ارجوكم اعذرونى

[Howayda Ismail]

مش عارفة ابدأ كلامى ازاى ومنين بس كل اللى عرفاه انى عاوزة اخرج الشحنة اللى جوايا خليط

من المشاعر المتضاربة فرحة ممزوجة بحزن كبير وقلق بالغ انا فرحانة له كتير اوى اوى لكن

بمجرد خروج زوجى للشغل دلوقت وغلقه باب الشقة حدث لى شبه انهيار وانفجرت فى بكاء لم يصادفنى

منذ وفاة والدى الله يرحمه من 11 سنة لكن وقتها كان زوجى واخواتى ووالدتى معايا بس دلوقتى هو مش معايا

لسة مفجآنى دلوقت بميعاد سفره للحج كنت عارفة اليوم تقريبا لكن لما حدد الساعة وباقى ساعات معدودة على

سفره ادعيت انى نائمة حتى لايرانى وانا ابكى انا مستغربة لحالتى لانى مشاعرى انا عارفها وباتحكم فيها

كويس لكن دلوقت مش قادرة اسيطر عليها رغم انه سافر قبل كده عمرتين بس اولادى كانوا صغيرين تحت ايدى وقدام عينى

دلوقت حاسة بمسئولية كبيرة خايفة ماقدرش اشيلها خصوصا كبروا وبيخرجوا لوحدهم للشارع ومدارسهم ودروسهم

سنين عشرة طويلة بينى وبينه 23 سنة خطوبة وزواج مافترقناش لحظة واحدة من اخر عمرة من15 سنة

عمر تانى تقريبا اتربيت فى بيته عشت عنده اكتر من بيت اهلى

انا بقالى فترة مش قادرة انام بقعد جنبهه ابص عليه واملى عينى منه ربنا مايحرمكم من عزيز عليكم

الفرقة صعبة اوى انا بالى مشغول من مدة مش عاوزة اطلع معاه المطار عشان مش بحب اودع حد وخصوصا لو كان

هو حشايا قلبى من جوا مش عارفة عاوزة اقوله سامحنى على اى ضيق سببته لك عاوزة اقوله ماتتأخرش علينا وارجع لنا

قوام عاوزة اقوله افتكرنى بدعوة رضا فى بيت الله الحرام زوجى انسان طيب اوى ومحترم وبحبه اوى اوى

ويمكن ده اللى سبب حالتى دى مش متصورة ان الظروف تبعدنا ماكنش ينفع اروح معاه عشان الاولاد والدراسة

ومينفعش يغيب عن عينى المدة دى كلها حاسة انى باتقطع من جوايا لكن مش عاوزاه يشوفنى كده ولاحتى ولادى

لانى عكس كده معاهم هو عارف انى الحمد لله قد المسئولية واعرف اصرف امورى وامور بيتى وولادى زى ماتعودت

لكن لحظة ضعف وحشة بالنسبة لى قدام نفسى انى اكون كده .ربنا مايحرم حد من حبايبه

وسمحونى انى تقلت عليكم بس باعتبر المنتدى بيتى التانى الى بادخله من غير ميعاد ومن غير ما اخبط ولا استاذن

لان اللى فيه اخواتى واهلى وده احساسى ناحية المنتدى

[Diab]

ربنا يخلي لك ويجمعكم ع خير

دي بتبقي من اللحظات الجميلة في عمر الانسان

هاتي عندك اجندة قديمة وسجلي فيها الحاجات دي وخليها ذكري لاولادك يقرأوها هما كبار :clappingrose:

[Mr MAGED]

يا أستاذة هند

ربنا يخليكوا لبعض .. ويرجعلك بالسلامة ان شاء الله

كلها كام يوم ويرجع متقلقيش ... الحج مش بيطول

وهتكون فرصة حلوة لتجديد المشاعر

حج مقبول وذنب مغفور ان شاء الله

تحياتي

[ozoozo]

