استجواب ...... استجواب .... بجد مش هرد عليها تانى

[pocy]

معلش يا جماعه انا تانى

طبعا المعظم عارف انى فى الكويت ولما جينا الكويت اتعرفنا على بعض الناس من ضمن الناس دول كانت فى واحده انا كنت بحسبها طيبه وساذجه وعلى نيتها اتارينى اا اللى كده خدوا بقي عندكم

كانت بتتصل بي شبه يوميا ماهى اصلها عندها ارضي وتكلمنى مش عارفه اطبخ ومش عارفه اغسل ومش عارفه وجوزى هيزعقلي وكانت لسه جايه الكويت عروسه وانا كنت زى المدب طب بصي اعملى النهارده كذا وده بيعمل بالطريقه الفلانيه ودى بالعلانيه ومش عارفه ادبر نفسي اصل جوزى ادانى مصروف وقالى صرفي نفسك بيه والعمليه بتخرم عادى عادى ما بتخرم من الناس كلها اشمعنى انتى طب تعالى نشوف حاجات البيت الاساسيه وايه الكمليات اللى نسنغنى عنها وكل المكالمات بتاعتها هى تشتكى وانا زى المدب احاول اساعدها لحد ما لقتنى بجد مش طايقاها وبخلص المكالمه بتاعتها تعبانه من كتر الاسئله انتى بتعملى ايه دلوقتى طب ابنك لما كان عنده كذا كان بيعمل ايه يعنى ابنك اكل وهو عنده مش عارف ايه امال المنيا ابنى مش بياكل ليه لحد ما لقيت ان مكالمتها عباره عن استجواب رسمي وبنقل بالحرف لزوجها اللى مش بيتبل فى بقه فوله وده اللى عرفنى انها بتقول لجوزها ومن ضمنها الحاجات النسائيه تخيلوا واخر ما طفح الكيل بتسألنى اول امبارح انتى مرتب زوجك كام قلتلها هو انا سالتك مرتب جوزك كا م علشان انتى تسالى وش كده على طول حسيت انى استنصحت لاول مره عليها لا ابدا مانتى لو سالتينى هقول قلتلها لا انا مش بسال على حاجه متخصنيش ولا تعنينى بشئ لا ابدا اصل انا كنت عايزه اعرف انتى بعرفي تدبقي ولا لا اصلي مش عارفه رحت اديتها وش وهتستفادى ايه لما تعرفي ؟؟؟؟ ابدا يعنى اشوفنى انا ماشيه صح ولا لا قلتلها هل جوزك زى جوزى قالت لالالالا قلتلها هل ابنى زى ابنك لالالالالالا هل انا زيك برضه لالالالالالالالالالالالالالالالالا يبقي اكيد عيشتنا مش هتكون زى بعضها ومش هقدر افيدك معلش انا الاكل على النار هستأذن بجد انا خلاص كرهتها وكرهتنى فى نفسي والواحد بيبقي زوق مع الناس دى ويقول فى غربه ولازم نساعد بعض لكن لحد كده خلاص بقي شويه شويه هتقلي انتى بتروحى الحمام كام مره فى اليوم سورى على التشبيه بس نرفزتى

بالله عليكم عندكم حد بالمنظر ده طب دى قله ذوق منى انى ارد عليها كده بس بجد تعبتنى من كتر الاسئله التى لا تعنيها بشئ ولا حتى هتستفاد منها

وفى موضوع تانى برضه نفسي اتكلم معاكم فيه لحسن انا خلاص على اخرى وشكلى هبطل اخرج من البيت احطه هنا ولا فى موضوع لوحده

[شريف مان]

مش عارف .. حاسس ان الست دى غلبانه

هى أكيد متعرفش حد غيرك عشان كده بتعتبرك زى مامتها :lol:

صحيح لها اسئلة مستفزة .. بس بردوا تعالى على نفسك شوية واستحمليها

حاولى تفتحى معاها أى موضوعات .. عشان يبقى فيه حوار مش بس سؤال و جواب

تحياتى

[Dreamwithme]

بصي يا مدام بوسي ......في ناس طبعها كده إنها فضوليةوحشرية لأقصي مدي . وأنت اتصرفتي صح جدا . طبعا متقطعيش علاقتك بها لكن حطي خطوط حمراء للأسئلة في المواضيع الخاصة واللي مش هتفيد حد إنه يعرفها . زي ما أنت عملتي قفللي علي الكلام.لأن هي عندها مشكلة خطيرة أخطر من الفضول وهي إنها بتحكي الكلام اللي بتقوليه لزوجها اللي بيحكيه لناس تانية وده يجيبلك مشاكل إنت في غني عنها .

