أيهما تفضل.. مشروع خاص ،، أم راتب ثابت ؟؟

[الغريب]

صراحة هذا الموضوع دوما يسبب لي بعض المعاناة الفكرية

أيهما أفضل : هل مشروع إستثماري خاص يفجر طاقات الإبداع لديك ويجعلك في متناول السوق والحياة اليومية، هذا المشروع أي كان محل أو شركة ولكني أقصد منه الإستمتاع حينما ترى ثمرة جهدك وإبداعك.

أم تفضل راتب ثابت يشعرك بالدفء ، ويعينك على نوائب الدهر :) دون دوشة أو إنزعاج ، دون تأثر بأحوال السوق والبورصة والمشاكل الاقتصادية

في رأيكم يا جماعة أيهما الأفضل من وجهة نظرك الشخصية ، ومن وجهة نظر الإفادة المجتمعية أيضا ؟؟

شكرا لمشاركات أهل الخبرات مقدما :closedeyes:

[nightmare]

في رأيكم يا جماعة أيهما الأفضل من وجهة نظرك الشخصية ، ومن وجهة نظر الإفادة المجتمعية أيضا ؟؟

شكرا لمشاركات أهل الخبرات مقدما :closedeyes:

أخي الغريب , الموضوع نسبي ويختلف من شخص لآخر حسب طموح كل فرد ومؤهلاته وخبراته.

لكن من وجهة نظري المتواضعة , لو هناك مشروع مدروس كويس ومضمون بإذن الله نجاحه الى حد كبير ولديك خبرة في كيفية إدارته ودارساً لكل مقومات السوق واحتياجاته , واحتمالية الخسارة لا قدر الله ضئيلة وانت من ستقوم بإدارته وليس أحد غيرك, ولديك مقومات مادية تستطيع ان تغطي نفقاتك لفترة حتى يقف المشروع على قدميه.

إذاً توكل على الله فالمشروع الخاص أفضل بكل المقاييس , فأنت تبنى شيئاً لنفسك أولاً ولأولادك وأحفادك مستقبلاً وبعد عمر مديد ان شاء الله

المشروع ملكك وانت صاحبه وليس أحد غيرك , وانا شخصياً أمنية حياتى ان يأتى اليوم الذي لا اعمل فيه عند أحد وأن يكون وقتى وجهدي لمشروعي الخاص الذي يكبر أمامى مع مرور الوقت.

شوف الفيديو ده كده وهتعرف ليه ده رأيي, مع تمنياتي لك بكل التوفيق والنجاح فيما تختار.

http://www.youtube.com/watch?v=0RHWTD6weWg

مع تحياتي

[عبير يونس]

أجاوب على السؤال ان لكل شيء ميزاته و عيوبه

و هذه الميزات و العيوب تختلف من شخص لآخر

فما أره ميزة قد تراه حضرتك عيبا و العكس صحيح

ما يناسبني قد لا يناسب غيري

و قطعا ما يناسب غيري قد لا يناسبني

في ناس بتحب المغامرة والمخاطرة و بتلاقي نفسها فيهم

و ناس بتحب الاستقرار و الثبات و تشعر بالضياع دونهما

و كما قال الفاضل نايت مير

كل واحد و حسب وظيفته و تخصصه

يعني عن نفسي مثلا معلمة لغة انجليزية في معاهد اللغات

جت عليا فترة ولادي كانوا محتاجين لي في البيت

فقعدت في البيت و اكتفيت بدروس خصوصية في بيتي و ترجمة في بيتي برضه بالتعامل مع أفراد و مكاتب و التسليم عن طريق النت

ده طبعا مكانش شغل ثابت

و كان له مواسم

ممكن شهر يبقى عندي شغل كتير جدا مش ملاحقة عليه

و شهور تانية بأنش

ماديا كان غير ثابت و لا يعتمد عليه كدخل اضافي للأسرة

يعني اتوجد اتنغنغا

و ما اتوجدش ادينا على دخل زوجي

لكنه بالمقابل مخلليني جوة البيت

و اقبل و أرفض براحتي

و أعتذر براحتي

أما شغل المعاهد فطبعا مستقر ماديا و مفيهوش فصال و أخد و رد و تهرب أحيانا من الدفع أو تأخيره كما يحدث في التعامل مع أفراد

بس فيه طبعا دوام و خروج و مصاريف على المظهر

كل واحد و ظروفه و احتياجاته في فترات حياته

[لماضة مصرية جدا]

السلام عليكم و رحمة الله و بركاته

يمكن استاذي انا مش من اهل الخبرة بس اسمحلي اتشارك بوجهة نظر المتواضعة

موضوع حضرتك مهم جدا.....اتهيالي في بداية قراية الموضوع ان ممكن السؤال ده بيساله واحد لنفسه لما بتمر بيه مثلا فترة من الوقت و هو بيشتغل نفس الشغلانةو بعدين يقف مع نفسه كده و يسالها انا رايح فين...و ايه اخرة ده كله؟؟؟

و بعدين لقيت ان السؤال ده اصلا لازم كل واحد يساله لنفسه و هو لسه بيخطي و بيشمر و بينزل الشغل لاول مرة

عارف ليه يا استاذي

عشان يفكر نفسه كل شوية.....أنا حلمي ايه

و حلمه ده هو اللي هيخليه يحط هدف واضح قدامه....و مهما اتكعبل يفضل يعافر و يقوم تاني