انا مش فاهم زعلانه ليه وقلقانه من ايه

حد يزعل علي حد رايح يشتري نفسه

لا اظن ان هناك مكان امن اكثر من بيت الله

وماتخافيش هو مش هايتجوز هناك -عشان عقد النكاح لا يجوز للمحرم-;)

ربنا يرجعهولك بالسلامه

[اغابي]

يا حبيبتى يا هند

انا بحييكى انك كنت متماسكة قدامه بالشكل داه

لان نفسيته كانت حتتعب اوى لو شافك بتبكي

على كدا يا هند انا جتتي نحست - انا جوزى طول السنة سفر بره الكويت فى الاول كان ياخدنى معاه انا والاولاد

اذا راح اى بلد من البلاد اللى عنده فيها ماموريات وانا لاقيت نفسي باتعب انا والاولاد مرمططة الفنادق واحيانا مش بنتفسح وبنزهق وهو مقضي الوقت كله اجتماعات فى الشغل - روحت قررت ان ما كنش السفر لمصر مش حاخرج بره الكويت تانى

وفعلا هو بدأ يسافر لوحده ويسيبنى انا والاولاد فى الكويت وعلى فكرة

هو عنده سفرية فى شهر 12 الجاى احتمال بيروت او لندن - لسة ما حددوش عنده اى مكان

ابقى فكريني ابكى شوية عليه بس علشان جوزى يفرح بيا ويفتكر ان عندي احساس

:lol:

لانه زعل المرة اللى فاتت لما رجع من دبي وقولتله مش حاقدر اسيب النت واروح استناك فى المطار اطلب تاكسي

:lol:

انا حاسة انى بالنسبة لمشاعرك الرقيقة يا هند انا جبلة اوى وما عنديش زوق

لو جوزى شافنى زعلانة اوى على سفره اكيد حيفرح بيا خالص خالص خالص

وعلشان تعرفى ان سفرية جوزك هينة شوية وتهونى على نفسك - افتكرى سفريات جوزى السندباد

اللى اكتر مرة قعد فيها فى الكويت الفترة اللى فاتت 3 شهور متواصلين وياريت قعد معانا لكن قعد يلعب العاب جيمز على الكمبيوتر

cr((: cr((: cr((:

ربنا ما يفرقكمش ابدا ياهند ابدا

ويرجعهولك بالف سلامة

rs:

تم تعديل 1 نوفمبر 2010 بواسطة اغابي

[عبير يونس]

مشاعرك طبيعية جدا يا هند يا حبيبتي

ربنا يديم المعروف بينكم و يجمع بينكم في خير ...آمين

حبيبتي

"ألا بذكر الله تطمئن القلوب"

ربنا يا حبيبتي هو الونيس الحقيقي

احسن حاجة عشان ترتاحي من الهواجس دي استودعيه

حطي ايديك على رأسه و قولي له " استودعتك الله الذي لا تضيع ودائعه"

حتلاقي قلبك ارتاح و هديتي

ادعيله دايما ربنا يكرمه و يتقبل منه و يرجعهولك بالسلامة ...آمين

و دايما الزمي الدعاء ده

اللهم انا نعوذ بك من جهد البلاء

و درك الشقاء

و سوء القضاء

و شماتة الأعداء

اللهم إنا نسألك عيش السعداء

و نزل الشهداء

و مرافقة الأنبياء

و النص على الأعداء

يا سميع الدعاء

يا ذا الطول و العطاء

آمين

:flr1::flr1::flr1:

[لونا]

إنت رقيقة أوي يا هند :wub:

ربنا يرجعه لك و لأولاده بالسلامة

قولي له على مشاعرك دي كلها.. و لا تخجلي .. دي مشاعر جميلة أوي

و لو كان على المسئولية .. فأكيد إنت قدها و قدود

و توكلي على الله .. ( حسبي الله .. لا إله إلا هو عليه توكلت .. و هو رب العرش العظيم )

[الغريب]

ما شاء الله أيه الإحساس الراقي ده

يلا خليكم تجربوا طعم الغربة شوية يالي قعدين في مصر

أن شاء الله ربنا هيتقبل منه ويرجعلكم بألف سلامة

أنا مجرب لوعة الفراق بتكون عاملة أزاي بس ربنا معاكي

[nightmare]