لكن متقطعيش معاها خالص جايز فعلا تكون محتجاكي في موقف وتقدري تساعديها وتأخدي ثواب.

بالنسبة للمشكلة التانية أعتقد إنه أفضل يكون موضوع منفصل.

كل عام وحضرتك بألف خير وربنا يتقبل منك ويحفظك.

[nightmare]

التصرفات تدل على انها شخصية متطفلة وفضولية وحشرية كمان

لانها تتدخل فيما لايعنيها وقد قال رسول الله صلي الله عليه وسلم ( من حسن إسلام المرء تركه ما لا يعنيه )

افضل حل مع هذه الشخصيات من وجهة نظري هو اتباع مبدأ التجاهل والصد والتقفيل عليهم بعدم اعطائهم الفرصة للتحدث فيما لا يخصهم , ووضع خطوط حمراء معهم لا يجوز تعديها , وان حاول ان يتعداها فيتم صده بقول وانت مالك مثلاً أو بتسأل ليه في حاجة ما تخصكش ؟ أو خليك في حالك.

لكن فيه بعض الناس بتحرج أو بتتكسف تقول كده ليهم , وده اللى بيجعلهم يتمادوا في هذه التصرفات.

مع تحياتي

[الغريب]

السلام عليكم

سبحان الله يا أم عمر زوجتى تعرف جارة تقريبا كدة بس عندك أنت الوضع متطور، أنما جارتنا دي أطيب بكتير، هي بردوا بتحب تقول حاجات كتيير لزوجتي عن حياتها هنا وطبعا بتنتظر من زوجتي أنها تبادلها نفس التصريحات ولكن الحمدلله زوجتي معندهاش الطبع ده، بس تخيلي بقى أني أنا اللي بتعاطف جدا معاها وبقول لزوجتي لي مش بتصرحلها أنت كمان وزوجتي تقولي أنا مبحبش كدة وبصرااحة برجع أقول لنفسي هي اللي صح

الخلاصة .. حبي جارتك لأقصى حد، لأن دي وصية النبي ، ولكن حاولي من سلوكك معاها تعلميها الصح من الغلط، متنسيش أنها زي ما بتقولي عروسة يعني محدش عرفها حاجة ولما صدقت لقيتك وفتحت سرها ليكي

بالله عليكي يا أم عمر لا تقسي عليها هي أختك بردوا وأنتو الأتنين متغربين وحاولي بذكائك تدبري المواقف معاها من غير ما تزعليها، وطبعا تحتسبي الكلام ده كله عند الله، ربنا أعلم لو أنت شديتي عليها هتكون حالتها أيه..

وربنا يكرمك ويساعدك ويوفقك

[رضوي]

بسبوسة حبيبتي وحشاني

حبيبتي صديقتك او جارتك دي بتفكرني بواحدة اعرفها .......... بتحب تعرف التفاصيل عن كل حاجة ........... لا ادق التفاصيل كمان

لكن السؤال هي عايزة تعرف ليه ؟

ياتري هي بتتعلم منك ؟

خلي بالك ...... لان لو دة السبب الحقيقي يبقي انتي ياحبيبتي لازم تنصحيها ...... ( مش شرط تقوليلها عن حياتك الشخصة لكن انصحيها وثوابك عند ربنا )

أما بقي لو بتسأل من باب الفضول والحشرية ........ يبقي بكل ذوق ولطافة صديها ...... بس بلاش تقطعي علاقتك بيها خالص .......... ممكن تكون محتجاكي

دايماً بيقي فيه ناس قريبة مننا اوي بنحكيلهم ونفضفض معاهم ....... وهما بس اللي بندخلهم في تفاصيل حياتنا نفضفض معاهم ويفضفضوا معانا ......... واكيد الناس دي اهل للثقة ....... وبنتعلم من خبرات وتجارب بعض ........

