ليه بتعمل فينا كده؟؟؟

[لماضة مصرية جدا]

السلام عليكم و رحمة الله و بركاته

ليه كده....هه...(وش طفل بريء بيسال مش اكتر)

عندي عادة اني بحب اقرا الاسماء الي بتتواجد....او اللي كانت موجودة....او اللي عدت قدام المصطبة

و بجد بستغرب جدا من الاسماء.....و مش عارفة اصحابها فين...عشان عايزة اسالهم

النهاردة الصبح بالليل لقيت ايه

"اخر مسجل لدينا: أخطل"

طب ليه....ليه طيب؟؟؟

حد يفهمني....يفهمني حد؟؟؟

هتقولولي معلشي مسجل جديد و متزنقيش عليه يا بنتي و خلينا نربي زبون....ماااااااااشي....

بس يعني هي ضاقت؟؟؟

طب خدوا عندكم الاسم ده كمان "بط جو"

طب ده يعني ايه بقي....يا استاذ بط....او يا استاذ جو....ممكن تنزل م ع السطوح و تكلمنا و تفهمنا ليه الاسم أبو تقفيصة دوت؟؟؟

معلشي يمكن حد هيقولي و انتي ايه اللي حشر مراخيرك في الموضوع

بس حبيت اسال...تفتكروا حد هيجاوبني....؟؟؟

ايوة يا جماعة متنسوش بقي...تقولوا كل سنة و انت طيب للعضو الفاضل...(فاضل عليا شعرة و اعيط ع فكرة)

أسود و تعالب و ارنب.......(يا مثبت العقل و الدين يا رب)

ع جنب بقي

اوعي حد يفتكر اني بتريق...ابدا و الله....بس عايزة افهم مش اكتر

[masraweya]

أخطل ده اسم شاعر كبير

ليس لدي معلومات أخرى

لكن الأسامي .. حرية شخصية .. كان فيه موضوع "اخترت اسمك ليه" ممكن نعمل لهم استدعاء زي كرسي الاعتراف كده

تحياتي

[Simba]

طيب وانتي اسمك لماضة ليه

ليه مش لماضة مصريةبس ولا لماضة مصرية جدا جدا

ولا ليه مش لماضة مصرية بس مش لماضة اوي

[مغتربة]

يا حبيبتى يا لموضه

كل دا شيلاه فى قلبك و ساكته

بصى يا بنتى الاسماء الحركيه دى حاجه كدا بتنبع من مزاج الواحد

يعنى ممكن تلاقى واحد بيحب الجاتو لكن حد تانى مبطقهوش و مابيحبش غير المخلل

حاجه كدا من الى ينطبق عليها الناس فيما يعشقون مذاهب

و ساعات الواحد و هو بيسجل جديد بيدبس فى اسم مكنش بيفكر فيه لحظتها لكن بتيجى معاه كده

زى مثلا انه يكون كان عايز يسجل باسم معين لكنه بيتفاجىء انه اتاخد فيكتب اى حاجه تيجى على باله او يكون مناثر بحاله نفسيه معينه و هو بيختار الاسم و بعدين بعد ما بتروح بيكتشف العمله ( الجميله الى عملها فى نفسه ) و كدا يعنى

لكن كلام علم النفس بقى انه لا شيىء ياتى اعتباطا

كل حاجه بتنبع منا بتكون لاسباب معينه داخليه خاصه بينا ممكن نكون احنا نفسنا مش عارفينها لكن اللاشعور الخاص بنا هو المتحكم الاساسى فى كل شيىء بيصدر عنا من اعظم حاجه لاتفهها

و ان كل شيىء بيدفعنا لعمله او اختياره بيكون لسبب و ان بدا لنا غير ذلك

مع اللاشعور الانسانى

لاشيىء صدفه او غير مفسر ابدا

كان معكم مراسلتكم مغتربه من جنب الفشه و قبل المراره بشويه

[اغابي]

تصدقى يا لماضة انا متاكدة ان كل اسم وراه قصة طويييييييييييلة

وحكاية كبيرة - يمكن احنا واخدين الاسم الحركى قصدى الاسم بطريقة او باخرى على انه غريب

