أحمد حِلمي .. هذا الفنان المحترم

[se_ Elsyed]

لم يكن أحد يتوقع أن يلمع نجم مذيع الأطفال أحمد حلمي الذي ظهر في اواخر التسعينات في برنامج على القنوات المصرية تحت عنون " كلام عيال " ويصبح هذا المذيع نجماً كوميدياً محترماً ..

وأركز على كلمة محترماً لأن الكثيرين يعتقدون أن الطريق إلى النجومية لابد أن يُغلف بشي من الأباحية واثارة الغرائز وأجتذاب فئة معينة من المشاهدين خصوصاً الشباب ....

وهو ما يركز عليه بعض مُدعي الفن ومنهم إنسان متصابي بلغ من العُمر أرذله كعادل إمام الذي أصبح جداً وله العديد من الأحفاد .. ومع ذلك مازال يظهر في ادوار الشاب الروش اللي ممكن يخطب ويحب ويعاكس ويعمل علاقات عاطفية !!!!!!!

نعود لأحمد حلمي .... فأهم ما يميزه بإنه بدأ الطريق الفني من اوله في دور صغير بفيلم عبود على الحدود ... ثم الناظر وكلاهما مع الراحل خفيف الظل علاء ولي الدين ثم توالت الأدوار لاصغيرة التي أنحصرت في دور " صديق البطل " تماماً كما كان يفعل العبقري عبد السلام النابلسي .

ثم تحول أحمد حلمي إلى البطولات المطلقة في أفلام خفيفة مثل " زكي شان " وميدو مشاكل " " مطب صناعي " " جعلتني مجرماً " " كده رضا " ... إلخ

ثم لا أدرى ما سر التحول الذي طرأ على حياته فأصبح يقدم أفلام جادة ذات رسالة واضحة وفي نفس الوقت كوميديه تنبع من كوميديا الموقف .. و تُحقق المعادلة الصعبة والخلطة العجيبة ف الجمع بين الإحترام والقصة وتحقيق إيرادات كبيرة جداً

ومن هذه الأفلام

أسف على الإزعاج

ألف مبروك

عسل إسود

ولا أعتقد أن أي أسرة مصرية يُمكن أن يخدش حياءها أو تخشى من وجود ألفاظ نابية أو مشاهد خارجه مثلما نرى ونسمع .. على سبيل المثال الفيلم الذي تجه له هذا الشيء المسماه إيناس الدغيدي فيلم توصفه بانه قنبلة وهو عن زنا المحارم .. وتأليف من تصوروا ؟

قصدي رفيق الصبان ... مش عاوز أكتب إسم الشهرة الخاص به في الوسط الفني .... وهو عبارة عن تعديل بسيط في إسمه الثاني بإذافة حرف واحد فقط .... ربنا يُستر على ولايانا

وفي نفس الوقت سيُعرض فيلم أخر بنعوان " الديوث "

تخيلوا وتصوروا الإنحطاط اللي وصلنا له حتى في أسماء الأفلام وعن القصص الشاذة التي يتم تاليفها في أقذر الأماكن وكأن المخربين دول خلصوا مناقشة وحل كل قضايا الدنيا كلها وما فاضلش إلا تلك المهازل

[لونا]

أستاذ س س :

تخيل اني إكتشفت أنني لا يمكن أن أترك أولادي أمام فيلم عربي قديم أو جديد..

و أنا واثقة أنهم لن يروا أو يسمعوا ما يخدش حياؤهم ..أو يتعلموا منه شيء سيء..

يمكن ان أتركهم فقط أمام أفلام أحمد حلمي .. و أنا أعرف أنهم لن يسمعوا كلمة أو يروا مشهداً قبيحاً يخدش طفولتهم

هذا بالإضافة إلى أننا جميعاً كبار و صغار نستمتع بأفلامه

[م تيمور المراغي]

احمد حلمي هو النجم رقم واحد في مصر الان

لكن لي تحفظين عليه استاذنكم اني اطرحهم هنا رغم اني مش متزمت والله ومعقد لكن حبيت استانس بردودكم يمكن اطلع غلطان

الاول تبدل اداء منى زكي من السينما النظيفه للسينما الجريئه وده واضح في فيلمها الاخير وتصريحها لما قالت اعشق ادوار الاغراء وزاد الطين بله تصريح احمد حلمي لما قال ( سخونة منى زكي لا تزعجني )

تاني نقطه دايقتني في فيلم عسل اسود مشهد التحرش في الاتوبيس بين رجال واحمد حلمي يعني بصراحه منظر مقرف وانا عاتبت خالد دياب في موضوعه اللي فتحه بنفسه للتعليق على الفيلم ومالاقاش الراجل رد يرد بيه ,,

اكرر اعتذاري لعشاق احمد حلمي وانا اولهم ,, لكن صديقك من صدقك ,,

اترككم الان مع ابو راويه ,, صديق احمد حلمي الانتيم هههههه :happy:

http://www.youtube.com/watch?v=Z32O_OUa_jE&feature=related

[se_ Elsyed]

بُص يا أرش ..