لكن لما كل كلمة تتنقل لزوجها ............. لا استوب مش من حقها

هنا لازم نعمل وقفة جامدة جداً استــــــــــــــــــــــــــــوب

اي علاقة صداقة مهما كانت وطيدة لازم لها خطوط حمراء وحدود ............... حتى اصدقائي المقريبن جدا عندي ليهم حدود هما عارفينها كويس ...... وانا برده عارفة حدودي معاهم .......... وبكدة بنريح بعض وبنبعد عن اي مشاكل محتملة

حبيبتي بلاش تخاصميها خالص وتبعدي عندها ......... ممكن تكون محتجاكي الله اعلم

لكن خلي دايماً فيه حد فاصل وخط احمر ............. ولو تعدت حدودها بسؤال ماتجاوبيش عليه ........ ولو سألته تاني قوليلها دي حاجة خاصة بحياتي ماينفعش اتكلم فيها

[aimen]

طيب واذا كان الموضوع ده فى الرجال كمان

احد اصدقائى فعلا لما بيتصل بى بيعملى استجواب عنى وعن الناس اللى اعرفهم بالرغم من انه ممكن يكون عارف معلومات عنهم اكثر منى

...

[اغابي]

ياربي - مش عارفة اقولك ايه يا بوسي

انا بصراحة ما اتعرضتش لحاجة زى كدا يمكن لان كل واحدة من معارفى

داه اذا اصلا اتكلمنا فى تلفونات بنبقى خطافى - اما واحنا فى الطريق وبنسوق

او احنا وبنوصل اولادنا للدروس الخصوصية حاجات كدا على السريع

يعنى نادرا ما تحصل انى اتكلم فى التلفون الارضي

- لكن انا اقولك عموما ما اتعرضتش لحاجة زى كدا لكن لو حصل معايا واحدة طريقتها كدا ومتطفلة اكيد انا حابعد عنها ما تسمحيش لاى مخلوق انه يتدخل فى حياتك الخاصة

تحت اى مسمي حتى لو كانت صداقة ومش دايما معرفة الناس كنوز فى ناس كويسة وفى يعنى ....

ربنا يعينك وحاولى تتهربي منها انشالله ترفعى سماعة التلفون - انا مرة رفعت سماعة التلفون لان اصحاب ابنى ما كنوش بيبطلو اتصال بيه وصدعونى روحت شيلت السماعة بعيد وفضلنا

كدا اروق واهدى بلا قلبت دماغ

ارفعى التلفون وما تتكسفيش منها واحرجيها لو اتعدت حدودها معاكى

خليكي دايما فاكرة ان مش دايما حيقابلوكى ناس بنفس طريقة تربيتك او مستواكى فى التعامل

تحياتى يا بوسي

[أمل حياتي]

حبيبتي بوسي

خير الأمور الوسط والإعتدال

انتي جندتي نفسك ليها ولأسئلتها وهيه من باب العشم زودت العيار

لو انتي شايفه ان هيه كويسه بغض النظر عن الموضوع ده يبقى خديها

بالهدوء وقفلي على امورك الشخصيه بكل ادب بدون تجريح مباشر

ولو انتي شايفه انها ما ينفعش تصاحبيها

يبقى خليكي بعيد احسن والبعد غنيمه

تم تعديل 7 نوفمبر 2010 بواسطة حمال الأسيه

[masraweya]

السلام عليكم

شوفي يا قمر .. أنا مش هقدر أضيف كتير

ممكن تاخدي بالأسهل و تقطعي علاقتك بها و تريحي نفسك

وممكن تعتبريه باب ثواب اتفتح لك

حاولي توجهيها .. تنصحيها و ما تتكسفيش تصديها عن الدخول في خصوصياتك

انتِ الوحيدة اللي تقدري تحددي هتقدري تتعاملي معاها و لاّ لأ

ربنا يعينك

[Simba]

عدو عاقل خير من صديق جاهل

انا متعاطف جدا معاكي يا مدام بوسي خصوصا ان في السنة من السنين زوجتي اتعرفت علي واحدة من العينة دي بس اللي بحكي عنها كانت بزيادة شوية وكانت بتتصل مرات في اليوم مش شبه يومي وبرضه سأتلها مرتب جوزك كام في الكويت فانا زوجتي قالت لها عادي خالص خالص الراتب بتاعي لكن اللي حصل ايه بقي