لكن اكيد كل اسم وراه حكاية ومعنى

فاكرين موضوع الاخمخنوق لما فتحنا عليه موضوع وكان حاطط صورة عادل امام فى الهلفوت

اتارى كان ليه حكاية كبيرة اخينا - مخنوق - مستخبية ورا اسمه وقفلت توبيك كبير عريض ومليان مشاركات

عارفة يا لماضة لو تتبنى الموضوع داه انتى اكتر واحدة حتقدرى تديريه صح

ويكون عنوانه مثلا افيشش عريض زى بتوع افلام السينما

انت اخترت اسمك ليه وايه حكايته

انا متاكدة ان الموضوع حيكسر الدنيا

تم تعديل 9 نوفمبر 2010 بواسطة اغابي

[الســـاري]

اغرب اسم مر علي بحياتي كان باحد المنتديات السعودية .. عضو محترم وكتاباته راقية ومهذبة وخفيفة دم

لكن اسمه مصيبة

كان اسمه " احساس ضفدع " ..

يعني ما اعرف ايش ولا ليش اقول بس ..

والاخطل التغلبي شاعر كبير من كبار الشعراء العرب المسيحيين بالعصر الاموي

و كان فيه شاعر لبناني اسمه بشارة خوري لقب نفسه بلقلب الاخطل الصغير ..

عن نفسي .. اعترف اني مصاب بعقدة نفسية من الاسماء المكتوبة باللغة الانجليزية .. وكنت كتبت قبل كدا عن الموضوع دا

غير كدا عندي كلو يهون :happy:

على فكرة لماضة .. ارحمينا شوي من خفة دمك .. لسه كنت قاري مشاركتك بموضوع البنت اللي تتزوج من نفسها وصرت اضحك حتى كدت ان استلقي على قفاي زي هارون الرشيد كدا

stnd::

والله كنت ح اموت من الضحك حتى زملائي بالعمل افتكروا اني استخفيت وهدمتي وقاري

:closedeyes:

كان معكم الساري مراسلكم من قسم كارهي الاسماء الانجليزية فرع الكفلاء الطيبين

[لماضة مصرية جدا]

السلام عليكم و رحمة الله و بركاته

أعزائي المستمعين اهلا و سهلا بيكم في حلقة الليلة من برنامج

"اسمي و انا حرة فيه.....اسمي...انشري و اكويه"

من آراء حضراتكم قدرنا نحط ايدينا علي الرؤية و المنظور المنبثق من اضمحلال اللاوعي في بناء المركب الانساني المعقد

و بالصلاتو ع النبي كده.....

انا فاهمة انها حرية شخصية......و بقدر ده جدا.....بس حبيت انكشكم كده هوت و اشوف بس حد ملاحظ الحكاية دي و لا لا

اللي فاقع معاميعي من جوه....اني فعلا مش بشوف مشاركات للاخوة دولم خالص

و الا كنا بعتنا اتنين عساكر امن مركزي و خطفناهم علي كورسي الاعتراف و هناك كل شيجين هينكشف و يبان (وش عبعال و هو بيكلم حسب الله)

انا متاكدة ان كل اسم وراه مصيبة.....قصدي قصة....و حبيت بس افهم

و الحمد لله رب العالمين....محدش من اصحاب الاسامي القوحافة....رد عليا

في نهاية الحلقة نحب نشكر كل الاخوة المستمعين و احب اقولهم....حاطين ودانكم علي السماعات....يعني قصاد طبلة ودنكم عدل

طب

تووووووووووووووووووووووووووووووووووووت

و احتمال ده يكون اسمي الجديد باذن الله

كان معكم مذيعة الربط من استديو 9...توت...توت.....و بلاش لعب بالنبوت

مساااكم رضا

[لماضة مصرية جدا]

اغرب اسم مر علي بحياتي كان باحد المنتديات السعودية .. عضو محترم وكتاباته راقية ومهذبة وخفيفة دم

لكن اسمه مصيبة

كان اسمه " احساس ضفدع " ..

