أخيراً تحققت كل امنياتي وامنياتكم ...

[se_ Elsyed]

أخيراً إبتسمت لي الدنيا ومادتنيش ضهرها كالعادة .... والحمد لله تحققت كل احلامي .. وفي خضم فرحتي لم أنسى أصدقائي وزملائي وحبايبي والمجتمع والناس اللي هما إنتم ...

فلم ولن أنسى وقوفكم بجانبي خلال أزمات حياتي التي مررت بها خاصة أزمة منتصف العمر وسن اليأس ..

المهم مش عايز أطول عليكم - قولوا طول - فالحكاية هي إني كنت باتصل الأسبوع الماضي على ست الحبايب - دي مامتي مش فايزة احمد :) - فمالقيتش في البيت غير أختي الصغننة فسألتها ماما فين ؟ .. قالتلي وهي تكاد تنط في السماعة من الفرح مبروك يا أبيه س س إنت كسبت الجايزة الكبيرة .. قلتلها إنت غلطانة يا ماما أنا مش بتاع جوايز ولا مكسب ده انا س س ملك القطط السودا .. واللي بيبقى المولد مليان ناس رايحة وجاية .. وجايين إشي من الصعيد وإشي من وجه بحري .. ومع ذلك الكلب السعران يسيب البشر دي كلها وفيهم المدملك والسمين وييجي يعض العبد الفقير الغلبان المسلوع ...

وحتى الكرشة الطرية الحلوه لما نفسي تهفني عليها كل فين وفين بيطلعلي فيها حتة عضمه تقف في زوري .. مع إن الجزار معرفة ..

المهم قولتلها إهدي كده وقوليلي إيه الحكاية .. قالت لي إن البوسطجي جالنا النهاردة الصبح وجاب لنا خطاب مُسجل من هيئة البريد والراجل صمم إنه لازم ياخد الحلاوة الأول .. المهم كنا شاريين بربع جنية حلاوة الرشيدي الميزان عشان العشا وماستخسرنهاش فيه والراجل إتبسط ومشي وهو متراضي.. فتحنا الجواب لقيناهم بيبلغونا أنك كسبت مبلغ وقدره " 100 جنية مصري فقط لا غير " وذلك نتيجة للسحب الذي تم على دفتر توفير البريد بتاعك اللي فاتحه سنة 1998 ..

والله العظيم أنا فرحت جداً بغض النظر عن المبلغ وبغض النظر عن إن كل اللي موجود في الدفتر اللي أنا نسيته أساساً ومش عارف هو فين هـــو 100 جنية فقط لا غير ... وقولت يا واد يا سونسون أهو يمكن دي تبقى فاتحة خير والنحس ينفك والعمل اللي معمولك من اعداءك عند الشيخة صباح العمشة ينحل وتأتي البقية بالخير وتكسب بقى في مسابقات بم بم وشيبسي والزيرو 900 وهلم جرا

الغريب بقى إن والدتي ماكدبتش خبر وراحت جري على البوسطة تستلم المبلغ .. وفاكره إن العملية سايبه وإنها بقى عشان والدتي يبقى الموضوع واحد واللي في جيبي في جيبها .. وطبعاً ردوها خالية الوفاض .. لأن المواضيع دي بالغة الحساسية وهم يتبعون الأسلوب السويسري في المحافظة على سرية حسابات العملاء وقالولها يا حاجة لازم إبنك س س ييجي بنفسه وشحمه ولحمه وناخد بصمة قزحية عينه وبصمة صوته عشان نقدر نصرف له المبلغ .

وفي خضم فرحتي بالجايزة لم أنساكم وقررت إني أحقق كل أُمنياتكم واحد واحد ....

فلم انسى اخويا حشيش وأمنيته إنه يتجوز قبل ما يموت .. وقررت أصرف على فرحه وشواره من جنيه لحد 35 ج .

