أمل و عمر*و نرجس و القطه بسبس*صور من كتاب القراءه الرشيده

[Simba]

هو كله جوه المدرسة كده

طيب ممكن انط من فوق السور كعادة اصيلة في المرحلة الابتدائية

واروح اشتري دوم من الست الغلبانة اللي قاعدة جنب سور المدرسة

ومعاها بالظبط

عسلية

دوم

ام الخلول

لب سوري في قراطيس

مصاصة غريبة كده شكل مثلث واحيانا بيكون فيها قرش صاغ

[زهرة الجبل]

بمناسبة طابور الصباح ..

كنت باحكي لابني على إننا كنا بنقف طابور الصباح كل يوم في المدرسة .. وإننا كنا بنحيي العلم ..

وكان فيه كام نشيد وطني لازم نقولهم كل يوم .

وكانت هناك الإذاعة المدرسية في طابور الصباح الذي كان يستمر قرابة ساعة إلا ربع تقريباً .. يعني حصة كاملة ..

وكانت تلك الإذاعة المدرسية يقدمها التلاميذ .. ويكتب الموهوبون منهم موضوعات تعبيرية ليلقوها على زملائهم في الصباح ..

وكان لها تحضير .. وإعداد ..

وكانت هناك جماعة الخطابة .. وفيها كنا نتعلم كيفية الإلقاء على العموم ... ببساطة وبدون تعقيدات ..

ولكنها كلها كانت أمور تتم بمنتهى الجدية والحزم ..

الأخ الفاضل أسد

حضرتك و الله فتحت باب جديد تماماً للذكريات

و ذكرتني ببرنامج طابور الصباح الرائع

و الذي كان - كما تفضلت - يستمر فعلاً لمده لا تقل عن ساعه إلا ربع تقريباً

لكنه كان برنامجاً متجدد و شيق بحيث لم يكن يحمل إلينا في يوم من الأيام شئ من الملل

و كان هناك مشرفون يمرون بين طوابير الفصول لضبط وقفة التلاميذ بإنتباه و إنتظام

و كان برنامج الإزاعه مقسم إلى فقرات تعجبت من نفسي لما وجدتني أتذكرها ( أو أغلبها على الأقل ) شبه مرتبه

و كان هناك طالب يشغل الفواصل بين كل فقره و أخرى قائلاً ( و الآن مع فقرة كذا ) و يعطي الميكرفون للتالي

كانت تبدأ بفقرة القرآن الكريم و كان يتم إنتقاء أجمل صوت خاشع في التلاوه من كل فصل يومياً بالدور

ليأخذ هذا الفصل دوره في التلاوه ممثلاً بصاحب الصوت

و تليها فقرة الحديث الشريف فنستمع يومياً لحديث جديد

و من ثم فقرة النشره .. و مقتطفات من أخبار من حولنا

و تليها فقرة ( هل تعلم أن ) .. يااا لها من ذكريات .. و الله أستطيع أن أجزم أن الصوت ( هل تعلم أن ) مازال في أذني ... كانت فقره هل تعلم أن هي المفضله عندي

فكنت أنتظرها يومياً من جمال المعلومات التي كانت تنتقى بعنايه لتجذب إنتباهنا و تثير دهشتنا

و تفتح في أذهاننا ممرات التأمل و التفكير و أحياناً التساؤل الذي يفتح أبواب البحث و الإستزاده

حقاً و الله كانت أيام جميله

ذكريات رائعة .. عن زمن كانت فيه المدرسة مؤسسة تختلف كثيراً عن مايطلق عليه مدرسة في زمننا الحالي ..

نشأنا وتعلمنا الكثير في تلك المؤسسات الرائعة (المدارس الحكومية) ... وبرغم ما كنا نعاني من أزمات إقتصادية .. وحرمان كبير مقارنة بما يحطى به الأطفال والتلاميذ اليوم .. إلا أننا كنا نتعلم ..

كانت هناك قيمة هامة جداً .. مغروسة في وجدان كل واحد منا .. وكان أهلنا يرردونها على أسماعنا حتى لا ننساها أو نتناساها ، وحتى لا نغفل عنها ..

التعليم والنجاح .. هو الباب الوحيد الذي ينقلك من مستوى إلى مستوى آخر ..

التعليم هو الذي يضيف لك القيمة ..

إذا تعلمت جيداً .. سيمكنك أن تنتقل من فئة إقتصادية أو إجتماعية إلى فئة أخرى ..

قيم كثيرة جميلة جداً تعلمناها في تلك الأيام ....