طب اتفضل.......اهو واحد مسمي نفسه كده....يبقي ايه بقي

بس انا شخصيا هتخيل كده انه الضفدع اللي كان في القصص الكارتونية بتاعت زمان....اللي هو عايش في المستنقع و بعدين الاميرة هتعدي عليه و باين هتديله خمسة جنيه في ايده....قوووووووووووووم ايه يتحول يبقي امير رائع الملامح

هي دي القصة و لا مش هي

و طبعا هنستني استاذ....الضفدع المحسس عشان يقولنا ايه السبب يعني...(وش واحدة واقفة تبص في الساعة و ماسكة الكسرولة و مخبياها ورا ضهرها)

ع جنب بقي

شكرا استاذنا علي المجاملة الطيبة ....جزاك الله كل خير.....ربنا يسعد حضرتك.....بس مش تروح انت تقع في الشغل علي مش عارفة ايه و بعدين تقولهم لماضة قالت.....انا مالي يا عم.....انا في دولة تانية خالص...(وش واحد بيطلع لسانه و بعد كده بيطلع يجري...و لانه بيجري بالعبيط بيلبس في الحيطة)

مسا حضرتك رضا

[لماضة مصرية جدا]

مغتربة.....أغابي

اقعدوا علي الكنبة جنب بعض عشان هكلمكم انتو الجوز

اتصدقوا اني فعلا في التوبيك دوت فكرت اعمل اكتيفتي كده نحط فيه علم النفس و نشتغل فيه اللي قدامنا

هي فكرة ان الواحد بشكل لا واعي بيختار الاسماء اللي ليها دلالة عنده....و بطريقة اسقاطية ما.....يروح قايلها....و كل ما اللي قدامه بينكشه اكتر كل ما بيقدر يعرف عنه اكتر

ع فكرة ده كده ممكن يبقي اكتيفتي هايل الواحد لو في مجموعة جديدة و عايز يتعرف عليهم بشكل جديد

و ممكن نعمله ك icebreaking activity

و ممكن نعمله مع الاستاف بتاعنا في اي اجتماع

دولم هيشوفوا مني اياااااااااااااام.......كلها شبه "احساس الضفدع"

ميرسي كتير علي انكم ساعدتوني اظبط الفكرة

مسااااااكم صواميل متربطة في الدماغ

[لماضة مصرية جدا]

طيب وانتي اسمك لماضة ليه

ليه مش لماضة مصريةبس ولا لماضة مصرية جدا جدا

ولا ليه مش لماضة مصرية بس مش لماضة اوي

بس ع فكرة انا جاوبت علي د ه لما جابوني تثبيت اكتاف علي كورسي الاعتراف...حضرتك بقي مش بتذاكر دي حكاية تانية

ليه سمبا بقي....(وش عيل مبربق عينيه)

===============================

استاذة مصراوية......انا عارفة الشاعر "الاخطل" تقريبا كان بيعمل مناظرات شعرية مع "الفرزدق"...بس استغربت مش اكتر

مساااااااااكم صااااااااافي جدا من غير دهشة

[shawshank]

...انا عارفة الشاعر "الاخطل" تقريبا كان بيعمل مناظرات شعرية مع "الفرزدق"

ده جرير :P

أنا هاجري بسرعة قبل ماتشوفي اسمي :sofa:

[عادل أبوزيد]

رغم ذلك يقوم فريق التنسيق و الإشراف بحذف خمس عضويات جديدة كل يوم نتيجة إختيار أسماء غير ملائمة بمعنى أسماء شاذة أو توحى بمعانى رديئة

ما سبق كان إستهلالا لابد منه

أنتهز هذه الفرصة كل من يريد الإنضمام لأسرة محاورات المصريين أن يختار إسمه بطريقة معقولة .

[Diab]

احلي منتدي فيالاسامي

هو منتدي كوووورة مصرية

بصوا كدة اسامي العضويات دي

كده كفايه

اهلاوي في زمن ميسي

الفول غذاء الروح

حنكوش مفروش

الله عليك تسلم رجليك

ارض التوافق

المراكبي الكتلوني ولو قتلوني :P

تم تعديل 10 نوفمبر 2010 بواسطة Diab

[لماضة مصرية جدا]

...انا عارفة الشاعر "الاخطل" تقريبا كان بيعمل مناظرات شعرية مع "الفرزدق"

ده جرير :P

أنا هاجري بسرعة قبل ماتشوفي اسمي :sofa:

شايفاااااااااااااااااااااااك....و اطلع حضرتك من ورا الكنبة عشان تبقي في مرمي الهدف.... :)

الحقيقة يا استاذ شواكيش.....مش عارفة اشكرك ازاي علي التصحيح ده...جزاك الله كل خير....(منه لله علام الفرنجة اللي بوظلي دماغي و جابلي قفايا قدام و راسي ورا....)