واخي إبن مصر وامنيته انه يغير الهوندا سيفيك بحاجة احدث ومكيفة ولتكن فيورا مثلاً .

وهاندي كرافت وطقم السنان اللي نفسه فيه عشان يقدر ياكل الدوم ويمضغ نبوت الغفير بسلاسة وحرية.

وحتى شعنونة وامنيتها انها تشتري جيب شيروكي فور باي فور من غير سقف .

ولايت هاوس والأوضة اللي عايزه تأجرها فوق السطح وتعمل فيها معمل مربى وطرشي الصبح وبالليل تدي فيها دروس خصوصية في اللغة العربية وقواعد اللغة العربية .

وحتى مجرمون ورغبته في إفتتاح مدرسة خاصة للكرة لتخريج جيل من اللاعبين الحريفة يحملوا راية الأهلي ويستكمل مسيرة الفشل وكان اخرها خسارة كأس مصر قدام المقاولين بتاع الدرجة الثانية أمبارح .

وطبعاً عمنا الكبير محمد أبو زيد والأمنية التى طالما تحدث عنها معي وهو انه يخصص حتة أرض من اللي عنده في مديرية التحرير ويفتحها نادي لتدريب الكاراتية والكونغفو والكيوكسل وكل ألعاب الدمار الشامل ويقدم لمصر أبطال أوليمبيين ويبقوا املنا في دورة بكين الاوليمبية سنة 2025 .

وصديقي العزيز سكوربيون وحلم حياته إنه يفتح محل بيتزا ويسمية " شيخ البيتزا " عشان يضرب به بيتزا هت وبيتزا إن ودومينوز بيتزا .

والدكتور أبو المحابيط وحلمه إنه يفتح مستشفى إستشماري في 6 اكتوبر ويشتغل في نقل الأعضاء وزراعة قطع الغيار البشرية .

وحتى هشام عبد الوهاب اللي انا مخاصمه مانستوش برضوا وقررت إني امول الأوبريت اللي عايز يعمله ونوصل للعالمية بقى ونقب على وش الدنيا .

وأختنا مسلمه إيجيبشان هاحقق لها امنيتها في إنها ترجع وتستقر في مصر وتفتح لها محل أم علي تضرب به المالكي بتاع الحسين وممكن من خلال المحل تربي زباين وتعالجهم علاج نفساوي بعد ما يتهبلوا من حلاوة ام علي اللي بالمكسرات .

أخواني وحبايبي ... أنا كلي ودان صاغية إني أسمع أمنياتكم ... إتكلموا وخدوا راحتكوا الخير كتير والمبلغ هايكفينا ويفيض وهانحجز منه كمان حاجة على جنب نشتري بها هدية للريس بمناسبة نجاح العملية ..

يالله واحد واحد وماتتخانقوش ..هاسمعكوا كلكم .

[Farida]

الف مبروك يا سى السيد انا فرحت لك جدا و الله (مع انك مش محتاج يعنى ...ما شاء الله شغال فى شركه مالتى ناشيونال ولو لا قدر الله حصل حاجه الطيارة بتجى لك لحد عندك .....اللهم لا حسد يعنى ) انا نفسى افتح مدرسه خاصه من غير فلوس كتير و فيها ملعب كبير و نشاطات و مدرسين على مستوى و حا اديهم مرتبات كبيرة جدا و الأولاد تتعلم فيها الأخلاق قبل الحفظ ......

[Cleo]

ألف ألف مبروك يا س س ..

ربنا يكرمك و تجيب تقدر دلوقتى تجيب المكسوبيشى اللانسوم و أنا مستعدة أشتغللك عليها خط إمبابة حلوان...

ولو إنى واخدة على خاطرى منك عشان افتكرت كل الأخوة دول و نسيتنى فى تقسيم التركة.... إإإإإ... قصدى الوصية.... يووه... الحلاوة... مع إنك عارف يعنى إن كان نفسى اشترى هرم منقرع و أقلبه كازينو و شقق فندقية...