يالها من ذكريات جميلة .. تشحن لنا همتنا من جديد

صدقت و الله أخي الفاضل

كانت المدارس حينها مؤسسه كامله مختلفه تماماً عن ما يسمى اليوم بالمدارس

و كانت جديره حقاً بما أخبرونا به أهالينا حول أن التعليم حقاً هو المفتاح السحري الوحيد الذي يفتح أمامنا كل الأبواب و يسمح لنا وحده بالأنتقال إلى المستوى الأفضل و الأعلى دائماً

يكفي أنها كما تفضلت إستمرت إلى اليوم تمدنا بذكريات تشحن لنا هممنا من جديد

.. أشكرك أخي الفاضل لطرح ذكرياتك هنا لنشاركك بها

دمت بكل الخير و الرضا

أم كريم

[زهرة الجبل]

أختي زهرة الجبل , تحياتي على الموضوع الرائع والكتاب الممتع

الحياة كانت سهلة والتعليم كان ميسر وبسيط ويكفي اننا كنا بنحب المدرسة بجد , لحد ما دخلنا الثانوية العامية واتقلب الحال 180 درجة

كان فيه موضوع برضه بحبه جدا للأخ العزيز Joo , اسمه "كيف تعرف انك احد ابناء الجيل الموكوس؟؟ " وده الرابط بتاعه

كيف تعرف أنك أحد أبناء الجيل الموكوس

هيعجبك قوي وفيه كل ذكريات هذا الجيل الجميل.

مع تحياتي

nightmare الأخ الكريم

و الله أنا كنت بحب جداً مرحلة الثانويه

و ما زلت محتفظه بأكثر من صديقه من المرحله الثانويه

نلتقي عبر المكالمات الهاتفيه غالباً و عندما يسعفنا الحظ لا نترك الفرصه للتزاور أيضاً و إن كانت نادره

كانت لي مجموعه من الصديقات كنا سوياً أربعة بنات في الثلاث سنوات لا نفترق

تلاثه منا لنا نفس الإسم و الرابعه كان إسمها نورا

و ما زلنا على إتصال و الحمد لله .. و كثيراً ما نستعيد سوياً ذكريات جميله و مواقف طريفه كنا نمر بها في تلك الأيام

بالمناسبه موضوع كيف تعرف أنك أحد أبناء الجيل الموكوس واضح إنه موضوع ظريف .. و ده باين من عنوانه

لن أفوت فرصة قراءته إن شاء الله

تحيتي لك أخي الفاضل

و دمت في حفظ الله

أم كريم

[زهرة الجبل]

الأخت الغاليه أغابي

اه يا زهرة الجبل

ميرسي فكرتيني باجمل الذكريات - بجد وفكرتيني بموضوع جووو - الجيل الموكوس - اكمنى انا من جيل الموكوسين

فكرتيني باجمل ايام ميرسي بجد انا عجبنى فى الكتاب داه الشغابيط اللى بخط صوغير وواضح انه خطك يظهر كدا

:lol:

أولاً و قبل كل شئ عاوزه أشكرك على تهنئة العيد التي أسعدتني جداً منك

لكن للأسف خاصية الرسايل عندك معطله و معرفتش أشكرك في حينها

لقيتها فرصه هنا أشكرك شكراً بجد و ربنا يديم الموده

<أما بقى موضوع الكتاب فـوالله ما خطي خالص .. أنا أول ما شفت من الكتاب ده كانت صفحه عالفيس بوك

وضعتها إحدى صديقاتي كتهنئه بالعيد كانت حاطه الدرس 13 و إسمه عيد سعيد

و مش قادره أوصف لك حالة الذهول و الدهشه و الفرحه و الحنين و حاجات تانيه كده كتيره حصلت معايا أول ما شفتها

شوفيها معايا

و كانت الصفحه دي سبب في إني قعدت أدور عالنت على بقيت الكتاب لحد ما لقيته كله

متجمع في رابطين للتحميل أكيد هنسخ الروابط دي هنا للي يحب يكون الكتاب عنده ... بس بعد ما أنزل منهم كم صوره قطاعي الأول :happy:

كانت اجمل ايام انا افتكرت حاجة على السريع كدا

لما كنت فى سنة اولى كنت باعيط جامد وماما راحت معايا اول يوم وانى اسكت مش ممكن لكن الميس

ادتنى بسكوتة ويفر - لون الورقة بتاعتها سلفر وبخط ازرق وكنت فرحانة اوى بيها

ومش ممكن انسي البسكوتة دى لانى فرحت بيها- ويمكن تكون عامل مساعد انى اخرس فى اليوم داه وابطل عياط خاصة

انى دخلت المدرسة اصغر من عمرى بسنة كاملة وماما وبابا دفعوا كرسي و20 جنيه لناظر المدرسة علشان يقبلنى

شفتي يا أغابي كانت حاجه بسيطه أد إيه ؟ لكن لأنها لفته جميله و معناها كبير فضلت موجوده في ذاكرتك

ورقة بسكوت عملت في ذاكرتك علامه لدرجة إنك لسه فاكره لونها و الخط الأزرق اللي عليها

و الله معنى جميل جدا و هو ده الفرق بين زمان و دلوقت

بين المدرسه بتاعة زمان و بتاعة دلوقت

بين طولة بال و صبر و حب الأولى و بين الضغط و العصبيه اللي التانيه متأثره بيه و بالتالي بتأثر بيه عالتلاميذ

بين بسكوتة و إبتسامة الأولى و صوت التانيه العالي و العصايه إللي في إيدها

الفرق كبير قوي يا أغابي .... و للأسف الإتنين بيتعلقوا في الذاكره !!

