أمل و عمر*و نرجس و القطه بسبس*صور من كتاب القراءه الرشيده

[زهرة الجبل]

لا أعرف إن كان هنا من يشاركني هذا الحنين الجارف لكل ما يذكرني بالماضي و طفولته و هدوءه و براءته و بساطته و كل ما فيه

إنتابتني حاله غريبه من كوكتيل مشاعر لا يمكن وصفها بكلمه واحده عندما رأيت صور كتاب القراءه الرشيده على النت

حاله ذهبت بي في رحله إلى مدرستي الإبتدائيه حتى أنني تذكرت وجوه بعض زميلاتي وقتها

و تذكرت كذلك وجوه بعض المدرسات و تذكرت ناظر المدرسه الذي كنت أحبه و أحترمه جداً

تذكرت تفاصيل كثيره قد تكون صغيره جداً لكنها كانت كفيله بإدخال السعاده و السرور على نفسي

تذكرت شكل الزي المدرسي الذي كنت أرتديه في الإبتدائيه .. المريول الكحلي و الكولون الأبيض و الكوله البيضاء

كان هناك ما يسمى بالكوله .. مش عارفه حد هنا عارفها و لا لأ ؟

كانت تلبس حول الرقبه كأنها ياقة قميص لكن أكبر بقليل و يجب أن تكون ظاهره بلونها الأبيض الجميل فوق المريول الكحلي

كانت أمي ربنا يمسيها بالخير .. صنعت لي واحده بإبرة التريكو بإيديها .. كانت عندي غيرها أكتر من واحده جاهزه مصنوعه من الدانتيل الأبيض ..

لكنني كنت أحب تلك التي صنعتها أمي بيدها .. و أفضل أن أضعها أكثر من الأخريات

شعرت أنني شممت رائحة هواء الصباح الذي كنت أحب عبيره صباحاً و أنا أنتظر سيارة المدرسه ..

تذكرت المكتبه الصغيره التي بجوار مدرستي و التي إعتدت أن أشتري منها قصص الأطفال المصوره الصغيره

تذكرت دفاتري التي كانت تطلب منا المدرسات تغليف كل ماده بلون

كان اللون الأزرق للغه العربيه و الأحمر للحساب و الأخضر للأنشطه و الأصفر للإنجليزي

كأن الكتاب كان مفتاح قديم عثرت عليه بالصدفه و فتحت به صندوق ذكريات غني جداً ..

صندوق لم أكن أتذكر ما به من ذكريات إلا أنه بمجرد فتحه أخذت الذكريات تتوالى و تقفز إلى ذهني كأنها تتسابق للفوز بالعوده إلى ذاكرتي

صور صفحات الكتاب بكل ما فيه بداية من الغلاف و حتى الفهرس مروراً بالدروس الجميله البسيطه

و الصور الجميله و الشخصيات التي إكتشفت فور رؤيتها أنها (( وحشتني قوي بجد )) و كأنها شخصيات حقيقيه

أمل و عمر و نرجس و القطه بسبس .. صور الأم و الأب و المعلمه .. صور الخال و الحقل و الجرن

تعالوا نتذكر سوياً ذكريات الطفوله و نتصفح الكتاب الذي أثارت صُـوَره على النت في نفسي رغبه كبيره جداً و أمنيه لا أعرف كيف أحققها في أن أمتلك الكتاب مره أخرى في يدي

سأضع هنا بعض الصور كبدايه .. و سأنتظر منكم إستعادة ذكرياتكم الجميله عن هذه المرحله التي لا أعتقد أن هناك من لا يهفو لها

تذكروا و شاركونا هذه التفاصيل الجميله المرحه و المفرحه

و سأتابع وضع الصور على فترات

تحيتي للجميع

[زهرة الجبل]

صورة غلاف الكتاب

جوله داخل الكتاب ... و الدرس الأول

الدرس الأول كلمه واحده مكرره ( أمل ) شوفتوا الحياه كانت جميله إزاي ؟

بقية الدرس الأول

لاحظوا خط التلميذ .. أصبح تاريخ ... تخيلوا إحساسه لما يشوف إنهرضه خطه و هو طفل

بقية الدرس

تم تعديل 19 نوفمبر 2010 بواسطة زهرة الجبل

[زهرة الجبل]

