف..

حاسس انى بتعلم الكتابه من جديد..

حاسس ان عندى.....عندى... فقدان للذاكره اخنيارى؟؟

يمكن..

بس اديتنى اكتر من حقى.. وأقل واجب اشكرك على تذكرى..

المشكله ان انا مش فاكرنى..

عصام قال انه زهق..

انا يمكن معنديش رفاهيه الزهق..

مش عارف بس بعد ما سلمنا الشؤايط على رأى عصام.. فى احساس جميل تانى..

مش عارف اوصفه..

انا فعلا مش عارف بكتب ايه وبقول ايه.. بس

شكرا من قلبى على تذكرك لى .. يمكن بمساعدتك.. افتكر.. انا كمان... كنت مين..

سا النور ............

وإيه يعني لو حاسس إنك بتتعلم الكتابة من جديد ..

أنا نفسي اتعلم معاك الكتابة من جديد ..

نفسي أتعلم إزاي أكتب كلام مفيد ..

حلو إننا نتعلم .. تاني .. طول عمرنا نفضل نتعلم ..

لو أنا ماكنتش أتعلم الكتابة معاك .. هاتعلمها مع مين ..

ياريت والله نقعد سوا مع بعض .. نمسك القلم ونتعلم نكتب تاني ..

كتابة من نوع مختلف .. يملا مكان مهم جوايا وجواك ..

مش هنعرف نملاه من غير مانتعلم تاني ..

أنت وحشتني عشان أنا عايز اتعلم الكتابة مع واحد زيك إنت ..

أصل أنا قريتلك كتير ..

وتعلمت منك كتير ..

وأنا طول عمري طماع ..

ولسه عايز اتعلم كمان ..

شوف أنا أكتر واحد بحبه هنا هو أبو جونيور ..

لما إنت تكون السبب في ده ..

يبقى إنت تبقى إيه؟

تبقى بتعلم .. واحد منك إنت اتعلم ..

هات إحساس تسليم الشؤايط الجميل ده ..

وامسك ايدي ..

وخلينا نتعلم ..

نفتكر مع بعض ..

نخلق لنفسنا حق جديد ..

يسمحلنا نكتب ساعات ..

نزهق ساعات ..

نحافظ على الإحساس الحلو اللي انت حاسه دلوقتي ..

دي رفاهية ..

هنتعلم أنا وإنت .. إزاي نحافظ عليه ..

مش عايزين مساعدة من حد ..

نقعد بس .. ونفكر .. ونستغرب .. ونتعجب .. ونتضايق ..

احساس حلو إننا نبقى حرين إننا نتضايق ..

إن حقنا اننا نتضايق ..

فإيد مين غيرك إنك تجيب حقك إنك تعرف تتضايق وقت ما تحب ..

أنا ممكن أقعد جنبك ..

لكن لو أنا اللي جبت حقك .. حقك هيبقى ملكي أنا ..

وساعتها برضه مش هيكون حقك ..

حقك إنت بنفسك لازم تمسكه ..

ومش لازم تستعجل ..

ولما تمسكه ..

هتعرف تستعمله ..

هتعرف إن من حقك تتضايق ..

مش عيب إنك تتضايق ..

إحنا مش في الدنيا عشان نغصب نفسنا إننا نبقى مانعرفش نتضايق ..

ده حقك ..

مش معنى إنك تاخده إنك لازم تقول لحد لما تمارسه ..

بس على الأقل .. هتمنح نفسك حق إنك تمارسه .. وتبقى متضايق ..

ده حقك إنك تبقى إنت ..

أحمد محمود ..

اللي من غير إحساس .. لازم يبقى جسد من غير روح ..

من حقك إنك تدافع عن حريتك في إنك تحس اللي نفسك تحسه وقت ما إنت عايز تحسه ..

مش لازم تقول لحد خالص إنت حاسس إيه ..

المهم تبقى قادر إنك تحس اللي من حقك في لحظة ما إنك تحسه ..

إنت مديت ايدك ليَّ قبل كده .. من غير ماتعرف ..

أنا النهارة مش قادر ما أمدش إيدي ..

واقفش في إيدك ..

واقولك يلا بقى ..

يلا .. يلا نتعلم ..

نكتب ..

نتضايق ..

نحس اللي من حقنا نحس وقت ما إحنا محتاجين نحسه ..

يلا ..

ليه نستنى؟

عشان مين؟

ليه أحب الناس .. واكره نفسي ..

لو بحب الناس عشان أخد حقي إني أحس إني كويس ..

مش معناه إني أبيع حقي إني أحب نفسي ..

لإني لو حبيت الناس .. وكرهت نفسي .. يبقى أنا مش كويس ..

خلينا نبقى حرين في اختيار إحساسنا .. من غير حدود ..

تجاه الناس ..

وتجاه نفسنا ..

إحنا لينا حق ..

مش هناخد من حد حقه ..

لكن لينا حق ..

إننا نحس .. اللي نفسنا نحسه .. لما نبقى عايزين نحسه ..

إسمه حق الحرية ..

لو سلبته من نفسك ..

خلينا أقولهالك .. إنك كده بقيت وحش ..

لو بتدور على راحة نفسك ..

على حقك في رفاهية حرية الإحساس ..

يبقى لازم تمسك حقك ده بنفسك ..

يلا ..

إمسك إيدي زي ما مسكتها زمان ..

وعلمني إزاي نكتب حلو ..

إزاي نبقى عندنا الرفاهية إننا نبقى بني آدمين بأحاسيس ..

علمني تاني ..

لأني عمري في حياتي ما هأنسى أبدا ..

إني اتعلمت منك كتير قبل كده ..

أنا باتمسك بحقي إني أطمع في إني أتعلم منك تاني ..

إحساس جميل إن من حقي إني أبقى حر اختار الإحساس اللي أنا عايزه ..

إن من حقي إني أزهق لما احتاج أزهق ..

أطمع لما أحتاج اطمع ..

إمسك إيدي ..

وخليني أمارس حقي في اختيار إحساسي ..

أنا مستنيك ..

وهافضل مادد إيدي ..

وواقف ..

مستني حقي ..

إني أحس إني طماع ..

آدي إيدي آهه ..

امسكها ..

وتعال نتعلم ..