عن الحج هاتكلم تاني

[se_ Elsyed]

فضلت أن أضع هذا الموضوع في باب المناقشات الجادة بدلاً من هدي الإسلام أو باب المغتربين ... لإنه يتعلق بامور جادة داخل عقل الإنسان المسلم ..... عقل غريب بصراحة

- فوجئت من الأسبوع الماضي كده بالمكالمات التليفونية تنهال عليه من أصدقاء أعزاء أعرفهم ... الوووو .. ايوه يا سيدي إيه الأخبار وعاوز إيه ؟

من الأخر كده .... عاوزين إقامتي وإقامة زوجتي .. عشان يستخرجوا تصاريح حج لوالده ووالدته أو حماه وحماته اللي هنا زيارة .... وبما إن هو أساسًاً حج هو وزوجته خلال الخمس سنوات الماضية فلا يحق له الحصول على تصريح رسمي إلا بعد إنقضاء خمس سنوات ....

وكل ما يروح لمكتب حملة من بتوع الحج يقول له : الزيارة لا يُمكن أن نستخرج لها تصريح حج ....

ولأن القائمين على تلك المكاتب معظمهم من شياطين الأنس ولا يتورعون عن الكذب والخداع ولهف الأموال بالباطل والإلتفاف حول القوانين .. وياااااااااااااااااااما حوادث نصب وكذب حصلت ومع الجميع .. أنا شخصياُ إتقرصت منهم كثيرررررررررررر....

فلقد تفتق ذهن هؤلاء الشياطين عن شيء .. وهو إنه يستخرج التصريح بإسم أي واحد نظامي وما حجش خلال الخمس سنوات الماضية.... وأخينا اللي مالوش تصريح ياخد التصريح ده وأهو لا عليه صورة ولا حاجه .... وحج يا حاج ..

وأنا طبعاً أو زوجتي لو حبينا نحج قريباً بإذن الله كمان سنة أو إتنين بالكتير ..... ناكل هوا بقى ومالناش تصريح ....

يعني تزوير في حجوجات رسمية ... وأنتحال صفة غير صفة .... وصاحبنا لو إتعكش يبقى أنا اللي أتعكشت مش هو ... ولا قدر الله لو توفى ولقوا مع الجثة التصريح بتاعي .. يبقى أنا اللي هايطلع لي تصريح دفن مش هو ......

وحاجه أخر مسخرة وألتفاف ونصب وتزوير وشيء يدعو للرثاء والله

ومليون مره نقول إن الحج مرتبط بالإستطاعه ... ومش بس كده .. دي إستطاعه مع سلوك القنوات الشرعية وعدم مخالفة تعليمات ولي الأمر .....

السعودية كتر خيرها بصراحة ....

تعمل إيه في مليار مسلم حول العالم جميعهم عاوزين يحجوا .. وهناك طاقة إستيعابية قصوى ومحدودة لمكه والمشاعر نقول مثلاً 3 مليون شخص..

فعشان كده عملت نسبة 1 في الالف لكل بلد مسلم خصوصاً البلدان الكبيرة زي مصر وإيران وأندونيسيا اللي حسبوها ولقوا بالنسبة دي إن كل واحد هاييجي عليه الدور عشان يحج بعد الف سنة ...

في حين إن في ناس لا تتورع إنها تطلع كل سنة تحج بأي طريقة ... والحِجة معروفه " يعني هي جت عليه أنا "

أيوه يا سيدي جت عليك ... إنت وأنا وهو وهي .... بناخد مكان ناس بتعيش وتحلم وتموت من غير ما تحقق الحلم لإن الإختيار لم يقع عليها بالرغم من توفر الإستطاعه ...