ما فيش حد كامل فينا ...

أنا باتكلم من زاوية فنية بحته ... مراته بتعمل إيه أو بتمثل إزاي .. ماليش دعوه ...

[م تيمور المراغي]

بُص يا أرش ..

ما فيش حد كامل فينا ...

أنا باتكلم من زاوية فنية بحته ... مراته بتعمل إيه أو بتمثل إزاي .. ماليش دعوه ...

ههههه ,, اللي تشوفه ياكبير ,,

الصين حلوه برضوا :happy: ,, رغم ان رأيكم في الناقد الفني في نفس الموضوع تطرق لحياته الشخصيه كجزء لا ينفصل من تقييمك الشخصي ليه

استنى اضحكك

من يومين رايح انترفيو في شركه كبيره في جده ,, المهم ,, مريت على صاحبي الانتيم بقاله سنين في الشركه عشان استنى شويه لحد ما معادي ييجي

دخلت عليه لقيته قال لي انت ناوي تدخل للراجل كده ؟ ,, قلت له : ماله كده ؟

قال لي لا يا ريس ,, لقيته قام واقف خالع الجاكت بتاعي من على كتفي ,, والكرافته ,, ونضارة الشمس ,, وسحب اللابتوب بتاعي ,, و اختصر ملف السيره الذاتيه من 42 ورقه الى ورقتين فقط ,, تخيل ؟

قلت له ليه كل ده ؟ ,, قال لي اهدى كده وخليك حليم ,, ماتتكلمش كثير في المقابله عشان تتعين بمرتب اكبر

فانا حاليا عزيزي س س متلبس روح الكسل اللذيذ ده وحقول لك بكل صراحه وحب وابتسام :

حلوه الصين :happy:

[اغابي]

فى نجوم كوميدية ممتازين

زى محمد سعد لكن للاسف محمد سعد نزل مرة واحدة بفلم كسر الدنيا اللمبي - وكانه واقف بيه فى اعلى سلمة وكل فلم ينزلوا سلمة جديدة

لغاية فلم كركر جابو الارض بجد

ونفس الموضوع محمد هنيدي مع الفارق ان محمد هنيدي كتير بيقدم ادوار انه يلبس واحدة ست

يعنى مش مرة ولا اتنين لكن محمد هنيدي ما وصلش لسة للصفر - هو ثابت عند خط معين - وانا بقيت ازهق من افلامه بحسها مكرر

احمد حلمى العكس بدأ من الصفر واخدها صعودا صعودا لغاية ما وصل للقمة

وحتى فلم ناسف للازعاج - برغم انه مش الكوميديا اللى متعودين عليها من احمد حلمى

لكن برضوه

انا حبيت اوى الفلم داه و صعب عليا الشاب

برغم انى اكتشفت من مشهد واحد فى الفلم ان ابوه داه شبح لما لاقيته فى لعب الاسكوش مفيش ولا كورة ابوه صدها بالمضرب

وكنت فرحانة بنفسي بالتركيز داه واكتشافى للفلم - وحسيت برضوه انه فلم مميز اوى واهو مثلا مش كوميدي ولا حاجة

احييك فى اختيارك يا مسيو س س

[doha]

احمد حلمي هو النجم رقم واحد في مصر الان

لكن لي تحفظين عليه استاذنكم اني اطرحهم هنا رغم اني مش متزمت والله ومعقد لكن حبيت استانس بردودكم يمكن اطلع غلطان

الاول تبدل اداء منى زكي من السينما النظيفه للسينما الجريئه وده واضح في فيلمها الاخير وتصريحها لما قالت اعشق ادوار الاغراء وزاد الطين بله تصريح احمد حلمي لما قال ( سخونة منى زكي لا تزعجني )

تاني نقطه دايقتني في فيلم عسل اسود مشهد التحرش في الاتوبيس بين رجال واحمد حلمي يعني بصراحه منظر مقرف وانا عاتبت خالد دياب في موضوعه اللي فتحه بنفسه للتعليق على الفيلم ومالاقاش الراجل رد يرد بيه ,,

اكرر اعتذاري لعشاق احمد حلمي وانا اولهم ,, لكن صديقك من صدقك ,,

اتفق مع الرأي ده تماما .. ولي اضافة صغيره ..

سوق السينما في مصر حاليا برمته في ايدي المنتجين .. كل الي بنشوفه من انحطاط او مواضيع بعينها بتطرح في السينما بيتم اختيارها من قبل القنوات الفضائية المنتجه للافلام دي وعلى راسهم الآي آر تي وروتانا . . النظام المتبع ان القناه بتدي المخرج مبلغ ( مقطوع ) ليكن خمسة مليون مثلا وتطلب منه فيلم ـ اي فيلم ـ ينتجه بالمبلغ ده وزي مايطلع معاه بقى .. هو طلع شاطر وجاب ممثلين كسر ومؤلف نص كم وحط فرق السعر مابينهم وبين الناس الي بتفهم في السينما بجد في جيبه يبقى هو شاطر .. مجابش يبقى ضيع على نفسه ( سبوبه ) معتبره .. طبعا الشركات دي وكونها هي المنتج في ايديها تماما تطرح الموضوع او بعض مما يجب ان يحتويه الفيلم عشان تقبل بانتاجه كونه هيعرض على شاشاتها هي قبل اي حد تاني ..