أ.هند

ما كنتش اعرف انك حساسة قوي كده

ربنا يخليكوا لبعض وأبو عبد الله يروح ويرجع بألف سلامة , وربنا يتقبل منه ويكتبها له حجة مبرورة ان شاء الله

هوني علي نفسك شوية , دول كلهم كام يوم , امال لو قالك جايلى عقد عمل وهيغيب عنك بالسنة والاثنين هتعملى ايه

لازم تكوني أقوي من كده بكثير , انتى انسانة مثقفة ومتعلمة , امال والدتى تعمل ايه اللى كانت متحملة مسئولية بيت وأولاد ومدارس لمدة 10 سنين كاملة, لم اري والدي من اولى اعدادي الا وانا في البكالوريوس الا شهر كل عام, دي على كده كانت "أسد" بقي, دي كانت بتلعب "كونغ فو" واللى يعمل فيها راجل ويفتح بقه تقوم مشنكلاه وقاعدة فوقه تبططه وتمسح بيه بلاط الشقةbngn::

الفراق صعب وكلنا مجربينه بس بيقولوا ان "الفراق هو سنة الحياة".

وانتى قدها وقدود , واهى فرصة تختبري نفسك في قدرتك على تحمل المسئولية وتجددوا المشاعر ما بينكم.

وما تخافيش عليه يا ستى مفيش اكثر من أعضاء السعودية في المحاورات وهنشيله فوق راسنا من فوق وبالمرة نطبعله كلامك ده وندهوله , ههههههههه:D

مع تحياتي

تم تعديل 1 نوفمبر 2010 بواسطة nightmare

[shiko]

فى البداية ...

...طبعا بحييكى على شعورك الجميل واعتزازك برفيق حياتك ..الذى لا طالما اجتمعتما على مشاعركما النبيلة

==========================================================

على جنب بقى ..ليه تموتى الاحساس الجميل بالفرحة انه مسافر للحج .....ولقاء من هو احب ...

ما تبوظيش فرحتك ...افرحى على وسع ايديكى ...مدى يديكى للهواء الطلق واحتضنيه زوجك ....

تذكرى يوم رجوعه لكى

انتظرى منه مفاجأة او هدية

اوصيه بهدايا لابنائك ...

رتبى جدول لايام سفره لتغيير غرف المنزل ..او تبديلها

رتبى له اوراقه واحتياجاته ودولابه الخاص

اشترى له بيجامة جديدة

اقبلى على الفرحة بفرحة اكبر

تغلبى على اى مشاعر سلبية بالتفكير فى مشاعر اخرى ايجابية ...

وماتنسوناش فى الدعاء

[pocy]

حبيبتى واختى فى الله هند

والله ان ما تشعرين به هو ما قد شعرت به بالضبط فى العام الماضي عندما نزلت قبل زوجى ب10 ايام حتى استطيع ان اخد راحتى مع اهلى قبل مجيئه واكون شبعت منهم شويه بس حبيت اقولك ان والله كان فراقه على صعب جدا لدرجه انى قررت انى ابدا ماهنزل تانى من غيره لانه حبيبي وزوجى وسندى وكل حياتى على الرغم من سنوات عمرى البسيطه اللى عشتها معاه 3 سنوات وخمس شهور الا يوم الا انها من اجمل سنين حياتى وبجد حاه بيكى جدا لانه الاحساس ده مستمر معايا كل يوم لحد ما يجي من الشغل وربنا يكرمنا فى ازواجنا وفى اولادنا ويجمع بيننا دائما فى الخير يارب العالمين

بس بجد مكنتش اعرف احساسك المرهف ده واسمعى كلام شيكو أد ايه جميل

[اغابي]