و بالمناسبة دي بقي....(وش عيل مكار)

اسم حضرتك يعني ايه....اوضح افصح ابن

اديني قاعدة اهه و مستنية....(هتطول ورا الكنبة و لا ايه :P )

[لماضة مصرية جدا]

احلي منتدي فيالاسامي

هو منتدي كوووورة مصرية

بصوا كدة اسامي العضويات دي

كده كفايه

اهلاوي في زمن ميسي

الفول غذاء الروح

حنكوش مفروش

الله عليك تسلم رجليك

ارض التوافق

المراكبي الكتلوني ولو قتلوني :P

السلام عليكم و رحمة الله و بركاته

عجبني انا اوي الاسم اللي بالفونت السبعاوي دوت...تحس كده ان صاحبه بيبعت اهداء للجامهور.....الله عليك....تسلم رجليك....آخ منك يا حبيب والديك

و ليه هف عليا المثل الشعبي الفزيع بتاع

من شاف اسامي غيره هانت عليه.......

ع جنب بقي

هو انتو بتخشوا منتديات تانية........بتجيبوا وقت منين....(قوووووووووووم ذااااااااااااااااااكر...و متقوليش اذاكر ايه....اهي كلمة لازمن ااقولها)

[مسافر زاده الخيال]

بعد السلام و التحية

اقول

معلمومة المطارحات الشعرية بين (الاخطل و جرير) صحيحة مئة بالمئة .......لكن مطارحات جرير و الفرزدق هي الاقوى و الاشهر حيث استمرت اكثر من 40 عاما اضافة ان اﻻخطل يفوق جرير والفرزدق عمرا بكثير مما اضعف قوة استفزاز جرير له ومن ناحية اخرى لم تكن ردود الاخطل بالجدية تجاه شاعر من سن احفاده

ومما ذكر عندما سئل جرير هل انت اشعر ام الاخطل فكان جوابه ((لقد ادركت الاخطل وله ناب=كناية عن الاسد الهرم=ولو ادركته ولو نابين ﻷكلني)) و لكن ظل اﻻخطل الاشعر في مجال وصف الشراب والخمر...........

وعودة لموضوع الاسماء المستعارة في المنتديات وبرامج التشات فهي فعلا انعكاس لشخصية و مشاعر الشخص ومن اطرف اﻻسماء المستعارة التى رائيت و سمعت

(مكتف النملة) و monkey in the trees و كان هذا الشخص يعتقد ان هذا الاسم سيجذب الفتيات!!!!!!!!!!

[shawshank]

اديني قاعدة اهه و مستنية....(هتطول ورا الكنبة و لا ايه :P )

دي زنقة وحشة أوي ورا الكنبة...

حضرتك شفتي اسمي ازاي مع إني قلت الكلمتين بسرعة وخدت اسمي في سناني ونزلت جري ورا الكنبة؟ هو أنا اسمي ظاهر أوي كده؟ ده أنا نفسي ماشوفتوش.

شواكيش .. قصدي شاوشنك ... ده اسم سجن في فيلم عجبني اسمه Shawshank Redemption وهو اللي جه على بالي لما جيت أسجل. ودي أكيد بتحصل كتير زي ما تفضل الزملاء.

ع جنب بقى (وش لماضة مصرية جدا) :P

حضرتك قولي بقى ... اعترفي ... أفصحي ... أبني ... أوضحي ... فسري ... معنى اسمك ايه؟ أنا مبحبش كراسي الاعتراف :P

وفيه سؤال أهم ... ليه خليتي "علـــــــــى" تبقى "ع" ؟ بتوفري حبر في الكتابة؟ :D بتفكريني بالموضوع القديم ده.

عارفة يا لماضة لو تتبنى الموضوع داه انتى اكتر واحدة حتقدرى تديريه صح

ويكون عنوانه مثلا افيشش عريض زى بتوع افلام السينما

انت اخترت اسمك ليه وايه حكايته

ياااااااااااااااااه (وش المارد في فيلم طير انت) فكرتيني بالمواضيع القديمة...

اسمك ليه .. !!

نعرف بعض أكثر