زمان ـ ايام الفيديو ـ كان شرط عشان الفيلم يتوزع في الخليج كويس ان يحتوي على جملة او مشهد او شخصية تفيد بانه مسافر الخليج او ( جاله عقد عمل ) او طالع ( السعودية ) كانت كلمات كده بتتلزق تلزيق في اي سيناريو او حوار كجواز مرور للعمل الفني ده لاسواق الفيديو هناك . النهرده برضه القنوات اياها دي لازم يكون في الافلام الي بتعرض فيها كلمات شديده السوقية .. لازم يكون في زنا .. لازم يكون في فقر شديد لا حل له الا ببيع الاعراض .. دي شروطهم على مايبدوا لقبول الفيلم ..

لو لاحظنا كلنا عدد رواد السينما دلوقت معادوش زي زمان ابدا ده بخلاف حقيقة ان الفيلم الي بينزل سينما امبارح بليل بيكون متداول على النت النهرده الصبح . فين بقى مكسب الناس الي بتكلف ملايين في الفيلم الواحد ؟

المكسب بقى مكسب فكري او معنوي تهدف اليه الجهات المنتجه .. يعني عاوزين ينشروا فكرة معينة او يوصلوا لحاجه معينة فبيكلفوا وهم اصلا مش منتظرين ربح واي حاجه يحققها شباك الايرادات بعد كده بركه انما هم خلاص وصلهم مكسبهم من ترويج الفكرة .. ده من جهة

ومن جهة ثانية المكسب بيجي من المعلن الخفي في داخل الفيلم.. يعني مثلا البطل ياخذ بعفويه زجاجة بيبسي .. او يلتقط سلسلة مفاتيحه من جنب علبة حليب جهينة .. او يمر بسيارته بسرعه من تحت يافطه كرفور .. وهتلاقي رعاة رسميين لممثلين بعينهم .. يعني كل افلام عادل امام كمثال ـ القديمه في عز شهرته ـ لا يمكن تخلوا من اعلان لشويبس .. واقف يتكلم مثلا جنب صف صناديق منها .. بتمر سيارة الشركه بجواره صدفة في الشارع .. او حتى قاعد هو وخطيبته بيتفرجوا على اعلان شويبس ..

افلام احمد حلمي تحديدا برعاية شركه ابل .. وعدد من الشركات الاخرى الي بتسوق لمنتجات تانية .. ساعات .. موتسيكلات .. ملابس شباب .. كله موجود ..

بطبيعه الحال الشركات دي بتوجه دعايتها لشريحه من الشباب المصري الي هم في غالبيتهم مثقفين والاهم مبيتفرجوش اصلا على افلام عربي .. درسوا كويس احتياجات الباب دول وميولهم .. وراحوا صمموا لهم خصيصا افلام على ذوقهم .. النوع ده مش عاوز عري ولا عاوز اجوار فقر .. عاوز فكرة تخاطب العقل .. وجو مليء بالتكنولوجيا والحضارة واكيد العلاقات الانسانية.. دي التركيبة الي ممكن اروج فيها لمنتج زي الآي فون او الماك .. وبطبيعه الحال مينفعش ابدا احط كل ده في فيلم عن العشوائيات ولا يقوم ببطولته عمر الشريف مثلا .. لازم فنان شاب .. بيلبس ستايل .. ملوش شهرة كبطل افلام خليعه .. خفيف الدم الصفات دي كلها انطبقت على حلمي ..

وبكده فالنوعية دي من الافلام هي الي اختارت احمد حلمي .. مش هو ابدا الي اختارها ..

[المهندسه]

وبكده فالنوعية دي من الافلام هي الي اختارت احمد حلمي .. مش هو ابدا الي اختارها ..

طبعا اتفق تماما على ان احمد حلمى فنان محترم جدااا و وجوده فى كل بيت لا يخدش الحياء ...فكل الاطفال تعرفه بالاسم وهو دليل على دخوله القلب سريعا ..واتفق معكم فى كل اراءكم

ولكن لى تعليق بسيط يا ضحى على هذا السطر ...اذا فرضنا فعلا ان احمد حلمى ليس له يد فى اختياره و ان الشركه الراعيه و المنتجه هى التى توجهه...