حبيبتى واختى فى الله هند

والله ان ما تشعرين به هو ما قد شعرت به بالضبط فى العام الماضي عندما نزلت قبل زوجى ب10 ايام حتى استطيع ان اخد راحتى مع اهلى قبل مجيئه واكون شبعت منهم شويه بس حبيت اقولك ان والله كان فراقه على صعب جدا لدرجه انى قررت انى ابدا ماهنزل تانى من غيره لانه حبيبي وزوجى وسندى وكل حياتى على الرغم من سنوات عمرى البسيطه اللى عشتها معاه 3 سنوات وخمس شهور الا يوم الا انها من اجمل سنين حياتى وبجد حاه بيكى جدا لانه الاحساس ده مستمر معايا كل يوم لحد ما يجي من الشغل وربنا يكرمنا فى ازواجنا وفى اولادنا ويجمع بيننا دائما فى الخير يارب العالمين

بس بجد مكنتش اعرف احساسك المرهف ده واسمعى كلام شيكو أد ايه جميل

جرا ايه يا جدعان - عقدتونى - يا هند يا بوسي - انتم حسستونى انى ما عنديش احساس

هو بصراحة يعنى - بيوحشنى احيانا جوزى - بس مش اوى خالص جدا

يدوب يدوب - يا دووب ممكن افتكره مثلا مرة فى اول الاسبوع

:lol:

وبعدين المشغوليات بتنسي الواحد اسمه بقى

امال الستات اللى اجوازهم فى الخليج و بينزلولهم مصر كل 3 سنين - يعملوا ايه

-_-

لا انا حالتى ارحم بكتير - بس بجد فكرونى فى شهر 12 الجاى ابكى شوية وهو ومسافر علشان يعنى يفرح ويحس انى بافتقده

ويحس بالدور العظيم اللى قاموا بيه سيدات المحاورات حيدعيلكم اوي الراجل جوزى المسكين داه وحيقولى اشكروهملى جدا

طولى بالك يا هند انت علشان ما اتعودتيش على غيابه - هى مسالة تعود اساليني انا

بس تصدقو احساسكم داه جميل اوى يا بخت اجوازكم بيكم

ابقى احكيله يا هند عن مشاعرك الرقيقة دى - صدقيني حيفرح اوى - اكمنى الرجالة دول زى الاطفال

:give_rose:

تم تعديل 1 نوفمبر 2010 بواسطة اغابي

[لماضة مصرية جدا]

السلام عليكم و رحمة الله و بركاته

الجميلة جدا.....الانسانة اوي.....العاشقة حتي النخاع....هند

خليني احكيلك حكاية صغنتوتة أوي

كان فيه زمان بنوتة اتعودت انها تعيش لوحدها....حتي لو حوايلها ناس كتير....برضه كانت بتحب تعمل مساحات خاصة ليها لوحدها

و كانت بتخاف من الجواز جدا جدا جدا....عشان كانت بتستغرب إزاي يعني حد يجي و ينط علي كل المساحات اللي كانت ليها لوحدها

و لما حد بيقولها بت انتي اتجوزي....تقولهم انا عايزة زوج بارت تايمر....و تضحك...و تضحك....اصلي مش هستحمل يعني اقوم كل يوم الصبح و اشوف نفس الوش....لا كده كتير

و تمر محطات كتير

و تتقلب صفحات اكتر

و يعدي عليها ليلة ممكن تكون أطول ليلة في الدنيا

اللية بتاعت شنطة السفر

يمكن لان القلب اتوجع من كتر ما فارق

يمكن لان فيه شخص هو "السكن"....مش بس مخدة تانية مشغولة جنبك.....لا ده شخص بيسكن كل خلاياكي....و كل افكارك....و كل احلامك...حتي و انتي ماشية بين الناس...بتفتكري ان ده وشه هو...و ملامح الناس كلها دابت في ملامحه هو

يمكن و الف يمكن

بس ال .."يمكن"....الأكيدة.....أن جواكي.....زي ما هو جوه البنوتة دي.....طاقة نور كبيرو اوي......طاقة مودة و رحمة أوي

مودة....للشريك....اللي هيغيب....و هياخد انفاسك معاه

و رحمة....لازم تكوني لنفسك قبل ما تكون لحد تاني

عارفة يا تانت هند......مش السفر.....بيوجع.....مش الفكرة اللي بتجيلك في نص صخب الدنيا...ممكن بتوجع.....جدا