إنما إيه موضوع العشرين جنيه و الكرسي دول ؟؟

حتى زمان كامن فيه كوسه ؟:happy:

بس شفتي ؟ حتى الكوسه زمان كانت بسيطه و جميله .. كرسي !! و عشرين جنيه .. يا بلاش و الله

:happy: :happy:

تحياتي لكِ و لذكرياتك الجميله اللي سمحتيلنا نشاركك فيها

و يا ريت أشوفك هنا تاني بمزيد من الذكريات

دمتِ بكل الود

أم كريم

تم تعديل 21 نوفمبر 2010 بواسطة زهرة الجبل

[arkan]

انا شوفت الكتاب ده فين .... شفته فين

هو بعينه

الله يذكرك بالخير ياأبلة فلانة

كانت بتدينا كل المواد للسنوات الاولى وبعد كده زى ما تقولوا اصبح في تخصص

يعنى استاذ واحد لمادتين الحساب والتاريخ عادي

ناظر المدرسة طبعا ماكانش نستجرى ندخل مكتبة حاجة هيبة وكمان المدرسين والمدرسات بس بجد الشدة في الفترة دى هى اللى علمتنا

كمان أولياء الأمور كانوا يحترموا المدرسبن جدا

فاكرين التفتيش المفاجىء على الاظافر واللى ضوافره طويلة يتذنب في الحوش ويبقى عبرة

طب فاكرين الحكيمة اللى في المدرسة ( بتقوم بدور الطبيب)

بلاش فاكرين لما كان بيجي مفتش او مفتشة كانت الابلة تقعد تحفز فينا اننا نبقى شطار ومؤدبين وبردة كنا في قمة الخوف من المفتش

طب العسليةاللى كانت ببتاع قدام المدرسة

بس بس ياخبر ده افتكرت فرّاشة المدرسة

كده مش هنخلص كتابة

اخر حاجة

كانوا بيخوفونا بأوضة الفيران .. اه والله

كفاية

كانت أيام.......جميلة

تم تعديل 21 نوفمبر 2010 بواسطة arkan

[زهرة الجبل]

هو كله جوه المدرسة كده

طيب ممكن انط من فوق السور كعادة اصيلة في المرحلة الابتدائية

واروح اشتري دوم من الست الغلبانة اللي قاعدة جنب سور المدرسة

ومعاها بالظبط

عسلية

دوم

ام الخلول

لب سوري في قراطيس

مصاصة غريبة كده شكل مثلث واحيانا بيكون فيها قرش صاغ

لا و الله يا أخ سمبا

مش كله جوه سور المدرسه و لا حاجه

أنا فاكره كويس كل اللي كان خارج السور بس للأسف ده ذكرياته معايا مش سعيده قوي

لأني لم أحظى بمصروف جيب قبل الإعداديه

كانت والدتي ربنا يكرمها لا يمكن تعطينا مصروف في المدرسه أبداً

كانت تعطينا ما نريده من البيت

أنا فاكره الجيب بتاع الأكل .. كان جيب خارجي على الشنطه من بره

كانت تضع لنا فيه السندويتش و كيس شيبسي و علبة عصير أو السندويتش و واحدة شيكولاته و علبة العصير

كانت وجهة نظرها إننا مانشتريش حاجه هي مش عارفاها و ناكلها بره المدرسه

لذلك كنت بشوف كل اللي حاجات اللي حضرتك حكيت عنها دي و أكتفي بتأمل تزاحم زميلاتي و زملائي عليها بشكل غريب

و كان كمان وقتها في سيده كبيره في السن بتقعد كل يوم تبيع جزر

آه و الله العظيم جزر .. جزر بس صغير و لونه أحمر .. و كانوا التلاميذ بيتزاحموا جداً عليها .. و دي الوحيده اللي كنت ببقى متضايقه إني مش عارفه أشتري منها

أنا دورت عالنت على صوره للجزر الأحمر و لقيت دي

لكن بما إن والدتي كانت بتعمل لنا زيارات تفقديه كتيره في المدرسه و أحياناً كانت بتبقى في نهاية اليوم الدراسي بحيث كنا نرجع البيت معاها بدل العوده في عربية المدرسه

فكنت بستغل الفرص دي و أطلب منها تشتري لي هي بنفسها جذر من البائعه دي

و دي الحاجه الوحيده اللي كانت بتسمح لنا بشرائها من بين بقية الباعه الموجودين خارج سور المدرسه