احمد حلمى فنان كبير يعنى تعرض عليه سنويا عدد لا بئس به من السيناريوهات بل و المسلسلات سواء التليفزيونيه او الاذاعيه ايضا وهو يختار بينهم بنفسه بنفسه يختار ما يروق له ثم تشاركه الرأى الشركات السابق ذكرها بمعنى ان الاختيار يكون اولا له وان ما يقدمه من نجاح يرجع اولا لاختياراته الموفقه و المحترمه

...والا ماكانش حد غلب كان اى فنان موهوب برضه بس معندوش حظ من النجاح ...تبنته مثل هذه الشركات صاحبه الاختيارات المناسبه للشباب او للجو العام الذى نعيشه...هذه الشركات صاحبه الفانوس السحرى .

ولكن نجاح الفنان بيكون نابع منه هو اولا و من اختياراته ودليل على ذلك هو الاستمرار فى النجاح .

[doha]

..والا ماكانش حد غلب كان اى فنان موهوب برضه بس معندوش حظ من النجاح ...تبنته مثل هذه الشركات صاحبه الاختيارات المناسبه للشباب او للجو العام الذى نعيشه...هذه الشركات صاحبه الفانوس السحرى .

ولكن نجاح الفنان بيكون نابع منه هو اولا و من اختياراته ودليل على ذلك هو الاستمرار فى النجاح .

مختلفناش .. لو مش موهوب مكانش نجح ومكانوش اصلا اختاروه .. بس احنا هنا مش بنتكلم عن موهبته ولا عن اسباب نجاحه . . ان لم اكن فهمت التوبيك بشكل خاطيء فاظن الفاضل سين سين كاتب في عنوانه ومقدمه الموضوع مايدل انه ( تحية للفنان المحترم ) ..

بغض النظر عن موهبته الي مش بنتناقش حولها دلوقت .. افلام احمد حلمي مش نظيفة ومناسبة لاطفالنا عشان هو نظيف ومناسب للاطفال وانما لان المنتج عاوز كده ..

احمد حلمى فنان كبير يعنى تعرض عليه سنويا عدد لا بئس به من السيناريوهات بل و المسلسلات سواء التليفزيونيه او الاذاعيه ايضا وهو يختار بينهم بنفسه بنفسه يختار ما يروق له ثم تشاركه الرأى الشركات السابق ذكرها بمعنى ان الاختيار يكون اولا له وان ما يقدمه من نجاح يرجع اولا لاختياراته الموفقه و المحترمه

من الخطأ تصديق ماتروجه وسائل اعلامنا من ان ( فنانيينا ) هم من يختارون اعمالهم وان الشركات تنج لهم ( بعد التشاور معهم ) .. دي صورة اعلانية تروج لنا كزبائن للميديا مش بضرورة ابدا هي الي بتحصل في الواقع . حقيقة صناعه السينما في مصر هي ماذكرته في مداخلتي السابقة .. الممثلون مجرد ادوات لايصال رسالة من يدفع ثمن ايصالها ..

واخيرا فاحد ماعلمته لي الحياه وبشكل قاطع ان ( الاخلاق لا تتجزأ ) .. المحترم محترم على جميع الاصعده .. ومن يقبل بالانحراف في جزء يحتمل قبوله على الكل .. مفيش حاجه اسمها هو محترم وبيختار حلو وفي نفس الوقت لا يجد غضاضه في افلام زوجته ويصرح بذلك .. هو بيمثل نظيف عشان هو انعرض عليه النظيف .. وهي بتمثل غير ذلك عشان هي اختاروها في الغير ذلك .. هم ـ او غيرهم ـ ملهمش اي دور سوي قبول العرض ..

تم تعديل 31 أكتوبر 2010 بواسطة doha

[الغريب]

واخيرا فاحد ماعلمته لي الحياه وبشكل قاطع ان ( الاخلاق لا تتجزأ ) .. المحترم محترم على جميع الاصعده .. ومن يقبل بالانحراف في جزء يحتمل قبوله على الكل .. مفيش حاجه اسمها هو محترم وبيختار حلو وفي نفس الوقت لا يجد غضاضه في افلام زوجته ويصرح بذلك .. هو بيمثل نظيف عشان هو انعرض عليه النظيف .. وهي بتمثل غير ذلك عشان هي اختاروها في الغير ذلك .. هم ـ او غيرهم ـ ملهمش اي دور سوي قبول العرض ..

ربنا يكرمك يا مدام ضحى

كنت داخل أقول الكلمتين دوول ، مينفعش نعلق أطفالنا بممثل في أفلام ولما ييجي يحود شمال نقولهم لأ ده وحش

الممثل بيبان من أفكاره

ربنا يحفظ أولادنا جميعا ، خلوا بالكم أوي والله دي نعمة كبيرة من ربنا وهنسأل عنهم

تم تعديل 31 أكتوبر 2010 بواسطة الغريب

[Simba]

لم يكن أحد يتوقع أن يلمع نجم مذيع الأطفال أحمد حلمي الذي ظهر في اواخر التسعينات في برنامج على القنوات المصرية تحت عنون " كلام عيال " ويصبح هذا المذيع نجماً كوميدياً محترماً