بس هتقويكي أكتر

و اكتر

و أكتر

عشان هتخليكي تحبيه علي البعد اكتر

و عشان هتدعيله علي البعد أحلي

و عشان هتبعتيله في السما مليون رسالة.....و هتضحكي لما تلاقيه بيرفع سماعة التليفون و يقولك....انا كنت بفكر فيكي دلوقتي....في نفس الوقت اللي انتي كنتي بتدعيله فيه

و عشان هتصحي كل يوم الصبح و هو معاكي.....و هتصومي عرفة......باذن الله....هتبقي علي طاعة.....و هو برضه هيكون علي طاعة...و في نفس الوقت

و بيتك....اللي هيغيب منه شعاع الشمس.....لفترة آد النملة......الدفا.....بتاعه عمره ما هيغيب

الدفا بتاعه خليه يقويكي علي الطاعة

خليه يقويكي علي العبادة

الأيام الجاية باذن الله ايام حلوة اوي

و هو هيكون في مكان روحاني اوي اوي اوي

متخليش الشيطان يوسوسلك.....عشان عايز يضعف عزيمتك علي الطاعة و الاجتهاد الفترة دي

عارفة كل ما تحسي انك مفتقداه اوي.....و هتحسيها جدا.....ثابري في الطاعة.....تحدي نفسك في عبادة جديدة

لو بتسبحي......1000 مرة....استفزي نفسك...و سبحي الفين

لو حسيتي انك اتخنقتي......بدل ما بتصلي ركعتين.....صلي تمانية

لما يوحشك فوق طاقتك...... ادعيله بكل لحظة حلوة نور فيها حياتك....ربنا ينور طريقه و يتقبل منه

شفتي إزاي بقي

الايام الجاية....هو هيتولد من جديد باذن الله

و انتي كمان

و ارتباط المودة و الرحمة بينكم هو كمان هيتولد من جديد......خلي ولادته تكون علي طاعة

خلي حبك لبني آدم....يوديكي......لحب رب البني آدم دوت

خلي الحب اللي بينكم يكبر اكتر في طاعة الله.....و هتحسي ربنا بيبعتلك شعاع دفا يطمنك...و يقويكي....و يربط علي قلبك.....حتي لو العين ما شفتشي حبيبها

اخر حاجة

إياكي في يوم تعتذري...او تخجلي انك فضفضتي هنا في المنتدي

الواحد اللي بيقدر يفضفض......صدقيني احسن بكتير من حد مش عارف يطلع اللي جواه....مع انه يعرف الابجدية كويس....

الفضفضة....و ربنا نعمة.....احمدي ربنا عليها

فيه حاجات مبتتقالش.....عشان فيه ناس متعلمتشي تطلع اللي جواها براها

مساحة لينا كلنا

مساحة بتحطي مشاعرك.....و بنزق معاها....وجعنا....و املنا....و يقينا....أن نور ربنا قريب.....قريب

[لماضة مصرية جدا]

السلام عليكم و رحمة الله و بركاته

ملحوظة مش قادرة امنع نفسي منها.......و اوعي حد يضرب....(انا عيل بتاع فضايح و خصوصا لو عيطت)

بصيت علي مداخلات الشوباب.....و بصيت علي مداخلات البناويت و المزمازيلات و المودامات

بجد......بجد....بجد

الولد.....هما كلمتين....و و بيخش يديكي الخلاصة

البنت....لما بتتكلم....مش عايزة حكمة الحياة....عايزة بس حد يطبطب علي كتقها......مش بتقولها صريحة.....بس بتقولها بالكلام

الكلام احيانا بيبقي طبطبة......حنينة جدا

امتي هيفهم ده الاولاد........اللي الكلام عندهم دايما...."ما قل و دل"