الدرس الثاني

بقية الدرس

شايفين الحياه جميله إزاي ؟

حاجه بسيطه خالص

هات الكرة .. خذي الكرة ... الكرة جرت

بس خلاص

**************************

منتظره ذكرياتكم و حكاياتكم حتى أكمل بقية المنهج ... قصدي صور الكتاب

أم كريم

تم تعديل 19 نوفمبر 2010 بواسطة زهرة الجبل

[Howayda Ismail]

بصى يامدام زهرة انا اكبر من حضرتك شوية يمكن اختى الاصغر منى لحقت امل وعمر

بس على ايامى انا كان عادل وسعاد وحدث لهم تطور بعد كده زى دلوقت على مااعتقد بسمة وامير

لكن فى النهاية انا حسيت بكل كلمة حضرتك ذكرتيها وده حصل معايا فعلا من يومين لما قابلت مدرستى

فى الابتدائى من اكتر من 30 سنة ووجدتها لسة فكرانى من اخر مقابلة معاها من 6 سنوات وقابلتنى بشوق وحب

حتى اولادى واولاد اختى فى الجامعة استغربوا من حرارة السلام بينا واستغربوا اكتر انها مدرسة الابتدائى

والسبب ان حبنا واحترامنا للمدرسيين زمان وقبل ده احترام المدرس لنفسه وتلاميذه مختلف تماما عن دلوقت

وكان السبب الرئيسى فى فقدان هذا الاحترام كارثة فيلم ومسرحية مدرسة المشاغبين التى افرزت جيل قليل الحياء

والاحترام للمعلم بل للاباء احيانا بما نشرته من سم فى العسل من انحطاط قيمى واخلاقى ضيع اجيال باكملها

المهم يامدام زهرة لما قابلت مدرستى مر شريط الذكريات فى خيالى فى لحظات دون سابق انذار كما حدث لحضرتك

مرورا بالاعدادى والثانوى وانا باحمد ربنا انى تركت ذكرى طيبة فى نفوس مدرسى وزميلاتى فى جميع المراحل

وسوف تتعجبى انى لى من كل مرحلة صديقة انتيم حتى الان نتزاور ونتقابل من الابتدائى والاعدادى والثانوى

رغم ان منهم فى محافظة تانية بعيد عنى الا انها اصرت على شراء سكن لحين نزولها لمحافظتنا بجوارى

انا نفسى علاقة التلميذ باستاذه تتحسن زى الاول بعيدا عن التعاملات المادية التى اهدرت كرامة المعلم

حتى امام تلميذ الابتدائى وفقدها نهائى فى الاعدادى والثانوى

نفسى الطالب يجرى يسلم على استاذه القديم بعد انتهاء علاقته بالمدرسة احتراما وتبجيلا وقبل ذلك

احترامه فى الفصل والمدرسة بدلا مما نراه من اساءات وبذاءات من الطرفين على حد سواء

شكرا لحضرتك على تذكرينا باحلام جميلة حلمنا وسعدنا فيها بطفولة نقية شفافة مرحة

[زهرة الجبل]

حضرتك نورتي الصفحه يا أستاذه هند

عندك حق و الله .. شئ محزن إنحدار العلاقه بين المدرس أو المعلم و بين التلاميذ و الطلبه إلى هذا الحد

و إنتي شايفه إن مسرحية مدرسة المشاغبين كانت البدايه .. لكن أنا حاسه إن تغليب الماده على هذه العلاقه هو ما وصل بها إلى ما وصلت إليه

علاقة المدرس بالطالب كانت علاقه محاطه بهاله من السمو و الرقي تستمده من تفاني المدرس في تعليبم الطالب و تقدير الطالب لهذا التفاني

لذلك عندما أصبحت العلاقه خد و هات و كله بتمنه و أصبح وقت المدرس يباع للتلاميذ بالساعه و الحسابه بتحسب تغير وضع هذه العلاقه كثيراً

فكان من الطبيعي أن إنسحب هذا الرقي منها و بهتت هالة السمو من حولها بالتدريج حتى تلاشت

عارفه يا مدام هند ؟

رغم إن قصدي من الموضوع كان السفر في رحله جميله إلى الماضي الجميل و الذكريات البريئه الراقيه ..