عموما لو تحب تدخل معايا شريك النص بالنص و المكسب مضمون...

بس طبعا بما إنك مقيم فى الخارج... ممكن تعمللى توكيل و أنا أخلص كل الإجراءات هنا...

و ماتخافش من حاجة... الواحد لما بيعامل.. بيعامل ربنا... و الناس لسه فيها خير... n2&(

هاستنى ردك على رسالة خاصة علشان إنت عارف البيزنس بيحتاج سرية فى التعامل و عشان العين و كدة يعنى...

كليو

بكالوريوس تجارة و إدارة أعمال

و حاصلة على الزمالة من كلية القناطر الخيرية - بنات

تم تعديل 3 يوليو 2004 بواسطة Cleo

[DARWEEN]

عقلي الباطن بيقول بما إن المبلغ محترم وحيغرق الدنيا ... الواحد لازم ياخد راحته ويتمطع في الطلبات ,اخويا س س مشرف برضه مش حيرد لي طلب

الله يخليك يا س س نفسي في قصر المنتزه بشوية الجناين اللي حواليه

ولك عليا كل يوم جمعه أسيبك تبلبط أنت والعيال براحتكم

ولو ممكن يعني لو فيها رزاله .... عاوز محطة القطر اللي بره فوق البيعه وتسميها محطة داروين

ممكن ؟؟؟؟؟؟؟؟؟؟؟؟؟؟؟؟؟؟؟؟

[se_ Elsyed]

الله يخليك يا س س نفسي في قصر المنتزه بشوية الجناين اللي حواليه

ولك عليا كل يوم جمعه أسيبك تبلبط أنت والعيال براحتكم

ولو ممكن يعني لو فيها رزاله .... عاوز محطة القطر اللي بره  فوق البيعه وتسميها محطة داروين

ممكن ؟؟؟؟؟؟؟؟؟؟؟؟؟؟؟؟؟؟؟؟

لأ مش ممكن يا خويا .. هو انا عشان بقى معايا فلوس يبقى أروح أشتري التروماي ..

يا داروين أنا عايز أسمع أفكار حيه .. إتعلم من فريده وأفكارها النيرة بتاعت المدارس والدروس الخصوصية والحاجات دي .

روح خدلك دش وفوق وأرجعلي بفكرة واقعية معلمية .

[DARWEEN]

بقى أنا أقولك المنتزه وبحر وبلبطه تقولي خدلك دش ؟؟

smk: lo:: lo::

طيب قول أنك بخلان علينا بحته من الرزق الي هبط عليك من السما بعد ما أتنغنغت والأشيا بقت معدن

طيب شوف كده أبو الدراوين لما يكسبله خمين جنيه في اليانصيب حيعمل معاك أحلى واجب إزاي

جتنا نيله في حظنا الهباب لا بنكسب ولا حاجه

n2&(

[حشيش]

نفسى الف العالم كله على ظهر بالون ... تكون نقطة الانطلاق والعودة هى مكتب البريد الذى ادخل السعادة فى قلوبنا جميعا n2&(

[se_ Elsyed]

فريده كتبت

انا نفسى افتح مدرسه خاصه من غير فلوس كتير و فيها ملعب كبير و نشاطات و مدرسين على مستوى و حا اديهم مرتبات كبيرة جدا و الأولاد تتعلم فيها الأخلاق قبل الحفظ ......

