يا بختكوا .......... كلمه بدأت اكرهها (الحسد والعين )

[pocy]

موضوع مكون من عده اسئله

ليه الناس بتحسد اصل الحسد يعنى تمنى زوال النعمه من المحسود طب ليه الناس تتمنى كده

وهل كل الناس بتحسد فعلا ومين اللى قال موضوه اللى عنيهم مقوره ومدوره يبقوا بيحسدوا واللى اللى عيونهم ضيقه برضوا بيحسدوا

طب هل فعلا الواحد ممكن يحسد نفسه ؟؟؟؟ طب ازاى ماهو فى مثل بيقول ما يحسد المال الا اصحابه طب ازاى ؟؟؟؟ ازاى اتمنى زوال النعمه منى ؟؟؟؟؟

معلش صدعتكوا بس انا بقالى فتره كل ما اجى اشوف تفسير لحلم الاقي انه حسد والحل بالرقيه الشرعيه طب امنع الحسد نهائي عننا ازاى واذاكان احنا ممكن نحسد نفسنا

انا اسفه طبعا بس انا عدت على تجارب مع الحسد كتير وعايزه اعرف تجاربكم ولو عرفتوا حد بيحسد وعينيهم وحشه بتتصرفوا ازاى معاهم

تم تعديل 8 نوفمبر 2010 بواسطة pocy

[nightmare]

ربنا يعافينا جميعاً من الحسد ويحفظنا من شرور العيون

لم أجد أفضل من هذين الموضوعين للرد علي كل تساؤلاتك يا مدام بوسي

العين والحسد

الوقاية من العين والحسد

وعليكي بكثرة الذكر وقراءة القرآن.

مع تحياتي

تم تعديل 8 نوفمبر 2010 بواسطة nightmare

[عبير يونس]

بوسي دي كانت مداخلة لي في موضوع

انتبهوا ... الافتراء على الله بأنه ابتلانا يعرضنا للبلاء الحقيقي

http://www.egyptiantalks.org/invb/index.php?showtopic=78523&st=0&p=475141&fromsearch=1entry475141

و حابة اني اوضح ان في ناس كتير بتخلط بين العين و الحسد

العين ممكن تجيلنا من أقرب الناس و ممكن حضرتك تدي نفسك عين في المراية مثلا لو بصيت فيها و عجبك شكلك و مقلتش ما شاء الله

اللهم كما حسنت خلقي حسن خُلقي

و ممكن تديها لحد من ولادك لو شفته كده و مقلتش ما شاء الله و دعيت له و حصنته

يعني العين ممكن تيجي من أي حد

و الحذر منها ضروري

و اتقاء شرها مفيش اسهل منه

كلمة " ما شاء الله " توقف تأثيرها فورا

أما الحسد و العياذ بالله

فده من السبع الموبقات المهلكات يعني من الكبائر

و هو تمني زوال النعمة

يعني واحد يكون بيكرهك و بيحقد عليك و يتمنى الخير اللي انت فيه يزول و العياذ بالله

و دي درجات طبعا

يعني الكراهية هي اول السلم

ان واحد ما بيتفقش معاك او مبيطيقكش و قد يقف الأمر عند هذا الحد

و اذا تطور الأمر يصبح حاقدا

و الحاقد هو اللي بيبص لك في الخير اللي انت فيه و يتساءل ليه انت و مش هو

و يتولد لديه شعور دائم بالظلم و انه المفروض هو اللي يبقى مكانك

و اللي يمثله المثل " يدي الحلق للي بلا ودان"

و طبعا دي بداية للوصول للحسد و العياذ بالله

فتلاقيه وصل لدرجة انه نفسه اللي عندك يزول حتى لو ما جالوش هوة

المهم انت لأ

و في ناس بيتطور معاها الموضوع انها تتمنى زوالك من الدنيا بكاملها

و عل فكرة مش شرط ابدا ان حد يتمنى لك زوال النعمة لأنه محروم منها

و ياما ناس بتحسد ان عندك فلوس و همة عندهم

او ان عندك ولاد و همة عندهم

... الخ نعم المولى عز و جل

يعني موضوع الحسد ده كبير

و مش ببساطة كده أي حد نتهمه انه حساد و العياذ بالله

و الحل بسيط جدا

هو الالتزام بأذكار الصباح و المساء و تحصين انفسنا و أولادنا

عشان ننتبه لحياتنا و نخرج من دوامة الخوف المستمر من زوال النعم

و الحقيقة ان الله تعالى هو المعطي الوهاب المنعم

و طول ما احنا في معية الله

مين ده اللي يقدر يصيبنا بأي مكروه

[Howayda Ismail]

احيانا الواحد بيضطر يكدب بس كدب مش بيضر حد لكن بيحافظ على النعم اللى عندى

لما واحدة تستكتر عليك جوزك واولادك او عيشتك او حتى شكلك اللى ربنا عطوهلك لما واحدة تقارن

عيالك بعيالها خصوصا لما يكونوا فى سنة دراسية واحدة(الموضوع ده بالذات مقروصة فيه جامد)

لما تلاحقك باسئلتها من غير متديكى فرصة تسأليها ولو حصل وسألتيها مافيش غير الشكوى

اظن الرضا اهم نعمة ربنا يديها للناس

على فكرة امثالنا الشعبية بتاعة زمان مكنتش من فراغ واهم مثلين باحبهم فى الموضوع ده

(دارى على شمعتك تايد) و( من بص لعيشة غيره حرمت عليه عيشته )