هو من جهة التوقعات فمن ساعة فيلم صعيدي في الجامعة الامريكية وفرقعته بقينا نتوقع اي حاجة

وبقدرة قادر بقوا كل السنيدة يعملوا افلام بطولات مطلقة

احمد حلمي فنان ونجم لامع لكن في نفس الوقت برضه عادل امام فنان كبير وله وزنه رغم الانتقادات الكتيرة ووالاسويين اللي معايا في الشغل ميعرفوش ممثل مصري غير عادل أمام

واللي يتحسب لاحمد حلمي ان افلامه فعلا خالية من الافيهات عكس الممثلين الشبان

لكن غدا لناظره قريب

[se_ Elsyed]

افلام احمد حلمي مش نظيفة ومناسبة لاطفالنا عشان هو نظيف ومناسب للاطفال وانما لان المنتج عاوز كده..

قرأت الفقرة دي يمكن حوالي 20 مره عشان افهمها .. وبرضوا ما فهمتهاش ... وهي من نفس نوعية رأيك يا ضحى على فكره لما كنا بنناقش الأعمال الفنية اللي أعجبتنا في رمضان وأخترنا تقريباً عمل أو إتنين ودخلتي ضربتي كُرسي في الكلوب لتعبري عن إنك لا تشاهدين أي اعمال فنية لا في رمضان ولا غيره ومش بس كده ... فعشان لازم يكون لكي بصمة روحتي قايله ما معناه " أسيبكوا تكملوا فرجه على الحاجه زهره وتشوفوا هاتعمل إيه ما أزواجها " !!!!!

يعني داخله تغلقي باب الحوار بالضبة والمفتاح في موقف غريب منك ...

فلما المنتج هو اللي عاوز كده .. ودي لا اعمال جاده ولا أعمال سودا حتى ...

طب ليه المُنتج ما بيعوزش كده مع باقي الاعمال اللي لا تُعتبر فن من بعيد أو قريب ؟

إيه في منتج بيبقى عاوز يكسب .. والتاني بيشتري حمام ويطيره ؟

واخيرا فاحد ماعلمته لي الحياه وبشكل قاطع ان ( الاخلاق لا تتجزأ ) .. المحترم محترم على جميع الاصعده .. ومن يقبل بالانحراف في جزء يحتمل قبوله على الكل .. مفيش حاجه اسمها هو محترم وبيختار حلو وفي نفس الوقت لا يجد غضاضه في افلام زوجته ويصرح بذلك .. هو بيمثل نظيف عشان هو انعرض عليه النظيف .. وهي بتمثل غير ذلك عشان هي اختاروها في الغير ذلك .. هم ـ او غيرهم ـ ملهمش اي دور سوي قبول العرض ..

رأي غير صحيح بالمره من وجهة نظري ..

فلو إتعرض عليه تقييم عمل فني مُعين ..

إما أقول والله أنا لا ليه في الفن ولا الطحين .. واسكت

أو أقول لأ لأ مش هاتفرج على العمل ده أصل زوجة البطل مره مثلت فيلم سنة 1956 وهي لابسه شبه عريان ... فأنا مقاطعه لأنه فنان غير محترم

او أقول رأيي في العمل بمنتهى الحيادية وأركز على العمل فقط

خصوصاً إن كان صاحب العمل ده لا شاذ جنسياً ولا أتمسك قبل كده في قضية مُخله ...

أما موضوع لحد دلوقت أعماله كويس لكن إبقوا قابلوني بعد كده .. فلا تعليق ...

------------

اللي أنا مستغرب له ..

لو إحنا بنناقش موضوع في كرة القدم مثلاً ...

وفي واحد لا له في الكرة ولا البطيخ .... ليه يدخل يتحفنا برأيه البعيد كل البُعد عن الرياضة ويقطم في اللي جابونا وإن كرة القدم هي لهو ورجس من عمل الشيطان ودي ناس بتاخد مليارات على قلة فايدة ... وجاتكو نيلة إنتم وهما

فمن البديهي .. الحاجة اللي لا تستهوي الواحد يبقى يطنشها .. يبعد عنها وبلاش يُدلي برأيه ...

ده مش حجر أو إرهاب فكري ..

لإني أعتقد أن هناك أراء ليست بأراء أساساً .. إنما هي محاولة لإثبات الوجود أو أنا عايش أهو ولازم أنط في كل توبيك وخلاص حتى لو ماليش فيه

والله كلامي هذا ليس موجهاً لأحد بعينه .. ولكنني تذكرت موقف محدد أثناء إحتفالنا فوز مصر بكأس الأمم الأفريقية ودخل بعض الزملاء نقد وبهدله في اللي موجودين لأننا نشجع الكرة التي تفسد الشعوب والتي هي من بروتوكولات أل صهيون وإن البلد بتخرب وإحنا قاعدين نهيص .. لاب لاب لاب لاب لاب

[doha]

ودخلتي ضربتي كُرسي في الكلوب لتعبري عن إنك لا تشاهدين أي اعمال فنية لا في رمضان ولا غيره

