شوية رفايع

[أشرف محمد شلقامي]

شوية رفايع

ف شنطة همومى

معاى ف أمسى وبكرة ويومى

ف صحوى ونومى............ف صحوى وغيومى

ف بعدى وقدومى

شوية رفايع ف شنطة هدومى

********

أبو رجل مسلوخة و أم شوشة والبَعوّ ف كُل ليلة

، والمقصّ ف إيد مزين ........ تحت إيده مالي حيلة

والتمرجى أبو إيد تقيلة

والغفير أبو إيد طويلة

و "الفَلقَة " ف كُتّاب سيدنا

لو فكرت ما أجيبش " خميسى " .....تبقي وقعة سوده نيلة

ولسع النار بالمعلقة قبل النوم

والجلدة عزيزة المسقِّية بزيت محروق

ف إيدين أستاذ

لو ضاقت ف عنيه الدنيا

ف ثانية بيقلب عشماوى

*****

لمّا صعبت عليها الشنطة قالت لى :

بتلملم ليه ف بقايا قزاز مكسور

ف بقايا ألوان بهتانة

ف بقايا دموع نشفانة

ليه غصبن عنها عايزها تخش معاك برواز

وتشكل لوحة لحلم حُمار جوّاك

سبقك " على بابا " وسابها وسابك......

مزنوق

كما زنقة كلب ف جامع

وقت صلاة العيد !!!

مهما تحاول أو تتحايل

حالك زي أيامك مايل

مهمن تقلق مهمن تصبر

مش راح تقدر إنك تقدر ....تعدل حال الحمل المايل

خدت كلامها ف جنبى ف قلبى

كأنه طعنة خنجر

وحدفت ف حنكى " سفة " مُر

و " سفة " حنضل

******

على كتفى الشنطة

والسلك الشايك شابك طرف أحلامى

ومفيش قدامى

غير إنى أبص ورايا!!!!!

[م تيمور المراغي]

السلام عليكم اشرف بك ,,

هل حضرتك ( ضيف مسافر ) اللي كتب القصيده دي في منتدى الجيران من اسبوعين ؟؟

لك كل الموده ,,

[أشرف محمد شلقامي]

السلام عليكم اشرف بك ,,

هل حضرتك ( ضيف مسافر ) اللي كتب القصيده دي في منتدى الجيران من اسبوعين ؟؟

لك كل الموده ,,

السلام عليكم ورحمة الله وبركاته .

كل عام وأنت بكل الخير وبالخير كله .

نعم أنا المذكور أعلاه الكاتب فى الموقع إياه.

ولك جمّ تحياتى ومودتى .

أخوك / أشرف محمد

[م تيمور المراغي]

صح لسانك والله وسلمت يمينك ,,

وقصيده من اروع ما قرأت في الفتره الاخيره ولانزكيكم على الله ,,

[لماضة مصرية جدا]

السلام عليكم و رحمة الله و بركاته

آخر النهار

شوية رفايع

طاقة عفوية جدا بتطلع في كلمات منتقاة جدا....بتتسلل للقلب كده و تسيبه في حالة خدر

حالة تامل محببة جدا

شوية رفايع

يا تري بجد في شنطة السفر بناخد شوية رفايع؟؟؟

و يا تري اللي بنشوفه احنا "شوية رفايع"....غيرنا بيشوفه أيه؟؟

مش يمكن "الرفايع"...التفاصيل الصغيرة اوي دي....ليها ذكريات...حكايات....ليها ترنيمة محدش يعرفها غير اصحاب "الرفايع"

كلمات حضرتك...خلتني...ابص في شنطتي

و الاقي جواها...حقيقي

"شوية رفايع"

فيه كلمة من اربع حروف...."شكرا"

بس الاحساس اللي بيوصل للناس مش لازم يتشكر....لازم كلماته تفضل ترن...عشان العقل يفضل شايل الكلمة و يفكر

تحياتي...من اعماقي

استاذي

[أشرف محمد شلقامي]

لماضة مصرية جدا / السلام عليكم ورحمة الله

كل عام وأنتِ بكل الخير وبالخير كله

الشجرة الكبيرة الكبيرة في الطريق من بيتنا إلي المدرسة ، كلنا يراهاكُل صباح !!!

عمي الطيب ( بياع الفول ) كلنا نقف أمام ( قدرته وفولها )كُل صباح !!!

استاذ اللغة العربية كلنا يسمع صوته في إذاعة الصباح كُل صباح !!!

ولكن ..........

ليس كل المارِّين أما الشجرة الكبيرة الكبيرة ....

يرون كم عشُاً بناه العصفور الغريب ، وكم عشاً سقط بفعل الريح !!!!!!!!

....

ليس كل من يقف أمام الطيب ( بياع الفول ) يعزيه في آخر ضرس أخذته شمس الشموسة !!!!

ليس كل من يسمع استاذ اللغة العربية كُل صباح ،يتأمل أزرارقميصه بأنها ليست لونا واحداً!!!

إنها التفاصيل التي لا يراها إلا من ذاق وعرف

لماضة مصرية جداً ، أنا سعيد جدا لأن في حقيبتك ( شوية رفايع )

لاتدعي البرواز يغادر صورته !!!!

اسمحي لي أن أضف كلماتك الرائعة النبيلة إلي رصيد ( شوية رفايع )نفسي وأجرك علي الله

تقبلي شكري المكرور علي رؤيتك (آخر نهار )

لكِ خالص تقديري واحترامي ومحبتي