صراحة الله ينور عليكي .. فكرة جيدة وأنا معاكي فيها وهامولك بكل ما تحتاجية ... وإسمحيلي أُطلق على المدرسة دي إسم " مدرسة فريده للأجيال السعيدة " وبعد إذنك أرشح لك اعضاء هيئة التدريس وأدرسي الأسامي كويس وقوليلي رأيك :

1- ناظرة المدرسة : فريده ( صاحبة الفكرة )

2- أمين الصندوق : س س ( فلوس وهُبر وخلافه )

3- أستاذ التربية القومية : عادل أبو زيد ( عشان يعلم الأولاد النزاهة والشرف والحاجات اللي أنقرضت دي )

4- أبلة التدبير المنزلي : سلوى

5- أبلة الحساب : فيروز

6- أبلة العربي : لايت هاوس

7- أستاذ الالعاب : محمد أبو زيد

8 - طقم تدريس تربية دينية إسلامية : د / صابر ، سي فوود ، مجرمون ( بس مش عايز كلام بره المنهج )

9- أستاذ المراجيح : هاندي كرافت ( بالتخصص )

10 - أبلة التاريخ والجغرافيا : كليو

11- أستاذ الإنجليزي : داروين .

12- أستاذ الإقتصاد : شرقية ( وده بالذات لو غاب هاخصم من مرتبه )

13- أستاذ مادة القانون : الأفوكاتو ( ودي مادة جديدة )

14- مشرفة الحضانة : ست أمينة ( ودي خدمه عاملينها للأبلوات الامهات اللي معاهم عيال صغيرة وعاملين لهم حضانه يخلوها فيها عيالهم لحد ما يخلصوا الحصص.. وما فيش أحن من ست امينة تاخد بالها من الأطفال )

15 - أستاذ غير متفرغ : حشيش ( وده هايبقى يدخل الحصص الفاضية ... جوكر يعني )

16 - أستاذ المزيكا : هشام عبد الوهاب ( هانبدأ معاه بشوية الآت موسيقية بسيطة .. مثل آلات النفخ والوتريات وبعض الآلات النحاسية )

17 - أبلة علم النفس : مسلمة إيجيبشان ( ولما يجيلها عدلها هاحاول أكلم د / أبو حلاوه يمسك بدلها المادة دي )

18 - أستاذ دين مسيحي : سكوربيون ( وهاخلي يدرس للعيال إيطالي في وقت فراغه... نوع من انواع الإستغلال )

19 - مشرف الكانتين : أبو فصاد ( وجبات جاهزة وباقيه وملوخية وحاجات من دي .... وعايزك تغذيلي العيال وتخلي العقل السليم في الجسم السليم )

20 - أستاذ رن الجرس : موديست ( مش عارف ليه عينته كده .. يمكن عشان عنده إهتمامات بالميديا والحاجات اللي بتعمل صوت )

21 - أستاذ الخطابة والخط العربي : إبن مصر

22- أستاذ العلوم : د / رجب ( كيميا وفيزيا وتشريح )

23- أبلة الكمبيوتر : نورا ( جيمز وبينت براش ولوجو ولو فاضية تبقى تبدا معاهم دروس متقدمة في البلاي ستيشن )

24 - أستاذ الفلسفة : سقراط ( اهو ده الوحيد اللي صعبان عليه عشان المادة دي غلسة ومافيهاش دروس خصوصية )

25 - الأخصائي المُجتماعي : محمد أبو زيد 0 راجل طيب ومابيحبش يزعل حد وبياخد كل واحد على قد عقله ... وبرضوا عشان يحجسن دخله جنب دروس الألعاب )

27 - أبلة الإسعافات الاولية : شعنونة ( وهاعملها صندوق صغنن في ماكراكروم وصبغة يود وشاش وقطن عشان العيال اللي بتتعور في الفسحة ) .

28 : الأستاذ اللي بيخوفوا به العيال الصغيرة : أسد ( حيث إنة الضرب ممنوع في المدرسة فالعيل اللي هايتشاقى نقول له لو ما سكتتش هانجيب لك الأسد )

وانا باقولها اهو ... عايزين نبقى مدرسة نضيفة يعني لا فيها ضرب ولا تعذيب ولا عيال بتتفقع عينها ... والأستاذ اللي هالاقيه بيقهر العيال ويجبرهم على أخد دروس خصوصية

ومش هايقسم معايا سأُنزل به أشد انواع العقاب .