إلا إنه فعلاً كان من الصعب تذكر الماضي بدون عقد مقارنه إجباريه بينه و بين هذا الحاضر العجيب الذي نعيشه الآن

و مع ذلك أنا سعيده إن الموضوع إجتر على حضرتك بعض الذكريات السعيده و ذكرك بعلاقتك الطيبه مع زميلاتك و معلماتك

دمتِ بكل الود

تم تعديل 19 نوفمبر 2010 بواسطة زهرة الجبل

[Simba]

انا لحقت امل وعمر وابي وامي بس مفيش حنين جارف للايام دي ولا حاجة

اول يوم لي في المدرسة قعدت في الصف الاول اعيط وكان فيه ابلة لسه فاكر وشها لحد دلوقتي لانها كانت جميلة وحزينة وقاعدة ساكتة وهادية خالص وانا اعيط ومفيش فايدة كانت اغرب حاجة بالنسبة لي لاني لما كنت ابكي في البيت في السن ده البيت كله يتقلب لكن دي مش نافع معاها حاجة

كل اللي فاكره اني ما كنتش بحب المدرسة ولا المدرسين

تخيلي مدرس الزراعة ضربني بالقلم وانا في تالتة ابتدائي علشان تعبت من كتر شيل البلاط اللي هيبنوا بيه المصلي ولحد اللحظة دي نفسي بجد اشوفه واديله القلم قلمين

وفاكر اني كنت اغلب الحصص سرحان مع المدرسين المملين المملين اوي وبركز مع المدرسين اللي بيخلونا نتفاعل معاهم ويدخلونا وسط الدرس

في خامسة ابتدائي مدرس الالعاب كان بيدينا تاريخ انا كرهته بسببه

المهم اخدت جزائي وقدر الله اني اكون تعليم متوسط لكن مش ندمان ابدا ابدا لاني بحب المجال اللي بشتغل فيه

ممكن استأذن حضرتك في الصورة اخدها علي صفحة في الفيس بوك

انا خارج م الموضوع بقي شكل جرس الفسحة ضرب

[زهرة الجبل]

مش عارفه أقول لك إيه يا أخ سمبا

ذكرياتك عن المدرسه مش و لا بد

و لو إنها منطقيه .. لما يكون مدرس الألعاب بيدرس ماده جميله زي التاريخ !! و مدرس أياً كان تخصصه يضرب طفل بالقلم !! كان طبيعي إن ده يبقى إنطباعك عنها

على كل حال أتمنى تكون مش هي دي القاعده

أنا عندي ذكريات جميله كتيره

تخيل أنا فاكره أول يوم فيب الحضانه

فاكره منه لقطات كده متفرقه كأنها فلاشات بتمر سريعه في الذاكره

فاكره إننا كنا قاعدين على كراسي منخفضه و قريبه من الأرض

و فاكره وجه المدرسه يومها .. و فاكره إن فعلاص أغلبية الاطفال كانوا بيبكوا .. بس أنا كنت ساكته و بتأمل .. لأني صدقت بسزاجتي وقتها إن ماما واقفه ورا باب الفصل منتظراني

فضلت طول اليوم ملتزمه بكلام ماما و هو إني لا أتحرك من الفصل و أسمع كلام المعلمه

و ماما يا دوب هتروح تستلم الكتب من الفصل اللي جمبنا و ترجع و تفضل منتظره وراء الباب :happy:

إللي كان شاغلني هو ليه كل العيال دول بيعيطوا i*: رغم إن أمهاتهم واقفين و را الباب ؟؟؟

[م تيمور المراغي]

التوبيك جميل اوي يا زهره

تسجيل اعجاب ومتابعه

بس اللي مستغربله بعض الاجابات كان فيها محاولات خاطئه تم تصويبها

يعني على اليمين ابي مثلا ,, الاقي خط رايح على امل

او على اليمين امي ’’ الاقي خط متردد ورايح على الراجل اللي بشنبات ,,

نفسي اعرف مصير صاحب الكتاب ده فين دلوقتي ؟؟!!!