فين قرأت لي سيدي الفاضل اني لا اشاهد اعمال فنية في غير رمضان ؟؟؟

ايوه في رمضان مش بتفرج على التلفزيون خالص لكن بعد رمضان عادي جدا ممكن اتفرج وعلى نفس المسلسلات الي اتعرضت في رمضان .. ايه المشكلة ؟

بعدين معليش هل التوبيك ده حضرتك فاتحه عشان نناقش فن احمد حلمي كفن وقيمه ولا نناقش مسالة كونه شخص محترم ممكن نسيبه ياخذ باله من العيال عادي واحنا رايحين نقضي مشاويرنا ؟

رأي غير صحيح بالمره من وجهة نظري ..

فلو إتعرض عليه تقييم عمل فني مُعين ..

إما أقول والله أنا لا ليه في الفن ولا الطحين .. واسكت

عاوزني اقيم العمل الفني ؟ عن نفسي شفت له فيلميه ( آسف للازعاج ) و ( الف مبروك ) .. رايي فيهم كافلام اكثر من رائعه طبعا .. على القمه مابين الافلام العربية الي اتعملت في خلال العشر سنوات الاخيرة بلا منازع .. رايي فيه كممثل .. كان مقنع في الفيلمين جدا وان كنت اتمنى لو كان ادائه اكثر اتقانا في مشهد احتضان امه له لما اكتشف وفاة والده ..

بس كل ده مش موضوعنا هنا .. الي فهمته انك فاتح التوبيك للاشاده بالفنان المحترم واختياراته المحترمه فحبيت اوضح حقيقة معلومه لكل العاملين في الوسط الفني مش سر يعني الكل بيتكلم عنها .. المنتج هو الي بيختار مش الفنان ..

فلما المنتج هو اللي عاوز كده .. ودي لا اعمال جاده ولا أعمال سودا حتى ...

طب ليه المُنتج ما بيعوزش كده مع باقي الاعمال اللي لا تُعتبر فن من بعيد أو قريب ؟

إيه في منتج بيبقى عاوز يكسب .. والتاني بيشتري حمام ويطيره ؟

مهو لو حضرتك ركزت في مداخلتي السابقة كنت وجدت اجابة على تساؤلك ده مكتوبه فيها بالحرف .. مش قلنا ان الافلام دلوقت مش بتكسب من شباك التذاكر .. ولا حتى من الاعلانات قبل وبعد عرض الفيلم .. كل ده ميجيبش التكاليف الفلكية الي وصلها انتاج الافلام في وقتنا الحالي .. وقلنا ان في طريقتين للربح .. اما اني اتفق مع شركه او مجموعة شركات تروج لمنتجاتها ( داخل الفيلم ) وهو ماحدث مع افلام احمد حلمي الاخيرة .. او اني اكون قبضت مكسبي من بدري من صاحب الفكرة الي دفع لي لترويج فكرته ايا كانت الفكرة دي .. وهو ده مكسب المنتج بتاع الاعمال الي حضرتك وصفتها بالافن ..

يعني حضرتك متخيل ان الناس الي بتنتج افلام العري الاخيرة دي بتنتجها عشان ده الي هيجذب الجمهور وبالتالي يعلي الايرادات .. طيب حضرتك آخر مرة دخلت فيها سينما كانت امتى . بلاش السؤال ده .. السنة الي فاتت دي دفعت كام جنيه لمشاهدة افلام ؟ طيب سؤال تالت اهم .. في السنة الي فاتت دي حضرتك شفت كام فيلم ؟

معظمنا ان لم يكن كلنا خلاص بنشوف الافلام دلوقت مجانا سواء على النت او في الفضائيات .. الافلام دي متكلفة ومدفوع ثمنها مسبقا .. هي تكاد تكون مجانية بالفعل وبتوصلنا لحد بيوتنا بدون ادنى مجهود .. في رايك يعني مين بيدفع ثمن ده كله ؟

يعني داخله تغلقي باب الحوار بالضبة والمفتاح في موقف غريب منك ...

هو مش حضرتك نوهت في بداية موضوعك انك مش عارف سر ( التحول ) في اختيارات حلمي .. ردي مكانش هابط بالبراشوت على موضوعك زي مابتحاول تصوره .. انا بس كنت بجاوبك على سؤالك ده ..

احمد حلمي عمل الف مبروك عشان انعرض عليه لا اكثر بالظبط زي ماسبق وعمل سهر الليالي لنفس السبب..

طلب اخير سيدي الفاضل سين سين .. يعني مش واحد بعد اذنك خليهم طلبين ..

اولهم ويمكن طلبته منك قبل كده على مااذكر .. اتمنى من كل قلبي تبطل ترد على الي بيكتب وتركز ردك في الي انكتب .. وثانيهم.. بعد اذنك .. اقرأ مداخلتي الاول مرة تانية .. يمكن تلاقي فيها المرة دي شيء جديد ..

