أشكفة مصرية متغربة و MaYousof

[Scorpion]

الأستاذ عادل عملها ... و في خبطة واحدة عمل عقد احتراف لأتنين من اللعيبة التقال قوي ...

مدام مصرية متغربة في خط الوسط ... و محمد يوسف فرود و باك يمين ... قشطة ...

شكلها فيه حفلة و أخيرآ حناكل الطورطة و الجاتوهات و البسبوسات ...

اما الحق اخدلي مكان جنب الترابيزة قبل ما مدام فولانة تكوش علي كل حاجة زي كل مرة ....

ايه ده .. ده الفريق كله أولريدي متجمع ...يا ساتر .. كل مرة يبقي فيها أكل تلاقيهم جم هوا ...

متجمعين عند النبي يا جماعة ...

عالعموم الأتنين يستاهلوا كل خير بصراحة ...

نطفي النور بقي ... و اول ما يخشوا الأوضة ... نولع فيهم ... قصدي نولعه و نعمل هيصة و زمبليطة .. يتخضوا يقوموا سايبين المحاورات كلها ... أقوم انا واكل كل اللي عالترابيزة ...

أستاذ .... ( وش وديع و هو بيهزلي راسه )

[Folana]

السلام عليكم ورحمة الله....

أنا عصافير بطنى نونوت..فين الاكل...قصدى فين المشرفين الجدد..اياك يكونوا جايبين معاهم مصروف زيادة علشان العيد بقى ونركب مراجيح وكدهوك...

وكما قال الرفيق الصديق الركن المهيب سكوربيون السرياقوسى ، نحب نشجب ونندد...ايه...مش دى؟...أمال؟

اه ..طيب..

نحن نتشرف بوجود قطبين..بل كوكبين..بل قمرين ..بل نجمين..من نجوم المحاورات معنا فى الغرفة الزرقاء..

اختنا الحبيبة مصرية متغربة

واخونا العزيز مصرى مش متغرب محمد يوسف..

ونحن اذ نتمنى لكم اقامة سعيدة بيننا ...

كفاية كده؟..

اتفضلوا معانا....

[Alshiekh]

يافتاح ياعليم يارزاق ياكريم

يعنى الحفلة دى فيها عشاء والذى منه ، طيب أنا الساعة حتبقى عندى 12:30 ظهرا ، ولو استنيت لما تبقى 8:30 عندى يبقى الأكل حيبرد ، وحتكونوا نمتوا انتوا كمان ، أنا عارف انها مش حاتفرق مع سكوب ولا مدام سلوى ، الفرق كله ساعتين ، لكن انا 8 ساعات.

طيب إيه رأيكم تبعتوا لى تذاكر الدعوة على أى مطعم فخم عندنا هنا فى أمريكا وابقى اتعشى انا على مهلى.

بالحق ، هى العزومة على مين؟ مين اللى شايل الليلة يعنى؟

عموما ماحدذ يقلق ، أنا كنت باهزر ، أنا حابقى مجهز شوية حاجات هنا علشان اشارككم الاحتفال من ارض الكفاح فى امريكا الشمالية محافظة الولايات المتحدة.

وأهلا وسهلا بالمشرفين الجدد مدام مصرية متغربة والاستاذ محمد يوسف ، ونتمنى لكم كل التوفيق .

[Salwa]

ايه ده ايه ده ايه ده؟؟؟

ايه النور ده كله ..

ياتلتميت مرحبا ..تلتميت ايه؟؟؟

ياترليون مرحبا بكما .

حللتما اهلا ونزلتما سهلا ....(( صلحها يابتاع العربى . صلحها يابو جونيور ...مش حضرتك برضه تخصص لغة عربية ؟؟؟ ))

بجد يعنى والله شئ يفرح القلب .

وكويس انى دخلت انهاردة ..بالصدفة .المقصودة تكون مش مقصودة ...

متجمعين ف الخير دايما يارب ...

سنة جديدة سعيدة عليكم جميعا ان شاء الله ..

بشرة خير والله وحاجة تفرح القلب ..

مرحبا بوجودكم معنا ويارب تكونوا مبسوطين .. :clappingrose: :clappingrose:

[Scorpion]

شوفوا يا جماعة ... مدام سلوي كان قصدها تقولكم

عَظِيمَيْـنِ فِي عُلْيَا مَعَدٍّ هُدِيْتُمَـا

وَمَنْ يَسْتَبِحْ كَنْزاً مِنَ المَجْدِ يَعْظُـمِ

حد ينده بقي علي ابو محمد يشرحلنا احنا بنقول ايه ....

