الأراء الشاذة ... محاولة لمعرفة السبب

[se_ Elsyed]

حقيقةً هذا الموضوع يشغلني كثيراً .....

هادخل في الموضوع

كنت أشاهد برنامج إقتصادي في التلفيزيون الأن ... وكانوا مستضيفين رئيس مجلس إدارة احدى الشركات الأقتصادية لمعرفة رأيه في موضوع صفقة عُمر أفندي

الراجل كبير في السن وشكله محترم وإبن ناس والله

لكن لما سمعته قولت : يا عم روح موت او أسكت أو .. مش عارف أقول إيه ََ!!!!

جُملة اعتراضية هاموت لو ما قولتهاش ...... لو إفترضنا إن فكرة موضوع معين هي عبارة عن نقطة وسط دائرة .. وبالتالي كل العقلاء بتبقى مناقشتهم تدور حول هذه النقطة يميناً ويساراً والمسافات بين تلك الأراء متباينة بالتأكيد ...

لكن لما واحد ييجي ويُدلي بدلوه وفجأة تلاقيه رسم نقطة بعييييييييييييييييييييييده ييجي 100 متر خارج الدائرة .... يبقى ده إيه ؟

ماشي هاقول لكم الراجل اول ما نطق قال إيه ... قال : إنه فوجيء سنة 2006 بتقييم شركة عمر أفندي بفروعها بسلاطتها ببابا غنوجها بمبلغ حوالي 600 مليون جنيه ...

مع إن رأيه الشخصي بيقول إن كل الهيلمان ده قيمته لا تزيد عن 300 مليون .. لكن للأسف - ده الكلام على لسان الحاج الكوبارة - بعض اعضاء اللجنة التي قامت بالتقييم لهم مصالح شخصية في - خدوا بالكم - في المبالغة في زيادة التقييم لهذا الصرح .

لا إله إلا الله ..... لا إله إلا الله

في إيه يا جدعان ؟

أنا مش هاتكلم إقتصاد .... لكن ليه في كده ؟

ليه إتباع أسلوب خالف تُعرف ؟

وأنا خُلقت لأعترض حتى لو كان ما أقوله مش رأي أساساً إنما يُعتبر كنافه أو أي حاجه غير إنه يُصنف على إنه رأي ؟؟؟؟

عارف والله إن ممكن القول : ومين قال لك إن معظم اللي إتقال حوالين موضوع معين يعتبر رأي ؟ مش يمكن كنافه برضوا والرأي اللي مش عاجبك هو اللي يُعتبر رأي بحق وحقيق ؟

لأ لأ ... لا أعتقد ذلك .... في يا جماعة بديهيات ... وفي فلسفة وتقعر وتحور زيادة عن اللازم بتتوه الموضوع ...

يعني تلاقي اللي دخل يقول لك : أنا أعترض ... دعنا أولاً نُعرف ما هو الرأي ؟

ثم نُعرف ما هي النقطة التي تتوسط محور الكلام ؟

ثم نُحدد معايير الإتفاق والإختلاف ؟

ثم نتناول قليلاً من الميلك تشيك مع شطائر التونه المدخنة ... واللي يحب النبي يسقف

وندخل في جدلية بني إسرائيل في مناقشتهم لنبي الله موسى حول آلية ذبح البقرة اللي هانقضي عُمرنا في تعريف البقرة لونها وكسمها ورسمها إيه لحد ما يتحول الحوار والجدال إلى حبل يلتف حول اعنقاهم جميعاً

إيه بقرة ...بقرة يا سيدي بأربع رجول وخلصنا .... أو أي بقرة والسلام يا سيدي

عاوز أسمع أراءكم ويارب رأيي ما يطلعش كنافة .... عشان مش باحبها سادة .. يا ريتها تكون بالمشمش زي اللي عملها الشيف بندق

[م تيمور المراغي]

كان نفسي يا س س اتحفك بطبق طورشي بلدي من عند عم بلبل اللي في القلعه

بس مش عارف انت بتحب الويسكي بالشطه ولا من غير ؟

:malta:

[اغابي]

انا حاتكلم فى نقطة - الراى الشاذ والراى الاخر

ما هو المشكلة ان اللى بيقول رايه وبيكون شاذ

ما بيعرفش انه رايه مخالف - لا - هو بيبقى فاكر ان رايه

داه هو الصواب وانه الحكمة كلها عنده وانه هو الصواب بعينه

ولو حد فوقه من الحلم الجميل داه وقاله لا رايك غلط او شاذ

تلاقيه اتجنن ودافع باستماتة علشان يؤكد ان رايه هو الصواب

اى حد فينا كدا وكل واحد بيعرض رايه

لكن هل كلنا بنتقبل كل الاراء المخالفة

هل كل واحد بيقبل بصدر رحب كل الاراء او بيقبل النقد وان كان احيانا النقد بناء جدا

هل داه بيحصل اعتقد انه

لا لا

لا

[se_ Elsyed]