نسال الله انه يتم علينا نعمة الرضا والقناعة ويحفظنا ويحفظ اولادنا والله خير حافظا وهو ارحم الراحمين

[se_ Elsyed]

خير الأمور الوسط

- يعني لا شكوى مستمرة وإدعاء للفقر والحاجه والعوز وعدم شكر الله زي ما بنشوف ناس كتير على طول تشتكي وعلى طول تدعي الفقر .. وفعلاً ده ممكن يؤدي إلى زوال النعمه وإبتلاءهم بالفقر اللي بيدعوه

- ولا مباهاه ومفاخرة أمام كل من هب ودب .. وبالتالي الإنسان بيجلب على نفسه المشاكل ... خصوصاً إن المستويات بين البشر متفاوته منذ أن خلق الله الأرض ومن عليها إلى يوم القيامة .. وبالتالي لما أقعد أنا أتفاخر على طول باللي عندي واللي ربنا رزقني به .. فمش بأراعي شعور الأخرين خاصةً لو كانوا محتاجين والحاجات اللي بأتفاخر بها دي تكون كماليات او زيادة جداً جداً .. وده ممكن يخلق الحسد .

أما ليه الناس بتحسد ... فممكن تسألي قابيل اللي قتل أخوه هابيل لأن زوجة هابيل كانت أجمل من زوجته ... وكمان ربنا كان بيتقبل قرابين هابيل وما كانش بيتقبل قرابين قابيل لإن الحسد بيملأ قلبه ... فكانت النتيجة إنه أرتكب أول جريمة قتل بين البشر ... وأصبحت سيئة جارية منذ بدية التاريخ إلى وقتنا هذا وكل جريمة قتل تحدث بتلزق في ذنوب قابيل ...

يعني الحسد زيه زي أي طبع سيء في الناس زي الكذب والخداع و و و و

ومستحيل تلاقي مجتمع من الملائكة ...

وفي أمور كتيرة تجلعنا نتقي الحسد منها الأذكار الشرعية وأذكار الصباح والمساء .. وذكر الله بعد كل نعمة

زي ما عمل الصديق في صديقة في سورة الكهف ...

واحد عنده أولاد كتييييير وثروات وحدائق كثيرة وبيتفاخر بذلك بدون شكر للنعمه

فصاحبه بيقول له

" وَلَوْلا إِذْ دَخَلْتَ جَنَّتَكَ قُلْتَ مَا شَاءَ اللَّهُ لاَ قُوَّةَ إِلاَّ بِاللَّهِ إِن تَرَنِ أَنَا أَقَلَّ مِنكَ مَالاً وَوَلَداً فَعَسَى رَبِّي أَن يُؤْتِيَنِي خَيْراً مِّن جَنَّتِكَ وَيُرْسِلَ عَلَيْهَا حُسْبَاناً مِّنَ السَّمَاءِ فَتُصْبِحَ صَعِيداً زَلَقاً أَوْ يُصْبِحَ مَاؤُهَا غَوْراً فَلَن تَسْتَطِيعَ لَهُ طَلَباً :

فكانت نتيجة إعجابه بنفسه وعدم شكره للنعمة " وَأُحِيطَ بِثَمَرِهِ فَأَصْبَحَ يُقَلِّبُ كَفَّيْهِ عَلَى مَا أَنفَقَ فِيهَا وَهِيَ خَاوِيَةٌ عَلَى عُرُوشِهَا وَيَقُولُ يَا لَيْتَنِي لَمْ أُشْرِكْ بِرَبِّي أَحَداً "

لإن المواضيع دي ساعات بتخلي الإنسان ينسى نفسه ويفتكر إن كل ده من فهلوته وشطارته وعلمه .. فبتبقى النتيجة إن كله بيروح وبتفضل له فلهوته وجهله وورينا هايعمل إيه ؟

لكن برضوا معليش

الإنسان مش المفروض يضع أمور الحسد أمام عينيه في كل وقت ويجعلها محور حياته لأن كده هايتعب نفسياً وستصيبه الوساوس وهايشك في كل الناس اللي حواليه ... ويوم ما حاجه تخرب عنده في البيت لأي سبب .. هايلزقها في الحسد وإن فلان كان عنده أمبارح وهو اللي نظر للحاجه دي فباظت وما إلى ذلك من الخرافات اللي بنسمعها كتير .... وده ممكن يفسد العلاقات بين الناس بدون داعي ..

[Howayda Ismail]

تجسيد الحسد فى الدراما المصرية

http://www.youtube.com/watch?v=nnkl1SsMz9I&feature=related

[aboramy]

طيب لو في واحدة ابنتها ماتت وامها معتقدة ان جارتهم هى اللى حسدت البنت لان جارتهم معندهاش بنات كلهم اولاد وهما دايما يلمحوا امامها بانها تحسدهم لدرجة ان زوجتى كانت فى زيارة جمعت الجارتين واثناء الجلسة اتخانق اولادى وكانت زوجتى تعالج الموضوع بحكمة وتقول لهم اسكتوا الان ونتفاهم فى البيت ردت واحدة لما يروحوا البيت هيروقوا وكانت تنظر الى جارتها تقصد انها التى حسدت اولادى المهم زوجتى لم تفهم والجارة فهمت ان الكلام عليها فاستاذنت ومشيت وصديقة زوجتى بعد ما الجارة مشيت قالت لزوجتى اصل الموضوع كيت كيت وانها حسدت حفيدتها وهى السبب فى موتها