شكراً لحضرتك بجد .. فكرتني بحاجات جميله

دمت في حفظ الرحمن

أم كريم

تم تعديل 21 نوفمبر 2010 بواسطة زهرة الجبل

[زهرة الجبل]

انا شوفت الكتاب ده فين .... شفته فين

هو بعينه

الله يذكرك بالخير ياأبلة فلانة

كانت بتدينا كل المواد للسنوات الاولى وبعد كده زى ما تقولوا اصبح في تخصص

يعنى استاذ واحد لمادتين الحساب والتاريخ عادي

ناظر المدرسة طبعا ماكانش نستجرى ندخل مكتبة حاجة هيبة وكمان المدرسين والمدرسات بس بجد الشدة في الفترة دى هى اللى علمتنا

كمان أولياء الأمور كانوا يحترموا المدرسبن جدا

فاكرين التفتيش المفاجىء على الاظافر واللى ضوافره طويلة يتذنب في الحوش ويبقى عبرة

طب فاكرين الحكيمة اللى في المدرسة ( بتقوم بدور الطبيب)

بلاش فاكرين لما كان بيجي مفتش او مفتشة كانت الابلة تقعد تحفز فينا اننا نبقى شطار ومؤدبين وبردة كنا في قمة الخوف من المفتش

طب العسليةاللى كانت ببتاع قدام المدرسة

بس بس ياخبر ده افتكرت فرّاشة المدرسة

كده مش هنخلص كتابة

اخر حاجة

كانوا بيخوفونا بأوضة الفيران .. اه والله

كفاية

كانت أيام.......جميلة

arcan أختي الكريمه

فكرتيني و الله بحاجات كمان حلوه

و التفتيش المفاجئ مرات في الطابور و مرات في الفصول على الأظافر و النظافه

و مش عارفه ليه إفتكرت حاجات غريبه دلوقت

كان في نهاية اليوم الدراسي بنسمع ميكرفون المدرسه بيشتغل تاني

كانت باصات المدرسه متقسمه مناطق

و طبعاً كل باص بياخد أكتر من تلميذ من أكتر من فصل

كان كل باص له رمز بيتعلق في مريول التلاميذ اللي بيستخدموه

عباره عن شرايط بألوان مختلفه و أزرار بألوان مختلفه

و نسمع بقى في الميكرفون و إحنا في فصولنا : ( الشريطه الحمرا )

فتقوم الأبله تجمع التلاميذ اللي معلقين شريطه حمرا و تنزلهم

شويه و نسمع : ( الزرار الأخضر ) فتجمع التلاميذ اللي معلقين زرار أخضر و تنزلهم

( الشريطه الصفرا ) .. و هكذا

أنا بقى مكنتش مشتركه في باصات المدرسه :blush2: كنت بروح المدرسه و أرجع مع عم محمود

ياااااااه أنا حاسه إني فاكره ملامحه لسه .. ربنا يكرمه و يرزقه الصحه لو لسه عايش و يرحمه لو كان توفى

كان أيامها رجل كبير في السن .. كان بياخدنا من البيت للمدرسه ومن المدرسه للبيت

كان هو اللي بيطلع يمر عالفصول و ياخدنا .. كنا تقريباً عشره أو إتناشر معاه في العربيه بيوصــلنا كل يوم

كانت أيااااام

لكن مين هي دي أبله فلانه ؟ و ليه مش بتقولي إسمها ؟

تخيلي أنا فاكره إسم بنتين زميلاتي من الإبتدائيه

مش عارفه ليه دول بالتحديد فاكره أسماءهم

بنت إسمها رانيا صفوت إبراهيم حبي

و دي كان لها أخ توأم إسمه أحمد صفوت إبراهيم حبي .. كان معانا في نفس الفصل

و البنت التانيه كان إسمها شيرين مصطفى عبد الوهاب

البنتين دول كانوا بيقعدوا معايا على نفس المكتب

كنا بنقعد تلاتات

كنا بنتقاسم اليوم في الفصل و في الفسحه

أول جرس الفسحه ما نسمعه كنا نجري و نتسابق مين هتوصل للساحه و تقف على رملها الأصفر قبل التانيه

ياااه .. أنا حاسه إني بفتكر حاجات غريبه مكنتش متخيله إنها لسه موجوده في ذاكرتي

الذاكره دي غريبه فعلا

شكراً لوجودك هنا و لذكرياتك الجميله

تحياتي و دمتِ بود

أم كريم

تم تعديل 21 نوفمبر 2010 بواسطة زهرة الجبل

[زهرة الجبل]

متفرقات

و أيضاً

تم تعديل 20 ديسمبر 2010 بواسطة زهرة الجبل

[زهرة الجبل]

طلعوا الكتاب و إفتحوا صفحة 140 على الدرس رقم

18

البطة الصغيرة

إقلبوا الصفحه !!!