ويا عالم يا هو قولنا مليووووووووووووووووووون مره إن ربنا كبيررررررررررررررر ورحييييييييييييييييييييم ويرزق من يشاء بغير حساب ... ويُجازي من يشاء بغير حساب

وإذا كان الحج المبرور ليس له جزاء إلا الجنة ... وإن الحج المبرور اللي لو تم الواحد بيرجع منه كيوم ولدته امه من الذنوب وما علهوش ولا ذنب

فبالتأكيد وكلنا ثقة في الله ... إن الخمسين ستين الف اللي هاصرفهم في الحج وكنت قد أديت الفريضة قبل ذلك ( ده أنا باتكلم عن متوسط واحد جاي من بره ) أو نقول ( 5 الاف ريال لو أنما من حجاج الداخل ) ..

بالتأكيد هالاقي لهم مليوووووووووووووووووووووووون مصرف شرعي أصرفهم فيه وناس أخرى تستفيد

يا أخي أنا ممكن أحجج حد تاني بهم .. أو أخليه يعمل عُمره

بلاش كده ... ده نفع أخروي وربنا يوعدنا

لكن هناك منافع دنيوية أفضل بكثيرررررررررررررر عند الله .. زي إني اساعد أيتام ... أو أعالج مريض ... او أساهم في بناء مسجد ... او أدفع كفالة لواحد غارم محبوس عشان مبلغ تافه ماقدرش يسده ... أو أساعد ناس فقراء وأوصل لهم مياه نظيفة أو صرف صحي أو أأجر له شقة محترمة وأدمية .... إلخخخخخخخخخخخخخخ

هل لدينا شك بأن تلك الاعمال افضل مليوووووووون مره من حج وعُمره مكررة كل عام ؟

ده ربنا بيقول ومن أحياها فكأنما أحيا الناس جميعاً ..

يعني المحيي والمميت هو الله .. لكن أنا كإنسان بيبقى في إيدي إن واحد مريض سرطان أو كبد او كلى على وشك الموت وبمساعدتي انا بيُشفى بإذن الله ويرجع سليم تاني لحياته ولعائلته ...

كنت حكيت لكم عن شاب قريبي من حوالي سنة كان هنا وقعد يكون في نفسه وبدأ صغير ويادوب بعد معاناة 5 سنوات لم ينزل فيهم أجازة لمصر مطلقاً ... قدر يعمل بيت ونزل يتزوج وفي أول أسبوع جواز إكتشف إن عنده سرطان المستقيم وهو في هذا السن الصغير وكان الاطباء هنا في السعودية قد شخصوا المرض في البداية على إنه بواسير ...

لكن بفضل الله وبفضل مساعدات أهل الخير - ومنهم ناس هنا في المنتدى ربنا يجازيهم كل خير - الحمد لله رب العالمين قدرنا نساعده بالرغم إن حظه ملعبك وجه في هوجة إيقاف العلاج على نفقة الدولة والكلام الفاضي ده .. فعملها على حسابه الشخصي عشان الموضوع ما كانش ينفع ينتظر أكثر من ذلك ... والولد بقى زي الفل وخف الحمد لله تماماً .. وجه جدد تأشيرته وإقامته ونزل مصر تاني يرتاح شويه بعد عذاب العلاج الكميائي والأشعاعي وبعد الجراحة وخلافه .... وهاييجي يعاود نشاطه تاني ويبني أسرة وربنا يزرقه بأولاد وبحياة سعيدة ...

وكل ده وإحنا بنتكلم في حاجات بالنسبة لنا تعتبر تافهه .. سوري يعني الواحد لما بيروح يصيف بيعمل ميزانية بالألوفات .... حلال وحقه ويعمل اللي هو عاوزه بفلوسه وبرزقه .. لكن ما ينساش حق الناس وحق الله في ماله وما ينساش الاولويات في الحياة ....