ان الصديقة الرائعة دي قالت لها يا شيخة اكيد بياخد اكتر من كده وجوزك بيكدب عليكي

بس الحمدلله صداقتهم دي انتهت علي خير قبل ما يحصل ما لا يحمد عقباه

فالاحسن انك تقطعي معاها خالص حتي لو قللتي من جو التعارف اللي بينكم ده فالطبع بيغلب التطبع

والمثل الكويتي قالك ايه بقي

ابو طبيع ما يوز عن طبعه

[كدة رضا]

واللة العظيم لية واحدة صاحبيتى نسخة من الى انتى بتحكية واكتر كمان لو حاجة حصلت معاة وصدفت حصلت معاية هى عملتلها مشكلة مع جوزها وانا الحمد للة مفرقتش مع جوزى بالمرة تبقى ماساة وهنعمل فيها اية يا ستى انا مش ماساة ولا حاجة استينى بالعافية لية ومقدرش اشكر فى اخلاق زوجى امامها بصراحة بخاف من عينيها اصل العالم الى بتسال كتير دى عادة بتعمل مقارنة بين حياتها وحياتك وتلاقيهم دايما بيقولة كلمة يابختك واشمعنى والاسئلة الغريبة من عينة قسط المدرسة دفعتية امتى وكام ودبرتى الفلوس ازاى وبتصرفة كام فى المصيف والاتصال بالمبايل انتى فين ومجرد مقول انا برة تلاقى الرد جاهز بتتفسحى طبعا يابختك انا محبوسة فى البيت واللة ببقى عاوزة اكذب واقول انا عند الدكتور بس بستحرم وع انى ماشاء اللة عليها ربنا مديها حاجات كتير واللة مش عندى بس تقولى اية فى قلة القناعة وكل مااقول هاقطع معاها تصعب عليا واقول بتعمل كدة من عشمها وكمن هى واخدة انها تكلم عن خصوصيتها امام كل الناس فمتوقعة ان كل الناس زيها يلا ربنا يهدى

[pocy]

اولا احب ان اعبر عن مدى سعادتى بردودكم لانكم حسستونى ان فى ناس لسه بتنصح بالخير والحمد لله

اما عن صديقتى وليست جارتى فهى للاسف من النوع الفضولى واكمنى انا مش بسألها عن خصوصيتها فمتوقعه انها كمان مش تسألنى على خصوصياتى بس انا بلاقي نفسي معاها كانى لازم ارد كانى بجري طول المكالمه عارفين فى الافلام الاجنبي لما بيحطوا الشاهد على المنصه ويقولوا احلف وبعدين الاسئله تنزل ترف اهه وتحس بضغط انك لازم تجاوب وتقول الحقيقه والمشكله انى مش متعوده اكدب فبالتالى مش هعرف اكدب وكلمه يا بختكوا دى بسمعها كتير والله العظيم كل الناس اللى بتشوفنى بره البيت بيولولى رايقه وفايقه ومعندكيش مشاكل بسبب انى بضحك وبهزر ومش شايله هم بس محدش يعرف انا ببقي خارجه علشان انفس واطلع فى الضحك والهزار ومحدش يعلم اسرار البيت بنرجع البيت سبحان اله منعرفش اللى بيحصل سببه ايه وكذا مره سبحان الله وانا احلم احلام ولما اشوف تفسيرها او المفسرين يردوا على كلها حسد وارقي نفسك وحصنى البيت طب مين وازاى وليه الله اعلم

والله اختى كذا مره لانها بتخرج معانا بتقلي هى فلانه متبعاكى قوى كده ليه ولما اقولها ازاى تقلي بتبصلك بصه مش عارفه اوصفها وانتى بتتكلمى اتلمى واسكتى شويه واقري قل اعوذ برب الفلق

وبجد جزاكم الله خيرا عنى وعن صديقتى انا اكيد مش هقطع منها بس على الاقل انها تحترم خصوصياتى انا كمان وزى ما قالت رضوى فى حاجات لازم نعمل فيها استوب ويا مسهل

اخى الفاضل استاذ غريب زوجتك عندها حق وده افضل شئ عملته كده الست دى هتعرف حدودها

اوعوا تروحوا بعيد عايزاكم فى موضوع اكبر من كده

[عبير يونس]