لا

لا

لا

ما تقوليش

معقوله هو نفسه !!!

ابو علاء بذاته وشحمه ولحمه ههههههه :happy:

[زهرة الجبل]

التوبيك جميل اوي يا زهره

تسجيل اعجاب ومتابعه

بس اللي مستغربله بعض الاجابات كان فيها محاولات خاطئه تم تصويبها

يعني على اليمين ابي مثلا ,, الاقي خط رايح على امل

او على اليمين امي '' الاقي خط متردد ورايح على الراجل اللي بشنبات ,,

نفسي اعرف مصير صاحب الكتاب ده فين دلوقتي ؟؟!!!

لا

لا

لا

ما تقوليش

معقوله هو نفسه !!!

ابو علاء بذاته وشحمه ولحمه ههههههه :happy:

Architect أخي الفاضل

حضرتك لاحظت الإجابات .. ملاحظتك قويه

أنا برضه سألت نفسي نفس السؤال .. يا ترى مين صاحب الكتاب و مصيره فين دلوقت ؟؟

بس المشكله إن صاحب الكتاب شال الـ ( تِــكــِــت ) من عليه قبل ما يصوره و ينزله عالنت .. تقريباً لدواعي أمنيه

بس حضرتك ليه بخلت علينا بذكرياتك في فترة الإبتدائيه ؟

يا جماعه أنا عاوزه الكل يسيب ذكرى هنا من ذكرياته في الفتره دي و يشاركنا بيها

أنا هضيف هنا بعض الصور تاني علشان ننشط الذاكره

[زهرة الجبل]

عوده بقى للزمن الجميل

و لرائحة الورق ... و للون القلم الرصاص بخطوطنا في مهدها

هذه صفحه تصف كيف كانت العلاقه بين التلاميذ و المدرسين أعمق من أن تحدها جدران الفصل

[زهرة الجبل]

مين فاكر الدرس ده ؟

يا سلااااام !!! شفتوا جمال الكلام ؟

الكتكوت سمع نو نو

الكتكوت صاح صو صو

تخيلوا كريم إبني السنه دي في أولى إبتدائي و الله منهجه شئ عجييييب

الدرس الأول بيقول :

كنت ألعب بكرة القدم و كرتي كسرت زجاج نافذتي و أبي حرمني من رحلة مدرستنا

شفتوا البؤس ؟

و الله الجيل ده غلبان آآآآآآآآآآآخر غلب

[زهرة الجبل]

أنا شكلي فاتحه التوبك ده علشان أحكي فيه عن ذكرياتي لوحدي

كان عندي أمل أسمع ذكريات بقية الناس و نتشارك لمحات هذه المرحله بما فيها من براءه و جمال

عموماً هكمل يمكن حد يغير رأيه و يفتكر و يشاركنا

(1)

أنا فاكره كويس في المدرسه كنا كل يوم الصبح في الطابور نغني بلادي بلادي بلااااادي لكِ حبي و فؤادي

و بعدها نغني طلع البدر علينا من ثنيات الوداع .. وجب الشكر علينا .. ما دعا لله داع

و كان اليوم اللي أوصل فيه المدرسه متأخر و ملحقش الطابور ببقى زعلانه جدا إني ملحقتش

أغني الأغاني دي يومها

إفتكرت الأغاني دي و أنا بقلب بين صفحات الكتاب عالنت و لقيت روحي بدندن بيها بيني و بين نفسي

(2)

مدرسة الرياضيات كانت إسمها أبله حنان

مش فاكره كانت في سنه كم بالظبط بس فاكراها كويس

كانت طويله و بيضاء جداً و وجهها كله نمش

المدرسه دي كنت في يوم بسألها عن حاجه في الواجب و بقول لها يا أبله إنتي قلتي كذا كذا

لقيتها غيرت ملامح وشها و قالت لي : يصح و إنتي بتكلميني تقولي إنتي ؟

إتكسفت جداً وقتها و قلت لها آسفه يا أبله .. حضرتك

و من يومها و أنا لا أنسى أبداً أن أضح لكل من أتكلم معه الحدود التي يستحقها في الكلام من ألقاب و إحترام