[akramgroup]

سبحان الله انا قاعد فى المكتب عمال افكر اطلع السنه دى حج انا والمدام ولا لا

وخصوصا ان بنتى لسه عندها سنه ونص ربنا يحميها يارب

وعمال اجيبها شمال واجيبها يمين وافكر هل بنتى تقدر تستحمل مشقه الحج والزحمه ولا لا

وخصوصا اننا انا والمدام والحمدلله حجينا قبل كده

واذ فجأة يظهر سى السيد بموضوعه الجديد كأنه بيقولى اتلم بقى وخلى عندك دم خلى الناس تحج

براحتها وأنى لما قولت هى جت عليا راح رد عليا برد مقنع

عموما جزاك الله على النيه فى النصيحه وكل عام وانت بخير

أكرم,,

تم تعديل 30 أكتوبر 2010 بواسطة akramgroup

[se_ Elsyed]

يا أكرم الواحد لو إتكلم بأستفاضة بصراحة هاينفجر من السلوكيات البعيده كل البعد عن الدين وعن الإحترام

في إشارات المرور دلوقت بتبقى في لوحات إعلانات ومنها الإرشادية لو في حاجه الحكومة عاوزه توصلها للناس أو حاجه

منها لوحات موجوده الان مكتوب عليها رجاء حار من وزارة الداخلية ومكتوب فيها " ممنوع الإفتراش "

ناس بتطلع تفليته لا تصريح ولا خيام ولا مكان ولا ولا ولا ولا .. ومعاه حصيره أو ملايه ...

وييجي في نص الطريق في المشاعر ويقوم فارش وهو ده مكاني غصب عن التخين ....

حمام بقى مش مهم يقضي حاجته مطرح ما بينام ..

ستات تنام في وسط الطريق وسوري تتعرى ما فيش مشكلة

تحصل كوارث حرائق أو حالات تستوجب الإسعاف وتلاقي سيارات المطافي والإسعاف ماشية في الطريق بتستغيث عشان الناس تحس على دمها وتوسع الطريق لأن معاهم ناس بيموتوا وولا حياة لمن تنادي...

وطبعاً ييجوا يتحركوا فياخدوا معاهم لفة شايلينها فوق راسهم تشتمل على ملابسهم والحصيرة و و و و ... ما هو ما عندوش مكان يضع فيه هذه الإغراض .. ونتيجة الزحام في رمي الجمرات مثلاً الحاجات دي بتقع منه .. وبيوطي على الأرض يجيبها .. فنتيجة حتميه اللي جاي من الخلف مش شايف إن في واحد تحت بيلم التعابين.. فبينداس تحت الأقدام .. مش بس كده يعني هو لو مات أهو خد جزاءه .. لكن ده بيكعبل ناس تانيين معاه وتلاقي العملية بقت عجينه خالص ويروح عشرات الضحايا فيها ...

قبل ما يعملوا جسر الجمرات ... كانت الناس حتى اللي جايين ولهم مخيمات واماكن محدده .. كانوا يسيبوها وييجوا يتمترسوا امام الجمرات توفيراً للمشوار اللي بيقطعه من المخيم إلى الجمرات كل يوم عشان يرمي ... والله العظيم كنت عشان أوصل للرمي أفضل أدوس على ناس على الأرض وأنط حواجز ... وحاجه بهدله ... أو تلاقي واحده رايحه ترجم وهي حامل على أخرها .. أو شيخ كبير أو ست مش قادرة تمشي ... ودول أول ناس بيموتوا بلا جدال .... طب ليه ؟ ما في حاجه إسمهاتوكيل يا ناس واللي قادر يرمي عن غير القادر ....

أخر مره حجيت كان معايا زوجتي سنة 2002 .... وكان نفسها تستمتع برمي الجمرات وما إلى ذلك .. فقلت لها ولجميع النساء اللي كانوا معانا في الحملة إن حتى القادر بدنياً ما بيبقاش ضامن لو راح يرمي إنه يرجع تاني خصوصاً في يوم التعجل .. وبالفعل رميت لي ولها وأقسم بالله في اليوم ده شوفت الموت بعيني وغريزة حب الحياة تغلبت ونجيت لأني أتشفطت لتحت في زحام الرمي وبعد ما رميت في أفواج بتيجي من الخلف .. فاللي خلص بيحاول يخرج .. واللي جاي بيضغط عشان يوصل للأمام ويرمي فبيبقى في قوة ومقاومة وتحصل حاجه زي دوامات الشفط نتيجة الضغط والواحد كمان ما بيبقاش عارف يتوزان لإن إيديه الإتنين مرفوعين لفوق .. واحده فيها الجمرات والتانية بيرمي بها وياما شوفنا حالات وفاة حدثت في المشهد ده بالذات ...