تم تعديل 1 نوفمبر 2010 بواسطة doha

[se_ Elsyed]

يبقى أنتي اللي ما أخدتيش بالك

لأني كتبت إني قرأت ردك أكثر من مره . وما فهمتش منه أي حاجه متعلقه " بباب الفنون " واخده بالك ؟

فين قرأت لي سيدي الفاضل اني لا اشاهد اعمال فنية في غير رمضان ؟؟؟

ايوه في رمضان مش بتفرج على التلفزيون خالص لكن بعد رمضان عادي جدا ممكن اتفرج وعلى نفس المسلسلات الي اتعرضت في رمضان .. ايه المشكلة ؟

ده شيء ممتاز وأعتراف صريح جداً

يبقى بما إنك ما بتتفرجيش على حاجه في رمضان .. يبقى داخله تُدلي برأيك ليه في أعمال رمضان اللي كنا فاتحين عشانها موضوع في رمضان ؟

بعدين معليش هل التوبيك ده حضرتك فاتحه عشان نناقش فن احمد حلمي كفن وقيمه ولا نناقش مسالة كونه شخص محترم ممكن نسيبه ياخذ باله من العيال عادي واحنا رايحين نقضي مشاويرنا ؟

ده رد من نوعية " دوخيني يا لمونه " !!! وهو أحمد حلمي يا ضُحى حلاق وداخلين نقول رأينا فيه في باب الفنون ؟

ياخد باله من العيال لو كنا فتحنا موضوع في باب الأسره والطفل . إنتي بس أختلط عليكي الأمر وما شوفتيش الموضوع في أنهي باب

مش قلنا ان الافلام دلوقت مش بتكسب من شباك التذاكر

أومال أرقام إيرادات شباك التذاكر مقرانة بتكلفة إنتاج الفيلم اللي بنقراها دي إيه ؟

Fake ...

كده وكده يعني وبيعملوا لنفسهم سُمعه بطاله سواء هما أو الأفلام الاجنبية مثلاً اللي إيراد تذاكرها فقط بتتخطى المليارات ؟

اما اني اتفق مع شركه او مجموعة شركات تروج لمنتجاتها ( داخل الفيلم ) وهو ماحدث مع افلام احمد حلمي الاخيرة .. او اني اكون قبضت مكسبي من بدري من صاحب الفكرة الي دفع لي لترويج فكرته ايا كانت الفكرة دي

ده إجتهاد شخصي ولا حقيقة ؟

لو إجتهاد شخصي .. يبقى رأيك الشخصي وإنتي حره فيه

لو حقيقة ... يبقى إثبتي لنا ذلك

وحكاية ترويج الأفكار دي عامله زي إشاعة رجال الأعمال اللي بيدفعوا للفنانات عشان يتحجبوا

يعني حضرتك متخيل ان الناس الي بتنتج افلام العري الاخيرة دي بتنتجها عشان ده الي هيجذب الجمهور وبالتالي يعلي الايرادات

!!!!!!!!!!!!!!!! أومال إيه ؟

عشان يُروج لفكرة العري اللي الناس ما تعرفهاش وبالتالي يبذل الغالي والرخيص ويكلف الفيلم ملايين عشان كده ؟

طيب حضرتك آخر مرة دخلت فيها سينما كانت امتى . بلاش السؤال ده

أخر مره أخر مره

أيوه .. دخلت بعد ما أنتي دخلتي بيوم .. أو يومين تقريباً لإن الجمعة كنت أجازة في البيت

السنة الي فاتت دي دفعت كام جنيه لمشاهدة افلام

مبلغ كبير جداً بصراحة .. إنتي عارفه السنيما مش تذكرة بس .. لكن دي شوية حاجات فوق بعض

فشار ولب وحاجه ساقعه وساندوتشات حلاوه بالقشطة

في السنة الي فاتت دي حضرتك شفت كام فيلم ؟

بتعرفي تعدي لحد كام ؟

اتمنى من كل قلبي تبطل ترد على الي بيكتب وتركز ردك في الي انكتب

ده على اساس إنك متعوده تردي على اللي أنكتب مش اللي بيكتب والدليل : قالوا له ..

وبالتالي الأسئلة من عينة دخلت كام مره السيما ودخلت برجلك اليومين وقلت إحم ودستور ولا لأ ؟ ...

ده كان إيه ؟؟؟ شاي بلبن ولا رد على المكتوب بس بطريقة عصرية ؟

اقرأ مداخلتي الاول مرة تانية .. يمكن تلاقي فيها المرة دي شيء جديد ..

أوعدك هاعمل كده في حالة واحده

لو كنتي عملتي Edit

وكتبتي

رأي فني بحق وحقيقي جديد

[doha]

على فكره ياسين سين كتير بيقابل الواحد مننا ردود مش ضروري ابدا يرد عليها .. يعني مكنتش مضطر تكتب ردك اعلاه وتجيب كلام من اليمين والشمال عشان يبقى فيه رد وخلاص ..