[se_ Elsyed]

مع إنك عارف يعنى إن كان نفسى اشترى هرم منقرع و أقلبه كازينو و شقق فندقية...

الأخت كليو لا داعي للرسائل الخاصة .. لذا فسأنشر الرسالة الخاصة الُمرسلة منك والتى تطلبي فيها مُساعدة :

- الأخ س س

ألف مبروك على فوزك بالجائزة الكبرى وهذا المبلغ المحترم ( وش بيزغرط ) وباطلب منك عدم اللامؤخذه أنك تحقق لي حلم طالما راودني وألح علي في كوابيسي وهو القيام ببعثة إكتشاف لمقبرة الإسكندر الأكبر بواحة سيوه والفرافرة وذلك لإثبات العلاقة بين الإسكندر والدولة الفاطمية وكذلك دحض المزاعم التي تقول بإن كانت هناك خلافات شخصية بينه وبين أحمس وغن المقوقس تدخل بينهم وسدد الفلوس اللي كان سالفها الإسكندر من احمس وضرب عليها العوافي وعمل عبيط لما جه ميعاد الكمبيالات ...

وانا يا اخ س س عملت كالكوليشن بسيط للمصاريف بما فيها أجور عمال الحفر الصعايدة والكوريكات ( جمع كوريك ) والفؤوس وكلوبات النور والخيم اللي هنبات فيها في الواحات والمواصلات ومعلبات الفول وبلاليص المش وحتى البصل اللي هانبلع به المش.. وهابلغك بها بعدين على ما يجيلي يومية المترجم اللي هايبقى وسيط بيني وبين الصعايدة ويفهمهم إحنا هانعمل إيه بالظبط.

وأنا من منبري هذا بأقول للأخت كليو إن كل طلباتك مُجابة من اول الكوريكات لحد الصعايدة .. بس على شرط كل الكنوز اللي هاتلاقيها في الجبانة بالنص وتشيلي لي على جنب الطرطور الصفيح اللي كان بيلبسه الأسكندر في المناسبات .. ده انا محتاجة في الحفلات التنكرية اللي بأروحها .

ولن تنسى لكِ البشرية يا كليو هذا الإكتشاف العظيم وسيسطر التاريخ إسمك بحروف من نور وسيتذكر العالم بإن كليو هي اول من أكتشفت طرطور الأسكندر الأكبر .

[se_ Elsyed]

نفسى الف العالم كله على ظهر بالون  ... تكون نقطة الانطلاق والعودة هى مكتب البريد الذى ادخل السعادة فى قلوبنا جميعا  n2&( 

طب ولما عيل مؤذي يكون واقف على سطوح بيتهم في شارع عبد العزيز جنب البوسطة ويقوم ضارب البالون بتاعك بالنبلة ومفرقعة .. يبقى منظرك إيه وإنت نازل من إرتفاع 30 ألف قدم ولا معاك بارشوت وطبعاً الضفادع مابتعرفش تطير .. يعني في إحتمال كبير تنزل زرع بصل في قلب ميدان العتبة او على كوبري السيدة عائشة .. وتخيل إنت بقى الزحمة الساعة 2 الضهر والموظفين خارجين من شغلهم والكل عمال يدهوس عليك .

يا حشيش خليك واقعي ... أنا خايف عليك ... يعني لو قلت لي عايز ألف العالم على ضهر جمل .. او حتى زي العالم المجانين اللي بره اللي بيلفوا العالم على بسكلته .... في الحالة دي ممكن أفكر واحقق لك امنيتك .

[maksoof]

الله يخليك يا س س نفسي في قصر المنتزه بشوية الجناين اللي حواليه

أنا آسف جدا يا عزيزى داروين بس أنا مش ناوى أبيعه دلوقت n2&(

و ألف مبروك على ال 100 لحلوح يا سٍ.س. و عقبال الملك (بكسر الميم)

[Scorpion]

عشمتني بالحلق يا سي السيد خرمت ودان حماتي ...بس عمال توعد و الا أحسن وزير ...