أعتقد إن أي إنسان قبل أن يُفكر في الحج .. لابد له أن يتعلم كيف يحج وكيف يكون سلوكه سلوك محترم يُعبر عن دينه المحترم ...

[mekkawy]

هتخوفنا ليه يا عمنا ع الست و البت .. يعني ما أخليش زوجتي ترمي الجمرات و أرمي أنا عنها و لا الوضع دلوقتي اختلف؟

مكاوى

[محمد عبدالعزيز]

والله يا سى السيد لو أقدر اديك مليون نقطة على الموضوع ده ماكنتش اتأخرت

طريقة تفكير غريبة فعلاً على المسلمين, ومش ناقص إلا إن الناس تسرق عشان تحج, اللى بيعمل كده المفروض يفهم إن ده ضرره أكبر من نفعه لعموم المسلمين مش له هو شخصياً, وشوف بقى كام واحد رايح يحج -بالطرق المشروعة- ممكن يتأذى بسبب إن واحد قال يعنى هى جت عليا.

أنا أعرف واحد والده توفى بدون ما يؤدى فريضة الحج, اعتقد إن والده كان ناوى وكان مقدم فى القرعة أو ماشابه ولكن أجله جاء قبل الحج.

فصاحبنا ده يروح يستلف عشان يبعت لواحد مقيم فى السعودية فلوس عشان يؤدى الحج عن والده, طيب ربنا قال لمن استطاع إليه سبيلاً, تقوم إنت تروح تستلف عشان تبعت لواحد تانى يحج عن والدك اللى توفى؟!!!

فى النهاية أنا بضم صوتى لصوتك يا سى السيد ونوجه النداء لحجاج الداخل وبالذات اللى أدى الفريضة قبل كده, لأن منهم كتير بيروحوا بطرق غير شرعية وكلنا عارفين الكلام ده.

[Mr MAGED]

هتخوفنا ليه يا عمنا ع الست و البت .. يعني ما أخليش زوجتي ترمي الجمرات و أرمي أنا عنها و لا الوضع دلوقتي اختلف؟

مكاوى

هو طبعا الوضع اختلف الوقتي كتير عن الاول يا ميكو خاصة في الجمرات

بس انت لازم تقدر الموقف بنفسك وقتها ... انت عندك وقت طويل ترمي فيه

فتشوف انسب وقت ميكنش فيه زحام وتتوكل علي الله

واذا حسيت ان الموضوع مش سالك .. ربنا اداك رخصة انها توكلك وترمي انت عنها

وربنا يتقبل ان شاء الله .. وترجعولنا بالسلامة

متنساش الدعاء

اما انت بقي يابو السيد فعلا باحييك علي الموضوع ده

وانا بتهيألي مش بيعمل كده غير المصريين

وهيا مسألة سلوكيات في الاول وفي الاخر

يعني مش في الحج بس .. ده في كل مظاهر الحياة

وبيتهيألي تستحق نفتحلها توبيك مستقل

لان بجد فيه سلوكيات كتيرة اوي بتتم بتخلي الواحد بيكون في نص هدومه

خاصة لما يشوفها واحد من جنسية تانية .. ويسألك سؤال بريء

هما ليه بيعملوا كده !!!!!!

[se_ Elsyed]

هتخوفنا ليه يا عمنا ع الست و البت .. يعني ما أخليش زوجتي ترمي الجمرات و أرمي أنا عنها و لا الوضع دلوقتي اختلف؟

مكاوى

الوضع أختلف 180 درجه يا ميتو ..