بجد يا بوسي اتخنقت من الكلام

و لا يمكن اتحمل وجود النوعية دي من الناس في حياتي

و الغريب انك لسه بتقولي صديقتي :blink:

صداقة ايه دي يا بوسي؟؟

تساعديها لو احتاجت لك

ماشي

أما صداقة؟؟؟

مش عارفة بقى

اللي تحسبيه انتي

اوعي تفتكري انك تقدري تحجمي النوعية دي و الا توقفيها عند حدها

حتلف تلف و ترجع توقعك تاني بطريقتها

و مادمتي متبتحبيش تكدبي (و أكيد هي متأكدة من كده)

يبقى مش حتخلصي يا جميل

ابعدي عنها يابوسي

و مادامت مش جارتك

يبقى حتى ملهاش حقوق الجار

لها حق الأخوة في الله

و ده لو كانت في شدة

و لو كنتي تقدري تساعديها

أما غير كده

ابعدي عن الشر يا ماما

خصوصا انها بتحكي لجوزها حتى الأمور النسائية

دي لوحدها كفاية اوي تخليكي تلغيها من حياتك بالمرة

انتي كده يعني مكشوفة قدام جوزها

و ممكن يطمع فيكي على فكرة

ده غير انه كمان بيحكي و ما بيتبلش في بقه فولة

اوعي تقولي

لا لا مش ممكن ده راجل محترم

دي واحدة حمقاء

و بتحكي له عنك

يعني أكيد راسم لك صورة في خياله مع الأسرار اللي بيعرفها من زوجته

و حبة حبة ممكن يتعلق بيكي

و مصيبة كمان انه يحكي عنك لحد تاني

و جوزك فين من ده كله يا بوسي

ياترى عارف مصايب الست دي؟؟؟

يا ترى عارف انها بتحكي عنك لجوزها؟؟

يا ترى متقبل فضولها و استجوابها ليكي؟؟

حاسبي منها لتخرب لك بيتك

الله يعافيكي يارب

السرطان الخبيث لا علاج له الإستئصال

مينفعش يصعب عليا و اسيبه

و اقول معلش غلبان

آسفة ان كلامي واضح زيادة عن اللزوم

بس سامحيني يا بوسي

لازم افوّقك

و انتي حرة بقى

[Simba]

السرطان الخبيث لا علاج له الإستئصال

مينفعش يصعب عليا و اسيبه

و اقول معلش غلبان

كلام سليم جداااا :)

[se_ Elsyed]

إدخلي الموضوع ده وأقرأيه جيداً قبل الاكل وبعد الأكل

http://www.egyptiantalks.org/invb/?showtopic=87184

غريبة قوي إن الإنسان يبقى هو اللي على حق .. وبعدين يتكسف ويستخبى ويشيل الهم ... والطرف الأخر البجح .. يبقى على قلبة مراوح وحاسس إن الدنيا حلوه

[عبير يونس]

بمناسبة الاستجوابات يا بوسي

زوجي من النوع اللي بيحب الناس و بيحب يساعدهم و متصور ان كل الناس طيبين

و طبعا ما كانش بيحب يخبي حاجة و بيعتبره كدب :blink:

لأول مرة ابتدى يجرب يخبي

و ما تتصوريش الحصار اللي بيتعرض له

و الاسئلة اللي بيسألوها

احنا نقلنا شقة جديدة

و ما عرفناش حد العنوان

على اعتبار ان محدش بيسأل فينا أساسا

التلاتة اللي محاصرينه

كانوا فاضيين و لا شغلة ولا مشغلة و مفكروش يساعدوه في عملية البحث عن شقة رغم انهم عارفين و ما شاء الله لو عاوزين يجيبوا شقة يقدروا (واحد فيهم بيشتغل في العقارات و تأجير الشقق)

ما علينا

اللي ينقط بجد

ان احنا اثناء ما كنا بندور و دايخين و مربطين العفش و بننام ع الأرض احنا و الولاد بعد ما فكينا السراير