بس مش عارف انت بتحب الويسكي بالشطه ولا من غير ؟

:malta:

إنت ما تعرفنيش

انا سفنجه يابني :P

لأ بجد .. إيه علاقة الطُرشي بالكنافة .. قصدي بالموضوع ؟

[se_ Elsyed]

لا يا أغابي أنا مش متفق معاكي لإن على ما يبدو ما عرفتش أوصل فكرتي

الخلاف في الرأي مطلوب وموجود

لكن في أراء لا هي خلاف ولا هي أراء صدقيني .... دي حاجه كده مش عارف أوصفها

[م تيمور المراغي]

تعرفي يا اغابي لو جات على واحد عنده رأي ما ومقتنع بيه بالفعل كانت هانت

لكن المصيبه انه بيقول رأي مخالف وخلاص وهو في قرارته عارف انه بيهرتل عشان يلفت الانتباه ,, يعني مبدأ خالف تعرف وخلاص

زي عضو عزيز هنا في المنتدى عارف نفسه كويس ظبطته بيقول الرأي وعكسه في خلال 48 ساعه في موضوعين منفصلين

حاجه تيييت والله ههههههه

[م تيمور المراغي]

بس مش عارف انت بتحب الويسكي بالشطه ولا من غير ؟

:malta:

إنت ما تعرفنيش

انا سفنجه يابني :P

لأ بجد .. إيه علاقة الطُرشي بالكنافة .. قصدي بالموضوع ؟

ههههههههه

هو ده المقصود

ده نموذج لناس تدخل في موضوع وتقوم جايبالك حاجه من كوكب تاني خالص حبيت اني اتقمص شخصيتهم في ردي عليك

وتحيا جمهورية مصر :happy:

[م تيمور المراغي]

ملحوظه مهمه :

الويسكي ده اسم شعبي بيطلق على ماء الطورشي اللي هو المخلل

و احيانا يباع بمفرده في اكياس كفاتح للشهيه عشان اللي مش شعبي زينا مايفهمناش غلط :happy:

[وطني حر]

من محاسن الصدف كنت بتابع البرنامج دا وبصراحه استغربت كتيرا من ما نقله الاستاذ الكبير سي سيد عن رئيس مجلس شركه الرشاد وممكن اكون فهت غلط لو ممكن نشوف الاعاده .

كان بيقول تقييم عمر افندي كان بـ 300 مليون جنيه عام 2006 وهذا تم بواسطه شركات عالميه ومحايده الخ

واضاف ان الصفقه تمت والشركه تباعت بـ 600 مليون جنيه ..

اي ضعف ثمن التقييم .

حلوه انضحك علي شركه انوال السعوديه ههههههه

بصراحه اعاد لي نوع من الطمئنينه والفرح . لكن !!!!! واستمر يقول

و يبقي السؤال هل لو استمرت الدوله في اداره عمر افندي هل ستحقق ارباح او المزيد من الخسائر .

وبالتالي بيعها كان الافضل لو بثمن بخس

[se_ Elsyed]

من محاسن الصدف كنت بتابع البرنامج دا وبصراحه استغربت كتيرا من ما نقله الاستاذ الكبير سي سيد عن رئيس مجلس شركه الرشاد وممكن اكون فهت غلط لو ممكن نشوف الاعاده .

كان بيقول تقييم عمر افندي كان بـ 300 مليون جنيه عام 2006 وهذا تم بواسطه شركات عالميه ومحايده الخ

واضاف ان الصفقه تمت والشركه تباعت بـ 600 مليون جنيه ..

اي ضعف ثمن التقييم .

حلوه انضحك علي شركه انوال السعوديه ههههههه

بصراحه اعاد لي نوع من الطمئنينه والفرح . لكن !!!!! واستمر يقول

و يبقي السؤال هل لو استمرت الدوله في اداره عمر افندي هل ستحقق ارباح او المزيد من الخسائر .

وبالتالي بيعها كان الافضل لو بثمن بخس

الراجل كذاب في أصل وشه يا وطني

عالمية إيه وعلى ميتين إيه ...

الشركة اصولها 6 مليار بتقييم سنة 2006 يا عزيزي وكفاية أراضيها ومخازنها في أرقى مكان بمدينة نصر .... ( الحمد لله أنا متابع جيد ودي لعبتي ودراستي وهوايتي كمان )

وأول تقييم كان من لجنة كونتها الشركة القابضة كان 900 مليون ج ... لكن الحكومة لم تأخذ بهذا الرأي ووافقوا إنهم يبيعوا على 600

وللعلم .. أعمل سيرش كده عن أي فترة زمنية .... منذ إنشاء عُمر أفندي لم تحقق اي خسائر .. بالعكس ... كانت بتحقق أرباح معقولة جداً ...

لكن دي حجة الحرامي ... زي ما باعوا شركات الأسمنت والحديد اللي

بتحقق خساير هي كمان

[جويرية]

(سياتى على أمتى سنوات خداعات يكذب فيها الصادق و يصدق فيها الكاذب ويؤتمن الخائن و يخون فيها الامين ......(

[se_ Elsyed]

(سياتى على أمتى سنوات خداعات يكذب فيها الصادق و يصدق فيها الكاذب ويؤتمن الخائن و يخون فيها الامين ......(

طب أنا مضطر أحذف الجُملة دي اللي مش عارف هل هي حديث شريف ولا قول مأثور إذا لم تُضيفي لها تفسير وتبرري مناسبتها ...

عفواً .. الموضوع مش رمي كلام وخلاص

[جويرية]

عن أبي هريرة رضي الله عنه قال : قال رسول الله صلى الله عليه وسلم : ( سيأتي على الناس سنوات خداعات ، يصدق فيها الكاذب ، ويكذب فيها الصادق ، ويؤتمن فيها الخائن ، ويخون فيها الأمين ، وينطق فيها الرويبضة ، قيل : وما الرويبضة ؟ قال : الرجل التافه في أمر العامة ).

حديث صحيح

يعني الناس دلوقتي حاجات كتير صح و بيعتبروها غلط ، و حاجات غلط و شايفنها صح

[Diab]

خالف تعرف

[se_ Elsyed]

عن أبي هريرة رضي الله عنه قال : قال رسول الله صلى الله عليه وسلم : ( سيأتي على الناس سنوات خداعات ، يصدق فيها الكاذب ، ويكذب فيها الصادق ، ويؤتمن فيها الخائن ، ويخون فيها الأمين ، وينطق فيها الرويبضة ، قيل : وما الرويبضة ؟ قال : الرجل التافه في أمر العامة ).

حديث صحيح

يعني الناس دلوقتي حاجات كتير صح و بيعتبروها غلط ، و حاجات غلط و شايفنها صح

صباح الخير يا جويريه

إستني أما ابطح نفسي وأقول إنتي اللي عورتيني بالموس

يا فندم إستشهادك بالحديث الشريف في غير محله تماماً

يا فندم إرجعي لرأي حضرتك في موضوع التعليم وعيال السباك اللي بيتجرأوا ويقعدوا في نفس الكلاس مع ولاد الباشمهندس وإنتي تعرفي أنا قصدي إيه ...

والحمد لله لا هو إسقاط ولا شخصنه .. أنا كتبت الموضوع ده قبل ما أقرأ أراء حضرتك الإنشطارية دي

ورجعتي كملتيها بإننا لازم نجيب ضرف الجامعات 10 سنين عشان سوق العمل متشبع

طب يا رب يا جويرية ييجي حظك في العشر سنين العجاف دول .. وورينا هاتعملي إيه ؟

معاك جويرية المدبولي يا فندم .. حاصلة على ثانوية عامة بمجموعة 98 % .. وما رضييوش يدخلوني الجامعة لمدة 10 سنين عشان سوق العمل مش محتاج .... وكدهوت يعني

عن إذنك أروح أكبس الجرح بشوية كوفي قصدي بُن

[nightmare]

خالف تعرف

صباح الخير يا جويريه

إستني أما ابطح نفسي وأقول إنتي اللي عورتيني بالموس

هههههههه , اخويا دياب واخويا سي السيد , مضايقين نفسكوا ليه بس

ده الموضوع ده بقي بالذات المفروض احنا ما نتكلمش فيه خالص , ونسيب الكلام كله للأستاذه جويرية , بما انها طبعا كل كام يوم كده تطلع علينا برأي جامد جداً لدرجة تصيبك بالدهشة زي الواد اللى في الصورة الرمزية بتاعتى ده.