[ابو محمد بن مصطفي]

الله عليك يا استاذة زهرة الجبل

انا من ضمن تدرسوا كتاب امل وعمر

فكرتيني بأبله لطفية ودي كانت مدرسة متخصصة في ضرب الاولاد في سنة اوله

ومش ضرب عادي علي الايدين لالالالالالالالالالالالالالالالالالالالالالالالالالالالالالالالالا

ده مد علي القدمين

بس تصدقوا كنت بذاكر ليل نهار من الخوف مش للعلم

بس في سنة تانية جاءت مدرسة تانية اسمها لطيفة

بس سبحان الله مع انهم نفس الحروف ولكن في تغيير موضع حرف الياء

بس اختلاف السما من العما

واتذكر اول يوم دراسي وانا رايح المدرسة كانت امي وخالتي معايا في اليوم ده

وكل اللي فاكره انهم بسموعولي اسمي

خللي بالك لما ينادوا ويقولوا يا مصطفي قول نعم .

لان كان لي اسم دلع بينادوني بيه من يوم الولادة الي اول يوم دراسي

ايه ذكريات

[abuAdham]

السلام عليكم اعلم ان الرد متأخر والموضوع قديم لكنيفي منتهي السعادة لرؤية هذا الكتاب لاني مازلت اذكر صفحاته ودروسه درس درس امل وعمر ونرجس وحازم وبم بم بسبس جرت ودروسه الحقول تجري وتجري ونشيد افتح الباب سعيد انه عمي فريد وكانت اصعب كلمة في الكتاب كله بالنسبة لي كلمة بسبس وتذكرت مدرسة الشمس وابلة زينب وزملاء صفي ياه شكرا يازهرة الجبل علي هذا السبق الصحفي والتميز ونتمني باقي الدروس لاني حفظتها في ملف واشاهدها مع اولادي

[eslam elmasre]

انا من جيل عادل وسعاد واول مادخلت المدرسة اتصدمت حتت صدمه لاني شطلاوي(أعسر) وماعجبش الابله اني بكتب بايدي الشمال قامت ضرباني علي ايدي عشان اكتب بايدي اليمين وفضلت ورايا كام سنة لحد ما نسيت الكتابه بالايد الشمال والحمد لله طلع خطي زي الزفت وماحدش يعرف يقراه غيري وكنت بعاني في الامتحانات عشان احسن خطي وباخد وقت كبير في الحل وطبعا ربنا يخليلنا الكيبورد لاني رجعت اكتب بايدي الشمال مرة تانيه

انا كنت عيل لمض ومدوحر من وانا صغير والحمد لله ربنا هداني دلوقتي لاني كنت عصبي جدا وكنت بخبط دماغي في الحيط لما حد يعصبني وكان مكاني المفضل هو اخر الصفوف في الركن البعيد الهادي عشان كنت بنام ومحدش يحس بيا والمدرس كان رامي طوبتي

الولد محمد ابني طالع عيل هادي (يمكن طالع لامه) ومش عاجني خالص وباقوله يابني اتنحرر شويه نفسي مرة يجيلي واحد يشتكي منك انك ضربته ولا حاجة يقولي انا بحب الهدوء ومابحبش اتعارك مع حد اقوله يابني انا كنت بشاكس طوب الارض وانا في سنك اتنحرر شوية وعايز اخشنه شويه مش عارف اعمل معاه ايه

وديتوا يلعب كاراتيه قالي مابحبش اللعبه دي يقولي انا عايز العب كورة

[أهااات روح]

يااااااااااه ياستاذة زهرة

ايه دا مش معقوووول اجمل زكريات حياتى

فاكرهامن وانا فى الحضانةوكانت عندى مدرستين محببتين الى قلبى جدا والحمد لله كانو بيحبونو قوى ابلة ليلى وابلة سحر لدرجة انهم كانو فاكرنيى لحد اما دخلت الجامعة وانا كنت فكراهم كويس قوى ولما كنت بشوفهم كنت اتكسف اسلم عليهم معتقدة انهم مش فاكرينى لكن فى مرة قابلت ابلة ليلى ولقيتها هى الى بتقرب منى وجاية تسلم عليا متتخيلوش قدر السعادة والفرحة الى كنت فيها لكن ابلة سحر كنت اقبلهاونفضل نبص لبعض كل واحدة فينا معتقدة ان التانية مش فاكرهاوكانت مسميانى ليزا البنت الى كانت بتيجى فى مسلسل هند والدكتور نعمان فاكرينه؟اصلى كنت بشبهها قوى

وفى الابتدائى بقى كانت فى مدرسة واحدة بتدينا كل المواد لغاية تالته ابتدائى وكانت اسمها ابلة صفية وكانت بنتها معانا فى نفس الفصل وكانت بتشبهنى قوى لدرجة انهم كانو مسمينا التؤام ومعظم المدرسين كانو يتكلمو معايا على اساس انى بنتها والصدفة الاكبر ان بنتها كان اسمها نفس اسمى فتخيلو بقى اتنين تؤام وليهم نفس الاسم كنا مميزين جدا فى المدرسة لاننا كنا رايحين جايين مع بعض وكنا كمان بنحى العلم وكنت فى فريق الموسيقى الى بيعزفو الاغانى الوطنية فى الطابور واشتركت كتير فى الاذاعة المدرسية