بيتزا... . مدارس و بلالين .. و المنتزه .. و الجناين و بلبطة .. و الترماي و القطر .. و في الآخر المبلغ كله تشتري بيه العربية لنفسك...

بلاغ هام ":

خلو بالكم العضو س س اشترى عربية جديده مكسبويشى لانسم وشكله بيقلب رزقه من وراكم ...... انا قلت بس انبهكم ... احنا جايين نهدى النفوس.

ايه رأيك بقييييييييييييييي في الأخبارية دي ... و من السعودية كمان علشان ما تقولش اننا بنتبلي عليك....

عالعموم انا بكره البيتزا ..طعمها دِلِع ... ما بيحطوش عليها هنا كزبرة و لا كمون....

[تلميذ]

ألف مليون مبروك ياسي الســــيد.

بقول يعني لو ممكن يعني كارت توصــية من حضــرتك لحضرة الناظرة إنها تقبلني تلميـــــــــذ عندها في المدرسة وتعفيني من المصاريف.

ياه ياســي الســـيد دا إنت طلعت طيب جــدا. ياراجــل داري علي شـــمعتك تقيـــد. دا العين فلقت الحجـــر.

روح ياشـــيخ ربنا يزيــدك ويكفيك شـــر كل اللي طامعانين فيك.

ربنا يكرمك ياراجــل ياطيب إوعي تـنســـي الكارت وعقبال متكســـب جايزة "من ســيربح البـونبــون".

[Cleo]

ياه ياســي الســـيد دا إنت طلعت طيب جــدا. ياراجــل داري علي شـــمعتك تقيـــد. دا العين فلقت الحجـــر.

روح ياشـــيخ ربنا يزيــدك ويكفيك شـــر كل اللي طامعانين فيك.

و إيش عرفك إن هو ده بسسسسس المبلغ اللى كسبه؟؟؟

مادام أعلن الموضوع ده يبقى أكيد كسب عشر أضعافه و بيقوللنا بس عشان يخزى العين... :lol:

ياااااااااااا بختتتتتتتتتتتتك ياااااااااااا قاااااااااااااسم...!!!!

[Guest Mohd Gramoun]

مبروك يا سي السيد...بس مسألة جوائز دفاتر التوفير دي... محتاجة فتوي.

عموما هبحث و اجيبلك الفتوي و بعدها نقرر إذا كان فيه مدرسة او مكبسة..

ماشي يا بتاع شلة البحرين؟؟؟؟ :lol:

[hamo90]

الف مبروك ياعم سي السيد

وحيث بقي أنت بقيت من الاغنياء والاكابر وربنا فتحها عليك

وأنا عارف أنك راجل بتاع خير وكلك ذوق وأخلاق و......................................... الخ

وبما أن حضرتك أغتنيت وهتشبرق نفسك أكيد هتشتري عربية جديدة

أيه رأيك لو تديني المتسوبيشي لانسوم

أكيد مش هتغلي عليا ‍

هاه أيه رايك هتديهالي أمتي ؟

HAMO

[mnman]

ماشي ياعم س س !!!! كدة تنساني في خضم فرحتك بالثروة!!!! وحتي متعينيش في المدرسة في الوظيفة الي كنت بحلم بيها طول عمري!!!!

عم منمان بواب المدرسة!!!! شفت انا تطلعاتي صغنونة ازاي!!!!

ولو علي المرتب مش مهم 4000 دولار في الشهر كفاية انا مش طماع!!!

ونفسي كمان اشتري محطة الرمل في الاسكندرية!!!! و نعمل الدخول بتذاكر 5 جنية التذكرة!!! وشوف حنلم كام!!!! وانا موافق انت النصف وانا النصف!!!!! علي الرغم انها فكرتي !!! لاكن زي بعضة احنا اخوات !!!!