[م تيمور المراغي]

ابارك لاثنين من اوفر الناس جهدا في المحاورات ,,

والشكر موصول للادارة الكريمه على حسن اختيارها دوما ,,

[masraweya]

ألف ألف مبروك

ده مش تشريف يا أفاضل .. ده تكليف

و أعباء و مراجعات و مواضيع تتقفل و تتضم

ربنا يكون في عونكم

و يسدد خطاكم

قولوا آمين

[الســـاري]

الف الف مبروك للعضوين الفاضلين .. وبحق يستاهلوا كل خير

الكريم محمد يوسف .. عضو نشيط .. تتميز مشاركاته بالثقافة والمعرفة بمختلف المجالات .. هو بحر من المعلومات .. والاجمل انه يجيد عرض مشاركاته باسلوب رشيق خفيف يصل مبتغاه وهدفه للقارئ بسهولة

والاخت مصرية مغتربة .. مجتهدة ونشيطة ومتابعة لكل المواضيع و تتميز القرب من الاعضاء ومشاركاتهم .. كما انها تتواجد باستمرار في المنتدى

كل التوفيق لهما في المهام الاشرافية الجديدة .. والشكر موصول للادارة على حسن الاختيار

[شريف مان]

مليار مبروووووووووووووووووووووووووووووك

اختيار ممتاز من الادارة وكنت أتمنى يكون نايت مير معاهم كمان .. عشان نشوف تغيير فى الادارة

بدل سكوربيون وسى السيد اللى زهقونا دول:P

[أسد]

مصرية متغربة

MaYousof

هما قلمين من الأقلام المتميزة في محاورات المصريين

من العقليات المهمة .. والذين يحملون أفكاراً معتدلة وثقافة ...

أتمنى لهم التوفيق من كل قلبي

[se_ Elsyed]

عيدنا دلوقت بقى تلاته في واحد

عيد الأضحى المبارك أعاده الله علينا بالخير واليُمن والبركات

وعيد ميلاد القائد سين سين حفظه الله ورعاه واعانه علينا وعلى اللي جابونا

وعيد إختيار مشرفين جدد من أجل مستقب أولاد المحاورات

معليش انا بعافيه شوية ... مفلوز ... هاخف بإذن الله وأرجع اعمل أفرح معاكو واعمل حركات

[م تيمور المراغي]

سلامتك يا س وكل سنه وانت طيب

[أبو محمد]

الفاضلة "مصرية متغربة" من الأقلام الهادئة .. قلم سهل ممتنع .. تفكير هادئ .. ثقافة واسعة .. تجيد مواجهة المواقف الصعبة بهدوء أحسدها عليه أحيانا..

الفاضل "MaYousof" قلم متدفق .. موسوعى .. جرئ بغير اقتحام .. واسع الأفق

كوكبان من ضمن كواكب كثيرة تملأ جنبات "محاورات المصريين" .. كل كوكب من هذه الكواكب جدير بتحمل المسؤولية .. ولولاهم بيننا لتحول هذا الموقع إلى ما يشبه "السيرك" ..

أنا سعيد بعضويتى فى "محاورات المصريين" .. سعيد بعضويتى فى فريق رائع يأخذ على عاتقه مسؤولية تهيئة الجو الصحى لكواكب "المحاورات" حتى لا يتوقف تدفق أفكارهم الراقية

نهنئ أنفسنا بتقدم الكوكبين "مصرية متغربة" و MaYousof للمشاركة فى حمل المسؤولية

[لماضة مصرية جدا]

السلام عليكم و رحمة الله و بركاته

مباااااااااارك....يا مصرية متغربة

ازرقيتي يا شابة

و مبارك يا استاذ ما...يوسف....عقبال البدلة الحمرا....قصدي عقبال لبس الاحرام لبيت الله

ع هامش المؤتمر

مين مسك....ايه.....و مين ساب ايه؟؟؟

سؤال اخو السؤال اللي فوق

الازرق خلاص عرفناه

ليه الادفيزور اللي هو استاذ عادل....مرة بيبان احمر و مرة بيبان ازرق....

و ليه ناس تانية بتبان اخضر....