جسر الجمرات الأن يعتبر من أعظم الإنجازات التي تمت في المشاعر المقدسة ... وبرضوا لو لقيت زحام زيادة عن الازم فمعك رخصة إنك ترمي عن النساء والضعفاء ... حتى لو كان مخيمكم بعيد ومش قادرين يمشوا .. فروح إنت خفيف خفيف وأرمي عنهم

طريقة تفكير غريبة فعلاً على المسلمين, ومش ناقص إلا إن الناس تسرق عشان تحج

لأ حصل حضرتك

والمتنطعين المتلطعين من المسلمين بالألوفات في مكه وتخلفوا عن عُمره رمضان وبيقضوا 3 شهور وزيادة في الشحاتة والتسول وقلة الأدب حتى يأتي موعد الحج ويحج الحج عشان يستقبلوه بالزغاريط وهو راجع مجبور الخاطر ومش عارفين إنه مد إيده في جيوب الناس وضيع ماء وجهه لمدة 3 شهور عشان يقضيها ويحج سفلقه على حساب الناس ..... وأبقى قابلني

وبعد ده كله يمسك جواز سفره ويقطعه ويروح يعيط لسفارته ويقول لهم سفروني ... وبتبقى النتيجة إنه يتسجن لأنه مخالف ومتخلف وعليه غرامة 10 الاف ريال لأنه خالف القوانين ... وفي الأخر بيتم العفو عنهم من قِبل السلطات السعودية لأن للأسف بينهم كبار السن والضعفاء اللي ما يستحملش في السجن يوم واحد ..

واعتقد ان المقيمين في جده بيشوفوا مناظر مخزية بعد الحج لناس تفترش تحت الكباري وفي الطرقات السريعة إنتظاراً إن السلطات تحن عليهم وتسفرهم أو سفارتهم تستخرج لهم أوراق بدل اللي قطعوها وهما مفكرين أن كده هايفلتوا بجريمتهم

فهل ما يحدث بشكل مستمر كل عام يُُرضي الله ورسوله ؟

وهل ما نسمعه عن الناس اللي بتطلع يوم وقفة العيد وتوصل الميقات وتستأجر السيارات التي تنقل الحجاج عن طريق

الصحراء زي المجرمين ومهربين المخدارات وبينزلوهم في منطقة معينه وياخدوها جري من قوات حرس الحدود ( المجاهدين ) عشان اللي بيتمسك بيتسجن ويترحل .... هل هذا حِج يقبله الله ؟

[ozoozo]

هتخوفنا ليه يا عمنا ع الست و البت .. يعني ما أخليش زوجتي ترمي الجمرات و أرمي أنا عنها و لا الوضع دلوقتي اختلف؟

مكاوى

الطريقه الولبيه لرمي الجمرات من اماكن مستخبيه

انا حجيت في 2008 مع زميلنا طاهر رياض وكنا فعلا هانموت في اول يوم بتاع العيد اللي كله بيصلي الفجر في مزدلفه وتبدأ معركه الرمي فالواحد اتفعص في السور بتاع الجمره وكان مش عارف يخرج ده غير الضغط اللي عليك ومفيش منفس غير انك ترمي نفسك في البير بتاع الجمرات

ده غير الناس اللي من الزحمه تلاقيها يترمي من ورا خالص وانت وحظك بقي تليس طوبه في دماغك في عينك -انا شخصيا جت في ودني مش عارف ازاي- وكل شويه تسمع اييييي اهههه وكده يعني المهم استخلصت الكام نصيحه دول لرمي امن

1-الناس كملها بترمي في اول جهه بتقابلها من الجمره وسايبه الحهه التانيه خالص تقوم انت سايب الحهه دي وتلف ترمي من الناحيه التانيه -نص الدايره الفاضي-

2-الجمرات 3 او اربع ادوار حاول تتجنب الدور الاول وكل ماطلعت فوق هاتلاقي المكان فاضي

