الناس ألوان

[Abouhemeed]

بسم الله الرحمن الرحيم

أشكال و ألوان خلقوا الناس

فيهم أبيض قلبه حساس

و أسود معجون بحماس

و أصفر أيديه تنباس

و الكل خلق الله

لون البشرة عمره ما كان مقياس

و ما في القلب مسكوك عليه ترباس

الكل عملهم في الحساب أساس

و الأعمال بنيات الناس

و من قدم خير يلقاه

الحياة قصة وحيدة الفصل

فيها الخير هو الأصل

و الشر داء له مصل

و طريق السماء له وصل

محبة و تقوى الله

دنيا عايشينها كلنا يلهينا

مالنا و عيالنا و أسامينا

و شياطينها تغوينا

بما كسبت أيادينا

يغضب إله في علاه

كل ظلم له آخر

و العدل يمكن يتاخر

يوم لكن في الآخر

يظهر الحق يتفاخر

و يفرح من لاقاه

من أخذ من أخيه حاجة

غصب أو بحياء الحاجة

أو أهانه لجاجة

بلسان مدهون فجاجة

سوء تكون عقباه

الكلمة يا بن آدم محسوبة عليك

من الفم تخرج ما ترجع ليك

حتى النظرة الحرام بعنيك

و كل ما جنته يديك

ملائكة عليك كتباه

فكر عملت إيه في دنياك

خير ستأخذه بيمناك

و لا شر نتيجته هلاك

تب عنه ربنا يرعاك

و الغفار هو الله

أبو حميد المصري ‏01‏‏/‏07‏‏/‏2004‏

[Abouhemeed]

هيهه يا جماعة ...

شدوا حيلكم ... :)

[drmsaber]

فتح الله عليك و نفع بكلماتك المسلمين

[White heart]

كلام سليم، وموزون ...

اللى عجبني فيه .... انه زى ما بيتكلم عن الناس ((( بكل ))) ألوانهم، فهو بيخاطبهم كلهم - و الأكيد انه معظمهم ان ما كانش ((( كلهم ))) هايتقبلوه .....

أحسنت.

[drmsaber]

أَفَنَجْعَلُ الْمُسْلِمِينَ كَالْمُجْرِمِينَ (35) مَا لَكُمْ كَيْفَ تَحْكُمُونَ (36)

فيلم " كل الناس" ده تتغطى كويس وانت نايم علشان تشوفه فى الحلم

[Abouhemeed]

هباااااااااا fsh::

[ragab2]

.

فيه ناس بتتلون بعشرين لون

وناس لا ليها طعم ولا لون

وناس بيضة وقلوبها أسود من الغليون

وناس سودة وقلوبها بيضة .. زى النيلون

وناس طيبة لا ليها فى المكر ولا فى اللون

فيه ناس بالفهلوة ممكن تجيب جون

بالصوت العالى والنفاق وكله فنون

وناس أصيلة بتلعب .. برة الجون

الفهلوى دايما عند السلطة زبون

يطلب مناصب ومكتب تكييف فريون

والراجل الشريف فى بيته مكنون

راضى بقليله ويعيش بملح وكمون

يصون العيش والملح وعمره مايخون

وراجل فقير يختار الشرف ولا المليون

ابنه يتعالج بقروش وابن الفهلوى بمليون

اللى جابولنا الصفر متخصصين ميكروفون

ضحكوا علينا وهبشوا ... كام مليون

سفر وهمبكة وضحك ع. الذقون

نشكى لمين والفساد .. من قرون

كان فى الأول وَحْش وبقى ليه قرون

واللا الشكوى مذلة وكان الله فى العون

[Abouhemeed]

الحقيقة المؤلمة يا أستاذ رجب

حسبنا الله و نعم الوكيل