ربنا يمسيها بالخير أبله حنان

:redrose: :redrose: :redrose:

[engmido]

موضوع جميل مدام زهرة

ومتابع معكى ولى عودة

[أبوعمار]

لا أعرف إن كان هنا من يشاركني هذا الحنين الجارف لكل ما يذكرني بالماضي و طفولته و هدوءه و براءته و بساطته و كل ما فيه

مين اللي ممكن يحسش بالحنين الجارف للطفولة وللفترة دي؟

أختي الفاضلة

اعذريني لأني قريت موضوعك بسرعة

ونزلت بلهفة على تحت أشوف الصور

فعلا حسيت بلهفة وفرحة غريبة

يااااااااااااااااه

ما كنتش متخيل ان الذكرى دي هاتحسسني برعشة

وانها هاترجع شريط الذكريات بسرعة

كأني دوست على الزرار اللي بيسرع الفيديو

أنا كنت بأغني بلادي بلادي

بس طلع البدر علينا كانت في المناسبات الدينية بس

وفاكر كويس ان اللي الأستاذ يلمحه ما بيقولش النشيد بقوة وحماس

يبقى أمه داعية عليه

أيامها كانت المدراس ... للتربية والتعليم بجد مش زي الأيام دي

فاكر اني كنت في مدرسة مشتركة

فاكر أول يوم وأنا داخل ماسك ايد أمي

أنا ما كنتش خايف ... بالعكس كنت فرحان جدا

وداخل مبهور ومبرق عينيا .. "زي أليس في بلاد العجائب" :P

بس المشكلة ان الأستاذ أول ما شافني

خطفني من ايدي أمي وقال لها :اتفضلي ياماما سيبيه وروحي.

هو كان فاكر اني هأعيط بقى وأمسك فيها وهو يقعد يشدني

دخلت الفصل بقى لقيت مناحة ... بنات وألاد قاعدين يعيطوا

وأنا قاعد أتفرج ومستغرب "بيعيطوا ليه دول؟" :sad:

كانت عندي مدرسة بتدرسني كل المواد لحد يمكن 3 ابتدائي

وكانت حلوة وزي القمر "أول والله لسه فاكر شكلها"

وفاكر برضو ان مدرس التاريخ كان بيدرسني ألعاب أو العكس مش عارف

وكمان السنة اللي بعدها درسني دين

بس مش مضايقني أبدا ... بالعكس ده حسسني لما افتكرته دلوقت انه المدرس المصري

يقدر يسد في اي حاجة بس يحط دماغه فيها

وبعدين احنا كنا عيال شاطرة ومش فارقة معانا

كانت أيام

لي عودة مع الذكريات والمغامرات

بإذن الله

جزاك الله خيرا على الذكرى الحلوة

[أسد]

درست في كتب مماثلة ..

لم تكن نفسها .. ولكنها كانت بنفس الروح

قبل ذلك ببضع سنوات

كانت الشخصيات هي .. سوسن ونصر ..

ثم عادل وسعاد ..

ومنصور ..

مش فاكر كويس .. ولكنها كانت بنفس الروح ..

بمناسبة طابور الصباح ..

كنت باحكي لابني على إننا كنا بنقف طابور الصباح كل يوم في المدرسة .. وإننا كنا بنحيي العلم ..

وكان فيه كام نشيد وطني لازم نقولهم كل يوم .

وكانت هناك الإذاعة المدرسية في طابور الصباح الذي كان يستمر قرابة ساعة إلا ربع تقريباً .. يعني حصة كاملة ..

وكانت تلك الإذاعة المدرسية يقدمها التلاميذ .. ويكتب الموهوبون منهم موضوعات تعبيرية ليلقوها على زملائهم في الصباح ..

وكان لها تحضير .. وإعداد ..

وكانت هناك جماعة الخطابة .. وفيها كنا نتعلم كيفية الإلقاء على العموم ... ببساطة وبدون تعقيدات ..

ولكنها كلها كانت أمور تتم بمنتهى الجدية والحزم ..

أتذكر وأنا في الصف الخامس الإبتدائي ... كان صوتي قوياً .. ووقتها كنت أقوم بتحية العلم في طابور الصباح .. وكنت أقول بعض العبارات قبل تحية العلم ..