3-بالنسبه لرميه التعجل دي لازم تبقي بعد الزوال-صلاه الظهر- تقوم تعمل ايه طالع من المخيم قبل الظهر بساعه -لو المخيم بعيد- وعقبال ما توصل يكون الظهر اذن تصلي حنب الجمرات وترمي وتتكل علي الله علي مكه -هاتاخد حوالي 6 ساعت في الزحمه بالسياره وحوالي ساعه ونص مشي-

[ozoozo]

لاحظت حاجه غريبه من زمايلي في الشغل -سعوديين وغير سعوديين-

اني كل ماسأل حد علي حمله يقولي فيما معناه انت عبيط يابني هاتلاك كيسين نوم وخيمه واتكل علي الله هاتدفع خمس الاف ريال في حمله

[se_ Elsyed]

وانا بتهيألي مش بيعمل كده غير المصريين

وهيا مسألة سلوكيات في الاول وفي الاخر

لأ لأ مش صحيح بالمره

إحنا عشان عددنا كبير فبيبان إن إحنا بس اللي بنعمل كده

على سبيل المثال .. السعوديين نفسهم بيعلموا كده ضمن حجاج الداخل وبيخالف نظام الخمس سنوات .. وبيطلع هو كمان بسيارته لو عرف يدخل منطقة المشاعرة ويرشقها في نصف الطريق طوال فترة الحج ..

اما المتخلفين عن العُمره فهم من جميع الجنسيات وروح جده بعد الحج وشوفهم عاملين إزاي في الشوارع وتحت الكباري وهما مشردين ومش عارفين يسافروا ....

وهانروح بعيد ليه ... يا أخي شوف سلوك رمي القمامة والمخلفات الناتجة عن أكل الشخص نفسه .... إيه ده وإيه الهمجية دي ؟

ألاف مؤلفه من الناس سوري بتبقى زي الدواب .. مطرح ما يكل مطرح ما يرمي زبالته مطرح ما ينام .. إيه في إيه ؟

بالرغم من إن كل مقومات النظافة متوفره .... والصناديق وعمال النظافة .. يا أخي بلاش كده ... إحتفظ بكيس فاضي وضع فيه القمامة واركنه في مكان ظاهر لعمال النظافة .. مش يشرب عصير او ياكل حاجه ويقوم مطوح الحاجه مطرح ما تيجي !!!!!!!!!!!!

أنا طوال فترة عملي بالسعودية لم أسمع ... وبأقولها وأنا متأكد .. لم اسمع أستغفر الله العظيم " سب الدين والأباحه واللعن " إلا في الحج ..

من ناس بتزاحم ... وناس بتتخانق بإيدها ورجلها عشان تاخد مكان .. وتلاقي جماعات ماشيه وكإنهم فتوات ويا ويله مين يقرب يلاقي كوع لبس في وشه او شلوت نطره بعيد ... أو تزاحم على الأكل اللي بيتوزع مجاناً وحاجه عامله زي جري الوحوش . شوفت ناس بعيني ممكن يبقى مجموعهم فرد أو إتنين ومع ذلك يزاحم عشان ياخد كرتونه عصير بارد كاملة مره واحده ويفضل شايلها على قلبه طول اليوم .. وبالتالي برضوا تراه يشرب زجاجة أو إتنين ويرمي الباقي لإنه بيسخن من الحر أو يفسد .... مش بيحصل كده ؟

[akramgroup]

عندك حق واللهى يا سى السيد

متفكرنيش بالناس اللى نايمه فى الشوارع

بجد حاجه مش عارف اقولك اسمها ايه يعنى ده فى اماكن الشوارع بتكون مقفوله من الناس اللى نايمه فيها

والخيم اللى عاملينها فى الشارع ولا بواقى الاكل واكياس الزباله حاجه بجد فظيعه

بس سمعت انهم والحمدلله خلاص قللوا الاعداد بتاعة الناس دى او تقريبا بطلوها

بجد كان الواحد اوقات بيطلع عن شعورة وهو رايح يرمى الجمرات وكام مرة حسيت ان الحج بتاعى هايبوظ