وكان فى راجل كبير فاتح كشك صغير وبيبيع لب ودوم ومصاصة وكانت فعلا فى ست كبيرة بتيع جزراحمر بالجذور الخضرا الى فيه وكان لازم واساسى انى يوميا اشترى جزر وناكله واحنا مروحين انا واصحابى

ياااااااااااااه كانت احلى ايام حياتى

والاحلى ان المدرسة قريبة من بيتنا( بيت بابا) لحد دلوقتى اروح واجى وابصلها واضحك لماافتكر احلى ايام

جزاكى الله خير والله يااستاذة زهرة على التوبك الرائع ده لانك بيه اسعدتينا كلنا

معلش ياستاذ سمبا انت ليك ظروفك الخاصة

اسفة طولت عليكو بس هو الكلام جاب بعضه ومقصدتش انى اطول عليكو والله

[عادل أبو عمر]

الفاضلة زهرة الجبل

بالله بادعيلك من كل قلبي ربنا يجازيكي كل خير إنتي و كل اللي شاركوا في هذا التوبيك يااااااااااااااااااااااه دا انا حسيت باحساس جميل فوق الوصف و إنتي بتفكريني بالأيام دي و الله جسمي قشعر لما شوفت الصور و رغم ظروف عملي التي أبعدتني عن المشاركة في المحاورات منذ فترة لكني لم أستطع أن اقرأ هذا الموضوع بدون مشاركة لجمال معناه و قربه لنفسي .

لي كثير من الذكريات الجميلة التي لا يمكن أن أنساها و لكن الأجمل هو الاتفاق معكم على أن هذا التعليم البسيط جدا جدا كان في مجمله أروع منظومة علمتنا كيف نحترم المعلم و علمت المعلم كيف يحترم علمه وقت خسرنا تلك المنظومة للأسف خسرنا كل شيء

لي عودة بإذن الله

مرة أخرى جزاكي الله كل خير

[مصري أصيل]

شكراً يا أم كريم أنك فكرتينا بالأيام الجميله دي بجد

المنهج ده منهج أولي إبتدائي صح و الا أنا غلطان ؟؟؟

طيب أنا بأتمني أنك تحطي جزء بسيط من منهج أولي أبتدائي بتاع كريم ... طبعاً منهج الكويت أكيد هيختلف عن منهج مصر بس علي

الأقل نشوف التلاميذ السوبر بتوع اليومين دول بيدرسوا ايه في أولي ابتدائي و بعدها نتناقش في النقطه دي .

[زهرة الجبل]

أخي الكريم ابو محمد

أولا بعتذر عن التأخر في الرد

ثانياً بقى انا سعيده جداً بعودة الذكريات الجميله دي

احياناً ذكريات الطفوله لما تزور مخيلتنا بتكون ترفيه في حد ذاته احلى من اي ترفيه واقعي

كأنها فـُـسحه حلوه او خروجه جميله الواحد بينعش بيها نفسه و هو في مكانه بدون ما يتحرك

بالنسبه بقى لذكريات حضرتك

واتذكر اول يوم دراسي وانا رايح المدرسة كانت امي وخالتي معايا في اليوم ده

وكل اللي فاكره انهم بسموعولي اسمي

خللي بالك لما ينادوا ويقولوا يا مصطفي قول نعم .

لان كان لي اسم دلع بينادوني بيه من يوم الولادة الي اول يوم دراسي

ايه ذكريات

أضحك الله سنك يا استاذ ابو محمد و الله

لحد اول يوم دراسي مكنتش تعرف اسمك الحقيقي؟

يعني اول معلومه اتعلمتها من المدرسه هي اسمك

مفارقه جميله و الله

اما أبله لطفيه الله يسامحها .. و ابله لطيفه ربنا يمسيها بالخير ..

فسبحان الله رغم ان الاولى و التانيه بينهم كما تفضلت حضرتك و قلت انهم فرق السما من العما

الا ان بينهم رابط و قاسم مشترك جميل جدا

و هو ان مجرد تذكرهم في المرحله اللي احنا فيها حالياً هو شئ مبهج و يثير الرغبه في الضحك

و طول ما انت بتعمل الواجب و مسطر الكراسه و خطك كويس .. يبقى لا تخاف من لطفيه و لا لطيفه

سعدت جداً بمرور حضرتك في الموضوع

شكراً لمشاركتك لنا بذكرياتك

تحيتي

[زهرة الجبل]