وبالطبع كانت تقال من الذاكرة .. وكان في أول يوم أقول تلك العبارات ... وأخطأت في التشكيل وأنا ألقيها ....

فلامني ناظر المدرسة .. وشعرت بإحراج شديد .. وكان ذلك حافزاً لي لأن أتدرب عليها جيداً حتى لا أخطئ فيها أبداً مستقبلاً .. وقد كان ..

أيضاً كان هناك مايسمى بالقسم المخصوص ..

وهذا القسم المخصوص كان عبارة عن مجموعة من التلاميذ يختارون ليتدربوا على عروض استعراضية .. تتم في الإستاد في مدينة بورسعيد في إحتفالات عيد النصر في ديسمبر ..

وكانوا يتدربون عليها كثيراً .. وكان التلاميذ يتجمعون من كل مدارس بورسعيد .. ويتم تدريبهم على الحركات والاستعراضات .. ليقوموا بتك الاستعراضات في هذا اليوم الجميل ..

ذكريات رائعة .. عن زمن كانت فيه المدرسة مؤسسة تختلف كثيراً عن مايطلق عليه مدرسة في زمننا الحالي ..

نشأنا وتعلمنا الكثير في تلك المؤسسات الرائعة (المدارس الحكومية) ... وبرغم ما كنا نعاني من أزمات إقتصادية .. وحرمان كبير مقارنة بما يحطى به الأطفال والتلاميذ اليوم .. إلا أننا كنا نتعلم ..

كانت هناك قيمة هامة جداً .. مغروسة في وجدان كل واحد منا .. وكان أهلنا يرردونها على أسماعنا حتى لا ننساها أو نتناساها ، وحتى لا نغفل عنها ..

التعليم والنجاح .. هو الباب الوحيد الذي ينقلك من مستوى إلى مستوى آخر ..

التعليم هو الذي يضيف لك القيمة ..

إذا تعلمت جيداً .. سيمكنك أن تنتقل من فئة إقتصادية أو إجتماعية إلى فئة أخرى ..

قيم كثيرة جميلة جداً تعلمناها في تلك الأيام ....

يالها من ذكريات جميلة .. تشحن لنا همتنا من جديد

[nightmare]

أختي زهرة الجبل , تحياتي على الموضوع الرائع والكتاب الممتع

الحياة كانت سهلة والتعليم كان ميسر وبسيط ويكفي اننا كنا بنحب المدرسة بجد , لحد ما دخلنا الثانوية العامية واتقلب الحال 180 درجة

كان فيه موضوع برضه بحبه جدا للأخ العزيز Joo , اسمه "كيف تعرف انك احد ابناء الجيل الموكوس؟؟ " وده الرابط بتاعه

كيف تعرف أنك أحد أبناء الجيل الموكوس

هيعجبك قوي وفيه كل ذكريات هذا الجيل الجميل.

مع تحياتي

تم تعديل 20 نوفمبر 2010 بواسطة nightmare

[اغابي]

اه يا زهرة الجبل

ميرسي فكرتيني باجمل الذكريات - بجد وفكرتيني بموضوع جووو - الجيل الموكوس - اكمنى انا من جيل الموكوسين

فكرتيني باجمل ايام ميرسي بجد انا عجبنى فى الكتاب داه الشغابيط اللى بخط صوغير وواضح انه خطك يظهر كدا

:lol:

كانت اجمل ايام انا افتكرت حاجة على السريع كدا

لما كنت فى سنة اولى كنت باعيط جامد وماما راحت معايا اول يوم وانى اسكت مش ممكن لكن الميس

ادتنى بسكوتة ويفر - لون الورقة بتاعتها سلفر وبخط ازرق وكنت فرحانة اوى بيها

ومش ممكن انسي البسكوتة دى لانى فرحت بيها- ويمكن تكون عامل مساعد انى اخرس فى اليوم داه وابطل عياط خاصة

انى دخلت المدرسة اصغر من عمرى بسنة كاملة وماما وبابا دفعوا كرسي و20 جنيه لناظر المدرسة علشان يقبلنى

تحياتى

موضوع جميل

[زهرة الجبل]