وممكن نعمل ملاهي ونسميها!!! س س لاند!!! وانت عارف ان الناس بتحب المراجيح و الشقلبة و التنطيط!!!!! والتذكرة ب 50 جنية!!! ولو عايز تلعب نشان تبقي ب 70 جنية !!!! وطبعا شعنونة متلعبش نشان ابدا انا شوفت ممكن تعمل اية لو مسكت بندقية!!! فرح العمدة بيشتغل !!!!!!

اية رائيك في الافكار اللوزعية بتاعتي!!! مش بزمتك خسارة في البلد!!! أةةةةةةةةةةةةةةةةةةةةةة لو في مني اتنين !!! كانت مصر بقت حاجة تانية !!!!!

وربنا يستر!!!!

منمان مساعد بواب وحارس بالأنابة!!!!

[se_ Elsyed]

مبروك يا سي السيد...بس مسألة جوائز دفاتر التوفير دي... محتاجة فتوي.

عموما هبحث و اجيبلك الفتوي و بعدها نقرر إذا كان فيه مدرسة او مكبسة..

أبوس إيدك يا شيخ مجمج ... حرمت والله وقبل ما تقيم علي الحد عايز أقول لك إني لا اتعامل من أساسه مع البنوك الربوية ولا دفاتر توفير البريد حتى ، والدفتر ده فتحته ونسيته من زمان وكل اللي فيه 100 جنية + جايزة 100 كمان خدهم وريحني .. والحمد لله بأتعامل مع بنك فيصل الإسلامي فقط أولاً لدرأ شبة الربا .. وثانياً لأنه من البنوك المصرية الوحيدة اللي ممكن تراسلها عن طريق موقعهم على النت وبصراحة عندهم رد فعل سريع وهائل لأي طلب بأطلبه .

[Guest Mohd Gramoun]

ربنا يبارك في رزقك يا بو السيد..... و خلينا في المهم..العقد دائم ولا مؤقت؟

و يتري هتعيش في ثياب الكفيل ولا لأ؟

[se_ Elsyed]

حامو كتب

أيه رأيك لو تديني المتسوبيشي لانسوم

أكيد مش هتغلي عليا ‍

هاه أيه رايك هتديهالي أمتي ؟

ما تغلاش عليك والله يا حمو بس تاخد بها لفه بس لحد أخر الشارع وترجع تاني ... بيني وبينك كنت لسه بأتكلم مع إبن مصر إمبارح بالليل وبأقوله أنا الشيطان بيوزني وعمال يقولي إنزل مصر المرة دي بالعربية بس خايف من البهدلة لأنها اول مرة اعمل كده .. فلو نزلت بها هانطلع انا وإنت المقطم وتاخدلك لفه ( إبقى فكرني افك الفرامل عشان يبقى عندك حرية في عمل خمسات أمريكاني )

مانمان

متعينيش في المدرسة في الوظيفة الي كنت بحلم بيها طول عمري!!!!

عم منمان بواب المدرسة

والله العظيم يا باتمان كنت على بالي في الوظيفة دي وحاجزها لك .. بس خوفت أقول لك أحسن تزعل وتكون راسم على الكانتين بتاع أبو فصاد ... بس حيث إنك طلبتها ونولتها يبقى خد عندك تسعيرة البوابة :

1- دخول من الباب 5 ج

2- نط من فوق السور 10 ج

3 - تزويع في الفسحة 12 ج

4- تزويغ في الحصة الستة الغلسة 20 ج

5- دخول المدرسة يوم الجمعة عشان الطلبة تستغل الملعب في لعب ماتشات كورة 25 ج للفريق وإذا كانوا أهلاوية يبقى ببلاش عشان بيتغلبوا قدام أي فريق حتى فرق المدراس .

إحسب حساباتك كده وإعمل دراسة جدول وقولي هانكسب كام من السبوبة دي مع نهاية كل تيرم .