يمكن انا غلط.....يمكن نا صح.....بس ملحوظة كده ع الماشي

صباحكم......هو.....و ....هي......و حياة نبنيها بكل اختلافتنا...(قدرنا بقي هنعمل ايه....وش واحدة بتمصمص في شفايفها...و بتعمل صوت بتاع شفط الليمون.....هههههههههههههه)

صباحكم حلا

[عبيد الله]

بارك الله فيكِ وفي زوجكِ أختنا هند

[لماضة مصرية جدا]

صباح يشبه قطرات الندي علي وردة بيضا

صباح الورد أغابي

عارفة.....عجبتني صراحتك....بس لو تسمحيلي.....هقولك حاجة يمكن انتي ناسياها

انتي مش زي ما وصفتي نفسك خالص

انتي مش ..."ج...." و لا القصة دي

انتي امرأة ذات احساس مختلف....و تبحث عن شيء مختلف....و بالتالي لا يرضيها العادي من الأشياء

و ده انطباعي لما تابعت بعض مما خطت يداكي في "احاديث رجل"

انتي فقط امرأة الاحساس المختلف

و كون انك تعجبتي انك لم تمري بالمشاعر...."العادية".....لا يعني عدم وجودها....بالعكس....هي موجودة....و جدا جدا.....بس طريقة النكش بتاعتها بتحتاج طريقة غير عادية

طريقة استثنائية

ع جنب بقي

الراجل يبقي راجع من دبي و متستقبليهوش يا قاااااادرة

طب الراجل ده عايزله وسام شجاعة و استحقاق.....ده راجع من دبي.....يعني يا بنتي قاوم كل مغريات الحياة و اتحدي نفسه و رجع......و رجع......و رجع

ده يتشال علي الاعناق يا امي....و نفضل نلف بيه صالة 3 و صالة 2 في المطار....و نقول عواد رجع يا ردالة....عواد اصيل يا ام الخير

ع جنب بقي....غير الجنب الفوقاني.....

لما سي الاستاذ يجي حدانا باذن الله يا ريت تقوليلنا...عشان نعملوا معاه واجب الضيافة....(وش أي شيال في مطار دبي الدولي)

صباحك استثنائي جدا

[المهندسه]

هند يا حبيبتى ماكنتش اعرف انك حساسه اوى كده ..انتى عارفه بحبك قد ايه علشان كده مش عارفه اقولك حاجه خااالص

ربنا يخليكوا لبعض يارب و يرجعهولك بالسلامه...بس قوليلو كل مشاعرك دى ما تخبيهاش عنه ابدا ابدا ..علشان الحب الكبير الجواكوا يكبر اكتر

و كمان ماتخبيش مشاعرك لاولادك علشان تعلميهم الحب بيكون ازاى و قد ايه ابوهم انسان عظيم و محترم علشان كده يستاهل منك كل الحب ده.

ربنا يارب يخليكوا لبعض و يفرحكوا باولادكم يارب.

اقول على حاجه على جنب ..انا كان فى مشكله بسيط بينى و بين جوزى و مازالت قائمه ...اول ما قريت موضوعك ده حسيت ان ربنا عاوز يقولى قومى

كلمى ابو ليى حبيبك و صالحيه ..

ربنل يرجعهولك انتى و اولادكم بالف سلامه و يجعله حج مبرور وذنب مغفور و اكيد انتى اكتر واحده هيدعيلها علشان انتى حبيبته زى ما هو حبيبك.

[م تيمور المراغي]

ربنا يحميكه ليكم ويعينه ويرجع لكم بالف سلامه

عملتي خير انك فضفتي لاخوانك هنا وان شاء الله تلاقي معاهم الصبر واحتمال الفرقه لحين عودته سالم غانم لكم ان شاء الله

وحجه مبروره ان شاء الله

[اغابي]

صباح يشبه قطرات الندي علي وردة بيضا

صباح الورد أغابي

عارفة.....عجبتني صراحتك....بس لو تسمحيلي.....هقولك حاجة يمكن انتي ناسياها

انتي مش زي ما وصفتي نفسك خالص

انتي مش ..."ج...." و لا القصة دي

انتي امرأة ذات احساس مختلف....و تبحث عن شيء مختلف....و بالتالي لا يرضيها العادي من الأشياء