السلام عليكم اعلم ان الرد متأخر والموضوع قديم لكنيفي منتهي السعادة لرؤية هذا الكتاب لاني مازلت اذكر صفحاته ودروسه درس درس امل وعمر ونرجس وحازم وبم بم بسبس جرت ودروسه الحقول تجري وتجري ونشيد افتح الباب سعيد انه عمي فريد وكانت اصعب كلمة في الكتاب كله بالنسبة لي كلمة بسبس وتذكرت مدرسة الشمس وابلة زينب وزملاء صفي ياه شكرا يازهرة الجبل علي هذا السبق الصحفي والتميز ونتمني باقي الدروس لاني حفظتها في ملف واشاهدها مع اولادي

أخي الفاضل ابو ادهم

أنا أسعد و الله بكلام حضرتك

سعيده جداً ان الكتاب اعاد اليك ذكريات سعيده

و سعيده اكتر بإهتمام حضرتك انك تشارك صور هذا الكتاب مع اولادك و تحكي لهم عن مدارس الزمن الجميل

طبعاً انا هجيب كل الصور اللي عندي هنا في الموضوع

و هجيب لحضرتك ان شاء الله المصدر لتحتفظ بها كامله عندك

مره اخرى سعيده بوجود حضرتك

تحيتي و دمت بحفظ الله

[زهرة الجبل]

انا من جيل عادل وسعاد واول مادخلت المدرسة اتصدمت حتت صدمه لاني شطلاوي(أعسر) وماعجبش الابله اني بكتب بايدي الشمال قامت ضرباني علي ايدي عشان اكتب بايدي اليمين وفضلت ورايا كام سنة لحد ما نسيت الكتابه بالايد الشمال والحمد لله طلع خطي زي الزفت وماحدش يعرف يقراه غيري وكنت بعاني في الامتحانات عشان احسن خطي وباخد وقت كبير في الحل وطبعا ربنا يخليلنا الكيبورد لاني رجعت اكتب بايدي الشمال مرة تانيه

انا كنت عيل لمض ومدوحر من وانا صغير والحمد لله ربنا هداني دلوقتي لاني كنت عصبي جدا وكنت بخبط دماغي في الحيط لما حد يعصبني وكان مكاني المفضل هو اخر الصفوف في الركن البعيد الهادي عشان كنت بنام ومحدش يحس بيا والمدرس كان رامي طوبتي

الولد محمد ابني طالع عيل هادي (يمكن طالع لامه) ومش عاجني خالص وباقوله يابني اتنحرر شويه نفسي مرة يجيلي واحد يشتكي منك انك ضربته ولا حاجة يقولي انا بحب الهدوء ومابحبش اتعارك مع حد اقوله يابني انا كنت بشاكس طوب الارض وانا في سنك اتنحرر شوية وعايز اخشنه شويه مش عارف اعمل معاه ايه

وديتوا يلعب كاراتيه قالي مابحبش اللعبه دي يقولي انا عايز العب كورة

أستاذ إسلام المصري

في البدايه تعجبت من كلام حضرتك ان المدرسه لا تعرف ان مسألة الكتابه باليد اليسرى شئ لا يتحكم فيه صاحبه

لكن تعجبت اكثر لما حضرتك قلت انها تمكنت بالفعل من تعليمك اذاي تكتب باليد اليمنى

و لازم نعترف للأبله بالجميل انها خلتك تكتب بالإيد اليمين

كفايه انها كان عندها اصرار و تبنت القضيه كام سنه ورا بعض

و الله الإصرار ده لو نصه عند المدرسين انهرضه كان حال ولادنا اتغير في حاجات كتير

اما مسألة سوء الخط دي بقى فمقدور عليها .. ياما دكاتره محدش بيعرف يقرأ خطهم

و في معلومه بتقول ان سوء الخط من سمات العباقره :happy:

اما ابن حضرتك فبيفكرني بإبني

تخيل بعد شهرين و نص من بداية العام الدراسي لقيت إدارة المدرسه باعتالي استدعاء

رحت اشوف في ايه .. و لاحظ ان الاستدعاء ده بعد شهرين و نص من الدراسه

لقيتهم بيسألوني ان كان عنده مشكله في النطق لأنه من اول يوم دراسه و هو بيخاف يكلم المدرسات عنده في الحضانه و لا حتى اصحابه في الفصل

طبعا اتفاجئت جدا لانه عفريت في البيت و مش بيبطل كلام

لدرجة انه لما شافني عنده في الفصل جرى عليا و كلمني .. المدرسه بتاعته بتقول لي انها اول مره تشوفه يتكلم

كان هادئ جدا جدا في المدرسه على عكس البيت تماما

و كان بيخاف جدا من الولاد معاه في الفصل

كان كل يوم يجي يشتكي .. في ولد ضربني .. في ولد شدني من القميص

لكن الحمد لله دلوقت الوضع اتحسن كتير

كررت زياراتي له في المدرسه

و بقيت اخليه يشارك في الأنشطه فيها و في الرحلات علشان يعمل علاقات مع زملاءه و زميلاته في الفصل