و ليه انا ببان اسود ....انا عايزة لوني يبقي فوشيا...(وش عيل بيخبط برجله في الارض)

اقتراح البنات يتعملها لون بينك...او فوشيا ديجراديه...و الولاد يتعملوا انفيزيبال كلور...(ضحكات شريرة من الاعماق)

مساااكم بلتة الوان

[لماضة مصرية جدا]

معليش انا بعافيه شوية ... مفلوز ... هاخف بإذن الله وأرجع اعمل أفرح معاكو واعمل حركات

أنف سنامة عنيك يا استاذنا (و ده صوت حد اخنف اخر حاجة)

مستنيني الحركات...و يا ريت تبقي حركات و ساندوتشات

هو البوفيه منين؟؟؟

انا حاسة اني بسال السؤال ده في كل توبيك و محدش راضي يرد عليا

[لماضة مصرية جدا]

بدل سكوربيون وسى السيد اللى زهقونا دول:P

أوبااااااااااااا

الجملة دي هتفضل ترن في ودني من هنا.....لغاية هنااااااااااااك

طب دعني اشد علي ايديك و احيك...

و اقولك....

و الله و هيبقي ليك وحشة يا استاذ شريف....مين هيتعصب عليا في التوبيكات....(بهزرحضرتك....و لو اتعصبت....خد دي... )

[المهندسه]

الف مبروك لمصريه متغربه ومايوسف على الاشراف ...وكل سنه وانتم طيبين و عيد مبارك عليكم

و نشكر الاداره على اختيارها الموفق و نتمنى من الادراه اضافه الاخ نايت مير ايضا الى قائمه المشرفين.

[doha]

ياخبر ابيض .. اغيب عن المحاورات ثلاث اربع ساعات ارجع الاقي اثنين تغيير وزاري خبطه وحده ..

واحلى مافي الموضوع انه منسيش كوتة المرأة .. على اعتبار طبعا ان الي داخل الاشراف جديد ميعرفش الي فيها وانه داخل على طفح من الكوته برضه ..

الف مبروك ياجماعه عليكم وربنا يعين متغربة وميم يوسف على الاشراف علينا اصل انتم عارفينا مصريين صنف نمرود خساره في الي بيحكمونا وربنا يصبرهم علينا ..

وبمناسبة التعيينات الجديده حد ينزلنا بتتر .. يختي عليها يختي عليها .. جات رجليها ماجت رجليها ..

شدوا الحيل ونشوفكم باذن الله بعد سنة من دلوقت كده ان كان لنا ولكم عمر تحدثونا عن .. هول التجربة ..

[أشرف حليم]

ألف ...ألفين .... و مليون مبروك

للمحاورات

و لنا

وللأفاضل

أ. مصرية متغربة

وأ. محمد يوسف

و أمنياتى بالنجاح و التوفيق

[om marawan]

اييييه ده وانا اقول ايه اللى حصل واشكفوهم ليه ودخلت على ملا وشي اشوف الناس الجدعان متأشكفة ليه وافك الحبل ونهرب كلنا

الاقي الموضوع اشراف

هييييييييييييييييييييييه

شوفوا انا اول مرة تقريبا اكتب من اول المنتدى مابقا بالاصدار الجديد وكنت جاية اعيد معاكم لقيت بجد العيد فرحة

انا بجد مبسوطة جدااا

مصرية انسانة راااااااائعة بكل المقاييس ومثل أعلى ... ومثال بجد اتمنى انى احتذى بيه شخصيا من نفس طيبة وقلب كبير وعقل راجح ورأى موزون وشخصية سوية محترمة ومثقفة ومهذبة ربنا يبارك فيها ويحفظها ويحفظ اسرتها الجميلة من كل سوء

وما يوسف طبعا اخ اصغر سنا وان كان اكبر علم وثقافة وحكمة ربنا يزيده يارب

اتمنالهم التوفيق وهم اضافة لباقة عبقة من المشرفين المحترمين اللى بجد من اهم اسباب نجاح المنتدى

خالص تهانينا وعيد سعيد على الجميع يارب

نيجى بقا للكلام الجد

موضوع الريبيوتيشن ده كل واحد فيكم يا مصرية ويابويوسف يحطلى من عنده قد تلاتين خمسين سبعين كده

المهم يووم والتانى والاقى الريبيوتيشن منورة بالفونت اكسيلانت جدااا ماااااااشي

هالف بقا لفة فى المنتدى وارجعلكم تانى على ماتعلم الحاجات الجديدة عليا اللى فى الاصدار

باقولك ايه يامصرية ماتدينى يا أختى التوك توك بتاعك اللى سلمهولك مع الاشراف عشان الف بيه شوية فى المنتديات وقوليلهم بعته يتركب له جنوط سبور