بجد نفسي تفهمنا كده واحدة واحدة , الرأي الشاذ ازاى الواحد بيفكر فيه , وهل بييجي لوحده كده "الهام يعني" والا بييجي بعد توارد مجموعة من الأفكار؟؟

وصاحب الرأي الشاذ ده بيبقي مقتنع بيه يعني وشايف نفسه هو الصح والباقي غلط والا هو مجرد انه حاجة مختلفة وخلاص عن البشر ؟, والا احيانا بيبقي علشان يصيب اللى قدامه بأمراض العصر مثل الضغط والسكر ؟ والواحد بيتولد بيه والا حاجة مكتسبة ؟

بجد الاسئلة دي نفسي اسمع اجابتها لانها محيرانى.

مع تحياتي

تم تعديل 3 نوفمبر 2010 بواسطة nightmare

[جسار]

من لطف ربنا علينا ان جعل البشر مختلفون وألا لكنا قوالب متشابهة وما كانش

هناك صراع ولا جدل فى الحياة اى تبقى ماسخة مالهاش طعم ، وفى موضوعنا لو

عملت احصائية بسيطة فى جدوى المناقشات والجدل اليومى ستجد شيئا غريبا ولافتا

للنظر ، لو أجتمع اربع اشخاص فى مكان ما وتجادلوا حول موضوع معين طرحه احدهم

ستجد أثنان منهم يعارضونه اما الثالث فلن تعرف ما الذى يقوله اصلا مش تعرف رايه

بيضرب لسانه فى سقف بقه ويقول اى كلام ولا يمكنك ان تخرج بنتيجة من كلامه يعنى

موافق وألا معارض وألا أيه بالضبط ، أما عن الآراء المستفزة والشاذة نسبيا

فهذه ترجع لنوعية اصحابها من حيث التكوين النفسى والثقافى والنشأة الأجتماعية

وقد صادفت كثيرا من هؤلاء عندما كنت فى الجامعة - أيام زمااااااااااان - ففى أحدى

الندوات أنبرى أحد الطلاب وتكلم عن مشكلة الفقر والغنى والتفاوت الأجتماعى ..الخ

وفوجئنا باحدى المنقبات تقول من الخلف بصوت عالى : وأحنا مالنا ومال الفقرا ما

يروحوا فى داهية !!! وطبعا تجاهلها الحضور وكأنها لم تقل شيئا

ويحضرنى هنا لقطة من فيلم سواق الأتوبيس عندما كانوا يناقشون مشكلة ديون الورشة

بتاعة أبوهم فمن قال أشترى الورشة وأعملها معرض موبيليا - الدمياطى - واللى قال

نبيع الورشة ونسدد ديون الضرائب - زوج الاخت اللى خربها - واللى قال نبيع البيت

علشان ننقذ الورشة - نور الشريف- واخيرا جاء دور وحيد سيف التاجر البورسعيدى

وقال انا من رايى نبيع البيت والورشة ونخلص ...

[Dreamwithme]

أعتقد إن الموضوع أصله حب الظهور فبالتالي يقوم الواحد خابط كلام صادم يجبرك إنك تتابعه من الصدمة لأنه لو قال رأي عادي ممكن مايلفتش النظر ووارد برضه يكون واحد بيفتي في حاجة مش فاهم فيها كويس ولا دارسه كويس وبني كلامه علي معلومات مغلوطة تبناها فأصبحت رأيه وطبعا معظم الناس إلا من رحم ربي صعب جدا عليهم إنهم يغيروا وجهات نظرهم أو يتقبلوا فكرة إن في نسبة 1 % أنه علي خطأ.

[جويرية]

غالبا مش حدخل موضوع الا اذا كان رأيي مخالف

المواضيع اللي متفقين مع اراء اصحابها مش بنعلق عليها لضيق الوقت ، مفروض ندخل و نقول جزاك الله خيرا مشكور

موضوع التعليم وعيال السباك اللي بيتجرأوا ويقعدوا في نفس الكلاس مع ولاد الباشمهندس وإنتي تعرفي أنا قصدي إيه ...

والحمد لله لا هو إسقاط ولا شخصنه .. أنا كتبت الموضوع ده قبل ما أقرأ أراء حضرتك الإنشطارية دي

ورجعتي كملتيها بإننا لازم نجيب ضرف الجامعات 10 سنين عشان سوق العمل متشبع

طب يا رب يا جويرية ييجي حظك في العشر سنين العجاف دول .. وورينا هاتعملي إيه ؟

حعلق علي المشاركة دي في نفس الموضوع