على العموم ياسيدي ومن هذا المنطلق فاعترف .. ردك الاخير ده برضه من المداخلات الي مينفعش اكتب لها رد ..على كل حال بعتذر لو ازعجت حضرتك في التوبيك بتاعك .. كنت فاكره انك بتتكلم عن خيارات احمد حلمي الاخيرة فحبيت اوضح لحضرتك انها مش اختيار .. ده بيزنس .. بس ارجع اقول انا الي اكيد غلطانة .. صناعة سينما ايه واحتكارات منتجين ايه .. احنا في زمن الخيارات الحرة والفنان الواعي الي مبيهموش مكسبه منين المهم يقدم فن .. نظيف ..

خلاص ياسيدي .. احمد حلمي فنان محترم ونظيف وافلامه روعه وتستحق نشوفها كل يوم وبيدخل ملايين الملايين من افلامه دي بدليل الخمستلاف فيلم الي شفتهم السنة الي فاتت والي اكيد دفعت ثمنهم كلهم ودخلوا جيب المنتج .. مفيش شركات بتعمل اعلانات في الافلام دي و بتبقى صدفه لو ظهر لوجو اي شركه فيهم في ثلاثه ارباع المشاهد .. احمد حلمي عليه اختيارات محصلتش تستاهل نشوفها كلنا في جلسة عائلية خاصة فيلمه المعجزه سهر الليالي .

احمد حلمي واللمبي وعادل امام وغيرهم كلهم عباقرة الفن بيحطوا رجل على رجل في صالون بيتهم ويقروا سيناريوهات والي يعجبهم ويحقق " رؤيتهم " يمثلوه .. والي ميعجبهوش يشوتوه بالرجل برا ولا انهم يمثلوا في افلامه ..

خلاص ياسيدي الفاضل انا مبفهمش في الفن ومبشوفش افلام ولا بفهم في حاجه خالص .. وده اعتراف صريح مني ياريت تطبعه عندك على البرنتر ويارت تعلقه في الصالون .. واكيد طبعا ياريت تطلعه لي في كل مداخله قادمه اكتبها او لو حبيت احطه لك في توقيعي .. المهم تكون مرتاح ..

وخلاص من هنا ورايح لما احب اتكلم في الفن ـ الي مبفهمش فيه ـ ابقى اسأل الاول واشوف الناس بتقول ايه واقول زيها .. وبلاش بقى الدخول في العمق وخلينا ناخذ الامور بسطحيتها وكما تبدوا لاول وهله .. الدنيا ربيع والجو بديع وحااااضر عشان خاطرك .. هقفل على كل المواضيع ..

[se_ Elsyed]

على كل حال بعتذر لو ازعجت حضرتك في التوبيك بتاعك

وأنا قبلت إعتذارك ... بس ما تعمليش كده تاني لو سمحتي

بس ارجع اقول انا الي اكيد غلطانة

عادي .. اي بني أدم بيغلط .. المهم إنه يعترف بغلطه

خلاص ياسيدي الفاضل انا مبفهمش في الفن ومبشوفش افلام ولا بفهم في حاجه خالص .. وده اعتراف صريح مني ياريت تطبعه عندك على البرنتر ويارت تعلقه في الصالون

لأ للأسف ما فيش مكان في الصالون .... ممكن ندور على مكان تاني مناسب

وخلاص من هنا ورايح لما احب اتكلم في الفن ـ الي مبفهمش فيه ـ ابقى اسأل الاول واشوف الناس بتقول ايه واقول زيها

مش عيب أبداً ... ما فيش واحد بيفهم في كل حاجه في الدنيا.

وصل الهانم لحد الباب يا عبدو

[شريف مان]

هوا تقريبا الموضوع بيتكلم فى نقطتين الاعمال المحترمة والنجاح التدريجى .. الاعمال التافهة وتحقيق الايرادات بأى شكل

النقطة الاولى : مش احمد حلمى لوحده هوا اللى أخد الطريق الصعب .. فيه غيره زى السقا وهنيدى وحتى محمد سعد اللى بعد كده خاب وفيه احمد عز اللى بدأ بشكل سيىء وبعد كده بقى ممتاز

النقطة الثانية : زى الاخوان سبكى وايناس الدغيدى وخالد يوسف وغيرهم .. دول عايزين شهرة وفلوس فقط لا غير .. ايه اللى يخلى منتج يدفع لاحمد حلمى عشرة مليون على الاقل لوحده فى فيلم

طيب مايجيب كام ممثل ( حشو) وكمان رقاصة وطبل وزمر وتجيب فلوس بدون مخاطرة كبيرة

بالنسبة لاحمد حلمى فدا ممثل ممتاز كل اعمال هايلة وناجحة .. صحيح مفيش قضايا بيناقشها فى افلامة باستثناء فيلم وللا اتنين .. انما انه يضحك الناس ويرسم البسمة على وجوههم بدون ابتزاء وسفالة

فدا شىء ممتاز