بسبب الناس اللى نايمين فى الشوارع دول

عموما ان شاء الله سنتين كده والعمليه كلها هاتتغير جذريا بعد اكمال التوسعات وتشغيل القطار بطاقته القصوى

ربنا يكتبهالنا يارب

أكرم,,

[ozoozo]

نصبحه للشباب ماتنسوش الفازلين مهم جدا جدا جدا جدا عشان المشي الكتير

تاني ماتنسوش

[الســـاري]

اكثر ما يغيظني في هؤلاء .. انه يسافر للحج بطريقة التهريب ويلقي مخلفاته ويشوه الاماكن ثم يسب ويلعن سلسفيل السعودية التي لم تقدم شيئاً كما يراه لازالة تلك المخلفات التي سببها هو واشكاله

انا عملت لفترة في المواسم ويعلم الله انها شهادة حق ان كمية الجهود لمنع الافتراش وازالة المخلفات هي جهود كبيرة فوق ما تتصورون وكل الجهات التنظيمية تستنفر كل قواها

لكن انت تتحدث عن عدد مهووووول .. ملايين البشر .. والسيطرة والاستنفار تكون بالامكان المعلومة سلفا .. ولحملات الحج المرخصة

لكن من هب ودب .. ورغم كل التحذيرات والنصائح .. يظل هؤلاء يأذون المسلمين والناس بافتراشهم واسمحوا لي بالكلمة .. بقلة ادبهم

يعني مو بس جاي تهريب ومفترش بالطريق وياكل ويشرب ويلقي مخلفاته في مكانه ..

لا وكمان زعلااان الباشا ..

مطعم البيك هناك بالمشاعر رفضوا ان يقدم وجبات الدجاج التي تحوي على العظام حتى لا يتم القائها .. وتم الاكتفاء بقطع الدجاج المسحب

وقال لي بالحرف : قال يعني مهتمين بالنظافة اوي ..!!

في ما مضى كان العساكر يغضون الطرف عن من ياتي في اخر الايام .. من باب انهم يستحرمون ان يمنعوه عن اداء منسك ..

لكنهم سببوا ضررا اكبر ..

وتشدد الوضع الان اكثر .. حتى لو قرر الدخول في يوم عرفة فلن يدخل

ويارب تنتهي هذه الظاهرة

[MaYousof]

تذكير:

على سبيل المثال .. السعوديين نفسهم بيعلموا كده ضمن حجاج الداخل وبيخالف نظام الخمس سنوات .. وبيطلع هو كمان بسيارته لو عرف يدخل منطقة المشاعرة ويرشقها في نصف الطريق طوال فترة الحج ..

اما المتخلفين عن العُمره فهم من جميع الجنسيات وروح جده بعد الحج وشوفهم عاملين إزاي في الشوارع وتحت الكباري وهما مشردين ومش عارفين يسافروا ....

شكرا للأخ أحمد

[se_ Elsyed]

.. حتى لو قرر الدخول في يوم عرفة فلن يدخل

ويارب تنتهي هذه الظاهرة

عاوز الحق ولا إبن عمه يا ساري ؟؟

لحد العام الماضي ... ومن شهود عيان .... العساكر حضرتك اللي واقفين على نقطة دخول مكه .... بيقبضوا وعاملين تسعيره .. 300 ريال للشخص .. فوت يا عم وحج وعيش .... وتخيل كم المبالغ المهولة اللي بيحصلوها على سبيل الرشوى من باصات كاملة ... باص كامل على الأقل 26 فرد كله بيدفع عشان يعدي ؟ .....

دي حقيقة لا يُمكن إنكارها

وكمان كثير منهم حتى اللي ما بياخدوش رشوه بيغلبوا العاطفة على العقل .. وهذا خطأ ..