سأسبق التعليق على هذا الكم الرائع من الذكريات الجميله بدرس جديد

صفحات من الماضي نفتح إنطوائها و نستعيد ما تشبعت به من براءه و خيال و جمال

ليس فقط في الأجواء المدرسيه و حيزاً تحده جدران المدرسه

بل هي صفحات تعيدنا بالذاكره للزمن الجميل .. فالذاكره لا تحدها الحدود و لا تعترف بالجدران .. فتتسع لتعيدنا إلى كل ما في هذا الوقت من جمال

صفحات لها على نفسي من التأثير ما يجعلني أقسم بالله أنه لو كان بإختياري لتنازلت عن نصف ما تبقى لي من عمر أو رما أكثر من النصف

في مقابل أن أعيش البقيه المتبقيه في هذا الزمن مرة أخرى

زمن يفترش البساطة و تكسوه المحبه و يزينه التعاون و يجتمع أهله على الموده و لا يحملون بقلوبهم أكثر مما فطرهم الله عليه

بساطه نراها متجسده في دروس صغيره على صفحات هذا الكتاب مستمده من واقع صادق كان الناس عليه .. كانت البساطه هي طباعهم و أخلاقهم

شوفوا معايا كده

التالي

التالي

تم تعديل 20 نوفمبر 2010 بواسطة زهرة الجبل

[زهرة الجبل]

أنا عارفه إن في ناس هتقول ده مجرد درس مكتوب بأسلوب مبسط للأطفال

لكن الحقيقه هي أن البساطة التي تقطر منه ليست فقط لأنه كـُتـِبَ للأطفال

بل لأنها كانت صفه غالبه على المجتمع حينها .. و ليس عن تقصد .. و لا يبذلون جهداً يذكر لهذا .. بل هذا هو الحال و بدون إفتعال

أو ربما هكذا أرى أنا

[زهرة الجبل]

Engmido الأخ الفاضل

نورت الموضوع

و منتظره عودتك محمل بالذكريات

تحياتي

*******************************************

الأخ الفاضل أبو عمار

فاكر أول يوم وأنا داخل ماسك ايد أمي

أنا ما كنتش خايف ... بالعكس كنت فرحان جدا

وداخل مبهور ومبرق عينيا .. "زي أليس في بلاد العجائب" :P

بس المشكلة ان الأستاذ أول ما شافني

خطفني من ايدي أمي وقال لها :اتفضلي ياماما سيبيه وروحي.

هو كان فاكر اني هأعيط بقى وأمسك فيها وهو يقعد يشدني

دخلت الفصل بقى لقيت مناحة ... بنات وألاد قاعدين يعيطوا

وأنا قاعد أتفرج ومستغرب "بيعيطوا ليه دول؟" :sad:

حضرتك نورت الموضوع

بس أكيد والدة حضرتك كانت معتمده نفس الخطه إللي والدتي عملتها معايا

كانت مفهماك إنها واقفه ورا الباب منتظره نهاية اليوم مش كده ؟

:happy:

وفاكر برضو ان مدرس التاريخ كان بيدرسني ألعاب أو العكس مش عارف

وكمان السنة اللي بعدها درسني دين

بس مش مضايقني أبدا ... بالعكس ده حسسني لما افتكرته دلوقت انه المدرس المصري

يقدر يسد في اي حاجة بس يحط دماغه فيها

وبعدين احنا كنا عيال شاطرة ومش فارقة معانا

كانت أيام

سبحان الله

مش عارفه إيه العلاقه الغريبه دي إللي بين الألعاب و التاريخ

حضرتك و الأخ سمبا عندكم نفس الواقعه

حاولوا تتواصلوا مين عالم .. يمكن تكونوا كنتم زمايل في مدرسه واحده

بس حضرتك و الله عندك حق .. فعلاً المدرس المصري قادر لو قرر و صمم إنه يعمل كل حاجه

قدرات جميله يا ريتنا دلوقت بنستغلَّها صح

ربنا يصلح الحال

أنا سعيده و الله إن حضرتك رجعت بالذاكره للمرحله الجميله دي

و منتظره عودتك بالمزيد

دمت في حفظ الله

أم كريم