لحد ما إنتهت المشكله و الحمد لله

هو دلوقت في تانيه ابتدائي

ربنا يبارك لك في اولادك و يحميهم هم و أولادي و أولاد المسلمين أجمعين

[زهرة الجبل]

عزيزتي آهات روح

جميل جدا أنك لسه محتفظه في الذاكره بأسماء مدرساتك المقربات و الاجمل انك لسه بتشوفيهم و هم كمان فاكرينك

كأن الذاكره هي رابط حي بين الماضي و الحاضر

وفى الابتدائى بقى كانت فى مدرسة واحدة بتدينا كل المواد لغاية تالته ابتدائى وكانت اسمها ابلة صفية وكانت بنتها معانا فى نفس الفصل وكانت بتشبهنى قوى لدرجة انهم كانو مسمينا التؤام ومعظم المدرسين كانو يتكلمو معايا على اساس انى بنتها والصدفة الاكبر ان بنتها كان اسمها نفس اسمى فتخيلو بقى اتنين تؤام وليهم نفس الاسم كنا مميزين جدا فى المدرسة لاننا كنا رايحين جايين مع بعض وكنا كمان بنحى العلم وكنت فى فريق الموسيقى الى بيعزفو الاغانى الوطنية فى الطابور واشتركت كتير فى الاذاعة المدرسية

وكان فى راجل كبير فاتح كشك صغير وبيبيع لب ودوم ومصاصة وكانت فعلا فى ست كبيرة بتيع جزراحمر بالجذور الخضرا الى فيه وكان لازم واساسى انى يوميا اشترى جزر وناكله واحنا مروحين انا واصحابى

مش عارفه ليه و انا بقرأ كلامك في الجزء ده كنت حاسه اني شايفاكي و انتي بتحكي و بتتكلمي بسرعه و مبسوطه و بتسابقي الكلام و انتي بتحكيه

بجد ذكريات جميله جداً عندك حق لما قلتي انها اجمل ايام العمر فعلاً

أنا كمان لحد انهرضه بكون سعيده جداً لما بروح البلد و تتاح ليا الفرصه اني امشي جمب مدرستي الثانويه بالذات

لكن طبعا دي مرات معدوده يمكن بحكم الغربه و اني على طول بعيد

الحمد لله على كل حال

شكراً بجد انك شاركتينا ذكرياتك و ابداً مكنش في إطاله .. بالعكس .. ياريت كل ما تفتكري حاجه تانيه تشاركينا بيها

تحياتي

[زهرة الجبل]

الفاضلة زهرة الجبل

بالله بادعيلك من كل قلبي ربنا يجازيكي كل خير إنتي و كل اللي شاركوا في هذا التوبيك يااااااااااااااااااااااه دا انا حسيت باحساس جميل فوق الوصف و إنتي بتفكريني بالأيام دي و الله جسمي قشعر لما شوفت الصور و رغم ظروف عملي التي أبعدتني عن المشاركة في المحاورات منذ فترة لكني لم أستطع أن اقرأ هذا الموضوع بدون مشاركة لجمال معناه و قربه لنفسي .

لي كثير من الذكريات الجميلة التي لا يمكن أن أنساها و لكن الأجمل هو الاتفاق معكم على أن هذا التعليم البسيط جدا جدا كان في مجمله أروع منظومة علمتنا كيف نحترم المعلم و علمت المعلم كيف يحترم علمه وقت خسرنا تلك المنظومة للأسف خسرنا كل شيء

لي عودة بإذن الله

مرة أخرى جزاكي الله كل خير

الأخ الفاضل عادل ابو عمر

شكراً جزيلاً على الدعاء ربنا يتقبله منك و يجعل لك مثله و زياده

و الحقيقه ان انا الأسعد و الله بمعرفة تأثير قراءة هذا الموضوع على حضرتك و على كل الأخوه و الاخوات الأفاضل هنا و الفضليات

و سعيده اني كنت سبب اننا نشوف حضرتك مشارك هنا مره اخرى رغم ظروف عملك .. أعانك الله

و تخيل حضرتك و الله حتى انا عندما اقرأ المشاركات هنا فكل تفصيله يذكرها من يقرأ لموضوع تذكرني بمثلها عندي ما كنت اتخيل انها مازالت في طي ذاكرتي

و أتفق مع حضرتك تماماً ان هذه المنظومه القديمه على بساطتها في وقتها لكنها أعتطتنا الكثير و الكثير مما عجزت الهيئه التعليميه الحاليه عن توفيره لأولادنا

لكن إن شاء الله في ظل الظروف الجديده أنا عندي أمل غن القادم أفضل

بإذن الله

شكراً لحضرتك مره اخرى للدعاء

جزانا الله الخير و إياكم و شكراً للمشاركه القيمه

تحياتي

أم كريم