يعني يسمح لهذا وذاك وتلك بالدخول بحجة إن " حرام أمنع شخص جاي يحج من دخول مكه "

هانروح بعيد ليه ... لي صديق لسه داخل مكه بالرغم من إن خلاص من عشرة أيام أو أسبوعين ممنوع دخول مكه إلا بتصريح حج أو إذا كنت داخل في مهمة عمل يبقى لازم تجيب خطاب موثق من كفيلك بإن لديك مهمة عمل داخل مكه ... المهم منعوه من الدخول فنزل تحدث مع الضابط الكبير وسمح له بالدخول ...

[mekkawy]

سلام عليكم

هأتكلم في نقطتين

الأولى: دخول مكة دلوقتي .. و ده عادي و سهل و أنا رحت يوم الخميس اللي فات و دخلت و محدش اتكلم معايا الصراحة.. هو فيه كمائن اه و حتى داخل مكة إنما أنا رحت صليت العشاء و طلعت على مول كدة كنت رايحه هناك و الأمور جميلةو الناس محترمة

الثانية: الحج

امبارح كنت في الحملة بأخلص اشتراكي لقيت جماعة دخلوا و حريصين جداً جداااااااااً على الحج قلت ما شاء الله .. و هوووب يا معلم يقوله .. ايه يا استاذ فلان هي أول سنة .. ده احنا مع بعض من 5 سنين ؟؟؟!!! حبيب ماما .. بقالك خمس سنين بتحج .. قالي هي السنة اللي فاتت بس اللي فاتتني .. قلتله تصدق حرام عليك .. كدة تفوت سنة ... جاري اللي جنبي و اللي طالعين سوا .. يقولي مش عاوز أعمل تصريح عشان السنة الجاية أقوله يا عمنا حج السنة دي و عيش لبكرة و لما تعيش ابقى اتكلم عن السنـــــــــة اللي جاية .. و أقوله هو انت هتحج كل سنة يقولي (ايه يا ابني حرام عليك .. أيوة طبعاً و هي دي حاجة تفوت؟؟؟))

يا ريت نقرأ كتاب فقه الأولويات للشيخ القرضاوي .. أنا مش اخوانجي ولا قرضاوي بس الكتاب ده راااائع و مفيد جداً .. بيكلمك عن ايه أولى في الدين .. أحج تاني و لا أتصدق .. أجاهد ولا أبر أمي .. أعتمر ولا أتزوج .. صدقوني اقرأوا الكتاب أو حتى أجزاء منه هيفرق في حياتكم بشكل عملي

مكاوى

[mekkawy]

رابط تحميل كتاب فقه الأولويات للشيخ يوسف القرضاوي

روابط التنزيل

http://www.aldoah.com/upload/uploade...1188584813.rar

أو

http://www.almeshkat.net/vb/attachme...5&d=1188588735

مكاوى .. منقول

[aimen]

رابط تحميل كتاب فقه الأولويات للشيخ يوسف القرضاوي

روابط التنزيل

http://www.aldoah.com/upload/uploade...1188584813.rar

أو

http://www.almeshkat.net/vb/attachme...5&d=1188588735

مكاوى .. منقول

عمى مكاوى

صباح النور

دلوقت الرابطين بتوع الكتاب واحد ممنوع والثانى اللنك اتلغى

اعمل ايه انا بقى

[se_ Elsyed]

يعني شغلانة الكتب مش بتاعتك يا ميكو وإنت عارف كده كويس .. يبقى كان من أولى أولوياتك إنك تعرف إن الموضوع ده له الأولويه وإن له رجاله المتخصصين وتسأل وتتقطس مش عيب ولا حرام :P

معليش يا أيمن .. سامحه عشان خاطري إحنا في أيام مفترجه وخد الكتاب اهو ولنك شغال بسرعة 500 ميجا واط في الثانية

فقه الأولويات

[mekkawy]

ايمن باشا صباح الفل

بساطة هو ممنوع هنا .. لكن أنا استخدمت الأول و اشتغل عادي .. انت تحمل برنامج هوت سبوت شيلد عشان الصفحات المحجوبة

و ده تحمله من هنا .. افـــــعص

و لو لقيته ممنوع جرب تدور عليه في صفحات تانية

تحياتي و حمل و عيش حياتك