و ده انطباعي لما تابعت بعض مما خطت يداكي في "احاديث رجل"

انتي فقط امرأة الاحساس المختلف

و كون انك تعجبتي انك لم تمري بالمشاعر...."العادية".....لا يعني عدم وجودها....بالعكس....هي موجودة....و جدا جدا.....بس طريقة النكش بتاعتها بتحتاج طريقة غير عادية

طريقة استثنائية

ع جنب بقي

الراجل يبقي راجع من دبي و متستقبليهوش يا قاااااادرة

طب الراجل ده عايزله وسام شجاعة و استحقاق.....ده راجع من دبي.....يعني يا بنتي قاوم كل مغريات الحياة و اتحدي نفسه و رجع......و رجع......و رجع

ده يتشال علي الاعناق يا امي....و نفضل نلف بيه صالة 3 و صالة 2 في المطار....و نقول عواد رجع يا ردالة....عواد اصيل يا ام الخير

ع جنب بقي....غير الجنب الفوقاني.....

لما سي الاستاذ يجي حدانا باذن الله يا ريت تقوليلنا...عشان نعملوا معاه واجب الضيافة....(وش أي شيال في مطار دبي الدولي)

صباحك استثنائي جدا

تصدقى يا لماضة

انت وصفتين بكلام جميل خالص ميرسي بجد تعالى افضفضلك

حاقولك فى البداية فى اول سفرياته كنت افكر كتير بس بصراحة بطريقة تختلف شوية عن طريقة هند وبوسي

يعنى مغريات دبي وبنتوتات بيروت وحلوياتك يا لندن - وكمان جوزى برضوه حاجة كدا احمد عز خالص قى الوسامة

والالوان والشياكة فانا كنت بفكر شوية ياترى لو لخبطنا مغريات دبي على وسامة جوزى ايه النتيجة ؟؟ - برغم وحياتك عندى واثقة من نفسي اوى وعارفة ومتاكدة - انا فى اى مكان بابقى ايه

المهم اخدنا فترة نسافر معاه لدرجة ان المدير المالى عندى فى شغلى - لو حبيت انزل مصر اجازة يقولى = لقد نفذ رصيدكم

وانا والاود تعبنا وزهقنا من سفريات جوزى والفنادق وكنت بالاقيه مجهود واجتماعات ومش فاضي حتى يفسحنا

روحت اخدت قرار انى اوقف السفر فعلا وافضل بالكويت

الخلاصة انا اشتريت دماغى من التفكير و كل القصص المتعورة دي - وبقيت كدا حاجة ( ج ) خالص خالص - بجد وهو داه الفيتامين اللى باوصفة لاى زوجة

:lol: :lol:

وخاصة باوصفه لنفسي - لازم ابقى ج - لو انا كل سفرية لجوزى حاعمل كدا زى هند يبقى حاتشل او حاتشل حاجة من الاتنين

والمحاورات حتخسر اغابي الى الابد

:P

على جنب بقى

اضحكك - لما سافر دبي اخر مرة وفعلا الموقف داه حصل يا لماضة هو ومسافر كنت فاتحة المحاورات

ولما رجع لاقى صفحة المحاورات برضوه راح قالى 12 يوم من وقت ما سافرت وانتى لسة على المحاورات - يابختهم بيكي

:lol: :lol:

كمان بخصوص الاشعار انا ما بعرفش اكتب اشعار خالص نهائي - ودى اول مرة

لكن انتى عارفة اكيد اللي يدخل مدرسة -احاديث سمبا و احاسيس لولا - لازم يتعلم يكتب الشعر

;)

صباح الورووود كلها

تم تعديل 1 نوفمبر 2010 بواسطة اغابي

[Howayda Ismail]

السلام عليكم ورحمة الله وبركاته

الاخوة الافاضل

diab

investor

ozoozo

الغريب

nightmare

عبيد الله

architect

انا شاكرة جدا اهتمامكم بالرد وجزاكم الله خيرا