انا شخصيا

هشتغل لمدة معينة باذن الله...عشان اقدر اكون و اكوم راس المال اللي اقدر ابتدي بيه حلمي الخاص

راس المال كان ممكن احصل عليه بطريقة سهلة جدا من الاهل ربنا يعزهم....بس لاعتبار شخصي عندي حسيت ان مهمة الاهل انتهت معايا و بزيادة كمان لحظة تخرجي

و بدا ليا ان الواحد لازم يفتش عن حلمه جواه

لما ابتديت اشتغل....اكتشفت اني ككائن و كتركيبة مبستحملشي اي وظيفة لاكتر من سنتين...و لما باجي علي نفسي بتبقي 3 سنين

السنة الاولي بفهم مفاتيح الشغل

السنة التانية ببتدي اطور و اضيف

السنة التالتة ببتدي افتش عن مرحلة جديدة..(وظيفة تانية)

فترة الشغل بالنسبة ليا مؤقتة جدا......و بعد كده باذن الله هبتدي حلمي الخاص...أينعم هو حاجة مش هتكسر الدنيا...بس حاجة انا مصدقاها اوي....و كان لازم ليا خبرة...و فلوس عشان ربنا يقدرني و احققها باذن الله

اللي ممكن يكتف الواحد انه ياخد قرار زي ده...لما بيكون عنده التزامات اسرية

و عشان كده متفقة جدا مع استاذ..."خير اللهم اجعله خير"....ان المشروع لازم يكون مدروس

حلاوة تحقيق حلم.....متهيالي هتبقي حاجة تستحق المغامرة

كفاية الواد يعمل حاجة نفسه فيها.....حتي لو ما صابتشي.....بس برضه اهه اسمه عملها

دي وجهة نظري المتواضعة....مع اني مش من اصحاب الخبرة

بالتوفيق يا رب

تحياتي

[م تيمور المراغي]

على الخبير وقعت ان شاء الله ,,

اياك ,,

عارف يعني ايه اياك !!

ان تترك الراتب الثابت ,, مهما اطمانيت وضمنت و ادخرت ودرست وتاكدت ,,

عاوز تغامر وتجرب مافيش مانع ,,

لكن اترك على الدوام خط الرجعه والارض تحت قدميك وانت تغوص في الغيب ,,

ويا سلام لوتقدر توفي بين الاثنين

يعني راتب ثابت + مشاريع جانبيه السوق نام والدنيا وقفت نرجع لحضن الراتب الحميم الحبيب الدافيئ

و لله الامر من قبل ومن بعد ,,

[ذهبية]

ان يكون لك دخل ثابت بعيد عن التقلبات و غدر الزمن دى نعمة كبيرة قوى لابد من الحفاظ عليها و عدم التفكير حتى فى خسارتها

الفكرة بقى فى طموح الانسان الحاجة اللى عمالة تقرصك و تبوظ عليك احساسك ان دايما فية حاجة ناقصة هى دى بقى المشكلة

ازاى تقدر تتعايش مع احساس زى دة ممكن جدا يفسد عليك احساسك بالرضا الداخلى اللى المفروض تحمد ربنا علية

دة بقى اللى مختلف من انسان لانسان

امتى اخد القرار انى ابدا طموحى الخاص لما تتوفر كذا نقطة

اولهما عدم المغامرة بالمرتب الثابت ابداا مهما كان و خلق وقت كافى لاشباع طموحى حسب ظروفى بالشكل اللى علية دة

لما يتوفر ليا جزء من المال بعيد عن حساباتى يعنى لو خسرتة مش هازعل علية

لما اجمع كل المعلومات الكافية مما سبقونى فى مشروعى وعلى اساسها هاحكم على نجاح او فشل المشروع

لما اختلف عن الاخرين و دى نقطة هامة جداااا لو ماختلفتش عن الاخرين يبقى اقعد فى بيتى احسن و اكفى خيرى شرى و احافظ على القرشين لولادى

ازاى اختلف دى نقطة الابتكار اللى بتخلق منك واحد صاحب مشروع مختلف فى الاسلوب فى الدعاية فى المنتج فى السعر

اجمع المال الخارج عن احتياجك اجمع كل المعلومات اسال ذوى الخبرة اعمل دراسة جدوى حدد هدفك ابداااا

بمجرد ما بدات و دارت العجلة كمل ولا تتوقع النجاح من اول معركة ادخل المجال للتعلم لا تتوقع المكسب فى الاول مكسبك خبرتك

خيرتك هتجيب مكسبك بس مع الوقت

و انا رغيت كتير ربنا يوفقك للصالح لك

[اغابي]

غريب

شوف - بقى لو المشروع مش مدروس له كويس - حيخسر معاك وخسارته حتدمرك

ولو مرتب ثابت بتبقى موظف ما لهوش اى طموحات غير انه ياخد مرتبه اخر الشهر

وكل حياته بتصاب بشلل نتيجة الملل اليومي

شوف طموحك ايه وتقدر تغامر ولا لاءة - عندك روح المغامرة ولا مش جواك - هو داه الدافع الاول لنجاح المشروع

انا عن نفسي - بحب المشروع حتى لو صغير

تحياتى