اتصلوا بيه عشان يجوا يسهروا معاه

يسهرواااااااااااااااا

طبعا زوجي لأول مرة يصدهم و يقول لحد لأ

المهم نقلنا بفضل الله

و اللي يعرف النقل في شهر شوال في مكة

يعرف المعجزة اللي ربنا سبحانه و تعالى انعم علينا بيها

يتصلوا بيه

يقولوا له عاوزين نتغدى عندك

قال لهم عينيا اعمل لكم الأكل و اجيبه لحد عندكم

فضلوا يلفوا و يدوروا

لغاية ما واحد عملها تهريج و قال له انت مش عايزنا نعرف بيتك

زوجي رد ببرود و مجاملة غير معهودة

التالت حاول معانا هو ومراته بطرق في منهتى الالتواء

الاول عايزين يجيبولنا ابنهم نذاكر له

زوجي اعتذر بلباقة

المدام اتصلت عايزة تجيبلي بنتها اذاكر لها

برضه اعتذرت بلباقة

قام الراجل اتصل بزوجي و قعد يسأله

هو انت سكنت فين

زوجي رد رد عام

قام اخينا قعد يقرره

لدرجة بيقوله عند المسجد فين؟

طب الدور الكام؟

الشقة اليمين و الا الشقة الشمال؟

تصوروا

متصورين يعني:blink:

مهماش مصدقين ان زوجي بيخبي عليهم حاجة

المصيبة بقى

ان زوجي ابتدى ينهار نفسيا

و ابتدى يحس انه مذنب

و انه مش مفروض يعمل كده

و ليه يكدب يعني

شفتوا قلب الحقائق

قدروا يحسسوه بالذنب

مع ان هو اللي على حق

و همة اللي بيتدخلوا فيما لا يعنيهم

[م تيمور المراغي]

عتاب رقيق ليكي مدام بوسي على انك كسرت بخاطرها بالشكل ده ,,

دي شكلها غشيمه وغلبانه ,,

المشكله في الناس الزوق اللي زي حضرتك انهم بيصبروا يصبروا بعدين ينفجروا

ولولا ان ضميرك بيأنبك مكنتيش فتحتي الموضوع ده وحكيتيلنا عليه عشان تجدي في ردود اخواني ما يبرر صدك للبنت دي

اكرر اعتذاري لو ردي زعلك ,, بس صديقك من صدقك واظن اننا هنا كلنا اخوان واصدقاء

كسر الخواطر - حتى لو الحق عندك - من اصعب الامور

احكيلك القصه دي

كان سيدنا ابراهيم عليه السلام يستقبل عابري السبيل كل ليله في خيمته ,,

يوقد نارا ,, ويدعوهم للدخول حتى يرتاحوا من السفر ويؤيهم ويقدم لهم الطعام ,,

وذات ليله دخل عليه شيخ كبير يبيت في خيمته وياكل من طعامه

وبعدما فرغ من الطعام ,, قام الى النار الموقده داخل الخيمه ,, وسجد لها

فغضب ابراهيم لربه غضبا شديدا وقام يجر الرجل والقاه خارج الخيمه ,, يقول : ايسجد لغير الله في خيمتي !!!

فرحل الرجل ,,

فنزل جبريل عليه السلام و قال لابراهيم ان الله عز وجل يقول لك:

"يا ابراهيم لم تتحمله ساعة و انا تحملته ستون عاما على ارضي ,, ياكل من طعامي ويعبد سواي !!!

فجرى ابراهيم خلف الشيخ و قال لة:هلم الى الطعام

فقال:لم؟؟؟

فقال ابراهيم: عاتبنى ربى فيك.

فقال الشيخ :اله رحيم لابد ان يعبد

و أسلم الرجل

[se_ Elsyed]

الطريق إلى جهنم مفروش بالنيات الطيبة

إيه علاقة إن الإنسان يبقى غلبان او زي ما بنقول غشيم وبين ان يكون نمام وحِشري وفضولي لأ وكمان لا يكتم السر ؟

ده يبقى بلوى يجب أن يتجنبها الأنسان

[م تيمور المراغي]

وده الفرق بيننا احنا البشر وبين الانبياء والمرسلين

تخيل لو كل نبي او مصلح اجتماعي لقى واحد حشري وفيه عبر الدنيا قام اعتبره بلوى وصده وكسفه بالشكل ده

بعدين يا مدام بوسي انتي ماقولتلناش صحيح مرتب جوز حضرتك كام :P

هههههههه :happy: